Read news in NepalBhasa text-- www.hamroschool.com BACK 𑐧𑑂𑐰𑐫𑐾𑐎𑐾𑐐𑐸 𑐩𑐏𑐸𑐮𑐵 𑐨𑐸𑐟𑐩𑐵𑐮𑐶 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑑂𑐰𑐫𑐾𑐎𑐾𑐐𑐸 𑐩𑐏𑐸𑐮𑐵 𑐨𑐸𑐟𑐩𑐵𑐮𑐶

𑐳𑐬𑑂𑐰𑐖𑑂𑐘𑐬𑐟𑑂𑐣 𑐟𑐸𑐮𑐵𑐢𑐬

𑐁𑐎𑐵𑐳𑐫𑑂 𑐥𑑂𑐫𑐵𑐏𑑄 𑐮𑑂𑐴𑐸𑐂, 𑐥𑐵𑐟𑐵𑐮𑐫𑑂 𑐧𑐵𑐖𑑄 𑐠𑐵𑐂 𑐠𑑂𑐰 𑐕𑐸 𑐏𑑅 ? – 𑐢𑐎𑐵𑑅 𑐳𑐸𑐣𑐵𑐣𑑄 𑐎𑑂𑐰𑐵𑑅 𑐣𑑂𑐫𑑃𑐳𑐵 𑐠𑐸𑐎𑐶𑐫𑐵 𑐮𑐶𑐳𑑅 𑐖𑐸𑐂 𑐨𑐸𑐟𑐸𑐩𑐵𑐮𑐶 𑐧𑑂𑐰𑐫𑐎𑐾𑐐𑐸 𑑋 𑐠𑑂𑐰 𑐖𑐸𑐮 𑐣𑐾𑐰𑐵𑑅 𑐎𑑂𑐰𑐵𑑅 𑑋 𑐥𑑂𑐫𑐎𑐸𑑄𑐮𑐵𑑅𑐐𑐸 𑐨𑑂𑐰𑑃𑐫𑐵𑐟 𑐔𑐷𑐥𑐸𑐐𑐸 𑐟𑐶 𑐎𑐠𑐶 𑐣𑐶𑐥𑐸, 𑐕𑐥𑐸 𑐢𑐣𑐸𑐲 𑐠𑐾𑑄 𑐔𑐵𑑅𑐟𑐸𑐂𑐎𑐵𑑅 𑐀𑐮𑐾 𑐩𑐾𑐐𑐸 𑐰𑐵𑐞 𑐠𑐾𑑄 𑐟𑐥𑑂𑐫𑑄𑐎 𑐟𑐫𑐵𑑅 𑐡𑐫𑐾𑐎𑐵𑑅 𑐎𑑅𑐎𑐵𑑅 𑐟𑐫𑐵𑑅 𑐳𑐸𑐎𑐵𑑄 𑐔𑐶𑐣𑐵𑑅 𑐩𑑀𑐴𑐣𑐶𑐧𑐮𑐫𑑂 𑐁𑐎𑐵𑐳𑐫𑑂 𑐧𑑂𑐰𑐫𑐾𑐎𑐾𑐐𑐸𑐫𑐵𑐟 𑐴𑐾 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾𑐐𑐸 𑐢𑐵𑐂𑐐𑐸 𑐏𑑅 𑑋 𑐨𑐸𑐟𑐩𑐵𑐮𑐶, 𑐨𑐸𑐟𑐶𑐩𑐵𑐮𑐶, 𑐨𑐸𑐟𑐸𑐩𑐵𑐮𑐶, 𑐨𑑂𑐰𑐟𑐩𑐵𑐮𑐶, 𑐨𑑂𑐰𑐟𑐵𑐩𑐵𑐮𑐶, 𑐨𑑂𑐰𑐟𑐶𑐩𑐵𑐮𑐵, 𑐨𑐸𑐟𑐶𑐩𑐵𑐮𑐵, 𑐨𑐸𑐣𑐶𑐩𑐵𑐮𑐶, 𑐨𑐸𑐟𑐶𑐩𑐵, 𑐧𑐏𑐸𑑄𑐩𑐵𑐮𑐶, 𑐧𑐟𑐶𑐩𑐵 (𑐡𑑀𑐮𑑂𑐏𑐵) 𑐣𑑂𑐴𑑂𑐫𑐵𑐐𑐸 𑐴𑐾 𑐢𑐵𑑅𑐳𑐵𑑄 𑐁𑐏𑐶𑐬 𑐠𑑂𑐰 𑐨𑐸𑐟𑐩𑐵𑐮𑐶 𑐴𑐾 𑐏𑑅 𑑋 𑐠𑐵𑐫𑑂 𑐰 𑐩𑐣𑐹 𑐳𑑂𑐰𑐫𑐵𑑅 𑐥𑐵𑑅𑐐𑐸 𑐣𑐵𑑄 𑐖𑐎 𑐏𑑅 𑑋 𑐨𑐸𑐟𑐩𑐵𑐮𑐶𑐂 𑐢𑐣𑐸𑐲 𑐠𑐾𑑄 𑐔𑐵𑑅𑐟𑐸𑐐𑐸 𑐎𑐠𑐶𑐫𑐵𑐟 𑐥𑐥𑐹 𑐎𑐠𑐶 (𑐧𑐥𑐶 𑐎𑐠𑐶) 𑐢𑐵𑐂𑐳𑐵 𑐧𑐶𑐔𑐫𑑂 𑐰𑐵𑐞 𑐠𑐾𑑄 𑐟𑐥𑑂𑐫𑑄𑐐𑐸 𑐎𑐠𑐶𑐫𑐵𑐟 𑐡𑐸𑐐𑑅𑐎𑐠𑐶 (𑐟𑑂𑐰𑐵𑑅 𑐎𑐠𑐶) 𑐢𑐵𑐂 𑑋 𑐡𑐸𑐐𑑅𑐎𑐠𑐶𑐫𑐵 𑐡𑐎𑐮𑐫𑑂 𑐔𑑂𑐰𑐫𑑂𑐫𑐵𑐐𑐸 𑐔𑑂𑐰𑐎𑐵𑐫𑐵𑐟 𑐨𑐸𑐟𑐩𑐵𑐮𑐶𑐫𑐵 𑐟𑑂𑐰𑐵𑑅 𑐢𑐵𑐂𑐐𑐸 𑐏𑑅 𑑋 𑐟𑑂𑐰𑐵𑑅 𑐡𑐸𑐠𑐵𑐫𑑂 𑐔𑑂𑐰𑑄𑐐𑐸 𑐎𑐠𑐶 𑐖𑐹𑐐𑐸𑐮𑐶𑑄 𑐴𑐾 𑐟𑑂𑐰𑐵𑑅𑐎𑐠𑐶 𑐢𑐵𑑅𑐐𑐸 𑐖𑐸𑐂𑐩𑐵𑑅 𑑋 𑐟𑑂𑐰𑐵𑑅 𑐢𑐫𑐵𑐐𑐸 𑐨𑐸𑐟𑐩𑐵𑐮𑐶𑐫𑐵 𑐳𑑂𑐚𑐾𑐬𑐶𑑄𑐐 𑐏𑑅 𑑋 𑐟𑑂𑐰𑐵𑑅 𑐐𑐸𑐏𑐾 𑐳𑑂𑐰𑐎𑐵𑑅 𑐎𑐵 𑐟𑐸𑐮𑐵 𑐎𑐵𑐮 𑐨𑐸𑐟𑐩𑐵𑐮𑐶 𑐄𑐏𑐾 𑐴𑐾 𑐧𑑂𑐰𑐵𑑃𑐫𑑂 𑐰𑐣𑐷 𑑋

𑐳𑐬𑑂𑐐𑑅 𑐰𑑃𑐔𑐸𑐳𑐾 𑐔𑑂𑐰𑐣𑐵𑑅, 𑐣𑐶𑐨𑐵𑑅 𑐠𑐶𑐣𑐵𑑅, 𑐣𑑂𑐴𑐶𑐔𑑂𑐕𑐶 𑐔𑐔𑑂𑐕𑐶 𑐰𑐵 𑐰𑐂𑐐𑐸 𑐡𑐶𑐣𑐵𑑅 𑐳𑐶𑐣𑐵𑐖𑑂𑐫𑐵 𑐳𑐶𑐢𑑅𑐐𑐸 𑐃 𑑋 𑐴𑐵𑐣𑑄 𑐴𑐵𑐣𑑄 𑐰𑐵 𑐰𑑅𑐳𑐵 𑐰𑐵𑐩𑐵 𑐥𑐵𑐎𑐫𑑂 𑐩𑐖𑐸𑐂 𑐮𑐵 𑐢𑐎𑐵𑑅 𑐂𑐣𑑂𑐡𑑂𑐬𑐫𑐵𑐟 ‘𑐁𑑅 𑐰𑐵 𑐰𑐫𑐾 𑐐𑐵𑐟, 𑐰𑐵 𑐥𑐵𑐎𑐫𑑂 𑐖𑐸𑐂 𑐟𑑂𑐫𑐮’ 𑐢𑐎𑐵𑑅 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐵𑑅 𑐰𑐵𑐡𑑂𑐫𑑅𑐫𑐵𑐟 𑐏𑐧𑐬 𑐕𑑂𑐰𑐫𑐾𑐐𑐸 𑐏𑑅 𑐢𑐫𑐵𑐐𑐸 𑐖𑐣𑐢𑐵𑐬𑐞𑐵 𑐡𑐸 𑑋 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐳𑐶𑐣𑐵𑐖𑑂𑐫𑐵 𑐳𑐶𑐩𑐢𑐫𑐾𑐎𑑄 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾 𑐩𑐖𑐶𑐄 𑐢𑐵𑐂 𑑋 𑐧𑑂𑐰𑐫𑐾𑐎𑐮𑐎𑐶 𑐰𑐵 𑐡𑐶𑐣𑐵𑑅 𑐳𑐶𑐣𑐵𑐖𑑂𑐫𑐵 𑐳𑑂𑐫𑐣𑐷 𑐢𑐎𑐵𑑅 𑐧𑑂𑐰𑑅𑐧𑐶𑐂 𑑋 𑐗𑐷𑐠𑐵𑐫𑑂 𑐨𑐸𑐟𑐩𑐵𑐮𑐶 𑐎𑑅𑐳𑐶, 𑐥𑐮𑐶𑐂, 𑐖𑐳𑑂𑐟𑐵𑐫𑑂 𑐠𑑅𑐠𑐶𑐟𑐶 𑐥𑐵𑐳𑐵𑐨𑐵𑐂 𑐩𑐸𑐣𑐵𑑅 𑐣𑐫𑐾𑐐𑐸 𑐟𑑂𑐰𑐣𑐾𑐐𑐸 𑐖𑑂𑐰𑐬𑐾 𑐫𑐵𑐣𑐵𑑅 𑐟𑐟𑑅𑐐𑑂𑐰𑑅𑐐𑐸 𑐳𑑂𑐥𑐶𑐎𑐬 𑐖𑐰𑑄𑐏𑐰𑑄 𑐟𑐫𑐵𑑅 𑐩𑐵𑐮𑐱𑑂𑐬𑐷, 𑐣𑐾𑐰𑐵𑑅 𑐢𑐸𑐣 𑐴𑐵𑐫𑐾𑐎𑐵𑑅 𑐎𑑁𑐮𑐵 𑐮𑐕𑐶𑐫𑑄𑐎 𑐴𑐾 𑐧𑑂𑐰𑐫𑐾𑐎𑐷 𑑋 𑐀𑐫𑑂𑐳𑐵𑑄 𑐀𑐲𑑂𑐚𑐩𑐶, 𑐣𑐰𑐩𑐶, 𑐡𑐱𑐩𑐶 𑐳𑑂𑐰𑐣𑑂𑐴𑐸 𑐰𑐶𑐲𑐾𑐱 𑐖𑐸𑐂 𑑋

𑐠𑐧𑐮𑐫𑑂 𑐳𑐬𑑂𑐐𑑅 𑐖𑐵𑐫𑐾𑐎 𑐳𑐵𑐡𑐵, 𑐴𑑂𑐫𑐵𑐄𑑃𑐮𑐵𑐮, 𑐰𑐵𑐄𑑃𑐮𑐵𑐮, 𑐴𑐵𑐎𑐸𑐮𑐵𑐮, 𑐩𑑂𑐴𑐵𑐳𑐸𑐮𑐵𑐮, 𑐰𑑃𑐔𑐸𑐮𑐵𑐮, 𑐧𑐵𑐥𑐵𑑅𑐔𑑂𑐫𑐵, 𑐡𑐵𑐬𑐶𑐰𑐵𑐮, 𑐥𑐵𑐣𑐧𑐸𑐟𑐵, 𑐱𑑄𑐏𑐧𑐸𑐟𑐵, 𑐦𑐵𑐟𑑂𑐰𑐵𑑅, 𑐢𑐬𑑂𑐎𑐾, 𑐟𑐶𑐣𑐢𑐬𑑂𑐎𑐾, 𑐟𑐶𑐣𑐎𑐸𑐣𑐾, 𑐔𑐵𑐬𑐎𑐸𑐣𑐾, 𑐣𑑂𑐴𑐶𑐥𑑄𑐰𑐵𑐮 𑐨𑐸𑐟𑐩𑐵𑐮𑐶𑑄 𑐂𑐮𑐶𑐮𑐶𑐮𑐶 𑐖𑐵𑐂 𑑋 𑐨𑐸𑐟𑐩𑐵𑐮𑐶 𑐧𑐵𑐖𑑄𑐟 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾𑐟 𑐥𑐣𑑂𑐖𑐵, 𑐐𑐐𑐮𑑂𑐳, 𑐎𑑂𑐫𑐵𑐥 𑐖𑑂𑐰𑐣𑐵𑑅 𑐟𑐫𑐵𑐬 𑐖𑐸𑐫𑐵𑐔𑑂𑐰𑐣𑐷 𑑋 𑐠𑐸𑐎𑐠𑑄 𑐨𑐸𑐟𑐩𑐵𑐮𑐶 𑐢𑐵𑐫𑐾𑐰𑑄 𑐴𑐾 𑐩𑐶𑐖𑑄𑐥𑐶𑐣𑐶 𑐠𑑅 𑐩𑐔𑐵𑐧𑐮𑐫𑑂𑐫𑐵 𑐮𑐟𑐵𑐂𑑃, 𑐳𑐸𑐎𑐵 𑐰 𑐩𑐣𑑂𑐡𑐮𑐶 𑐎𑐵𑐳𑐵 𑐮𑐸𑐩𑐣𑐵 𑐰𑐂 𑑋 𑐠𑑁𑑄𑐎𑐣𑑂𑐴𑐫𑑂 𑐩𑐶𑐳𑐵𑐥𑐶𑑄 𑐣𑑄 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾𑐐𑐸𑐮𑐶𑐂 𑐣𑑂𑐴𑑂𑐫𑐔𑐶𑐮𑐵𑐰𑑅𑐐𑐸 𑐡𑐸 𑑋

𑐨𑐸𑐟𑐩𑐵𑐮𑐶 𑐣𑑄 𑐣𑐶𑐟𑐵𑐖𑐶 𑐡𑐸 𑑋 𑐣𑐾𑐥𑐵𑐮𑐷 𑐨𑑂𑐰𑑄 𑐰 𑐮𑐏𑐣𑐅 𑐨𑑂𑐰𑑄𑐫𑐵𑐐𑐸 𑑋 𑐮𑐏𑐣𑐅 𑐨𑑂𑐰𑑃𑐟𑐫𑑂 𑐣𑑄 𑐳𑐵𑐡𑐵 𑐰 𑐱𑑄𑐏 𑐑𑑀𑐟𑐫𑑂 𑐫𑐵𑐣𑐵𑐟𑑅𑐐𑐸 𑐢𑐎𑐵𑑅 𑐣𑐶𑐠𑐶 𑐡𑐸 𑑋 𑐱𑑄𑐏 𑐑𑑀𑐟𑐫𑑂 𑐫𑐵𑐣𑐵𑐟𑑅𑐐𑐸 𑐨𑐸𑐟𑐩𑐵𑐮𑐶 𑐑𑑀𑐟𑐫𑑂 𑐫𑐵𑐣𑐵 𑐩𑐟𑑅𑐐𑐸 𑐨𑐸𑐟𑐩𑐵𑐮𑐶 𑐳𑑂𑐰𑐫𑐵𑑅 𑐨𑐔𑐵 𑐠𑐶𑐎𑐾 𑐖𑐸𑐂 𑑋 𑐣𑐾𑐥𑐵𑐮𑐷 𑐨𑑂𑐰𑑄𑐫𑐵𑐐𑐸 𑐨𑐸𑐟𑐩𑐵𑐮𑐶 𑐣𑑄 𑐮𑐏𑐣𑐅 𑐨𑐸𑐟𑐩𑐵𑐮𑐶 𑐳𑑂𑐰𑐫𑐵𑑅 𑐨𑐔𑐵 𑐀𑐥𑑂𑐰𑑅 𑐴𑐾 𑐠𑐶𑐎𑐾, 𑐟𑐬 𑐧𑐵𑑄𑐮𑐵𑑅 𑑋 𑐣𑐾𑐥𑐵𑐮𑐷 𑐨𑑂𑐰𑑄𑐫𑐵𑐐𑐸 𑐨𑐸𑐟𑐩𑐵𑐮𑐶 𑐗𑐷𑐠𑐵𑐫𑑂 𑐴𑐾 𑐡𑐫𑐾𑐎𑐷𑐐𑐸 𑐖𑐹𑐐𑐸𑐮𑐶𑑄 𑐩𑐳𑑂𑐟𑐫𑑂𑐟 𑐢𑐎𑐵𑑅 𑐔𑐶𑐔𑐶𑐥𑐵𑑅𑐐𑐸 𑐣𑑄 𑐡𑐫𑐾𑐎𑐵 𑐧𑑂𑐫𑐹 𑑋

𑐠𑑁𑑄𑐎𑐣𑑂𑐴𑐫𑑂 𑐮𑐵 𑐀𑐗 𑐔𑐶𑐎𑑂𑐔𑐵–𑐔𑐶𑐎𑑂𑐔𑐵𑐥𑐵𑑅𑐐𑐸 𑐧𑑂𑐰𑐳𑐵 𑐨𑐸𑐟𑐩𑐵𑐮𑐶 𑐣𑑄 𑐡𑐫𑐾𑐎𑐹 𑑋 𑐣𑐾𑐥𑐵𑐮𑐷 𑐨𑐸𑐟𑐩𑐵𑐮𑐶 𑐮𑐏𑐣𑐅 𑐨𑑂𑐰𑑄𑐫𑐵 𑐨𑐸𑐟𑐩𑐵𑐮𑐶 𑐠𑐾𑑄 𑐗𑑂𑐫𑐵𑐬𑐗𑐸𑐬 𑐐𑐸𑐂 𑐩𑐏𑐸 𑑋 𑐮𑐏𑐣𑐅 𑐨𑐸𑐟𑐩𑐵𑐮𑐶𑐂 𑐣𑑄 𑐳𑑂𑐫𑑅𑐎𑐵 𑐢𑐎𑐵𑑅 𑐨𑐸𑐟𑐩𑐵𑐮𑐶𑐫𑐵 𑐧𑑀𑐬𑑂𑐜𑐬𑐫𑑂 𑐳𑐸𑐎𑐵 𑐟𑐫𑐵𑐟𑑅𑐐𑐸 𑐡𑐂 𑑋 𑐠𑑁𑑄𑐎𑐣𑑂𑐴𑐫𑑂𑐫𑐵 𑐨𑐸𑐟𑐩𑐵𑐮𑐶 𑐥𑑂𑐮𑐵𑐳𑑂𑐚𑐶𑐎𑐫𑐵𑐐𑐸 𑐄𑐎𑐶𑐳𑐣𑑄 𑐧𑐶𑐖𑑂𑐘𑐵𑐥𑐣, 𑐫𑐶𑐏𑐨 𑐮𑐫𑐟𑐨𑐎, 𑐫𑐶𑐏𑐨 𑐟𑑂𑐬𑐐𑐫𑐟𑐨𑐎, m𑐨𑐎𑐎𑐧𑐣𑐨𑐎, 𑐎𑐵𑐬𑑂𑐚𑐸𑐣𑐫𑐵 𑐥𑐵𑐟𑑂𑐬 𑐁𑐡𑐶 𑐂𑐟𑑂𑐫𑐵𑐡𑐶 𑐕𑐵𑐥𑐫𑑂 𑐫𑐵𑐣𑐵𑐟𑑅𑐐𑐸 𑐡𑐂 𑑋 𑐀𑐗 𑐐𑐸𑐐𑐸𑑄 𑐮𑐵 𑐨𑐬𑐵𑐫𑑂𑐥𑐵𑑅𑐐𑐸 𑐎𑐵𑐥𑑅𑐫𑐵𑐐𑐸 𑐮𑐵𑐥𑐵𑐔𑐵, 𑐗𑑄𑐐𑑅, 𑐁𑐎𑐵𑐬 𑐥𑑂𑐬𑐎𑐵𑐬𑐫𑑂 𑐡𑐫𑐎𑐵 𑐟𑑅𑐐𑐸 𑐡𑐂 𑑋

𑐨𑐸𑐟𑐩𑐵𑐮𑐶𑐫𑐵 𑐖𑑂𑐫𑐵𑐣 𑐢𑐫𑐵𑐐𑐸 𑐎𑑅𑐎𑐵 𑐴𑐾 𑐏𑑅 𑑋 𑐎𑑅𑐎𑐵𑐫𑐵𑐟 𑐐𑐮𑑅𑐎𑐵, 𑐗𑑂𑐫𑐵𑐏𑐶𑑄 (𑐏𑑂𑐰𑐥𑐫𑑂) 𑐣𑑄 𑐢𑐵𑑅 𑑋 𑐎𑑅𑐎𑐵 𑐟𑐫𑐾𑐟 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐳𑐸𑐎𑐵 𑐕𑐟𑑂𑐰𑐵𑑅 𑐎𑐫𑐵𑑅 𑐖𑐰𑐐𑐸 𑐥𑐥𑐹 𑐎𑐠𑐶𑑄 𑐏𑐰𑐐𑐸 𑐥𑐥𑐹 𑐎𑐠𑐶 𑐟𑐎 𑐳𑑂𑐰𑐟𑐸 𑐎𑐵 𑐣𑐵𑐥𑐾 𑐫𑐵𑐫𑐾𑐐𑐸 𑑋 𑐀𑐮𑐾 𑐥𑐥𑐹 𑐎𑐠𑐶 𑐰 𑐡𑐸𑐐𑑅 𑐎𑐠𑐶 𑐎𑑂𑐬𑐳 𑐖𑐸𑐫𑐵𑐔𑑂𑐰𑑄𑐠𑐵𑐫𑑂 𑐳𑐶𑐣𑑂𑐎𑐵𑑄 𑐔𑑂𑐰𑐫𑑂 𑐕𑐥𑑂𑐰𑐵𑑅 𑐎𑑂𑐰𑐫𑑂 𑐕𑐥𑑂𑐰𑐵𑑅 𑐎𑑂𑐬𑐳 𑐖𑐸𑐂𑐎 𑐣𑐶𑐥𑑂𑐰𑐵𑑅 𑐏𑐣𑐾𑐐𑐸 𑑋 𑐀𑐠𑐾𑐴𑐾 𑐔𑑂𑐰𑐫𑑂 𑐥𑑂𑐰𑐵𑑅 𑐏𑐣𑐵𑐐𑐸 𑐠𑐵𑐳𑑄 𑐕𑐐𑐹 𑐥𑐵𑐏 𑐎𑑂𑐰𑐫𑑂 𑐡𑐸𑐐𑑅 𑐎𑐠𑐶𑐫𑐵 𑐖𑐰𑑄 𑐏𑐰𑑄 𑐕𑐥𑑂𑐰𑐵𑑅 𑐕𑐥𑑂𑐰𑐵𑑅 𑐏𑐣𑐾𑐐𑐸 𑑋 𑐀𑐮𑐾 𑐣𑑂𑐴𑐵𑐔𑑅𑐫𑐵𑐐𑐸 𑐳𑐸𑐎𑐵 𑐣𑐶𑐮𑑅 𑐫𑐵𑐣𑐵𑑅 𑐳𑐶𑐣𑑂𑐎𑐵𑑄 𑐥𑑂𑐰𑐵𑑅 𑐏𑐣𑐵𑐐𑐸 𑐥𑑂𑐰𑐵𑐮𑐫𑑂 𑐳𑐸𑐎𑐵 𑐡𑐸𑐕𑑂𑐰𑐫𑐵 𑐔𑑂𑐰𑐫𑑂 𑐡𑐸𑐐𑑅 𑐎𑐠𑐶 𑐰 𑐧𑐥𑐶 𑐎𑐠𑐶 𑐎𑑂𑐬𑐳 𑐖𑐸𑐫𑐵𑐔𑑂𑐰𑑄𑐠𑐵𑐫𑑂 𑐰 𑐎𑑂𑐰𑐫𑑂 𑐡𑐠𑐸𑐎𑐠𑐶𑐂 𑐣𑑄 𑐎𑑂𑐰𑐵𑐟𑑂𑐟𑐸𑐎 𑐣𑐶𑐐𑐠𑑅 𑐳𑑂𑐰𑐐𑐠𑑅 𑐐𑐠𑑅 𑐔𑐷𑐐𑐸 𑑋 𑐔𑑂𑐰𑐫𑑂𑐫𑐵𑐐𑐸 𑐐𑐠𑑅 𑐣𑑄 𑐎𑑂𑐰𑐫𑑂𑐫𑐵𑐐𑐸 𑐰 𑐎𑑂𑐰𑐫𑑂𑐫𑐵𑐐𑐸 𑐐𑐠𑑅 𑐣𑑄 𑐔𑑂𑐰𑐫𑑂𑐫𑐵𑐐𑐸 𑐐𑐠𑑅𑐫𑐵 𑐳𑐸𑐎𑐵 𑐧𑐬𑐵𑐧𑐬 𑐫𑐵𑐣𑐵𑑅 𑐴𑐵𑐣𑑄 𑐩𑐾𑐐𑐸 𑐐𑐠𑑅 𑐔𑐷𑐐𑐸 𑑋 𑐠𑑂𑐰 𑐴𑐾 𑐨𑐸𑐟𑐩𑐵𑐮𑐶𑐫𑐵 𑐎𑑅𑐎𑐵 𑐖𑐸𑐮 𑑋

𑐠𑑂𑐰𑐴𑐾 𑐎𑑅𑐎𑐵𑐫𑐵 𑐔𑑂𑐰𑑅𑐮𑐶𑐳𑐾 𑐮𑐟𑐵𑐂𑑃𑐫𑐵 𑐳𑐸𑐎𑐵 𑐳𑑂𑐰𑐵𑐎𑐵 𑐫𑑄𑐎𑐾𑐐𑐸 𑑋 𑐎𑑅𑐎𑐵 𑐟𑑅𑐐𑐸 𑐧𑐵𑑄𑐮𑐵𑐟𑐎𑐶 𑐨𑐸𑐟𑐩𑐵𑐮𑐶𑐫𑐵𑐟 𑐠𑑅𑐐𑐸 𑐧𑐳𑐫𑑂 𑐟𑐫𑐾𑐦𑐂 𑑋 𑐨𑐸𑐟𑐩𑐵𑐮𑐶 𑐠𑑅𑐐𑐸 𑐎𑐣𑑂𑐚𑑂𑐬𑑀𑐮𑐫𑑂 𑐡𑐂 𑑋 𑐎𑑅𑐎𑐵 𑐧𑐵𑑄𑐮𑐵𑑅𑐐𑐸 𑐨𑐸𑐟𑐩𑐵𑐮𑐶 𑐠𑐶𑐎𑐸𑐠𑐶𑐎𑐸 𑐥𑐣𑐷, 𑐔𑐎𑐶𑐔𑐎𑐶 𑐣𑑄 𑐣𑐂 𑑋 𑐖𑐰𑐫𑑂 𑐣𑑄 𑐰𑐣𑐷, 𑐏𑐰𑐫𑑂 𑐣𑑄 𑐰𑐣𑐷 𑑋 𑐔𑑂𑐰𑐫𑑂 𑐣𑑄 𑐰𑐣𑐷 𑐎𑑂𑐰𑐫𑑂 𑐣𑑄 𑐰𑐣𑐷 𑑋 𑐳𑐸𑐂𑐐𑐸 𑐕𑑂𑐫𑑄 𑐦𑐸𑐳𑐫𑑂 𑐫𑑄𑐎𑐵𑑅 𑐨𑐸𑐟𑐩𑐵𑐮𑐶 𑐔𑐎𑐶𑐔𑐎𑐶 𑐣𑐎𑐾 𑐮𑐵 𑐠𑐶𑐎𑐸𑐠𑐶𑐎𑐸 𑐥𑑄𑐎𑐾𑐮𑐵 𑐣𑑂𑐴𑑂𑐫𑐵𑐐𑐸𑑄 𑐴𑐾 𑐫𑐵𑐫𑐾 𑐦𑐂 𑑋 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾𑐧𑐮𑐫𑑂 𑐨𑐸𑐟𑐩𑐵𑐮𑐶 𑐠𑐶𑐎𑐸𑐠𑐶𑐎𑐸 (𑐠𑑂𑐫𑐵𑐎𑐵𑐠𑑂𑐫𑐵𑐎𑐵) 𑐣𑑄 𑐥𑐣𑐾𑐦𑐸, 𑐔𑐎𑐶𑐔𑐎𑐶 (𑐔𑐎𑐾𑐔𑐎𑐾) 𑐣𑑄 𑐣𑐫𑐾𑐦𑐸 𑑋 𑐀𑐥𑑂𑐰𑑅 𑐠𑐶𑐎𑐸𑐠𑐶𑐎𑐸 𑐣𑐮𑐎𑐶 𑐨𑐸𑐟𑐩𑐵𑐮𑐶 𑐮𑐵𑐟𑐵 𑐴𑐾 𑐖𑐸𑐂 𑐫𑑅, 𑐣𑑂𑐴𑑂𑐫𑐵𑐎𑑂𑐰 𑐦𑐸𑑃𑐂 𑐟𑑅𑐳𑐵𑑄 𑐨𑐸𑐟𑐩𑐵𑐮𑐶 𑐕𑐥𑑂𑐟𑐶 𑐴𑐾 𑐔𑐎𑐶𑐔𑐎𑐶 𑐣𑐂 𑐩𑐏𑐸 𑑋 𑐠𑐫𑑂 𑐖𑐸𑐂𑐧𑐮𑐫𑑂 𑐠𑐳𑐶𑐎𑑅𑐎𑐵 (𑐠𑐠𑐸𑐎𑐵) 𑐕𑐠𑐸 𑐳𑐶𑐫𑐵𑑅 (𑐣𑐶𑐂𑐎𑐵) 𑐧𑐶𑐮𑐎𑐶 𑐨𑐸𑐟𑐩𑐵𑐮𑐶 𑐴𑐵𑐣𑑄 𑐔𑐎𑐶𑐔𑐎𑐶 𑐣𑐂 𑑋 𑐀𑐥𑑂𑐰𑑅 𑐔𑐎𑐶𑐔𑐎𑐶 𑐣𑐮𑐎𑐶 𑐢𑐵𑑅𑐳𑐵 𑐎𑑂𑐰𑐳𑐶𑐎𑑅𑐎𑐵 (𑐎𑑂𑐰𑐠𑐸𑐎𑐵) 𑐕𑐠𑐸 𑐳𑐶𑐫𑐵𑑅 (𑐣𑐶𑐂𑐎𑐵) 𑐧𑐶𑐮𑐎𑐶 𑐣𑑄 𑐨𑐸𑐟𑐩𑐵𑐮𑐶 𑐠𑐶𑐎𑐸𑐠𑐶𑐎𑐸 𑐥𑐣𑐵 𑐰𑐂 𑑋 𑐐𑐸𑐩𑑂𑐴𑐐𑐸𑐩𑑂𑐴𑐾𑐳𑑂𑐫𑐵𑑄 𑐔𑐎𑐶𑐔𑐎𑐶 𑐀𑐥𑑂𑐰𑑅 𑐣𑐮𑐎𑐶 𑐧𑐾𑐩𑐵𑐣 𑐣𑐮 𑐢𑐎𑐵𑑅 𑐨𑑂𑐰𑑄𑐫𑐵𑐐𑐸 𑐣𑑂𑐴𑐶𑐥𑑄 𑐟𑐫𑐵𑑅 𑐣𑑄 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐷 𑑋 𑐮𑐶𑐥𑐵 𑐩𑐣𑐹𑐟𑐫𑑂𑐳𑑄 𑐀𑐜𑐶𑐫𑑀 𑐨𑐶𑐜𑐶𑐫𑑀 𑐚𑐾𑐥𑐫𑐵 𑐣𑑄 𑐣𑑂𑐴𑐶𑐥𑑄 𑐟𑐫𑐾𑐐𑐸 𑐫𑐵𑐣𑐵 𑐴𑐮 𑑋 𑐁𑑅 𑐮𑐵 𑐀𑐜𑐶𑐫𑑀 𑐨𑐶𑐜𑐶𑐫𑑀 𑐚𑐾𑐥 𑐣𑑄 𑐟𑐣𑐵 𑐰𑐣𑐾 𑐢𑐸𑑄𑐎𑐮 𑑋 𑐀𑐠𑐾 𑐴𑐾 𑐐𑐧𑐮𑐾𑑄 𑐨𑐸𑐟𑐩𑐵𑐮𑐶 𑐧𑑂𑐰𑐫𑐵 𑐔𑑂𑐰𑐔𑑂𑐰𑑄 𑐴𑐾 𑐨𑑂𑐰𑐵𑐎𑑂𑐎 𑐢𑐵𑐫𑐾𑐎 𑐖𑐹𑐰𑐣𑐾𑐫𑑅 𑑋 𑐀𑐠𑐾 𑐖𑐸𑐮𑐎𑐶 𑐮𑐵𑐥𑐵 𑐣𑐎𑐾𑐐𑐸 (𑐳𑑂𑐫𑐵𑐫𑐾𑐐𑐸) 𑐢𑐎𑐵𑑅 𑐡𑐸𑐐𑑅 𑐎𑐠𑐶 𑐕𑐵𑐟𑐶 𑐦𑐸𑐮𑐫𑑂 𑐫𑐵𑐫𑐾 𑐠𑐾𑑄 𑐔𑐵𑑅𑐟𑐸𑐂𑐎𑐵𑑅 𑐩𑐶𑐮𑐫𑑂 𑐫𑐵𑐂 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐨𑐸𑐟𑐩𑐵𑐮𑐶 𑐖𑐰𑐫𑑂 𑐰𑐵 𑐏𑐰𑐫𑑂 𑐕𑐏𑐾 𑐖𑐎 𑐢𑐾 𑐔𑐸𑐂𑐫𑑅 𑑋 𑐀𑐧𑐮𑐫𑑂 𑐨𑐸𑐟𑐩𑐵𑐮𑐶𑐫𑐵𑐟 𑐳𑐣𑑂𑐟𑐸𑐮𑐣 𑐫𑐵𑐫𑐾𑐟 𑐐𑑂𑐰𑐵𑑅 𑐣𑐎𑐾𑐐𑐸 (𑐧𑐎𑐸𑐮𑐵 𑐣𑐎𑐾𑐐𑐸, 𑐐𑑂𑐰𑐵𑐫𑑂 𑐣𑐷𑐎𑐾𑐐𑐸) 𑐢𑐎𑐵𑑅 𑐢𑐾𑐫𑑂𑐔𑐸𑐐𑐸𑐫𑐵 𑐀𑑅𑐏𑑅𑐥𑐵𑐏𑐾 𑐨𑑂𑐰𑑄 𑐕𑐎𑐹𑐔𑐵 𑐥𑐥𑐹 𑐎𑐠𑐶𑐂 𑐟𑐣𑐾𑐩𑐵𑑅 𑑋 𑐧𑐵𑑄𑐮𑐵𑑅𑐐𑐸 𑐨𑐸𑐟𑐩𑐵𑐮𑐶 𑐧𑑂𑐰𑐂𑐧𑐮𑐫𑑂 𑐳𑑂𑐫𑐵𑐎𑐸 (𑐳𑑂𑐫𑐵𑐦𑑅, 𑐳𑐶𑐎𑐸𑐳𑐶𑐎𑐸) 𑐣𑐂 𑐩𑐏𑐸 𑑋 𑐳𑐸𑐎𑐵 𑐟𑑂𑐰𑑅𑐟𑐹𑐮𑐶𑐳𑐾 𑐨𑐸𑐟𑐩𑐵𑐮𑐶 𑐠𑐳𑐶𑐧𑐵𑑅 𑐰𑐣𑐾𑐫𑑅 𑑋 𑐁𑐎𑑂𑐳𑐫𑑂 𑐗𑐣𑑂𑐗𑐣𑑂 𑐠𑐴𑐵𑑄 𑐰𑐣𑐵𑑅 𑐮𑐟𑐵𑐂𑑃 𑐣𑑄 𑐨𑐸𑐟𑐩𑐵𑐮𑐶 𑐟𑐎𑐫𑐵 𑐳𑐸𑐎𑐵 𑐑𑑅𑐩𑐵𑑅𑐫𑐵 𑐁𑐎𑐵𑐬𑐫𑑂 𑐔𑐵𑑅𑐟𑐸𑐮𑐵 𑐔𑑂𑐰𑐣𑐷 𑑋

𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾𑐟 𑐕𑐩𑑂𑐴𑐾𑐳𑑂𑐫𑐵𑑄 𑐮𑐟𑐵𑐂𑑃 𑐖𑑂𑐰𑐣𑐾 𑐩𑐵𑐮 𑐀𑐮𑐾 𑐩𑐾𑐩𑑂𑐴𑐾𑐳𑑂𑐫𑐵𑑄 𑐨𑐔𑐵 𑐟𑐵𑐥𑐵𑐎𑑂𑐎 𑐰𑐣𑐵𑑅 𑐨𑐸𑐟𑐩𑐵𑐮𑐶𑐫𑐵 𑐥𑐥𑐹 𑐎𑐠𑐶 𑐖𑑂𑐰𑐣𑐵𑑅 𑐁𑐎𑐵𑐳𑐫𑑂 𑐧𑑂𑐰𑐫𑐾𑐎𑐵 𑐧𑐶𑐂𑐩𑐵𑑅 𑑋 𑐨𑐸𑐟𑐩𑐵𑐮𑐶 𑐁𑐎𑐵𑐳𑐫𑑂 𑐧𑑂𑐰𑐫𑐾𑐎𑐵 𑐧𑐶𑐂𑐐𑐸𑐫𑐵𑐟 𑐴𑐾 𑐨𑐸𑐟𑐩𑐵𑐮𑐶 𑐟𑐶𑐂𑐐𑐸 𑐢𑐵𑐂𑐐𑐸 𑐏𑑅 𑑋 𑐨𑐸𑐟𑐩𑐵𑐮𑐶 𑐟𑑂𑐫𑐹 𑐰𑐣𑐷𑐩𑑂𑐴𑐾𑐳𑑂𑐫𑐵𑑄 𑐧𑐵𑑄𑐮𑐵𑐎 𑐄𑐏𑐾𑐠𑐸𑐏𑐾𑑄, 𑐣𑑂𑐴𑑂𑐫𑑅𑐣𑐾𑐮𑑂𑐫𑐹𑐣𑐾 𑐳𑑂𑐰𑐫𑐵 𑐖𑐸𑐂𑐩𑐵𑑅 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐖𑐳𑑂𑐟𑐵, 𑐥𑐮𑐶𑑄 𑐎𑐸𑐟𑐸𑐰𑐣𑐵𑑅 𑐧𑐵𑑄𑐩𑐮𑐵𑐎𑑂𑐎 𑐑𑐵𑑅𑐥𑐵𑑅 𑐖𑐹𑐥𑐶𑑄 𑐣𑑄 𑐡𑐸 𑑋 𑐀𑐠𑐾 𑐴𑐾 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐷𑐩𑑂𑐴 𑐣𑑄 𑐦𑐸𑐂𑑃 𑐟𑐟𑑄 𑐮𑐶𑐴𑐵𑑄 𑐮𑐶𑐴𑐵𑑄 𑐰𑐣𑐵 𑐑𑐵𑑅𑐥𑐵𑑅 𑐖𑐹𑐥𑐶𑑄 𑐣𑑄 𑐡𑐸 𑑋 𑐨𑐸𑐟𑐩𑐵𑐮𑐶 𑐁𑐎𑐵𑐳𑐫𑑂 𑐧𑑂𑐰𑐮𑐎𑐶 𑐩𑐾𑐥𑐶𑑄 𑐣𑐵𑐥 𑐮𑑂𑐰𑐵𑐎𑐾 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐷 𑑋 𑐀𑐮𑐾 𑐦𑑃𑐸𑐂 𑐫𑐵𑐫𑐾𑐐𑐸 𑐳𑐸𑐬𑐸 𑐖𑐸𑐂 𑑋 𑐦𑐸𑐂𑑃 𑐎𑐵𑐫𑐾𑐐𑐸 𑐰 𑐦𑐸𑐂𑑃 𑐟𑐫𑐾𑐐𑐸 𑐣𑑄 𑐳𑐸𑐬𑐸 𑐖𑐸𑐂 𑑋 𑐖𑐰𑐫𑑂 𑐥𑐵𑐟𑐵𑐥𑐵𑐟𑐵 𑐦𑐸𑐂𑑃 𑐫𑐵𑑅𑐳𑐵 𑐨𑐸𑐟𑐩𑐵𑐮𑐶 𑐖𑐰𑐫𑑂 𑐢𑐾𑐔𑐸𑐂 𑐏𑐰𑐫𑑂 𑐦𑐵𑐟𑐵𑐦𑐵𑐟𑐵 𑐦𑐸𑐂𑑃 𑐫𑐵𑑅𑐳𑐵 𑐨𑐸𑐟𑐩𑐵𑐮𑐶 𑐏𑐰𑐫𑑂 𑐢𑐾𑐔𑐸𑐂 𑑋 𑐦𑐸𑐂𑑃 𑐟𑐫𑐵𑑅 𑐠𑑅𑐐𑐸 𑐨𑐸𑐟𑐩𑐵𑐮𑐶 𑐡𑑂𑐫𑐣𑐾 𑐮𑐵𑐎𑐾𑐟 𑐳𑐣𑐷, 𑐡𑑂𑐫𑐣𑐾 𑐮𑐵𑐟𑐎𑐶 𑐴𑐵𑐣𑑄 𑐜𑐧𑐮 𑐦𑐸𑐂𑑃 𑐟𑐫𑐵 𑐟𑑅𑐮𑐾 𑐮𑐵𑑅𑐩𑑂𑐴 𑐧𑐶𑐳𑐶𑐄𑑃 𑐰𑐣𑐾 𑐩𑐦𑐫𑐾𑐎 𑐨𑐸𑐟𑐩𑐵𑐮𑐶𑑄 𑐎𑑂𑐰𑐵𑐣𑐵𑑅 𑐎𑑂𑐰𑐎𑐫𑐵𑑅 𑐎𑐵 𑐕𑐸𑐣𑐾𑐐𑐸 𑐫𑐵𑐂, 𑐎𑐵 𑐟𑑂𑐰𑐟𑐾𑐐𑐸 𑐫𑐵𑐂, 𑐐𑐧𑐮𑐾 𑐟𑐎 𑐔𑐫𑑂𑐟 𑐫𑐵𑐫𑐾 𑐦𑐂𑐩𑐏𑐸 𑐀𑐧𑐮𑐫𑑂 𑐟𑐎 𑐎𑐵 𑐕𑐸𑐣𑐵𑐔𑑂𑐰𑐣𑐷 𑑋 𑐕𑐸𑑄 𑐐𑐠𑐾 𑐖𑐸𑐫𑐵𑑅 𑐠𑑅𑐐𑐸 𑐨𑐸𑐟𑐩𑐵𑐮𑐶 𑐔𑐫𑑂𑐟 𑐖𑐸𑐮𑐎𑐶 𑐎𑐵 𑐟𑐸𑐮𑐾 𑐴𑐠𑐵𑐫𑑂 𑐖𑐸𑐂, 𑐕𑐵𑐫𑑂𑐢𑐵𑑅𑐳𑐵𑑄 𑐩𑐾𑐩𑐾𑐥𑐶𑑄 𑐥𑐮𑐶𑐂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄𑐳𑑄 𑐎𑐵𑐥𑐸 𑐥𑐠𑑄 𑐡𑐵𑐫𑐵𑑅 𑐎𑐵𑐫𑐾𑐫𑑅 𑑋

𑐨𑐸𑐟𑐩𑐵𑐮𑐶 𑐢𑐫𑐵𑐐𑐸 𑐩𑐧𑑂𑐰𑑅𑐟𑐮𑐾 𑐧𑑂𑐰𑐫𑐎𑐾𑐐𑐸, 𑐧𑑂𑐰𑐫𑐾 𑐢𑐸𑑄𑐎𑐵 𑐮𑑂𑐰𑐵𑐎𑐾𑐐𑐸, 𑐮𑑂𑐰𑐵𑐎𑐾 𑐢𑐸𑑄𑐎𑐵𑑅 𑐔𑐵𑐫𑐾𑐐𑐸, 𑐔𑐵𑐫𑐾 𑐢𑐸𑑄𑐎𑐵𑑅 𑐴𑐵𑐣𑑄 𑐠𑐵𑐎𑐵𑐠𑐸𑐎𑐸 𑐎𑐵𑐫𑐾𑐐𑐸 𑐏𑑅 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐠𑐵𑐎𑐵𑐠𑐸𑐎𑐸 𑐎𑐵𑐫𑐾 𑐢𑐵𑐟𑑂𑐟𑐮𑐾𑑄 𑐮𑐟𑐵𑐂𑑃𑐣𑐵𑐥𑑄 𑐠𑐵𑐎𑐵𑐠𑐸𑐎𑐸 𑐎𑐵𑑅𑐐𑐸 𑐨𑐸𑐟𑐩𑐵𑐮𑐶𑑄 𑐴𑐾 𑐳𑐵𑐮𑐵 𑐫𑐣𑐾 𑐫𑑅 𑑋 𑐨𑐸𑐟𑐩𑐵𑐮𑐶 𑐮𑑂𑐰𑐵𑐎𑐵𑑅 𑐩𑐾𑐥𑐶𑐣𑐶 𑐧𑑂𑐰𑐫𑐵𑐔𑑂𑐰𑑄𑐐𑐸 𑐨𑐸𑐟𑐩𑐵𑐮𑐶 𑐔𑐵𑐣𑐵𑑅, 𑐔𑐫𑑂𑐟 𑐫𑐵𑐫𑐾 𑐴𑐠𑐵𑐫𑑂 𑐖𑐸𑐂 𑑋 𑐩𑐞𑑂𑐜𑐮𑐷 𑐖𑐸𑐂𑐟 𑐳𑑂𑐰𑐂 𑑋 𑐨𑐸𑐟𑐩𑐵𑐮𑐶 𑐮𑑂𑐰𑐵𑐎𑑅 𑐩𑐰𑐮𑐎𑐶, 𑐧𑐶𑐳𑐶𑐄𑐧𑐶𑐳𑐶𑐄𑑃 𑐰𑐣𑐎𑐶 𑐴𑐵𑐬𑐨𑐸𑐳𑑂𑐫𑐵𑑅 ! 𑐴𑐵𑐬𑐸𑐰𑐵 ! 𑐁𑐡𑐶 𑐂𑐟𑑂𑐫𑐵𑐡𑐶 𑐢𑐫𑐵𑑅 𑐮𑐵𑐫𑑂𑐮𑐵𑐫𑑂 𑐧𑐸𑐂 𑑋 𑐣𑑂𑐴𑐵𑐫𑑂 𑐰𑐣𑐷𑐨𑐣𑑄 𑐨𑐸𑐟𑐩𑐵𑐮𑐶 𑐮𑑂𑐰𑐵𑐎𑐾𑐟 𑐎𑐬𑑄 𑐎𑑂𑐫𑑄𑐎𑐷 𑑋 𑐨𑐸𑐟𑐩𑐵𑐮𑐶 𑐔𑐵𑐫𑐾 𑐦𑐟𑐎𑐶 𑐟𑑂𑐰𑐵𑑅 𑐴𑐾 𑐠𑑂𑐰𑐫𑐾𑐎 𑐟𑐟𑑅𑐳𑐮𑑄 𑐔𑐫𑑂𑐟 𑐔𑐫𑑂𑐟 𑐢𑐎𑐵𑑅 𑐴𑐵𑐮𑐶 𑑋 𑐩𑐵𑐣𑑁𑑄 𑐎𑐶 𑐮𑐜𑑆𑐵𑐂𑑃 𑐴𑐾 𑐟𑑂𑐫𑐵𑐎𑐵 𑐰𑑅𑐥𑐶𑑄 𑐠𑐾𑑄 𑑋 𑐐𑐸𑐩𑑂𑐴𑐐𑐸𑐩𑑂𑐴𑐳𑑂𑐫𑐵𑑄 𑐚𑐶𑐣 𑐠𑐵𑐂, 𑐡𑐾𑐩𑐵 𑐠𑐵𑐂, 𑐨𑐸𑐳𑑂𑐫𑐵𑑅 𑐟𑐎𑑄 𑐠𑐵𑐂 𑑋 𑐴𑐵𑑅 𑐴𑐹 𑐫𑐵𑐂 𑑋 𑐣𑑂𑐴𑑂𑐫𑐂𑐥𑐸𑐎𑐷 𑑋 𑐣𑐾𑐥𑐵𑐮𑐷 𑐥𑐴𑐮𑑄 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐷𑐥𑐶𑑄𑐳𑑄 𑐮𑐟𑐵𑐂𑑃𑐫𑐵 𑐳𑐸𑐎𑐵 𑐟𑑂𑐰𑑅𑐟𑐵𑑅, 𑐎𑐵 𑐕𑐸𑐣𑐵𑑅 𑐨𑐸𑐟𑐩𑐵𑐮𑐶 𑐔𑐵𑐂𑐳𑐵 𑐩𑐢𑐾𑐳𑐷 𑐥𑐴𑐮𑑄 𑐧𑑂𑐰𑐫𑐾𑐎𑐷𑐥𑐶𑑄𑐳𑑄 𑐳𑐸𑐎𑐵 𑐗𑑂𑐰𑐵𑑃𑐫𑑂𑐗𑐸𑐂𑑃 𑐳𑐵𑐮𑐵𑑅 𑐨𑐸𑐟𑐩𑐵𑐮𑐶 𑐔𑐵𑐂 𑑋 𑐀𑐫𑑂 𑐖𑐹𑐐𑐸𑐮𑐶𑑄 𑐣𑐾𑐥𑐵𑐮𑐷 𑐥𑐴𑐮𑑄 𑐧𑑂𑐰𑐫𑐾𑐎𑐷𑐥𑐶𑐣𑐶 𑐳𑐸𑐎𑐵 𑐀𑐥𑑂𑐰𑑅 𑐦𑐸𑐂 𑑋

𑐠𑑁𑑄𑐎𑐣𑑂𑐴𑐫𑑂 𑐠𑐾𑑄 𑐬𑐾𑐜𑐶𑐩𑐾𑐜 𑐳𑐸𑐎𑐵 𑐮𑐟𑐵𑐂𑑃 𑐀𑐧𑐮𑐫𑑂 𑐣𑑂𑐫𑐵𑐫𑐾𑐐𑐸 𑐩𑐡𑐸 𑑋 𑐀𑐧𑐮𑐫𑑂 𑐣𑑂𑐫𑐵𑐫𑐾 𑐡𑐸𑐐𑐸 𑐳𑐸𑐎𑐵 𑐢𑐫𑐵𑐐𑐸 𑐥𑐵𑑃𑐔 𑐳𑐫 𑐐𑐖, 𑐴𑐖𑐵𑐬 𑐐𑐖 (𑐜𑐵𑐫𑐩𑐞𑑂𑐜 𑐧𑑂𑐬𑐵𑐞𑑂𑐜), 𑐐𑐣𑐩𑐵𑐬 (𑐳𑐶𑑄𑐫𑐵𑐐𑐸 𑐔𑐶𑐎𑑂𑐔𑐵 𑐐𑑂𑐰𑑅𑐐𑐸 𑐮𑐟𑐵𑐂𑑃𑐏𑐫𑑂 𑐰𑐂𑐐𑐸), 𑐱𑐵𑐮𑐶𑐩𑐵𑐬 𑐧𑑂𑐬𑐵𑐞𑑂𑐜, 𑐎𑑀𑐚𑐳𑑂 𑐧𑑂𑐬𑐵𑐞𑑂𑐜, 𑐬𑐶𑐮 𑐳𑐸𑐎𑐵, 𑑒𑑐 𑐣𑑄 𑐫𑐵 𑐐𑑂𑐰𑐵𑐬𑐵 𑐳𑐸𑐎𑐵 𑐏𑑅 𑑋 𑐠𑑂𑐰 𑐳𑐸𑐎𑐵 𑐦𑐸𑐎𑑂𑐎 𑐩𑐵𑐖𑐵 𑐩𑐡𑐸𑐐𑐸, 𑐩𑐵𑐖𑐵 𑐟𑐫𑐾 𑐩𑐵𑐣𑐶𑐐𑐸 𑐳𑐸𑐎𑐵 𑐏𑑅 𑑋 𑐀𑐮𑐾 𑐩𑐵𑐖𑐵 𑐟𑐫𑐾𑐐𑐸 𑐢𑐎𑐵𑑅 𑐳𑐵𑐧𑐡𑐵𑐣𑐵 𑐡𑐵𑐫𑐾𑐎𑐵𑑅 𑐮𑐳𑑂𑐳𑐵 𑐰𑐫𑐾𑐎𑐵𑑅 𑐕𑐥𑐵 𑐮𑑂𑐴𑐵𑐟𑐶𑐂 𑐳𑐵𑐧𑐡𑐵𑐣𑐵 𑐩𑐾𑐐𑐸 𑐮𑑂𑐴𑐵𑐟𑐶𑐂 𑐏𑐵𑑅𑐔𑐶𑑄 (𑐏𑐵𑐔𑐸𑑄, 𑐔𑐶𑐩𑐔𑐸𑑄) 𑐖𑑂𑐰𑐣𑐵𑑅, 𑐕𑐩𑑂𑐴𑐾𑐳𑑂𑐫𑐵𑑄 𑐳𑐸𑐎𑐵 𑐟𑑂𑐰𑑅𑐟𑐾𑐐𑐸 𑐩𑐾𑐩𑑂𑐴𑐳𑑂𑐫𑐵𑑄 𑐳𑐸𑐎𑐵 𑐟𑐸𑐮𑐾𑐐𑐸 𑐫𑐵𑐣𑐵𑑅 𑐩𑐵𑐖𑐵 𑐟𑐫𑐾𑐐𑐸 𑐏𑑅 𑑋 𑐐𑐸𑐩𑑂𑐴 𑐐𑐸𑐩𑑂𑐴𑐳𑑂𑐫𑐵𑑄 𑐏𑐵𑐳𑐵 𑐰 𑐏𑐵𑑅𑐔𑐶𑑄, 𑐎𑐸𑐣𑑂𑐴𑐹 𑐰 𑐏𑐵𑑅𑐔𑐶𑑄, 𑐏𑐾𑑃 𑐰 𑐏𑐵𑐔𑐶𑑄 𑐩𑐵𑐖𑐵 𑐟𑐂𑐥𑐶𑑄 𑐣𑑄 𑐡𑐸 𑑋 𑐀𑑅𑐏𑑅 𑐩𑐵𑐖𑐵, 𑐜𑐧𑐮 𑐩𑐵𑐖𑐵 𑐢𑐎𑐵 𑐳𑐸𑐎𑐵 𑐧𑐮𑑂𑐮𑐵𑐎𑐾𑐟 𑐟𑐂𑐥𑐶𑑄 𑐣𑑄 𑐡𑐸 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐩𑐵𑐖𑐵 𑐟𑑅𑐐𑐸 𑐩𑐶𑐮𑐾 𑐩𑐖𑐸𑐮𑐎𑐶 𑐢𑐵𑑅𑐳𑐵 𑐳𑐸𑐎𑐵 𑐧𑐮𑑂𑐮𑐵𑐫𑐾𑐐𑐸 𑐳𑐟𑑂𑐟𑐵 𑐠𑐸𑐳𑐸𑐠𑐸𑐳𑐸 (𑐟𑐸𑐳𑐸𑐟𑐸𑐳𑐸) 𑐰𑐣𑐾 𑐫𑑅 𑑋 𑐧𑐵𑑄𑐮𑐵𑐎𑑂𑐎 𑐩𑐵𑐖𑐵 𑐟𑑅𑐐𑐸 𑐳𑐸𑐎𑐵𑑄 𑐰𑐎𑑂𑐰 𑐰𑐎𑑂𑐰 𑐔𑐫𑐾𑐟 𑐣𑑄 𑐫𑐵𑐫𑐾𑐦𑐸 𑑋 𑐩𑐣𑑂𑐡𑐮𑐶 𑐖𑐸𑐫𑐵𑐔𑑂𑐰𑐣𑐾𑐦𑐸 𑑋 𑐠𑑁𑑄𑐎𑐣𑑂𑐴𑐫𑑂 𑐩𑐵𑐖𑐵 𑐟𑐫𑐾𑐐𑐸 𑐗𑐣𑑂𑐗𑐟 𑐕𑐟𑐵 𑐩𑐣𑑂𑐟 𑑋 𑐡𑐵𑑄 𑐖𑐎 𑐥𑐸𑐮𑐾𑐩𑐵𑑅 𑐩𑐾𑐳𑐶𑐣𑑄 𑐩𑐵𑐖𑐵 𑐟𑐫𑐵𑐟𑑅𑐐𑐸 𑐥𑑂𑐫𑐟𑐸, 𑐏𑐸𑐟𑐸, 𑐔𑑂𑐫𑐵𑐟𑐸, 𑐗𑐶𑐟𑐸, 𑐗𑐶𑑄𑐣𑐶𑐟𑐸 𑐎𑐵 𑐟𑐫𑐵𑑅 𑐣𑐶𑐮𑐵 𑐟𑑅𑐐𑐸 𑐬𑑄𑐐𑐶𑐣 𑐳𑐸𑐎𑐵, 𑐰 𑐣𑑄 𑐎𑐶𑐳𑐶𑐩 𑐎𑐶𑐳𑐶𑐩𑐫𑐵𑐐𑐸 𑐂𑐣𑑂𑐜𑐶𑐫𑐣, 𑐢𑐿𑐢𑐿𑐐𑐸 𑐣𑑂𑐫𑐵𑐫𑐾𑐐𑐸 𑐡𑐟𑑋

𑐣𑑂𑐴𑐵𑐥𑐵𑐫𑐵𑐐𑐸 𑐩𑐵𑐖𑐵 𑐠𑑁𑑄𑐎𑐣𑑂𑐴𑐫𑑂𑐫𑐵 𑐨𑐵𑐳𑑄 𑐀𑐬𑑂𑐐𑐵𑐣𑐶𑐎 𑐩𑐵𑐖𑐵 𑐏𑑅𑐳𑐵 𑐠𑑁𑑄𑐎𑐣𑑂𑐴𑐫𑑂𑐫𑐵 𑐩𑐵𑐖𑐵 𑐎𑐾𑐩𑐶𑐎𑐮𑐫𑐸𑐎𑑂𑐟𑐐𑐸 𑐩𑐵𑐖𑐵 𑐏𑑅 𑑋 𑐐𑐸𑐐𑐸 𑐗𑐷𑐟 𑐩𑐣𑐶𑑄𑐐𑐸 𑐩𑐵𑐖𑐵 𑐏𑑅 𑑋 𑐕𑐸𑑄 𑐐𑐠𑐾 𑐖𑐸𑐫𑐵𑑅 𑐠𑑁𑑄𑐎𑐣𑑂𑐴𑐫𑑂𑐫𑐵 𑐩𑐵𑐖𑐵 𑐡𑐸𑐐𑐸 𑐳𑐸𑐎𑐵𑑄 𑐮𑑂𑐴𑐵𑐟𑐶𑐂, 𑐩𑑂𑐴𑐫𑑂 𑐐𑐣𑐣𑑄 𑐎𑐶𑐟, 𑐗𑑂𑐰𑐫𑑂𑐥𑐶𑐮 𑐢𑐵𑑅𑐳𑐵 𑐧𑐵𑑄𑐮𑐵𑐎 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅 𑑋 𑐟𑐬 𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑐵𑐥𑐵 𑐠𑐾𑑄 𑐨𑐸𑐟𑐩𑐵𑐮𑐶𑐫𑐵 𑐎𑑂𑐬𑐾𑐖 𑐢𑐵𑑅𑐳𑐵 𑐩𑑄𑐟 𑑋 𑐨𑐸𑐟𑐩𑐵𑐮𑐶 𑐣𑑄 𑐠𑐶𑐎𑐾, 𑐳𑐸𑐎𑐵 𑐣𑑄 𑐠𑐶𑐎𑐾, 𑐃 𑐣𑑄 𑐩𑐡𑐫𑐵𑐰𑐣 𑑋 𑐣𑑂𑐴𑐵𑐥𑐵 𑐳𑑂𑐰𑐫𑐵 𑐗𑑄𑐗𑑄 𑐮𑐶𑐩𑐮𑐵𑐣𑐵𑐰𑐣 𑑋

𑐥𑐮𑐶𑐂, 𑐎𑑅𑐳𑐶𑐂, 𑐖𑐳𑑂𑐟𑐵𑐫𑑂 𑐩𑐳𑑂𑐟 𑐔𑐵𑐣𑐵 𑐴𑑅𑐐𑐸 𑐨𑐸𑐟𑐩𑐵𑐮𑐶 𑐮𑐵𑐫𑐾 𑐢𑐎𑐵 𑐟𑐫𑐵𑐬 𑐖𑐸𑐫𑐵𑐔𑑂𑐰𑐣𑐷 𑑋 𑐐𑐸𑐩𑑂𑐴𑑄 𑐥𑑃, 𑐐𑐸𑐩𑑂𑐴𑑄 𑐟𑐵𑐴𑐵𑐎𑑅𑐐𑐸 𑐎𑐠𑐶 𑐖𑑂𑐰𑐣𑐵𑑅 𑐨𑐸𑐟𑐩𑐵𑐮𑐶 𑐰𑐮𑐎𑐶 𑐡𑐵𑐫𑐵 𑐎𑐵𑐫𑐾 𑐢𑐎𑐵𑑅 𑐳𑐸𑐮𑐵𑑅 𑐥𑐶𑐫𑐵𑐔𑑂𑐰𑐣𑐷 𑑋 𑐐𑐸𑐩𑑂𑐴 𑐐𑐸𑐩𑑂𑐴𑐳𑑂𑐫𑐵𑑄 𑐩𑐞𑑂𑐜𑐮𑐷 𑐎𑐫𑐾𑐎𑐵𑑅 𑐎𑐵𑐫𑐾𑐟 𑐳𑐣𑐵𑐔𑑂𑐰𑐣𑐷 𑑋 𑐨𑐸𑐟𑐩𑐵𑐮𑐶 𑐐𑐸𑐟𑐎𑐶 𑐢𑐵𑑅𑐳𑐵 𑐖𑐵𑐐𑑂𑐰𑑅, 𑐖𑐵𑐟𑐶, 𑐩𑑅, 𑐎𑐸𑐣𑑂𑐴𑐹 𑐣𑑄 𑐥𑐬𑐎𑐵 𑐴𑐵𑐣𑑄 𑐖𑑂𑐫𑐵 𑐎𑐵𑐂 𑑋 𑐀𑐧𑐮𑐫𑑂 𑐠𑑁𑑄𑐎𑐣𑑂𑐴𑐫𑑂 𑐠𑐾𑑄 𑐳𑐾𑐮𑑀 𑐚𑐾𑐥 𑐩𑐡𑐸 𑑋 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾 𑐟𑑂𑐫𑐂, 𑐦𑐫𑑂 𑐳𑐣𑐷 𑐩𑐏𑐸 𑑋 𑐦𑐫𑑂 𑐩𑐳𑑄𑐎𑑄 𑐨𑐸𑐟𑐩𑐵𑐮𑐶 𑐧𑑂𑐰𑐂 𑐩𑐏𑐸 𑑋 𑐴𑐷𑐩𑐷 𑐔𑐵𑐂 𑑋 𑐀𑐮𑐾 𑐕𑐸 𑐩𑐵𑐮, 𑐦𑐳 𑐡𑑂𑐫𑑅𑐫𑐵𑐟 𑐧𑑂𑐰𑑅 𑐧𑐶𑐂 – 𑐦𑐫𑑂 𑐥𑑂𑐰𑐵𑑅 𑐡𑑂𑐫𑑅𑐫𑐵 𑐣𑑂𑐴𑐵𑐫𑑂 𑐳𑑂𑐫𑑄 !!! 𑐦𑐫𑑂𑐎𑑂𑐰𑐵𑑅 𑐡𑑂𑐫𑑅𑐫𑐵 𑐣𑑂𑐴𑐵𑐫𑑂 𑐰𑑄 !!! 𑐢𑐎𑐵𑑅 𑐴𑐵𑐮𑐶 𑑋 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐵𑑅 𑐮𑑂𑐫𑑄 𑐡𑐸𑐐𑐸 𑐳𑐸𑐎𑐵, 𑐮𑐵𑐣𑐵 𑐎𑐫𑐵𑐟𑑅𑐐𑐸 𑐎𑐵𑐥𑐸 𑐖𑑂𑐰𑐣𑐵𑑅 𑐔𑐸𑐎𑐫𑑂, 𑐮𑐵𑐕𑐶𑐂, 𑐣𑐣𑐶𑐂, 𑐧𑐴𑐵𑐮𑐫𑑂 𑐰𑐫𑐵 𑐴𑐣𑑂𑐡𑐮𑐶 𑐩𑐣𑑂𑐡𑐮𑐶 𑐎𑐵𑐳𑐵, 𑐗𑑂𑐰𑐵𑐂𑑃𑐗𑐸𑐂𑑃 𑐎𑐵𑐳𑐵 𑐩𑑂𑐴𑐶𑐟𑐵𑑅 𑐨𑐸𑐟𑐩𑐵𑐮𑐶 𑐣𑐏𑑅 𑐎𑑂𑐰𑐔𑐵𑐫𑐾𑐎𑐷 𑑋

𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑐵𑐥𑐵 𑐠𑐾𑑄 𑐎𑑅𑐳𑐶𑐂, 𑐖𑐳𑑂𑐟𑐵𑐫𑑂, 𑐥𑐮𑐶𑐂 𑐔𑑂𑐰𑐣𑐵 𑐨𑐸𑐟𑐩𑐵𑐮𑐶 𑐧𑑂𑐰𑐫𑐾𑐎𑐾 𑐩𑐕𑐶𑐣𑐵𑐰𑑅𑐐𑐸𑐮𑐶𑑄 𑐨𑐸𑐟𑐩𑐵𑐮𑐶 𑐎𑐵𑐳𑐵 𑐢𑐎𑐵𑑅 𑐨𑐸𑐟𑐩𑐵𑐮𑐶𑐧𑐵𑐖𑐟𑐫𑑂𑐐𑐸 𑐮𑐵𑐐𑐶 𑐀𑐮𑐐𑑂𑐐 𑐴𑐾 𑐟𑐶𑑄𑐏𑑂𑐫𑐮𑐫𑑂, 𑐥𑐴𑐵𑐜𑐫𑑂 𑐨𑐸𑐟𑐩𑐵𑐮𑐶 𑐎𑐵𑐳𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐣𑑄 𑐡𑐸 𑑋 𑐀𑐠𑐾𑐴𑐾 𑐠𑑁𑑄𑐣𑐾 𑐣𑐾.𑐳𑑄. 𑑑𑑑𑑔𑑑 𑐎𑑁𑐮𑐵𑐐𑐵𑑅 𑑓 𑐳𑐣𑐶𑐰𑐵𑑅, 𑐧𑐸𑐬𑐵𑑄𑐏𑑂𑐫𑑅𑐫𑐵 𑐣𑑂𑐫𑐟 𑐄𑐡𑐵𑐫 𑐕𑐾𑑃𑐫𑑂 𑐄𑐡𑐵𑐫 𑐳𑐩𑐵𑐖𑐫𑐵 𑐄𑐡𑐵𑐫𑑂 𑐫𑐸𑐰𑐵 𑐥𑐸𑐔𑑅𑐥𑐵𑐏𑐾𑑄 𑐨𑐸𑐟𑐩𑐵𑐮𑐶 𑐎𑐵𑐳𑐵 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS