𑐖𑐸𑐖𑐸𑐎𑐵𑐖𑐷𑐫𑐵 ‘𑐩𑐟𑐶𑐣𑐵𑐫𑐵 𑐐𑐮𑑂𑐮𑐶’ 𑐥𑐶𑐡𑐣
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐰𑐬𑐶𑐲𑑂𑐛 𑐳𑑄𑐐𑐷𑐟𑐎𑑅𑐩𑐶𑐮𑐶𑐳𑐾𑑄 𑐣𑐵𑑄𑐖𑐵𑑅𑐩𑑂𑐴 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐖𑐸𑐖𑐸𑐎𑐵𑐖𑐷 𑐬𑑄𑐖𑐶𑐟𑐫𑐵 𑐣𑑂𑐴𑐹𑐐𑐸 𑐊𑐎𑐮 𑐩𑑂𑐫𑐾𑑃𑐔𑐵𑑅 ‘𑐩𑐟𑐶𑐣𑐵𑐫𑐵 𑐐𑐮𑑂𑐮𑐶’ 𑐥𑐶𑐴𑐵𑑄 𑐰𑑅𑐐𑐸 𑐡𑐸 𑑋 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐬𑐳𑐶𑐫𑐣 𑐎𑐮𑑂𑐔𑐬 𑐳𑐾𑐣𑑂𑐚𑐬𑐫𑐵 𑐬𑐳𑐶𑐫𑐣 𑐴𑐵𑐄𑐳𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐬𑑄𑐖𑐶𑐟𑐫𑐵 𑐄𑐐𑐸 𑐊𑐎𑐮 𑐩𑑂𑐫𑐾𑑃𑐔𑐵𑑅𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋
𑐣𑐾𑐥𑐵𑐮 𑐬𑐸𑐳 𑐩𑐿𑐟𑑂𑐬𑐷 𑐟𑐠𑐵 𑐳𑐵𑑄𑐳𑑂𑐎𑐺𑐟𑐶𑐎 𑐳𑑄𑐑𑐫𑐵 𑐣𑐵𑐫𑑅 𑐳𑑂𑐰𑐬𑐵𑐖 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐳𑐾𑑄 𑐩𑑂𑐫𑐾𑑃𑐔𑐵𑑅 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 𑐩𑑂𑐫𑐾𑑃𑐫𑑂 𑐰𑐬𑐶𑐲𑑂𑐛 𑐳𑑄𑐐𑐷𑐟𑐎𑐵𑐬 𑐩𑐣𑐬𑐵𑐖𑐵 𑐣𑐎𑑅𑐩𑐶 𑐰 𑐖𑐸𑐐𑐮 𑐜𑑄𑐐𑑀𑐮𑑄 𑐮𑐳𑐫𑑂 𑐴𑐣𑐵𑐡𑐷𑐐𑐸 𑐏𑑅 𑑋 𑐩𑑂𑐫𑐾𑑃𑐔𑐵𑐮𑐫𑑂 𑐡𑐸𑐠𑑂𑐫𑐵𑑅𑐐𑐸 𑐖𑑂𑐰𑑅𑐩𑑂𑐫𑐾𑑃𑐫𑑂 𑐰𑐬𑐶𑐲𑑂𑐛 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐬𑑄𑐖𑐶𑐟𑐫𑐵𑐟 𑐬𑐟𑑂𑐣𑐱𑑀𑐨𑐵 𑐩𑐴𑐬𑑂𑐖𑐣 𑐰 𑐣𑐶𑐱𑐵 𑐡𑐾𑐳𑐵𑐬𑑄 𑐳𑐵𑐠 𑐧𑐶𑐫𑐵𑐡𑐷𑐐𑐸 𑐡𑐸 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑑄 𑐡𑑂𑐫𑑅 𑐢𑐂𑐥𑐶𑑄 𑐏𑐶𑐄𑑃𑐐𑐸 𑐠𑐵𑐳𑐫𑑂, 𑐦𑑀𑐴𑐬 𑐠𑐵𑐫𑑂 𑐖𑐹𑐳𑐵𑑄 𑐐𑐣 𑐩𑐟𑐶𑐣𑐵 𑐡𑐂 𑐀𑐣 𑐴𑐾 𑐡𑐂 𑐢𑐂𑐐𑐸𑐫𑐵 𑐨𑐵𑐰 𑐩𑑂𑐫𑐾𑑃𑐔𑐵𑑅𑐫𑐵 𑐚𑑂𑐬𑐵𑐂𑐚𑐮 𑐚𑑂𑐬𑐵𑐫𑐎𑑄 𑐥𑐶𑐧𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐩𑑂𑐫𑐾𑑃𑐔𑐵𑑅𑐫𑐵 𑐣𑐵𑑄 𑐰 𑐩𑑂𑐫𑐾𑑃𑐐𑑂𑐰𑑅𑐟 𑐳𑑂𑐰𑐫𑐧𑐮𑐫𑑂 𑐨𑐵𑐬𑐟𑐫𑐵 𑐣𑐵𑑄𑐖𑐵𑑅𑐩𑑂𑐴 𑐎𑐰𑐶𑐮𑐶𑐳𑐾𑑄 𑐡𑐵𑐬𑑂𑐱𑐣𑐶𑐎 𑐎𑐰𑐷𑐬𑐫𑐵 𑐰𑐵𑐞𑐷𑐥𑐵𑐏𑐾𑑄 𑐥𑑂𑐬𑐨𑐵𑐰𑐟 𑐖𑐹𑐐𑐸 𑐏𑐣𑐾𑐡𑐸 𑐢𑐫𑐵𑐡𑐶𑐮 𑑋
𑐳𑐵𑐴𑐶𑐟𑑂𑐫𑐎𑐵𑐬𑐮𑐶𑐳𑐾𑑄 𑐳𑑄𑐔𑐵𑐬𑐎𑑅𑐩𑐶, 𑐣𑐶𑐬𑑂𑐡𑐾𑐱𑐎 𑐥𑑂𑐬𑐎𑐵𑐱 𑐳𑐵𑐫𑑂𑐩𑐶, 𑐥𑐸𑐮𑐵𑑄𑐩𑑂𑐴 𑐩𑐸𑐏𑑂𑐫 𑐳𑐔𑐶𑐰𑐣𑐵𑐥𑑄 𑐎𑐾𑐳𑐸 𑐐𑐸𑐠𑐶𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐎𑐾𑐱𑐰𑐬𑐵𑐖 𑐬𑐵𑐖𑐨𑐞𑑂𑐜𑐵𑐬𑐷𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐖𑐸𑐖𑐸𑐎𑐵𑐖𑐷 𑐬𑑄𑐖𑐶𑐟 𑐕𑐥𑐸 𑐬𑐳𑐶𑐫𑐣 𑐨𑐵𑐫𑑂𑐫𑐵 𑐩𑑂𑐫𑐾𑑃𑐮𑐶𑐳𑐾 𑐥𑑂𑐫𑐥𑐸 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋
𑐩𑑂𑐫𑐾𑑃 𑐴𑐵𑐮𑐵𑐩𑐶 𑐬𑑄𑐖𑐶𑐟𑐫𑐵 𑐖𑐴𑐵𑐣 𑐎𑑁𑐱𑐮𑑂𑐫𑐵 𑐬𑑄𑐖𑐶𑐟𑑄 𑐥𑐶𑐠𑐣𑐵𑐡𑐷𑐐𑐸 𑐩𑑂𑐫𑐾𑑃𑐔𑐵𑑅 𑐥𑐶𑐟𑐧𑑂𑐰𑐖𑑂𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐴𑐾 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐩𑑂𑐫𑐾𑑃𑐔𑐵𑐮𑐫𑑂 𑐡𑐸𑐠𑑂𑐫𑐵𑑅𑐐𑐸 𑐕𑐥𑐸 𑐩𑑂𑐫𑐾𑑃𑐫𑐵 𑐩𑑂𑐫𑐸𑐖𑐶𑐎 𑐨𑐶𑐜𑐶𑐫𑑀𑐫𑐵 𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋
LEAVE YOUR COMMENTS