Read news in NepalBhasa text-- www.hamroschool.com BACK 𑐕𑐰𑐵𑑅𑐫𑑄𑐎𑑄 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐡𑐶𑐰𑐳 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐕𑐰𑐵𑑅𑐫𑑄𑐎𑑄 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐡𑐶𑐰𑐳

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐠𑐸𑐐𑐸𑐳𑐷 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐡𑐶𑐰𑐳 𑐕𑐰𑐵𑑅𑐫𑑄𑐎𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑐣𑐷𑐐𑐸 𑐖𑐹𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂 𑐳𑑄𑐑𑐳𑑄𑐳𑑂𑐠𑐵𑑄 𑐩𑑄𑐎𑐵𑑅𑐎𑐠𑑄 𑐕𑐰𑐵𑑅𑐟𑐎 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐴𑐣𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑𑐫𑐵 𑐖𑑂𑐫𑐵𑐎𑐸𑐠𑐶𑐂 𑐖𑐹𑐐𑐸 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐠𑐸𑐐𑐸𑐳𑐷 ‘𑑒𑑘 𑐎𑑂𑐰𑑅𑐐𑐸 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐡𑐶𑐰𑐳’ 𑐣𑑂𑐴𑐵𑐥𑐵𑐮𑐶𑐥𑐵 𑐠𑐾𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑐣𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐩𑐴𑐵𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐐𑑂𑐫𑐵𑐮𑑂𑐖𑐾𑐣 𑐱𑐾𑐬𑑂𑐥𑐵𑑄 𑐰𑐶𑐐𑐟𑐫𑐵 𑐡𑑃𑐫𑑂 𑐠𑐾𑑄 𑐠𑐸𑐐𑐸𑐳𑐷 𑐣𑑄 𑐩𑐴𑐵𑐳𑑄𑐑𑐫𑐵 𑐣𑐾𑐟𑐺𑐟𑑂𑐰𑐫𑑂 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂 𑐳𑑄𑐑𑐳𑑄𑐳𑑂𑐠𑐵𑑄 𑐩𑑄𑐎𑐵𑑅𑐎𑐠𑑄 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐡𑐶𑐰𑐳 𑐴𑐣𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑑋

𑐩𑐴𑐵𑐳𑑄𑐑𑑄 𑐄𑐟𑑂𑐳𑐰𑐫𑐵 𑐬𑐸𑐥𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐡𑐶𑐰𑐳 𑐴𑐣𑐾𑐐𑐸 𑐀𑐢𑑂𑐫𑐎𑑂𑐲 𑐱𑐾𑐬𑑂𑐥𑐵𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐳𑑄 𑐟𑐵𑑅 𑐃𑐟𑐎 𑐁𑐣𑑂𑐡𑑀𑐮𑐣 𑐫𑐵𑑅𑐳𑐵𑑄 𑐄𑐥𑐮𑐧𑑂𑐢𑐶 𑐥𑑂𑐬𑐵𑐥𑑂𑐟 𑐩𑐖𑐹𑐐𑐸 𑐣𑐵𑐥𑑄 𑐀𑐢𑐶𑐎𑐵𑐬𑐫𑐵 𑐳𑐸𑐣𑐶𑐱𑑂𑐔𑐶𑐟𑐟𑐵 𑐣𑑄 𑐖𑐸𑐂 𑐩𑐦𑐸𑐐𑐸𑐮𑐶𑑄 𑐄𑐟𑑂𑐳𑐰𑐫𑐵 𑐬𑐸𑐥𑐫𑑂 𑐀𑐢𑐶𑐎𑐵𑐬 𑐳𑐸𑐣𑐶𑐱𑑂𑐔𑐶𑐟𑐟𑐵𑐫 𑐣𑐶𑑄𑐟𑐶𑑄 𑐡𑐧𑐵𑐰 𑐧𑐷𑐐𑐸 𑐮𑑂𑐫𑐵𑐏𑑄 𑐕𑐰𑐵𑑅𑐫𑑄𑐎𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐳𑐵𑐄𑐣 𑑒𑑔 𑐐𑐟𑐾 𑐡𑐶𑐰𑐳𑐫𑐵 𑐩𑐹𑐮 𑐳𑐩𑐵𑐬𑑀𑐴𑐫𑐵 𑐖𑑂𑐫𑐵𑐗𑑂𑐰𑑅 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑑂 𑐫𑐵𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵 𑐗𑐵𑐫𑐵𑐡𑐷𑐐𑐸 𑐖𑐹𑐐𑐸 𑐡𑐸 𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐁𑐡𑐶𑐰𑐵𑐳𑐷 𑐡𑐶𑐰𑐳𑐫𑐵 𑐴𑐾 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐩𑐴𑐵𑐳𑑄𑐑𑐥𑐵𑐏𑐾𑑄 𑐳𑐩𑑂𑐧𑐣𑑂𑐢𑐣 𑐥𑑂𑐬𑐵𑐥𑑂𑐟 𑐳𑑄𑐑𑐳𑑄𑐳𑑂𑐠𑐵 𑐰 𑐣𑑂𑐴𑐫𑑂𑐐𑐹 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂 𑐳𑑄𑐳𑑂𑐠𑐵𑐫𑐵 𑐣𑐾𑐟𑐺𑐟𑑂𑐰𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑐳𑐵𑐄𑐣 𑑒𑑐 𑐐𑐟𑐾 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐔𑐮𑐔𑐶𑐟𑑂𑐬 𑐩𑐴𑐵𑐳𑑄𑐑𑑄 𑐥𑐬𑑂𑐫𑐚𑐣 𑐧𑑀𑐬𑑂𑐜𑐫𑑂 ‘𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐳𑑄𑐎𑐶𑐥𑐵 𑐎𑑂𑐫𑐣𑐾𑐐𑐸 𑐰 𑐰𑐶𑐱𑐾𑐲 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐳𑐵𑐄𑐣 𑑒𑑑 𑐐𑐟𑐾 𑐁𑐡𑐶𑐰𑐵𑐳𑐷 𑐖𑐣𑐖𑐟𑐶 𑐩𑐴𑐶𑐮𑐵 𑐩𑐴𑐵𑐳𑑄𑐑𑑄 ‘𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐖𑑂𑐘𑐵𑐣𑐫𑐵 𑐳𑑄𑐬𑐎𑑂𑐲𑐞 𑐰 𑐥𑐸𑐸𑐳𑑂𑐟𑐵𑐣𑑂𑐟𑐬𑐞𑐫𑑂 𑐁𑐡𑐶𑐰𑐵𑐳𑐷 𑐩𑐶𑐳𑐵𑐟𑐫𑑂 𑐨𑐹𑐩𑐶𑐎𑐵’ 𑐰𑐶𑐲𑐫𑐎 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐳𑐵𑐄𑐣 𑑒𑑑 𑐐𑐟𑐾 𑐴𑐾 𑐣𑐾𑐥𑐵𑐮 𑐩𑐐𑐬 𑐳𑑄𑐑𑑄 ‘𑐩𑐐𑐬𑐵𑐟 𑐳𑐨𑑂𑐫𑐟𑐵𑐫𑑂 𑐥𑐴𑐶𑐔𑐵𑐣𑐫𑐵 𑐁𑐢𑐵𑐬 𑐰𑐶𑐲𑐫𑐎 𑐰𑐶𑐔𑐵𑐬 𑐐𑑀𑐲𑑂𑐛𑐷, 𑐳𑐵𑐄𑐣 𑑒𑑒 𑐐𑐟𑐾 𑐎𑐶𑐬𑐵𑐟 𑐬𑐵𑐃 𑐫𑐵𑐫𑑀𑐎𑑂𑐏𑐵𑑄 ‘𑑓𑑕𑐍𑑄 𑐳𑑂𑐠𑐵𑐥𑐣𑐵 𑐡𑐶𑐰𑐳 𑐰 𑐥𑑂𑐬𑐡𑐾𑐱 𑐣𑑄. 𑑑 𑐎𑐶𑐬𑐵𑐟 𑐥𑑂𑐬𑐡𑐾𑐱’ 𑐰𑐶𑐲𑐫𑐫 𑐧𑐴𑐳, 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 (𑐦𑑀𑐣𑐶𑐖𑑄) 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐡𑐶𑐰𑐳 𑐰 𑑒𑑓 𑐎𑑂𑐰𑑅𑐐𑐸 𑐳𑑂𑐠𑐵𑐥𑐣𑐵 𑐡𑐶𑐰𑐳𑐫𑐵 𑐳𑐣𑑂𑐡𑐬𑑂𑐨𑐫𑑂 ‘𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐁𑐣𑑂𑐡𑑀𑐮𑐣𑐲 𑐳𑐩𑐷𑐎𑑂𑐲𑐵 𑐰 𑐁𑑅𑐫𑐵 𑐎𑐵𑐬𑑂𑐫𑐡𑐶𑐱𑐵’ 𑐰𑐶𑐲𑐫𑐫𑑂 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐠𑐸𑐎𑐠𑑄 𑐴𑐾 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐫𑐸𑐰𑐵 𑐩𑐴𑐵𑐳𑑄𑐑𑑄 𑐳𑐵𑐄𑐣 𑑒𑑘 𑐐𑐟𑐾 ‘𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐫𑐵 𑐩𑐸𑐸𑐡𑑂𑐢𑐵𑐫𑑂 𑐁𑐢𑐵𑐬𑐶𑐟 𑐣𑐾𑐟𑐺𑐟𑑂𑐰 𑐣𑐶𑐬𑑂𑐩𑐵𑐞’ 𑐰𑐶𑐲𑐫 𑐟𑐵𑐮𑐶𑐩 𑐳𑑄𑐔𑐵𑐮𑐣 𑐫𑐵𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐂𑐣𑑂𑐜𑐶𑐖𑐶𑐣𑐶𑐫𑐳 𑐚𑐾𑐮𑐶𑐨𑐶𑐖𑐣𑑄 𑐕𑐰𑐵𑑅𑐫𑑄𑐎𑑄 𑐴𑐾 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐫𑐵 𑐳𑐰𑐵𑐮𑐫𑑂 𑐧𑐴𑐳 𑐖𑑂𑐫𑐵𑐗𑑂𑐰𑑅 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋
𑐠𑐸𑐐𑐸𑐳𑐷 𑐰𑐂𑐐𑐸 𑐀𑐐𑐲𑑂𑐚 𑑙 𑐎𑐸𑐣𑑂𑐴𑐸 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐡𑐶𑐰𑐳 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐳𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐠𑑂𑐰 𑐡𑐶𑐰𑐳 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS