𑐦𑐸𑐚𑐧𑐮 𑐎𑐵𑐳𑐵𑐫𑑂 𑐦𑐶𑐮𑑂𑐩 𑐧𑐣𑑂𑐖𑐵𑑅𑐫𑐵𑐟 𑐴𑐣

𑐫𑐮(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐳𑑄𑐳𑐵𑐬 𑐎𑑂𑐬𑐶𑐫𑐳𑐣𑑂𑐳𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐳𑑄𑐳𑐵𑐬 𑐎𑐥 𑐦𑐸𑐚𑐧𑐮 𑐎𑐵𑐳𑐵𑐫𑐵 𑐗𑑂𑐰𑐮𑐫𑑂 𑐣𑐶𑐩𑑂𑐴 𑐦𑐶𑐮𑑂𑐩 𑐧𑐣𑑂𑐖𑐵𑑅𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐠𑐣𑐫𑐵 𑐏𑑀𑐣𑐵𑐫𑑂 𑐔𑑂𑐰𑑄𑐐𑐸 𑐖𑑂𑐘𑐵𑐣𑑀𑐡𑐫 𑐧𑐵𑐮𑐧𑐵𑐚𑐶𑐎𑐵 𑐳𑑂𑐎𑐸𑐮𑐫𑑂 𑐖𑐹𑐐𑐸 𑐦𑐸𑐚𑐧𑐮 𑐎𑐵𑐳𑐵𑐮𑐶𑐳𑐾𑑄 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐄𑐐𑐸 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐔𑐮𑐔𑐶𑐟𑑂𑐬 𑐰𑐶𑐎𑐵𑐳 𑐧𑑀𑐬𑑂𑐜𑐫𑐵 𑐳𑐮𑑂𑐮𑐵𑐴𑐎𑐵𑐬𑐫𑑂 𑐣𑐶𑐫𑐸𑐎𑑂𑐟 𑐖𑐸𑐫𑐵𑐡𑐷𑐩𑑂𑐴 𑐣𑐵𑑄𑐖𑐵𑑅𑐩𑑂𑐴 𑐦𑐶𑐮𑑂𑐩 𑐧𑐣𑑂𑐖𑐵𑑅 𑐐𑑀𑐥𑐵𑐮𑐎𑐵𑐖𑐷 𑐎𑐵𑐫𑐳𑑂𑐠 𑐰 𑐣𑐾𑐥𑐵𑐮 𑐔𑐮𑐔𑐶𑐟𑑂𑐬 𑐳𑑄𑐑𑐫𑐵 𑐩𑐴𑐵𑐳𑐔𑐶𑐰 𑐦𑐶𑐮𑑂𑐩 𑐧𑐣𑑂𑐖𑐵𑑅 𑐣𑐬𑐾𑐣𑑂𑐡𑑂𑐬 𑐩𑐴𑐬𑑂𑐖𑐣𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐎𑑂𑐬𑐶𑐫𑐳𑐣𑑂𑐳𑐫𑐵 𑐎𑐖𑐶 𑐳𑑂𑐰𑐟𑐣𑑂𑐟𑑂𑐬 𑐳𑑄𑐳𑐵𑐬 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑑 𑐰𑐜𑐵𑐀𑐢𑑂𑐫𑐎𑑂𑐲 𑐬𑐰𑐶𑐣𑑂𑐡𑑂𑐬 𑐩𑐴𑐬𑑂𑐖𑐣𑑄 𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐟 𑐴𑐣𑐵𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑑄𑐳𑑂𑐠𑐵𑐫𑐵 𑐳𑑄𑐳𑑂𑐠𑐵𑐥𑐎 𑐥𑐾𑑂𑐬𑐩𑐵𑐴𑐵 𑐩𑐴𑐬𑑂𑐖𑐣𑑄 𑐏𑐵𑐡𑐵 𑐰 𑐳𑐮𑑂𑐮𑐵𑐴𑐎𑐵𑐬 𑐰𑐶𑐖𑐫𑐬𑐟𑑂𑐣 𑐀𑐳𑑄𑐧𑐬𑐾𑑄 𑐳𑑂𑐰𑐵𑑄𑐩𑐵𑑅 𑐎𑑂𑐰𑐏𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐎𑑂𑐬𑐶𑐫𑐳𑐣𑑂𑐳𑐫𑐵 𑐐𑑂𑐰𑐳𑐵𑐮𑐫𑑂 𑐰𑐶𑐱𑑂𑐰𑐫𑑂 𑐡𑐎𑐮𑐫𑑂 𑐟𑐵𑑅𑐴𑐵𑐎𑑅𑐐𑐸 𑐰 𑐟𑑅𑐢𑑄𑐐𑐸 𑐀𑐰𑐵𑐬𑑂𑐜 𑐖𑑂𑐫𑐵𑐗𑑂𑐰𑑅 𑐡𑐵𑐰𑐷 𑐫𑐵𑐣𑐵𑐟𑑅𑐐𑐸 𑐣𑐶𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑑂𑐚𑐵𑐬 𑐩𑑂𑐫𑐸𑐖𑐶𑐎 𑐀𑐰𑐵𑐬𑑂𑐜𑐫𑐵 𑐥𑑂𑐬𑐩𑑀𑐳𑐣 𑐫𑐵𑐫𑐾𑐎𑐠𑑄 𑐄𑐐𑐸 𑐦𑑂𑐸𑐚𑐧𑐮 𑐎𑐵𑐳𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐎𑐵𑐳𑐵 𑐮𑐶𑐥𑐵 𑐖𑐹𑐐𑐸 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐳𑐬𑐳𑑂𑐰𑐟𑐶 𑐩𑐵𑐣𑐣𑑂𑐢𑐬, 𑐎𑐶𑐱𑑀𑐬 𑐱𑐵𑐴𑐷 , 𑐎𑐮𑑂𑐥𑐣𑐵 𑐱𑑂𑐬𑐾𑐲𑑂𑐛 𑐮𑐐𑐵𑐫𑐟𑐫𑐵 𑐎𑐮𑐵𑐎𑐵𑐬𑑄 𑐠𑑅𑐠𑑅𑐐𑐸 𑐳𑐵𑑄𑐐𑐷𑐟𑐶𑐎 𑐥𑑂𑐬𑐳𑑂𑐟𑐸𑐟𑐶 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸𑐸 𑐏𑑅 𑑋 𑐀𑐠𑐾 𑐴𑐾 𑐰𑐜𑐵𑐀𑐢𑑂𑐫𑐎𑑂𑐲 𑐩𑐴𑐬𑑂𑐖𑐣𑑄 𑐦𑐸𑐚𑐧𑐮 𑐎𑐵𑐳𑐵𑐫𑑂 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐥𑐸𑐔𑑅 𑐰 𑐎𑐮𑐵𑐎𑐵𑐬𑐥𑐶𑑄𑐟 𑐡𑐳𑐶𑐥𑑁, 𑐩𑐾𑐜𑐮 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋