𑐀𑐬𑑂𑐧𑐥𑐟𑐶 𑐴𑐶𑐬𑐵 𑐧𑑂𑐫𑐵𑐥𑐵𑐬𑐷𑐫𑐵 𑐔𑑂𑐫𑐵𑐡𑑃 𑐡𑐸𑐩𑑂𑐴 𑐩𑑂𑐴𑑂𑐫𑐵𑐫𑑂 𑐨𑐶𑐎𑑂𑐲𑐸𑐞𑐷 𑐖𑐸𑐮
𑐊𑐖𑐾𑐣𑑂𑐳𑐷÷ 𑐨𑐵𑐬𑐟𑐫𑑂 𑐕𑐩𑑂𑐴 𑐴𑐶𑐬𑐵 𑐧𑑂𑐫𑐵𑐥𑐵𑐬𑐷𑐫𑐵 𑐔𑑂𑐫𑐵𑐡𑑃 𑐡𑐸𑐩𑑂𑐴 𑐩𑑂𑐴𑑂𑐫𑐵𑐫𑑂 𑐖𑐿𑐣 𑐢𑐬𑑂𑐩 𑐎𑐠𑑄 𑐨𑐶𑐎𑑂𑐲𑐸𑐞𑐷 𑐖𑐹𑐰𑑄𑐐𑐸 𑐡𑐸 𑑋 𑐀𑐬𑑂𑐧𑑁𑑄𑐫𑐵 𑐴𑐶𑐬𑐵 𑐧𑑂𑐫𑐵𑐥𑐵𑐬𑐷𑐫𑐵 𑐄𑐟𑑂𑐟𑐬𑐵𑐢𑐶𑐎𑐵𑐬𑐷 𑐖𑐸𑐫𑐵𑐔𑑂𑐰𑑄𑐩𑑂𑐴 𑐡𑐾𑐰𑐵𑑄𑐱𑐷 𑐳𑑄𑐑𑐰𑐷𑑄 𑐦𑐸𑐎𑑂𑐎 𑐎𑐠𑑄𑐫𑐵 𑐳𑐸𑐏𑐳𑐫𑐮 𑐟𑑂𑐰𑑅𑐟𑐵𑑅 𑐨𑐶𑐎𑑂𑐲𑐸𑐞𑐷𑐫𑐵 𑐎𑐛𑐷𑐣 𑐖𑐷𑐰𑐣 𑐴𑑄𑐰𑑄𑐐𑐸 𑐏𑑅 𑑋 𑐕𑐾𑑃𑐫𑑂 𑐔𑑂𑐰𑐣𑐵𑑅 𑐢𑐵𑑅𑐢𑐵𑑅𑐐𑐸 𑐣𑐫𑐾𑐟𑑂𑐰𑐣𑐾 𑐡𑐸𑐩𑑂𑐴, 𑐢𑐵𑑅𑐢𑐵𑑅𑐐𑐸 𑐰𑐳𑑅 𑐥𑐸𑐣𑐾 𑐡𑐸𑐩𑑂𑐴 𑐡𑐾𑐰𑐵𑑄𑐱𑐷 𑐁𑑅 𑐟𑐸𑐫𑐸𑐐𑐸 𑐰𑐳𑑅 𑐦𑐸𑐣𑐵𑑅 𑐏𑐵𑐮𑐷 𑐟𑐸𑐟𑐶𑑄 𑐕𑐾𑑃𑐫𑑂 𑐕𑐾𑑃𑐫𑑂 𑐔𑐵𑑅𑐴𑐶𑐮𑐵𑑅 𑐨𑐶𑐎𑑂𑐲𑐵 𑐦𑑂𑐰𑐣𑐵𑑅 𑐠𑑅𑐐𑐸 𑐖𑐷𑐰𑐣 𑐫𑐵𑐥𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐰𑑄𑐐𑐸 𑐰𑐵𑐮𑐫𑑂 𑐴𑐶𑐬𑐵 𑐧𑑂𑐫𑐵𑐥𑐵𑐬𑐷 𑐢𑐣𑐾𑐱 𑐳𑑄𑐑𑐰𑐷 𑐰 𑐰𑐫𑐵 𑐎𑐮𑐵𑑅 𑐀𑐩𑐷 𑐳𑑄𑐑𑐰𑐷𑐫𑐵 𑐣𑐶𑐩𑑂𑐴 𑐩𑑂𑐴𑐫𑐵𑐫𑑂 𑐩𑐢𑑂𑐫𑐾 𑐟𑑅𑐢𑐶𑐎𑑅𑐩𑑂𑐴 𑐩𑑂𑐴𑑂𑐫𑐵𑐫𑑂 𑐡𑐶𑐰𑐵𑑄𑐱𑐷 𑐖𑐿𑐣 𑐢𑐬𑑂𑐩𑐎𑐠𑑄 𑐨𑐶𑐎𑑂𑐲𑐸𑐞𑐷 𑐖𑐹𑐰𑑄𑐐𑐸 𑐏𑑅 𑑋 𑐨𑐵𑐬𑐟𑐫𑑂 𑐖𑐿𑐣 𑐢𑐬𑑂𑐩 𑐩𑐵𑐣𑐾 𑐫𑐵𑐂𑐥𑐶𑑄 𑐳𑑄𑐑𑐰𑐷𑐟𑐫𑑂 𑐖𑐣𑐳𑑄𑐏𑑂𑐫𑐵 𑑔𑑕 𑐮𑐵𑐏 𑐡𑐸 𑑋 𑐖𑐿𑐣 𑐢𑐬𑑂𑐩 𑑒𑑕𑑐𑑐 𑐡𑑃 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐳𑑂𑐠𑐵𑐥𑐶𑐟 𑐢𑐬𑑂𑐩 𑐏𑑅 𑑋 𑐠𑑁𑑄𑐎𑐣𑑂𑐴𑐫𑑂 𑐨𑐵𑐬𑐟𑐫𑑂 𑐠𑐠𑐾 𑐖𑐿𑐣 𑐢𑐬𑑂𑐩𑐫𑑂 𑐡𑐸𑐴𑐵𑑄 𑐰𑐣𑐵𑑅 𑐨𑐶𑐎𑑂𑐲𑐸–𑐨𑐶𑐎𑑂𑐲𑐸𑐞𑐷 𑐖𑐸𑐂𑐥𑐶𑑄 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑐫𑐵𑐔𑑂𑐰𑑄𑐳𑐵𑑄 𑐡𑐾𑐰𑐵𑑄𑐱𑐷𑑄 𑐠𑐾𑑄 𑐩𑐔𑐵 𑐂𑐮𑐫𑑂 𑐴𑐾 𑐨𑐶𑐎𑑂𑐲𑐸𑐞𑐷𑐫𑐵 𑐮𑑃𑐥𑐸 𑐮𑐶𑐂𑐐𑐸 𑐢𑐵𑑅𑐳𑐵 𑐀𑐳𑐵𑐩𑐵𑐣𑑂𑐫 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐡𑐾𑐰𑐵𑑄𑐱𑐷 𑐰𑑄𑐐𑐸 𑐧𑐸𑐢𑐰𑐵𑑅 𑐐𑐸𑐖𑐬𑐵𑐟𑐫𑐵 𑐳𑐸𑐬𑐟 𑐱𑐴𑐬𑐫𑑂 𑐖𑐿𑐣 𑐨𑐶𑐎𑑂𑐲𑐸𑐨𑐶𑐎𑑂𑐲𑐸𑐞𑐷 𑐰 𑐴𑐖𑐵𑐬𑑁𑑄 𑐀𑐣𑐸𑐫𑐵𑐫𑐷𑐟𑐫𑑂 𑐄𑐥𑐳𑑂𑐠𑐶𑐟𑐶𑐂 𑐡𑐷𑐎𑑂𑐲𑐵 𑐎𑐫𑐵𑑅 𑐐𑐺𑐴𑐟𑑂𑐫𑐵𑐐 𑐫𑐵𑐫𑐾𑐐𑐸 𑐥𑑂𑐬𑐞 𑐫𑐵𑑅𑐐𑐸 𑐏𑑅 𑑋 𑐡𑐷𑐎𑑂𑐲𑐵 𑐎𑐵𑑅𑐰𑑅𑐧𑐮𑐫𑑂 𑐠𑑅 𑐩𑐵𑑄𑐀𑐧𑐸 𑐮𑐶𑐳𑐾𑑄 𑐬𑐟𑑂𑐣𑐫𑐵 𑐟𑐶𑐳𑐵𑑄 𑐟𑐶𑐫𑐵𑑅 𑐬𑐾𑐱𑐩𑐫𑐵 𑐰𑐳𑑅 𑐥𑐸𑐣𑐵𑑅, 𑐴𑐶𑐬𑐵 𑐠𑐸𑐣𑐵𑐟𑑅𑐐𑐸 𑐩𑐟𑐹 𑐥𑐸𑐫𑐵𑐰𑑅𑐩𑑂𑐴 𑐡𑐾𑐰𑐵𑑄𑐱𑐷 𑐡𑐷𑐎𑑂𑐲𑐵 𑐎𑐵𑐫𑐾𑐢𑐸𑑄𑐎𑐵𑑅 𑐳𑑃 𑐦𑐸𑐎𑑂𑐎 𑐔𑐵𑐣𑐵𑑅 𑐟𑐸𑐫𑐸𑐐𑐸 𑐰𑐳𑑅 𑐥𑐸𑐣𑐵𑑅 𑐨𑐶𑐎𑑂𑐲𑐸𑐞𑐷 𑐖𑐹𑐰𑑄𑐐𑐸 𑐏𑑅 𑑋
𑐖𑐿𑐣 𑐢𑐬𑑂𑐩 𑐠𑑅 𑐮𑑃𑐫𑑂 𑐖𑐸𑐂𑐧𑐮𑐫𑑂 𑐣𑑄 𑐎𑐷 𑐕𑐩𑑂𑐴 𑐣𑑄 𑐳𑑂𑐫𑐵𑐫𑐾 𑐩𑐖𑐶𑐄 𑐢𑐫𑐵𑐐𑐸 𑐩𑐵𑐣𑑂𑐫𑐟𑐵 𑐡𑐸𑐐𑐸 𑐢𑐬𑑂𑐩 𑐏𑑅 𑑋 𑐄𑐎𑐶𑑄 𑐁𑑅 𑐡𑐾𑐰𑐵𑑄𑐱𑐷𑑄 𑐠𑑅 𑐮𑑃𑐫𑑂 𑐖𑐸𑐂𑐧𑐮𑐫𑑂 𑐣𑑄 𑐗𑐸𑐎𑐾 𑐖𑐸𑐫𑐵𑑅 𑐣𑑄 𑐎𑐷𑐫𑐵𑐟 𑐩𑐣𑑂𑐴𑐸𑐂𑐩𑐵 𑐢𑐎𑐵𑑅 𑐧𑑃 𑐥𑐸𑐫𑐵𑑅 𑐰𑐣𑐾𑐟 𑐟𑐸𑐦𑐶 𑐕𑐥𑐸 𑐣𑑄 𑐖𑑂𑐰𑐣𑐵 𑐖𑐸𑐂 𑑋 𑐁𑑅 𑐡𑐾𑐰𑐵𑑄𑐱𑐷 𑐩𑐾𑐩𑐾𑐥𑐶𑑄 𑐖𑐿𑐣 𑐨𑐶𑐎𑑂𑐲𑐸𑐨𑐶𑐎𑑂𑐲𑐸𑐞𑐷𑐥𑐶𑑄 𑐔𑑂𑐰𑐣𑐵 𑐰𑐫𑐵𑐔𑑂𑐰𑑄𑐐𑐸 𑐄𑐥𑐵𑐱𑑂𑐬𑐫 𑐢𑐵𑑅𑐐𑐸 𑐁𑐱𑑂𑐬𑐩𑐫𑑂 𑐔𑑂𑐰𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐳𑑄𑐑𑐰𑐷 𑐢𑐫𑐵𑐥𑐶𑑄 𑐖𑐿𑐣 𑐢𑐬𑑂𑐩 𑐡𑐸𑐣𑐾𑐫𑐵 𑐣𑑄 𑐠𑐖𑑂𑐫𑐵𑑅𑐐𑐸 𑐳𑐩𑑂𑐥𑑂𑐬𑐡𑐵𑐫 𑐏𑑅, 𑐐𑐣 𑐩𑐳𑑂𑐟𑐫𑑂𑐟 𑐣𑑄 𑐨𑐶𑐎𑑂𑐲𑐸–𑐨𑐶𑐎𑑂𑐲𑐸𑐞𑐷𑐫𑐵 𑐬𑐸𑐥𑐫𑑂 𑐳𑑂𑐰𑐷𑐎𑐵𑐬 𑐫𑐵𑐂 𑑋 𑐡𑐾𑐰𑐵𑑄𑐱𑐷𑐫𑐵 𑐀𑐨𑐶𑐨𑐵𑐰𑐎𑐥𑐶𑑄 ‘𑐟𑐳𑐎𑑄 𑐢𑐵𑐬𑑂𑐩𑐶𑐎’ 𑐎𑐠𑑄 𑐩𑑂𑐴𑐳𑐷𑐎𑐵 𑐡𑐸𑐥𑐶𑑄 𑐏𑑅 𑑋 𑐄𑐩𑐶 𑐕𑐾𑑃𑐖𑑅𑐥𑐶𑑄𑐳𑑄 𑐢𑐵𑑅𑐎𑐠𑑄 𑐡𑐾𑐰𑐵𑑄𑐱𑐷 𑐣𑑄 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐀𑐟𑑂𑐫𑐵𑐟𑑂𑐩𑐶𑐎 𑐖𑐷𑐰𑐣𑐥𑐵𑐏𑐾𑑄 𑐗𑐸𑐎𑐵𑐰 𑐡𑐸𑐩𑑂𑐴 𑐏𑑅 𑑋 𑐄𑐩𑐶𑐐𑐸 𑐎𑐠𑑄 𑐡𑐾𑐰𑐵𑑄𑐱𑐷𑑄 𑐐𑐸𑐧𑐮𑐾𑑄 𑐣𑑄 𑐚𑐶𑐨𑐷 𑐰𑐵 𑐳𑑄𑐎𑐶𑐥𑐵 𑐩𑐳𑑂𑐰𑑅, 𑐀𑐮𑐾 𑐐𑐸𑐧𑐮𑐾𑑄 𑐣𑑄 𑐩𑐮 𑐰𑐵 𑐬𑐾𑐲𑑂𑐚𑐸𑐬𑐵𑑃𑐫𑑂 𑐩𑐰𑑄 𑑋 𑐚𑐵𑐂𑐩𑑂𑐳 𑐀𑐦 𑐂𑐜𑐶𑐞𑑂𑐫𑐵𑐫𑐵 𑐎𑐠𑑄 𑐡𑐾𑐰𑐵𑑄𑐱𑐷𑑄 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐣𑑂𑐴𑐶 𑐳𑑂𑐰𑐎𑑂𑐰𑑅 𑐥𑑂𑐬𑐵𑐬𑑂𑐠𑐣𑐵 𑐫𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐀𑐮𑐾 𑐣𑐶𑐡𑑃 𑐡𑐸𑐧𑐮𑐫𑑂 𑐣𑐶𑐳𑐾𑑄 𑐴𑐾 𑐰𑑂𑐬𑐟 𑐔𑑂𑐰𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐡𑐾𑐰𑐵𑑄𑐱𑐷 𑐳𑑄𑐣𑑂𑐫𑐵𑐳 𑐐𑑂𑐬𑐴𑐞 𑐫𑐵𑐫𑐾 𑐕𑐣𑑂𑐴𑐸 𑐣𑑂𑐴𑑂𑐫𑑅 𑐰𑐫𑐵 𑐕𑐾𑑃𑐖𑑅𑐥𑐶𑑄𑐳𑑄 𑐳𑐸𑐬𑐟𑐫𑑂 𑐎𑐶𑐳𑐶, 𑐳𑐮, 𑐐𑑀𑐬𑐸𑐐𑐵𑐜𑐵𑐫𑑂 𑐠𑐷𑐠𑐷 𑐗𑐵𑑃𑐎𑐷𑐟𑐫𑐵𑑅 𑐟𑑅𑐢𑑄𑐐𑐸 ¥𑐫𑐵𑐮𑐷 𑐣𑑄 𑐥𑐶𑐎𑐵𑑅𑐐𑐸 𑐏𑑅 𑑋 𑐄𑐧𑐮𑐫𑑂 𑐡𑐾𑐰𑐵𑑄𑐱𑐷 𑐰 𑐰𑐫𑐵 𑐕𑐾𑑃𑐖𑑅𑐥𑐶𑑄 𑐎𑐶𑐳𑐶 𑐳𑐵𑐮𑐵𑐴𑑅𑐐𑐸 𑐬𑐠𑐫𑑂 𑐔𑑂𑐰𑐣𑐵𑐰𑑅𑐐𑐸 𑐏𑑅 𑑋
𑐡𑐾𑐰𑐵𑑄𑐱𑐷𑑄 𑐳𑑄𑐣𑑂𑐫𑐵𑐳 𑐐𑑂𑐬𑐴𑐞 𑐫𑐵𑑅𑐐𑐸 𑐮𑐳𑐟𑐵𑐫𑑂 𑐩𑐸𑐩𑑂𑐧𑐃𑐫𑐵 𑐮𑐶𑐳𑐾𑑄 𑐧𑐾𑐮𑑂𑐖𑐶𑐫𑐩𑐫𑐵 𑐊𑐣𑑂𑐚𑐰𑐬𑑂𑐥𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐳𑑄𑐑𑐰𑐷 𑐳𑐩𑑂𑐥𑑂𑐬𑐡𑐵𑐫𑑄 𑐄𑐟𑑂𑐳𑐰 𑐣𑑂𑐫𑐵𑐫𑐾𑐎𑐹𑐐𑐸 𑐏𑑅 𑑋
𑐡𑐾𑐰𑐵𑑄𑐱𑐷𑐫𑐵 𑐳𑑄𑐣𑑂𑐫𑐵𑐳𑐫𑐵𑐟 𑐖𑐿𑐣 𑐳𑐩𑐸𑐡𑐵𑐫𑐫𑐵𑐥𑐶𑑄𑐳𑑄 𑐳𑐩𑐬𑑂𑐠𑐣 𑐫𑐵𑑅𑐳𑐵𑑄 𑐀𑐢𑐶𑐎𑐵𑐬𑐎𑐬𑑂𑐩𑐷𑐟𑐫𑑂𑐳𑑄 𑐢𑐵𑑅𑐳𑐵 𑐩𑐔𑐵 𑐀𑐢𑐶𑐎𑐵𑐬𑐫𑐵 𑐴𑐣𑐣 𑐖𑐹𑐐𑐸 𑐢𑐵𑐳𑐾𑑄 𑐎𑐸𑑄𑐏𑐶𑐄𑑃𑐐𑐸 𑐡𑐸 𑑋 𑐀𑐢𑐶𑐎𑐵𑐬𑐎𑐬𑑂𑐩𑐷𑐟𑐫𑑂𑐳𑑄 𑐩𑐔𑐵𑑄 𑐳𑑄𑐣𑑂𑐫𑐵𑐳𑐷 𑐖𑐸𑐂 𑐢𑐎𑐵𑑅 𑐳𑐴𑐩𑐟𑐶 𑐴𑐾 𑐧𑐶𑐄𑐳𑐵𑑄 𑐎𑐵𑐣𑐸𑐣𑐷 𑐳𑐴𑐩𑐟𑐶 𑐖𑐸𑐂𑐩𑐏𑐸 𑐢𑐵𑑅𑐐𑐸 𑐡𑐸 𑑋 𑐎𑐵𑐣𑐸𑐣𑐷 𑐬𑐸𑐥𑑄 𑐠𑑅𑐩𑑂𑐴𑑄 𑐠𑑅𑐐𑐸 𑐧𑐵𑐬𑐾 𑐣𑐶𑐬𑑂𑐞𑐫 𑐫𑐵𑐫𑐾𑐦𑐂 𑐢𑐫𑐵𑐐𑐸 𑑑𑑘 𑐡𑑃 𑐡𑐫𑐾𑐢𑐸𑑄𑐎𑐵𑑅 𑐖𑐸𑐂 𑐢𑐵𑐳𑐾𑑄 𑐄𑐩𑐶𑐳𑑄 𑐡𑐾𑐰𑐵𑑄𑐱𑐷𑑄 𑐳𑑄𑐣𑑂𑐫𑐵𑐳 𑐎𑐵𑑅𑐐𑐸 𑐣𑐶𑐬𑑂𑐞𑐫 𑐰𑐫𑐵 𑐩𑐵𑑄𑐀𑐧𑐸𑐥𑐶𑑄𑐳𑑄 𑐫𑐵𑑅𑐐𑐸 𑐣𑐶𑐬𑑂𑐞𑐫 𑐖𑐹𑐐𑐸 𑐰 𑐠𑐸𑐎𑐶𑑄 𑐰𑐫𑐵𑐐𑐸 𑐴𑐶𑐟 𑐡𑐸 𑐎𑐶 𑐩𑐡𑐸 𑐢𑐫𑐵𑐐𑐸 𑐧𑐶𑐔𑐵𑑅 𑐩𑐫𑐵𑑅 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋
‘𑐠𑐖𑑂𑐫𑐵𑑅𑐐𑐸 𑐣𑐶𑐬𑑂𑐞𑐫𑑄 𑐩𑐔𑐵𑐫𑐵𑐟 𑐱𑐶𑐎𑑂𑐲𑐵 𑐰 𑐩𑐣𑑀𑐬𑐘𑑂𑐖𑐣𑑄 𑐧𑐘𑑂𑐔𑐶𑐟 𑐫𑐵𑐟 𑐢𑐵𑑅𑐳𑐵 𑐠𑑂𑐰 𑐀𑐢𑐶𑐎𑐵𑐬𑐫𑐵 𑐄𑐮𑑂𑐮𑑄𑐑𑐣 𑐏𑑅’ 𑐕𑐩𑑂𑐴 𑐀𑐢𑐶𑐎𑐵𑐬𑐎𑐬𑑂𑐩𑐷𑑄 𑐢𑐵𑑅𑐐𑐸 𑐡𑐸 𑑋
𑐟𑐬 𑐩𑐸𑐩𑑂𑐧𑐃 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐖𑐿𑐣 𑐡𑐬𑑂𑐱𑐣 𑐧𑑂𑐫𑑄𑐎𑐵 𑐰𑐫𑐵𑐔𑑂𑐰𑑄𑐩𑑂𑐴 𑐜𑐵. 𑐰𑐶𑐥𑐶𑐣 𑐡𑑀𑐲𑐷𑑄 𑐢𑐵𑑅𑐐𑐸 𑐡𑐸, ‘𑐡𑐾𑐰𑐵𑑄𑐱𑐷 𑐥𑐬𑐩𑑂𑐥𑐬𑐵𑐐𑐟 𑐩𑐣𑑀𑐬𑐘𑑂𑐖𑐣𑐥𑐵𑐏𑐾𑑄 𑐧𑐘𑑂𑐔𑐶𑐟 𑐖𑐸𑐂𑐦𑐸, 𑐟𑐬 𑐕𑐸 𑐠𑑂𑐰 𑐢𑐵𑐠𑐾𑑄 𑐡𑐎𑑂𑐰𑐳𑐶𑐟𑑄 𑐩𑐵𑑅 𑐴𑐾 𑐢𑐫𑐵𑐐𑐸 𑐡𑐸 𑐮𑐵 ? 𑐰 𑐥𑑂𑐬𑐾𑐩 𑐰 𑐱𑐶𑐎𑑂𑐲𑐵𑐥𑐵𑐏𑐾𑑄 𑐧𑐘𑑂𑐔𑐶𑐟 𑐖𑐸𑐂 𑐢𑐫𑐵𑐐𑐸 𑐏𑑃𑐫𑑂 𑐖𑐶 𑐳𑐴𑐩𑐟 𑐩𑐡𑐸 𑑋 𑐰𑑄 𑐠𑑅 𑐐𑐸𑐬𑐸𑐫𑐵 𑐩𑐵𑐫𑐵 𑐔𑐹𑐮𑐵𑐎𑐷, 𑐀𑐮𑐾 𑐂𑐩𑐵𑐣𑑂𑐡𑐵𑐬 𑐖𑐸𑐫𑐵𑑅 𑐀𑐳𑑄𑐮𑐐𑑂𑐣 𑐖𑐸𑐂𑐐𑐸 𑐳𑐫𑐾𑐎𑐷 𑑋 𑐠𑑂𑐰 𑐕𑐸 𑐗𑐣𑑂 𑐧𑐵𑑄𑐮𑐵𑑅𑐐𑐸 𑐏𑑃 𑐩𑐏𑐸𑐮𑐵 ?’
𑐫𑐡𑐶 𑐡𑐾𑐰𑐵𑑄𑐱𑐷 𑐮𑐶𑐥𑐵 𑐠𑑅𑐐𑐸 𑐧𑐶𑐔𑐵𑑅 𑐴𑐶𑐮𑐵𑑅 𑐨𑐶𑐎𑑂𑐲𑐸𑐞𑐷 𑐖𑐷𑐰𑐣 𑐟𑑂𑐫𑐵𑐐 𑐫𑐵𑐣𑐵𑑅 𑐥𑐸𑐮𑐵𑑄𑐐𑐸 𑐖𑐷𑐰𑐣𑐫𑑂 𑐮𑐶𑐴𑐵𑑄 𑐰𑐫𑐾 𑐔𑐵𑐴𑐾 𑐖𑐹𑐳𑐵 𑐰𑐫𑐾𑐦𑐂 𑐢𑐵𑑅𑐐𑐸 𑐡𑐸 𑑋 𑐨𑐵𑐬𑐬𑐟𑐫𑑂 𑐳𑐣𑑂 𑑒𑑐𑑐𑑙 𑐫𑑂 𑐕𑐩𑑂𑐴 𑑒𑑑 𑐡𑑃 𑐡𑐸𑐩𑑂𑐴 𑐖𑐿𑐣 𑐨𑐶𑐎𑑂𑐲𑐸𑐞𑐷 𑐁𑐱𑑂𑐬𑐩𑑄 𑐧𑐶𑐳𑐶𑐄𑑃 𑐰𑐫𑐵𑑅 𑐠𑑅 𑐥𑑂𑐬𑐾𑐩𑐷𑐮𑐶𑐳𑐾 𑐧𑑂𑐫𑐵𑐴𑐵 𑐫𑐵𑑅𑐐𑐸 𑐏𑑅 𑑋 𑐰 𑐣𑑄 𑐐𑐸𑐡𑑃 𑐡𑐸𑐧𑐮𑐫𑑂 𑐴𑐾 𑐨𑐶𑐎𑑂𑐲𑐸𑐞𑐷 𑐖𑐹𑐰𑑄𑐩𑑂𑐴 𑐏𑑅 𑑋
LEAVE YOUR COMMENTS