𑐳𑐸 𑐖𑐸𑐂𑐐𑐸 𑐖𑐸𑐮 𑐣𑑂𑐴𑐹𑐩𑑂𑐴 𑐬𑐵𑐲𑑂𑐚𑑂𑐬𑐥𑐟𑐶 ?
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐦𑐵𑐐𑐸𑐣 𑑒𑑕 𑐐𑐟𑐾 𑐖𑐸𑐂𑐐𑐸 𑐬𑐵𑐲𑑂𑐚𑑂𑐬𑐥𑐟𑐶 𑐔𑐸𑐣𑐵𑐰 𑐣𑑂𑐴𑑂𑐫𑑅 𑐴𑐾 𑐠𑐸𑐎𑐶𑐫𑐵 𑐧𑐵𑐬𑐾 𑐳𑐴𑐩𑐟𑐶 𑐡𑐫𑐾𑐎𑐾𑐐𑐸 𑐮𑐵𑐐𑐶𑑄 𑐩𑑂𑐴𑐶𑐐𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐰 𑐊𑐩𑐵𑐮𑐾 𑐀𑐢𑑂𑐫𑐎𑑂𑐲 𑐎𑐾𑐥𑐷 𑐌𑐮𑐷 𑐡𑐠𑐸𑐂 𑐟𑐵𑑅𑐴𑐵𑐎𑑅 𑐏𑑃𑐮𑑂𑐴𑐵𑐧𑐮𑑂𑐴𑐵 𑐖𑐹𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐶𑐫 𑐳𑑂𑐰𑐟𑐣𑑂𑐟𑑂𑐬 𑐥𑐵𑐬𑑂𑐚𑐷𑐫𑐵 𑐀𑐢𑑂𑐫𑐎𑑂𑐲 𑐬𑐰𑐶 𑐮𑐵𑐩𑐶𑐕𑐵𑐣𑐾𑐫𑐵 𑐳𑐵𑑄𑐳𑐡 𑐮𑐶𑐳𑐾𑑄 𑐩𑐣𑑂𑐟𑑂𑐬𑐷 𑐥𑐡 𑐧𑐡𑐬 𑐖𑐸𑐂𑐢𑐸𑐸𑑄𑐎𑐵𑑅 𑐰𑐫𑑂𑐎𑑅𑐥𑐶𑐣𑐶 𑐡𑐠𑐸𑐂 𑐕𑐸𑑄 𑐴𑐾 𑐳𑑄𑐰𑐵𑐡 𑐩𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋
𑐊𑐩𑐵𑐮𑐾 𑐀𑐢𑑂𑐫𑐎𑑂𑐲 𑐎𑐾𑐥𑐷 𑐌𑐮𑐷𑑄 𑐮𑐵𑐩𑐶𑐕𑐵𑐣𑐾𑐫𑐵𑐟 𑐴𑐵𑐣𑑄 𑐐𑐺𑐴 𑐩𑐣𑑂𑐟𑑂𑐬𑐵𑐮𑐫𑐫𑐵 𑐴𑐾 𑐖𑐶𑐩𑑂𑐩𑐾𑐰𑐵𑐬𑐷 𑐧𑐷 𑐩𑐵𑐮 𑐢𑐎𑐵𑑅 𑐥𑑂𑐬𑐩 𑐡𑐵𑐴𑐵𑐮𑐫𑐵𑐟 𑐟𑑅𑐎𑑂𑐰𑑅𑐩𑐕𑐶 𑐴𑐾 𑐂𑐣𑐵𑐥 𑐫𑐵𑑅𑐐𑐸 𑐏𑑅𑐳𑐵𑑄 𑐥𑑂𑐬𑐩 𑐡𑐵𑐴𑐵𑐮𑑄 𑐄𑐎𑐶𑐫𑐵𑐟 𑐰𑐾𑐰𑐵𑐳𑑂𑐟𑐵 𑐫𑐵𑐫𑐾𑐰𑑄 𑐣𑐶𑐩𑑂𑐴 𑐣𑐾𑐟𑐵𑐫𑐵 𑐡𑐠𑐸𑐂 𑐳𑑄𑐰𑐵𑐡 𑐩𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐌𑐮𑐷𑑄 𑐢𑐵𑑅𑐳𑐵𑑄 𑐣𑑄 𑐥𑑂𑐬𑐩 𑐡𑐵𑐴𑐵𑐮𑑄 𑐬𑐰𑐶𑐫𑐵𑐟 𑐐𑐺𑐴 𑐩𑐣𑑂𑐟𑑂𑐬𑐷 𑐩𑐡𑐫𑐾𑐎𑐹𑐐𑐸 𑐎𑐵𑐬𑐞𑑄 𑐌𑐮𑐷 𑐰 𑐡𑐵𑐴𑐵𑐮 𑐡𑐠𑐸𑐂 𑐳𑐩𑐳𑑂𑐫𑐵 𑐧𑑂𑐰𑐮𑐣𑐷𑐐𑐸 𑐖𑐸𑐂 𑐢𑐎𑐵𑑅 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐗 𑐬𑐰𑐶𑐫𑐵 𑐴𑐾 𑐎𑐵𑐬𑐞𑑄 𑐰𑐬𑑂𑐟𑐩𑐵𑐣 𑐳𑐟𑑂𑐟𑐵 𑐐𑐛𑐧𑐣𑑂𑐢𑐣 𑐟𑑂𑐰𑐵𑑅𑐡𑐮𑐾𑐦𑐸 𑐢𑐂𑐐𑐸 𑐟𑐎 𑐣𑑄 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋
𑐐𑐺𑐴 𑐩𑐣𑑂𑐟𑑂𑐬𑐷 𑐩𑐧𑐶𑐄 𑐢𑐎𑐵𑑅 𑐬𑐰𑐶𑐫𑐵 𑐥𑐵𑐬𑑂𑐚𑐷 𑐳𑐬𑐎𑐵𑐬𑑄 𑐥𑐶𑐴𑐵𑑄 𑐰𑐫𑐾𑐢𑐸𑑄𑐎𑐵𑑅 𑐁𑑅 𑐊𑐩𑐵𑐮𑐾 𑐣𑑄 𑐳𑐬𑐎𑐵𑐬𑑄 𑐥𑐶𑐴𑐵𑑄 𑐰𑐫𑐾𑐦𑐸 𑐢𑐎𑐵𑑅 𑐀𑐣𑐸𑐩𑐵𑐣 𑐖𑐹𑐐𑐸 𑐏𑑅 𑑋 𑐟𑐬 𑐩𑑂𑐴𑐶𑐐𑑅 𑐣𑐶𑐩𑑂𑐴 𑐣𑐾𑐟𑐵𑐫𑐵 𑐡𑐠𑐸𑐂 𑐖𑐹𑐐𑐸 𑐏𑑃𑐮𑑂𑐴𑐵𑐧𑐮𑑂𑐴𑐵𑑄 𑐢𑐵𑑅𑐳𑐵 𑐊𑐩𑐵𑐮𑐾 𑐳𑐬𑐎𑐵𑐬𑑄 𑐥𑐶𑐴𑐵𑑄 𑐰𑐂𑐐𑐸 𑐕𑐸𑑄 𑐴𑐾 𑐳𑐩𑑂𑐨𑐵𑐰𑐣𑐵 𑐩𑐡𑐸𑐐𑐸 𑐏𑑃 𑐳𑐹𑐟𑑂𑐬𑑄 𑐢𑐵𑑅𑐐𑐸 𑐡𑐸 𑑋
𑐩𑑂𑐴𑐶𑐐𑑅 𑐰𑐫𑑂𑐎𑑅𑐥𑐶𑐣𑐶 𑐡𑐠𑐸𑐂 𑐮𑐵𑐩𑐶𑐕𑐵𑐣𑐾 𑐳𑐬𑐎𑐵𑐬𑑄 𑐥𑐶𑐴𑐵𑑄 𑐰𑐣𑐾𑐢𑐸𑑄𑐎𑐵𑑅𑐫𑐵 𑐬𑐵𑐖𑐣𑐷𑐟𑐶𑐎 𑐀𑐰𑐳𑑂𑐠𑐵, 𑐬𑐰𑐶𑐫𑐵 𑐥𑐵𑐬𑑂𑐚𑐷𑑄 𑐟𑑂𑐰𑑅𑐟𑐹𑐐𑐸 𑐳𑑂𑐰𑑄𑐐𑐹 𑐩𑐣𑑂𑐟𑑂𑐬𑐵𑐮𑐫 𑐂𑐣𑐾𑐐𑐸 𑐏𑑃 𑐰 𑐬𑐵𑐲𑑂𑐚𑑂𑐬𑐥𑐟𑐶 𑐔𑐸𑐣𑐵𑐰𑐫𑐵 𑐧𑐵𑐬𑐾 𑐏𑑃 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐊𑐩𑐵𑐮𑐾𑑄 𑐬𑐵𑐲𑑂𑐚𑑂𑐬𑐥𑐟𑐶 𑐔𑐸𑐣𑐵𑐰 𑐟𑐎 𑐥𑐷𑐐𑐸 𑐮𑐵𑐐𑐶𑑄 𑐴𑐾 𑐮𑐵𑐩𑐶𑐕𑐵𑐣𑐾 𑐳𑐬𑐎𑐵𑐬𑑄 𑐥𑐶𑐴𑐵𑑄 𑐰𑑄𑐳𑐵𑑄 𑐎𑐜𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐩𑐧𑐶𑐄𑐐𑐸 𑐏𑑅 𑑋 𑐩𑑂𑐴𑐶𑐐𑑅𑐫𑐵 𑐰𑐵𑐬𑑂𑐟𑐵𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐔𑐸𑐣𑐵𑐰𑐫𑑂 𑐊𑐩𑐵𑐮𑐾𑑄 𑐥𑑂𑐬𑐳𑑂𑐟𑐵𑐰𑐶𑐟 𑐫𑐵𑑅𑐩𑑂𑐴 𑐩𑐣𑐹𑐫𑐵 𑐥𑐎𑑂𑐲𑐫𑑂 𑐴𑐾 𑐬𑐵𑐲𑑂𑐚𑑂𑐬𑐶𑐫 𑐳𑐴𑐩𑐟𑐶 𑐡𑐫𑐾𑐎𑐾𑐐𑐸 𑐧𑐵𑐬𑐾 𑐣𑑄 𑐔𑐬𑑂𑐔𑐵 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐟𑐬 𑐊𑐩𑐵𑐮𑐾𑑄 𑐳𑐸𑐫𑐵𑐟 𑐥𑑂𑐬𑐳𑑂𑐟𑐵𑐰𑐶𑐟 𑐫𑐵𑐂 𑐢𑐂𑐐𑐸 𑐏𑑃 𑐢𑐵𑑅𑐳𑐵 𑐳𑐷 𑐩𑐡𑐸𑐣𑐶 𑑋 𑐊𑐩𑐵𑐮𑐾𑑄 𑐰𑐬𑑂𑐟𑐩𑐵𑐣 𑐬𑐵𑐲𑑂𑐚𑑂𑐬𑐥𑐟𑐶 𑐰𑐶𑐡𑑂𑐫𑐵 𑐨𑐞𑑂𑐜𑐵𑐬𑐷𑐫𑐵𑐟 𑐴𑐾 𑐴𑐵𑐣𑑄 𑐬𑐵𑐲𑑂𑐚𑑂𑐬𑐥𑐟𑐶 𑐡𑐫𑐾𑐎𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐥𑐶𑐴𑐵𑑄 𑐰𑐫𑐾𑐰𑑄 𑐩𑐵𑐌𑐰𑐵𑐡𑐷𑑄 𑐳𑐩𑐬𑑂𑐠𑐣 𑐩𑐫𑐵𑐫𑐾𑐐𑐸 𑐏𑑃 𑐥𑐶𑐟 𑐴𑑅𑐐𑐸 𑐳𑐹𑐟𑑂𑐬𑐫𑐵 𑐡𑐵𑐰𑐷 𑐡𑐸 𑑋
𑐊𑐩𑐵𑐮𑐾𑐥𑐵𑐏𑐾𑑄 𑐠𑑁𑑄𑐎𑐣𑑂𑐴𑐫𑑂 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐬𑐸𑐥𑐫𑑂 𑐀𑐲𑑂𑐚𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, 𑐳𑐸𑐨𑐵𑐳 𑐣𑐾𑐩𑑂𑐧𑐵𑐒 𑐰 𑐜𑑀𑐬𑐩𑐞𑐶 𑐥𑑁𑐜𑐾𑐮𑐫𑐵 𑐣𑐵𑑄 𑐣𑑂𑐴𑑂𑐫𑑅𑐣𑐾 𑐴𑐫𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐩𑐵𑐌𑐰𑐵𑐡𑐷𑑄 𑐣𑐾𑐩𑑂𑐧𑐵𑐒 𑐰 𑐱𑐵𑐎𑑂𑐫𑐫𑐵𑐟 𑐖𑐎 𑐳𑐩𑐬𑑂𑐠𑐣 𑐫𑐵𑐫𑐾 𑐦𑐂 𑐢𑐎𑐵𑑅 𑐢𑐵𑑅𑐐𑐸 𑐏𑑃 𑐳𑐹𑐟𑑂𑐬𑑄 𑐎𑑄𑐐𑐸 𑐡𑐸 𑑋 𑐫𑐡𑐶 𑐩𑐵𑐌𑐰𑐵𑐡𑐷𑐫𑐵𑐟 𑐣𑑄 𑐔𑐶𑐟𑑂𑐟 𑐧𑐸𑐗𑐾 𑐖𑐹𑐩𑑂𑐴 𑐩𑐣𑐹𑐫𑐵 𑐣𑐵𑑄 𑐥𑑂𑐬𑐳𑑂𑐟𑐵𑐰𑐶𑐟 𑐫𑐵𑐟 𑐢𑐵𑑅𑐳𑐵 𑐳𑐩𑐬𑑂𑐠𑐣 𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐳𑐹𑐟𑑂𑐬𑐫𑐵 𑐎𑐠𑑄 𑐊𑐩𑐵𑐮𑐾𑐫𑐵 𑐕𑐐𑐹 𑐮𑐧𑐷 𑐣𑐾𑐩𑐎𑐶𑐥𑐵𑐫𑐵 𑐀𑐢𑑂𑐫𑐎𑑂𑐲 𑐣𑐵𑐬𑐵𑐫𑐞𑐩𑐵𑐣 𑐧𑐶𑐖𑐸𑐎𑑂𑐕𑐾𑐫𑐵𑐟 𑐬𑐵𑐲𑑂𑐚𑑂𑐬𑐥𑐟𑐶 𑐡𑐫𑐾𑐎𑐾𑐩𑐵𑑅 𑐢𑐎𑐵𑑅 𑐣𑑄 𑐳𑐎𑑂𑐬𑐶𑐫 𑐖𑐹𑐐𑐸 𑐡𑐸 𑑋 𑐕𑐸𑑄 𑐃 𑐣𑑂𑐴𑑂𑐫𑑅 𑐖𑐎 𑐬𑐵𑐲𑑂𑐚𑑂𑐬𑐥𑐟𑐶 𑐰𑐶𑐡𑑂𑐫𑐵𑐡𑐾𑐰𑐷 𑐨𑐞𑑂𑐜𑐵𑐬𑐷 𑐁𑐎𑐵𑐗𑐵𑐎𑐵𑑄 𑐧𑐶𑐖𑐸𑐎𑑂𑐕𑐾𑐫𑐵 𑐕𑐾𑑃𑐫𑑂 𑐗𑐵𑐫𑐵𑑅 𑐬𑐵𑐲𑑂𑐚𑑂𑐬𑐥𑐟𑐶 𑐔𑐸𑐣𑐵𑐰𑐧𑐵𑐬𑐾 𑐴𑐾 𑐏𑑃𑐮𑑂𑐴𑐵𑐧𑐮𑑂𑐴𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐟𑐬 𑐧𑐶𑐖𑐸𑐎𑑂𑐕𑐾 𑐢𑐵𑑅𑐳𑐵 𑐩𑐵𑐣𑐾 𑐖𑐸𑐫𑐵𑐡𑐷𑐐𑐸 𑐩𑐡𑐸𑐣𑐶 𑑋
𑐩𑐾𑐏𑐾 𑐩𑐵𑐌𑐰𑐵𑐡𑐷𑑄 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵𑐟 𑐬𑐵𑐲𑑂𑐚𑑂𑐬𑐶𑐫 𑐳𑐴𑐩𑐟𑐶 𑐳𑐴𑐶𑐟 𑐬𑐵𑐲𑑂𑐚𑑂𑐬𑐥𑐟𑐶 𑐡𑐫𑐾𑐎𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐣𑐾𑐎𑐥𑐵 (𑐊𑐳) 𑐫𑐵 𑐰𑐬𑐶𑐲𑑂𑐛 𑐣𑐾𑐟𑐵 𑐗𑐮𑐣𑐵𑐠 𑐏𑐣𑐵𑐮𑑄 𑐣𑑄 𑐬𑐵𑐲𑑂𑐚𑑂𑐬𑐥𑐟𑐶 𑐖𑐸𑐂𑐐𑐸 𑐂𑐔𑑂𑐕𑐵 𑐫𑐵𑐣𑐵𑐡𑐷𑐐𑐸 𑐏𑑃 𑐳𑐹𑐟𑑂𑐬𑑄 𑐢𑐵𑑅𑐐𑐸 𑐡𑐸 𑑋
LEAVE YOUR COMMENTS