Read news in NepalBhasa text-- www.hamroschool.com BACK 𑐀𑐟𑑂𑐫𑐵𑐢𑐸𑐣𑐶𑐎 𑐥𑑂𑐬𑐰𑐶𑐢𑐶𑐫𑐵 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐀𑐟𑑂𑐫𑐵𑐢𑐸𑐣𑐶𑐎 𑐥𑑂𑐬𑐰𑐶𑐢𑐶𑐫𑐵 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐫𑐾𑑃 𑐩𑐴𑐵𑐣𑐐𑐬 𑐥𑐵𑐮𑐶𑐎𑐵 𑑒𑑐 𑐰𑐜𑐵𑐫𑐵 𑐥𑐬𑑀𑐥𑐎𑐵𑐬𑐫𑑂 𑐀𑐟𑑂𑐫𑐵𑐢𑐸𑐣𑐶𑐎 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 𑐳𑑄𑐔𑐵𑐮𑐣𑐫𑑂 𑐴𑑅𑐐𑐸 𑐡𑐸 𑑋 𑐰𑑄𑐐𑐸 𑐣𑐷𑐣𑑂𑐫𑐵𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 𑐡𑐸𑐐𑐸 𑐠𑐵𑐳𑐫𑑂 𑐴𑐾 𑐀𑐟𑑂𑐫𑐵𑐢𑐸𑐣𑐶𑐎 𑐔𑑅𑐧𑐶 𑐣𑐶𑐬𑑂𑐩𑐵𑐞 𑐫𑐵𑐣𑐵𑑅 𑐳𑑄𑐔𑐵𑐮𑐣𑐫𑑂 𑐴𑑅𑐐𑐸 𑐏𑑅 𑑋

𑐊𑐬𑑀𑐳𑐵𑐣 𑐳𑐳𑑂𑐚𑐾𑐣𑐾𑐰𑐮 𑐳𑑂𑐫𑐵𑐣𑐶𑐚𑐾𑐳𑐣𑐮𑐶𑐳𑐾𑐫𑐵 𑐳𑐴𑐎𑐵𑐬𑑂𑐫𑐫𑑂 𑐥𑐬𑑀𑐥𑐎𑐵𑐬𑐫𑐵 𑐳𑑂𑐟𑐬𑑀𑐣𑑂𑐣𑐟𑐶 𑐮𑐶𑐥𑐵 𑐀𑐥𑐵𑐒𑑂𑐐, 𑐰𑐵𑐟𑐵𑐰𑐬𑐞 𑐰 𑐮𑐿𑐒𑑂𑐐𑐶𑐎𑐩𑐿𑐟𑑂𑐬𑐷 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 𑐳𑑄𑐔𑐵𑐮𑐣𑐫𑑂 𑐴𑑅𑐐𑐸 𑐏𑑅 𑑋 𑐰𑐶𑐲𑑂𑐞𑐸𑐩𑐟𑐶 𑐏𑐸𑐳𑐶 𑐳𑐶𑐠𑐫𑑂 𑐄𑐐𑐸 𑐮𑐵𑐐𑐵 𑐖𑐸𑐫𑐵𑑅 𑐰𑐫𑐾 𑐰𑐣𑐾 𑐫𑐵𑐂𑐥𑐶𑑄 𑐣𑑂𑐫𑐹𑐣 𑐁𑐫 𑐡𑐸𑐥𑐶𑑄 𑐰𑑂𑐫𑐎𑑂𑐟𑐶𑐫𑐵 𑐳𑐴𑐖𑐟𑐵𑐫𑐵 𑐣𑐶𑑄𑐟𑐶𑑄 𑐔𑑅𑐧𑐶𑐫𑐵 𑐳𑑂𑐟𑐬𑑀𑐣𑑂𑐣𑐟𑐶 𑐫𑐵𑐣𑐵𑑅 𑐳𑑄𑐔𑐵𑐮𑐣𑐫𑑂 𑐴𑑅𑐐𑐸 𑐏𑑅 𑑋

𑐣𑑂𑐫𑐹𑐣 𑐁𑐫𑐫𑐵 𑐰𑐬𑑂𑐐𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐀𑐟𑑂𑐫𑐵𑐢𑐸𑐣𑐶𑐎 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶𑐫𑐵 𑐀𑐰𑐮𑑀𑐎𑐣 𑐫𑐵𑐣𑐵𑐡𑐶𑐳𑐾𑑄 𑐫𑐾𑑃 𑐩𑐴𑐵𑐣𑐐𑐬 𑐥𑑂𑐬𑐩𑐸𑐏 𑐧𑐵𑐮𑐾𑐣𑑂𑐡𑑂𑐬 𑐱𑐵𑐴 (𑐧𑐵𑐮𑐾𑐣𑑄) 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 𑐳𑑄𑐔𑐵𑐮𑐣 𑐰 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐩𑐴𑐵𑐣𑐐𑐬 𑐡𑐸𑐣𑐾 𑐳𑐦𑐮 𑐀𑐨𑑂𑐫𑐵𑐳𑐫𑐵𑐟 𑐩𑐾𑐩𑐾𑐐𑐸 𑐰𑐜𑐵𑐫𑑂 𑐣𑑄 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐣𑐵 𑐫𑑄𑐎𑐾𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐀𑐰𑐮𑑀𑐎𑐣 𑐮𑐶𑐥𑐵 𑐰𑐫𑑂𑐎𑐮𑑄 𑐮𑑅𑐫𑐵 𑐰𑑂𑐫𑐰𑐳𑑂𑐠𑐵, 𑐏𑐶 𑐔𑑂𑐰𑑅𑐫𑐵 𑐥𑑂𑐬𑐱𑑀𑐢𑐣 𑐥𑑂𑐬𑐞𑐵𑐮𑐷, 𑐰𑐵𑐟𑐶 𑐮𑑅 𑐩𑐸𑑄𑐎𑐾𑐐𑐸 𑐰𑐶𑐢𑐶 𑐮𑐐𑐵𑐫𑐟𑐫𑐵 𑐥𑐎𑑂𑐲𑐫𑑂 𑐰𑐶𑐱𑐾𑐲 𑐔𑐶𑐄𑐟𑐵𑑅 𑐟𑐫𑐵𑑅 𑐖𑐵𑐣𑐎𑐵𑐬𑐷 𑐣𑑄 𑐎𑐫𑐵𑐡𑐷𑐐𑐸 𑐏𑑅 𑑋

𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶𑐫𑐵 𑐀𑐰𑐮𑑀𑐎𑐣 𑐫𑐵𑐣𑐵𑐡𑐶𑐳𑐾𑑄 𑐩𑐾𑐫𑐬 𑐱𑐵𑐴𑑄 𑐔𑑅𑐧𑐶𑐂 𑐥𑑂𑐬𑐫𑑀𑐐 𑐖𑐹𑐐𑐸 𑐰𑐵𑐟𑐵𑐰𑐬𑐞𑐩𑐿𑐟𑑂𑐬𑐷 𑐥𑑂𑐬𑐰𑐶𑐢𑐶𑐫𑐵𑐟 𑐎𑐫𑐵𑑅 𑐟𑐳𑐎𑑄 𑐄𑐟𑑂𑐳𑐸𑐎𑐟𑐵𑐥𑐹𑐬𑑂𑐰𑐎 𑐔𑐶𑐄𑐟𑐵𑑅 𑐎𑑂𑐫𑐣𑐵𑐡𑐶𑐳𑐾𑑄 𑐔𑑅𑐧𑐶 𑐰𑑂𑐫𑐰𑐳𑑂𑐠𑐶𑐟 𑐖𑐹𑐐𑐸 𑐣𑐵𑐥𑑄 𑐫𑐾𑑃 𑐩𑐴𑐵𑐣𑐐𑐬 𑐡𑐸𑐣𑐾 𑐠𑐸𑐎𑐠𑑄𑐫𑐵 𑐔𑑅𑐧𑐶 𑐠𑐥 𑐣𑐶𑐬𑑂𑐩𑐵𑐞 𑐫𑐵𑐫𑐾𑐩𑐵𑑅𑐐𑐸 𑐢𑐵𑐬𑐞𑐵 𑐟𑐫𑐵𑐡𑐷𑐐𑐸 𑐏𑑅 𑑋
𑐰𑐫𑑂𑐎𑐮𑑄 𑐔𑑅𑐧𑐶𑐂 𑐥𑑂𑐬𑐫𑑀𑐐 𑐖𑐹𑐐𑐸 𑐰𑐵𑐟𑐶 𑐮𑑅𑐩𑐸𑑄𑐎𑐾𑐐𑐸 𑐰 𑐥𑐸𑐣𑑅𑐨𑐬𑐞 𑐥𑑂𑐬𑐰𑐶𑐢𑐶𑐫𑐵𑐟 𑐩𑐴𑐵𑐣𑐐𑐬𑐫𑐵 𑐥𑑂𑐬𑐟𑑂𑐫𑐾𑐎 𑐕𑐾𑑃𑐏𑐵𑐫𑑂 𑐣𑑄 𑐖𑐜𑐵𑐣 𑐫𑐵𑐫𑐾𑐟 𑐁𑐰𑐱𑑂𑐫𑐎 𑐧𑐖𑐾𑐚 𑐰𑐶𑐣𑐶𑐫𑑀𑐖𑐣 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐫𑐵𑐡𑐶𑐮 𑑋

𑑒𑑐 𑐰𑐜𑐵𑐀𑐢𑑂𑐫𑐎𑑂𑐲 𑐬𑐵𑐖𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬𑑄 𑐔𑑅𑐧𑐶𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐶𑐳𑐾𑑄 𑐰𑐜𑐵𑐰𑐵𑐳𑐷𑐫𑐵𑐟 𑐠𑐥 𑐳𑐸𑐰𑐶𑐢𑐵 𑐧𑐶𑐫𑐵 𑐰𑐣𑐾𑐐𑐸 𑐠𑑅𑐥𑐶𑐣𑐶𑐐𑐸 𑐖𑐶𑐩𑑂𑐩𑐾𑐰𑐵𑐬𑐷 𑐏𑑅 𑐢𑐵𑐳𑐾𑑄 𑐄𑐐𑐸 𑐠𑐵𑐳𑐫𑑂 𑐣𑑂𑐴𑐵𑐥𑐵 𑐡𑐸𑐐𑐸 𑐳𑐵𑐬𑑂𑐰𑐖𑐣𑐶𑐎 𑐔𑑅𑐧𑐶 𑐥𑑂𑐬𑐫𑑀𑐐 𑐫𑐵𑐫𑐾𑐟 𑐳𑐩𑐳𑑂𑐫𑐵 𑐖𑐸𑐂𑐰𑑄 𑐳𑐵𑐗𑐾𑐡𑐵𑐬𑐷 𑐖𑑂𑐫𑐵𑐗𑑂𑐰𑑅𑐥𑐵𑐏𑐾𑑄 𑐔𑑅𑐧𑐶𑐫𑐵 𑐳𑑂𑐟𑐬𑑀𑐣𑑂𑐣𑐟𑐶 𑐫𑐵𑐣𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐳𑐴𑐖 𑐬𑐸𑐥𑑄 𑐥𑑂𑐬𑐫𑑀𑐐 𑐫𑐵𑐫𑐾 𑐦𑐂𑐐𑐸 𑐠𑐸𑐎𑐠𑑄𑐫𑐵 𑐔𑑅𑐧𑐶𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐖𑑂𑐫𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵 𑐰𑐣𑐾𑐐𑐸 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐄𑐐𑐸 𑐔𑑅𑐧𑐶 𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐊𑐬𑑀𑐳𑐵𑐣𑑄 𑐁𑐟𑐎𑐫𑐵 𑐡𑐸𑐣𑐾 𑐄𑐎𑐠𑑄𑐫𑐵 𑐏𑐸𑐐𑐹 𑐀𑐟𑑂𑐫𑐵𑐢𑐸𑐣𑐶𑐎 𑐔𑑅𑐧𑐶 𑐣𑐶𑐬𑑂𑐩𑐵𑐞 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐊𑐬𑑀𑐳𑐵𑐣𑑄 𑐳𑐣𑑂 𑑒𑑐𑑒𑑐 𑐣𑐶𑐳𑐾𑑄 𑑒𑑐𑑒𑑒 𑐫𑐵 𑐡𑐸𑐣𑐾 𑐫𑐾𑑃 𑐩𑐴𑐵𑐣𑐐𑐬 𑐎𑑂𑐲𑐾𑐟𑑂𑐬𑐫𑑂 𑐥𑑂𑐫𑑄𑐐𑐹 𑐰 𑐫𑐮 𑐩𑐴𑐵𑐣𑐐𑐬 𑐎𑑂𑐲𑐾𑐟𑑂𑐬𑐫𑑂 𑐣𑐶𑐐𑐹 𑐀𑐟𑑂𑐫𑐵𑐢𑐸𑐣𑐶𑐎 𑐔𑑅𑐧𑐶 𑐣𑐶𑐬𑑂𑐩𑐵𑐞 𑐫𑐵𑐣𑐵𑑅 𑐳𑑄𑐔𑐵𑐮𑐣𑐫𑑂 𑐴𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐊𑐬𑑀𑐳𑐵𑐣𑐫𑐵 𑐥𑑂𑐬𑐩𑐸𑐏 𑐎𑐵𑐬𑑂𑐫𑐎𑐵𑐬𑐷 𑐥𑑂𑐬𑐎𑐵𑐱 𑐀𑐩𑐵𑐟𑑂𑐫𑐫𑐵𑐎𑐠𑑄 𑐠𑑅𑐥𑐶𑑄𑐳𑑄 𑐣𑐶𑐬𑑂𑐩𑐵𑐞 𑐫𑐵𑐣𑐵𑐐𑐸 𑐠𑐸𑐎𑐠𑑄𑐫𑐵 𑐔𑑅𑐧𑐶𑐂 𑐣𑑂𑐴𑐶𑑄 𑑑𑑐𑑐𑑐 𑐮𑐶𑐚𑐬 𑐦𑑀𑐴𑐬 𑐮𑑅 𑐥𑑂𑐬𑐱𑑀𑐢𑐣 𑐫𑐵𑐫𑐾𑐐𑐸 𑐎𑑂𑐲𑐩𑐟𑐵 𑐡𑐸 𑑋 𑐔𑑅𑐧𑐶𑐥𑐵𑐏𑐾𑑄 𑐥𑐶𑐴𑐵𑑄 𑐰𑐂𑐐𑐸 𑐐𑐸𑐐𑐸𑑄𑐎𑐠𑑄𑐫𑐵 𑐦𑑀𑐴𑐬 𑐔𑐵, 𑐮𑑅, 𑐦𑐫𑑂 𑐰𑐵 𑐩𑐾𑐐𑐸 𑐐𑐣𑑄 𑐣𑑄 𑐰𑐣𑐷 𑐩𑐏𑐸 𑑋 𑐄𑐎𑐶𑑄 𑐠𑑂𑐰 𑐥𑐹𑐬𑑂𑐞𑐬𑐸𑐥𑑄 𑐰𑐵𑐟𑐵𑐰𑐬𑐞𑐩𑐿𑐟𑑂𑐬𑐷 𑐖𑐹𑐐𑐸 𑐰𑐫𑑂𑐎𑑅𑐫𑐵 𑐢𑐵𑐥𑐹 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS