𑐣𑐾. 𑐳𑑄. 𑑑𑑑𑑔𑑓 𑐟𑐕𑐮𑐵𑐐𑐵 𑐡𑐸𑐟𑐶𑐫𑐵 -

𑐦𑑀𑐣𑐶𑐖 𑐧𑐵𑐐𑐩𑐟𑐶𑐫𑐵 𑐣𑑂𑐫𑐵𑐎𑑂𑐰𑑅𑐐𑐸 𑐥𑑂𑐬𑐵𑐡𑐾𑐱𑐶𑐎 𑐨𑐾𑐮𑐵

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 (𑐦𑑀𑐣𑐶𑐖) 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 (𑐣𑐾𑐰𑐵𑑅–𑐟𑐵𑐩𑑂𑐳𑐵𑐮𑐶𑐒) 𑐫𑐵 𑐣𑑂𑐫𑐵𑐎𑑂𑐰𑑅𑐐𑐸 𑐥𑑂𑐬𑐵𑐡𑐾𑐱𑐶𑐎 𑐨𑐾𑐮𑐵 𑐔𑐶𑐟𑐰𑐣𑐫𑑂 𑐎𑑂𑐰𑐔𑐵𑐮 𑑋 𑐔𑐶𑐟𑐰𑐣𑐫𑐵 𑐬𑐵𑐥𑑂𑐟𑐷 𑐣𑐐𑐬𑐥𑐵𑐮𑐶𑐎𑐵𑐳𑑂𑐠𑐶𑐟 𑐎𑐺𑐲𑐶 𑐰𑐶𑐎𑐵𑐳 𑐟𑐵𑐮𑐶𑐩 𑐎𑐾𑐣𑑂𑐡𑑂𑐬𑐫𑑂 𑐄𑐐𑐸 𑐥𑑂𑐬𑐵𑐡𑐾𑐱𑐶𑐎 𑐨𑐾𑐮𑐵 𑐖𑐹𑐐𑐸 𑐏𑑅 𑑋

‘𑐥𑐴𑐶𑐔𑐵𑐣 𑐰 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐳𑐩𑐵𑐰𑐾𑐱𑐷 𑐳𑑄𑐔𑐵𑐬 𑐋𑐣 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞, 𑐳𑑄𑐰𑐶𑐢𑐵𑐣 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐁𑐢𑐵𑐬’ 𑐢𑐂𑐐𑐸 𑐣𑐵𑐬𑐵 𑐧𑐶𑐫𑐵𑑅 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐣𑐶𑐣𑑂𑐴𑐸𑐫𑑄𑑄𑐎𑑄𑐫𑐵 𑐨𑐾𑐮𑐵𑑄 𑐠𑑂𑐰 𑐴𑐾 𑐦𑐵𑐐𑐸𑐣 𑑒𑑗 𑐰 𑑒𑑘 𑐐𑐟𑐾 𑐳𑐬𑑂𑐮𑐵𑐴𑐷𑐂 𑐖𑐹 𑐰𑐣𑐵𑐔𑑂𑐰𑑄𑐐𑐸 𑐦𑑀𑐣𑐶𑐖𑐫𑐵 𑐰𑐶𑐢𑐵𑐣 𑐀𑐢𑐶𑐰𑐾𑐱𑐣𑐫𑐵 𑐣𑐶𑑄𑐟𑐶𑑄 𑐳𑐸𑐗𑐵𑐰𑐟 𑐥𑐾𑐱 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐨𑐾𑐮𑐵𑑄 𑐳𑐎𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬𑐟𑐫𑑂 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶𑐫𑐵 𑐣𑐶𑑄𑐟𑐶𑑄 𑐥𑑂𑐬𑐡𑐾𑐱𑐫𑐵 𑐡𑐎𑑂𑐰𑑄 𑐖𑐶𑐮𑑂𑐮𑐵𑐫𑑂 ‘𑐧𑐵𑐐𑐩𑐟𑐶 𑐦𑐵𑐣𑐶𑐖 𑐖𑐵𑐐𑐬𑐞’ 𑐀𑐨𑐶𑐫𑐵𑐣𑐫𑐵 𑐬𑐸𑐥𑐫𑑂 𑐥𑑂𑐬𑐱𑐶𑐎𑑂𑐲𑐞 𑐟𑐵𑐮𑐶𑐩 𑐳𑑄𑐔𑐵𑐮𑐣 𑐫𑐵𑐫𑐾𑐐𑐸 𑐣𑑄 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐡𑐸 𑑋

𑐬𑐵𑐥𑑂𑐟𑐷 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐱𑐩𑐱𑐾𑐬 𑐮𑐵𑐩𑐵𑐫𑐵 𑐥𑑂𑐬𑐩𑐸𑐏 𑐁𑐟𑐶𑐠𑑂𑐫𑐟𑐵𑐫𑑂 𑐖𑐹𑐐𑐸 𑐨𑐾𑐮𑐵𑐫𑑂 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐄𑐥𑐥𑑂𑐬𑐩𑐸𑐏 𑐡𑐾𑐰𑐾𑐣 𑐮𑐵𑐩𑐵, 𑐦𑑀𑐣𑐶𑐖𑐫𑐵 𑐳𑑄𑐑𑐷𑐫 𑐳𑐔𑐶𑐰 𑐳𑐩𑐶𑐬 𑐧𑐮𑐵𑐩𑐷, 𑐳𑑄𑐑𑐷𑐫 𑐳𑐡𑐳𑑂𑐫𑐮𑐶𑐳𑐾𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐂𑐣𑑂𑐔𑐵𑐬𑑂𑐖 𑐥𑐾𑐩𑐵 𑐮𑐵𑐩𑐵, 𑐬𑐵𑐥𑑂𑐟𑐷 𑐣𑐐𑐬𑐥𑐵𑐮𑐶𑐎𑐵 𑑕 𑐰𑐜𑐵𑐀𑐢𑑂𑐫𑐎𑑂𑐲 𑐳𑐶𑐟𑐵𑐬𑐵 𑐧𑐮 𑐟𑐵𑐩𑐵𑐒, 𑐣𑐾𑐥𑐵𑐮 𑐟𑐵𑐩𑐵𑐒 𑐑𑐾𑐡𑐸𑐒𑐫𑐵 𑐳𑑄𑐑𑐷𑐫 𑐳𑐔𑐶𑐰 𑐐𑑀𑐥𑐵𑐮 𑐳𑐶𑑄𑐴 𑐮𑐵𑐩𑐵, 𑐦𑑀𑐣𑐶𑐖 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐳𑐮𑑂𑐮𑐵𑐴𑐎𑐵𑐬 𑐎𑐺𑐲𑑂𑐞 𑐳𑐵𑐬𑐸 𑐩𑐐𑐬, 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑 𑐔𑐶𑐟𑐰𑐣 𑐖𑐶𑐮𑑂𑐮𑐵 𑐀𑐢𑑂𑐫𑐎𑑂𑐲 𑐩𑐴𑐾𑐣𑑂𑐡𑑂𑐬 𑐡𑐸𑐬𑐵, 𑐠𑐵𑐬𑐸 𑐥𑐟𑑂𑐬𑐎𑐵𑐬 𑐳𑑄𑐑 𑐔𑐶𑐟𑐰𑐣𑐫𑐵 𑐀𑐢𑑂𑐫𑐎𑑂𑐲 𑐡𑐶𑐥𑐾𑐱 𑐠𑐵𑐬𑐸, 𑐟𑐵𑐩𑐵𑐒 𑐥𑐟𑑂𑐬𑐎𑐵𑐬 𑐳𑑄𑐑 𑐔𑐶𑐟𑐰𑐣 𑐱𑐵𑐏𑐵 𑐳𑐔𑐶𑐰 𑐥𑑂𑐬𑐎𑐵𑐱 𑐟𑐵𑐩𑐵𑐒, 𑐳𑐩𑐵𑐖𑐰𑐵𑐡𑐷 𑐥𑐾𑑂𑐬𑐳 𑐳𑑄𑐐𑐛𑐣𑐫𑐵 𑐎𑑀𑐲𑐵𑐢𑑂𑐫𑐎𑑂𑐲 𑐧𑐧𑐶𑐮𑐵𑐮 𑐟𑐵𑐩𑐵𑐒𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐦𑑀𑐣𑐶𑐖 𑐖𑐶𑐮𑑂𑐮𑐵 𑐱𑐵𑐏𑐵 𑐡𑑀𑐮𑐏𑐵𑐫𑐵 𑐥𑐸𑐮𑐵𑑄𑐩𑑂𑐴 𑐡𑐸𑐖𑑅 𑐱𑐾𑐬𑐧𑐴𑐵𑐡𑐸𑐬 𑐨𑐸𑐖𑐾𑐮 𑐩𑐟𑑂𑐫𑐰𑑄 𑐩𑐡𑐸𑐐𑐸𑐮𑐶𑑄 𑐡𑐸𑑅𑐏 𑐥𑑂𑐰𑑄𑐎𑐳𑐾 𑐱𑑀𑐎 𑐥𑑂𑐬𑐳𑑂𑐟𑐵𑐰 𑐣𑑄 𑐥𑐵𑐬𑐶𑐟 𑐫𑐵𑑅𑐐𑐸 𑐡𑐸𑐳𑐵 𑐨𑐾𑐮𑐵𑑄 𑑑𑑓 𑐐𑐹 𑐧𑐸𑑃𑐡𑐵𑐫𑐵 𑐬𑐵𑐥𑑂𑐟𑐷 𑐑𑑀𑐲𑐞𑐵𑐥𑐟𑑂𑐬 𑐣𑑄 𑐖𑐵𑐬𑐷 𑐫𑐵𑑅𑐐𑐸 𑐡𑐸 𑑋