𑐌𑐮𑐷𑐫𑐵 𑐢𑐵𑐥𑐸𑐟𑐶𑑄 𑐣𑑂𑐴𑐹𑐐𑐸 𑐥𑐬𑐶𑐳𑑂𑐠𑐶𑐟𑐶
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮𑑄 𑐰𑑄𑐐𑐸 𑐥𑐸𑐳 𑑒𑑖 𑐐𑐟𑐾𑐫𑐵 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐧𑐿𑐛𑐎𑐫𑑂 𑐊𑐩𑐵𑐮𑐾𑐫𑐵 𑐀𑐢𑑂𑐫𑐎𑑂𑐲 𑐎𑐾𑐥𑐷 𑐱𑐬𑑂𑐩𑐵 𑐌𑐮𑐷𑑄 𑐳𑑄𑐳𑐡 𑐰𑐶𑐑𑐚𑐣 𑐥𑐵𑐫𑑂𑐕𑐶 𑐏𑑅 𑐢𑐎𑐵𑑅 𑐢𑐵𑑅𑐐𑐸𑐮𑐶𑑄 𑐴𑐾 𑐩𑐵𑐌𑐰𑐵𑐡𑐷𑑄 𑐣𑑂𑐴𑐹𑐐𑐸 𑐰𑐶𑐎𑐮𑑂𑐥 𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐄𑐩𑑂𑐩𑐾𑐡𑐰𑐵𑐬 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳𑐫𑐵 𑐣𑐾𑐟𑐵 𑐬𑐵𑐩𑐔𑐣𑑂𑐡𑑂𑐬 𑐥𑑁𑐜𑐾𑐮𑐫𑐵𑐟 𑐟𑑂𑐫𑐵𑐎𑐾𑐟 𑐧𑐶𑐴𑐷𑐰𑐵𑑅 𑐔𑑂𑐫𑐵𑐐𑐹 𑐡𑐮𑐷𑐫 𑐳𑐵𑑄𑐳𑐡𑐟𑐫𑑂 𑐨𑐾𑐮𑐵𑐫𑐵𑐟 𑐳𑐩𑑂𑐧𑑀𑐢𑐣 𑐫𑐵𑐳𑐾𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐠𑑂𑐰 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 ‘𑐌𑐮𑐷𑐫𑐵 𑐧𑐶𑐔𑐵𑑅 𑐣𑑂𑐫𑐣𑐾𑐢𑐸𑑄𑐎𑐵𑑅 𑐖𑐶𑐩𑐶𑐟 𑐳𑑀𑐔𑐾 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐣𑐵𑐧𑐶𑐮’, 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋
𑐳𑐩𑑂𑐧𑑀𑐢𑐣𑐫𑐵 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐖𑐶𑐐𑐸 𑐣𑐶𑑄𑐟𑐶𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐡 𑐟𑑅𑐢𑑄𑐐𑐸 𑐏𑑃 𑐩𑐏𑐸, 𑐳𑑄𑐰𑐶𑐢𑐵𑐣 𑐰 𑐮𑑀𑐎𑐟𑐣𑑂𑐟𑑂𑐬𑐫𑐵 𑐬𑐎𑑂𑐲𑐵 𑐟𑑅𑐢𑑄𑐐𑐸 𑐏𑑃 𑐏𑑅 𑑋 𑐥𑐸𑐳 𑑒𑑖 𑐐𑐟𑐾 𑐳𑑄𑐳𑐡𑐫𑑂 𑐖𑐶𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐬𑐸𑐥𑐫𑑂 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐎𑐫𑐵𑐔𑑂𑐰𑐣𑐵𑐐𑐸 𑐂𑐮𑐫𑑂 𑐌𑐮𑐷𑐖𑐸𑑄 𑐳𑑄𑐳𑐡𑐫𑑂 𑐐𑐸𑐐𑐸 𑐣𑑂𑐰𑐰𑐵𑐣𑐵𑐡𑐶𑐮, 𑐄𑐎𑐶𑑄 𑐩𑐣𑐫𑑂 𑐔𑐳𑐎𑑂𑐎 𑐖𑐸𑐮 𑑋 𑐖𑐶𑐥𑐶𑑄 𑐳𑑄𑐳𑐡𑑂 𑐰𑐶𑐑𑐚𑐣𑐫𑐵 𑐰𑐶𑐥𑐎𑑂𑐲𑐫𑑂 𑐡𑐸𑐥𑐶𑑄 𑐏𑑅, 𑐀𑐮𑐾 𑐟𑑅𑐢𑑄𑐐𑐸 𑐳𑑄𑐑𑐬𑑂𑐲 𑐫𑐵𑐣𑐵𑑅 𑐳𑑄𑐳𑐡𑑂 𑐮𑐶𑐟 𑐴𑐫𑐵𑐐𑐸 𑐏𑑅 𑑋 𑐟𑐬 𑐰𑐫𑑂𑐎𑐮𑑄 𑐳𑑄𑐳𑐡 𑐰𑐶𑐑𑐚𑐣 𑐥𑐵𑐫𑑂𑐕𑐶 𑐢𑐵𑐫𑐵𑐧𑐶𑐮, 𑐠𑐸𑐎𑐶𑑄 𑐖𑐶𑐩𑐶𑐟 𑐳𑑀𑐔𑐾 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐣𑐵𑐧𑐶𑐮 𑑋 𑐳𑑄𑐰𑐶𑐢𑐵𑐣 𑐰 𑐮𑑀𑐎𑐟𑐣𑑂𑐟𑑂𑐬 𑐰𑐶𑐬𑐸𑐡𑑂𑐢 𑐖𑐶𑐥𑐶𑑄 𑐰𑐣𑐾𑐐𑐸 𑐖𑐸𑐂𑐩𑐏𑐸, 𑐀𑐠𑐾 𑐖𑐸𑐫𑐵𑑅 𑐣𑑂𑐴𑐹𑐐𑐸 𑐥𑐬𑐶𑐳𑑂𑐠𑐶𑐟𑐶 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋 𑐳𑑄𑐰𑐶𑐢𑐵𑐣 𑐰 𑐮𑑀𑐎𑐟𑐣𑑂𑐟𑑂𑐬𑐫𑐵 𑐬𑐎𑑂𑐲𑐵𑐫𑐵 𑐣𑐶𑐟𑐶𑑄 𑐴𑐵𑐎𑐣𑑄 𑐖𑐶𑐥𑐶𑑄 𑐕𑐠𑐵𑐫𑑂 𑐔𑑂𑐰𑐣𑐵𑐐𑐸 𑐡𑐸 𑑋’
𑐄𑐎𑐠𑑄 𑐴𑐾 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐬𑐵𑐲𑑂𑐚𑑂𑐬𑐥𑐟𑐶 𑐳𑑄𑐰𑐶𑐢𑐵𑐣, 𑐮𑑀𑐎𑐟𑐣𑑂𑐟𑑂𑐬𑐫𑐵 𑐬𑐎𑑂𑐲𑐎 𑐰 𑐬𑐵𑐲𑑂𑐚𑑂𑐬𑐫𑐵 𑐀𑐨𑐶𑐨𑐵𑐰𑐎 𑐖𑐹𑐳𑐵𑑄 𑐰𑑄𑐐𑐸 𑐂𑐮𑐫𑑂 𑐀𑐠𑐾 𑐩𑐖𑐹𑐐𑐸 𑐣𑑂𑐴𑑂𑐫𑐠𑑃𑐳𑐾𑑄 𑐐𑐛𑐧𑐣𑑂𑐢𑐣𑐥𑐵𑐏𑐾𑑄 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐄𑐩𑑂𑐩𑐾𑐡𑐰𑐵𑐬 𑐖𑐸𑐫𑐵𑐡𑐷𑐩𑑂𑐴 𑐥𑑁𑐜𑐾𑐮𑐫𑐵𑐟 𑐎𑐫𑐵𑑅 𑐢𑐫𑐵𑐡𑐶𑐮, ‘𑐠𑐸𑐐𑐸𑐳𑐷 𑐖𑐶𑐩𑐶𑐳𑑄 𑐳𑑄𑐰𑐶𑐢𑐵𑐣𑐫𑐵 𑐩𑐴𑐟𑑂𑐰 𑐰 𑐀𑐣𑑂𑐟𑐬𑑂𑐫 𑐠𑐹𑐩𑑂𑐴, 𑐮𑑀𑐎𑐟𑐣𑑂𑐟𑑂𑐬𑐫𑐵 𑐣𑐶𑐟𑐶𑑄 𑐟𑐵𑑅 𑐃
𑐎 𑐳𑑄𑐑𑐬𑑂𑐲 𑐫𑐵𑑅𑐩𑑂𑐴 𑐣𑐶𑐲𑑂𑐛𑐵𑐰𑐵𑐣 𑐣𑐾𑐟𑐵 𑐄𑐩𑑂𑐩𑐾𑐡𑐰𑐵𑐬 𑐡𑐫𑐾𑐎𑐵𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐳𑑄𑐰𑐶𑐢𑐵𑐣 𑐰 𑐮𑑀𑐎𑐟𑐣𑑂𑐟𑑂𑐬𑐫𑐵 𑐬𑐎𑑂𑐲𑐵𑐫𑐵 𑐣𑐶𑐟𑐶𑑄 𑐀𑐨𑐶𑐨𑐵𑐰𑐎𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐷 𑐢𑐫𑐵𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋’
𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐫𑐾𑐐𑐸 𑐗𑑂𑐰𑐮𑐫𑑂 𑐎𑐵𑑄𑐐𑑂𑐬𑐾𑐳𑐫𑐵 𑐳𑐨𑐵𑐥𑐟𑐶 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵𑑄 𑐬𑐵𑐲𑑂𑐚𑑂𑐬𑐥𑐟𑐶𑐂 𑐬𑐵𑐩𑐔𑐣𑑂𑐡𑑂𑐬 𑐥𑑁𑐜𑐾𑐮𑐫𑐵𑐟 𑐟𑑂𑐫𑐵𑐎𑐮 𑐢𑐵𑑅𑐳𑐵 𑐣𑑂𑐴𑐵𑐥𑐵 𑐠𑐾𑑄 𑐳𑑄𑐰𑐶𑐢𑐵𑐣 𑐏𑐸𑐂𑐐𑐸 𑐖𑑀𑐏𑐶𑐩 𑐩𑐰𑐂𑐐𑐸 𑐡𑐵𑐰𑐷 𑐫𑐵𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐁𑑅 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐣𑐶𑑄𑐟𑐶𑑄 𑐥𑑁𑐜𑐾𑐮 𑐴𑐾 𑐡𑐎𑐮𑐫𑑂 𑐫𑑀𑐐𑑂𑐫 𑐰 𑐄𑐥𑐫𑐸𑐎𑑂𑐟 𑐄𑐩𑑂𑐩𑐾𑐡𑐰𑐵𑐬 𑐖𑐹𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐢𑐫𑐵𑐡𑐷𑐐𑐸 𑐡𑐸, ‘𑐰𑑄𑐐𑐸 𑐂𑐮𑐫𑑂 𑐬𑐵𑐲𑑂𑐚𑑂𑐬𑐥𑐟𑐶𑐥𑐵𑐏𑐾𑑄 𑐳𑑄𑐰𑐶𑐢𑐵𑐣𑐫𑐵 𑐬𑐎𑑂𑐲𑐎𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐹𑐐𑐸 𑐀𑐣𑐸𑐨𑐹𑐟𑐶 𑐫𑐵𑐫𑐾𑐩𑐦𑐸𑐟 𑑋 𑐁𑑅 𑐥𑑁𑐜𑐾𑐮𑐖𑐸 𑐬𑐵𑐲𑑂𑐚𑑂𑐬𑐥𑐟𑐶 𑐖𑐸𑐮 𑐢𑐵𑑅𑐳𑐵 𑐀𑐖𑑂𑐫𑐵𑑅𑐐𑐸 𑐖𑑀𑐏𑐶𑐩 𑐖𑐸𑐂𑐩𑐏𑐸 𑑋’
LEAVE YOUR COMMENTS