Read news in NepalBhasa text-- www.hamroschool.com BACK 𑐗𑐶𑐐𑐹 𑐧𑐸𑑃𑐡𑐾 𑐣𑐾𑐟𑐵𑐟𑐫𑑂𑐟 𑐚𑐶𑐎𑐚 𑐩𑐧𑐷𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐗𑐶𑐐𑐹 𑐧𑐸𑑃𑐡𑐾 𑐣𑐾𑐟𑐵𑐟𑐫𑑂𑐟 𑐚𑐶𑐎𑐚 𑐩𑐧𑐷𑐐𑐸

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷ 𑐣𑐾𑐎𑐥𑐵 𑐊𑐩𑐵𑐮𑐾𑐫𑐵 𑐀𑐢𑑂𑐫𑐎𑑂𑐲 𑐎𑐾𑐥𑐷 𑐱𑐬𑑂𑐩𑐵 𑐌𑐮𑐷𑐫𑐵𑐎𑐾 𑐗𑐶𑐐𑐹 𑐧𑐸𑑃𑐡𑐾 𑐳𑐴𑐩𑐟𑐶 𑐫𑐵𑐣𑐵𑑅 𑐥𑐵𑐬𑑂𑐚𑐷 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐟𑐵𑐟𑐫𑑂𑐟 𑐰𑐂𑐐𑐸 𑐩𑑄𑐳𑐶𑐬 𑑔 𑐐𑐟𑐾 𑐖𑐸𑐂𑐐𑐸 𑐔𑐸𑐣𑐵𑐰𑐫𑑂 𑐚𑐶𑐎𑐚 𑐩𑐧𑐷𑐐𑐸 𑐩𑐣𑐳𑑂𑐠𑐶𑐟𑐶 𑐡𑐸𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐥𑐵𑐬𑑂𑐚𑐷𑐫𑐵 𑐧𑐿𑐛𑐎𑐫𑑂 𑐳𑐴𑐮𑐴𑐫𑐵 𑐗𑑂𑐰𑐮𑐫𑑂 𑐗𑐶𑐐𑐹 𑐧𑐸𑑃𑐡𑐾 𑐳𑐴𑐩𑐟𑐶 𑐫𑐵𑐣𑐵𑑅 𑐥𑐵𑐬𑑂𑐚𑐷𑐂 𑐔𑑂𑐰𑐣𑐵𑐔𑑂𑐰𑐥𑐶𑑄𑐟 𑐄𑐩𑑂𑐩𑐾𑐡𑐰𑐵𑐬 𑐡𑐫𑐾𑐎𑐾𑐐𑐸 𑐳𑐩𑑂𑐧𑐣𑑂𑐢𑐫𑑂 𑐏𑑃 𑐰𑐫𑐾𑐰𑑄 𑐀𑐢𑑂𑐫𑐎𑑂𑐲 𑐌𑐮𑐷 𑐄𑐩𑐶𑐐𑐸 𑐧𑐵𑐬𑐾 𑐠𑐥 𑐳𑐴𑐮𑐴 𑐫𑐵𑐫𑐾𑐩𑐵𑐣𑐶 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐠𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐴𑐾 𑐧𑐬𑑂𑐏𑐵𑐳𑑂𑐟 𑐫𑐵𑐫𑐾𑐐𑐸𑐮𑐶𑐂 𑐴𑐳𑑂𑐟𑐵𑐎𑑂𑐲𑐬 𑐫𑐵𑑅𑐥𑐶𑑄 𑐣𑐾𑐟𑐵𑐟𑐫𑑂𑐳𑑄𑑄 𑐁𑐟𑑂𑐩𑐵𑐮𑑀𑐔𑐣𑐵 𑐩𑐫𑐵𑐫𑐾𑐎𑑄 𑐚𑐶𑐎𑐚 𑐩𑐧𑐷𑐐𑐸 𑐩𑐣𑐳𑑂𑐠𑐶𑐟𑐶 𑐀𑐢𑑂𑐫𑐎𑑂𑐲 𑐌𑐮𑐷𑑄 𑐡𑐫𑐾𑐎𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐳𑐴𑐮𑐴𑐫𑐵 𑐗𑑂𑐰𑐮𑐫𑑂 𑐀𑐢𑑂𑐫𑐎𑑂𑐲 𑐌𑐮𑐷𑑄 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸, ‘𑐥𑐵𑐬𑑂𑐚𑐷 𑐀𑐢𑑂𑐫𑐎𑑂𑐲𑐫𑐵𑐟 𑐴𑐾 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐥𑐵𑐏𑐾𑑄 𑐧𑐬𑑂𑐏𑐵𑐳𑑂𑐟 𑐫𑐵𑐫𑐾𑐟 𑐴𑐳𑑂𑐟𑐵𑐎𑑂𑐲𑐬 𑐫𑐵𑑅𑐥𑐶𑑄 𑐣𑐾𑐟𑐵𑐟𑐫𑑂𑐟 𑐁𑐟𑑂𑐩𑐁𑐮𑑀𑐔𑐣𑐵 𑐩𑐫𑐵𑐫𑐾𑐎𑑄 𑐐𑐸𑐎𑐠𑑄 𑐚𑐶𑐎𑐚 𑐧𑐷𑐐𑐸 ? 𑐰𑐫𑑂𑐎𑑅𑐥𑐶𑑄𑐳𑑄 𑐄𑐐𑐸 𑐂𑐮𑐫𑑂 𑐖𑐶𑐩𑐶𑐐𑐸 𑐥𑐵𑐏𑐾𑑄 𑐐𑐩𑑂𑐨𑐷𑐬 𑐐𑐮𑑂𑐟𑐷 𑐖𑐸𑐮 𑐢𑐎𑐵𑑅 𑐮𑐶𑐏𑐶𑐟 𑐬𑐸𑐥𑐫𑑂 𑐁𑐟𑑂𑐩𑐁𑐮𑑀𑐔𑐣𑐵 𑐫𑐵𑐫𑐾𑐩𑐵𑑅, 𑐩𑐏𑐸𑐳𑐵 𑐴𑐵𑐎𑐣𑑄 𑐣𑑄 𑐥𑐵𑐬𑑂𑐚𑐷𑐫𑐵𑐟 𑐢𑑀𑐎𑐵 𑐧𑐷𑐐𑐸 𑐳𑐩𑑂𑐨𑐵𑐰𑐣𑐵 𑐡𑐸 𑑋’

𑑑𑑐 𑐧𑐸𑑃𑐡𑐾 𑐳𑐩𑐗𑐡𑐵𑐬𑐷 𑐫𑐵𑐣𑐵𑑅 𑐊𑐩𑐵𑐮𑐾𑐫𑑂 𑐟𑐸𑑄 𑐔𑑂𑐰𑐥𑐶𑑄 𑐣𑐾𑐟𑐵𑐟𑐫𑑂𑐟 𑐰𑐂𑐐𑐸 𑐁𑐩 𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑑄𑐟𑐶𑑄 𑐠𑑅𑐠𑑅𑐐𑐸 𑐣𑐶𑐬𑑂𑐰𑐵𑐔𑐣 𑐎𑑂𑐲𑐾𑐟𑑂𑐬𑑄 𑐄𑐩𑑂𑐩𑐾𑐡𑐰𑐵𑐬 𑐳𑐶𑐦𑐵𑐬𑐶𑐳 𑐣𑑄 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐟𑐬 𑐀𑐢𑑂𑐫𑐎𑑂𑐲 𑐌𑐮𑐷𑑄 𑐥𑐵𑐬𑑂𑐚𑐷𑐫𑐵𑐟 𑐢𑑀𑐎𑐵 𑐧𑐷𑐢𑐸𑑄𑐎𑐹𑐐𑐸𑐮𑐶𑑄 𑐁𑐟𑑂𑐩𑐵𑐮𑑀𑐔𑐣 𑐩𑐫𑐵𑐫𑐾𑐎𑑄 𑐚𑐶𑐎𑐚 𑐧𑐷𑐩𑐖𑐶𑐄𑐐𑐸 𑐏𑑃𑐫𑑂 𑐀𑐜𑐵𑐣 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐌𑐮𑐷𑑄 𑐀𑐢𑑂𑐫𑐎𑑂𑐲𑑄 𑐮𑐶𑐏𑐶𑐟 𑐩𑐏𑐸𑐳𑐵𑑄 𑐠𑑅𑐐𑐸 𑐣𑑂𑐴𑑂𑐫𑑅𑐣𑐾 𑐖𑐎 𑐖𑐹𑐳𑐵𑑄 𑐩𑐵𑐦𑐷 𑐦𑑂𑐰𑐣𑐢𑐵𑑅𑐳𑐵𑑄 𑐣𑑄 𑐚𑐶𑐎𑐚 𑐧𑐷𑐐𑐸 𑐏𑑃 𑐠𑑅 𑐳𑐟𑐷𑐥𑐶𑑄 𑐣𑐾𑐟𑐵𑐟𑐫𑑂𑐟 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐳𑐴𑐮𑐴𑐫𑐵 𑐗𑑂𑐰𑐮𑐫𑑂 𑐊𑐩𑐵𑐮𑐾𑐫𑐵 𑐐𑐸𑐮𑐶𑐏𑐾 𑐥𑐡𑐵𑐢𑐶𑐎𑐵𑐬𑐷𑐟𑐫𑑂𑐳𑑄 𑐎𑑂𑐰𑐫𑑂𑐫𑐵 𑐟𑐴𑐮𑑄 𑐳𑐶𑐦𑐵𑐬𑐶𑐳 𑐖𑐸𑐫𑐵𑐰𑑅𑐥𑐶𑑄𑐟 𑐚𑐶𑐎𑐚 𑐧𑐷𑐩𑐵𑑅𑐐𑐸 𑐢𑐵𑐥𑐹 𑐟𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐊𑐩𑐵𑐮𑐾𑐫𑐵 𑐁𑐣𑑂𑐟𑐬𑐶𑐎 𑐰𑐶𑐰𑐵𑐡 𑐳𑐩𑐵𑐢𑐣 𑐫𑐵𑐫𑐾𑐟 𑐣𑐷𑐳𑑂𑐰𑑄𑐐𑐸 𑐎𑐵𑐬𑑂𑐫𑐡𑐮𑑄 𑑒𑑐𑑗𑑘 𑐀𑐳𑐵𑐬 𑑒𑑗 𑐐𑐟𑐾 𑐗𑐶𑐐𑐹 𑐧𑐸𑑃𑐡𑐾 𑐳𑐴𑐩𑐟𑐶 𑐫𑐵𑑅𑐐𑐸 𑐏𑑅 𑑋 𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐰𑐿𑐱𑐵𑐏 𑑒𑑗 𑐐𑐟𑐾 𑐟𑐟𑑂𑐎𑐵𑐮𑐷𑐣 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐌𑐮𑐷𑑄 𑐰𑐶𑐱𑑂𑐰𑐵𑐳𑐫𑐵 𑐩𑐟 𑐎𑐵𑐫𑐾𑐟 𑐳𑑂𑐰𑑅𑐐𑐸 𑐏𑑅𑐳𑐵 𑐣𑐷𑐔𑑂𑐫𑐵𑐩𑑂𑐴 𑐳𑐵𑑄𑐳𑐡 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐧𑐿𑐛𑐎𑐫𑑂 𑐩𑐰𑑄𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐗𑐶𑑄𑐣𑐶𑐩𑑂𑐴 𑐣𑐾𑐟𑐵 𑑑𑑐 𑐧𑐸𑑃𑐡𑐾 𑐳𑐴𑐩𑐟𑐶 𑐫𑐵𑐣𑐵𑑅 𑐊𑐩𑐵𑐮𑐾𑑄 𑐟𑐸𑑄 𑐔𑑂𑐰𑑄𑐐𑐸 𑐏𑑅𑐳𑐵 𑐮𑑂𑐫𑑄𑐡𑐸𑐥𑐶𑑄𑐳𑑄 𑐣𑐾𑐎𑐥𑐵 𑐊𑐎𑐷𑐎𑐺𑐟 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐗𑐶𑐐𑐹 𑐧𑐸𑑃𑐡𑐾 𑐳𑐴𑐩𑐟𑐶 𑐫𑐵𑐫𑐾𑐢𑐸𑑄𑐎𑐵𑑅 𑐊𑐩𑐵𑐮𑐾𑐫𑑂 𑐟𑐸𑑄 𑐔𑑂𑐰𑐥𑐶𑑄 𑐣𑐾𑐟𑐵𑐟 𑐨𑐷𑐩 𑐬𑐵𑐰𑐮, 𑐀𑐲𑑂𑐚𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, 𑐫𑐸𑐰𑐬𑐵𑐖 𑐖𑑂𑐘𑐰𑐵𑐮𑐷, 𑐳𑐸𑐬𑐾𑐣𑑂𑐡𑑂𑐬 𑐥𑐵𑐞𑑂𑐜𑐾, 𑐫𑑀𑐐𑐾𑐱 𑐨𑐚𑑂𑐚𑐬𑐵𑐃, 𑐐𑑀𑐎𑐬𑑂𑐞 𑐧𑐶𑐲𑑂𑐚, 𑐢𑐣𑐱𑑂𑐫𑐵𑐩 𑐨𑐸𑐲𑐵𑐮, 𑐨𑐷𑐩 𑐁𑐔𑐵𑐬𑑂𑐫, 𑐀𑐩𑐺𑐟 𑐧𑑀𑐴𑐬𑐵 𑐰 𑐬𑐑𑐸𑐖𑐷 𑐥𑐣𑑂𑐟 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS