Read news in NepalBhasa text-- www.hamroschool.com BACK 𑐁𑐎𑐵𑐱𑐾 𑐟𑐵𑑃 𑐟𑐟𑑂𑐎𑐵𑐮 𑐩𑐬𑑂𑐩𑐟 𑐫𑐵𑐫𑐾𑐟 𑐂𑐣𑐵𑐥 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑐎𑐵𑐱𑐾 𑐟𑐵𑑃 𑐟𑐟𑑂𑐎𑐵𑐮 𑐩𑐬𑑂𑐩𑐟 𑐫𑐵𑐫𑐾𑐟 𑐂𑐣𑐵𑐥

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)-𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐩𑐴𑐵𑐣𑐐𑐬 𑐎𑑂𑐲𑐾𑐟𑑂𑐬 𑐡𑐸𑐣𑐾𑐫𑐵 𑐁𑐎𑐵𑐱𑐾 𑐟𑐵𑑃 (𑐁𑐎𑐵𑐱𑐾 𑐥𑐸𑐮) 𑐟𑐟𑑂𑐎𑐵𑐮 𑐩𑐬𑑂𑐩𑐟 𑐳𑐩𑑂𑐨𑐵𑐬 𑐫𑐵𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑐴𑐵𑐣𑐐𑐬𑑄 𑐣𑐶𑐖𑐷 𑐳𑐵𑐗𑐾𑐡𑐵𑐬𑐷 𑐖𑑂𑐫𑐵𑐗𑑂𑐰𑑅 𑐀𑐣𑑂𑐟𑐬𑑂𑐐𑐟 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐀𑐖𑑂𑐫𑐵𑑅𑐐𑐸 𑐁𑐎𑐵𑐱𑐾 𑐟𑐵𑑃 𑐟𑐟𑑂𑐎𑐵𑐮 𑐩𑐬𑑂𑐩𑐟 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐳𑐵𑐬𑑂𑐰𑐖𑐣𑐶𑐎 𑐣𑐶𑐖𑐷 𑐳𑐵𑐗𑐾𑐡𑐵𑐬𑐷 𑐂𑐎𑐵𑐃𑐫𑐵 𑐀𑐢𑐶𑐎𑐵𑐬𑐷𑐟𑐮𑐶𑐳𑐾 𑐖𑐹𑐐𑐸 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑐵 𑐂𑐮𑐫𑑂 𑐁𑐎𑐵𑐱𑐾 𑐟𑐵𑑃𑐟 𑐟𑐟𑑂𑐎𑐵𑐮 𑐬𑑂𑐩𑐣 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑑁𑑄𑐫𑐵 𑐂𑐮𑐫𑑂 𑐟𑐎 𑐠𑑂𑐫𑑄𑐐𑐸 𑐀𑐰𑐳𑑂𑐠𑐵𑐫𑑂 𑐁𑐎𑐵𑐱𑐾 𑐟𑐵𑑃𑐟 𑐟𑐳𑐎𑑄 𑐀𑐳𑐸𑐬𑐎𑑂𑐲𑐶𑐟 𑐖𑐹𑐐𑐸 𑐢𑐵𑐳𑐾𑑄 𑐟𑐟𑑂𑐎𑐵𑐮 𑐳𑐸𑐢𑐵𑐬𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐄𑐥𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐢𑐫𑐵𑐡𑐷𑐐𑐸 𑐏𑑅 𑑋

‘𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐀𑐥𑑂𑐰𑑅𑐠𑐾𑑄 𑐁𑐎𑐵𑐱𑐾 𑐟𑐵𑑃𑐫𑐵 𑐀𑐰𑐳𑑂𑐠𑐵 𑐟𑐳𑐎𑑄 𑐡𑐫𑐣𑐷𑐫 𑐏𑐣𑐾𑐡𑐸 𑑋 𑐳𑑄𑐬𑐔𑐣𑐵 𑐡𑐎𑑂𑐰𑑄 𑐳𑑂𑐫𑐣𑐵𑐔𑑂𑐰𑑄𑐐𑐸 𑐡𑐸’, 𑐩𑐴𑐵𑐣𑐐𑐬 𑐄𑐥𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐢𑐫𑐵𑐡𑐷𑐐𑐸 𑐡𑐸, ‘𑐁𑐎𑐵𑐱𑐾 𑐟𑐵𑑄 𑐰𑐣𑐾𑐧𑐮𑐫𑑂 𑐟𑐎𑑂𑐫𑐣𑐵𑑅 𑐡𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐧𑐵𑐬 𑐣𑑄 𑐟𑐟𑑅𑐖𑐵𑑅 𑐖𑐹𑐐𑐸𑐮𑐶𑑄 𑐳𑐸𑐠𑐫𑑂 𑐧𑐴𑐣𑐶 𑐰𑐣𑐾𑐧𑐮𑐫𑑂 𑐟𑐵𑑃 𑐖𑐸𑐫𑐵𑑅 𑐰𑐣𑐾𑐟 𑐀𑐳𑐸𑐬𑐎𑑂𑐲𑐶𑐟 𑐩𑐴𑐳𑐸𑐳 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐸𑐢𑐵𑐬𑐫𑐵 𑐣𑐶𑑄𑐟𑐶𑑄 𑐟𑐟𑑂𑐎𑐵𑐮 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐏𑐣𑐾 𑐡𑐸 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐀𑐥𑐵𑑄𑐐𑐟𑐵 𑐖𑐹𑐥𑐶𑑄 𑐟𑐵𑑃 𑐐𑐫𑐵𑑅 𑐰𑐣𑐾 𑐦𑐂𑐐𑐸 𑐳𑑂𑐠𑐶𑐟𑐶 𑐩𑐡𑐸, 𑐖𑑀𑐏𑐶𑐩 𑐣𑐵𑐮𑐵 𑐳𑐟𑐎𑑄 𑐴𑐾 𑐮𑑃 𑐟𑑂𑐰𑐵𑑅𑐮𑑂𑐴𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐟𑐵𑑃𑐫𑑂 𑐔𑑂𑐰𑑄𑐐𑐸 𑐧𑐵𑐬𑐫𑐵 𑐖𑐵𑑅 𑐣𑑄 𑐩𑑂𑐴𑑀 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐟𑐵𑑃 𑐩𑐬𑑂𑐩𑐟 𑐫𑐵𑐫𑐾𑐧𑐮𑐫𑑂 𑐧𑐵𑐬 𑐔𑐶𑐖𑐵𑑅 𑐫𑐵𑐣𑐵𑑅 𑐥𑐵𑐬𑐡𑐬𑑂𑐱𑐷 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐳𑐾𑑄 ‘𑐡𑐫𑐎𑐢𑐾𑐢𑐸𑑄𑐎𑐵𑑅 𑐳𑐶𑐢𑐮 𑐢𑐎𑐵𑑅 𑐀𑐠𑐾𑑄 𑐟𑑂𑐰𑑅𑐟𑐾 𑐩𑐖𑐶𑐄 𑑋 𑐄𑐎𑐶𑐫𑐵𑐟 𑐩𑐬𑑂𑐩𑐟 𑐫𑐵𑐫𑐾𑐩𑐵𑑅’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐄𑐐𑐸 𑐂𑐮𑐫𑑂 𑐩𑐴𑐵𑐣𑐐𑐬𑐫𑐵 𑐣𑐶𑐬𑑂𑐡𑐾𑐱𑐎 𑐣𑐹𑐬𑐣𑐶𑐢𑐶 𑐣𑑂𑐫𑑁𑐥𑐵𑐣𑐾𑑄 𑐳𑐵𑐬𑑂𑐰𑐖𑐣𑐶𑐎 𑐣𑐶𑐖𑐷 𑐳𑐵𑐗𑐾𑐡𑐵𑐬𑐷 𑐖𑑂𑐫𑐵𑐗𑑂𑐰𑑅 𑐀𑐣𑑂𑐟𑐬𑑂𑐐𑐟 𑐳𑑄𑐔𑐵𑐮𑐣𑐫𑑂 𑐡𑐸𑐐𑐸 𑐚𑐵𑐰𑐬, 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 𑐮𑐐𑐵𑐫𑐟𑐫𑐵 𑐳𑑄𑐬𑐔𑐣𑐵 𑐣𑐶𑐬𑑂𑐩𑐵𑐞 𑐰 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐫𑐵𑐎𑐵𑐡𑐷𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS