𑐨𑐸𑐏𑐵𑐔𑑄 𑐡𑐸𑑄𑐐𑐸 𑐕𑐾𑑃𑐫𑑂 𑐮𑑂𑐴𑐵𑐣𑐵𑐔𑑂𑐰𑑄𑐩𑑂𑐴 𑐣𑐎𑐟𑐶𑐣𑐶 𑐧𑐹𑐩𑑂𑐴 𑐩𑐔𑐵𑐫𑐵 𑐄𑐡𑑂𑐢𑐵𑐬
𑐊𑐖𑐾𑐣𑑂𑐳𑐷- 𑐳𑐶𑐬𑐶𑐫𑐵𑐫𑑂 𑐨𑐸𑐏𑐵𑐔𑑄 𑐫𑐵𑐣𑐵𑑅 𑐕𑐾𑑃 𑐡𑐸𑐣𑐵𑑅 𑐮𑑂𑐴𑐵𑐣𑐵𑐔𑑂𑐰𑑄𑐩𑑂𑐴 𑐕𑐩𑑂𑐴 𑐣𑐎𑐟𑐶𑐣𑐶 𑐧𑐹𑐩𑑂𑐴 𑐴𑑂𑐫𑐵𑐄𑑃𑐩𑐔𑐵𑐫𑐵 𑐄𑐡𑑂𑐢𑐵𑐬 𑐖𑐹𑐐𑐸 𑐡𑐸 𑑋 𑐚𑐬𑑂𑐎𑐶 𑐰 𑐳𑐶𑐬𑐶𑐫𑐵𑐫𑑂 𑐳𑑀𑐩𑐰𑐵𑑅 𑐧𑑂𑐰𑑅𑐐𑐸 𑐨𑐸𑐏𑐵𑐔𑑄 𑐫𑐵𑐣𑐵𑑅 𑐕𑐾𑑃𑐫𑑂 𑐡𑐸𑑄𑐐𑐸 𑐏𑑅 𑑋 𑐕𑐩𑑂𑐴 𑐥𑑂𑐰𑐵𑐠𑐫𑑂 𑐡𑐸𑐩𑑂𑐴 𑐩𑐶𑐳𑐵𑑄 𑐕𑐾𑑃𑐫𑑂 𑐮𑑂𑐴𑐵𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐴𑐾 𑐄𑐩𑑂𑐴 𑐩𑐔𑐵 𑐧𑐸𑐂𑐎𑐹𑐐𑐸 𑐀𑐣𑐸𑐩𑐵𑐣 𑐡𑐸 𑑋 𑐩𑐔𑐵𑐫𑐵 𑐩𑐵𑑄𑐩𑑂𑐴 𑐢𑐵𑑅𑐳𑐵 𑐳𑐷𑐢𑐸𑑄𑐎𑐹𑐐𑐸 𑐡𑐸 𑑋
𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑐟𑐫𑑂𑐳𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑐨𑐸𑐏𑐵𑐔𑑄 𑐫𑐵𑐣𑐵𑑅 𑐣𑑂𑐫𑐵𑐐𑐹 𑐟𑐮𑑂𑐮𑐵 𑐡𑐸𑐐𑐸 𑐕𑐾𑑃 𑐡𑐸𑐣𑐵𑑅 𑐮𑑂𑐴𑐵𑐣𑐵𑑅 𑐔𑑂𑐰𑑄𑐩𑑂𑐴 𑐩𑐔𑐵𑐫𑐵 𑐄𑐡𑑂𑐢𑐵𑐬 𑐖𑐹𑐐𑐸 𑐏𑑅 𑑋 𑐩𑐔𑐵𑐫𑐵 𑐩𑐵𑑄, 𑐀𑐧𑐸 𑐰 𑐩𑐾𑐥𑐶 𑐕𑐾𑑃𑐖𑑅 𑐢𑐵𑑅𑐳𑐵 𑐕𑐾𑑃𑐫𑑂 𑐮𑑂𑐴𑐵𑐣𑐵𑑅 𑐳𑐷𑐐𑐸 𑐏𑑅 𑑋 𑐩𑐔𑐵𑐫𑐵𑐟 𑐮𑐶𑐎𑐵𑐐𑐸 𑐨𑐶𑐜𑐶𑐫𑑀 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 𑐡𑐸 𑑋 𑐨𑐸𑐏𑐵𑐫𑑂 𑐧𑑂𑐰𑑅𑐐𑐸 𑑓𑑐 𑐑𑑁 𑐮𑐶𑐥𑐵 𑐩𑐔𑐵𑐫𑐵 𑐄𑐡𑑂𑐢𑐵𑐬 𑐖𑐹𑐐𑐸 𑐏𑑅 𑑋 𑐩𑐔𑐵𑐫𑐵 𑐀𑐰𑐳𑑂𑐠𑐵 𑐳𑑂𑐠𑐶𑐬 𑐖𑐹𑐐𑐸 𑐳𑐩𑐵𑐔𑐵𑐬 𑐳𑑄𑐳𑑂𑐠𑐵 𑐊𑐊𑐦𑐥𑐷𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐏𑑂𑐰𑐵𑐄𑑃𑐐𑐸 𑐎𑐵𑐬𑐞𑑄 𑐩𑐔𑐵𑐫𑐵𑐟 𑐴𑐵𑐂𑐥𑑀𑐠𑐬𑑂𑐩𑐶𑐫𑐵 𑐖𑐹𑐐𑐸 𑐡𑐸 𑑋 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮𑐫𑑂 𑐠𑐖𑑂𑐫𑐵𑑅𑐐𑐸 𑐫𑐎𑑂𑐰 𑐴𑐾 𑐄𑐡𑑂𑐢𑐵𑐬𑐫𑐵 𑐥𑐷𑐜𑐵𑐡𑐵𑐫𑐷 𑐨𑐶𑐜𑐶𑐫𑑀 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐳𑐷𑐥𑐶𑐣𑐶 𑐮𑑂𑐫𑐵𑑅 𑐀𑐥𑑂𑐰𑐫𑐵𑐔𑑂𑐰𑐣
𑐨𑐸𑐏𑐵𑐔𑐫𑑂 𑐮𑐵𑑅𑐥𑐶𑐣𑐶 𑐄𑐡𑑂𑐢𑐵𑐬𑐫𑐵 𑐖𑑂𑐫𑐵 𑐩𑐡𑐶𑐎𑑂𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐷𑐠𑐷 𑐡𑐾𑐱𑐫𑐵 𑐄𑐡𑑂𑐢𑐵𑐬𑐎𑐬𑑂𑐟𑐵𑐟 𑐚𑐬𑑂𑐎𑐷 𑐰 𑐳𑐶𑐬𑐶𑐫𑐵𑐫𑑂 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐄𑐡𑑂𑐢𑐵𑐬𑐫𑐵 𑐎𑑂𑐬𑐩 𑐖𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐶𑐐𑐸𑐮𑐶𑑄 𑐡𑐾𑐱𑐫𑑂 𑐫𑐵𑐣𑐵𑑅 𑐳𑐷𑐥𑐶𑐣𑐶 𑐮𑑂𑐫𑐵𑑅 𑐐𑐸𑐡𑑂𑐰𑑅 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐚𑐬𑑂𑐎𑐷𑐂 𑐖𑐎 𑑖𑑒𑑐𑑐 𑐩𑑂𑐴𑑄 𑐩𑐮𑑂𑐫𑐵𑐎 𑐩𑐣𑐹𑐟 𑐳𑐷𑐐𑐸 𑐡𑐸𑐳𑐵 𑐳𑐶𑐬𑐶𑐫𑐵𑐫𑑂 𑐁𑑅𑐟𑐎 𑑒𑑕𑑐𑑐 𑐩𑑂𑐴 𑐳𑐶𑐧𑐾𑑄 𑐀𑐥𑑂𑐰 𑐩𑐣𑐹𑐟 𑐳𑐷𑐢𑐸𑑄𑐎𑐹𑐐𑐸 𑐧𑐶𑐧𑐶𑐳𑐷𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐰𑐶𑐱𑑂𑐰 𑐳𑑂𑐰𑐵𑐳𑑂𑐠𑑂𑐫 𑐳𑑄𑐐𑐛𑐣𑑄 𑐠𑑂𑐰 𑐨𑐸𑐏𑐵𑐔𑐫𑑂 𑐮𑐵𑐣𑐵𑑅 𑑒𑑐 𑐡𑑂𑐰𑑅 𑐩𑐣𑐹𑐟 𑐳𑐷𑐐𑐸 𑐀𑐣𑐸𑐩𑐵𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋
𑐔𑐶𑐎𑐸𑐮𑐵𑐫𑐵 𑐩𑑁𑐳𑐩 𑐖𑐹𑐐𑐸𑐮𑐶𑑄 𑐟𑐳𑐎𑑄 𑐏𑑂𑐰𑐵𑐄𑑃𑐳𑐾 𑐔𑑂𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐄𑐡𑑂𑐢𑐵𑐬 𑐫𑐵𑐫𑐾𑐟 𑐣𑑄 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐕𑐾𑑄 𑐮𑑂𑐴𑐵𑐣𑐵𑐔𑑂𑐰𑐥𑐶𑑄 𑐩𑐵𑐮𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐨𑐸𑐏𑐵𑐔𑑄 𑐫𑐵𑐣𑐵𑑅 𑐏𑐸𑐡𑑂𑐰𑐮𑑄 𑐩𑐮𑑂𑐫𑐵𑐎 𑐨𑐰𑐣 𑐡𑐸𑑄𑐐𑐸 𑐡𑐸 𑑋
𑐨𑐸𑐏𑐵𑐫𑑂 𑐎𑐬 𑐰𑐶𑐬𑐸𑐡𑑂𑐢 𑐖𑐣𑐟𑐵 𑐟𑐩𑑂𑐰𑐮
𑐠𑑂𑐰 𑐴𑐾 𑐡𑐠𑐸𑐂 𑐚𑐬𑑂𑐎𑐷 𑐳𑐬𑐎𑐵𑐬 𑐣𑐶𑐐𑐹 𑐡𑐱𑐎 𑐣𑑂𑐴𑑂𑐫𑐰𑐣𑐶𑐳𑐾𑑄 𑐎𑐫𑐵𑐰𑐫𑐵𑐔𑑂𑐰𑑄𑐐𑐸 𑐨𑐸𑐏𑐵𑐫𑑂 𑐎𑐬 𑐳𑐬𑐎𑐵𑐬𑑄 𑐐𑐣 𑐏𑐬𑑂𑐔 𑐫𑐵𑐣𑐵𑐔𑑂𑐰𑐣 𑐢𑐎𑐵𑑅 𑐖𑐣𑐟𑐵𑑄 𑐣𑑂𑐴𑑂𑐫𑐳𑑅 𑐠𑐣𑐵𑐴𑑅𑐐𑐸 𑐡𑐸 𑑋 𑐨𑐸𑐏𑐵𑐫𑑂 𑐎𑐬𑐫𑐵𑐟 𑐎𑐫𑐵𑑅 𑐚𑐬𑑂𑐎𑐷𑐫𑐵 𑐖𑐣𑐟𑐵 𑐟𑑄𑐩𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐣𑐸𑐩𑐵𑐣𑐶𑐟 𑑘𑑘 𑐧𑐶𑐮𑐶𑐫𑐣 𑐮𑐶𑐬𑐵 (𑑔.𑑖 𑐀𑐬𑑂𑐧 𑐀𑐩𑐾𑐬𑐶𑐎𑐷 𑐜𑐮𑐬) 𑐥𑑂𑐬𑐎𑑀𑐥 𑐬𑑀𑐎𑐠𑐵𑐩 𑐰 𑐁𑐥𑐟𑐎𑐵𑐮𑐷𑐣 𑐳𑐾𑐰𑐵𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐏𑐬𑑂𑐔 𑐖𑐸𑐂𑐩𑐵𑑅𑐐𑐸 𑐏𑑅, 𑐟𑐬 𑐠𑑂𑐰 𑐏𑐬𑑂𑐔 𑐐𑐣 𑐖𑐸𑐫𑐵𑐔𑑂𑐰𑐣 𑐢𑐫𑐵𑐐𑐸 𑐏𑑃 𑐚𑐬𑑂𑐎𑐷 𑐳𑐬𑐎𑐵𑐬𑑄 𑐩𑐢𑐵𑑅𑐣𑐶𑐐𑐸 𑐧𑐶𑐧𑐶𑐳𑐷𑑄 𑐢𑐵𑑅𑐐𑐸 𑐡𑐸 𑑋
𑐀𑐢𑐶𑐎𑐵𑐬𑐷𑐟𑐫𑑂𑐳𑑄 𑐠𑐸𑐎𑐶𑐫𑐵𑐟 𑐰𑐶𑐱𑐾𑐲 𑐳𑑄𑐔𑐵𑐬 𑐎𑐬 𑐢𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐣𑑂 𑑑𑑙𑑙𑑙 𑐫𑐵 𑐨𑐸𑐏𑐵𑐫𑑂 𑐮𑐶𑐥𑐵 𑐠𑑂𑐰 𑐎𑐬 𑐎𑐵𑐫𑐾𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐏𑑅, 𑐟𑐬 𑐏𑐬𑑂𑐔 𑐐𑐣 𑐖𑐸𑐫𑐵𑐔𑑂𑐰𑐣 𑐢𑐵𑑅𑐳𑐵 𑐳𑐷𑐩𑐡𑐸𑐣𑐶 𑑋 𑐖𑐣𑐟𑐵𑑄 𑐳𑐣𑑂 𑑑𑑙𑑙𑑙 𑐣𑐶𑐳𑐾𑑄 𑐧𑐶𑐫𑐵𑐔𑑂𑐰𑐣𑐵𑐐𑐸 𑐎𑐬 𑐐𑐣 𑐰𑐣 𑐢𑐎𑐵𑑅 𑐣𑑂𑐴𑑂𑐫𑐳𑑅 𑐟𑐫𑐵𑐔𑑂𑐰𑑄𑐐𑐸 𑐏𑑅 𑑋
LEAVE YOUR COMMENTS