𑐥𑐾𑐳𑑂𑐟𑑀𑐮 𑐎𑑂𑐫𑑄𑐩𑑂𑐴 𑐥𑑂𑐬𑐴𑐬𑐷 𑐰𑐶𑐬𑐸𑐡𑑂𑐢 𑐕𑐵𑐣𑐧𑐶𑐣
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐳𑐎𑑂𑐰 𑐣𑐐𑐬𑐥𑐵𑐮𑐶𑐎𑐵 𑐧𑑀𑐗𑐣𑐷 𑐢𑐵𑑅𑐐𑐸 𑐠𑐵𑐳𑐫𑑂 𑐖𑐹𑐐𑐸 𑐁𑐣𑑂𑐡𑑀𑐮𑐣𑐫𑑂 𑐰𑑅𑐥𑐶𑑄 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐟 𑐥𑐾𑐳𑑂𑐟𑑀𑐮 𑐟𑐵𑐎𑐾 𑐫𑐵𑑅𑐩𑑂𑐴 𑐂𑐣𑑂𑐳𑑂𑐥𑐾𑐎𑑂𑐚𑐬 𑐰𑐶𑐱𑐵𑐮𑐧𑐴𑐵𑐡𑐸𑐬 𑐧𑐸𑐝𑐵𑐠𑑀𑐎𑐷𑐧𑐵𑐬𑐾 𑐕𑐵𑐣𑐰𑐶𑐣 𑐱𑐸𑐬𑐸 𑐫𑐵𑑅𑐐𑐸 𑐡𑐸 𑑋
𑐳𑐎𑑂𑐰𑐫𑐵 𑐱𑑄𑐏𑐬𑐵𑐥𑐸𑐬 𑐣𑐐𑐬𑐥𑐵𑐮𑐶𑐎𑐵 𑑓 𑐳𑑂𑐠𑐶𑐟 𑐧𑑀𑐗𑐣𑐷𑐂 𑐰𑐶𑐡𑑂𑐫𑐸𑐟 𑐳𑐧𑐳𑑂𑐚𑐾𑐱𑐣 𑐡𑐫𑐾𑐎𑐾𑐟𑑂𑐫𑑄𑐐𑐸 𑐰𑐶𑐬𑑀𑐢𑐫𑑂 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐳𑑄 𑐥𑑂𑐬𑐡𑐬𑑂𑐱𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐖𑐹𑐐𑐸 𑐥𑑂𑐬𑐡𑐬𑑂𑐱𑐣 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐟 𑐧𑑁𑐡𑑂𑐢𑐫𑐵 𑐥𑑂𑐬𑐴𑐬𑐷 𑐚𑑀𑐮𑐷 𑐣𑑄 𑐏𑐚𑐾 𑐖𑐹𑐐𑐸 𑐏𑑅 𑑋 𑐄𑐐𑐸 𑐚𑑀𑐮𑐷𑐫𑐵 𑐥𑑂𑐬𑐴𑐬𑐷 𑐣𑐶𑐬𑐷𑐎𑑂𑐲𑐎 𑐧𑐸𑐝𑐵𑐠𑑀𑐎𑐷𑑄 𑐥𑑂𑐬𑐡𑐬𑑂𑐱𑐣𑐎𑐵𑐬𑐷𑐟𑐫𑑂𑐟 ‘𑐐𑑀𑐮𑐷𑑄 𑐎𑐫𑐾𑐎𑐾 𑐮𑐵 ?’ 𑐢𑐎𑐵𑑅 𑐥𑐾𑐳𑑂𑐟𑑀𑐮 𑐟𑐵𑐎𑐾 𑐫𑐵𑑅𑐐𑐸 𑐏𑑅 𑑋 𑐧𑐸𑐝𑐵𑐠𑑀𑐎𑐷𑑄 𑐀𑐣 𑐐𑐿𑐬𑐰𑑂𑐫𑐰𑐳𑐵𑐫𑐶𑐎 𑐖𑑂𑐫𑐵 𑐫𑐵𑑅𑐐𑐸 𑐢𑐵𑐳𑐾𑑄 𑐰𑐫𑐵𑐐𑐸 𑐰𑐶𑐬𑐸𑐡𑑂𑐢 𑐕𑐵𑐣𑐰𑐶𑐣 𑐖𑐹𑐐𑐸 𑐏𑑅 𑑋
𑐧𑑀𑐗𑐣𑐷𑐂 𑐣𑐾𑐥𑐵𑐮 𑐰𑐶𑐡𑑂𑐫𑐸𑐟 𑐥𑑂𑐬𑐵𑐢𑐶𑐎𑐬𑐞𑑄 𑐡𑐫𑐾𑐎𑐾𑐟𑑂𑐫𑑄𑐐𑐸 𑐰𑐶𑐡𑑂𑐫𑐸𑐟𑐷𑐫 𑐳𑐧𑐳𑑂𑐚𑐾𑐳𑐣𑑄 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐁𑐡𑐶𑐨𑐹𑐩𑐶 𑐮𑐵𑐎𑐵𑑅 𑐠𑑅𑐥𑐶𑑄𑐟 𑐰𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐟𑑂𑐫𑑄𑐐𑐸 𑐢𑐵𑐳𑐾𑑄 𑐁𑐣𑑂𑐡𑑀𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐳𑑂𑐠𑐵𑐣𑐷𑐫 𑐰𑐵𑐳𑐶𑐣𑑂𑐡𑐵𑐫𑐵 𑐁𑐣𑑂𑐡𑑀𑐮𑐣𑐫𑐵𑐟 𑐧𑐺𑐴𑐟 𑐣𑐵𑐐𑐬𑐶𑐎 𑐁𑐣𑑂𑐡𑑀𑐮𑐣𑑄 𑐣𑑄 𑐳𑐩𑐬𑑂𑐠𑐣 𑐫𑐵𑑅𑐐𑐸 𑐡𑐸 𑑋
𑐧𑐺𑐴𑐟 𑐣𑐵𑐐𑐬𑐶𑐎 𑐁𑐣𑑂𑐡𑑀𑐮𑐣𑑄 𑐩𑑂𑐴𑐶𑐐𑑅 𑐖𑐵𑐬𑐷 𑐫𑐵𑑅𑐐𑐸 𑐰𑐶𑐖𑑂𑐘𑐥𑑂𑐟𑐶𑐂 𑐢𑐫𑐵𑐟𑑅𑐐𑐸 𑐡𑐸, ‘𑐰𑐶𑐎𑐵𑐳𑑄 𑐥𑑂𑐬𑐨𑐵𑐰 𑐮𑐵𑐂𑐥𑐶𑑄 𑐖𑐣𑐟𑐵𑐮𑐶𑐳𑐾 𑐫𑐵𑐫𑐾𑐩𑐵𑑅𑐐𑐸 𑐳𑐴𑐩𑐟𑐶 𑐰 𑐳𑐴𑐎𑐵𑐬𑑂𑐫𑐫𑐵𑐟 𑐣𑑂𑐴𑐸𑐫𑐵𑑅 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐖𑐣𑐟𑐵𑐫𑐵𑐟 𑐄𑐛𑐶𑐧𑐵𑐳 𑐫𑐵𑐫𑐾𑐐𑐸, 𑐐𑐸𑐐𑐸𑑄 𑐣𑑄 𑐧𑐳𑑂𑐟𑐷, 𑐳𑐩𑐸𑐡𑐵𑐫 𑐰𑐵 𑐳𑑂𑐠𑐵𑐣𑐫𑐵 𑐋𑐟𑐶𑐴𑐵𑐳𑐶𑐎𑐟𑐵 𑐴𑐾 𑐢𑑂𑐰𑐳𑑂𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐳𑑂𑐰𑐷𑐎𑐵𑐬𑑂𑐫 𑐩𑐡𑐸 𑑋’
LEAVE YOUR COMMENTS