Read news in NepalBhasa text-- www.hamroschool.com BACK 𑐩𑑀𑐴𑐣𑐷 𑐰 𑐡𑐱𑐿𑑃𑐫𑐵 𑐨𑑂𑐬𑐵𑐣𑑂𑐟𑐶 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑑀𑐴𑐣𑐷 𑐰 𑐡𑐱𑐿𑑃𑐫𑐵 𑐨𑑂𑐬𑐵𑐣𑑂𑐟𑐶

𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 𑐄𑐥𑐎𑐸𑐮𑐥𑐟𑐶 𑐜𑐵𑑄 𑐖𑐐𑐩𑐵𑐣 𑐐𑐸𑐬𑐸𑐒𑑄 𑐫𑑃𑐫𑐵𑑅𑐫𑐵 𑐰𑐬𑑂𑐞𑐣 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐖𑑂𑐫𑐵𑐥𑐸𑐟𑐫𑑂𑐟 𑐀𑐳𑐸𑐬 𑐢𑐵𑑅𑐐𑐸 𑐏𑑃𑐫𑑂 𑐰𑐶𑐬𑑀𑐢 𑐖𑐸𑐮 𑑋 𑐴𑐵𑐣𑑄 𑐰𑐫𑑂𑐎𑑅𑐫𑐵 𑐴𑐾 “𑐡𑐱𑐿𑑃” 𑐳𑐩𑑂𑐧𑐣𑑂𑐢𑐷 𑐀𑐣𑑂𑐟𑐬𑑂𑐰𑐵𑐬𑑂𑐟𑐵 𑐣𑑄 𑐥𑐶𑐴𑐵𑑃 𑐰𑑅𑐐𑐸 𑐡𑐸 𑑋 𑐱𑐎𑑂𑐟𑐶𑐫𑐵 𑐄𑐥𑐵𑐳𑐣𑐵 𑐳𑐎𑐳𑐶𑐣𑑄 𑐫𑐵𑑅, 𑐟𑐬 𑐡𑐱𑐿𑑃 𑐴𑐣𑐾𑐐𑐸 𑐗𑑂𑐰𑐮𑐫𑑂 𑐢𑐵𑑅𑐳𑐵 𑐴𑐶𑐣𑑂𑐡𑐹𑐫𑐵 𑐥𑑂𑐬𑐨𑐵𑐰 𑐮𑐵𑑅𑐐𑐸 𑐡𑐸 𑑋 𑐠𑐠𑐾 𑐥𑑂𑐬𑐨𑐵𑐰 𑐮𑐵𑑅𑐐𑐸 𑐴𑐸𑐣𑐶 𑐢𑐵𑑅𑐳𑐵 𑐴𑐶𑐣𑑂𑐡𑐹𑐟 𑐳𑐟𑑂𑐟𑐵𑐫𑑂 𑐡𑐫𑐵𑑅 𑐴𑐾 𑐏𑑅 𑐢𑐵𑑅𑐐𑐸 𑐣𑑂𑐫𑐣𑐾𑐡𑐟 𑑋 𑐐𑐸𑐬𑐸𑐒 𑐨𑐵𑐖𑐸 𑐖𑐣𑐖𑐵𑐟𑐶𑐫𑐵 𑐩𑐣𑐹 𑐏𑑅 𑑋 𑐀𑐠𑐾 𑐖𑐸𑐫𑐵𑑅 𑐖𑐣𑐖𑐵𑐟𑐶𑐫𑐵 𑐏𑑃 𑐠𑐹, 𑐳𑐶𑐄 𑑋 𑐟𑐬 𑐫𑑄𑐎𑐾𑐐𑐸 𑐠𑐵𑐫𑑂 𑐐𑐣 𑐏𑑅𑐮𑐾 𑐢𑐵𑐫𑐾𑐧𑐮𑐫𑑂 𑐠𑑂𑐰 𑐏𑑃 𑐢𑐫𑐵𑐔𑑂𑐰𑐣𑐾 𑐴𑐾 𑐩𑑂𑐰𑐵𑑅 𑑋 𑐰𑐵𑐳𑑂𑐟𑐰𑐫𑑂 𑐢𑑂𑐫𑐵𑐮𑐫𑑂 𑐥𑐮𑐵𑑅 𑐩𑐟𑐫𑐾𑐎𑑄 𑐢𑑂𑐫𑐵𑐔𑐮𑑄 𑐩𑐣𑐹 𑐮𑐵 𑐮𑐶𑐎𑐵𑐫𑐾𑐦𑐂𑐩𑐏𑐸, 𑐀𑐠𑐾 𑐴𑐾 𑐳𑐸𑐫𑐵𑐟𑑄 𑐐𑐣𑑄 𑐫𑑄𑐎𑐾 𑐩𑐵𑐮 𑐢𑐵𑑅𑐳𑐵 𑐰𑐫𑐵𑐐𑐸 𑐕𑐾𑑃𑐫𑑂 𑐡𑐸𑐟𑐥𑐶𑐟 𑐡𑐸𑐩𑑂𑐴 𑐴𑐾 𑐩𑐣𑐹 𑐩𑐵𑑅 𑑋 𑐀𑐗 𑐳𑑂𑐫𑐵𑑅𑐣𑑂𑐫𑐵𑑅 𑐖𑐸𑐫𑐵𑑅 𑐴𑐾 𑐎𑑂𑐫𑐣𑐾𑐦𑐸𑐩𑑂𑐴 𑐩𑐣𑐹 𑐏𑑅 𑑋 𑐠𑐸𑐖𑑂𑐰𑑅𑐥𑐶𑑄 𑐩𑐣𑐹𑐟 𑐳𑐩𑐵𑐖𑐫𑑂 𑐮𑐵 𑐣𑑂𑐴𑐵𑐥𑐵𑑄𑐣𑐶𑐳𑐾. 𑐴𑐾 𑐡𑐸, 𑐠𑐸𑐎𑐠𑑄𑐫𑐵 𑐥𑑂𑐬𑐰𑐺𑐟𑑂𑐟𑐶 𑐣𑑄 𑐡𑐸, 𑐟𑐬 𑐳𑑄𑐑𑐷𑐫𑐟𑐵𑐫𑐵 𑐳𑐰𑐵𑐮 𑐥𑐶𑐡𑑄𑐳𑐵𑑄𑐣𑐶𑐳𑐾𑑄 𑐖𑐐𑐩𑐵𑐣 𑐐𑐸𑐬𑐸𑐒 𑐣𑑂𑐴𑑂𑐫𑑅𑐣𑐾 𑐏𑐣𑐾𑐡𑐫𑐵 𑐔𑑂𑐰𑐣 𑑋

𑐄𑐧𑐮𑐫𑑂 𑐎𑐶𑐬𑐵𑐟𑐟𑐫𑑂 𑐴𑐶𑐣𑑂𑐡𑐹𑐎𑐬𑐞 𑐫𑐵𑐫𑐾𑐟 𑐩𑐴𑐾𑐣𑑂𑐡𑑂𑐬𑑄 𑐎𑐵𑐮𑐾 𑐬𑐵𑐃𑐫𑐵𑐟 𑐳𑑂𑐰𑐵𑐩𑐷 𑐥𑑂𑐬𑐥𑐣𑑂𑐣𑐵𑐔𑐵𑐬𑑂𑐫 𑐡𑐫𑐾𑐎𑐵𑑅 𑐖𑐶𑐩𑑂𑐩𑐵 𑐧𑐶𑐄𑐐𑐸 𑐏𑑃 𑐣𑑄 𑐔𑐬𑑂𑐔𑐵𑐫𑑂 𑐰𑑅 𑑋 𑐐𑐸𑐮𑐶𑐳𑐶𑐣𑑄 𑐎𑐵𑐮𑐾 𑐬𑐵𑐃 𑐢𑐫𑐵𑐩𑑂𑐴 𑐟𑑂𑐬𑐶𑐨𑐸𑐰𑐣𑐫𑐵 𑐴𑐾 𑐬𑐵𑐃𑐣𑐷𑐥𑐵𑐏𑐾𑑄𑐫𑐵 𑐳𑐣𑑂𑐟𑐵𑐣 𑐏𑑅 𑐢𑐎𑐵𑑅 𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋 𑐠𑐠𑐾 𑐫𑐵𑐫𑐾𑐟 𑐎𑐶𑐬𑐵𑐟 𑐳𑐸𑐸 𑐏𑑅 𑐢𑐎𑐵𑑅 𑐳𑐦𑐹 𑐴𑐾 𑐣𑑄 𑐥𑐶𑐎𑐵𑐮 𑑋 𑐠𑐺𑐸𑐎𑐠𑑄𑐫𑐵 𑐣𑐶𑐫𑑀𑐖𑐶𑐟 𑐥𑑂𑐬𑐎𑑂𑐬𑐶𑐫𑐵 𑐮𑐵 𑐣𑐾𑐥𑐵𑐮𑐫𑑂 𑐣𑑂𑐴𑑂𑐫𑐵𑐎𑐵 𑐴𑐾 𑐔𑑂𑐰𑑄𑐐𑐸 𑐣𑑂𑐴𑑂𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐸 𑑋 𑐐𑐸𑐮𑐶𑑄 𑐠𑑅𑐴𑐾 𑐔𑐮𑐵𑐏 𑐖𑐸𑐫𑐵𑑅 𑐣𑑄 𑐠𑐸𑐎𑐠𑑄 𑐳𑐣𑐵 𑐖𑐸𑐫𑐵𑑅 𑐳𑐬𑐎𑐵𑐬𑐫𑑂 𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂 𑐥𑑂𑐬𑐶𑐫𑐥𑐵𑐟𑑂𑐬 𑐣𑑄 𑐖𑐸𑐫𑐵𑐖𑐹𑐐𑐸 𑐡𑐂 𑑋 𑐩𑐵𑐳 𑐳𑐵𑐂𑐎𑑀𑐮𑑀𑐖𑐷 𑐎𑐠𑑄 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐴𑐶𑐬𑑀, 𑐴𑐶𑐬𑑀𑐂𑐣 𑐣. 𑐥𑐸𑐣𑐵𑐟𑑅𑐐𑐸 𑐰𑐳𑑅, 𑐴𑐾𑐫𑐬 𑐳𑑂𑐚𑐵𑐂𑐮𑐫𑐵 𑐣𑐎𑑂𑐎𑐮 𑐫𑐵𑐫𑐾𑐐𑐸 𑐖𑐹𑑋 𑐦𑐶𑐮𑑂𑐩 𑐰𑐫𑐾 𑐳𑐶𑐎𑑄 𑐣𑑂𑐴𑑂𑐫𑑅 𑐬𑐵𑐖𑐎𑐸𑐩𑐵𑐬𑐟𑐳𑐾. 𑐕𑑂𑐫𑐮𑐷𑐐𑐸 𑐰𑐳𑑅 𑐰 𑐳𑑂𑐚𑐵𑐂𑐮𑐫𑐵 𑐣𑐎𑑂𑐎𑐮 𑐖𑐸𑐂𑐐𑐸 𑐏𑑅 𑑋 𑐐𑐸𑐐𑐸 𑐏𑑃 𑐳𑑂𑐚𑐵𑐫𑑂𑐜𑐞𑑂𑐜 𑐰𑐵 𑐩𑐵𑐣𑐎 𑐏𑑅, 𑐄𑐎𑐶𑐂𑐾 𑐴𑐾 𑐠𑑅𑐥𑐶𑑄 𑐣𑑄 𑐡𑐸𑐠𑑂𑐫𑐵𑐫𑐾𑐐𑐸 𑐰𑐵 𑐡𑐸𑐠𑑂𑐫𑐵𑐎𑐾𑐐𑐸 𑐔𑐵𑐴𑐣𑐵 𑐮𑐵 𑐳𑐎𑐳𑐶𑐎𑐾𑑄 𑐡𑐂 𑑋 𑐠𑐸𑐎𑐠𑑄𑐫𑐵 𑐩𑐣𑑀𑐰𑐶𑐖𑑂𑐘𑐵𑐣 𑑄𑐣.𑑄 𑐠𑐸𑐩𑐶𑐳𑑄 𑐥𑑂𑐬𑐫𑑀𑐐 𑐫𑐵𑐂 𑑋 𑐩𑐾𑐟𑐵 𑐏𑑅 𑐁𑐩 𑐳𑐘𑑂𑐔𑐵𑐬𑐟𑐳𑐾𑑄𑑄 𑐕𑐸 𑐥𑑂𑐬𑐔𑐵𑐬 𑐫𑐵𑐟 𑐕𑐸𑑄 𑐩𑐳𑐶𑐄𑐥𑐶𑐳𑑄 𑐮𑐵 𑐄𑐎𑐶𑐫𑐵𑐟 𑐴𑐾 𑐠𑐸𑐂𑐎𑐵 𑐎𑐵𑐂𑐐𑐸 𑐏𑑅 𑑋 𑐠𑑂𑐰 𑐣𑑄 𑐳𑐎𑐳𑐶𑐫𑐵𑑄 𑐩𑐏𑐸, 𑐕𑐠𑑂𑐰𑑅 𑐩𑐣𑐹𑐟𑐫𑑂𑐐𑐸 𑐖𑐸𑐫𑐵 𑐔𑑂𑐰𑐣𑐷 𑑋

𑐣𑐾𑐥𑐵𑑅𑐫𑐵 𑐠𑐷𑐠𑐷 𑐬𑐵𑐲𑑂𑐚𑑂𑐬𑐶𑐫𑐟𑐵 𑐡𑐸𑐐𑐸 𑐡𑐾𑐫𑑂 𑐏𑑅 𑑋 𑐨𑐵𑐫𑑂𑐫𑐵 𑐮𑑂𑐫𑐵𑐏𑑄 𑐣𑑄 𑐕𑐐𑐹 𑐴𑐾 𑐩𑐏𑐸, 𑐳𑑄𑐳𑑂𑐎𑐺𑐟𑐶𑐫𑐵 𑐮𑑂𑐫𑐵𑐏𑑄 𑐣𑑄 𑐕𑐐𑐹 𑐴𑐾 𑐩𑐏𑐸, 𑐨𑐹𑐐𑑀𑐮𑐫𑐵 𑐧𑐣𑑀𑐚𑐫𑐵 𑐮𑑂𑐫𑐵𑐏𑑄 𑐣𑑄 𑐕𑐐𑐹 𑐴𑐾 𑐩𑐏𑐸, 𑐣𑐱𑑂𑐮𑐫𑐵 𑐮𑑂𑐫𑐵𑐏𑑄 𑐣𑑄 𑐕𑐐𑐹 𑐴𑐾 𑐩𑐏𑐸 𑑋 𑐟𑐬 𑐣𑐾𑐥𑐵𑐮 𑐢𑐫𑐵𑐐𑐸 𑐬𑐵𑐲𑑂𑐚𑑂𑐬 𑐏𑑅 𑐢𑐎𑐵𑑅 𑐡𑐫𑐾𑐎𑐾𑐟 𑐠𑐣 𑐕𑐠𑐷 𑐴𑐾 𑐫𑐵𑐫𑐾𑐐𑐸 𑐎𑐸𑐟𑑅 𑐢𑐵𑑅𑐳𑐵 𑐳𑐟𑑂𑐟𑐵𑐬𑐸𑐝 𑐰𑐬𑑂𑐐𑑄 𑐣𑑂𑐴𑑂𑐫𑐵𑐎𑐵 𑐴𑐾 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐸𑐏𑑂𑐫 𑐬𑐹𑐥𑑄 𑐠𑐸𑐂𑐎𑐾𑐩𑐵𑑅𑐐𑐸 𑐏𑑃 𑐠𑐣 𑐴𑐾 𑐡𑐸 𑑋 𑐣𑐾𑐰𑐵𑑅𑐟𑐫𑑂 𑐩𑑀𑐴𑐣𑐷,𑐟𑐵𑐩𑐵𑐒𑑂𑐐𑐟𑐫𑑂 𑐩𑑂𑐴𑐾𑐣𑐶𑐒, 𑐏𑐳𑐁𑐬𑑂𑐫𑐟𑐫𑑂 𑐡𑐱𑐿𑑃, 𑐟𑐬𑐵𑐃 𑐰 𑐨𑐵𑐬𑐟𑐫𑐵 𑐡𑐱𑐴𑐬𑐵 𑐰𑐵 𑐰𑐶𑐖𑐫𑐵 𑐡𑐱𑐩𑐷, 𑐱𑐎𑑂𑐟𑐶 𑐳𑐵𑐢𑐎𑐟𑐫𑑂 𑐣𑐰𑐬𑐵𑐟𑑂𑐬 𑐁𑐡𑐶𑐫𑐵 𑐰𑐶𑐨𑐶𑐣𑑂𑐣𑐟𑐵 𑐡𑐸 𑑋 𑐟𑐬𑐵𑐃𑐮𑐫𑑂 𑐔𑑂𑐰𑑄𑐥𑐶𑐳𑑄 𑐗𑐷𑐠𑐵𑐫𑑂 𑐴𑐾 𑐟𑐟𑑅𑐢𑐷𑐥𑐶𑑄 𑐡𑐸𑐬𑑂𑐐𑐵𑐫𑐵 𑐩𑐹𑐬𑑂𑐟𑐶 𑐡𑐫𑐾𑐎𑐵𑑅 𑐥𑐸𑐖𑐵 𑐫𑐵𑐫𑐾𑐐𑐸 𑐀𑐮𑐾 𑐡𑐱𑐩𑐷 𑐢𑐸𑐣 𑐢𑐵𑐫𑐾𑐰𑑄 𑐏𑐸𑐳𑐶𑐂 𑐫𑑄𑐎𑐵𑑅 𑐔𑐸𑐂𑐎𑐵 𑐕𑑂𑐰𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐗𑐷𑐳𑑄 𑐱𑐧𑑂𑐡𑐫𑑂 𑐖𑐎 𑐩𑐏𑐸, 𑐩𑑀𑐴𑐣𑐷 𑐢𑐎𑐵𑑅 𑐩𑑀𑐴𑐣𑐷 𑐳𑐶𑐣𑑂𑐴𑑅𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵 𑐰𑐫𑐵𑐔𑑂𑐰𑐣𑐵 𑑋

𑐠𑐸𑐥𑐵𑐮𑐫𑑂 𑐑𑐚𑐳𑑂𑐠𑐵𑐥𑐣𑐵 𑐡𑐸𑐥𑐶𑐣𑐶 𑐡𑐱𑐿, 𑐩𑐡𑐸𑐥𑐶𑐣𑐶 𑐩𑑀𑐴𑐣𑐷 𑐢𑐎𑐵𑑅 𑐢𑐵𑐮 𑑋 𑐠𑑂𑐰 𑐥𑐵𑐫𑑂𑐕𑐶 𑐏𑑃 𑐏𑑅 𑑋 𑐣𑐾𑐰𑐵𑑅𑐟𑐫𑑂 𑐣𑐏𑐟𑑂𑐫𑐵 𑐰𑐣𑐾𑐐𑐸 𑐔𑐮𑐣 𑐡𑐸, 𑐣𑐏𑐟𑑂𑐫𑐵 𑐳𑑅𑐟𑐾𑐐𑐸 𑐔𑐮𑐣 𑐡𑐸 𑑋 𑐠𑑅 𑐴𑐾 𑐰𑐣𑐵𑑅 𑐳𑐶𑐣𑑂𑐴𑑅 𑐦𑐫𑐵𑑅 𑐖𑐸𑐂𑐐𑐺𑐸 𑐔𑐮𑐣 𑐢𑐵𑑅𑐳𑐵 𑐩𑐡𑐸 𑑋 𑐠𑐸𑐎𑐠 𑐰𑑂𑐫𑐵𑐰𑐴𑐵𑐬𑐶𑐎 𑐳𑑄𑐳𑑂𑐎𑐺𑐟𑐶 𑐣𑐵𑐥 𑐥𑐵𑐣𑐵 𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐩𑑀𑐴𑐣𑐷𑐧𑐮𑐫𑑂 𑐏𑐳𑐷 𑐕𑐩𑑂𑐴 𑐴𑐫𑐵𑑅 𑐳𑑂𑐫𑐵𑐫𑐾 𑐴𑐾 𑐩𑐵𑑅𑐐𑐸 𑐢𑐫𑐵𑐐𑐸 𑐠𑐸𑐖𑑂𑐰𑑅𑐐𑐸 𑐨𑐵𑐰𑐣𑐵 𑐣𑑄 𑐩𑐡𑐸 𑑋 𑐀𑐠𑐾 𑐖𑐸𑐫𑐵𑑅 𑐁𑐎𑐵𑑄𑐎𑑂𑐲𑐵 𑐣𑑄 𑐦𑐬𑐎 𑐏𑑅 𑑋 𑐳𑑄𑐰𑐶𑐢𑐵𑐣𑐫𑑂 𑐳𑑂𑐰𑐟 𑐢𑐵𑑅𑐳𑐵 𑐕𑐐𑐹 𑐁𑐎𑐵𑑄𑐎𑑂𑐲𑐵 𑐰𑐵 𑐩𑐣𑑀𑐨𑐵𑐰𑐣𑐵 𑐡𑐸𑐥𑐶𑐣𑐶𑐐𑐸 𑐴𑐾 𑐬𑐵𑐲𑑂𑐚𑑂𑐬 𑐖𑐸𑐂𑐐𑐸 𑐏𑑅 𑑋 𑐟𑐬 𑐗𑐷 𑐠𑐷𑐠𑐷 𑐖𑐵𑐟𑐶𑐫𑐵 𑐩𑐣𑐹𑐟𑐫𑑂𑐐𑐸 𑐩𑐣𑑀𑐨𑐵𑐰𑐣𑐵 𑐰 𑐁𑐎𑐵𑑄𑐎𑑂𑐲𑐵 𑐴𑐾 𑐦𑐬𑐎 𑐏𑐣𑐾𑐡𑐸 𑑋

𑐡𑐱𑐿𑑃 𑐢𑐎𑐵𑑅 𑐣𑐾𑐥𑐵𑐮𑐫𑑂 𑐔𑐿𑐟𑐫𑑂 𑐰 𑐀𑐳𑑀𑐖𑐫𑑂 𑐩𑐵𑐣𑐾 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐳𑐵𑐬 𑐰 𑐥𑐸𑐳𑐫𑑂 𑐣 𑐩𑐵𑐣𑐾 𑐫𑐵𑑅 𑐢𑐫𑐵𑐐𑐸 𑐖𑐐𑐩𑐵𑐣𑐫𑐵 𑐏𑑃 𑐡𑐸 𑑋 𑐠𑑂𑐰 𑐖𑐹𑐐𑐸𑐮𑐶𑑄 𑐠𑑂𑐰 𑐆𑐟𑐸𑐀𑐣𑐸𑐳𑐵𑐬𑐫𑐵 𑐣𑐏𑑅 𑐏𑑅 𑐢𑐫𑐵𑐐𑐸 𑐡𑐵𑐰𑐷 𑐫𑐵𑐟 𑑋 𑐰𑐵𑐳𑑂𑐟𑐰𑐫𑑂 𑐥𑐱𑑂𑐔𑐶𑐩𑐫𑑂 𑐥𑑂𑐫𑑄𑐐𑐹 𑐖𑐎 𑐆𑐟𑐸 𑐡𑐸, 𑐗𑐷𑐠𑐵𑐫𑑂 𑐏𑐸𑐐𑐹 𑐆𑐟𑐸 𑐡𑐸 𑑋 𑐰𑐵𑐳𑑂𑐟𑐰𑐫𑑂 𑐡𑐎𑑂𑐎𑐫𑑂 𑐟𑐵𑑅𑐴𑐵𑑅𑐐𑐸 𑐣𑑂𑐴𑐶, 𑐡𑐎𑑂𑐎𑐫𑑂 𑐟𑐵𑐴𑐵𑑅𑐐𑐸 𑐔𑐵, 𑐣𑑂𑐴𑐶 𑐰 𑐔𑐵 𑐧𑐬𑐵𑐰𑐬 𑐖𑐸𑐂𑐐𑐸 𑐰𑐬𑑂𑐲𑐫𑐵 𑐣𑐶𑐐𑐹 𑐡𑐶𑑄 𑐫𑐵𑐣𑐵𑑅 𑐥𑑂𑐫𑑄𑐐𑐸 𑐰𑐶𑐣𑑂𑐡𑐸 𑐮𑐵 𑐴𑐮𑐶𑐩𑐫𑑂 𑐁𑐡𑐶𑐩 𑐩𑐣𑐹𑐟𑐳𑐾𑑄 𑐣𑑄 𑐔𑐵𑐫𑐾𑐎𑐵 𑐴𑐾 𑐰𑐫𑐵𑐔𑑂𑐰.𑐐𑐸 𑐏𑑅 𑑋 𑐠𑑂𑐰 𑐮𑑂𑐫𑐵𑐏𑑄 𑐴𑐾 𑐩𑐵𑐣𑐾 𑐫𑐵𑐂𑐥𑐶𑐳𑑄 𑐩𑐵𑐣𑐾 𑐫𑐵𑑅𑐐𑐸 𑐏𑐂 𑑋 𑐔𑐿𑐟𑐫𑐵 𑐡𑐱𑐿𑑃 𑐩𑑁𑐮𑐶𑐎 𑐏𑑅, 𑐟𑐬 𑐀𑐳𑑀𑐖𑐫𑐵 𑐂𑐮𑐫𑑂 𑐱𑐬𑐡𑑂 𑐆𑐟𑐸 𑐮𑐵𑑅𑐐𑐺𑐸𑐮𑐶𑑄 𑐁𑐥𑐵𑑅 𑐩𑐵𑐣𑐾 𑐫𑐵𑐟 𑐢𑐵𑐂 𑑋 𑐠𑑂𑐰 𑐏𑑃𑐫𑑂 𑐣𑑄 𑐳𑐟𑑂𑐫𑐟𑐵 𑐡𑐫𑐾𑐦𑐸 𑑋

𑐗𑐷𑐐𑐸 𑐳𑑄𑐳𑑂𑐎𑐺𑐟𑐶𑐂 𑐩𑑀𑐴𑐣𑐷 𑐣𑐏𑑅 𑐱𑐎𑑂𑐟𑐶 𑐳𑐵𑐢𑐣𑐵 𑐫𑐵𑐣𑐵𑑅 𑐱𑐟𑑂𑐬𑐸 𑐎𑑂𑐰𑑅𑐠𑐮𑐾𑐟 𑐟𑐫𑐵𑐬 𑐖𑐸𑐂𑐐𑐸 𑐣𑐏𑑅 𑐏𑑅 𑑋 𑐱𑐟𑑂𑐬𑐸 𑐢𑐎𑐵𑑅 𑐠𑑅𑐠𑑅 𑐱𑐟𑑂𑐬𑐸 𑐳𑐶𑐎𑑄 𑐣𑑄 𑐴𑑅𑐟𑐵𑑅 𑐫𑐵𑑅𑐰𑐂𑐥𑐶𑑄 𑐡𑐿𑐟𑑂𑐫𑐟𑐫𑑂𑐟 𑐎𑑂𑐰𑑅𑐠𑐮𑐾𑐐𑐸 𑐰 𑐡𑐾𑐱𑐬𑐎𑑂𑐲𑐵𑐫𑐵 𑐳𑐰𑐵𑐮 𑐥𑐵𑐫𑐵𑑅 𑐥𑐶𑐎𑐵𑐫𑐾𑐐𑐸 𑐂𑐟𑑂𑐫𑐵𑐡𑐶 𑐳𑑂𑐰𑐫𑐾𑐧𑐮𑐫𑑂 𑐳𑐷𑐡𑐸 𑑋 𑐩𑑀𑐴𑐣𑐷 𑐢𑐵𑐫𑐾𑐧𑐮𑐫𑑂 𑐳𑑂𑐰𑐫𑑄 𑐱𑐟𑑂𑐬𑐸𑐫𑐵𑐟 𑐕𑐮𑐾 𑐫𑐵𑐫𑐾𑐐𑐸 𑐰 𑐠 𑑅𑐧𑐔𑐾 𑐖𑐸𑐂𑐐𑐺𑐸 𑐮𑑃𑐥𑐸 𑐖𑐸𑐂𑐦𑐸 𑑋 𑐱𑐟𑑂𑐬𑐸𑐫𑐵𑐟 𑐨𑑂𑐬𑐩 𑐄𑐟𑑂𑐥𑐣𑑂𑐣 𑐖𑐸𑐂𑐎𑐾𑐐𑐺𑐸 𑐂𑐟𑑂𑐫𑐵𑐡𑐶 𑐣𑑄 𑐫𑐸𑐡𑑂𑐢 𑐮𑐶𑐳𑐾 𑐳𑐩𑑂𑐧𑐣𑑂𑐢𑐶𑐟 𑐏𑑃 𑐴𑐾 𑐏𑑅 𑑋

𑐖𑐣𑐖𑐵𑐟𑐶 𑐣𑐾𑐟𑐵 𑐐𑑀𑐬𑐾 𑐧𑐴𑐵𑐡𑐸𑐬 𑐏𑐥𑐵𑐒𑑂𑐐𑐷𑑄 𑐩𑐐𑑅𑐟𑐫𑑂𑐐𑐸 𑐡𑐠𑐸𑐂 𑐡𑐱𑐿𑑃 𑐰𑐴𑐶𑐲𑑂𑐎𑐵𑐬 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐹𑐳𑐾𑑄𑐮𑐶 𑐠𑐸𑐎𑐶𑐫𑐵 𑐬𑐵𑐖𑐣𑐷𑐟𑐶𑐎 𑐀𑐬𑑂𑐠 𑐰 𑐎𑑂𑐲𑐾𑐟𑑂𑐬 𑐧𑐵𑐬𑐾 𑐁𑐥𑐵𑑅 𑐔𑐬𑑂𑐔𑐵 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐶𑐬𑐵𑐟𑐫𑑂𑐟 𑐡𑐱𑐿𑑃 𑐩𑐵𑐣𑐾 𑐫𑐵𑐎𑐾𑐟 𑐳𑐾𑐣𑐵 𑐴𑐾 𑐰𑐂𑐐𑐸 𑐢𑐎𑐵𑑅 𑐢𑐫𑐐𑐸 𑐏𑑃 𑐣𑑄 𑐥𑐶𑐴𑐵𑑃 𑐰𑑅𑐐𑐸 𑐡𑐸 𑑋 𑐡𑐱𑐿𑑃 𑐩𑐵𑐣𑐾 𑐫𑐵𑐣𑐵𑑅 𑐢𑐎𑐵𑑅 𑐎𑑂𑐫𑐣𑐾𑐐𑐸 𑐡𑐸𑐐𑐸𑐔𑐵 𑐰 𑐥𑐱𑐸𑐫𑐵 𑐕𑑂𑐫𑑀𑑃 𑐴𑐾 𑐮𑐸𑐏𑐵𑐫𑑂 𑐏𑐵𑐫𑐾 𑐩𑐵𑑅𑐐𑐸 𑐰 𑐣𑐶𑐩𑑂𑐴 𑐁𑐛𑐥𑐴𑐬𑐶𑐫𑐵𑐟𑐫𑑂𑐟 𑐮𑐵 𑐳𑑂𑐫𑐵𑐣𑐵 𑐴𑐾 𑐫𑐶𑐮 𑐢𑐎𑐵𑑅 𑐣𑑄 𑐏𑑃 𑐥𑐶𑐴𑐵𑑃 𑐰𑑅𑐐𑐸 𑐡𑐸 𑑋 𑐖𑐣𑐖𑐵𑐟𑐶𑐫𑐵 𑐁𑐣𑑂𑐡𑑀𑐮𑐣𑑄 𑐳𑐟𑑂𑐟𑐵𑑄 𑐣𑐾𑐥𑐵𑑅𑐫𑐵𑐟 𑐕𑐐𑐹 𑐴𑐾 𑐬𑐵𑐲𑑂𑐚𑑂𑐬 𑐏𑑅 , 𑐕𑐠𑐷 𑐴𑐾 𑐨𑐵𑐫𑑂 𑐮𑑂𑐴𑐵𑐂, 𑐕𑐠𑐷 𑐴𑐾 𑐣𑐏𑑅𑐔𑐏𑑅 𑐴𑐣𑐷, 𑐕𑐠𑐷 𑐴𑐾 𑐰𑐳𑐟𑑄 𑐥𑐸𑐣𑐷 𑐢𑐎𑐵𑑅 𑐡𑐫𑐾𑐎𑐾𑐟𑑂𑐫𑑄𑐐𑐸 𑐲𑐜𑐫𑐣𑑂𑐟𑑂𑐬 𑐢𑐵𑑅𑐳𑐵 𑐟𑑅𑐢𑑄𑐐𑐸 𑐴𑐾 𑐢𑐎𑑂𑐎𑐵 𑐣𑑅𑐐𑐸 𑐡𑐸 𑑋 𑐟𑐬 𑐔𑐎𑐣𑐵𑐔𑐸𑐬 𑐖𑐸𑐫𑐵𑑅 𑐩𑐡𑐫𑐵 𑐴𑐾 𑐰𑑄𑐐𑐸 𑐩𑐡𑐸𑐣𑐶 𑑋 𑐀𑐠𑐾 𑐖𑐸𑐫𑐵𑑅 𑐠𑑂𑐰 𑐳𑐰𑐵𑐮 𑐰 𑐰𑐶𑐰𑐵𑐡 𑐣𑑂𑐴𑑂𑐫𑑅𑐣𑐾 𑐫𑑄𑐎𑐾𑐩𑐵𑑅𑐐𑐸 𑐖𑐬𑐸𑐬𑐷 𑐏𑐣𑐾𑐡𑐸𑑂 𑑋

𑐠𑐣 𑐴𑑂𑐫𑐵𑐄𑑃𑐐𑐸 𑐰 𑐟𑐸𑐫𑐹𑐐𑐸 𑐳𑐶𑐣𑑂𑐴𑑅𑐫𑐵 𑐔𑐬𑑂𑐔𑐵 𑐣𑑄 𑐫𑐵𑐫𑐾𑐐𑐸𑐺 𑐫𑐵𑑅 𑑋 𑐡𑐱𑐿𑑃 𑐢𑐫𑐵𑐐𑐸 𑐁𑐬𑑂𑐫𑐟𑐳𑐾𑑄 𑐟𑑂𑐫𑐵𑐎𑐹𑐐𑐸 𑐰 𑐎𑐶𑐬𑐵𑐟𑐟 𑐧𑐹𑐐𑐸 𑐢𑐎𑐵𑑅 𑐟𑑂𑐫𑐵𑑅𑐥𑐶𑐳𑑄 𑐴𑑂𑐫𑐵𑐄𑑃𑐐𑐸 𑐳𑐶𑐣𑑂𑐴𑑅 𑐟𑐶𑐂𑐐𑐺𑐸 𑐰 𑐧𑐹𑐐𑐸 𑐖𑐸𑐫𑐵𑑅 𑐟𑐸𑐫𑐹𑐐𑐸 𑐳𑐶𑐣𑑂𑐴𑑅 𑐟𑐶𑐂𑐐𑐸 𑐢𑐎𑐵𑑅 𑐰𑑂𑐫𑐵𑐏𑑂𑐫𑐵 𑐫𑐵𑐂𑐥𑐶𑑄 𑐡𑐸 𑑋 𑐟𑐬 𑐖𑐐𑐩𑐵𑐣 𑐐𑐸𑐬𑐸𑐒𑑄 𑐢𑐵𑑅𑐳𑐵 𑐀𑐧𑐶𑐬 𑐢𑐫𑐵𑐐𑐸𑐺 𑐣𑐾𑐥𑐵𑐮𑐫 𑐄𑐟𑑂𑐥𑐵𑐡 𑐴𑐾 𑐩𑐖𑐹𑐐𑐸𑐮𑐶𑑄 𑐳𑐎𑐳𑐶𑐣𑑄 𑐟𑐸𑐫𑐹𑐐𑐸 𑐳𑐶𑐣𑑂𑐴𑑅 𑐟𑐶𑐂𑐐𑐸 𑐴𑐾 𑐏𑑅 𑑋 𑐫𑐾𑑃𑐫𑑂 𑐨𑐵𑐬𑐟𑐷𑐫 𑐰𑑂𑐫𑐵𑐥𑐵𑐬𑐷 𑐰 𑐨𑐵𑐬𑐟𑐫𑑂 𑐰𑐣𑐵𑑅 𑐰𑑅𑐥𑐶𑑄 𑐣𑐾𑐰𑐵𑑅 𑐰𑑂𑐫𑐵𑐥𑐵𑐬𑐷𑐟𑐫𑑂𑐳𑑄 𑐀𑐧𑐶𑐬 𑐴𑐫𑐵𑑅 𑐴𑑂𑐫𑐵𑐄𑑃𑐐𑐸 𑐳𑐶𑐣𑑂𑐴𑑅 𑐟𑐶𑐂𑐐𑐸 𑐳𑐸𑐬𑐸 𑐫𑐵𑐟, 𑐩𑐾𑐥𑐶𑐳𑑄 𑐣𑑄 𑐴𑑂𑐫𑐵𑐄𑑃𑐎 𑐏𑐣𑐵𑑅 𑐧𑐵𑑄𑐮𑐵𑑅𑐐𑐸 𑐟𑐵𑐫𑐵𑑅 𑐣𑐎𑑂𑐎𑐮 𑐫𑐵𑐟 𑐢𑐫𑐵𑐐𑐸 𑐖𑐐𑐩𑐵𑐣𑐫𑐵 𑐟𑐬𑑂𑐎 𑐡𑐸 𑑋 𑐠𑑂𑐰 𑐰𑐵𑐳𑑂𑐟𑐰𑐫𑑂 𑐀𑐣𑐸𑐳𑐣𑑂𑐢𑐵𑐣 𑐖𑐸𑐂𑐩𑐵𑑅𑐐𑐸 𑐴𑐾 𑐏𑑃 𑐏𑑅 𑑋 𑐟𑐬 𑐳𑐶𑐣𑑂𑐴𑑅 𑐟𑐶𑐂𑐩𑐵𑑅𑐐𑐺𑐸 𑐢𑐵𑑅𑐐𑐸 𑐰 𑐐𑐵𑐩𑐫𑑂 𑐀𑐧𑐷𑐬 𑐩𑐡𑐫𑐵𑑅 𑐎𑐥𑐵𑐮𑐫𑑂 𑐖𑐵𑐫𑐾𑐎 𑐖𑐵𑐎𑐶 𑐳𑐶𑐣𑑂𑐴𑑅 𑐢𑐮𑐶𑐂 𑐧𑐸𑐮𑐵𑑅 𑐟𑐶𑐫𑐾𑐐𑐸 𑐔𑐮𑐣 𑐫𑐵𑐟 𑐢𑐵𑐂𑐥𑐶𑑄 𑐣𑑄 𑐡𑐸 𑑋 𑐟𑐬 𑐳𑐶𑐣𑑂𑐴𑑅 𑐧𑑂𑐫𑐵𑐐𑑅 𑐫𑐵𑐣𑐵𑑅 𑐎𑑂𑐫𑐣𑐾𑐐𑐸 𑐕𑐐𑐹 𑐁𑐢𑐵𑐬 𑐢𑐵𑑅𑐳𑐵 𑐖𑐹𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS