𑐫𑐾𑑃–𑐎𑐾𑐬𑐸𑐒 𑐬𑐾𑐮𑐩𑐵𑐬𑑂𑐐𑐫𑐵 𑐀𑐢𑑂𑐫𑐫𑐣 𑐱𑐸𑐬𑐸

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐫𑐾𑑃𑐣𑐶𑐳𑐾𑑄 𑐔𑐷𑐣𑐫𑐵 𑐎𑐾𑐬𑐸𑐒 𑐠𑑂𑐫𑐣𑐷𑐐𑐸 𑐬𑐾𑐮 𑐩𑐵𑐬𑑂𑐐𑐫𑐵 𑐰𑐶𑐳𑑂𑐟𑐺𑐟 𑐀𑐢𑑂𑐫𑐫𑐣–𑐫𑐵 𑐖𑑂𑐫𑐵 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑑅𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐟 𑐳𑑀𑐩𑐰𑐵𑑅 𑐖𑐎 𑐕𑐐𑐹 𑐔𑐶𑐣𑐶𑐫𑐵𑑃 𑐥𑐸𑐔𑑅 𑐣𑐾𑐥𑐵𑑅 𑐠𑑂𑐫𑑄𑐎𑑅 𑐰𑑅𑐐𑐸 𑐏𑑅𑐳𑐵 𑐄𑐐𑐸 𑐥𑐸𑐔𑐮𑑄 𑐀𑐢𑑂𑐫𑐫𑐣𑐫𑐵 𑐖𑑂𑐫𑐵 𑐱𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐠𑑂𑐰 𑐰𑐶𑐳𑑂𑐟𑐺𑐟 𑐀𑐢𑑂𑐫𑐫𑐣 𑐖𑐎 𑐫𑐵𑐫𑐾𑐟 𑐴𑐾 𑐳𑑂𑐰𑐡𑑃 𑐧𑐷𑐐𑐸 𑐏𑑃 𑐡𑐸 𑑋 𑐔𑐷𑐣𑑄 𑐡𑐫𑐾𑐎𑐵 𑐧𑐷𑐐𑐸 𑐢𑐎𑐵𑑅 𑐥𑑂𑐬𑐳𑑂𑐟𑐵𑐰𑐶𑐟 𑐫𑐵𑐣𑐵𑐟𑑅𑐐𑐸 𑐠𑑂𑐰 𑐬𑐾𑐮 𑐔𑐷𑐣𑐫𑐵 𑐎𑐾𑐬𑐸𑐒𑑄 𑐣𑐾𑐥𑐵𑑅𑐫𑐵 𑐬𑐳𑐸𑐰𑐵– 𑐐𑐝𑐷 𑐖𑐸𑐫𑐵𑑅 𑐫𑐾𑑃𑐫𑑂 𑐟𑐎 𑐠𑑂𑐫𑐣𑐷 𑑋

𑐰𑑄𑐐𑐸 𑐰𑐶.𑐳𑑄. 𑑒𑑐𑑗𑑕 𑐳𑐵𑐮𑐫𑑂 𑐠𑑂𑐰 𑐬𑐾𑐮𑐩𑐵𑐬𑑂𑐐𑐫𑐵 𑐥𑐹𑐬𑑂𑐰 𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐖𑐹𑐐𑐸 𑐏𑑅𑐳𑐵 𑐔𑐶𑐣𑐶𑐫𑐵𑑃 𑐬𑐵𑐲𑑂𑐚𑑂𑐬𑐥𑐟𑐶 𑐳𑐷 𑐔𑐶𑐣𑐦𑐶𑐒 𑐰𑑄𑐐𑐸 𑐀𑐳𑑀𑐖𑐫𑑂 𑐣𑐾𑐥𑐵𑑅 𑐰𑐫𑐾𑐰𑑄 𑐠𑐸𑐎𑐶𑐫𑐵 𑐰𑐶𑐳𑑂𑐟𑐺𑐟 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐳𑐴𑐩𑐟𑐶 𑐖𑐹𑐐𑐸 𑐏𑑅 𑑋 𑐟𑐬 𑐡𑐠𑐸𑐂 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑑄 𑐫𑐵𑐣𑐵𑑅 𑐖𑑂𑐫𑐵 𑐣𑑂𑐴𑑂𑐫𑐵𑑅 𑐰𑐣𑐾 𑐩𑐦𑐸𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐖𑐹𑐧𑐮𑐫𑑂 𑐬𑐾𑐮𑐩𑐵𑐬𑑂𑐐 𑐐𑐣𑑄 𑐐𑐣 𑐟𑐎 𑐫𑑄𑐎𑐾𑐐𑐸 𑐢𑐎𑐵𑑅 𑐀𑐢𑑂𑐫𑐫𑐣 𑐖𑐹𑐐𑐸 𑐏𑑅 𑑋

𑐰𑐶𑐖𑑂𑐘𑐟𑐫𑑂𑐳𑑄 𑐢𑐵𑑅𑐎𑐠𑑄 𑐨𑑁𑐐𑑀𑐮𑐶𑐎 𑐎𑐵𑐬𑐞𑑄 𑐫𑐵𑐣𑐵𑑅 𑐠𑑂𑐰 𑐬𑐾𑐮𑐩𑐵𑐬𑑂𑐐𑐫𑐵 𑐣𑐶𑐬𑑂𑐩𑐵𑐞 𑐀𑐟𑐶𑐎𑑄 𑐖𑐚𑐶𑐮 𑐖𑐸𑐂𑐐𑐸 𑐏𑐣𑐾𑐡𑐸 𑑋 𑐟𑐳𑐎𑑄 𑐟𑐖𑐵𑑅𑐐𑐸 𑐠𑐵𑐳𑑄 𑐕𑐎𑑂𑐰𑐮𑑄 𑐔𑐶𑐖𑐵𑑅𑐐𑐸 𑐠𑐵𑐳𑐫𑑂 𑐎𑐸𑐴𑐵𑑄 𑐰𑐫𑐾𑐩𑐵𑑅𑐐𑐸 𑐖𑐸𑐫𑐵𑑅 𑐠𑐸𑐎𑐶𑐫𑐵 𑐣𑐶𑐬𑑂𑐩𑐵𑐞 𑐡𑐸𑐱𑑂𑐎𑐬 𑐖𑐸𑐂𑐐𑐸 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐨𑑁𑐐𑑀𑐮𑐶𑐎 𑐎𑐵𑐬𑐞𑑄 𑐫𑐵𑐣𑐵𑑅 𑐠𑑂𑐰 𑐬𑐾𑐮𑐩𑐵𑐬𑑂𑐐𑐫𑐵 𑑙𑑙 𑐥𑑂𑐬𑐟𑐶𑐱𑐟 𑐧𑑂𑐰 𑐳𑐸𑐬𑐸𑐒 𑐩𑐵𑐬𑑂𑐐 𑐖𑐸𑐫𑐵𑑅 𑐣𑑂𑐴𑑂𑐫𑐵𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐎𑐾𑐰𑐮 𑑑 𑐥𑑂𑐬𑐟𑐶𑐱𑐟 𑐖𑐎 𑐨𑐹𑐩𑐶𑐫𑐵 𑐔𑑂𑐰𑐫𑑂 𑐖𑐸𑐂 𑑋 𑐠𑑂𑐰 𑐬𑐾𑐮𑐩𑐵𑐬𑑂𑐐 𑐡𑐫𑐾𑐎𑐮 𑐢𑐵𑑅𑐳𑐵 𑐣𑐾𑐥𑐵𑑅𑐫𑐵 𑐫𑐵𑐟𑐵𑐫𑐵𑐟 𑐏𑑂𑐫𑐮𑐫𑑂 𑐣𑑂𑐴𑐹𑐐𑐸 𑐫𑐸𑐐 𑐱𑐸𑐬𑐸 𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋