Read news in NepalBhasa text-- www.hamroschool.com BACK 𑐩𑐴𑐵𑐣𑐐𑐬 𑐡𑐶𑐰𑐳𑐫𑑂 𑐕𑐰𑐵𑑅𑐫𑑄𑐎𑑄 𑐖𑑂𑐫𑐵𑐗𑑂𑐰𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑐴𑐵𑐣𑐐𑐬 𑐡𑐶𑐰𑐳𑐫𑑂 𑐕𑐰𑐵𑑅𑐫𑑄𑐎𑑄 𑐖𑑂𑐫𑐵𑐗𑑂𑐰𑑅

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)-𑐫𑐾𑑃 𑐩𑐴𑐵𑐣𑐐𑐬 𑐥𑐵𑐮𑐶𑐎𑐵𑑄 𑐩𑐴𑐵𑐣𑐐𑐬 𑐡𑐶𑐰𑐳𑐫𑐵 𑐟𑐫𑐵𑐬𑐷 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐡𑑃𑐫𑑂𑐡𑐳𑑄 𑐩𑑄𑐳𑐶𑐬 𑑒𑑙 𑐐𑐟𑐾𑐫𑐵𑐟 𑐩𑐴𑐵𑐣𑐐𑐬 𑐡𑐶𑐰𑐳𑐫𑐵 𑐬𑐸𑐥𑐫𑑂 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐗𑑂𑐰𑐮𑐫𑑂 𑐠𑐸𑐐𑐸𑐳𑐷 𑐴𑐣𑐾𑐟𑑂𑐫𑑄𑐐𑐸 𑐩𑐴𑐵𑐣𑐐𑐬 𑐡𑐶𑐰𑐳 𑑒𑑘 𑐎𑑂𑐰𑑅𑐐𑐸 𑐏𑑅 𑑋

𑐠𑐸𑐐𑐸𑐳𑐷 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐕𑐰𑐵𑑅𑐫𑑄𑐎𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐩𑐴𑐵𑐣𑐐𑐬 𑐡𑐶𑐰𑐳 𑐴𑐣𑐾𑐟𑑂𑐫𑑄𑐐𑐸 𑐡𑐸 𑑋 𑐩𑐴𑐵𑐣𑐐𑐬 𑐡𑐶𑐰𑐳𑐫𑐵 𑐟𑐫𑐵𑐬𑐷𑐫𑐵 𑐣𑐶𑑄𑐟𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐮𑐶𑐳𑐾𑑄 𑐩𑐴𑐵𑐣𑐐𑐬 𑐡𑐶𑐰𑐳 𑐩𑐹𑐮 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐧𑐵𑐮𑐾𑐣𑑂𑐡𑑂𑐬 𑐱𑐵𑐴 (𑐧𑐵𑐮𑐾𑐣)𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐔𑑂𑐰𑑄𑐐𑐸 𑐩𑐸𑑃𑐖𑑂𑐫𑐵𑐫𑑂 𑐠𑐷𑐠𑐷 𑐄𑐥𑐳𑐩𑐶𑐟𑐶𑐥𑐵𑐏𑐾𑑄 𑐖𑑂𑐫𑐵𑐗𑑂𑐰𑑅𑐟 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐥𑑂𑐬𑐳𑑂𑐟𑐵𑐰𑐶𑐟 𑐖𑑂𑐫𑐵𑐗𑑂𑐰𑑅𑐎𑐠𑑄 𑐀𑐣𑐮𑐵𑐂𑐣 𑐳𑐾𑐰𑐵𑐐𑑂𑐬𑐵𑐴𑐷 𑐳𑐬𑑂𑐰𑐾𑐎𑑂𑐲𑐞 𑐫𑐵𑐫𑐾𑐐𑐸 𑐣𑐵𑐥𑑄 𑐳𑐵𑐬𑑂𑐰𑐖𑐣𑐶𑐎 𑐳𑑂𑐠𑐮, 𑐳𑐬𑐎𑐵𑐬𑐷 𑐰 𑐳𑐵𑐬𑑂𑐰𑐖𑐣𑐶𑐎 𑐖𑑂𑐫𑐵𑐎𑐹, 𑐳𑐩𑑂𑐥𑐡𑐵 𑐎𑑂𑐲𑐾𑐟𑑂𑐬, 𑐰𑐜𑐵 𑐖𑑂𑐫𑐵𑐎𑐹𑐮𑐶𑐳𑐾𑑄 𑐏𑐸𑐳𑐶𑐫𑐵 𑐳𑐸𑐔𑐸𑐎𑐸𑐔𑐸 𑐫𑐵𑐫𑐾𑐐𑐸 𑐮𑐐𑐵𑐫𑐟𑐫𑐵 𑐖𑑂𑐫𑐵𑐗𑑂𑐰𑑅𑐟 𑐟𑐫𑐵𑐟𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐩𑐾𑐫𑐬 𑑑𑑑 𑐰 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑑑𑑑 𑐡𑐠𑐸𑐂 𑐩𑐿𑐟𑑂𑐬𑐷𑐥𑐹𑐬𑑂𑐞 𑐦𑐸𑐚𑐧𑐮 𑐎𑐵𑐳𑐵, 𑐩𑐶𑐳𑐵 𑐎𑐬𑑂𑐩𑐔𑐵𑐬𑐷 𑐰 𑐩𑐶𑐳𑐵 𑐖𑐣𑐥𑑂𑐬𑐟𑐶𑐣𑐶𑐢𑐶 𑐡𑐠𑐸𑐂 𑐎𑐸𑐬𑑂𑐳𑐷 𑐡𑑁𑐜, 𑐰𑐶𑐡𑑂𑐫𑐵𑐮𑐫𑐳𑑂𑐟𑐬𑐷𑐫 𑐔𑐶𑐟𑑂𑐬𑐎𑐮𑐵, 𑐣𑐶𑐧𑐣𑑂𑐢 𑐥𑑂𑐬𑐟𑐶𑐫𑑀𑐐𑐶𑐟𑐵 𑐰 𑐱𑐶𑐎𑑂𑐲𑐎𑐳𑑂𑐟𑐬𑐷𑐫 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐣𑑄 𑐟𑐫𑐵𑐟𑑅𑐐𑐸 𑐡𑐸 𑑋

𑐠𑐸𑐎𑐠𑑄 𑐴𑐾 𑐥𑐬𑐩𑑂𑐥𑐬𑐵𑐐𑐟 𑐰𑐵𑐡𑑂𑐫𑐰𑐵𑐡𑐫𑑂 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵𑐟 𑐥𑑂𑐬𑑀𑐟𑑂𑐳𑐵𑐴𑐶𑐟 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐢𑐶𑐩𑐾 𑐧𑐵𑐖𑑄 𑐎𑐵𑐳𑐵, 𑐳𑐩𑑂𑐥𑐡𑐵 𑐫𑐵𑐟𑑂𑐬𑐵𑐫𑐵 𑐀𑐣𑐸𑐨𑐰𑐫𑐵𑐟 𑐨𑐶𑐜𑐶𑐫𑑀 𑐥𑑂𑐬𑐡𑐬𑑂𑐱𑐣𑐫𑑂𑐣𑐵𑐥𑑄 𑐳𑐩𑑂𑐥𑐡𑐵 𑐩𑐵𑐬𑑂𑐐𑐫𑑂 𑐠𑐷𑐠𑐷 𑐬𑐔𑐣𑐵𑐟𑑂𑐩𑐎 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐣𑑄 𑐥𑑂𑐬𑐳𑑂𑐟𑐵𑐰 𑐫𑐵𑑅𑐐𑐸 𑐡𑐸 𑑋 𑐠𑑂𑐰 𑐧𑐵𑐴𑐾𑐎𑑄 𑐠𑐸𑐐𑐸𑐳𑐷 𑐩𑐴𑐵𑐣𑐐𑐬𑐫𑐵 𑐥𑑂𑐬𑐟𑐶𑐲𑑂𑐛𑐵 𑐰 𑐐𑑁𑐬𑐰𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐎𑐶𑐥𑐵 𑐰 𑐔𑐶𑐟𑑂𑐬𑐫𑐵 𑐥𑑂𑐬𑐟𑐶𑐫𑑀𑐐𑐶𑐟𑐵𑐟𑑂𑐩𑐎 𑐥𑑂𑐬𑐡𑐬𑑂𑐱𑐣𑐷 𑐣𑑄 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋
𑐩𑐾𑐏𑐾 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐥𑐬𑐩𑑂𑐥𑐬𑐵𑐐𑐟 𑐧𑐵𑐖𑑄 𑐐𑐸𑐬𑐸𑐫𑐵 𑐳𑐩𑑂𑐩𑐵𑐣, 𑐩𑐴𑐵𑐣𑐐𑐬𑐫𑐵 𑐣𑑂𑐴𑐵𑐥𑐵𑑄𑐩𑑂𑐴 𑐥𑑂𑐬𑐩𑐸𑐏 𑐖𑐣𑐎𑐩𑐵𑐣 𑐱𑑂𑐬𑐾𑐲𑑂𑐛𑐫𑐵 𑐣𑐵𑐩𑑄 𑐳𑑂𑐰𑐣𑐵𑐟𑑅𑐐𑐸 𑐖𑐣𑐎𑐩𑐵𑐣 𑐱𑑂𑐬𑐾𑐲𑑂𑐛 𑐳𑐸𑐱𑐵𑐳𑐣 𑐳𑐶𑐬𑐥𑐵𑑅, 𑐳𑑂𑐠𑐵𑐣𑐷𑐫 𑐳𑐾𑐰𑐵 𑐐𑑁𑐬𑐰 𑐥𑐡𑐎 𑐰𑐶𑐟𑐬𑐞, 𑐄𑐟𑑂𑐎𑐺𑐲𑑂𑐚 𑐎𑐬𑐡𑐵𑐟𑐵, 𑐎𑐬𑑂𑐩𑐔𑐵𑐬𑐷 𑐳𑐩𑑂𑐩𑐵𑐣𑐮𑐶𑐳𑐾𑑄 𑐳𑐸𑐱𑐵𑐳𑐣 𑐥𑐟𑑂𑐬𑐎𑐵𑐬𑐶𑐟𑐵 𑐥𑐸𑐬𑐳𑑂𑐎𑐵𑐬 𑐰𑐶𑐟𑐬𑐞𑐫𑐵 𑐖𑑂𑐫𑐵𑐗𑑂𑐰𑑅 𑐣𑑄 𑐟𑐫𑐵𑐟𑑅𑐐𑐸 𑐡𑐸 𑑋

𑐩𑐴𑐵𑐣𑐐𑐬 𑐡𑐶𑐰𑐳 𑐳𑐸𑐠𑐵𑑄 𑐮𑐵𑐎𑐾𑐟 𑐧𑐿𑐛𑐎𑑄 𑐠𑐷𑐠𑐷 𑐄𑐥𑐳𑐩𑐶𑐟𑐶 𑐣𑑄 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐩𑐴𑐵𑐣𑐐𑐬𑐫𑐵 𑐥𑑂𑐬𑐰𑐎𑑂𑐟𑐵𑐮𑐶𑐳𑐾𑑄 𑑑𑑗 𑐰𑐜𑐵𑐀𑐢𑑂𑐫𑐎𑑂𑐲 𑐣𑐰𑐶𑐣 𑐩𑐵𑐣𑐣𑑂𑐢𑐬𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐖𑐣𑐥𑑂𑐬𑐟𑐶𑐣𑐶𑐢𑐶, 𑐥𑐟𑑂𑐬𑐎𑐵𑐬 𑐰 𑐳𑐩𑐵𑐖𑐫𑐵 𑐮𑐧𑑂𑐢 𑐥𑑂𑐬𑐟𑐶𑐲𑑂𑐛𑐶𑐟 𑐰𑑂𑐫𑐎𑑂𑐟𑐶 𑐳𑐩𑑂𑐩𑐵𑐣 𑐣𑐵𑐥𑑄 𑐥𑐸𑐬𑐳𑑂𑐎𑐵𑐬 𑐕𑐣𑑁𑐚 𑐄𑐥𑐳𑐩𑐶𑐟𑐶, 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐊𑐰𑑄 𑐥𑑂𑐬𑐟𑐶𑐰𑐾𑐡𑐣 𑐄𑐥𑐳𑐩𑐶𑐟𑐶 𑐬 𑐎𑐵𑐬𑑂𑐫𑐎𑑂𑐬𑐩 𑐳𑐘𑑂𑐔𑐵𑐮𑐣 𑐊𑐰𑑄 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐣𑐵𑑅 𑐳𑑂𑐰𑑄𑐐𑐹 𑐄𑐥𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐥𑑂𑐬𑐩𑐸𑐏 𑐥𑑂𑐬𑐱𑐵𑐳𑐎𑐷𑐫 𑐀𑐢𑐶𑐎𑐺𑐟 𑐰𑐳𑐣𑑂𑐟 𑐀𑐢𑐶𑐎𑐵𑐬𑐷𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐎𑐬𑑂𑐩𑐔𑐵𑐬𑐷 𑐥𑐸𑐬𑐳𑑂𑐎𑐵𑐬 𑐰 𑐳𑐩𑑂𑐩𑐵𑐣 𑐄𑐥𑐳𑐩𑐶𑐟𑐶, 𑑘 𑐰𑐜𑐵𑐀𑐢𑑂𑐫𑐎𑑂𑐲 𑐁𑐱𑐵𑐩𑐵𑐣 𑐳𑑄𑐐𑐟𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐟𑐠𑐵 𑐳𑐩𑑂𑐥𑐡𑐵 𑐄𑐥𑐳𑐩𑐶𑐟𑐶, 𑑑𑑐 𑐰𑐜𑐵𑐀𑐢𑑂𑐫𑐎𑑂𑐲 𑐬𑐵𑐩𑐎𑐸𑐩𑐵𑐬 𑐎𑐾𑐳𑐷𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐎𑐵𑐳𑐵 𑐰 𑐂𑐨𑐾𑐣𑑂𑐚 𑐳𑑄𑐔𑐵𑐮𑐣, 𑑑𑑑 𑐰𑐜𑐵𑐀𑐢𑑂𑐫𑐎𑑂𑐲 𑐴𑐶𑐬𑐵𑐮𑐵𑐮 𑐟𑐞𑑂𑐜𑐸𑐎𑐵𑐬𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐀𑐟𑐶𑐠𑐶 𑐳𑐟𑑂𑐎𑐵𑐬 𑐰 𑐣𑐶𑐩𑐣𑑂𑐟𑑂𑐬𑐞𑐵 𑐄𑐥𑐳𑐩𑐶𑐟𑐶, 𑑑𑑒 𑐰𑐜𑐵𑐀𑐢𑑂𑐫𑐎𑑂𑐲 𑐧𑐵𑐮𑐎𑐺𑐲𑑂𑐞 𑐜𑑄𑐐𑑀𑐮𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐳𑐬𑐳𑐦𑐵𑐂 𑐰 𑐳𑐵𑐖𑐳𑐖𑑂𑐖𑐵, 𑑑𑑖 𑐰𑐜𑐵𑐀𑐢𑑂𑐫𑐎𑑂𑐲 𑐩𑐸𑐎𑐸𑐣𑑂𑐡 𑐬𑐶𑐖𑐵𑐮𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐬𑐵𑐖𑐳𑑂𑐰 𑐥𑐸𑐬𑐳𑑂𑐎𑐵𑐬 𑐰 𑐳𑐩𑑂𑐩𑐵𑐣, 𑑓𑑐 𑐰𑐜𑐵𑐀𑐢𑑂𑐫𑐎𑑂𑐲 𑐡𑐮𑐧𑐴𑐵𑐡𑐸𑐬 𑐎𑐵𑐬𑑂𑐎𑐷𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐳𑑂𑐰𑐵𑐳𑑂𑐠𑑂𑐫𑑀𑐥𑐔𑐵𑐬 𑐄𑐥𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐏𑑅 𑑋

𑐩𑐴𑐵𑐣𑐐𑐬 𑐡𑐶𑐰𑐳𑐫𑑂 𑐩𑐴𑐵𑐣𑐐𑐬𑐰𑐵𑐳𑐷𑐫𑐵 𑐳𑐴𑐨𑐵𑐐𑐶𑐟𑐵 𑐀𑐥𑑂𑐰𑐫𑐎𑐾𑐟 𑐠𑐷𑐠𑐷 𑐠𑐵𑐳𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐣𑑄 𑐳𑑄𑐔𑐵𑐮𑐣 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS