Read news in NepalBhasa text-- www.hamroschool.com BACK 𑐔𑐷𑐣—𑐟𑐵𑐂𑐰𑐵𑐣 𑐟𑐣𑐵𑐰, 𑐫𑐸𑐡𑑂𑐢𑐫𑐵 𑐏𑐟𑐬𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐔𑐷𑐣—𑐟𑐵𑐂𑐰𑐵𑐣 𑐟𑐣𑐵𑐰, 𑐫𑐸𑐡𑑂𑐢𑐫𑐵 𑐏𑐟𑐬𑐵

𑐔𑐶𑐣𑐶𑐫𑐵 𑐖𑐣𑐩𑐸𑐎𑑂𑐟𑐶 𑐳𑐾𑐣𑐵𑑄 𑐟𑐵𑐂𑐰𑐵𑐣 𑐚𑐵𑐥𑐹𑐫𑐵 𑐕𑐔𑐵𑑅𑐮𑐶𑑄 𑐳𑐿𑐣𑐶𑐎 𑐀𑐨𑑂𑐫𑐵𑐳 𑐣𑑂𑐴𑑂𑐫𑐵𑐎𑐹𑐐𑐸 𑐏𑑃𑐫𑑂 𑐔𑐷𑐣𑑄 𑐥𑐶𑐴𑐵𑑄 𑐰𑐂𑐐𑐸 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂𑐫𑐵 𑐣𑑂𑐴𑐶𑐥𑑁 𑐐𑑂𑐮𑑀𑐧𑐮 𑐚𑐵𑐂𑐩𑑂𑐳𑐫𑑂 ‘𑐊𑐎𑐷𑐎𑐬𑐞 𑐎𑐵𑐬𑐰𑐵𑐴𑐷𑐫𑐵 𑐥𑐹𑐬𑑂𑐰𑐵𑐨𑑂𑐫𑐵𑐳’ 𑐱𑐷𑐬𑑂𑐲𑐎 𑐟𑐫𑐵𑑅 𑐧𑐸𑐏𑑃 𑐥𑐶𑐠𑑄𑐐𑐸 𑐡𑐸 𑑋 𑐣𑐵𑐥𑑄 𑐱𑐷𑐬𑑂𑐲𑐎𑐫𑑂 𑐴𑐾 𑐄𑐐𑐸 𑐚𑐵𑐥𑐹𑐂 𑐕𑐔𑐵𑑅𑐮𑐶𑑄 𑐥𑑄𑐐𑑅 𑐠𑐣𑐾𑐐𑐸 𑐏𑑃 𑐬𑐸𑐚𑐶𑐣 𑐴𑐾 𑐖𑐸𑐂 𑐢𑐎𑐵𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐠𑐸𑐐𑐸 𑐳𑐿𑐣𑐶𑐎 𑐀𑐨𑑂𑐫𑐵𑐳 𑐟𑐵𑐂𑐰𑐵𑐣𑐫𑐵 𑐨𑐹𑐩𑐶𑑄 𑑙 𑐣𑐚𑐶𑐎𑐮 𑐩𑐵𑐂𑐮 𑐀𑐬𑑂𑐠𑐵𑐟𑑂 𑑑𑑖 𑐐𑐹𑐟𑑂𑐫𑐵 𑐎𑐶𑐮𑑀𑐩𑐶𑐚𑐬 𑐖𑑅𑐏𑑅 𑐟𑐵𑐥𑐵𑐎 𑐔𑑂𑐰𑐣𑐵𑑅 𑐖𑐸𑐫𑐵𑐔𑑂𑐰𑑄𑐐𑐸 𑐢𑐵𑑅𑐐𑐸 𑐡𑐸 𑑋 𑐟𑐵𑐂𑐰𑐵𑐣𑑄 𑐠𑑅𑐥𑐶𑐣𑐶𑐐𑐸 𑐴𑐰𑐵𑐃 𑐎𑑂𑐲𑐾𑐟𑑂𑐬 𑐡𑐸𑐣𑐾 𑐔𑐶𑐣𑐶𑐫𑐵 𑐮𑐜𑐵𑐎𑐸 𑐰𑐶𑐩𑐵𑐣 𑐡𑐸𑐴𑐵𑑄 𑐰𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐟𑐵𑐂𑐰𑐵𑐣 𑐠𑑅𑐥𑐶𑐳𑑄 𑐥𑐬𑐶𑐳𑑂𑐠𑐶𑐟𑐶𑐫𑐵 𑐀𑐣𑐸𑐐𑐩𑐣 𑐫𑐵𑐣𑐵𑐔𑑂𑐰𑐣𑐵𑐐𑐸 𑐢𑐵𑐳𑐾𑑄 𑐖𑐣𑐟𑐵𑐫𑐵𑐟 𑐳𑐟𑐬𑑂𑐎 𑐖𑐸𑐫𑐵𑐔𑑂𑐰𑐣𑐾𑐟 𑐢𑐵𑑅𑐐𑐸 𑐡𑐸 𑑋 ‘𑐟𑐵𑐂𑐰𑐵𑐣 𑐚𑐵𑐂𑐩𑑂𑐳’𑐫𑐵 𑐎𑐠𑑄 𑐀𑐣𑐫𑐵 𑐟𑐵𑐌𑐫𑐸𑐁𑐣 𑐰𑐶𑐩𑐵𑐣𑐳𑑂𑐠𑐮𑑄 𑐖𑐸𑐂𑐐𑐸 𑑕𑑑 𑐐𑐹 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐄𑐜𑐵𑐣 𑐬𑐡𑑂𑐡 𑐳𑐸𑐔𑑄 𑐧𑐸𑐢𑐰𑐵𑑅 𑐴𑐾 𑐥𑐶𑐎𑐵𑑅𑐐𑐸 𑐡𑐸 𑑋 𑐠𑐸𑐎𑐠𑑄 𑐄𑐐𑐸 𑐮𑐵𑐐𑐵𑐫𑑂 𑐳𑐩𑐸𑐡𑑂𑐬𑐷 𑐖𑐴𑐵𑐖 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵 𑐣𑑄 𑐡𑐶𑐄𑐐𑐸 𑐡𑐸 𑑋

𑐔𑐶𑐣𑐶𑐫𑐵 𑐐𑑂𑐮𑑀𑐧𑐮 𑐚𑐵𑐂𑐩𑑂𑐳𑐫𑐵 𑐎𑐠𑑄 𑐔𑐶𑐣𑐶𑐫𑐵 𑐳𑐿𑐣𑐶𑐎 𑐀𑐨𑑂𑐫𑐵𑐳𑐫𑐵 𑐖𑑂𑐫𑐵𑐫𑑂 𑐳𑐸𑐥𑐬𑐳𑑀𑐣𑐶𑐎 𑐡𑐶𑐊𑐦–𑑑𑑗 𑐩𑐶𑐳𑐵𑐂𑐮 𑐰 𑐖𑐾–𑑒𑑐 𑐳𑑂𑐠𑐾𑐮𑑂𑐚 𑐮𑐜𑐵𑐎𑐹 𑐖𑐾𑐚 𑐣𑑄 𑐕𑑂𑐫𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐶𑐣𑐶𑐫𑐵 𑐳𑐩𑐵𑐔𑐵𑐬 𑐳𑐩𑐶𑐟𑐶 ‘𑐳𑐶𑐣𑑂𑐴𑑂𑐰𑐵𑑄’ 𑐔𑐶𑐣𑐶𑐫𑐵 𑐖𑐣𑐩𑐸𑐎𑑂𑐟𑐶 𑐳𑐾𑐣𑐵𑐫𑐵 𑐥𑐹𑐬𑑂𑐰𑐷𑐫 𑐠𑐶𑐫𑐚𑐬 𑐎𑐩𑐵𑐞𑑂𑐜 𑐳𑐾𑐣𑐵𑑄 𑐏𑐸𑐐𑐹 𑐩𑐵𑐂𑐮 𑐟𑐵𑑅𑐴𑐵𑐎𑑅𑐐𑐸 𑐡𑐹𑐬𑐷𑐫𑐵 𑐩𑐶 𑐥𑐶𑐴𑐵𑑄 𑐰𑐂𑐐𑐸 𑐩𑐶𑐳𑐵𑐂𑐮 𑐟𑐵𑐂𑐰𑐵𑐣 𑐖𑐮𑐜𑐩𑐬𑐸𑐫𑐵 𑐥𑐹𑐬𑑂𑐰𑐥𑐵𑐏𑐾 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐠𑐵𑐳𑐫𑑂 𑐳𑐦𑐮𑐟𑐵𑐥𑐹𑐬𑑂𑐰𑐎 𑐎𑐫𑐾𑐎𑐹𑐐𑐸 𑐢𑐵𑑅𑐐𑐸 𑐡𑐸 𑑋 𑐠𑑂𑐰 𑐀𑐨𑑂𑐫𑐵𑐳 𑐁𑐂𑐟𑐰𑐵𑑅 𑐟𑐎 𑐣𑑂𑐴𑑂𑐫𑐵𑐂𑐐𑐸 𑐣𑑄 𑐢𑐵𑑅𑐐𑐸 𑐡𑐸 𑑋

𑐰𑑄𑐐𑐸 𑐩𑐐𑐮𑐰𑐵𑑅 𑐔𑐵𑐣𑑂𑐴𑐫𑑂 𑐀𑐣𑐫𑐵 𑐳𑑂𑐠𑐵𑐣𑐷𑐫 𑐃𑐎𑐠𑑄 𑐔𑐵𑐣𑑂𑐴𑐳𑐶𑐫𑐵 𑑑𑑑𑐟𑐵𑑅 (𑐗𑐷𑐠𑐵𑐫𑑂𑐫𑐵 𑐃 𑐎𑐠𑑄 𑐖𑑅𑐕𑐶𑐥𑐵𑑅 𑑙𑐟𑐵𑑅) 𑐂𑐮𑐫𑑂 𑐀𑐩𑐾𑐬𑐶𑐎𑐵𑐫𑐵 𑐎𑑂𑐰𑐫𑑂𑐫𑐵 𑐳𑐡𑐣 𑐴𑐵𑐄𑐳 𑐀𑐦 𑐬𑐶𑐥𑑂𑐬𑐶𑐖𑐾𑐣𑑂𑐚𑐾𑐚𑐶𑐨𑐫𑐵 𑐳𑐨𑐵𑐩𑐸𑐏 𑐣𑐵𑐣𑑂𑐳𑐷 𑐥𑐾𑐮𑑀𑐳𑐷 𑐟𑐵𑐂𑐰𑐵𑐣𑐫𑐵 𑐨𑑂𑐬𑐩𑐫𑑂 𑐰𑑄𑐐𑐸𑐮𑐶𑑄 𑐠𑑂𑐰 𑐳𑑂𑐠𑐶𑐟𑐶 𑐥𑐶𑐡𑑄𑐐𑐸 𑐏𑑅 𑑋 𑐀𑐩𑐾𑐬𑐶𑐎𑐵𑑄 𑐧𑐾𑐂𑐖𑐶𑐒𑑂𑐐𑐣𑐵𑐥 𑐴𑐾 𑐠𑑅𑐐𑐸 𑐍𑐥𑐔𑐵𑐬𑐶𑐎 𑐳𑑂𑐰𑐵𑐥𑐹 𑐡𑐫𑐾𑐎𑐵𑐟𑑅𑐐𑐸 𑐡𑐸 𑐰 𑐟𑐵𑐂𑐰𑐵𑐣𑐮𑐶𑐳𑐾𑐫𑐵 𑐳𑑂𑐰𑐵𑐥𑐹𑐫𑐵𑐟 𑐁𑐢𑐶𑐎𑐵𑐬𑐶𑐎 𑐩𑐏𑐸 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐥𑐟𑐶 𑐖𑑀 𑐧𑐵𑐂𑐜𑐾𑐣 𑐰𑐵 𑐴𑑂𑐰𑐵𑐂𑐚 𑐴𑐵𑐄𑐳𑑄 𑐠𑐸𑐐𑐸 𑐨𑑂𑐬𑐩𑐞 𑐫𑐵𑐫𑐾𑐩𑐟𑐾 𑐢𑐎𑐵𑑅 𑐢𑐵𑑅𑐐𑐸 𑐏𑑅, 𑐟𑐬 𑐰𑐣𑐾𑐐𑐸 𑐥𑐾𑐮𑑀𑐳𑐷𑐫𑐵 𑐀𑐢𑐶𑐎𑐵𑐬 𑐏𑑅 𑐢𑐎𑐵𑑅 𑐢𑐵𑐮 𑑋

𑐔𑐶𑐣𑐶𑐫𑐵 𑐬𑐵𑐲𑑂𑐚𑑂𑐬𑐥𑐟𑐶 𑐳𑐶 𑐖𑐶𑐣𑐥𑐶𑐒𑑂𑐐𑑄 𑐰𑑄𑐐𑐸 𑐖𑐸𑐮𑐵𑐂 𑑒𑑘 𑐟𑐵𑐬𑐶𑐏𑐎𑐸𑐣𑑂𑐴𑐸 𑐖𑐎 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐖𑑀 𑐧𑐵𑐂𑐜𑐾𑐣𑐫𑐵𑐟 𑐦𑑀𑐣 𑐫𑐵𑐣𑐵𑑅 𑐟𑐵𑐂𑐰𑐵𑐣𑐫𑑂 𑐐𑐸𑐐𑐸𑐎𑐠𑑄 𑐣𑑄 𑐩𑑂𑐴𑐶𑐟𑐾𑐐𑐸 𑐎𑐸𑐟𑑅 𑐫𑐵𑐫𑐾𑐩𑐟𑐾 𑐢𑐎𑐵𑑅 𑐏𑑂𑐫𑐵𑐔𑑂𑐰𑑅 𑐧𑐶𑐄𑐐𑐸 𑐏𑑃 𑐗𑐷𑐳𑑄 𑐧𑑂𑐰𑐣𑐵𑐐𑐸 𑐰 𑐣𑑂𑐫𑐣𑐵𑐐𑐸 𑐴𑐾 𑐏𑑅 𑑋 𑐟𑐬 𑐩𑐮𑐾𑐱𑐶𑐫𑐵𑐫𑐵 𑐨𑑂𑐬𑐩𑐞𑐫𑑂 𑐰𑐣𑐵𑐔𑑂𑐰𑑄𑐩𑑂𑐴 𑐀𑐩𑐾𑐬𑐶𑐎𑐷 𑐳𑐨𑐵𑐩𑐸𑐏 𑐥𑐾𑐮𑑀𑐳𑐷 𑐟𑐵𑐂𑐰𑐵𑐣𑐫𑑂 𑐰𑐣𑐾𑐟𑑂𑐫𑑄𑐐𑐸 𑐢𑐂𑐐𑐸 𑐏𑑃 𑐩𑑄𑐐𑐮𑐰𑐵𑑅 𑐳𑐸𑐠𑑄𑐣𑐶𑐳𑐾𑑄 𑐴𑐾 𑐥𑐶𑐴𑐵𑑄 𑐰𑐮 𑑋 𑐠𑐸𑐐𑐸 𑐨𑑂𑐬𑐩𑐞 𑐣𑑄 𑐫𑐵𑐫𑐾𑐩𑐟𑐾 𑐢𑐎𑐵𑑅 𑐔𑐷𑐣𑑄 𑐔𑐾𑐟𑐵𑐰𑐣𑐷 𑐖𑐵𑐬𑐷 𑐫𑐵𑐟 𑑋 𑐥𑐾𑐮𑑀𑐳𑐷 𑐟𑐵𑐂𑐥𑐾𑐂𑐫𑐵 𑐳𑑀𑐣𑐳𑐵𑐒𑑂𑐐 𑐰𑐶𑐩𑐵𑐣𑐳𑑂𑐠𑐮𑐫𑑂 𑐎𑐸𑐴𑐵𑑄 𑐰𑐫𑐾𑐰𑑄 𑐴𑐾 𑐔𑐶𑐣𑐶𑐫𑐵 𑐖𑐣𑐩𑐸𑐎𑑂𑐟𑐶 𑐳𑐾𑐣𑐵𑑄 𑐣𑑄 𑐕𑐐𑐹 𑐰𑐎𑑂𑐟𑐰𑑂𑐫 𑐖𑐵𑐬𑐷 𑐫𑐵𑐳𑐾𑑄 𑐠𑑅𑐥𑐶𑑄𑐳𑑄 𑐟𑐵𑐂𑐰𑐵𑐣𑐫𑐵 𑐖𑑅𑐏𑑅 𑐏𑐸𑐐𑐹 𑐠𑐵𑐳𑐫𑑂 𑐳𑐿𑐣𑐶𑐎 𑐀𑐨𑑂𑐫𑐵𑐳 𑐫𑐵𑐫𑐾𑐐𑐸 𑐖𑐸𑐂 𑐢𑐵𑐮 𑑋

𑐳𑐨𑐵𑐩𑐸𑐏 𑐣𑐵𑐣𑑂𑐳𑐷 𑐥𑐾𑐮𑑀𑐳𑐷 𑐣𑐾𑐟𑐺𑐟𑑂𑐰𑐫𑐵 𑐀𑐩𑐾𑐬𑐶𑐎𑐷 𑐳𑑄𑐳𑐡𑐫𑐵 𑐥𑑂𑐬𑐟𑐶𑐣𑐶𑐢𑐶𑐩𑐞𑑂𑐜𑐮𑐫𑐵 𑐟𑐵𑐂𑐰𑐵𑐣 𑐨𑑂𑐬𑐩𑐞𑐫𑐵 𑐗𑑂𑐰𑐮𑐫𑑂 𑐄𑐐𑐸 𑐥𑑂𑐬𑐟𑐶𑐣𑐶𑐢𑐶𑐩𑐞𑑂𑐜𑐮𑐥𑐵𑐏𑐾𑑄 𑐥𑐶𑐠𑑄𑐐𑐸 𑐰𑐎𑑂𑐟𑐰𑑂𑐫 𑐡𑐎𑐮𑐫𑑂 𑐣𑑂𑐴𑑂𑐫𑐠𑐣𑐾𑐧𑐴𑐐𑐸 𑐏𑑃 𑐏𑑅 𑑋 𑐠𑑂𑐰 𑐨𑑂𑐬𑐩𑐞 𑐀𑐩𑐾𑐬𑐶𑐎𑐵𑑄 𑐣𑐵𑐮𑐵𑐔𑑂𑐰𑑄𑐐𑐸 𑐂𑐣𑑂𑐜𑑀𑐥𑑂𑐫𑐵𑐳𑐶𑐦𑐶𑐎 𑐬𑐞𑐣𑐷𑐟𑐶 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐗𑑂𑐰𑐮𑐫𑑂 𑐴𑐾 𑐖𑐹𑐐𑐸 𑐏𑑅 𑐢𑐎𑐵𑑅 𑐳𑑂𑐥𑐲𑑂𑐚 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐄𑐎𑐷 𑐢𑐫𑐵𑐟𑑅𑐐𑐸 𑐡𑐸 ‘𑐖𑐶𑐩𑐶𑐐𑐸 𑐳𑑄𑐳𑐡𑐷𑐫 𑐥𑑂𑐬𑐟𑐶𑐣𑐶𑐢𑐶𑐩𑐞𑑂𑐜𑐮𑐫𑐵 𑐟𑐵𑐂𑐰𑐵𑐣 𑐨𑑂𑐬𑐩𑐞 𑐟𑐵𑐂𑐰𑐵𑐣𑐫𑐵 𑐖𑐷𑐰𑐣𑑂𑐟 𑐮𑑀𑐎𑐟𑐣𑑂𑐟𑑂𑐬𑐥𑑂𑐬𑐟𑐶 𑐀𑐩𑐾𑐬𑐶𑐎𑐵𑐫𑐵 𑐳𑐩𑐬𑑂𑐠𑐣 𑐎𑑂𑐫𑐣𑐷 𑑋 𑐖𑐶𑐩𑐶𑐐𑐸 𑐠𑑂𑐰 𑐨𑑂𑐬𑐩𑐞 𑐴𑐶𑐣𑑂𑐡𑐥𑑂𑐬𑐱𑐵𑐣𑑂𑐟 𑐎𑑂𑐲𑐾𑐟𑑂𑐬𑐫𑐵 𑐟𑐧𑑂𑐫𑐵𑐐𑐸 𑐨𑑂𑐬𑐩𑐞𑐫𑐵 𑐴𑐾 𑐀𑑄𑐐 𑐏𑑅 𑑋 𑐖𑐶𑐥𑐶 𑐟𑐵𑐂𑐰𑐵𑐣 𑐧𑐵𑐴𑐾𑐎 𑐣𑑄 𑐳𑐶𑑄𑐐𑐵𑐥𑐸𑐬, 𑐩𑐮𑐾𑐱𑐶𑐫𑐵, 𑐡𑐎𑑂𑐲𑐶𑐞 𑐎𑑀𑐬𑐶𑐫𑐵 𑐰 𑐖𑐵𑐥𑐵𑐣𑐫𑐵 𑐨𑑂𑐬𑐩𑐞𑐫𑑂 𑐡𑐸 𑑋 𑐠𑑂𑐰 𑐨𑑂𑐬𑐩𑐞 𑐁𑐥𑐳𑐷 𑐳𑐸𑐬𑐎𑑂𑐲𑐵, 𑐁𑐬𑑂𑐠𑐶𑐎 𑐳𑐵𑐗𑐾𑐡𑐵𑐬𑐷 𑐰 𑐳𑐸𑐱𑐵𑐳𑐣𑐫𑐵 𑐏𑑃𑐫𑑂 𑐎𑐾𑐣𑑂𑐡𑑂𑐬𑐶𑐟 𑐖𑐸𑐂 𑑋 𑐟𑐵𑐂𑐰𑐵𑐣𑐫𑑂 𑐖𑐶𑐩𑐶𑐳𑑄 𑐖𑐶𑐩𑐶 𑐳𑐵𑐗𑐾𑐡𑐵𑐬𑐣𑐵𑐥 𑐠𑑅𑐐𑐸 𑐳𑐩𑐬𑑂𑐠𑐣 𑐴𑐵𑐎𑐣𑑄 𑐖𑐵𑐴𑐾𑐬 𑐫𑐵𑐫𑐾𑐐𑐸𑐮𑐶𑐳𑐾𑑄 𑐳𑑂𑐰𑐟𑐣𑑂𑐟𑑂𑐬 𑐰 𑐏𑐸𑐮𑑂𑐮𑐵 𑐴𑐶𑐣𑑂𑐡𑐥𑑂𑐬𑐱𑐵𑐣𑑂𑐟 𑐎𑑂𑐲𑐾𑐟𑑂𑐬𑐫𑐵 𑐖𑐶𑐩𑐶𑐐𑐸 𑐳𑐵𑐗𑐵 𑐔𑐶𑐄𑐟𑐵𑑅𑐫𑐵 𑐳𑐩𑑂𑐧𑐣𑑂𑐢𑐫𑑂 𑐏𑑃 𑐮𑑂𑐴𑐵𑐫𑐾𑐐𑐸 𑐖𑐸𑐂 𑑋 𑐟𑐵𑐂𑐰𑐵𑐣𑐫𑐵 𑑒 𑐐𑐹 𑐎𑐬𑑀𑐜 𑑓𑑐 𑐐𑐹 𑐮𑐏 𑐖𑐣𑐟𑐵𑐥𑑂𑐬𑐟𑐶 𑐀𑐩𑐾𑐬𑐶𑐎𑐵𑐫𑐵 𑐋𑐎𑑂𑐫𑐧𑐡𑑂𑐢𑐟𑐵 𑐎𑑂𑐫𑐣𑐾𑐐𑐸 𑐁𑑅 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐐𑐸 𑐡𑐸 𑐕𑐵𑐫𑑂𑐎𑐶 𑐠𑑂𑐰 𑐮𑑀𑐎𑐟𑐣𑑂𑐟𑑂𑐬 𑐰 𑐣𑐶𑐬𑑄𑐎𑐸𑐱𑐟𑐣𑑂𑐟𑑂𑐬 𑐩𑐢𑑂𑐫𑐾 𑐐𑐸𑐐𑐸 𑐮𑑂𑐫𑐫𑐾𑐐𑐸 𑐢𑐎𑐵𑑅 𑐢𑐵𑐫𑐾𑐩𑐵𑑅𑐐𑐸 𑐃 𑐏𑑅 𑑋!

𑐠𑐸𑐎𑐷 𑐣𑐶𑐬𑑄𑐎𑐸𑐱𑐟𑐣𑑂𑐟𑑂𑐬 𑐢𑐎𑐵𑑅 𑐮𑐵 𑐔𑐷𑐣𑐫𑐵𑐟 𑐴𑐾 𑐢𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐠𑐸𑐎𑐶𑑄 𑐠𑑂𑐰 𑐨𑑂𑐬𑐩𑐞𑐫𑐵 𑐩𑐎𑐳𑐡 𑐳𑐷𑐡𑐸 𑑋 𑐥𑐾𑐮𑑀𑐳𑐷 𑐬𑐵𑐲𑑂𑐚𑑂𑐬𑐥𑐟𑐶 𑐣𑑄 𑐩𑐏𑐸, 𑐩𑐣𑑂𑐟𑑂𑐬𑐷 𑐣𑑄 𑐩𑐏𑐸 𑑋 𑐳𑐬𑐎𑐵𑐬𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐂𑐩𑑂𑐴 𑐩𑐣𑐹 𑐩𑐏𑐸 𑑋 𑐟𑐬 𑐀𑐩𑐾𑐬𑐶𑐎𑐷 𑐬𑐵𑐖𑑂𑐫𑐫𑐵 𑐕𑐩𑑂𑐴 𑐄𑐔𑑂𑐔𑐥𑐡𑐳𑑂𑐠 𑐥𑐡𑐵𑐢𑐶𑐎𑐵𑐬𑐷 𑐢𑐵𑑅𑐳𑐵 𑐏𑑅 𑑋 𑐰𑑄 𑐳𑑄𑐳𑐡𑐷𑐫 𑐥𑑂𑐬𑐟𑐶𑐣𑐶𑐢𑐶𑐩𑐞𑑂𑐜𑐮𑐫𑐵 𑐣𑐾𑐟𑐺𑐟𑑂𑐰 𑐫𑐵𑑅𑐳𑐵𑑄 𑐀𑐩𑐾𑐬𑐶𑐎𑐵𑐫𑐵 𑐴𑐾 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑑅𑐐𑐸 𑐖𑐸𑐂 𑑋 𑐔𑐷𑐣𑑄 𑐮𑐵 𑐠𑐸𑐎𑐠𑑄 𑐴𑐾 𑐎𑐵𑑅𑐐𑐸 𑐡𑐸 𑑋

𑐗𑐷𑐐𑐸 𑐳𑐬𑑀𑐎𑐵𑐬𑐫𑐵 𑐰𑐶𑐲𑐫 𑐢𑐫𑐵𑐐𑐸 𑐊𑐱𑐶𑐫𑐵 𑐎𑑂𑐲𑐾𑐟𑑂𑐬𑐫𑑂 𑐧𑑂𑐰𑐮𑑄𑐐𑐸 𑐟𑐣𑐵𑐰𑐫𑐵 𑐳𑑂𑐠𑐶𑐟𑐶𑐫𑐵𑐟 𑐎𑐫𑐵𑑅 𑐖𑐸𑐮 𑐰 𑐨𑐰𑐶𑐲𑑂𑐫𑐫𑑂 𑐫𑐸𑐡𑑂𑐢 𑐖𑐸𑐂𑐦𑐂𑐐𑐸 𑐳𑑂𑐠𑐶𑐟𑐶 𑐣𑑄 𑐏𑐣𑐾𑐡𑐟 𑐢𑐫𑐵𑐐𑐸 𑐏𑑅 𑑋 𑐥𑐾𑐮𑑀𑐳𑐷𑑄 𑐟𑐵𑐂𑐰𑐵𑐣𑐫𑑂 𑐰𑐣𑐵𑑅 𑐟𑐶𑐧𑑂𑐧𑐟𑐷 𑐱𑐬𑐞𑐵𑐬𑑂𑐠𑐷 𑐣𑐾𑐟𑐵 𑐣𑑄 𑐣𑐵𑐥 𑐮𑐵𑑅𑐐𑐸 𑐡𑐸 𑑋 𑐠𑐸𑐎𑐶𑑄 𑐣𑑄 𑐀𑐩𑐾𑐬𑐶𑐎𑐵𑐫𑐵 𑐣𑐶𑐫𑐟 𑐳𑑂𑐥𑐲𑑂𑐚 𑐖𑐹𑐐𑐸 𑐡𑐸 𑑋 𑐠𑑂𑐰 𑐂𑐮𑐫𑑂 𑐁𑑅 𑐕𑐐𑐹 𑐖𑐎 𑐡𑑂𑐰𑑄𑐎𑐾𑐐𑐸 𑐖𑑂𑐫𑐵 𑐖𑐸𑐮 𑐢𑐵𑑅𑐳𑐵𑑄 𑐣𑑄 𑐁𑐞𑐰𑐶𑐎 𑐴𑐟𑐶𑐫𑐵𑐬 𑐟𑑂𑐰𑑅𑐟𑐾𑐐𑐸 𑐖𑑂𑐫𑐵 𑐖𑐸𑐂𑐦𑐸 𑐢𑐎𑐵𑑅 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬𑐳𑑄𑐑𑐫𑐵 𑐩𑐴𑐵𑐳𑐔𑐶𑐰 𑐊𑐣𑑂𑐚𑑀𑐂𑐣 𑐐𑐸𑐚𑐾𑐬𑐾𑐖𑑄 𑐄𑐎𑐸𑐣𑑂𑐴𑐸 𑐩𑑄𑐐𑐮𑐰𑐵𑑅 𑐴𑐾 𑐖𑐎 𑐢𑐵𑑅𑐐𑐸 𑐏𑑅𑑋 𑐁𑑅 𑐫𑐸𑐡𑑂𑐢 𑐖𑐸𑐂 𑐦𑐸𑐐𑐸 𑐏𑐟𑐬𑐵 𑐡𑐸 𑑋 𑐊𑐱𑐶𑐫𑐵𑐥𑐵𑐏𑐾 𑐟𑐣𑐵𑐰 𑐣𑑂𑐫𑑄𑐐𑐸 𑐢𑐂𑐐𑐸 𑐗𑐷𑐐𑐸 𑐣𑐶𑑄𑐟𑐶𑑄 𑐣𑑄 𑐐𑑂𑐫𑐵𑐣𑐵𑐥𑐸𑐐𑐸 𑐏𑑃 𑐏𑑅 𑑋

𑐩𑐵𑐌𑐟𑑂𑐳𑐾 𑐟𑐸𑐒𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐔𑐶𑐣𑐶𑐫𑐵 𑐎𑐩𑑂𑐫𑐸𑐣𑐶𑐳𑑂𑐟 𑐥𑐵𑐬𑑂𑐚𑐷𑑄 𑐔𑐷𑐣𑐫𑑂 𑐎𑐧𑑂𑐖𑐵 𑐫𑐵𑐳𑐾𑑄𑐮𑐶 𑐀𑐧𑐮𑐫𑑂 𑐔𑐷𑐣𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐳𑐬𑐴 𑐔𑐶𑐣𑐶𑐫𑐵 𑐬𑐵𑐲𑑂𑐚𑑂𑐬𑐶𑐫 𑐳𑐬𑐎𑐵𑐬𑐫𑐵 𑐀𑐢𑑂𑐫𑐎𑑂𑐲 𑐖𑐸𑐫𑐵𑐔𑑂𑐰𑑄𑐩𑑂𑐴 𑐔𑑂𑐫𑐵𑐒𑑂𑐐 𑐎𑐵𑐃 𑐱𑐾𑐎 𑐦𑐬𑑂𑐩𑑀𑐳𑐵 𑐚𑐵𑐥𑐹𑐂 𑐧𑐶𑐳𑐶𑐄𑑃 𑐰𑑄𑐐𑐸 𑐢𑐂𑐐𑐸 𑐏𑑃 𑐗𑐷𑐳𑑄 𑐧𑑂𑐰𑐣𑐵𑐟𑐫𑐵𑐐𑐸 𑐴𑐾 𑐏𑑅 𑑋 𑐠𑑂𑐰 𑐳𑐣𑑂 𑑑𑑙𑑔𑑙 𑐫𑐵 𑐏𑑃 𑐏𑑅 𑑋 𑐰 𑐴𑐾 𑐦𑐬𑑂𑐩𑑀𑐳𑐵 𑐁𑑅 𑐟𑐵𑐂𑐰𑐵𑐣 𑐏𑑅 𑑋 𑐀𑐣 𑐰𑐣𑐵𑑅 𑐔𑑂𑐫𑐵𑐒𑑂𑐐𑐎𑐵𑐃 𑐱𑐾𑐎𑑄 𑐠𑑅𑐟 𑐬𑐵𑐲𑑂𑐚𑑂𑐬𑐥𑐟𑐶 𑐑𑑀𑐲𑐞𑐵 𑐫𑐵𑐣𑐵𑑅 𑐀𑐣𑐫𑐵 𑐖𑐣𑐟𑐵𑐫𑐵𑐟 𑐱𑐵𑐳𑐣 𑐫𑐵𑐟 𑑋 𑐄𑐎𑐶𑐫𑐵𑐟 𑐴𑐾 𑐐𑐞𑐟𑐣𑑂𑐟𑑂𑐬 𑐔𑐷𑐣 𑐢𑐵𑐮, 𑐀𑐮𑐾 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬𑐳𑑄𑐑𑐫𑐵 𑐳𑐡𑐳𑑂𑐫𑐟𑐵 𑐣𑑄 𑐎𑐵𑐮 𑑋 𑐄𑐎𑐶𑐫𑐵𑐟 𑐴𑐾 𑐀𑐩𑐾𑐬𑐶𑐎𑐵𑑄 𑐔𑐷𑐣 𑐢𑐎𑐵𑑅 𑐩𑐵𑐣𑑂𑐫𑐟𑐵 𑐧𑐶𑐮 𑑋 𑐩𑐸𑐏𑑂𑐫 𑐨𑐹𑐩𑐶 𑐔𑐷𑐣𑐫𑐵𑐟 𑐩𑐵𑐣𑑂𑐫𑐟𑐵 𑐩𑐧𑐶𑐄 𑑋

𑐳𑐣𑑂 𑑑𑑙𑑗𑑑 𑐫𑑂 𑐰𑐫𑐵𑑅 𑐟𑐶𑐣𑐶 𑐔𑐷𑐣𑑄 𑐟𑐵𑐂𑐰𑐵𑐣𑐫𑐵𑐟 𑐔𑐷𑐎𑐵𑑅 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑐵 𑐳𑐡𑐳𑑂𑐫𑐟𑐵 𑐎𑐵𑑅𑐐𑐸 𑐏𑑅𑐳𑐵 𑐀𑐩𑐾𑐬𑐶𑐎𑐵𑑄 𑐣𑑄 𑐩𑐹𑐮 𑐔𑐷𑐣𑐫𑐵𑐟 𑐴𑐾 𑐩𑐵𑐣𑑂𑐫𑐟𑐵 𑐧𑐶𑐫𑐵𑑅 𑐟𑐵𑐂𑐰𑐵𑐣𑐮𑐶𑐳𑐾 𑐀𑐣𑑁𑐥𑐔𑐵𑐬𑐶𑐎 𑐳𑐩𑑂𑐧𑐣𑑂𑐢 𑐖𑐎 𑐟𑐫𑐾𑐐𑐸 𑐣𑐷𑐟𑐶 𑐎𑐵𑐮 𑑋 𑐀𑐣𑑄𑐮𑐶 𑐀𑐩𑐾𑐬𑐶𑐎𑐵𑑄 𑐟𑐵𑐂𑐰𑐵𑐣𑑄 𑐠𑑅𑐐𑐸 𑐳𑐸𑐬𑐎𑑂𑐲𑐵 𑐠𑐩𑑂𑐴𑑄 𑐴𑐾 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐎𑐵𑐣𑐹𑐣 𑐣𑑄 𑐥𑐵𑐳 𑐫𑐵𑑅𑐐𑐸 𑐏𑑅 𑑋 𑐀𑐩𑐾𑐬𑐶𑐎𑐵𑑄 𑐣𑑄 𑐊𑐎 𑐔𑐷𑐣 𑐣𑐷𑐟𑐶 𑐎𑐵𑐮 𑑋 𑐟𑐵𑐂𑐰𑐵𑐣𑑄 𑐠𑑅𑐟 𑐍𑐥𑐔𑐵𑐬𑐶𑐎 𑐬𑐹𑐥𑑄 𑐐𑐞𑐟𑐣𑑂𑐟𑑂𑐬 𑐔𑐷𑐣 𑐢𑐎𑐵𑑅 𑐢𑐫𑐵𑐔𑑂𑐰𑑄𑐐𑐸 𑐡𑐸 𑐢𑐵𑑅𑐳𑐵 𑐰𑐶𑐱𑑂𑐰𑐫𑑂 𑐩𑑂𑐴𑐳𑐶𑐫𑐵𑐔𑑂𑐰𑑄𑐐𑐸 𑐩𑐹𑐮 𑐨𑐹𑐩𑐶 𑐔𑐷𑐣 𑐖𑐣𑐰𑐵𑐡𑐷 𑐐𑐞𑐟𑐣𑑂𑐟𑑂𑐬 𑐔𑐷𑐣 𑐏𑑅 𑑋 𑐠𑐸𑐎𑐠𑑄 𑐣𑐶𑐐𑐹 𑐔𑐷𑐣 𑐡𑐸𑐐𑐸 𑐖𑐸𑐮 𑑋 𑐟𑐬 𑐠𑐸𑐎𑐶𑐫𑐵𑐟 𑐀𑐳𑑂𑐰𑐷𑐎𑐵𑐬 𑐫𑐵𑐳𑐾𑑄 𑐣𑐾𑐥𑐵𑑅𑐮𑐶𑐳𑐾𑑄 𑐳𑐎𑐮 𑐡𑐾𑐫𑑂𑐟𑐳𑐾𑑄 𑐁𑑅 𑐕𑐐𑐹 𑐖𑐎 𑐔𑐷𑐣 𑐡𑐸 𑐰 𑐟𑐵𑐂𑐰𑐵𑐣 𑐢𑐫𑐵𑐐𑐸 𑐩𑐹𑐮 𑐔𑐷𑐣𑐫𑐵 𑐨𑐹𑐨𑐵𑐐 𑐖𑐎 𑐏𑑅 𑐢𑐎𑐵𑑅 𑐩𑐵𑐣𑐾 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐣𑑂 𑑑𑑙𑑔𑑕 𑐟𑐎 𑐮𑐵 𑐖𑐵𑐥𑐵𑐣𑐷𑐟𑐳𑐾𑑄 𑐴𑐾 𑐱𑐵𑐳𑐣 𑐫𑐵𑐣𑐵𑑅 𑐳𑐿𑐣𑐶𑐎 𑐀𑐏𑐜𑐵 𑐣𑑄 𑐡𑐫𑐾𑐎𑐵𑐟𑑅𑐐𑐸 𑐏𑑅 𑑋 𑐟𑐬 𑐣𑐶𑐐𑐹𑐐𑐸 𑐰𑐶𑐱𑑂𑐰𑐫𑐸𑐡𑑂𑐢𑐫𑑂 𑐖𑐵𑐥𑐵𑐣𑑄 𑐁𑐟𑑂𑐩𑐳𑐬𑑂𑐩𑐞 𑐫𑐵𑐳𑐾𑑄𑐮𑐶 𑐀𑐣 𑐔𑑂𑐰𑑄𑐥𑐶𑑄 𑐖𑐵𑐥𑐵𑐣𑐷 𑐳𑐾𑐣𑐵𑑄 𑐟𑑂𑐰𑑅𑐟𑐵 𑐰𑐣𑐾𑐩𑐵𑑅𑐐𑐸 𑐩𑐵𑐐 𑐖𑐸𑐮 𑑋 𑐀𑐩𑐾𑐬𑐶𑐎𑐷𑐟𑐳𑐾𑑄 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐟𑐟𑑂𑐎𑐵𑐮𑐷𑐣 𑐔𑑂𑐫𑐵𑐒𑑂𑐐𑐎𑐵𑐃 𑐱𑐾𑐎𑐫𑐵 𑐳𑐬𑐎𑐵𑐬𑐫𑐵𑐟 𑐐𑑂𑐰𑐵𑐎𑐮 𑐀𑐮𑐾 𑐖𑐵𑐥𑐵𑐣𑑄 𑐀𑐣𑐫𑐵 𑐥𑑂𑐬𑐱𑐵𑐳𑐣 𑐮𑑅𑐮𑑂𑐴𑐵𑐣𑐵𑐧𑐶𑐮 𑑋 𑐠𑐣𑑄𑐣𑐶𑐳𑐾𑑄 𑐴𑐾 𑐟𑐵𑐂𑐰𑐵𑐣𑐫𑑂 𑐀𑐩𑐾𑐬𑐶𑐎𑐷𑐟𑐫𑑂𑐐𑐸 𑐨𑐹𑐩𑐶𑐎𑐵 𑐡𑐸𑐐𑐸 𑐏𑑅 𑑋 𑐔𑐷𑐣𑑄 𑐴𑐒𑐎𑐒 𑐧𑐾𑐮𑐵𑐫𑐟𑐥𑐵𑐏𑐾𑑄 𑐎𑐵𑐮, 𑐥𑐸𑐬𑑂𑐟𑐐𑐵𑐮𑐷𑐟𑐥𑐵𑐏𑐾𑑄 𑐩𑐎𑐵𑐄 𑐎𑐵𑐮 𑐟𑐬 𑐟𑐵𑐂𑐰𑐵𑐣𑐫𑐵𑐟 𑐢𑐵𑑅𑐳𑐵 𑐊𑐎𑐷𑐎𑐬𑐞 𑐫𑐵𑐫𑐾𑐦𑐸𑐐𑐸 𑐩𑐡𑐸𑐣𑐶 𑑋 𑐠𑐸𑐎𑐶𑐫𑐵 𑐮𑐶𑐄𑐣𑐾 𑐀𑐩𑐾𑐬𑐶𑐎𑐵 𑐴𑐾 𑐮𑑂𑐴𑐵𑑅 𑐡𑐸 𑑋

𑐥𑐾𑐮𑑀𑐳𑐷𑐫𑐵 𑐨𑑂𑐬𑐩𑐞𑐫𑐵 𑐣𑑂𑐴𑑂𑐫𑑅 𑐴𑐾 𑐬𑐹𑐳𑑄 𑐠𑐸𑐎𑐶𑐫𑐵𑐟 𑐄𑐎𑑂𑐳𑐵𑐴𑐚𑐫𑐵 𑐖𑑂𑐫𑐵 𑐢𑐎𑐵𑑅 𑐰𑐶𑐬𑑀𑐢 𑐫𑐵𑑅𑐐𑐸 𑐏𑑅 𑑋 𑐠𑐸𑐎𑐠𑑄 𑐔𑐷𑐣 𑐰 𑐬𑐹𑐳 𑐕𑐥𑑂𑐥𑑃 𑐏𑐣𑐾𑐡𑐸 𑐢𑐵𑑅𑐳𑐵 𑐖𑐵𑐥𑐵𑐣 𑐰 𑐧𑐾𑐮𑐵𑐫𑐟 𑐳𑑂𑐰𑐵𑐨𑐵𑐰𑐶𑐎 𑐬𑐹𑐥 𑐀𑐩𑐾𑐬𑐶𑐎𑐵𑐮𑐶𑐳𑐾 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS