Read news in NepalBhasa text-- www.hamroschool.com BACK 𑐏𑑂𑐰𑐥𑐫𑑂 𑐳𑐵𑐥𑐵𑐬𑐸𑐫𑐵 𑐟𑑅𑐖𑐶𑐐𑐸 𑐟𑐫𑐵𑐬𑐷 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐏𑑂𑐰𑐥𑐫𑑂 𑐳𑐵𑐥𑐵𑐬𑐸𑐫𑐵 𑐟𑑅𑐖𑐶𑐐𑐸 𑐟𑐫𑐵𑐬𑐷

𑐏𑑂𑐰𑐥(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐠𑐸𑐐𑐸𑐳𑐷 𑐳𑐵𑐥𑐵𑐬𑐸 𑐟𑑅𑐖𑐶𑐎 𑐴𑐣𑐾𑐐𑐸 𑐣𑐶𑑄𑐟𑐶𑑄 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐶𑐡𑑃 𑐟𑐎 𑐎𑑀𑐬𑑀𑐣𑐵𑐫𑐵 𑐎𑐵𑐬𑐞𑑄 𑐍𑐥𑐔𑐵𑐬𑐶𑐎𑐟𑐵𑐫𑑂 𑐖𑐎 𑐳𑐷𑐩𑐶𑐟 𑐖𑐹𑐐𑐸 𑐳𑐵𑐥𑐵𑐬𑐸 𑐣𑐏𑑅 𑐠𑐸𑐐𑐸𑐳𑐷 𑐳𑐨𑑂𑐫 𑐰 𑐨𑐰𑑂𑐫 𑐬𑐸𑐥𑑄 𑐴𑐣𑐷𑐐𑐸 𑐖𑐹𑐐𑐸 𑐡𑐸𑐳𑐵 𑐰 𑐴𑐾 𑐮𑑂𑐫𑐵𑐏𑑄 𑐟𑐫𑐵𑐬𑐷 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐠𑐸𑐐𑐸𑐳𑐷 𑐳𑐵𑐥𑐵𑐬𑐸 𑐟𑑅𑐖𑐶𑐎 𑐴𑐣𑐾𑐟 𑐳𑐬𑑂𑐰 𑐳𑐵𑐢𑐵𑐬𑐞𑐫𑐵𑐟 𑐁𑐴𑑂𑐰𑐵𑐣 𑐫𑐵𑑅𑐐𑐸 𑐡𑐸 𑑋 𑐰𑐂𑐐𑐸 𑐳𑐵𑐄𑐣 𑑒𑑗 𑐐𑐟𑐾 𑐱𑐸𑐎𑑂𑐬𑐰𑐵𑑅𑐎𑐸𑐣𑑂𑐴𑐸 𑐟𑑅𑐖𑐶𑐎 𑐳𑐵𑐥𑐵𑐬𑐸 𑐣𑐏𑑅 𑐴𑐣𑐾𑐟 𑐁𑐴𑑂𑐰𑐵𑐣 𑐫𑐵𑐳𑐾 𑐳𑐵𑐥𑐵𑐬𑐸 𑐔𑐵𑑅𑐴𑐶𑐮𑐷𑐐𑐸 𑐮𑑃𑐥𑐸𑐫𑐵𑐟 𑐩𑐵𑐬𑑂𑐐 𑐥𑑂𑐬𑐱𑐳𑑂𑐟 𑐫𑐵𑐫𑐾𑐟 𑐣𑑄 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐣𑐐𑐬 𑐡𑐸𑐣𑐾 𑐳𑐵𑐥𑐵𑐬𑐸 𑐔𑐵𑑅𑐴𑐶𑐮𑐷𑐐𑐸 𑐮𑐵𑐐𑐵𑐫𑑂 𑐔𑑂𑐰𑑄𑐐𑐸 𑐣𑐶𑐬𑑂𑐩𑐵𑐞 𑐳𑐵𑐩𑐐𑑂𑐬𑐷 𑐮𑐐𑐵𑐫𑐟 𑐡𑐎𑑂𑐰𑑄 𑐳𑐵𑐩𑐐𑑂𑐬𑐷 𑐔𑐶𑐂𑐎𑐾𑐟 𑐢𑐵𑐳𑐾𑑄 𑐳𑐩𑑂𑐧𑐣𑑂𑐢𑐶𑐟 𑐣𑐶𑐎𑐵𑐫𑐫𑐵𑐟 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐣𑐶𑐬𑑂𑐡𑐾𑐱𑐣 𑐣𑑄 𑐧𑐶𑐄𑐐𑐸 𑐡𑐸 𑑋

𑐏𑑂𑐰𑐥 𑐣𑐐𑐬 𑐥𑑂𑐬𑐩𑐸𑐏 𑐳𑐸𑐣𑐶𑐮 𑐥𑑂𑐬𑐖𑐵𑐥𑐟𑐶𑑄 𑐰𑑄𑐐𑐸 𑐣𑐶𑐡𑑃𑐟𑐎 𑐎𑑀𑐬𑑀𑐣𑐵𑐫𑐵 𑐎𑐵𑐬𑐞𑑄 𑐍𑐥𑐔𑐵𑐬𑐶𑐎𑐟𑐵𑐫𑑂 𑐖𑐎 𑐳𑐷𑐩𑐶𑐟 𑐖𑐹𑐐𑐸 𑐳𑐵𑐥𑐵𑐬𑐸 𑐣𑐏𑑅 𑐠𑐸𑐐𑐸𑐳𑐷 𑐰𑑂𑐫𑐰𑐳𑑂𑐠𑐶𑐟 𑐰 𑐩𑐬𑑂𑐫𑐵𑐡𑐶𑐟 𑐬𑐸𑐥𑐫𑑂 𑐴𑐣𑐾𑐟 𑐂𑐣𑐵𑐥 𑐫𑐵𑐳𑐾𑑄 𑐳𑐵𑐥𑐵𑐬𑐸 𑐔𑐵𑑅𑐴𑐶𑐮𑐷𑐐𑐸 𑐮𑑃𑐥𑐸𑐫𑐵𑐟 𑐳𑐸𑐔𑐸𑐎𑐸𑐔𑐸 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐳𑐵𑐥𑐬𑐸𑐫𑐵 𑐮𑑃𑐥𑐸𑐂 𑐮𑐵𑑅𑐐𑐸 𑐰𑐶𑐡𑑂𑐫𑐸𑐟, 𑐚𑐾𑐮𑐶𑐦𑑀𑐣, 𑐎𑐾𑐧𑐸𑐮, 𑐂𑐣𑑂𑐚𑐬𑐣𑐾𑐚 𑐮𑐐𑐵𑐫𑐟𑐫𑐵 𑐟𑐵𑐬𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟 𑐣𑑄 𑐳𑐩𑑂𑐧𑐣𑑂𑐢𑐶𑐟 𑐡𑐎𑑂𑐰𑑄 𑐣𑐶𑐎𑐵𑐫𑐫𑐵𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐳𑐵𑐥𑐵𑐬𑐸 𑐔𑐵𑑅𑐴𑐶𑐮𑐷𑐐𑐸 𑐮𑑃𑐥𑐸 𑐏𑐵𑐮𑐷 𑐫𑐵𑐫𑐾𑐟 𑐰 𑐠𑐷𑐠𑐷 𑐥𑑂𑐬𑐫𑑀𑐖𑐣𑐫𑐵 𑐣𑐶𑑄𑐟𑐶𑑄 𑐟𑐫𑐵𑐟𑑅𑐐𑐸 𑐟𑐵𑐬 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟 𑐕𑐐𑐹 𑐳𑐩𑐶𑐟𑐶 𑐣𑑄 𑐐𑐛𑐣 𑐫𑐵𑑅𑐐𑐸 𑐡𑐸 𑑋 𑑙 𑐰𑐜𑐵𑐀𑐢𑑂𑐫𑐎𑑂𑐲 𑐬𑐰𑐶𑐣𑑂𑐡𑑂𑐬 𑐖𑑂𑐫𑐵𑐏𑑂𑐰𑑅𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐳𑐵𑐫𑐵𑑅 𑐰𑐣𑐷𑐐𑐸 𑐮𑑃𑐥𑐸𑐂 𑐔𑑂𑐰𑑄𑐐𑐸 𑐟𑐵𑐬 𑐰𑑂𑐫𑐰𑐳𑑂𑐠𑐵𑐥𑐣𑐮𑐶𑐳𑐾𑑄 𑐁𑐰𑐱𑑂𑐫𑐎 𑐳𑐩𑐣𑑂𑐰𑐫 𑐰 𑐀𑐣𑐸𑐐𑐩𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐣𑑂𑐴𑐫𑑂𑐩𑑂𑐴𑐾𑐳𑐶𑐫𑐵 𑐳𑐩𑐶𑐟𑐶 𑐐𑐛𑐣 𑐫𑐵𑑅𑑅𑐐𑐸 𑐏𑑅 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐳𑐩𑑂𑐧𑐣𑑂𑐢𑐶𑐟 𑐣𑐶𑐎𑐵𑐫𑐫𑐵 𑐥𑑂𑐬𑐩𑐸𑐏𑐟𑐮𑐶𑐳𑐾 𑐖𑐹𑐐𑐸 𑐳𑐴𑐮𑐴𑐫𑐵 𑐂𑐮𑐫𑑂 𑐳𑐵𑐄𑐣 𑑒𑑐 𑐐𑐟𑐾𑐫𑐵 𑐡𑐸𑐣𑐾 𑐡𑐎𑑂𑐰𑑄 𑐟𑐵𑐬 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐟 𑐢𑐵𑑅𑐐𑐸 𑐡𑐸 𑑋

𑐳𑐵𑐄𑐣 𑑒𑑐 𑐡𑐸𑐣𑐾 𑐟𑐵𑐬 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐩𑐖𑐸𑐮 𑐢𑐵𑑅𑐳𑐵 𑐣𑐐𑐬𑐥𑐵𑐮𑐶𑐎𑐵 𑐠𑐩𑑂𑐴𑑄 𑐴𑐾 𑐫𑐵𑐫𑐾𑐐𑐸 𑐰 𑐄𑐎𑐶𑐫𑐵 𑐰𑐵𑐥𑐟 𑐖𑐹𑐐𑐸 𑐏𑐬𑑂𑐔 𑐰 𑐖𑐬𑐶𑐰𑐵𑐣𑐵 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑐥𑐵𑐏𑐾𑑄 𑐴𑐾 𑐀𑐳𑐸𑐮 𑐄𑐥𑐬 𑐫𑐵𑐫𑐾𑐐𑐸 𑐣𑐐𑐬 𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑑄 𑐎𑐣𑐵𑐡𑐶𑐮 𑑋

𑐳𑐵𑐥𑐵𑐬𑐸 𑐩𑐬𑑂𑐫𑐵𑐡𑐶𑐟 𑐰 𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐠𑐸𑐐𑐸 𑐖𑑂𑐫𑐵𑐫𑑂 𑐳𑐎𑐳𑐶𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐳𑐾𑑄 𑐳𑐬𑑀𑐎𑐵𑐬𑐰𑐵𑐮𑐵 𑐥𑐎𑑂𑐲𑑄 𑐣𑑄 𑐠𑑅𑐠𑑅𑐐𑐸 𑐠𑐵𑐳𑑄 𑐁𑐰𑐱𑑂𑐫𑐎 𑐨𑐹𑐩𑐶𑐎𑐵, 𑐳𑐴𑐎𑐵𑐬𑑂𑐫 𑐰 𑐳𑐩𑐣𑑂𑐰𑐫 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐀𑐠𑐾 𑐴𑐾 𑐳𑐵𑐥𑐵𑐬𑐸𑐎𑐸𑐣𑑂𑐴𑐸 𑐳𑐵𑐫𑐵𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑐣𑐷𑐐𑐸 𑐀𑐰𑐢𑐶 𑐟𑐎 𑐰𑐶𑐡𑑂𑐫𑐸𑐟 𑐁𑐥𑐹𑐬𑑂𑐟𑐶 𑐧𑐣𑑂𑐡 𑐩𑐫𑐵𑐫𑐾𑐟 𑐣𑑄 𑐣𑐾𑐥𑐵𑐮 𑐰𑐶𑐡𑑂𑐫𑐸𑐟 𑐥𑑂𑐬𑐵𑐢𑐶𑐎𑐬𑐞𑐫𑐵𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐳𑐵𑐫𑐵𑑅𑐫𑐵 𑐂𑐮𑐫𑑂 𑐥𑑂𑐬𑐡𑐬𑑂𑐱𑐣 𑐫𑐵𑐂𑐐𑐸 𑐑𑐶𑐣𑑂𑐟𑐵𑑄𑐑𑐶𑐳𑐶 𑐥𑑂𑐫𑐵𑐏𑑄 𑐰 𑐩𑐾𑐩𑐾𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐧𑑂𑐰𑐖𑑂𑐫𑐵 𑐡𑐾𑐱, 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄𑐳𑑄 𑐣𑑄 𑐀𑑅𑐥𑐸𑐎 𑐀𑐰𑐮𑑀𑐎𑐣 𑐫𑐵𑐫𑐾 𑐏𑐣𑐾𑐩𑐵 𑐢𑐂𑐐𑐸 𑐮𑑂𑐫𑐵𑐏𑑄 𑐚𑐾𑐮𑐶𑐨𑐶𑐖𑐣, 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐥𑐵𑐏𑐾𑑄 𑐥𑑂𑐬𑐟𑑂𑐫𑐎𑑂𑐲 𑐥𑑂𑐬𑐱𑐵𑐬𑐞𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐣𑑄 𑐣𑐐𑐬𑐥𑐵𑐮𑐶𑐎𑐵𑑄 𑐁𑐴𑑂𑐰𑐵𑐣 𑐫𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS