𑐢𑐶𑐩𑐾 𑐰 𑐥𑑄𑐔𑐧𑐸𑐡𑑂𑐢 𑐥𑑂𑐫𑐵𑐏𑑄 𑐥𑑂𑐬𑐱𑐶𑐎𑑂𑐲𑐞
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐾𑐰𑐵𑑅 𑐏𑐮𑑅 𑐎𑐵𑐳𑑂𑐎𑐷𑐫𑐵 𑐎𑐔𑐵 𑐳𑑄𑐐𑐛𑐣 𑐣𑐾𑐰𑐵𑑅 𑐩𑐶𑐳𑐵 𑐥𑐸𑐔𑑅 𑐎𑐵𑐳𑑂𑐎𑐷 𑐰 𑐣𑐾𑐰𑐵𑑅 𑐮𑑂𑐫𑐵𑐫𑑂𑐩𑑂𑐴 𑐥𑐸𑐔𑑅 𑐎𑐵𑐳𑑂𑐎𑐷𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐢𑐶𑐩𑐾 𑐰 𑐥𑑄𑐔𑐧𑐸𑐡𑑂𑐢 𑐥𑑂𑐫𑐵𑐏𑑄 𑐥𑑂𑐬𑐱𑐶𑐎𑑂𑐲𑐞 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅 𑐏𑐮𑑅 𑐎𑐵𑐳𑑂𑐎𑐷𑐫𑐵 𑐳𑑄𑐫𑑀𑐖𑐣𑐫𑑂 𑐖𑐹𑐐𑐸 𑐥𑑂𑐬𑐱𑐶𑐎𑑂𑐲𑐞𑐫𑑂 𑐢𑐶𑐩𑐾 𑐧𑐵𑐖𑐣𑐫𑑂 𑐏𑑂𑐰𑐷𑐣𑑂𑐫𑐵𑐩𑑂𑐴 𑐰 𑐥𑑄𑐔𑐧𑐸𑐡𑑂𑐢 𑐥𑑂𑐫𑐵𑐏𑑄 𑐥𑑂𑐬𑐱𑐶𑐎𑑂𑐲𑐞𑐫𑑂 𑐣𑐷𑐣𑑂𑐫𑐵𑐩𑑂𑐴𑐾𑐳𑐶𑐣𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋
𑐟𑐵𑐮𑐶𑐩 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐐𑐞𑑂𑐜𑐎𑐷 𑐥𑑂𑐬𑐡𑐾𑐱𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐏𑐐𑐬𑐵𑐖 𑐀𑐢𑐶𑐎𑐵𑐬𑐷𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐟 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐥𑑀𑐏𑐬𑐵 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑓 𑐰𑐜𑐵𑐫𑐵 𑐁𑐠𑐶𑑄𑐎 𑐐𑑂𑐰𑐵𑐴𑐵𑐮𑐶𑑄 𑐖𑐹𑐐𑐸 𑐟𑐵𑐮𑐶𑐩𑐫𑐵 𑐣𑐶𑑄𑐟𑐶𑑄 𑑙 𑐰𑐜𑐵𑐥𑐵𑐏𑐾𑑄 𑐔𑑂𑐫𑐵𑐐𑑅 𑐢𑐶𑐩𑐾 𑐧𑐵𑐖𑑄 𑐏𑐮𑑅𑐫𑐵𑐟 𑐐𑑂𑐰𑐵𑐴𑐵𑐮𑐶𑐎𑐠𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐟𑐵𑐮𑐶𑐩 𑐫𑐾𑑃𑐫𑐵 𑐰𑐖𑑂𑐬 𑐎𑐮𑐵 𑐎𑐸𑐘𑑂𑐖𑐫𑐵 𑐳𑐸𑐡𑐣 𑐩𑐸𑐣𑐶𑐎𑐵𑐬𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋
𑐏𑐮𑑅𑐫𑐵 𑐣𑐵𑐫𑑅 𑐀𑐱𑑀𑐎 𑐥𑐵𑐮𑐶𑐏𑐾𑑄 𑐠𑑅𑐥𑐶𑑄 𑐏𑑃 𑐮𑑂𑐴𑐵𑐂𑐥𑐶𑑄 𑐖𑐎 𑐩𑐏𑐸, 𑐖𑑂𑐫𑐵 𑐫𑐵𑐣𑐵𑑅 𑐎𑑂𑐫𑐣𑐷𑐥𑐶𑑄 𑐏𑑅 𑐢𑐂𑐐𑐸 𑐕𑐐𑐹 𑐡𑐳𑐸 𑐠𑑂𑐰 𑐟𑐵𑐮𑐶𑐩 𑐏𑑅 𑐢𑐵𑐳𑐾𑑄 𑐠𑐸𑐎𑐠𑑄 𑐠𑑅𑐐𑐸 𑐎𑐵𑐬𑑂𑐫 𑐎𑑂𑐲𑐾𑐟𑑂𑐬𑐫𑑂 𑐣𑑄 𑐣𑑂𑐴𑑂𑐫𑐔𑐶𑐮𑐵𑑅 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵𑐟 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐄𑐡𑑂𑐡𑐾𑐱𑑂𑐫𑑄 𑐴𑐾 𑐏𑐮𑑅𑐥𑐵𑐏𑐾𑑄 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐠𑐷𑐠𑐷 𑐟𑐵𑐮𑐶𑐩 𑐳𑑄𑐔𑐵𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵𑐟 𑐮𑑂𑐫𑑄𑐎𑐾𑐐𑐸 𑐄𑐡𑑂𑐡𑐾𑐱𑑂𑐫𑑄 𑐠𑐸𑐎𑐠𑑄𑐫𑐵 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐰 𑐰𑐂𑐐𑐸 𑐡𑐶𑐣𑐫𑑂 𑐣𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐣𑑂𑐴𑑂𑐫𑐵𑐎𑐵 𑐫𑑄𑐎𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋
𑐩𑐶𑐳𑐵 𑐥𑐸𑐔𑑅𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐱𑐵𑐣𑑂𑐟𑐶 𑐱𑑂𑐬𑐾𑐲𑑂𑐛 𑐄𑐡𑐵𑐳𑑄 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐟𑐫𑑂 𑐳𑑄𑐳𑑂𑐎𑐺𑐟𑐶𑐥𑑂𑐬𑐟𑐶 𑐩𑑀𑐴 𑐡𑐫𑐵𑐔𑑂𑐰𑐣𑐾𑐩𑐵 𑐣𑐵𑐥𑑄 𑐀𑐗 𑐣𑑂𑐴𑑂𑐫𑑅𑐣𑐾 𑐫𑑄𑐎𑐾𑐩𑐵 𑐦𑐫𑐾𑐩𑐵 𑐢𑐂𑐐𑐸 𑐄𑐡𑑂𑐡𑐾𑐱𑑂𑐫𑑄 𑐴𑐾 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐣𑐏𑑅𑐔𑐏𑑅 𑐁𑐡𑐶𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐮𑑂𑐫𑐵𑐏𑑄 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋
𑐄𑐐𑐸 𑐂𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐳𑑄 𑐢𑐶𑐩𑐾 𑐧𑐵𑐖𑑄𑐮𑐶𑐳𑐾𑑄 𑐥𑑄𑐔𑐧𑐸𑐡𑑂𑐢 𑐥𑑂𑐫𑐵𑐏𑑄𑐫𑐵 𑐥𑑂𑐬𑐳𑑂𑐟𑐸𑐟𑐶 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋
LEAVE YOUR COMMENTS