Read news in NepalBhasa text-- www.hamroschool.com BACK 𑐩𑐴𑐵𑐎𑐵𑐮𑐷𑐂 𑐀𑐥𑑂𑐥𑐵𑑄 𑐎𑐫𑐾𑐎𑐵𑑅 𑐮𑑂𑐰𑐵𑐥𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑐴𑐵𑐎𑐵𑐮𑐷𑐂 𑐀𑐥𑑂𑐥𑐵𑑄 𑐎𑐫𑐾𑐎𑐵𑑅 𑐮𑑂𑐰𑐵𑐥𑐸

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)-𑐰𑑄𑐐𑐸 𑐕𑐸𑑄 𑐣𑑂𑐴𑐶 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐨𑐵𑐬𑐟𑐷𑐫 𑐥𑐎𑑂𑐲𑐮𑐶𑐳𑐾 𑐟𑐣𑐵𑐰𑐐𑑂𑐬𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐥𑐱𑑂𑐔𑐶𑐩 𑐣𑐾𑐥𑐵𑑅𑐫𑐵 𑐡𑐵𑐬𑑂𑐔𑐸𑐮𑐵𑐫𑑂 𑐩𑑂𑐴𑐶𑐐𑑅 𑐩𑐴𑐵𑐎𑐵𑐮𑐷 𑐏𑐸𑐳𑐶𑐫𑐵 𑐳𑐷𑐩𑐵 𑐰𑐵𑐬𑐷 𑐰 𑐳𑐷𑐩𑐵 𑐥𑐵𑐬𑐷 𑐀𑐥𑑂𑐥𑐵𑑄 𑐎𑐫𑐾𑐎𑐵𑑅 𑐮𑑂𑐰𑐵𑐥𑐸 𑐖𑐹𑐐𑐸 𑐡𑐸 𑑋

𑐨𑐵𑐬𑐟𑑄 𑐩𑐴𑐵𑐎𑐵𑐮𑐷 𑐏𑐸𑐳𑐶𑐫𑐵 𑐠𑑅𑐐𑐸 𑐳𑐶𑐩𑐵𑐣𑐵𑐫𑑂 𑐫𑐎𑑅𑐟𑐶 𑐝𑑄𑐐𑑄 𑐟𑐚𑐧𑐣𑑂𑐢 𑐡𑐫𑐾𑐎𑐾𑐐𑐸 𑐱𑐸𑐬𑐸 𑐫𑐵𑐫𑐾𑐰𑑄 𑐣𑐾𑐥𑐵𑑅𑐮𑐶𑐳𑐾 𑐟𑐣𑐵𑐰 𑐱𑐸𑐬𑐸 𑐖𑐹𑐐𑐸 𑐏𑑅 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐮𑑂𑐰𑐵𑐥𑐸 𑐟𑐔𑑂𑐰𑐫𑐵 𑐰𑐣𑐵𑑅 𑐠𑑁𑑄 𑐣𑐶𑐐𑐹 𑐡𑐾𑐫𑑂𑐫𑐵 𑐣𑐵𑐐𑐬𑐶𑐎𑐟𑐫𑑂 𑐡𑐠𑐸𑐂 𑐀𑐥𑑂𑐥𑐵𑑄 𑐎𑐫𑐾𑐎𑐵𑑅 𑐮𑑂𑐰𑐵𑐥𑐸 𑐖𑐹𑐐𑐸 𑐏𑑅 𑑋

𑐣𑐾𑐥𑐵𑑅𑐫𑐵 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐳𑑄 𑐡𑐵𑐬𑑂𑐔𑐸𑐮𑐵𑐫𑑂 𑐔𑑂𑐰𑐣𑐵𑑅 𑐨𑐵𑐬𑐟𑐫𑐵 𑐢𑐵𑐬𑑂𑐔𑐸𑐮𑐵𑐥𑐵𑐏𑐾 𑐀𑐥𑑂𑐥𑐵𑑄 𑐎𑐫𑐾𑐎𑐵𑐕𑑂𑐰𑑅𑐐𑐸 𑐏𑑅𑐳𑐵 𑐄𑐏𑐾 𑐢𑐵𑐬𑑂𑐔𑐸𑐮𑐵𑐥𑐵𑐏𑐾𑑄 𑐣𑑄 𑐨𑐵𑐬𑐟𑐷𑐫 𑐣𑐵𑐐𑐬𑐶𑐎𑐟𑐫𑑂𑐳𑑄 𑐣𑐾𑐥𑐵𑑅𑐥𑐵𑐏𑐾 𑐀𑐥𑑂𑐥𑐵𑑄 𑐎𑐫𑐾𑐎𑐵 𑐴𑑅𑐐𑐸 𑐏𑑅 𑑋 𑐄𑐎𑐷 𑐮𑐵𑐣𑐵𑑅 𑐥𑑂𑐫𑐩𑑂𑐴 𑐣𑐾𑐥𑐵𑑅𑐩𑐶 𑐑𑐵𑑅𑐥𑐵𑑅 𑐖𑐹𑐐𑐸 𑐡𑐸 𑑋 𑐣𑐶𑐐𑐹 𑐥𑐎𑑂𑐲 𑐡𑐠𑐸𑐂 𑐀𑐥𑑂𑐥𑐵𑑄 𑐎𑐫𑐾𑐎𑐵𑑅 𑐮𑑂𑐰𑐵𑐥𑐸 𑐖𑐸𑐂𑐰𑑄 𑐣𑐾𑐥𑐵𑑅–𑐨𑐵𑐬𑐟 𑐳𑑂𑐰𑐵𑐂𑐐𑐸 𑐩𑐴𑐵𑐎𑐵𑐮𑐷 𑐏𑐸𑐳𑐶𑐫𑐵 𑐟𑐵𑑃 𑐧𑐣𑑂𑐡 𑐫𑐵𑐣𑐵 𑐧𑐶𑐄𑐐𑐸 𑐏𑑅 𑑋

𑐣𑐾𑐥𑐵𑑅𑐮𑐶𑐳𑐾 𑐕𑐸𑑄 𑐴𑐾 𑐳𑐮𑑂𑐮𑐵𑐴 𑐩𑐫𑐵𑐳𑐾 𑐨𑐵𑐬𑐟𑑄 𑐫𑐎𑑅𑐟𑐶 𑐝𑑄𑐐𑑄 𑐟𑐚𑐧𑐣𑑂𑐢 𑐡𑐫𑐾𑐎𑐾𑐰𑑄 𑐄𑐐𑐸 𑐮𑐵𑐐𑐵𑐫𑑂 𑐕𑐸𑑄 𑐃 𑐣𑑂𑐴𑑂𑐰𑑄𑐣𑐶𑐳𑐾𑑄 𑐴𑐾 𑐟𑐣𑐵𑐰 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐨𑐵𑐬𑐟𑑄 𑐠𑑅𑐠𑐵𑐫𑑂 𑐟𑐚𑐧𑐣𑑂𑐡 𑐡𑐫𑐾𑐎𑐾𑐰𑑄 𑐣𑐾𑐥𑐵𑑅𑐥𑐵𑐏𑐾𑑄 𑐄𑐎𑐷 𑐁𑐥𑐟𑑂𑐟𑐶 𑐎𑑂𑐫𑑄𑐐𑐸 𑐏𑑅 𑑋 𑐨𑐵𑐬𑐟𑑄 𑐠𑑅𑐐𑐸 𑐨𑐹𑐩𑐶𑐂 𑐖𑐎 𑐫𑐎𑑅𑐟𑐶 𑐝𑑄𑐐𑑄 𑐟𑐚𑐧𑐣𑑂𑐡 𑐡𑐫𑐾𑐎𑐮 𑐢𑐵𑑅𑐳𑐵 𑐄𑐎𑐶𑑄 𑐫𑐵𑐣𑐵𑑅 𑐏𑐸𑐳𑐶𑐫𑐵 𑐢𑐵𑐬 𑐴𑐶𑐮𑐵𑑅 𑐣𑐾𑐥𑐵𑑅𑐥𑐵𑐏𑐾 𑐏𑐸𑐳𑐶𑐧𑐵𑑅 𑐰𑐂𑐐𑐸 𑐳𑐩𑑂𑐨𑐵𑐰𑐣𑐵 𑐡𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐡𑐵𑐬𑑂𑐔𑐸𑐮𑐵𑐫𑐵 𑐳𑐡𑐬𑐩𑐸𑐎𑐵𑐩 𑐏𑐮𑑄𑐐𑐵𑐫𑑂 𑐟𑐎𑑄 𑐏𑐟𑐬𑐵 𑐧𑑂𑐰𑐮𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮𑑄 𑐠𑐸𑐎𑐶𑐫𑐵𑐧𑐵𑐬𑐾 𑐨𑐵𑐬𑐟𑐫𑐵𑐟 𑐂𑐮𑐫𑑂 𑐧𑑂𑐫𑐮𑐫𑑂 𑐳𑐟𑐬𑑂𑐎 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅𑐳𑐵𑑄 𑐨𑐵𑐬𑐟𑑄 𑐢𑐵𑑅𑐳𑐵 𑐄𑐎𑐶𑐫𑐵𑐟 𑐰𑐵𑐳𑑂𑐟𑐵 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸 𑑋

𑐨𑐵𑐬𑐟𑑄 𑐀𑐠𑐾 𑐫𑐎𑑅𑐟𑐶 𑐬𑐸𑐥𑑄 𑐟𑐚𑐧𑐣𑑂𑐡 𑐡𑐫𑐾𑐎𑐵𑐔𑑂𑐰𑑄𑐳𑐵𑑄 𑐣𑐾𑐥𑐵𑑅𑐫𑐵 𑐥𑑂𑐬𑐱𑐵𑐳𑐣𑑄 𑐢𑐵𑑅𑐳𑐵 𑐰𑐵𑐳𑑂𑐟𑐵 𑐩𑐫𑐵𑑅𑐐𑐸 𑐡𑑂𑐰𑐥𑑄 𑐣𑑄 𑐣𑐾𑐥𑐵𑑅𑐫𑐵 𑐣𑐵𑐐𑐬𑐶𑐎𑐟𑐫𑑂𑐳𑑄 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐨𑐵𑐬𑐟𑑄 𑐣𑐾𑐥𑐵𑑅𑐫𑐵𑐎𑐾 𑐣𑑂𑐫𑑃 𑐴𑐾 𑐩𑐣𑑂𑐫𑑃𑐳𑐾 𑐟𑐚𑐧𑐣𑑂𑐡 𑐡𑐫𑐾𑐎𑐷𑐐𑐸 𑐏𑑅𑐳𑐵𑑄 𑐠𑐸𑐐𑐸𑐳𑐷 𑐢𑐵𑑅𑐳𑐵 𑐣𑐾𑐥𑐵𑑅𑐫𑐵𑐟 𑐖𑐵𑐣𑐎𑐵𑐬𑐷 𑐧𑐶𑐫𑐵𑑅 𑐖𑑂𑐫𑐵 𑐱𑐸𑐬𑐸 𑐫𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐠𑑅𑐐𑐸 𑐮𑐵𑐐𑐵𑐫𑑂 𑐟𑐚𑐧𑐣𑑂𑐢 𑐡𑐫𑐾𑐎𑐾𑐐𑐸 𑐗𑑂𑐰𑐮𑐫𑑂 𑐨𑐵𑐬𑐟𑐫𑐵 𑐛𑐾𑐎𑐾𑐡𑐵𑐬𑐟𑐫𑑂𑐳𑑄 𑐰𑑄𑐐𑐸 𑐰𑐵𑐮𑐫𑑂 𑐣𑐾𑐥𑐵𑑅𑐫𑐵 𑐳𑐷𑐩𑐵𑐥𑐵𑐏𑐾 𑐔𑑂𑐰𑑄𑐐𑐸 𑐮𑑂𑐰𑐴𑑄 𑐳𑐩𑐾𑐟 𑐮𑑂𑐴𑑂𑐫𑐫𑐾𑐐𑐸 𑐱𑐸𑐬𑐸 𑐫𑐵𑐫𑐾𑐰𑑄 𑐣𑐾𑐥𑐵𑑅𑐫𑐵 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐳𑑄 𑐁𑐥𑐟𑑂𑐟𑐶 𑐥𑑂𑐰𑑄𑐎𑐹𑐐𑐸 𑐏𑑅 𑑋 𑐣𑐾𑐥𑐵𑑅𑐥𑐵𑐏𑐾𑐫𑐵 𑐮𑑂𑐰𑐴𑑄 𑐣𑑄 𑐮𑑂𑐴𑑂𑐫𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑑃𑐫𑐵𑐟 𑐎𑐫𑐵𑑅 𑐣𑑄 𑐣𑐾𑐥𑐵𑑅 𑐰 𑐨𑐵𑐬𑐟𑐫𑐵 𑐳𑐷𑐩𑐵 𑐰𑐵𑐬𑐷–𑐥𑐵𑐬𑐷 𑐔𑑂𑐰𑑄𑐥𑐶𑑄 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂 𑐡𑐠𑐸𑐂 𑐮𑑂𑐰𑐵𑐥𑐸 𑐖𑐹𑐐𑐸 𑐡𑐸 𑑋 𑐟𑐬 𑐠𑑅𑐐𑐸 𑐡𑐾𑐱𑐫𑐵 𑐮𑑂𑐰𑐴𑑄 𑐮𑑂𑐴𑑂𑐫𑐫𑐵𑐔𑑂𑐰𑐣𑑄 𑐣𑑄 𑐣𑐾𑐥𑐵𑑅𑐫𑐵 𑐥𑑂𑐬𑐱𑐵𑐳𑐣𑑄 𑐢𑐵𑑅𑐳𑐵 𑐥𑑂𑐬𑐟𑐶𑐬𑑀𑐢 𑐩𑐫𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS