𑐡𑐾𑐫𑑂 𑐡𑐧𑐹𑐫𑐵 𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐲𑐡𑑂𑐫𑐵 𑐩𑐸𑑃𑐖𑑂𑐫𑐵 𑐖𑐸𑐂𑐐𑐸
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑑂𑐴𑐵𑐥𑐵𑑄𑐐𑐸 𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐲𑐡𑑂𑐫𑐵 𑐩𑐸𑑃𑐖𑑂𑐫𑐵 𑐰𑐂𑐐𑐸 𑐱𑐣𑐶𑐰𑐵𑑅 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑐣𑐫𑐵 𑐚𑐾𑐎𑐸𑐂 𑐔𑑂𑐰𑑄𑐐𑐸 𑐩𑐳𑐮𑐵 𑐎𑐚𑐾𑐖𑐫𑑂 𑐄𑐐𑐸 𑐩𑐸𑑃𑐖𑑂𑐫𑐵 𑐖𑐸𑐂 𑑋
𑐠𑐐𑐸𑐣𑐾 𑐔𑐶𑐮𑑂𑐮𑐵𑐐𑐵 𑐊𑐎𑐵𑐡𑐱𑐶 (𑐔𑐿𑐟 𑑑𑑔)𑐣𑐶𑐳𑐾𑑄 𑐳𑑂𑐰𑐣𑑂𑐴𑐸𑐫𑑄𑐎𑑄 𑐢𑐬𑐵𑐣𑐫𑑂 𑐖𑐹𑐐𑐸 𑐣𑑂𑐴𑐫𑑂𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐫𑐾𑐢𑐸𑑄𑐎𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑑂𑐴𑐹𑐐𑐸 𑐰𑐶𑐢𑐵𑐣𑑄 𑐥𑐬𑐶𑐎𑐮𑑂𑐥𑐣𑐵 𑐫𑐵𑑅𑐎𑐠𑑄 𑐐𑐛𑐣 𑐖𑐹𑐐𑐸 𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐲𑐡𑑂𑐫 𑐣𑑂𑐴𑐵𑐥𑐵𑑄𑐐𑐸 𑐩𑐸𑑃𑐖𑑂𑐫𑐵 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋
𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐲𑐡𑐫𑐵 𑐩𑐸𑑃𑐖𑑂𑐫𑐵𑐫𑑂 𑑑𑑐𑑒 𑐩𑑂𑐴 𑐥𑑂𑐬𑐟𑐶𑐣𑐶𑐢𑐶𑑄 𑐧𑑂𑐰𑐟𑐶 𑐎𑐵𑐂𑐐𑐸 𑐏𑑃 𑐡𑐾𑐫𑑂 𑐡𑐧𑐸𑐮𑐶𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐡𑐾𑐫𑑂 𑐡𑐧𑐹𑐫𑐵 𑐎𑐠𑑄 𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐲𑐡𑐫𑑂 𑐎𑐾𑐣𑑂𑐡𑑂𑐬𑐷𑐫 𑐖𑑂𑐫𑐵𑐳𑐣𑐵 𑐥𑐸𑐔𑑅𑐥𑐵𑐏𑐾𑑄 𑑔𑑕𑐩𑑂𑐴, 𑐳𑐮𑑂𑐮𑐵𑐎𑐵𑐬 𑐥𑐸𑐔𑑅𑐥𑐵𑐏𑐾𑑄 𑑑𑑕 𑐩𑑂𑐴, 𑐥𑑂𑐬𑐡𑐾𑐱 𑐳𑐩𑐶𑐟𑐶𑐥𑐵𑐏𑐾𑑄 𑐔𑑂𑐫𑐵𑐩𑑂𑐴, 𑐀𑐢𑑂𑐫𑐎𑑂𑐲𑐥𑐵𑐏𑐾𑑄 𑐩𑐣𑑀𑐣𑐶𑐟 𑐰𑐶𑐲𑐫𑐰𑐶𑐖𑑂𑐘 𑐣𑑂𑐫𑐵𑐩𑑂𑐴, 𑐖𑐵𑐟𑐷𑐫 𑐥𑐬𑐶𑐲𑐡𑑂𑐥𑐵𑐏𑐾𑑄 𑐣𑑂𑐫𑐵𑐩𑑂𑐴 𑐰 𑐔𑑂𑐫𑐵𑐐𑐸𑐮𑐶𑑄 𑐥𑑂𑐬𑐡𑐾𑐱𑑄 𑐮𑑂𑐫𑑅𑐥𑐶𑑄 𑑒𑑓 𑐩𑑂𑐴 𑐰 𑐡𑐾𑐫𑑂 𑐡𑐧𑐹𑐫𑐵 𑐰𑐶𑐲𑐫𑐐𑐟 𑐎𑐰𑑅 (𑐨𑐵𑐟𑐺 𑐳𑑄𑐐𑐛𑐣)𑐫𑐵 𑐣𑐵𑐫𑑅 𑐣𑐵𑐥𑑄 𑐫𑐵𑐣𑐵𑑅 𑑑𑑐𑑒 𑐩𑑂𑐴 𑐥𑑂𑐬𑐟𑐶𑐣𑐶𑐢𑐶𑑄𑑄 𑐧𑑂𑐰𑐟𑐶 𑐎𑐵𑐂 𑑋
𑐟𑑅𑐩𑐸𑑃𑐖𑑂𑐫𑐵 𑐮𑐶𑐥𑐵𑐫𑐵 𑐣𑐶𑐐𑐹𑐐𑐸 𑐟𑑅𑐢𑑄𑐐𑐸 𑐳𑑄𑐬𑐔𑐣𑐵𑐎𑐠𑑄 𑐎𑐫𑐵𑐟𑑅𑐐𑐸 𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐲𑐡𑐫𑐵 𑐩𑐸𑑃𑐖𑑂𑐫𑐵𑐫𑑂 𑐩𑐴𑐵𑐢𑐶𑐰𑐾𑐱𑐣𑐥𑐵𑐏𑐾𑑄 𑐥𑐵𑐬𑐶𑐟 𑐖𑐸𑐫𑐵𑑅 𑐁𑐟𑐎𑐫𑐵 𑐡𑐸𑐣𑐾 𑐫𑐵𑑅𑐐𑐸 𑐖𑑂𑐫𑐵, 𑐰𑐂𑐐𑐸 𑐁𑐬𑑂𑐠𑐶𑐎 𑐡𑑃𑐫𑐵 𑐣𑐶𑑄𑐟𑐶𑑄 𑐧𑐖𑐾𑐚 𑐀𑐣𑐸𑐩𑑀𑐡𑐣 𑐫𑐵𑐫𑐾𑐐𑐸 𑐣𑐵𑐥𑑄 𑐡𑐕𑐶𑐫𑑄𑐎𑑄 𑐖𑐹𑐐𑐸 𑐥𑑂𑐬𑐐𑐟𑐶 𑐰𑐶𑐰𑐬𑐞 𑐰 𑐨𑐵𑐰𑐷 𑐎𑐵𑐬𑑂𑐫𑐫𑑀𑐖𑐣𑐵 𑐥𑐾𑐱 𑐫𑐵𑐣𑐵𑑅 𑐄𑐎𑐶𑐫𑐵𑐟 𑐀𑐣𑐸𑐩𑑀𑐡𑐣 𑐫𑐵𑐂𑐐𑐸 𑐡𑐾𑐫𑑂 𑐡𑐧𑐹𑐮𑐶𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋
𑐀𑐠𑐾 𑐴𑐾 𑐎𑐾𑐣𑑂𑐡𑑂𑐬𑐷𑐫 𑐎𑐵𑐬𑑂𑐫𑐳𑐩𑐶𑐟𑐶𑑄 𑐥𑑂𑐬𑐳𑑂𑐟𑐵𑐰 𑐫𑐵𑐂𑐐𑐸 𑐰𑐶𑐢𑐵𑐣 𑐳𑑄𑐱𑑀𑐢𑐣𑐫𑐵 𑐣𑑄 𑐀𑐣𑐸𑐩𑑀𑐡𑐣 𑐫𑐵𑐂𑐐𑐸 𑐡𑐾𑐫𑑂 𑐡𑐧𑐸𑐮𑐶𑑄 𑐢𑐵𑑅𑐐𑐸 𑐡𑐸 𑑋
LEAVE YOUR COMMENTS