𑐢𑐶𑐩𑐾 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐎𑑄𑐎𑐾𑐱𑑂𑐰𑐬𑐷 𑐡𑐵𑐦𑐵 𑐏𑐮𑑅 𑐣𑑂𑐴𑐵𑐥
𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)/ 𑐎𑐶𑐮𑐵𑐑𑑅 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐔𑑅𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐫𑐾𑑃 𑐩𑐴𑐵𑐣𑐐𑐬𑐰𑑂𑐫𑐵𑐥𑐷 𑐩𑐾𑐫𑐬𑑂𑐳 𑐚𑑂𑐬𑐦𑐷 𑐔𑐶𑐐𑑂𑐰𑑅 𑐢𑐶𑐩𑐾 𑐎𑐵𑐳𑐵𑐫𑑂 𑐎𑑄𑐎𑐾𑐱𑑂𑐰𑐬𑐷 𑐡𑐵𑐦𑐵 𑐏𑐮𑑅 𑐳𑐩𑐵𑐖, 𑐫𑐟𑐏𑐵 𑐣𑑂𑐴𑐵𑐥 𑐮𑐵𑑅𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬 𑐮𑐵𑐐𑐵 𑐡𑐸𑐣𑐾𑐫𑐵 𑐗𑐶𑑄𑐣𑑂𑐴𑐫𑑂𑐐𑐹 𑐟𑑂𑐰𑐵𑑅, 𑐏𑐮𑑅, 𑐥𑐸𑐔𑐮𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐎𑐵𑐳𑐵𑐫𑑂 𑐌𑐩𑐧𑐴𑐵𑑅 𑐟𑑂𑐰𑐵𑑅 𑐏𑐮𑑅, 𑐌𑐩𑐧𑐴𑐵𑑅 𑐮𑐶𑐄 𑐰 𑐢𑐶𑐩𑐾 𑐐𑐸𑐠𑐶 𑐏𑐮𑑅, 𑐥𑐬𑐶𑐰𑐵𑐬 𑐧𑐶𑐖𑑂𑐫𑐵𑐥𑐹𑐣𑐣𑐶 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐡𑐸 𑑋
𑐎𑐵𑐳𑐵𑐫𑑂 𑐰𑐶𑐖𑐫𑐷 𑐖𑐸𑐫𑐵 𑐖𑐸𑐫𑐵𑐡𑐷𑐥𑐶𑑄𑐟 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐚𑑂𑐬𑐦𑐷, 𑐩𑐾𑐜𑐮𑐮𑐶𑐳𑐾𑑄 𑐡𑐳𑐶𑐥𑑁𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹 𑐥𑑂𑐬𑐵𑐫𑑀𑐖𑐎 𑐣𑐧𑐶𑐮 𑐦𑐵𑐄𑐣𑑂𑐜𑐾𑐱𑐣𑐥𑐵𑐏𑐾𑑄 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐫𑐵𑐟 𑐕𑐳𑐶𑐎𑐠𑑄 𑐕𑐐𑐹 𑐮𑐏, 𑐣𑑂𑐫𑐫𑑂𑐡𑑂𑐰𑑅 𑐰 𑐣𑐷𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋
𑐳𑑂𑐰𑑄𑐐𑐹 𑐔𑐬𑐞𑐫𑑂 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐳𑐾𑑄 𑐩𑐹𑐥𑐵𑐴𑐵𑑄 𑐫𑐾𑑃 𑐩𑐴𑐵𑐣𑐐𑐬 𑐥𑑂𑐬𑐩𑐸𑐏 𑐱𑐵𑐎𑑂𑐫𑑄 𑐠𑐖𑑂𑐫𑐵𑑅𑐐𑐸 𑐎𑐵𑐳𑐵 𑐡𑑃𑐫𑑂𑐡𑐳𑑄 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐖𑑂𑐫𑐵 𑐫𑐵𑐂𑐥𑐶𑑄𑐟 𑐥𑐶𑐣𑐾 𑐔𑑂𑐰𑑄𑐥𑐶𑑄𑐳𑑄 𑐐𑐧𑐮𑐾𑑄 𑐣𑑄 𑐖𑐳 𑐧𑐷𑐐𑐸 𑐖𑑂𑐫𑐵 𑐩𑐖𑐸𑐂𑐐𑐸𑐮𑐶𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐂𑐔𑑂𑐕𑐵 𑐡𑐫𑐵𑑄 𑐣𑑄 𑐣𑐶𑐬𑐣𑑂𑐟𑐬𑐟𑐵 𑐧𑐷 𑐩𑐦𑐫𑐵 𑐰𑐣𑐷𑐐𑐸 𑐏𑑅 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 
𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐎𑐩𑐳𑐾 𑐎𑐩 𑐣𑑄 𑐖𑑂𑐫𑐵 𑐫𑐵𑐂𑐥𑐶𑑄𑐟 𑐠𑑂𑐰 𑐩𑐶𑐮𑐾 𑐩𑐖𑐹, 𑐰 𑐫𑐵𑐫𑐾 𑐩𑐖𑐶𑐄, 𑐠𑐠𑐾 𑐩𑐫𑐵𑑅𑐳𑐵 𑐖𑐶𑐄 𑐢𑐎𑐵𑑅 𑐎𑐸𑑄𑐏𑐶𑐣𑐾𑐐𑐸 𑐖𑐎 𑐩𑐫𑐵𑐳𑐾 𑐦𑐸𑐳𑐵 𑐠𑐩𑑂𑐴𑑄 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐩𑐦𑐸𑐳𑐵 𑐫𑐵𑑅𑐐𑐸 𑐖𑑂𑐫𑐵 𑐛𑐷𑐎 𑐖𑐹 𑐢𑐎𑐵𑑅 𑐢𑐵𑐫𑐾𑐐𑐸 𑐫𑐵𑐫𑐾𑐩𑐵𑑅 𑑋’
𑐀𑐠𑐾 𑐴𑐾 𑐖𑑂𑐫𑐵𑐗𑑂𑐰𑑅𑐫𑐵 𑐰𑐶𑐱𑐾𑐲 𑐥𑐵𑐴𑐵𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐴𑐬𑐶𑐥𑑂𑐬𑐨𑐵 𑐏𑐜𑑂𑐐𑐷 𑐱𑑂𑐬𑐾𑐲𑑂𑐛𑑄 𑐥𑐬𑐩𑑂𑐥𑐬𑐵𑐐𑐟 𑐮𑑀𑐎𑐳𑑄𑐳𑑂𑐎𑐺𑐟𑐶𑐫𑐵 𑐧𑐵𑐖𑑄 𑐳𑑄𑐬𑐎𑑂𑐲𑐞 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐧𑐖𑐾𑐚 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐫𑑀𑐖𑐣𑐵 𑐡𑐫𑐾𑐎𑐵𑐔𑑂𑐰𑐣𑐵𑐐𑐸 𑐢𑐵𑐳𑐾𑑄 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐠𑐷𑐠𑐷 𑐟𑑂𑐰𑐵𑑅, 𑐐𑐸𑐠𑐶, 𑐏𑐮𑑅 𑐥𑐸𑐔𑑅 𑐥𑐸𑐔𑑅 𑐰𑐶𑐨𑐵𑐖𑐶𑐟 𑐖𑐸𑐫𑐵𑑅 𑐩𑐏𑐳𑐾 𑐳𑐎𑐮𑐾𑑄 𑐕𑐐𑐹 𑐴𑐾 𑐠𑐵𑐳𑐫𑑂 𑐩𑐸𑐣𑐵𑑅 𑐰𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋
𑐥𑐸𑐔𑑅𑐫𑐵 𑐣𑐵𑐫𑑅 𑐳𑐵𑐣𑐸𑐎𑐵𑐖𑐷 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅𑐳𑐵 𑐣𑐳𑐵𑐖𑑂𑐰𑐮𑑄𑐫𑐵 𑐳𑑂𑐚𑐮 𑐣𑑄 𑐟𑐫𑐵𑐟𑑅𑐐𑐸 𑐏𑑅 𑑋
LEAVE YOUR COMMENTS