𑐣𑐾. 𑐳𑑄. 𑑑𑑑𑑔𑑓 𑐔𑑁𑐮𑐵𑐠𑑂𑐰 𑐡𑐸𑐟𑐶𑐫𑐵 -

𑐩𑐵𑐣𑐣𑑂𑐢𑐬 𑐳𑑄𑐑𑐫𑐵 𑐠𑐷𑐠𑐷 𑐎𑐵𑐳𑐵

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐎𑐾𑐣𑑂𑐡𑑂𑐬𑐷𑐫 𑐩𑐵𑐣𑐣𑑂𑐢𑐬 𑐳𑑄𑐑𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐩𑐵𑐑 𑑑𑑔 𑐐𑐟𑐾 𑐱𑐣𑐶𑐰𑐵𑑅 𑐀𑐟𑐶𑐬𑐶𑐎𑑂𑐟 𑐎𑑂𑐬𑐶𑐫𑐵𑐎𑐮𑐵𑐥 𑐀𑐣𑑂𑐟𑐬𑑂𑐐𑐟 𑐠𑐷𑐠𑐷 𑐎𑐵𑐳𑐵 𑐖𑐸𑐮 𑑋 𑐳𑑄𑐑𑐫𑐵 𑑗𑑙 𑐎𑑂𑐰𑑅𑐐𑐸 𑐳𑑂𑐠𑐵𑐥𑐣𑐵 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐠𑐣𑐫𑐵 𑐳𑐵𑐩𑐵𑐏𑐸𑐳𑐶𑐂 𑐔𑑂𑐰𑑄𑐐𑐸 𑐁𑐱𑐶𑐬𑑂𑐰𑐵𑐡 𑐎𑐮𑐾𑐖𑐫𑑂 𑐰𑐵𑐬𑑂𑐲𑐶𑐎 𑐏𑐾𑐮𑐎𑐸𑐡 𑐥𑑂𑐬𑐟𑐶𑐫𑑀𑐐𑐶𑐟𑐵 𑐀𑐣𑑂𑐟𑐬𑑂𑐐𑐟 𑐔𑐾𑐳( 𑐩𑐶𑐳𑐵 𑐰 𑐩𑐶𑐖𑑄), 𑐚𑐾𑐧𑐸𑐮 𑐚𑐾𑐣𑐶𑐳 (𑐩𑐶𑐳𑐵 𑐰 𑐩𑐶𑐖𑑄), 𑐏𑐸𑐡𑑃 𑐎𑑂𑐰𑐫𑑂𑐫𑐵 𑐩𑐳𑑂𑐟𑐫𑑂 𑐡𑐠𑐸𑐂 𑐩𑐔𑐵 𑐧𑑂𑐰𑐵𑐖𑑂𑐫𑐵 𑐰 𑑑𑑕 𑐡𑑃 𑐟𑐎𑐫𑐵 𑐩𑐳𑑂𑐟𑐫𑑂 𑐡𑐠𑐸𑐂 𑐢𑐵𑑅 𑐧𑐵𑐖𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 𑐖𑐹𑐐𑐸 𑐏𑑅 𑑋

𑐎𑐵𑐳𑐵𑐫𑑂 𑐚𑐾𑐧𑐸𑐮 𑐚𑐾𑐣𑐶𑐳 (𑐩𑐶𑐖𑑄)𑐥𑐵𑐏𑐾 𑐄𑐖𑑂𑐖𑐰𑐮 𑐩𑐵𑐣𑐣𑑂𑐢𑐬 (𑐟𑑄𑐮𑐵𑐕𑐶) 𑐣𑑂𑐴𑐵𑐥, 𑐳𑐵𑐬𑑂𑐠𑐎 𑐩𑐵𑐣𑐣𑑂𑐢𑐬 (𑐔𑐳𑑂𑐰𑐵𑑄𑐡𑑂𑐰𑑃) 𑐮𑐶𑐄 𑐰 𑐬𑐵𑐖𑐾𑐱 𑐩𑐵𑐣𑐣𑑂𑐢𑐬 (𑐡𑐿𑐳𑐵𑑅) 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐚𑐾𑐧𑐸𑐮 𑐚𑐾𑐣𑐶𑐳 (𑐩𑐶𑐳𑐵𑐥𑐵𑐏𑐾) 𑐥𑑂𑐬𑐶𑐟𑐶𑐎𑐵 𑐩𑐵𑐣𑐣𑑂𑐢𑐬 (𑐔𑐳𑑂𑐰𑐵𑑄𑐡𑑂𑐰𑑃), 𑐃𑐱𑐵 𑐩𑐵𑐣𑐣𑑂𑐢𑐬 (𑐨𑐶𑑄𑐡𑑂𑐫𑑅 𑐐𑐸𑐠𑐶) 𑐰 𑐥𑐮𑐶𑐳𑐵 𑐩𑐵𑐣𑐣𑑂𑐢𑐬 (𑐨𑐶𑑄𑐡𑑂𑐫𑑅 𑐐𑐸𑐠𑐶) 𑐕𑐳𑐶𑐎𑐠𑑄 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐡𑐸 𑑋 𑐩𑐔𑐵 𑐧𑑂𑐰𑐵𑐖𑑂𑐫𑐵 𑐎𑐵𑐳𑐵𑐫𑑂 𑐳𑐩𑑂𑐫𑐎 𑐩𑐵𑐣𑐣𑑂𑐢𑐬 (𑐳𑐵𑑅𑐎𑑂𑐰𑐮𑐵𑐣 𑐟𑑂𑐰𑐵𑑅 𑐏𑑂𑐰𑐥) 𑐣𑑂𑐴𑐵𑐥, 𑐁𑐬𑑂𑐱𑐶𑐫𑐵 𑐩𑐵𑐣𑐣𑑂𑐢𑐬 (𑐟𑑄𑐮𑐵𑐕𑐶) 𑐮𑐶𑐄 𑐰 𑐬𑐶𑐫𑐵𑐖 𑐩𑐵𑐣𑐣𑑂𑐢𑐬 (𑐥𑐵𑐎𑑂𑐰 𑐥𑐸𑐏𑐹𑐡𑑂𑐫𑐵𑑄) 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐡𑐸 𑑋

𑐔𑐾𑐳𑐫𑑂 𑐩𑐶𑐖𑑄𑐥𑐵𑐏𑐾 𑐣𑐶𑐬𑐵𑐖𑐣 𑐩𑐵𑐣𑐣𑑂𑐢𑐬 (𑐟𑑅𑐏𑐵𑐕𑐾𑑃 𑐏𑐮𑑅) 𑐣𑑂𑐴𑐵𑐥, 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬 (𑐟𑑄𑐮𑐵𑐕𑐶)𑐮𑐶𑐄 𑐰 𑐩𑐣𑐶𑐲 𑐩𑐵𑐣𑐣𑑂𑐢𑐬 (𑐨𑐶𑑄𑐡𑑂𑐫𑑅 𑐐𑐸𑐠𑐶) 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐡𑐸𑐳𑐵 𑐩𑐶𑐳𑐵𑐥𑐵𑐏𑐾 𑐱𑑂𑐰𑐾𑐟𑐵 𑐩𑐵𑐣𑐣𑑂𑐢𑐬 (𑐟𑑄𑐮𑐵𑐕𑐶) 𑐣𑑂𑐴𑐵𑐥, 𑐳𑑂𑐰𑐳𑑂𑐟𑐶 𑐩𑐵𑐣𑐣𑑂𑐢𑐬 (𑐟𑑄𑐮𑐵𑐕𑐶) 𑐮𑐶𑐄 𑐮𑐵𑐫𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋

𑐢𑐵𑑅𑐧𑐵𑐖𑑄𑐥𑐵𑐏𑐾 𑐠𑑃𑐴𑐶𑐟𑐶𑐫𑐵 𑐮𑐸𑐩𑐶𑐮𑐵 𑐩𑐵𑐣𑐣𑑂𑐢𑐬 𑐣𑑂𑐴𑐵𑐥 𑐰 𑐠𑑃𑐴𑐶𑐟𑐶𑐫𑐵 𑐴𑐾 𑐮𑐸𑑃𑐳𑑂𑐰𑐵𑑄 𑐩𑐵𑐣𑐣𑑂𑐢𑐬 𑐮𑐶𑐄 𑐮𑐵𑐫𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸𑐳𑐵 𑑙 𑐡𑑃 𑐡𑐸𑐩𑑂𑐴 𑐳𑐩𑑂𑐩𑐸𑐣𑐟 𑐩𑐵𑐣𑐣𑑂𑐢𑐬𑑄 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋

𑐳𑑄𑐑𑐫𑐵 𑐐𑑂𑐰𑐳𑐵𑐮𑐫𑑂 𑐩𑐵𑐣𑐣𑑂𑐢𑐬 𑐮𑑂𑐫𑐵𑐫𑑂𑐩𑑂𑐴 𑐥𑐸𑐔𑑅𑐫𑐵 𑐳𑑄𑐫𑑀𑐖𑐣𑐵𑐫𑑂 𑐖𑐹𑐐𑐸 𑐀𑐟𑐶𑐬𑐶𑐎𑑂𑐟 𑐎𑑂𑐬𑐶𑐫𑐵𑐎𑐮𑐵𑐥 𑐀𑐣𑑂𑐟𑐬𑑂𑐐𑐟 𑐔𑐾𑐳, 𑐚𑐾𑐧𑐸𑐮 𑐚𑐾𑐣𑐶𑐳 𑐰 𑐩𑐔𑐵 𑐧𑑂𑐰𑐵𑐖𑑂𑐫𑐵 𑐡𑐎𑑂𑐲𑐶𑐞 𑐊𑐱𑐶𑐫𑐵𑐫𑐵 𑐎𑐷𑐬𑑂𑐟𑐶𑐩𑐵𑐣 𑐢𑐵𑐰𑐎𑐣𑐵𑐥𑑄 𑐳𑑄𑐑𑐥𑐵𑐏𑐾𑑄 𑐥𑑂𑐬𑐧𑐸𑐡𑑂𑐢 𑐰𑑂𑐫𑐎𑑂𑐟𑐶𑐎𑐠𑑄 𑐳𑐩𑑂𑐩𑐵𑐣𑐶𑐟 𑐧𑐿𑐎𑐸𑐞𑑂𑐛 𑐩𑐵𑐣𑐣𑑂𑐢𑐬𑑄 𑐳𑑂𑐰𑐣𑐵𑐡𑐷𑐐𑐸 𑐎𑑀𑐲𑐥𑐵𑐏𑐾𑑄 𑐖𑐹𑐐𑐸 𑐏𑑅𑐳𑐵 𑐢𑐵𑑅𑐧𑐵𑐖𑑄 𑐱𑐩𑑂𑐨𑐸𑐩𑐵𑐣 (𑐎𑐵𑐎𑐵𑐨𑐵𑐂) 𑐧𑐳𑐸𑐣𑑂𑐢𑐬𑐵 𑐮𑐸𑐩𑐣𑑂𑐟𑐶 𑐎𑑀𑐲𑐥𑐵𑐏𑐾𑑄 𑐖𑐹𑐐𑐸 𑐏𑑅 𑑋

𑐰𑐶𑐖𑐫𑐷 𑐎𑐵𑐳𑐵𑐩𑐶𑐥𑐶𑑄𑐟 𑐰𑐂𑐐𑐸 𑐦𑐵𑐐𑐸𑐣𑐫𑑂 𑐖𑐸𑐂𑐐𑐸 𑐳𑑂𑐰𑐫𑐩𑑂𑐨𑐹 𑐨𑑂𑐰𑐖𑐫𑑂 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐫𑐾𑐐𑐸 𑐳𑑄𑐑𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐳𑑄𑐑𑐫𑐵 𑐐𑑂𑐰𑐳𑐵𑐮𑐫𑑂 𑐰𑐂𑐐𑐸 𑐔𑐿𑐟 𑐩𑐴𑐶𑐣𑐵𑐫𑑂 𑐣𑑁𑐧𑐵𑐖𑑄 𑐳𑐩𑑂𑐩𑐾𑐮𑐣 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋