Read news in NepalBhasa text-- www.hamroschool.com BACK 𑐣𑐵𑐐𑐬𑐶𑐎𑐟𑐵 𑐰𑐶𑐢𑐾𑐫𑐎 𑐥𑐵𑐬𑐶𑐟 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐵𑐐𑐬𑐶𑐎𑐟𑐵 𑐰𑐶𑐢𑐾𑐫𑐎 𑐥𑐵𑐬𑐶𑐟

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐬𑐵𑐲𑑂𑐚𑑂𑐬𑐥𑐟𑐶𑑄 𑐥𑐸𑐣𑐬𑑂𑐰𑐶𑐔𑐵𑐬 𑐫𑐵 𑐢𑐎𑐵𑑅 𑐳𑐸𑐗𑐵𑐰 𑐳𑐴𑐶𑐟 𑐮𑐶𑐟 𑐕𑑂𑐰𑐫𑐵 𑐴𑑅𑐐𑐸 𑐣𑐵𑐐𑐬𑐶𑐎𑐟𑐵 𑐰𑐶𑐢𑐾𑐫𑐎 𑐩𑑂𑐴𑐶𑐐𑑅 𑐥𑑂𑐬𑐟𑐶𑐣𑐶𑐢𑐶 𑐳𑐨𑐵𑑄 𑐴𑐵𑐣𑑄 𑐧𑐴𑐸𑐩𑐟𑑄 𑐥𑐵𑐬𑐶𑐟 𑐫𑐵𑐟 𑑋 𑐩𑑂𑐴𑐶𑐐𑑅 𑐳𑑄𑐳𑐡𑑄 𑐬𑐵𑐲𑑂𑐚𑑂𑐬𑐥𑐟𑐶𑑄 𑐕𑑂𑐰𑐫𑐵 𑐴𑑅𑐐𑐸 𑐳𑐸𑐗𑐵𑐰𑐫𑐵𑐟 𑐐𑐣𑑄 𑐴𑐾 𑐄𑐮𑑂𑐮𑐾𑐏 𑐩𑐫𑐵𑐳𑐾 𑐣𑑂𑐴𑐵𑐥𑐵 𑐐𑐠𑐾 𑐕𑑂𑐰𑑅𑐐𑐸 𑐏𑑅 𑐥𑐵𑐫𑑂𑐕𑐶 𑐀𑐠𑐾 𑐴𑐾 𑐫𑐵𑐣𑐵𑑅 𑐥𑐵𑐬𑐶𑐟 𑐫𑐵𑑅𑐐𑐸 𑐏𑑅 𑑋

𑐣𑐵𑐐𑐬𑐶𑐎𑐟𑐵 𑐋𑐣 𑑒𑑐𑑖𑑓 𑐳𑑄𑐱𑑀𑐢𑐣 𑐫𑐵𑐫𑐾𑐟 𑐴𑑅𑐐𑐸 𑐄𑐐𑐸 𑐰𑐶𑐢𑐾𑐫𑐎 𑐰𑐬𑑂𑐟𑐩𑐵𑐣 𑐳𑐬𑐎𑐵𑐬𑑄 𑐥𑐵𑐬𑐶𑐟 𑐫𑐵𑐣𑐵𑑅 𑐥𑑂𑐬𑐩𑐵𑐞𑐷𑐎𑐬𑐞𑐫𑐵 𑐮𑐵𑐐𑐶𑑄 𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐠𑐵𑐫𑑂 𑐕𑑂𑐰𑑅𑐐𑐸 𑐏𑑅𑐳𑐵 𑐬𑐵𑐲𑑂𑐚𑑂𑐬𑐥𑐟𑐶𑑄 𑐄𑐎𑐷 𑐴𑐵𑐣𑑄 𑐕𑐎𑑂𑐰𑑅 𑐧𑐶𑐔𑐵𑑅 𑐫𑐵𑐣𑐵𑑅 𑐖𑐎 𑐥𑐵𑐬𑐶𑐟 𑐫𑐵𑐳𑐾𑑄 𑐳𑐸𑐗𑐵𑐰 𑐳𑐴𑐶𑐟 𑐮𑐶𑐟 𑐕𑑂𑐰𑐫𑐵 𑐴𑑅𑐐𑐸 𑐏𑑅 𑑋

𑐠𑑂𑐰 𑐰𑐶𑐢𑐾𑐫𑐎𑐫𑐵𑐟 𑐣𑑂𑐴𑐵𑐥𑐵 𑐮𑐶𑐥𑐵 𑐠𑐾𑑄 𑐢𑑂𑐰𑐣𑐷 𑐩𑐟𑑄 𑐥𑐵𑐬𑐶𑐟 𑐫𑐵𑐎𑐾𑐐𑐸 𑐟𑐫𑐵𑐬𑐷 𑐖𑐹𑐐𑐸 𑐏𑑅𑐳𑐵𑑄 𑐥𑑂𑐬𑐩𑐸𑐏 𑐥𑑂𑐬𑐟𑐶𑐥𑐎𑑂𑐲𑐷𑑄 𑐢𑑂𑐰𑐣𑐷 𑐩𑐟 𑐥𑑂𑐬𑐞𑐵𑐮𑐷𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑐫𑐾 𑐩𑐏𑐸 𑐢𑐵𑑅𑐐𑐸𑐮𑐶𑑄 𑐩𑐟𑐡𑐵𑐣 𑐴𑐾 𑐫𑐵𑐣𑐵𑑅 𑐥𑐵𑐬𑐶𑐟 𑐫𑐵𑑅𑐐𑐸 𑐏𑑅 𑑋 𑐩𑐟𑐡𑐵𑐣𑐫𑑂 𑐎𑐸𑐮 𑐄𑐥𑐳𑑂𑐠𑐶𑐟 𑑑𑑙𑑕 𑐩𑑂𑐴 𑐳𑐵𑑄𑐳𑐡 𑐩𑐢𑑂𑐫𑐾 𑐥𑑂𑐬𑐳𑑂𑐟𑐵𑐰𑐫𑐵 𑐥𑐎𑑂𑐲𑐫𑑂 𑑑𑑓𑑖 𑐩𑐟 𑐰 𑐰𑐶𑐥𑐎𑑂𑐲𑐫𑑂 𑑖𑑐 𑐩𑐟 𑐰𑑄𑐐𑐸 𑐏𑑅 𑑋

𑐳𑐬𑐎𑐵𑐬𑑄 𑐣𑐵𑐐𑐬𑐶𑐎𑐟𑐵 𑐋𑐣𑐫𑑂 𑐳𑑄𑐱𑑀𑐢𑐣 𑐩𑐖𑐹𑐐𑐸 𑐎𑐵𑐬𑐞𑑄 𑐣𑐾𑐥𑐵𑐮𑐷 𑐩𑐵𑑄𑐀𑐧𑐸𑐥𑐵𑐏𑐾𑑄 𑐖𑐣𑑂𑐩 𑐖𑐹𑐥𑐶𑑄 𑐎𑐬𑐶𑐧 𑑗 𑐮𑐵𑐏𑐩𑑂𑐴 𑐩𑐳𑑂𑐟𑐫𑑂𑐳𑑄 𑐣𑐵𑐐𑐬𑐶𑐎𑐟𑐵 𑐎𑐵𑐫𑐾 𑐩𑐏𑐣𑐵𑐔𑑂𑐰𑑄𑐐𑐸 𑐡𑐸 𑐢𑐵𑐳𑐾𑑄 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐫𑐵𑐫𑐾𑐩𑐵𑑅𑐐𑐸 𑐟𑐬𑑂𑐎 𑐣𑑂𑐴𑑂𑐫𑑅𑐣𑐾 𑐟𑑅𑐐𑐸 𑐏𑑅 𑑋 𑐰𑐶𑐥𑐎𑑂𑐲𑐷𑐟𑐫𑑂𑐳𑑄 𑐢𑐵𑑅𑐳𑐵 𑐠𑑂𑐰 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐖𑐸𑐮 𑐢𑐵𑑅𑐳𑐵 𑐣𑐾𑐥𑐵𑐮𑐷 𑐩𑐶𑐖𑑄𑐮𑐶𑐳𑐾 𑐂𑐴𑐶𑐥𑐵 𑐫𑐵𑐣𑐵 𑐰𑐂𑐥𑐶𑑄 𑐨𑐵𑐬𑐟𑐷𑐫 𑐩𑐶𑐳𑐵𑐟𑐫𑑂𑐳𑑄 𑐟𑐸𑐬𑐸𑐣𑑂𑐟 𑐴𑐾 𑐣𑐵𑐐𑐬𑐶𑐎𑐟𑐵 𑐎𑐵𑐫𑐾 𑐏𑐣𑐷𑐐𑐸 𑐖𑐹𑐐𑐸𑐮𑐶𑑄 𑐄𑐎𑐶𑐫𑐵𑐟 𑐥𑐣𑐾𑐐𑐸 𑐮𑐵𑐐𑐶𑑄 𑐣𑑄 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐫𑐵𑐫𑐾 𑐩𑐖𑐶𑐄 𑐢𑐎𑐵𑑅 𑐰𑐶𑐬𑑀𑐢 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐊𑐩𑐵𑐮𑐾𑑄 𑐬𑐵𑐲𑑂𑐚𑑂𑐬𑐥𑐟𑐶𑐥𑐵𑐏𑐾𑑄 𑐳𑐸𑐗𑐵𑐰 𑐳𑐩𑐾𑐟 𑐟𑐫𑐵𑑅 𑐰𑐶𑐢𑐾𑐫𑐎𑐫𑑂 𑐥𑐸𑐣𑐬𑑂𑐰𑐶𑐔𑐵𑐬 𑐫𑐵 𑐢𑐎𑐵𑑅 𑐮𑐶𑐟 𑐕𑑂𑐰𑐫𑐵 𑐴𑑅𑐐𑐸 𑐖𑐹𑐐𑐸𑐮𑐶𑑄 𑐄𑐎𑐷 𑐳𑑄𑐳𑐡𑐫𑐵 𑐣𑐶𑐐𑐸𑐮𑐶𑑄 𑐳𑐡𑐣𑐫𑑂 𑐰𑑂𑐫𑐵𑐥𑐎 𑐕𑐮𑐦𑐮 𑐫𑐵𑐣𑐵𑑅 𑐖𑐎 𑐥𑐵𑐬𑐶𑐟 𑐫𑐵𑐫𑐾𑐩𑐵𑑅𑐐𑐸 𑐟𑐬𑑂𑐎 𑐟𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐳𑐬𑐎𑐵𑐬𑑄 𑐢𑐵𑑅𑐳𑐵 𑐁𑑅 𑐰𑐶𑐢𑐾𑐫𑐎𑐫𑐵𑐟 𑐥𑐵𑐬𑐶𑐟 𑐫𑐵𑐫𑐾 𑐮𑐶𑐧𑐵𑐎𑐵 𑐟𑐫𑐾 𑐩𑐖𑐶𑐄 𑐢𑐵𑐳𑐾𑑄 𑐥𑐵𑐬𑐶𑐟 𑐫𑐵𑐣𑐵 𑐕𑑂𑐰𑐫𑐾𑐐𑐸 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋

𑐁𑑅 𑐬𑐵𑐲𑑂𑐚𑑂𑐬𑐥𑐟𑐶𑑄 𑐮𑐶𑐟 𑐕𑑂𑐰𑐫𑐾 𑐩𑑄𑐟
𑐬𑐵𑐲𑑂𑐚𑑂𑐬𑐥𑐟𑐶𑑄 𑐕𑑂𑐰𑐫𑐵 𑐮𑐶𑐟 𑐕𑑂𑐰𑐫𑐵 𑐴𑑅𑐐𑐸 𑐰𑐶𑐢𑐾𑐫𑐎𑐫𑐵𑐟 𑐳𑐬𑐎𑐵𑐬𑑄 𑐕𑐸𑑄 𑐴𑐾 𑐳𑑄𑐱𑑀𑐢𑐣 𑐩𑐫𑐵𑐳𑐾 𑐴𑐵𑐣𑑄 𑐐𑐠𑐾 𑐏𑑅 𑐀𑐠𑐾 𑐴𑐾 𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐠𑐵𑐫𑑂 𑐕𑑂𑐰𑐫𑐵 𑐧𑐶𑐮 𑐢𑐵𑑅𑐳𑐵 𑐣𑐶𑐎𑑂𑐰𑑅𑐐𑐸 𑐏𑐸𑐳𑐷 𑐬𑐵𑐲𑑂𑐚𑑂𑐬𑐥𑐟𑐶𑑄 𑐄𑐎𑐶𑐫𑐵𑐟 𑐥𑑂𑐬𑐩𑐵𑐞𑐷𑐎𑐬𑐞 𑐫𑐵𑐣𑐵 𑐧𑐷𑐩𑐵𑑅𑐐𑐸 𑐥𑑂𑐬𑐵𑐰𑐢𑐵𑐣 𑐡𑐸 𑑋 𑐳𑑄𑐰𑐶𑐢𑐵𑐣 𑐎𑐠𑑄 𑐕𑐸𑑄 𑐣𑑄 𑐰𑐶𑐢𑐾𑐫𑐎𑐫𑐵𑐟 𑐣𑐶𑐎𑑂𑐰𑑅 𑐟𑐎 𑐮𑐶𑐟 𑐕𑑂𑐰𑐫𑐾 𑐩𑐦𑐂𑐐𑐸 𑐖𑐹𑐐𑐸𑐮𑐶𑑄 𑐁𑑅 𑐬𑐵𑐲𑑂𑐚𑑂𑐬𑐥𑐟𑐶𑑄 𑐠𑑂𑐰 𑐰𑐶𑐢𑐾𑐫𑐎𑐫𑐵𑐟 𑐥𑑂𑐬𑐩𑐵𑐞𑐷𑐎𑐬𑐞 𑐩𑐫𑐵𑐳𑐾𑑄 𑐩𑐐𑐵𑑅𑐐𑐸 𑐏𑑃 𑐎𑐵𑐣𑐹𑐣𑐰𑐶𑐡𑑂𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋

𑐳𑑄𑐰𑐶𑐢𑐵𑐣𑐫𑐵 𑐢𑐵𑐬𑐵 𑑑𑑑𑑓 𑐫𑐵 𑐄𑐥𑐢𑐵𑐬𑐵 (𑑔) 𑐎𑐠𑑄 𑐬𑐵𑐲𑑂𑐚𑑂𑐬𑐥𑐟𑐶𑑄 𑐮𑐶𑐟 𑐕𑑂𑐰𑑅𑐐𑐸 𑐀𑐖𑑂𑐫𑐵𑑅𑐐𑐸 𑐰𑐶𑐢𑐾𑐫𑐎 𑐴𑐵𑐣𑑄 𑐥𑐵𑐬𑐶𑐟 𑐫𑐵𑐣𑐵𑑅 𑐬𑐵𑐲𑑂𑐚𑑂𑐬𑐥𑐟𑐶𑐠𑐵𑐫𑑂 𑐕𑑂𑐰𑐫𑐵 𑐧𑐶𑐮 𑐢𑐵𑑅𑐳𑐵 𑐬𑐵𑐲𑑂𑐚𑑂𑐬𑐥𑐟𑐶𑑄 𑑑𑑕 𑐣𑑂𑐴𑐸𑐫𑐵 𑐡𑐸𑐣𑐾 𑐄𑐎𑐶𑐫𑐵𑐟 𑐥𑑂𑐬𑐩𑐵𑐞𑐎𑐬𑐞 𑐫𑐵𑐣𑐵 𑐧𑐷𑐩𑐵𑑅 𑑋 𑐫𑐡𑐶 𑐩𑐫𑐵𑐟 𑐢𑐵𑑅𑐳𑐵 𑐰 𑐳𑑂𑐰𑐟𑑅 𑐥𑐵𑐬𑐶𑐟 𑐖𑐹𑐐𑐸 𑐨𑐵𑑅𑐥𑐷 𑑋 𑐳𑑄𑐰𑐶𑐢𑐵𑐣𑐰𑐶𑐡𑑂 𑐜𑐵. 𑐰𑐶𑐥𑐶𑐣 𑐁𑐔𑐵𑐬𑑂𑐫𑑄 𑐬𑐵𑐳𑐳𑐫𑐵𑐟 𑐎𑐣𑐵𑐡𑐷𑐎𑐠𑑄 𑐁𑑅 𑐬𑐵𑐲𑑂𑐚𑑂𑐬𑐥𑐟𑐶𑑄 𑐠𑑂𑐰 𑐰𑐶𑐢𑐾𑐫𑐎𑐫𑐵𑐟 𑐠𑐸𑐣𑐕𑐾𑐎 𑐫𑐵𑐣𑐵 𑐟𑐫𑐾 𑐡𑐂 𑐩𑐏𑐸, 𑐳𑐸𑐩𑑂𑐎 𑐥𑑂𑐬𑐩𑐵𑐞𑐷𑐎𑐬𑐞 𑐫𑐵𑐣𑐵 𑐕𑑂𑐰𑐫𑐾𑐩𑐵𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS