Read news in NepalBhasa text-- www.hamroschool.com BACK 𑐳𑑂𑐰𑐟𑐣𑑂𑐟𑑂𑐬 𑐩𑐾𑐫𑐬𑐟𑐫𑑂𑐟 𑐠𑐵𑐎𑐸𑐫𑐵 𑐰𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑑂𑐰𑐟𑐣𑑂𑐟𑑂𑐬 𑐩𑐾𑐫𑐬𑐟𑐫𑑂𑐟 𑐠𑐵𑐎𑐸𑐫𑐵 𑐰𑐮

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐰𑑄𑐐𑐸 𑐳𑑂𑐠𑐵𑐣𑐷𑐫 𑐣𑐶𑐬𑑂𑐰𑐵𑐔𑐣𑐫𑑂 𑐬𑐵𑐖𑐢𑐵𑐣𑐷 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐮𑐐𑐵𑐫𑐟 𑐡𑐾𑐫𑑂𑐫𑐵 𑐕𑐸𑑄 𑐩𑐴𑐟𑑂𑐰𑐥𑐹𑐬𑑂𑐞 𑐣𑐐𑐬𑐥𑐵𑐮𑐶𑐎𑐵𑐫𑑂 𑐳𑑂𑐰𑐟𑐣𑑂𑐟𑑂𑐬 𑐄𑐩𑑂𑐩𑐾𑐡𑐰𑐵𑐬𑐟𑐫𑑂𑐳𑑄 𑐩𑐾𑐫𑐬 𑐥𑐡 𑐟𑑂𑐫𑐵𑐎𑐹𑐐𑐸 𑐏𑑅𑐳𑐵𑑄 𑐁𑑅 𑐰𑐫𑐵𑑅 𑐢𑐵𑑅𑐳𑐵 𑐠𑑂𑐰 𑐳𑑂𑐰𑐟𑐣𑑂𑐟𑑂𑐬𑐟𑐫𑑂𑐟 𑐖𑑂𑐫𑐵 𑐫𑐵𑐫𑐾𑐟 𑐠𑐵𑐎𑐸𑐫𑐵 𑐰𑐂𑐐𑐸 𑐳𑑄𑐎𑐾𑐟 𑐥𑐶𑐴𑐵𑑄 𑐰𑑅𑐐𑐸 𑐡𑐸 𑑋 𑐰𑐫𑑂𑐎𑑅𑐥𑐶𑑄 𑐩𑐾𑐫𑐬 𑐥𑐡𑐫𑑂 𑐧𑐴𑐵𑐮𑐷 𑐖𑐹𑐐𑐸 𑑑𑑐𑑐 𑐣𑑂𑐴𑐸 𑐎𑑂𑐫𑐣𑐾 𑐣𑑂𑐴𑑂𑐫𑑅 𑐴𑐾 𑐠𑐖𑑂𑐫𑐵𑑅𑐐𑐸 𑐳𑑄𑐎𑐚𑐫𑐵 𑐳𑑄𑐎𑐾𑐟 𑐏𑐣𑐾 𑐡𑐫𑐵 𑐰𑑅𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐥𑐡𑐫𑑂 𑐳𑑂𑐰𑐟𑐣𑑂𑐟𑑂𑐬𑑄 𑐟𑑂𑐫𑐵𑑅𑐩𑑂𑐴 𑐧𑐵𑐮𑐾𑐣𑑂𑐡𑑂𑐬 𑐳𑐵𑐴𑐫𑐵𑐟 𑐠𑑁𑑄𑐎𑐣𑑂𑐴𑐫𑑂 𑐦𑑀𑐴𑑀𑐬𑐫𑐵 𑐳𑐩𑐳𑑂𑐫𑐵𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐥𑐶𑐬𑐾 𑐫𑐵𑐣𑐵 𑐴𑑅𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐩𑐟𑐐𑐞𑐣𑐵𑐫𑑂 𑐠𑑅 𑐣𑑂𑐴𑑂𑐫𑑅𑐣𑐾 𑐮𑐵𑐫𑐾𑐰𑑄 𑐴𑐾 𑐦𑑀𑐴𑑀𑐬𑐫𑐵 𑐳𑐩𑐳𑑂𑐫𑐵 𑐣𑐶𑑄 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐢𑐎𑐵𑑅 𑐥𑐴𑐮 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵𑑄 𑐁𑑅 𑐰𑐫𑐵𑑅 𑐠𑑂𑐰 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐖𑐸𑐂𑐐𑐸 𑐳𑐶𑐧𑐾𑑄 𑐣𑑄 𑐗𑐣 𑐳𑑂𑐰𑐟𑐸𑐩𑐟𑐸 𑐳𑑂𑐰𑐫𑐵 𑐰𑐣𑐷𑐐𑐸 𑐳𑑄𑐎𑐾𑐟 𑐏𑐣𑐾 𑐡𑐫𑐵 𑐰𑑅𑐐𑐸 𑐡𑐸 𑑋

𑐥𑐸𑐮𑐵𑑄𑐐𑐸 𑐮𑑂𑐫𑐵𑐞𑑂𑐜𑐦𑐶𑐮 𑐳𑐵𑐂𑐚 𑐳𑐶𑐳𑐜𑑀𑐮𑐫𑑂 𑐁𑑅 𑐦𑑀𑐴𑑀𑐬 𑐰𑐵𑐫𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸𑐳𑐵 𑐣𑑂𑐴𑐹𑐐𑐸 𑐮𑑂𑐫𑐵𑐞𑑂𑐜𑐦𑐶𑐮 𑐳𑐵𑐂𑐚 𑐧𑐘𑑂𑐔𑐬𑐾𑐜𑐵𑑃𑐜𑐵𑐫𑐵 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐦𑑀𑐴𑑀𑐬 𑐰𑐵𑐎𑐾 𑐧𑐷 𑐩𑐏𑐸 𑐢𑐎𑐵𑑅 𑐥𑐣𑐵 𑐧𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐣𑐶𑐠𑐵𑐳𑑄 𑐦𑑀𑐴𑑀𑐬 𑐰𑐵𑐫𑐾 𑐩𑐦𑐸𑐐𑐸 𑐎𑐵𑐬𑐞𑑄 𑐫𑐾𑑃𑐫𑑂 𑐴𑐵𑐣𑑄 𑐠𑐵𑐫𑑂𑐠𑐵𑐳𑐫𑑂 𑐦𑑀𑐴𑑀𑐬 𑐡𑑂𑐰𑑃 𑐔𑐶𑐣𑐾𑐐𑐸 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐦𑑀𑐴𑑀𑐬𑐫𑐵 𑐳𑐩𑐳𑑂𑐫𑐵𑑄 𑐫𑐵𑐣𑐵𑑅 𑐩𑐾𑐫𑐬 𑐳𑐵𑐴 𑐠𑑁𑑄𑐎𑐣𑑂𑐴𑐫𑑂 𑐟𑐳𑐎𑑄 𑐟𑐣𑐵𑐰𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐩𑐣𑐥𑐵𑐫𑐵 𑐎𑐬𑑂𑐩𑐔𑐵𑐬𑐷𑐟𑐫𑑂𑐳𑑄 𑐢𑐫𑐵𑐴𑑅𑐐𑐸 𑐡𑐸 𑑋

𑐩𑐣𑐥𑐵 𑐳𑐹𑐟𑑂𑐬𑐫𑐵 𑐎𑐠𑑄 𑐩𑐾𑐫𑐬 𑐳𑐵𑐴𑑄 𑐁𑑅 𑐟𑐎 𑐕𑐸𑑄 𑐣𑑄 𑐣𑑂𑐴𑐹𑐐𑐸 𑐫𑑀𑐖𑐣𑐵 𑐁𑐬𑐩𑑂𑐨 𑐫𑐵𑐣𑐵𑐡𑐷𑐐𑐸 𑐩𑐡𑐸𑐣𑐶 𑑋 𑐰𑐫𑑂𑐎𑑅 𑐣𑑂𑐴𑐹𑐐𑐸 𑐖𑑂𑐫𑐵 𑐱𑐸𑐬𑐸 𑐫𑐵𑐫𑐾𑐐𑐸 𑐳𑐶𑐧𑐾𑑄 𑐣𑑄 𑐐𑐧𑐮𑐾𑑄 𑐫𑐩 𑐧𑐸𑐡𑑂𑐢𑐫𑐵 𑐗𑑂𑐰𑐵𑐟𑐵 𑐰 𑐐𑐧𑐮𑐾𑑄 𑐰𑐖𑑂𑐬𑐵𑐔𑐵𑐬𑑂𑐫 𑐳𑐩𑐸𑐡𑐵𑐫𑐫𑐵 𑐩𑐸𑐎𑐸𑐚𑐫𑐵 𑐎𑐵𑐬𑐞𑑄 𑐰𑐶𑐰𑐵𑐡𑐫𑑂 𑐮𑐵𑐫𑐾𑐐𑐸 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐄𑐏𑐾 𑐢𑐬𑐵𑐣 𑐄𑐥𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑑄 𑐳𑑂𑐰𑐟𑐣𑑂𑐟𑑂𑐬𑑄 𑐟𑑂𑐫𑐵𑑅𑐩𑑂𑐴 𑐩𑐾𑐫𑐬 𑐴𑐬𑑂𑐎 𑐳𑐵𑐩𑑂𑐥𑐵𑐒𑐫𑐵𑐟 𑐢𑐩𑐵𑐢𑐩 𑐖𑑂𑐫𑐵 𑐫𑐵𑐫𑐾𑐟 𑐠𑐵𑐎𑐸𑐫𑐵 𑐰𑑅𑐐𑐸 𑐡𑐸 𑑋 𑐠𑑁𑑄𑐎𑐣𑑂𑐴𑐫𑑂 𑐎𑐵𑐬𑑂𑐫𑐥𑐵𑐮𑐶𑐎𑐵𑐫𑐵 𑐧𑐿𑐛𑐎 𑐔𑑂𑐰𑑄𑐎𑑂𑐰𑐥𑐟𑐶𑐎𑑄 𑐰𑐶𑐰𑐵𑐡 𑐖𑐸𑐂𑐐𑐸 𑐎𑐵𑐬𑐞𑑄 𑐫𑐵𑐣𑐵𑑅 𑐩𑐾𑐫𑐬 𑐳𑐵𑐩𑑂𑐥𑐵𑐒𑐫𑐵 𑐣𑑄 𑐟𑐣𑐵𑐰 𑐱𑐸𑐬𑐸 𑐖𑐹𑐐𑐸 𑐡𑐸 𑑋

𑐩𑑂𑐴𑐶𑐐𑑅 𑐊𑐩𑐵𑐮𑐾𑐫𑐵 𑐰𑐜𑐵 𑐀𑐢𑑂𑐫𑐎𑑂𑐲𑐟𑐫𑑂𑐳𑑄 𑐧𑐿𑐛𑐎 𑐧𑐴𑐶𑐲𑑂𑐎𑐵𑐬 𑐫𑐵𑐫𑐾𑐰𑑄 𑐎𑐵𑐬𑑂𑐫𑐥𑐵𑐮𑐶𑐎𑐵𑐫𑐵 𑐧𑐿𑐛𑐎 𑐟𑐎𑑄 𑐔𑑂𑐰𑐣𑐾 𑐩𑐦𑐸𑐟 𑑋 𑐩𑐾𑐫𑐬 𑐴𑐬𑑂𑐎 𑐳𑐵𑐩𑑂𑐥𑐵𑐒𑑄 𑐧𑐿𑐛𑐎 𑐧𑐴𑐶𑐲𑑂𑐎𑐵𑐬 𑐫𑐵𑐫𑐾𑐩𑐵𑑅𑐐𑐸 𑐎𑐵𑐬𑐞 𑐕𑐸 𑐏𑑅 𑐢𑐎𑐵𑑅 𑐣𑑂𑐫𑑄𑐐𑐸 𑐏𑑅𑐳𑐵𑑄 𑐰𑐜𑐵 𑐀𑐢𑑂𑐫𑐎𑑂𑐲𑐟𑐫𑑂𑐳𑑄 𑐕𑐸𑑄 𑐮𑐶𑐳𑑅 𑐩𑐧𑐷𑐰𑑄 𑐧𑐿𑐛𑐎 𑐳𑐘𑑂𑐔𑐵𑐮𑐣 𑐫𑐵𑐫𑐾 𑐩𑐦𑐸𑐐𑐸 𑐏𑑅 𑑋 𑐢𑐬𑐵𑐣𑐫𑑂 𑐊𑐩𑐵𑐮𑐾 𑐰𑐜𑐵 𑐀𑐢𑑂𑐫𑐎𑑂𑐲𑐟𑐫𑑂 𑐧𑐴𑐸𑐩𑐟 𑐡𑐸 𑑋 𑐧𑐿𑐛𑐎𑐫𑑂 𑐕𑐸𑑄 𑐃 𑐣𑑂𑐴𑑂𑐫𑑅 𑐧𑐶𑐳𑐶𑐄𑑃 𑐰𑑄𑐐𑐸 𑐧𑐬𑐵𑐴 𑐳𑐴𑐎𑐵𑐬𑐷 𑐧𑐵𑐬𑐾 𑐣𑑄 𑐳𑐴𑐮𑐴 𑐫𑐵𑐫𑐾𑐐𑐸 𑐐𑑂𑐰𑐳𑐵𑑅 𑐡𑐸𑐐𑐸 𑐏𑑅 𑑋 𑐧𑐬𑐵𑐴 𑐳𑐴𑐎𑐵𑐬𑐷 𑐧𑐶𑐳𑐶𑐄𑑃 𑐏𑑃𑐫𑑂 𑐄𑐥𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐰𑐵𑐳𑑂𑐟𑐵 𑐩𑐫𑐵𑑅 𑐢𑐵𑐳𑐾𑑄 𑐣𑐶𑐎𑑂𑐲𑐾𑐥𑐎𑐬𑑂𑐟𑐵𑐟𑐫𑑂𑐳𑑄 𑐩𑐾𑐫𑐬 𑐳𑐵𑐩𑑂𑐥𑐵𑐒 𑐰𑐶𑐬𑐸𑐡𑑂𑐢 𑐣𑐵𑐬𑐵𑐧𑐵𑐖𑐷 𑐫𑐵𑐳𑐾𑑄 𑐖𑑂𑐫𑐵𑐎𑐸𑐠𑐶𑐂 𑐟𑑀𑐜𑐦𑑀𑐜 𑐳𑐩𑐾𑐟 𑐫𑐵𑑅𑐐𑐸 𑐏𑑅 𑑋
𑐊𑐩𑐵𑐮𑐾 𑐰𑐜𑐵 𑐀𑐢𑑂𑐫𑐎𑑂𑐲𑐟𑐫𑑂𑐐𑐸 𑐧𑐿𑐛𑐎 𑐧𑐴𑐶𑐲𑑂𑐎𑐵𑐬 𑐮𑐶𑐥𑐵 𑐩𑐾𑐫𑐬 𑐳𑐵𑐩𑑂𑐥𑐵𑐒𑑄 𑐊𑐩𑐵𑐮𑐾𑑄 𑐠𑑂𑐰 𑐛𑐷𑐎 𑐩𑐫𑐵𑑅𑐐𑐸 𑐰 𑐠𑐸𑐎𑐶𑑄 𑐢𑐬𑐵𑐣𑐫𑐵 𑐰𑐶𑐎𑐵𑐳𑐫𑑂 𑐮𑐶𑐔𑑂𑐰𑑅 𑐮𑐵𑐎𑐷𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐠𑑂𑐰𑐴𑐾 𑐗𑑂𑐰𑐮𑐫𑑂 𑐥𑑂𑐬𑐩𑐸𑐏 𑐥𑑂𑐬𑐟𑐶𑐥𑐎𑑂𑐲𑐷 𑐣𑐾𑐎𑐥𑐵 (𑐊𑐩𑐵𑐮𑐾) 𑐫𑐵 𑐀𑐢𑑂𑐫𑐎𑑂𑐲 𑐎𑐾𑐥𑐷 𑐌𑐮𑐷𑑄 𑐳𑑂𑐰𑐟𑐣𑑂𑐟𑑂𑐬𑐟𑐫𑑂𑐳𑑄 𑐣𑐶𑐣𑑂𑐴𑐸 𑐥𑑂𑐫𑐣𑑂𑐴𑐸 𑐩𑐣𑑀𑐬𑐘𑑂𑐖𑐣 𑐫𑐵𑑅 𑐰𑐫𑐾𑐰𑑄 𑐟𑐸𑑄 𑐡𑐾𑐱 𑐰𑐶𑐎𑐵𑐳 𑐖𑐸𑐂 𑐩𑐏𑐸 𑐢𑐫𑐵𑐡𑐷𑐐𑐸 𑐡𑐸 𑑋 𑐥𑐵𑐬𑑂𑐚𑐷𑐫𑐵 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐰𑐶𑐔𑐵𑐬 𑐰 𑐐𑐣𑑂𑐟𑐰𑑂𑐫 𑐧𑐶𑐣𑐵𑑅 𑐳𑑂𑐰𑐟𑐣𑑂𑐟𑑂𑐬 𑐖𑐸𑐫𑐵𑑅 𑐡𑐾𑐱 𑐰𑐶𑐎𑐵𑐳 𑐫𑐵𑐫𑐾 𑐩𑐦𑐂𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS