Read news in NepalBhasa text-- www.hamroschool.com BACK 𑐫𑑃𑐫𑐵𑑅 𑐳𑑂𑐰𑐫𑐾𑐟 𑑒𑑕 𑐩𑑂𑐴 𑐣𑐐𑐬 𑐥𑑂𑐬𑐩𑐸𑐏𑐫𑐵𑐟 𑐧𑑂𑐰𑐣𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑑃𑐫𑐵𑑅 𑐳𑑂𑐰𑐫𑐾𑐟 𑑒𑑕 𑐩𑑂𑐴 𑐣𑐐𑐬 𑐥𑑂𑐬𑐩𑐸𑐏𑐫𑐵𑐟 𑐧𑑂𑐰𑐣𑐵

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐫𑑃𑐫𑐵𑑅 𑐥𑐬𑑂𑐰 𑐳𑑂𑐰𑐫𑐾𑐐𑐸 𑐮𑐵𑐐𑐶𑑄 𑐳𑑂𑐰𑐡𑑃 𑐣𑑂𑐴𑑂𑐫𑑅 𑐠𑐾𑑄 𑐠𑐸𑐐𑐸𑐳𑐷 𑐣𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐠𑑅𑐥𑐶𑑄𑐮𑐶𑐳𑐾 𑐨𑐵𑐟𑐺 𑐳𑑂𑐰𑐵𑐥𑐹 𑐡𑐸𑐐𑐸 𑐠𑐷𑐠𑐷 𑐡𑐾𑐫𑑂𑐫𑐵 𑐣𑐐𑐬 𑐥𑑂𑐬𑐩𑐸𑐏𑐟𑐫𑑂𑐟 𑐧𑑂𑐰𑐣𑐵𑐥𑑁 𑐕𑑂𑐰𑑅𑐐𑐸 𑐡𑐸 𑑋

𑐫𑐾𑑃 𑐩𑐣𑐥𑐵 𑐳𑐹𑐟𑑂𑐬𑐫𑐵 𑐎𑐠𑑄 𑐩𑐾𑐫𑐬 𑐧𑐵𑐮𑐾𑐣𑑂𑐡𑑂𑐬 𑐳𑐵𑐴𑑄 𑐠𑐸𑐐𑐸𑐳𑐷 𑐠𑐷𑐠𑐷 𑐡𑐾𑐫𑑂𑐫𑐵 𑑒𑑕 𑐩𑑂𑐴 𑐣𑐐𑐬 𑐥𑑂𑐬𑐩𑐸𑐏𑐥𑐶𑑄𑐟 𑐫𑑃𑐫𑐵𑑅 𑐳𑑂𑐰𑑅 𑐰𑐫𑐾𑐐𑐸 𑐮𑐵𑐐𑐶𑑄 𑐧𑑂𑐰𑐣𑐵𑐥𑑁 𑐕𑑂𑐰𑑅𑐐𑐸 𑐏𑑅 𑑋 𑐠𑐸𑐎𑐷 𑐨𑐵𑐬𑐟𑐫𑐵 𑐣𑑂𑐴𑐹 𑐡𑐶𑐮𑑂𑐮𑐷, 𑐔𑐷𑐣𑐫𑐵 𑐮𑑂𑐴𑐵𑐳𑐵, 𑐮𑐵𑐣𑑂𑐖𑐵𑐄𑐣𑐶𑐳𑐾𑑄 𑐎𑐫𑐵𑑅 𑐀𑐩𑐾𑐬𑐶𑐎𑐵, 𑐖𑐵𑐥𑐵𑐣, 𑐖𑐬𑑂𑐩𑐣𑐷, 𑐡𑐎𑑂𑐲𑐶𑐞 𑐎𑑀𑐬𑐶𑐫𑐵 𑐰 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵 𑐠𑐷𑐠𑐷 𑐣𑐐𑐬 𑐥𑑂𑐬𑐩𑐸𑐏𑐥𑐶𑑄𑐟 𑐟𑐎𑑄 𑐧𑑂𑐰𑐣𑐵𑐥𑑁 𑐕𑑂𑐰𑑅𑐐𑐸 𑐡𑐸 𑑋

𑐫𑐾𑑃 𑐩𑐣𑐥𑐵𑐥𑐵𑐏𑐾𑑄 𑐩𑐾𑐫𑐬 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑐫𑐵 𑐥𑐵𑐮𑐫𑑂 𑐫𑑃𑐫𑐵𑑅𑐫𑐵𑐟 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐬𑐸𑐥𑑄 𑐥𑑂𑐬𑐔𑐵𑐬 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐠𑐷𑐠𑐷 𑐣𑐐𑐬𑐫𑐵 𑐥𑑂𑐬𑐩𑐸𑐏𑐥𑐶𑑄𑐟 𑐫𑐾𑑃𑐫𑑂 𑐧𑑂𑐰𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐥𑐘𑑂𑐔𑐵𑐒𑑂𑐐 𑐣𑐶𑐬𑑂𑐞𑐵𑐫𑐎 𑐰𑐶𑐎𑐵𑐳 𑐳𑐩𑐶𑐟𑐶𑐥𑐵𑐏𑐾𑑄 𑐠𑐸𑐐𑐸𑐳𑐷 𑐖𑐸𑐂𑐐𑐸 𑐫𑑃𑐫𑐵𑑅 𑐖𑐵𑐟𑑂𑐬𑐵𑐫𑐵 𑐳𑐵𑐂𑐟 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋 𑐳𑐩𑐶𑐟𑐶𑑄 𑐧𑐶𑐄𑐐𑐸 𑐳𑐵𑐂𑐟 𑐎𑐠𑑄 𑐁𑑅 𑐰𑐂𑐐𑐸 𑐨𑐡𑑁 𑑒𑑒 𑐐𑐟𑐾 𑐧𑐸𑐢𑐰𑐵𑑅 𑐳𑐸𑐠𑐫𑑂 𑑗.𑑑𑑗 𑐧𑐖𑐾 𑐴𑐣𑐸𑐩𑐵𑐣𑐢𑑂𑐰𑐵𑐏𑐵𑐫𑑂 𑐫𑑅𑐳𑐶𑑄 𑐠𑐣𑐷𑐐𑐸 𑐖𑐹𑐐𑐸 𑐡𑐸 𑑋 𑐫𑑅𑐳𑐶𑑄 𑐎𑐵𑑅 𑐰𑐣𑐾𑐐𑐸 𑐮𑐵𑐐𑐶𑑄 𑐠𑑂𑐰𑐴𑐾 𑐰𑐂𑐐𑐸 𑐨𑐡𑑁 𑑑𑑓 𑐐𑐟𑐾 𑐳𑐸𑐠𑐫𑑂 𑑙.𑑑𑑗 𑐧𑐖𑐾 𑐰𑐣 𑐫𑐵𑐟𑑂𑐬𑐵 𑐖𑐸𑐂𑐐𑐸 𑐰 𑐰𑐎𑐸𑐣𑑂𑐴𑐸 𑐴𑐾 𑐧𑐴𑐣𑐷 𑐫𑑅𑐳𑐶𑑄𑐫𑐵𑐟 𑐩𑐵𑑅𑐐𑐸 𑐳𑐶𑐩𑐵 𑐥𑐵𑐮𑐷𑐐𑐸 𑐖𑐸𑐂 𑑋 𑐨𑐡𑑁 𑑑𑑙 𑐐𑐟𑐾 𑐳𑐸𑐠𑐫𑑂 𑑗.𑑒𑑔 𑐧𑐖𑐾 𑐫𑑅𑐳𑐶𑑄𑐫𑐵𑐟 𑐣𑐐𑐬 𑐥𑑂𑐬𑐰𑐾𑐱 𑐫𑐵𑐎𑐷𑐐𑐸 𑐖𑑂𑐫𑐵𑐗𑑂𑐰𑑅 𑐡𑐸 𑑋 𑐫𑑅𑐳𑐶𑑄 𑐠𑐣𑐾𑐰𑑄 𑐫𑐾𑑃𑐫𑑂 𑐡𑐷𑐥𑑂𑐫𑐵𑐏𑑄, 𑐮𑐵𑐏𑐾, 𑐥𑐸𑐮𑐸𑐎𑐶𑐳𑐶 𑐁𑐡𑐶 𑐣𑑄 𑐥𑐶𑐴𑐵𑑄 𑐰𑐂 𑑋

𑐄𑐎𑐠𑑄 𑐴𑐾 𑐨𑐡𑑁 𑑒𑑔 𑐐𑐟𑐾 𑐎𑐸𑐩𑐵𑐬𑐷 𑐬𑐠𑐫𑐵𑐟𑑂𑐬𑐵𑐫𑐵 𑐎𑑂𑐰𑑅𑐣𑐾𑐫𑐵𑑅, 𑑒𑑕 𑐐𑐟𑐾 𑐠𑑅𑐣𑐾𑐫𑐵𑑅, 𑑒𑑙 𑐐𑐟𑐾 𑐧𑐸𑐢𑐰𑐵𑑅 𑐣𑐵𑐣𑐶𑐔𑐵𑐫𑐵𑑅 𑐰 𑐰𑐎𑐸𑐣𑑂𑐴𑐸 𑐴𑐾 𑐧𑐴𑐣𑐷 𑑗.𑑓𑑓 𑐧𑐖𑐾 𑐫𑑅𑐳𑐶𑑄 𑐎𑑂𑐰𑑅𑐠𑐮𑐷 𑑋 𑐫𑑅𑐳𑐶𑑄 𑐎𑑂𑐰𑑅𑐠𑐮𑐾𑐰𑑄 𑐫𑑃𑐫𑐵𑑅 𑐥𑐬𑑂𑐰 𑐣𑑄 𑐎𑑂𑐰𑐔𑐵𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS