Read news in NepalBhasa text-- www.hamroschool.com BACK 𑐳𑑄𑐏𑐸𑐰𑐵𑐳𑐨𑐵𑐫𑑂 𑐮𑐵𑐏𑐾 𑐖𑐵𑐟𑑂𑐬𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑑄𑐏𑐸𑐰𑐵𑐳𑐨𑐵𑐫𑑂 𑐮𑐵𑐏𑐾 𑐖𑐵𑐟𑑂𑐬𑐵

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐥𑑂𑐬𑐡𑐾𑐱 𑐣𑑄 𑑑𑐫𑐵 𑐳𑑄𑐏𑐸𑐰𑐵𑐳𑐨𑐵𑐫𑑂 𑐮𑐵𑐏𑐾 𑐖𑐵𑐟𑑂𑐬𑐵 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐣𑐾𑐰𑐵𑑅 𑐳𑐩𑐸𑐡𑐵𑐫 𑐡𑐸𑐣𑐾 𑐀𑐟𑐶𑐎𑑄 𑐩𑐴𑐟𑐰𑐥𑐹𑐬𑑂𑐞 𑐥𑐬𑑂𑐰𑐩𑐢𑑂𑐫𑐾 𑐕𑐐𑐹 𑐠𑐣𑐫𑐵 𑐮𑐵𑐏𑐾 𑐖𑐵𑐟𑑂𑐬𑐵 𑐣𑐵𑐐𑐥𑑄𑐔𑐩𑐶𑐣𑐶𑐳𑐾𑑄 𑐱𑐸𑐬𑐸 𑐖𑐹𑐐𑐸 𑐏𑑅𑐳𑐵 𑐎𑐺𑐲𑑂𑐞 𑐖𑐣𑑂𑐩𑐵𑐲𑑂𑐚𑐩𑐶𑐟𑐎 𑐣𑑂𑐴𑑂𑐫𑐵𑐂 𑑋

𑐰𑑄𑐐𑐸 𑐕𑐸𑑄 𑐡𑑃 𑐠𑐸𑐏𑐾 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞 𑐰 𑐠𑐷𑐠𑐷 𑐎𑐵𑐬𑐞𑑄 𑐮𑐵𑐏𑐾 𑐥𑐶𑐠𑐣𑐾𑐐𑐸 𑐖𑑂𑐫𑐵 𑐡𑐶𑐣𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑐸𑐐𑐸𑐳𑐷 𑐠𑐷𑐠𑐷 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐨𑐶𑑄𑐡𑑂𑐫𑑅𑐫𑐵 𑐡𑐾𑐐𑐮𑐫𑑂 𑐰𑐶𑐢𑐶𑐰𑐟 𑐥𑐸𑐖𑐵 𑐫𑐵𑐣𑐵𑑅 𑐮𑐵𑐏𑐾 𑐥𑑂𑐫𑐵𑐏𑑄 𑐥𑐶𑐠𑑄𑐐𑐸 𑐏𑑅 𑑋

𑐳𑑂𑐠𑐵𑐣𑐷𑐫 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐳𑑄 𑐏𑐵𑐳 𑐔𑐶𑐄𑐟𑐵𑑅 𑐩𑐎𑑂𑐫𑑄𑐐𑐸𑐮𑐶𑑄 𑐫𑐵𑐣𑐵𑑅 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐮𑑀𑐥 𑐖𑐸𑐂𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐐𑐸 𑐮𑐵𑐏𑐾 𑐥𑑂𑐫𑐵𑐏𑑄𑐫𑐵 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑄𑐏𑐸𑐰𑐵𑐳𑐨𑐵𑐫𑐵 𑐳𑑄𑐫𑑀𑐖𑐣𑐫𑑂 𑐴𑐵𑐎𑐣𑑄 𑐥𑐶𑐠𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐮𑐵𑐏𑐾 𑐥𑑂𑐫𑐵𑐏𑑄 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐴𑐾 𑐡𑐾𑐫𑑂 𑐡𑐧𑐹 𑐳𑑄𑐏𑐸𑐰𑐵𑐳𑐨𑐵𑐫𑐵 𑐳𑑄𑐫𑑀𑐖𑐣𑐫𑑂 𑐥𑑂𑐫𑐵𑐏𑑄 𑐥𑐶𑐠𑑄𑐐𑐸 𑐏𑑅 𑑋

𑐮𑐶𑐥𑐵𑑄𑐐𑐸 𑐂𑐮𑐫𑑂 𑐮𑐵𑐏𑐾 𑐥𑑂𑐫𑐵𑐏𑑄𑐥𑑂𑐬𑐟𑐶 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵 𑐔𑐶𑐄𑐟𑐵𑑅 𑐩𑑂𑐴𑑀 𑐖𑐸𑐫𑐵 𑐰𑑄𑐐𑐸𑐮𑐶𑑄 𑐠𑐸𑐐𑐸𑐳𑐷 𑐡𑐾𑐫𑑂 𑐡𑐧𑐹𑐫𑐵 𑐴𑐾 𑐳𑑄𑐫𑑀𑐖𑐣𑐫𑑂 𑐥𑑂𑐫𑐵𑐏𑑄 𑐥𑐶𑐠𑐣𑐵𑐐𑐸 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑑄𑐏𑐸𑐰𑐵𑐳𑐨𑐵𑐫𑐵 𑐣𑐵𑐫𑑅 𑐩𑐫𑑂𑐖𑐸 𑐳𑐷𑐟𑐵 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

𑐳𑑄𑐏𑐸𑐰𑐵𑐳𑐨𑐵 𑐖𑐶𑐮𑑂𑐮𑐵𑐫𑑂 𑐣𑐾𑐰𑐵𑑅𑐟𑐫𑑂 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐏𑐵𑑃𑐡𑐰𑐵𑐬𑐷, 𑐔𑐿𑐣𑐥𑐸𑐬, 𑐳𑐶𑐨𑐸𑐰𑐵, 𑐳𑑂𑐫𑐵𑐧𑐸𑐣, 𑐟𑐸𑐩𑑂𑐮𑐶𑐒𑐚𑐵𑐬 𑐁𑐡𑐶 𑐠𑐵𑐳𑐫𑑂 𑐠𑐷𑐠𑐷 𑐎𑑂𑐮𑐧, 𑐳𑑄𑐑𑐳𑑄𑐳𑑂𑐠𑐵𑐥𑐵𑐏𑐾𑑄 𑐮𑐵𑐏𑐾 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑐸𑐐𑐸𑐳𑐷 𑐢𑐵𑑅𑐳𑐵 𑐡𑐾𑐫𑑂 𑐡𑐧𑐹𑐫𑐵 𑐴𑐾 𑐳𑑄𑐫𑑀𑐖𑐣𑐫𑑂 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋

𑐖𑐶𑐮𑑂𑐮𑐵𑐫𑑂 𑐠𑐷𑐠𑐷𑐎𑐠𑑄𑐫𑐵 𑐮𑐵𑐏𑐾 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐰 𑐠𑑁𑑄𑐫𑐵 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐄𑐎𑐶𑐫𑐵 𑐖𑐵𑐣𑐎𑐵𑐬𑐷 𑐩𑐡𑐸𑐐𑐸𑐮𑐶𑑄 𑐮𑐵𑐏𑐾 𑐥𑑂𑐫𑐵𑐏𑑄𑐫𑐵 𑐩𑐴𑐟𑑂𑐰 𑐎𑐣𑐾𑐐𑐸 𑐣𑐵𑐥𑑄 𑐄𑐎𑐶𑐫𑐵 𑐥𑑂𑐬𑐱𑐶𑐎𑑂𑐲𑐞 𑐣𑑄 𑐧𑐷𑐐𑐸 𑐫𑐵𑐣𑐵 𑐫𑑄𑐎𑐮 𑐢𑐵𑑅𑐳𑐵 𑐣𑑂𑐴𑐹 𑐥𑐸𑐳𑑂𑐟𑐵 𑐠𑐸𑐏𑐾𑐥𑐵𑐏𑐾 𑐁𑐎𑐬𑑂𑐲𑐶𑐟 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐳𑑂𑐠𑐵𑐣𑐷𑐫 𑐥𑐸𑐲𑑂𑐥𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋
𑐮𑐵𑐏𑐾 𑐥𑑂𑐫𑐵𑐏𑑄𑐫𑐵 𑐣𑐶𑑄𑐟𑐶𑑄 𑐁𑐥𑐵𑐮𑑄 𑐏𑐬𑑂𑐔 𑐩𑐵𑑅𑐐𑐸𑐮𑐶𑑄 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐗𑑂𑐰𑐮𑐫𑑂 𑐁𑐬𑑂𑐠𑐶𑐎 𑐳𑑄𑐎𑐮𑐣 𑐣𑑄 𑐫𑐵𑐫𑐾𑐐𑐸 𑐰 𑐄𑐎𑐶𑐫𑐵𑐥𑐵𑐏𑐾𑑄 𑐥𑑂𑐫𑐵𑐏𑑄 𑐎𑑂𑐫𑐣𑐾𑐟 𑐮𑐐𑐾 𑐖𑐹𑐐𑐸 𑐏𑐬𑑂𑐔 𑐎𑐚𑐾 𑐫𑐵𑐣𑐵𑑅 𑐮𑑂𑐫𑑄 𑐡𑐸𑐐𑐸 𑐢𑑂𑐫𑐧𑐵 𑐥𑑂𑐫𑐵𑐏𑑄𑐫𑐵𑐟 𑐩𑐵𑑅𑐐𑐸 𑐴𑐮𑑄𑐖𑑂𑐰𑐮𑑄 𑐣𑑂𑐫𑐵𑐫𑐾𑐟 𑐏𑐬𑑂𑐔 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS