𑐣𑐾. 𑐳𑑄. 𑑑𑑑𑑔𑑓 𑐔𑑁𑐮𑐵𑐠𑑂𑐰 𑐡𑐸𑐟𑐶𑐫𑐵 -

𑐩𑐵𑐢𑐰𑐫𑐵𑐟 𑐣𑑄 𑐳𑐬𑐎𑐵𑐬𑐫𑑂 𑐫𑑄𑐎𑐷𑐐𑐸, 𑐠𑐷𑐠𑐷 𑐳𑐩𑑂𑐥𑐬𑑂𑐎 𑐳𑐹𑐟𑑂𑐬𑐥𑐵𑐏𑐾𑑄 𑐩𑐵𑐢𑐰 𑐣𑐾𑐥𑐵𑐮𑐮𑐶𑐳𑐾 𑐏𑑃𑐮𑑂𑐴𑐵𑐧𑐮𑑂𑐴𑐵

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐩𑐵𑐌𑐰𑐵𑐡𑐷 𑐎𑐾𑐣𑑂𑐡𑑂𑐬𑐫𑐵 𑐀𑐢𑑂𑐫𑐎𑑂𑐲 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐠𑑅𑐎𑐾 𑐕𑐐𑐹 𑐧𑐔𑑄 𑐴𑐾 𑐩𑐣𑑂𑐫𑑃𑐳𑐾 𑐐𑐛𑐧𑐣𑑂𑐢𑐣 𑐟𑑂𑐰𑑅𑐟𑐵𑑅 𑐊𑐩𑐵𑐮𑐾𑐮𑐶𑐳𑐾 𑐖𑐵𑐣𑐵𑑅 𑐳𑐬𑐎𑐵𑐬 𑐐𑐛𑐣 𑐫𑐵𑑅 𑐰𑑄𑐐𑐸 𑐏𑐣𑐵𑑅 𑐩𑐵𑐢𑐰 𑐣𑐾𑐥𑐵𑐮 𑐰 𑐰𑐫𑑂𑐎𑑅𑐫𑐵 𑐥𑐵𑐬𑑂𑐚𑐷 𑐣𑐾𑐎𑐥𑐵 (𑐊𑐳) 𑐀𑐮𑐩𑐮𑐫𑑂 𑐮𑐵𑑅 𑐰𑑄𑐐𑐸 𑐡𑐸𑐳𑐵 𑐁𑑅 𑐳𑐬𑐎𑐵𑐬 𑐐𑐛𑐣 𑐮𑐶𑐥𑐵 𑐰𑐫𑑂𑐎𑑅𑐫𑐵𑐟 𑐣𑑄 𑐠𑑂𑐰𑐴𑐾 𑐳𑐬𑐎𑐵𑐬𑐫𑑂 𑐧𑑂𑐰𑐣𑐵 𑐴𑐫𑐾𑐐𑐸 𑐎𑐸𑐟𑑅 𑐱𑐸𑐬𑐸 𑐖𑐹𑐐𑐸 𑐡𑐸 𑑋

𑐰𑐫𑑂𑐎𑑅𑐫𑐵𑐟 𑐰𑐬𑑂𑐟𑐩𑐵𑐣 𑐳𑐬𑐎𑐵𑐬𑐫𑑂 𑐡𑐸𑐴𑐵𑑄 𑐰𑐫𑐾𑐟 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐴𑐾 𑐂𑐣𑐵𑐥 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐠𑐸𑐎𑐶𑐫𑐵 𑐮𑐵𑐐𑐶𑑄 𑐊𑐩𑐵𑐮𑐾 𑐣𑑄 𑐳𑐎𑐵𑐬𑐵𑐟𑑂𑐩𑐎 𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑐷𑐠𑐷 𑐔𑑂𑐫𑐵𑐣𑐮𑑄 𑐫𑐵𑐣𑐵𑐔𑑂𑐰𑑄𑐐𑐸 𑐎𑐸𑐟𑑅𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐀𑐢𑑂𑐫𑐎𑑂𑐲 𑐩𑐵𑐢𑐰 𑐣𑐾𑐥𑐵𑐮 𑐣𑑄 𑐡𑐵𑐴𑐵𑐮 𑐣𑐾𑐟𑐺𑐟𑑂𑐰𑐫𑐵 𑐐𑐛𑐧𑐣𑑂𑐢𑐣 𑐳𑐬𑐎𑐵𑐬𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐳𑐎𑐵𑐬𑐵𑐟𑑂𑐩𑐎 𑐖𑐹𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐣𑐾𑐥𑐵𑐮𑐫𑐵𑐟 𑐳𑐬𑐎𑐵𑐬𑐫𑑂 𑐧𑑂𑐰𑐟𑐶 𑐎𑐵𑐫𑐾𑐎𑐾𑐐𑐸 𑐣𑐶𑐟𑐶𑑄 𑐩𑑂𑐴𑐶𑐐𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮𑑄 𑐣𑐵𑐥𑐮𑐵𑐣𑐵𑑅 𑐳𑐬𑐎𑐵𑐬𑐫𑐵𑐟 𑐳𑐩𑐬𑑂𑐠𑐣 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐠𑑅𑐟 𑐣𑐵𑐥𑐮𑐵𑑅 𑐰𑑅𑐐𑐸 𑐂𑐮𑐫𑑂 𑐣𑑄 𑐀𑐢𑑂𑐫𑐎𑑂𑐲 𑐣𑐾𑐥𑐵𑐮𑑄 𑐎𑐵𑑄𑐐𑑂𑐬𑐾𑐳 𑐮𑐶𑐳𑐾𑐫𑐵 𑐐𑐛𑐧𑐣𑑂𑐢𑐣 𑐟𑑂𑐰𑐵𑑅𑐠𑐮𑐵𑑅 𑐊𑐩𑐵𑐮𑐾𑐮𑐶𑐳𑐾 𑐖𑐵𑐣𑐵𑑅 𑐳𑐬𑐎𑐵𑐬 𑐡𑐫𑐾𑐎𑐾𑐐𑐸 𑐂𑐮𑐫𑑂 𑐡𑐵𑐴𑐵𑐮𑑄 𑐠𑑅𑐮𑐶𑐳𑐾 𑐳𑐴𑐮𑐴 𑐩𑐫𑐵𑑅 𑐢𑐎𑐵𑑅 𑐐𑐸𑐣𑐵𑐳𑑀 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐩 𑐡𑐵𑐴𑐵𑐮𑑄 𑐣𑐾𑐥𑐵𑐮𑐫𑐵 𑐐𑐸𑐣𑐵𑐳𑑀𑐫𑐵𑐟 𑐳𑐩𑑂𑐧𑑀𑐢𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐴𑐾 𑐳𑐬𑐎𑐵𑐬𑐫𑑂 𑐰𑐫𑐾𑐟 𑐂𑐣𑐵𑐥 𑐫𑐵𑐣𑐵𑐐𑐸 𑐏𑑅 𑐢𑐎𑐵𑑅 𑐮𑐶𑐳𑑅 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐡𑐵𑐴𑐵𑐮𑑄 𑐣𑐾𑐥𑐵𑐮𑐫𑐵𑐟 𑐳𑐬𑐎𑐵𑐬𑐫𑑂 𑐰𑐣𑐾𑐐𑐸 𑐏𑑅𑐳𑐵 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂 𑐰𑐶𑐳𑑂𑐟𑐵𑐬𑐫𑐵 𑐂𑐮𑐫𑑂 𑐦𑐸𑐎𑑂𑐎𑑄 𑐰𑐶𑐲𑐫 𑐩𑐶𑐮𑐾 𑐫𑐵𑐫𑐾𑐦𑐂𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐩𑐾𑐏𑐾 𑐣𑐾𑐥𑐵𑐮𑐫𑐵𑐟 𑐳𑐬𑐎𑐵𑐬𑐫𑑂 𑐴𑐫𑐾𑐐𑐸 𑐣𑐶𑐟𑐶𑑄 𑐊𑐩𑐵𑐮𑐾𑐫𑐵 𑐣𑑄 𑐕𑐸𑑄 𑐣𑐾𑐟𑐵𑐟 𑐳𑐎𑑂𑐬𑐶𑐫 𑐖𑐹𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐊𑐩𑐵𑐮𑐾𑐫𑐵 𑐄𑐥𑐵𑐢𑑂𑐫𑐎𑑂𑐲 𑐮𑐶𑐳𑐾𑑄 𑐄𑐥𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐧𑐶𑐲𑑂𑐞𑐸 𑐥𑑁𑐜𑐾𑐮𑑄 𑐣𑑄 𑐀𑐢𑑂𑐫𑐎𑑂𑐲 𑐣𑐾𑐥𑐵𑐮𑐫𑐵𑐟 𑐣𑐵𑐥𑐮𑐵𑐣𑐵𑑅 𑐳𑐴𑐎𑐵𑐬𑑂𑐫 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐢𑐸𑑄𑐎𑐹𑐐𑐸 𑐡𑐸 𑑋

𑐩𑑂𑐴𑐶𑐐𑑅 𑐴𑐾 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐡𑐵𑐴𑐵𑐮𑑄 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐫𑐵 𑐀𑐢𑑂𑐫𑐎𑑂𑐲 𑐄𑐥𑐾𑐣𑑂𑐡𑑂𑐬 𑐫𑐵𑐡𑐰– 𑐫𑐵𑐟 𑐣𑑄 𑐣𑐵𑐥𑐮𑐵𑐣𑐵𑐡𑐷𑐐𑐸 𑐡𑐸 𑑋 𑐣𑐶𑐩𑑂𑐴𑐾𑐳𑐶𑐫𑐵 𑐏𑑃𑐮𑑂𑐴𑐵– 𑐧𑐮𑑂𑐴𑐵𑐫𑑂 𑐡𑐵𑐴𑐵𑐮𑑄 𑐳𑐬𑐎𑐵𑐬𑐫𑑂 𑐰𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐫𑐵𑐡𑐰𑑄 𑐳𑐬𑐎𑐵𑐬𑐫𑑂 𑐰𑐫𑐾𑐟 𑐠𑑅 𑐳𑐎𑐵𑐬𑐵𑐟𑑂𑐩𑐎 𑐏𑑅𑐳𑐵𑑄 𑐥𑐵𑐬𑑂𑐚𑐷𑐂 𑐳𑐴𑐮𑐴 𑐫𑐵𑐣𑐵𑑅 𑐖𑐎 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐮𑐶𑐳𑑅 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐊𑐩𑐵𑐮𑐾 𑐡𑐸𑐣𑐾 𑐣𑑄 𑐩𑐵𑐢𑐰𑐫𑐵𑐟 𑐮𑐳𑐎𑐸𑐳
𑐊𑐩𑐵𑐮𑐾𑐫𑐵 𑐰𑐶𑐖𑑂𑐘 𑐳𑐹𑐟𑑂𑐬𑐟𑐫𑑂𑐳𑑄 𑐢𑐵𑑅𑐎𑐠𑑄 𑐣𑐾𑐎𑐥𑐵 (𑐊𑐳) 𑐫𑐵 𑐀𑐢𑑂𑐫𑐎𑑂𑐲 𑐩𑐵𑐢𑐰 𑐣𑐾𑐥𑐵𑐮𑐫𑐵𑐟 𑐁𑑅 𑐳𑐬𑐎𑐵𑐬𑐫𑑂 𑐖𑐎 𑐩𑐏𑐸, 𑐖𑐶𑐄𑐳𑐵 𑐣𑐾𑐎𑐥𑐵 (𑐊𑐩𑐵𑐮𑐾) 𑐫𑑂 𑐴𑐾 𑐮𑐶𑐟 𑐧𑑂𑐰𑐣𑐵 𑐫𑑄𑐎𑐾𑐐𑐸 𑐮𑐵𑐐𑐶𑑄 𑐣𑑄 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐊𑐩𑐵𑐮𑐾𑐫𑐵 𑐣𑐶𑐐𑐹𑐐𑐸 𑐱𑑂𑐬𑐾𑐞𑐷𑐫𑐵 𑐣𑐾𑐟𑐵𑐟𑐫𑑂𑐳𑑄 𑐰𑐫𑑂𑐎𑑅𑐫𑐵𑐟 𑐟𑑅𑐎𑑂𑐰𑑅𑐩𑐕𑐶 𑐣𑐵𑐥𑐮𑐵𑐣𑐵𑑅 𑐥𑐸𑐮𑐵𑑄𑐐𑐸 𑐏𑑃 𑐮𑑂𑐰𑑅𑐩𑑄𑐎𑐵𑑅 𑐊𑐩𑐵𑐮𑐾𑐫𑑂 𑐴𑐾 𑐮𑐶𑐴𑐵𑑄 𑐰𑐫𑐾 𑐩𑐵𑐮 𑐢𑐎𑐵𑑅 𑐂𑐣𑐵𑐥 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑑂𑐎𑑅𑐫𑐵𑐟 𑐥𑐺𑐠𑑂𑐰𑐷 𑐳𑐸𑐧𑑂𑐧𑐵 𑐐𑐸𑐬𑐸𑐒𑑄 𑐟𑑅𑐎𑑂𑐰𑑅 𑐣𑐵𑐥𑐮𑐵𑐣𑐵𑐡𑐷𑐢𑐸𑑄𑐎𑐹𑐐𑐸 𑐡𑐸𑐳𑐵 𑐳𑐸𑐰𑐵𑐳 𑐣𑐾𑐩𑑂𑐧𑐵𑐒𑑄 𑐣𑑄 𑐣𑐵𑐥𑐮𑐵𑐣𑐵𑑅 𑐏𑑃𑐮𑑂𑐴𑐵𑐧𑐮𑑂𑐴𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐰𑐫𑑂𑐎𑑅𑐫𑐵𑐟 𑐊𑐩𑐵𑐮𑐾 𑐀𑐢𑑂𑐫𑐎𑑂𑐲 𑐎𑐾𑐥𑐷 𑐌𑐮𑐷𑐫𑐵 𑐳𑐣𑑂𑐡𑐾𑐱 𑐖𑑂𑐰𑐣𑐵𑑅 𑐩𑐴𑐵𑐳𑐔𑐶𑐰 𑐱𑑄𑐎𑐬 𑐥𑑀𑐏𑐬𑐾𑐮𑑄 𑐣𑑄 𑐣𑐵𑐥𑐮𑐵𑐫𑐾𑐟 𑐎𑐸𑐟𑑅 𑐫𑐵𑐣𑐵𑐡𑐷𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐟𑐬 𑐣𑐾𑐟𑐵 𑐣𑐾𑐥𑐵𑐮𑑄 𑐠𑑅𑐟 𑐀𑐢𑑂𑐫𑐎𑑂𑐲 𑐌𑐮𑐷𑑄 𑐴𑐾 𑐣𑐵𑐥𑐮𑐵𑑅 𑐰𑐫𑐾𑐩𑐵𑑅 𑐢𑐎𑐵𑑅 𑐀𑐜𑐵𑐣 𑐎𑐵𑑅𑐐𑐸 𑐏𑑃 𑐣𑑄 𑐳𑐹𑐟𑑂𑐬𑑄 𑐢𑐵𑑅𑐐𑐸 𑐡𑐸 𑑋 𑐳𑐹𑐟𑑂𑐬𑐟𑐫𑑂𑐳𑑄 𑐢𑐵𑑅𑐎𑐠𑑄 𑐣𑐾𑐟𑐵 𑐣𑐾𑐥𑐵𑐮𑑄 𑐣𑑂𑐴𑐵𑐥𑐵 𑐠𑑅𑐟 𑐊𑐩𑐵𑐮𑐾 𑐀𑐢𑑂𑐫𑐎𑑂𑐲 𑐌𑐮𑐷𑑄 𑐠𑑅𑐟 𑐥𑑂𑐬𑐫𑑀𑐐 𑐫𑐵𑑅𑐐𑐸 𑐡𑐸𑐬𑑂𑐰𑐔𑐣𑐫𑐵𑐟 𑐎𑐫𑐵𑑅 𑐣𑐸𑐐𑐮𑐫𑑂 𑐳𑑂𑐫𑐵𑐎𑐵𑐡𑐷𑐐𑐸 𑐡𑐸 𑑋