‘𑐨𑐵𑐬𑐟–𑐥𑐵𑐎𑐶𑐳𑑂𑐟𑐵𑐣 𑐡𑐠𑐸𑐂 𑐗𑐣𑑂𑐜𑐿 𑐥𑐬𑐩𑐵𑐞𑐸 𑐫𑐸𑐡𑑂𑐢 𑐖𑐸𑐂𑐟𑑂𑐫𑑄𑐐𑐸’
𑐊𑐖𑐾𑐣𑑂𑐳𑐷÷ 𑐀𑐩𑐾𑐬𑐶𑐎𑐵𑐫𑐵 𑐥𑐸𑐮𑐵𑑄𑐩𑑂𑐴 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐩𑐵𑐂𑐎 𑐥𑑀𑐩𑑂𑐥𑐶𑐌𑑄 𑐳𑐣𑑂 𑑒𑑐𑑑𑑙 𑐫𑑂 𑐨𑐵𑐬𑐟 𑐰 𑐥𑐵𑐎𑐶𑐳𑑂𑐟𑐵𑐣 𑐡𑐠𑐸𑐂 𑐗𑐣𑑂𑐜𑐿 𑐥𑐬𑐩𑐵𑐞𑐸 𑐫𑐸𑐡𑑂𑐢 𑐖𑐸𑐂𑐟𑑂𑐫𑑄𑐐𑐸 𑐡𑐵𑐰𑐷 𑐫𑐵𑑅𑐐𑐸 𑐡𑐸 𑑋 𑐠𑑅𑐐𑐸 𑐳𑑄𑐳𑑂𑐩𑐬𑐞 𑐳𑐦𑐹 ‘𑐣𑐾𑐨𑐬 𑐐𑐶𑐨 𑐊𑐣 𑐂𑐣𑑂𑐔 𑑅 𑐦𑐵𑐂𑐚𑐶𑐒 𑐦𑐬 𑐡𑐶 𑐀𑐩𑐾𑐬𑐶𑐎𑐵 𑐁𑐂 𑐮𑐨’𑐫𑑂 𑐥𑑀𑐩𑑂𑐥𑐶𑐌𑑄 𑐢𑐫𑐵𑐟𑑅𑐐𑐸 𑐡𑐸, ‘𑐳𑐣𑑂 𑑒𑑐𑑑𑑙𑐫𑐵 𑐦𑐾𑐧𑑂𑐬𑐀𑐬𑐷 𑐩𑐴𑐶𑐣𑐵𑐫𑑂 𑐨𑐵𑐬𑐟 𑐰 𑐥𑐵𑐎𑐶𑐳𑑂𑐟𑐵𑐣 𑐡𑐠𑐸𑐂 𑐥𑐬𑐩𑐵𑐞𑐸 𑐫𑐸𑐡𑑂𑐢𑐫𑐵 𑐣𑐶𑑄𑐟𑐶𑑄 𑐐𑐖𑑂𑐫𑐵𑑅𑐐𑐸 𑐟𑐎𑐫𑐵 𑐀𑐰𑐳𑑂𑐠𑐵 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐢𑐫𑐵𑐐𑐸 𑐏𑑃 𑐩𑐾𑐥𑐶𑑄 𑐳𑐶𑐄𑐠𑐾𑑄 𑐖𑐶𑐟𑑅 𑐩𑐟𑐵𑑅 𑑋’
’𑐳𑐟𑑂𑐫 𑐕𑐸 𑐢𑐵𑑅𑐳𑐵 𑐐𑐸𑐮𑐶 𑐳𑐟𑐶𑐎 𑐠𑑂𑐫𑐣 𑐢𑐫𑐵𑐐𑐸 𑐖𑐶𑑄 𑐣𑑄 𑐠𑑂𑐫𑐵𑐎𑑂𑐎 𑐴𑐾 𑐩𑐳𑐶𑐄, 𑐟𑐬 𑐖𑐶𑑄 𑐠𑑂𑐰 𑐳𑐶𑐄 𑐎𑐶 𑐟𑐳𑐎𑑄 𑐳𑐟𑐶𑐎 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐏𑑅 𑑋’
𑐴𑐣𑑀𑐃 𑐕𑐐𑐹 𑐱𑐶𑐏𑐬 𑐰𑐵𑐬𑑂𑐟𑐵𑐫𑐵 𑐂𑐮𑐫𑑂 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑐮𑐶𑐳𑐾 𑐥𑐬𑐩𑐵𑐞𑐸𑐀𑐳𑑂𑐟𑑂𑐬 𑐧𑐵𑐬𑐾 𑐰𑐵𑐬𑑂𑐟𑐵 𑐖𑐸𑐫𑐵𑐔𑑂𑐰𑑄𑐐𑐸 𑐔𑐵𑐣𑑂𑐴𑐫𑑂 𑐨𑐵𑐬𑐟 𑐰 𑐥𑐵𑐎𑐶𑐳𑑂𑐟𑐵𑐣𑑄 𑐎𑐱𑑂𑐩𑐶𑐬𑐫𑐵 𑐰𑐶𑐲𑐫𑐫𑑂 𑐠𑑅𑐠𑐰𑐫𑑂 𑐏𑑂𑐫𑐵𑐔𑑂𑐰𑑅 𑐧𑐶𑐂𑐐𑐸 𑐳𑐸𑐬𑐸 𑐫𑐵𑑅𑐐𑐸 𑐠𑑅𑐩𑑂𑐴𑑄 𑐐𑐸𑐧𑐮𑐾𑑄 𑐮𑑂𑐰𑑅𑐩𑑄𑐎𑐾 𑐩𑐦𑐂𑐐𑐸 𑐏𑑃 𑐥𑑀𑐩𑑂𑐥𑐶𑐌𑑄 𑐳𑐦𑐸𑐮𑐶𑐂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋
𑐄𑐧𑐮𑐫𑑂 𑐨𑐵𑐬𑐟 𑐥𑑂𑐬𑐱𑐵𑐳𑐶𑐟 𑐎𑐱𑑂𑐩𑐶𑐬𑐫𑑂 𑐨𑐵𑐬𑐟𑐷𑐫 𑐳𑐸𑐬𑐎𑑂𑐲𑐵𑐎𑐬𑑂𑐩𑐷𑐟𑐫𑑂𑐟 𑐴𑐶𑑄𑐳𑑂𑐬𑐎 𑐁𑐎𑑂𑐬𑐩𑐞 𑐖𑐸𑐂𑐰𑑄 𑐡𑐶𑐮𑑂𑐮𑐷𑑄 𑐥𑐵𑐎𑐶𑐳𑑂𑐟𑐵𑐣𑐫𑐵 𑐨𑐹𑐨𑐵𑐐𑐫𑑂 𑐴𑐰𑐵𑐃 𑐁𑐎𑑂𑐬𑐩𑐞 𑐳𑐸𑐬𑐸 𑐫𑐵𑐟 𑑋 𑐠𑑂𑐰 𑐮𑐶𑐥𑐵 𑐧𑑂𑐰𑐮𑑄𑐐𑐸 𑐟𑐣𑐵𑐰 𑐡𑐠𑐸𑐂 𑐥𑐬𑐩𑐵𑐞𑐸 𑐀𑐳𑑂𑐟𑑂𑐬 𑐕𑑂𑐫𑐮𑐷𑐐𑐸 𑐖𑑀𑐏𑐶𑐩 𑐟𑐔𑑂𑐰𑐫𑐵 𑐰𑑅𑐐𑐸 𑐏𑑅 𑑋
𑐄𑐧𑐮𑐫𑑂 𑐥𑐺𑐠𑐎𑐟𑐵𑐰𑐵𑐡𑐷 𑐮𑐜𑐵𑐎𑐸𑐟𑐫𑑂𑐳𑑄 𑐁𑐎𑑂𑐬𑐩𑐞 𑐫𑐵𑐣𑐵𑑅 𑐨𑐵𑐬𑐟𑐫𑐵 𑐥𑐷𑐩𑑂𑐴𑑄 𑐩𑐮𑑂𑐫𑐵𑐎 𑐳𑐿𑐣𑐶𑐎𑐟𑐫𑑂𑐟 𑐳𑑂𑐫𑐵𑐣𑐵𑐧𑐶𑐄𑐐𑐸 𑐏𑑅 𑑋 𑐠𑐸𑐎𑐶𑐫𑐵𑐟 𑐥𑑀𑐩𑑂𑐥𑐶𑐌𑑄 ‘𑐳𑐩𑑂𑐨𑐰𑐟𑑅 𑐥𑐵𑐎𑐶𑐳𑑂𑐟𑐵𑐣𑐫𑐵 𑐥𑑂𑐬𑐟𑐶𑐁𑐟𑑄𑐎𑐰𑐵𑐡𑐳𑐩𑑂𑐧𑐣𑑂𑐢𑐷 𑐎𑐩𑐖𑑀𑐬 𑐣𑐷𑐟𑐶𑐫𑐵 𑐎𑐵𑐬𑐞𑑄 𑐳𑐩𑑂𑐨𑐰 𑐖𑐹𑐐𑐸 𑐕𑐐𑐹 𑐂𑐳𑑂𑐮𑐵𑐩𑐶𑐎 𑐁𑐟𑑄𑐎𑐰𑐵𑐡𑐷 𑐁𑐎𑑂𑐬𑐩𑐞’ 𑐢𑐵𑑅𑐐𑐸 𑐡𑐸 𑑋
𑐥𑑀𑐩𑑂𑐥𑐶𑐌𑑄 𑐳𑐦𑐸𑐮𑐶𑐂 𑐣𑑂𑐴𑑂𑐫𑐠𑐣𑐵𑐟𑑅𑐎𑐠𑑄 𑐴𑐣𑑀𑐃 𑐡𑑂𑐫𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐕𑐩𑑂𑐴 𑐨𑐵𑐬𑐟𑐷𑐫 𑐳𑐩𑐎𑐎𑑂𑐲𑐷𑐮𑐶𑐳𑐾 𑐏𑑃 𑐮𑑂𑐴𑐵𑐫𑐾 𑐩𑐵𑐮 𑐢𑐎𑐵𑑅 𑐠𑑄𑐰𑐮 𑑋 𑐰𑑄 𑐥𑐵𑐎𑐶𑐳𑑂𑐟𑐵𑐣𑐷𑐟𑐫𑑂𑐳𑑄 𑐎𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐠𑑅𑐥𑐶𑐣𑐶 𑐥𑐬𑐩𑐵𑐞𑐸𑐀𑐳𑑂𑐟𑑂𑐬 𑐟𑐫𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐐𑐸 𑐠𑑅𑐥𑐶𑑄𑐟 𑐟𑐵𑑅𑐐𑐸 𑐰 𑐠𑑅𑐥𑐶𑑄𑐳𑑄 𑐣𑑄 𑐠𑐸𑐎𑐶𑐫𑐵 𑐧𑐵𑐬𑐾 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑐣𑐵𑐐𑐸 𑐏𑑃 𑐎𑐣 𑑋
𑐥𑑀𑐩𑑂𑐥𑐶𑐌𑑄 𑐄𑐧𑐮𑐫𑑂 𑐁𑑅𑐫𑐵𑐟 𑐕𑐸𑑄 𑐫𑐵𑐫𑐾𑐩𑐟𑐾𑐣𑐶, 𑐏𑑃 𑐩𑐶𑐮𑐾 𑐫𑐵𑐫𑐾𑐟 𑐕𑐸𑑄 𑐃 𑐧𑐷𑐟 𑐂𑐣𑐵𑐥 𑐫𑐵𑐟 𑑋 𑐥𑑀𑐩𑑂𑐥𑐶𑐌𑑄 𑐀𑐧𑐮𑐫𑑂 𑐠𑑅𑐮𑐶𑐳𑐾𑑄 𑐡𑐸𑐩𑑂𑐴 𑐟𑐵𑐟𑑂𑐎𑐵𑐮𑐶𑐣 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐶𑐫 𑐳𑐸𑐬𑐎𑑂𑐲𑐵 𑐳𑐮𑑂𑐴𑐵𑐎𑐵𑐬 𑐖𑑀𑐣 𑐧𑑀𑐮𑑂𑐚𑐣𑐮𑐶𑐳𑐾 𑐳𑐴𑐮𑐴 𑐫𑐵𑐟, 𑐀𑐮𑐾 𑐟𑐸𑐬𑐸𑐣𑑂𑐟 𑐥𑐵𑐎𑐶𑐳𑑂𑐟𑐵𑐣𑐷 𑐳𑐾𑐣𑐵 𑐥𑑂𑐬𑐩𑐸𑐏 𑐖𑐣𑐬𑐮 𑐎𑐩𑐡 𑐖𑐵𑐰𑐾𑐡 𑐧𑐵𑐖𑑂𑐰𑐵𑐫𑐵𑐟 𑐳𑑂𑐰𑐵𑐥𑐹 𑐟𑐫𑐵𑑅 𑐨𑐵𑐬𑐟𑐷𑐫 𑐥𑐎𑑂𑐲𑑄 𑐢𑐵𑑅𑐐𑐸 𑐏𑑃 𑐎𑐣 𑑋 𑐄𑐧𑐮𑐫𑑂 𑐥𑐵𑐎𑐶𑐳𑑂𑐟𑐵𑐣𑐷 𑐳𑐾𑐣𑐵𑐥𑑂𑐬𑐩𑐸𑐏𑑄 𑐠𑑅𑐥𑐶𑑄𑐳𑑄 𑐥𑐬𑐩𑐵𑐞𑐸 𑐀𑐳𑑂𑐟𑑂𑐬 𑐕𑑂𑐫𑐮𑐾𑐟𑑂𑐫𑐣 𑐢𑐫𑐵𑐐𑐸 𑐏𑑃𑐫𑑂 𑐳𑐟𑑂𑐫𑐟𑐵 𑐩𑐡𑐸𑐐𑐸 𑐧𑐬𑐸 𑐨𑐵𑐬𑐟𑑄 𑐠𑑅𑐐𑐸 𑐥𑐬𑐩𑐵𑐞𑐸 𑐀𑐳𑑂𑐟𑑂𑐬 𑐥𑐬𑐶𑐔𑐵𑐮𑐣 𑐫𑐵𑐫𑐾𑐟 𑐟𑐫𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐢𑐫𑐵𑐐𑐸 𑐠𑑅𑐥𑐶𑑄𑐟 𑐖𑐵𑐣𑐎𑐵𑐬𑐷 𑐰𑑅𑐐𑐸 𑐢𑐫𑐵𑐐𑐸 𑐏𑑃 𑐎𑑄𑐐𑐸 𑐥𑑀𑐩𑑂𑐥𑐶𑐌𑑄 𑐳𑐦𑐸𑐮𑐶𑐂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋
‘𑐡𑐶𑐮𑑂𑐮𑐷 𑐰 𑐂𑐳𑑂𑐮𑐵𑐩𑐵𑐧𑐵𑐡𑐫𑑂 𑐔𑑂𑐰𑑄𑐥𑐶𑑄 𑐀𑐩𑐾𑐬𑐶𑐎𑐷 𑐥𑐸𑐔𑐮𑑄 𑐧𑐵𑑄𑐮𑐵𑐎 𑐖𑑂𑐫𑐵 𑐫𑐵𑑅𑐐𑐸𑐮𑐶𑑄 𑐕𑐸𑑄 𑐑𑑁 𑐡𑐸𑐣𑐾 𑐣𑐶𑐐𑐸𑐮𑐶𑑄 𑐥𑐎𑑂𑐲𑐫𑐵𑐟 𑐥𑐬𑐩𑐵𑐞𑐸 𑐫𑐸𑐡𑑂𑐢𑐫𑐵 𑐟𑐫𑐵𑐬𑐷 𑐫𑐵𑐣𑐵 𑐔𑑂𑐰𑑄𑐐𑐸 𑐩𑐡𑐸 𑐢𑐫𑐵𑐐𑐸 𑐏𑑃𑐫𑑂 𑐰𑐶𑐱𑑂𑐰𑐳𑑂𑐟 𑐫𑐵𑐫𑐾𑐦𑐟’ 𑐥𑑀𑐩𑑂𑐥𑐶𑐌𑑄 𑐢𑐫𑐵𑐟𑑅𑐐𑐸 𑐡𑐸 𑑋 𑐀𑐠𑐾𑐴𑐾 𑐰𑐫𑑂𑐎𑐮𑑄 𑐄𑐧𑐮𑐫𑑂 𑐐𑑂𑐫𑐵𑐣𑐵𑐥𑐸𑐐𑐸 𑐮𑐶𑐔𑑂𑐰𑑅 𑐰𑐫𑐾𑐎𑐾 𑐩𑐧𑐶𑐂𑐟 𑐠𑑅𑐥𑐶𑑄𑐳𑑄 𑐐𑐸𑐐𑐸 𑐖𑑂𑐫𑐵 𑐫𑐵𑐣𑐵 𑐰 𑐩𑐾𑐩𑐾𑐐𑐸 𑐡𑐾𑐱𑑄 𑐫𑐵𑐫𑐾𑐩𑐦𑐂𑐐𑐸 𑐏𑑃 𑐣𑑄 𑐳𑐦𑐸𑐮𑐶𑐂 𑐢𑐫𑐵𑐟𑑅𑐐𑐸 𑐡𑐸 𑑋
𑐥𑑀𑐩𑑂𑐥𑐶𑐌𑑄 𑐠𑑅𑐐𑐸 𑐳𑐦𑐸𑐮𑐶𑐂 𑐫𑐵𑐣𑐵𑐟𑑅𑐐𑐸 𑐡𑐵𑐰𑐷𑐫𑐵𑐟 𑐢𑐵𑑅𑐳𑐵 𑐨𑐵𑐬𑐟 𑐰 𑐥𑐵𑐎𑐶𑐳𑑂𑐟𑐵𑐣 𑐣𑐶𑐐𑐸𑐮𑐶𑑄 𑐥𑐎𑑂𑐲𑑄 𑐕𑐸𑑄 𑐥𑑂𑐬𑐟𑐶𑐎𑑂𑐬𑐶𑐫𑐵 𑐧𑐶𑐄𑐐𑐸 𑐩𑐡𑐸𑐣𑐶 𑑋 𑐥𑑀𑐩𑑂𑐥𑐶𑐌 𑐄𑐧𑐮𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥𑐫𑐵 𑐎𑑂𑐫𑐵𑐧𑐶𑐣𑐾𑐚𑐫𑑂 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋
LEAVE YOUR COMMENTS