Read news in NepalBhasa text-- www.hamroschool.com BACK 𑑑𑑓 𑐰𑐜𑐵𑐫𑑂 𑐑𑐬𑐧𑐵𑐚𑑀𑐫𑐵 𑐰𑐶𑐰𑐵𑐡 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑑑𑑓 𑐰𑐜𑐵𑐫𑑂 𑐑𑐬𑐧𑐵𑐚𑑀𑐫𑐵 𑐰𑐶𑐰𑐵𑐡

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐫𑐾𑑃 𑐩𑐣𑐥𑐵 𑐰𑐜𑐵 𑐣𑑄. 𑑑𑑓 𑐥𑐵𑐏𑐾𑑄 𑐰𑐜𑐵 𑐀𑐢𑑂𑐫𑐎𑑂𑐲 𑐢𑑂𑐬𑐸𑐰𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬𑑄 𑐩𑑂𑐴𑐶𑐐𑑅 𑐕𑐐𑐹 𑐰𑐎𑑂𑐟𑐰𑑂𑐫 𑐥𑐶𑐎𑐵𑐳𑐾𑑄 𑐑𑐬𑐧𑐵𑐚𑑀 𑐳𑐩𑑂𑐧𑐣𑑂𑐢𑐷 𑐕𑐐𑐹 𑐰𑐶𑐰𑐵𑐡𑐫𑑂 𑐀𑐳𑐩𑑂𑐧𑐣𑑂𑐢𑐶𑐟 𑐩𑐣𑐹𑐟𑐫𑑂𑐳𑑄 𑐣𑑂𑐴𑐶𑑄𑐣𑑂𑐴𑐶𑑄 𑐰𑐜𑐵 𑐎𑐵𑐬𑑂𑐫𑐵𑐮𑐫𑐫𑑂 𑐰𑐫𑐵𑑅 𑐰𑐜𑐵𑐫𑐵 𑐖𑑂𑐫𑐵𑐫𑑂 𑐥𑑄𑐐𑑅 𑐠𑑄 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑑑𑑓 𑐰𑐜𑐵 𑐡𑐸𑐣𑐾 𑐮𑐵𑑅𑐐𑐸 𑐕𑐐𑐹 𑐖𑐐𑑂𑐐𑐵 𑐬𑐵𑐲𑑂𑐚𑑂𑐬𑐶𑐫 𑐰𑐵𑐞𑐶𑐖𑑂𑐫 𑐧𑐿𑑄𑐎𑐥𑐵𑐏𑐾𑑄 𑐮𑐶𑐮𑐵𑐩 𑐫𑐵𑐣𑐵𑑅 𑐩𑐷𑐢𑐸𑑄𑐎𑐵𑑅 𑐄𑐎𑐶𑐫𑐵𑐟 𑐩𑐵𑑅𑐐𑐸 𑐑𑐬𑐧𑐵𑐚𑑀 𑐧𑐷𑐐𑐸 𑐳𑐰𑐵𑐮𑐫𑑂 𑐰𑐶𑐰𑐵𑐡 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋 𑑑𑑓 𑐰𑐜𑐵 𑐎𑐵𑐬𑑂𑐫𑐵𑐮𑐫𑐥𑐵𑐏𑐾𑑄 𑐑𑐬𑐧𑐵𑐚𑑀 𑐩𑐧𑐶𑐄 𑐢𑐎𑐵𑑅 𑐠𑑂𑐰 𑐰𑐶𑐰𑐵𑐡 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋

𑑑𑑓 𑐰𑐜𑐵𑐫𑐵 𑐀𑐢𑑂𑐫𑐎𑑂𑐲 𑐩𑐵𑐣𑐣𑑂𑐢𑐬𑑄 𑐎𑐣𑐵𑐡𑐷𑐎𑐠𑑄 𑑑𑑓 𑐰𑐜𑐵 𑐡𑐸𑐣𑐾 𑐮𑐵𑑅𑐐𑐸 𑐕𑐾𑑃𑐧𑐸𑑃 𑐮𑐶𑐮𑐵𑐩 𑐖𑐸𑐂𑐧𑐮𑐫𑑂 𑐰𑐜𑐵𑐫𑐵 𑐥𑑂𑐬𑐟𑐶𑐣𑐶𑐢𑐶 𑐳𑐩𑐾𑐟 𑐟𑐫𑐾𑐩𑐵𑑅𑐐𑐸 𑐏𑑅 𑑋 𑐟𑐬 𑐠𑑂𑐰 𑐩𑐸𑐡𑑂𑐡𑐵𑐫𑑂 𑑒𑑔 𑐰𑐜𑐵𑐫𑑂 𑐔𑑂𑐰𑐣𑐵𑑅 𑐧𑐿𑑄𑐎𑑄 𑐐𑑀𑐥𑑂𑐫 𑐬𑐸𑐥𑑄 𑐖𑐐𑑂𑐐𑐵 𑐮𑐶𑐮𑐵𑐩 𑐫𑐵𑐣𑐵 𑐕𑑂𑐰𑑅𑐐𑐸 𑐏𑐣𑐾𑐡𑐸 𑑋 𑐮𑐶𑐮𑐵𑐩 𑐧𑐵𑐬𑐾 𑐰𑐜𑐵𑐫𑐵𑐟 𑐕𑐸𑑄 𑐖𑐵𑐣𑐎𑐵𑐬𑐷 𑐟𑐎𑑄 𑐩𑐧𑐶𑐄 𑑋 𑐠𑐖𑑂𑐫𑐵𑑅𑐐𑐸 𑐩𑐵𑐩𑐶𑐮𑐵𑐫𑑂 𑐑𑐬𑐧𑐵𑐚𑑀 𑐧𑐷𑐐𑐸 𑐐𑐿𑐬𑐎𑐵𑐣𑐸𑐣𑐷 𑐖𑐸𑐂𑐐𑐸 𑐏𑐣𑐾 𑐡𑐸𑐐𑐸𑐮𑐶𑑄 𑐰𑐜𑐵𑐥𑐵𑐏𑐾𑑄 𑐑𑐬𑐧𑐵𑐚𑑀 𑐩𑐧𑐶𑐄𑐐𑐸 𑐏𑑃 𑐰𑐫𑑂𑐎𑐮𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐠𑑅𑐠𑑅𑐥𑐶𑑄 𑐖𑐎 𑐔𑑂𑐰𑐣𑐵𑑅 𑐫𑐵𑑅𑐐𑐸 𑐄𑐐𑐸 𑐮𑐶𑐮𑐵𑐩𑐫𑑂 𑐖𑐐𑑂𑐐𑐵 𑐣𑑂𑐫𑐵𑐣𑐵 𑐎𑐵𑑅𑐩𑑂𑐴 𑐐𑑁𑐟𑐩𑐬𑐵𑐖 𑐏𑐜𑑂𑐎𑐵 𑐣𑐵𑑄𑐫𑐵𑑅𑐩𑑂𑐴 𑐩𑐣𑐸𑐏𑑄 𑐡𑑄𑐎 𑐖𑐐𑑂𑐐𑐵 𑐣𑑂𑐫𑐵𑐣𑐵 𑐎𑐵𑐫𑐾𑐐𑐸 𑐮𑐵𑐐𑐶𑑄 𑐀𑐠𑐾 𑐠𑑅𑐠𑑅 𑐖𑐎 𑐔𑑂𑐰𑐣𑐵𑑅 𑐮𑐶𑐮𑐵𑐩𑐫𑐵 𑐖𑑂𑐫𑐵 𑐎𑑂𑐰𑐔𑐵𑐫𑐾𑐎𑐹𑐐𑐸 𑐏𑐣𑐾𑐡𑐸 𑐢𑐵𑑅𑐐𑐸 𑐡𑐸 𑑋

𑐠𑑂𑐰 𑐎𑐾𑐱𑐫𑐵𑐟 𑐎𑐫𑐵𑑅 𑐕𑐵𑐣𑐧𑐶𑐣 𑐫𑐵𑐫𑐾𑐩𑐵𑑅 𑐢𑐎𑐵𑑅 𑑑𑑓 𑐰𑐜𑐵 𑐎𑐵𑐬𑑂𑐫𑐵𑐮𑐫𑐥𑐵𑐏𑐾𑑄 𑐀𑐏𑑂𑐟𑐶𑐫𑐵𑐬 𑐡𑐸𑐬𑐸𑐥𑐫𑑀𑐐 𑐀𑐣𑐸𑐳𑐣𑑂𑐢𑐵𑐣 𑐁𑐫𑑀𑐐 𑐰 𑐬𑐵𑐲𑑂𑐚𑑂𑐬𑐶𑐫 𑐳𑐟𑐬𑑂𑐎𑐟𑐵 𑐎𑐾𑐣𑑂𑐡𑑂𑐬𑐫𑐵𑐟 𑐣𑐵𑐥𑑄 𑐂𑐣𑐵𑐥 𑐫𑐵𑐣𑐵 𑐕𑑂𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐄𑐎𑐶𑑄 𑐰𑐜𑐵𑐢𑑂𑐫𑐎𑑂𑐲 𑐩𑐵𑐣𑐣𑑂𑐢𑐬𑑄 𑐄𑐐𑐸 𑐣𑐶𑐎𑐵𑐫𑐥𑐵𑐏𑐾𑑄 𑐐𑐖𑑂𑐫𑐵𑑅𑐐𑐸 𑐣𑐶𑐬𑑂𑐡𑐾𑐱𑐣 𑐰𑐂 𑐰𑐴𑐾 𑐫𑐵𑐫𑐾𑐐𑐸 𑐖𑐸𑐂 𑐢𑐫𑐵𑐡𑐷𑐐𑐸 𑐡𑐸 𑑋

𑐖𑐐𑑂𑐐𑐵 𑐣𑑂𑐫𑐵𑐣𑐵 𑐎𑐵𑑅𑐥𑐶𑑄 𑐩𑐣𑐹𑐟𑐫𑑂𑐳𑑄 𑐢𑐵𑑅𑐳𑐵 𑐰𑐜𑐵 𑐀𑐢𑑂𑐫𑐎𑑂𑐲 𑐩𑐵𑐣𑐣𑑂𑐢𑐬𑑄 𑑒 𑐎𑐬𑑀𑐜 𑐡𑐵𑑄 𑐩𑐵𑐐 𑐫𑐵𑑅𑐐𑐸 𑐰 𑐄𑐐𑐸 𑐢𑑂𑐫𑐧𑐵 𑐩𑐧𑐶𑐮 𑐢𑐎𑐵𑑅 𑐑𑐬𑐧𑐵𑐚𑑀 𑐩𑐧𑐶𑐄𑐐𑐸 𑐏𑑅 𑐢𑐵𑐳𑐾𑑄 𑐥𑑀𑐲𑑂𑐚𑐬 𑐴𑐾 𑐟𑐶𑐎𑐵𑑅 𑐥𑑂𑐬𑐔𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐜𑐵 𑐀𑐢𑑂𑐫𑐎𑑂𑐲 𑐩𑐵𑐣𑐣𑑂𑐢𑐬𑑄 𑐠𑑂𑐰 𑐩𑐸𑐡𑑂𑐡𑐵𑐫𑐵𑐟 𑐠𑑅𑐥𑐶𑑄𑐳𑑄 𑐴𑐾 𑐀𑐏𑑂𑐟𑐶𑐫𑐵𑐬𑐫𑑂 𑐄𑐖𑐸𑐬𑐷 𑐟𑐫𑐾𑐢𑐸𑐣𑐵𑐐𑐸 𑐖𑐹𑐐𑐸𑐮𑐶𑑄 𑐀𑐣𑐫𑐵 𑐦𑐿𑐳𑐮𑐵 𑐥𑐷𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐮𑐶𑐮𑐵𑐩𑐫𑑂 𑐳𑐴𑐨𑐵𑐐𑐷 𑐧𑐿𑑄𑐎 𑐰 𑐖𑐐𑑂𑐐𑐵 𑐣𑑂𑐫𑐵𑑅𑐥𑐶𑑄 𑐩𑐣𑐹𑐟 𑐠𑑅𑐐𑐸 𑐏𑑃 𑐣𑑂𑐫𑐣𑐾𑐟 𑐟𑐫𑐵𑐬 𑐖𑐸𑐂𑐢𑐸𑑄𑐎𑐹𑐳𑐵𑑄 𑐠𑑁𑑄𑐎𑐣𑑂𑐴𑐫𑑂 𑐀𑐳𑐩𑑂𑐧𑐣𑑂𑐢𑐶𑐟 𑐩𑐣𑐹𑐟 𑐳𑐎𑑂𑐬𑐶𑐫 𑐖𑐸𑐫𑐵𑑅 𑐏𑑂𑐫𑐵𑐔𑑂𑐰𑑅 𑐧𑐶𑐄 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐎𑐣𑐵𑐡𑐶𑐮 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS