Read news in NepalBhasa text-- www.hamroschool.com BACK 𑐧𑐺𑐴𑐟 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐰 𑐴𑐣𑐵 𑐖𑑂𑐫𑐵𑐗𑑂𑐰𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐺𑐴𑐟 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐰 𑐴𑐣𑐵 𑐖𑑂𑐫𑐵𑐗𑑂𑐰𑑅

𑐫𑐮 – 𑐣𑐾𑐥𑐵𑐮𑐩𑐞𑑂𑐜𑐮 𑐳𑐵𑐴𑐶𑐟𑑂𑐫 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐱𑐣𑐶𑐰𑐵𑑅 𑐕𑐐𑐹 𑐰𑐺𑐴𑐟 𑐳𑐵𑐴𑐶𑐟𑑂𑐫𑐶𑐎 𑐳𑐩𑑂𑐩𑐾𑐮𑐣 𑐣𑐵𑐥𑑄 𑐴𑐣𑐵𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐵𑐫𑑅 𑐧𑐡𑑂𑐬𑐷 𑐧𑐾𑐡𑐣𑐵𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐵𑑄𑐖𑐵𑑅𑐩𑑂𑐴 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐖𑐐𑐩𑑀𑐴𑐣 𑐰𑐵𑐩𑐶 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐹𑐥𑐶𑑄 𑐰 𑐥𑐸𑐮𑐵𑑄𑐥𑐶𑑄 𑐫𑐵𑐣𑐵𑑅 𑐥𑐷𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂𑐳𑑄 𑐠𑑅𑐠𑑅𑐐𑐸 𑐬𑐔𑐣𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐬𑐵𑐖𑐨𑐵𑐃 𑐖𑐎𑑅𑐩𑐶, 𑐩𑑄𑐐𑐮𑐣𑐵𑐬𑐵𑐫𑐞 𑐖𑑀𑐱𑐷, 𑐱𑑂𑐫𑐵𑐩 ‘𑐁𑐱𑐵’ 𑐎𑐵𑐫𑐳𑑂𑐠, 𑐩𑐵𑐞𑐶𑐎 𑐄𑐬𑐵𑐫, 𑐧𑐶𑐩𑐮𑐥𑑂𑐬𑐨𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐎𑐺𑐲𑑂𑐞 𑐳𑐵𑐫𑑂𑐩𑐶, 𑐥𑑂𑐬𑐾𑐩𑐎𑐺𑐲𑑂𑐞 𑐟𑐵𑐩𑑂𑐬𑐵𑐎𑐵𑐬, 𑐧𑐸𑐡𑑂𑐢 𑐣𑐾𑐰𑐵𑑅, 𑐬𑐩𑐾𑐱 𑐩𑐵𑐣𑐣𑑂𑐢𑐬, 𑐖𑑂𑐘𑐵𑐣𑐷𑐬𑐵𑐖𑐵 𑐩𑐵𑐣𑐣𑑂𑐢𑐬, 𑐀𑐩𑐺𑐟𑐩𑐵𑐣 𑐖𑑅, 𑐡𑐱𑐬𑐵𑐖 𑐱𑐵𑐎𑑂𑐫, 𑐀𑐬𑑂𑐖𑐸𑐣 𑐣𑐾𑐥𑐵𑑅𑐩𑐶, 𑐬𑐾𑐞𑐸 𑐱𑑂𑐬𑐾𑐲𑑂𑐛, 𑐬𑐵𑐎𑐾𑐱 𑐩𑐴𑐬𑑂𑐖𑐣, 𑐎𑐰𑐶𑐣𑑂𑐡𑑂𑐬𑐮𑐵𑐮 𑐥𑑂𑐬𑐢𑐵𑐣, 𑐟𑐷𑐬𑑂𑐠𑐬𑐟𑑂𑐣 𑐱𑐵𑐎𑑂𑐫, 𑐂𑐣𑑂𑐡𑑂𑐬𑐩𑐵𑐣 𑐩𑐴𑐬𑑂𑐖𑐣, 𑐳𑐸𑐰𑐬𑑂𑐞 𑐩𑐴𑐬𑑂𑐖𑐣, 𑐧𑐳𑐣𑑂𑐟 𑐣𑐎𑑅𑐩𑐶 𑐮𑐐𑐵𑐫𑐟𑑄 𑐠𑑅𑐠𑑅𑐐𑐸 𑐳𑐵𑐴𑐶𑐟𑑂𑐫 𑐬𑐔𑐣𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐫𑐵𑐩𑑂𑐴 𑐠𑐷𑐠𑐷 𑐏𑑂𑐫𑑅𑐫𑐵 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐟 𑐠𑐷𑐠𑐷 𑐴𑐣𑐵𑐥𑐵𑐏𑐾𑑄 𑐣𑑄 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋 𑐳𑐸𑐢𑐶𑐬 𑐏𑑂𑐰𑐧𑐶𑐫𑐵𑐟 𑐩𑐾𑐣𑐎𑐵 𑐴𑐣𑐵, 𑐐𑑀𑐰𑐶𑐣𑑂𑐡𑐩𑐵𑐣 𑐱𑑂𑐬𑐾𑐲𑑂𑐛𑐫𑐵𑐟 𑐣𑐶𑐬𑑂𑐩𑐮𑐵 𑐮𑐸𑐩𑐣𑑂𑐟𑐶 𑐴𑐣𑐵, 𑐜𑐵. 𑐬𑐶𑐣𑐵 𑐟𑐸𑐮𑐵𑐢𑐬 𑐧𑐣𑐶𑐫𑐵𑐫𑐵𑐟 𑐜𑐵. 𑐎𑑁𑐱𑐮𑑂𑐫𑐵 𑐮𑐸𑐩𑐣𑑂𑐟𑐶 𑐴𑐣𑐵, 𑐱𑑂𑐫𑐵𑐩 𑐟𑐩𑑀𑐚 (𑐨𑑀𑐖𑐥𑐸𑐬)𑐫𑐵𑐟 𑐳𑑄𑐐𑐷𑐟𑐬𑐟𑑂𑐣 𑐮𑐸𑐩𑐣𑑂𑐟𑐶 𑐴𑐣𑐵 𑐰 𑐳𑐸𑐬 𑐴𑐣𑐵–𑑑𑑑𑑓𑑘 𑐥𑐟𑑂𑐬𑐎𑐵𑐬𑐶𑐟𑐵 𑐬𑐵𑐖𑐾𑐣𑑂𑐡𑑂𑐬 𑐬𑑄𑐖𑐶𑐟𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐥𑐶𑑄𑐟 𑐩𑑂𑐴𑐟𑐶𑑄 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐡𑐵𑐟𑐵𑐥𑐵𑐏𑐾𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅𑐳𑐵 𑐩𑐹𑐥𑐵𑐴𑐵𑑄𑐥𑐵𑐏𑐾𑑄 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷, 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵, 𑐆𑐲𑐶 𑐱𑑂𑐬𑐾𑐲𑑂𑐛 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐰𑐮𑑂𑐬𑑂𑐜 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐳𑐣𑐫𑐵 𑐣𑐵𑐫𑑅 𑐳𑐶𑐖𑐣 𑐱𑑂𑐬𑐾𑐲𑑂𑐛𑑄 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐟 𑐡𑑃𑐫𑑂𑐡𑐳𑑄 𑐕𑐐𑐹 𑐴𑐾 𑐠𑐵𑐳𑐫𑑂 𑐩𑐸𑑄𑐎𑐾𑐐𑐸 𑐮𑑂𑐫𑐵𑐏𑑄 𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳 𑐴𑐣𑐾𑐐𑐸 𑐎𑑂𑐰𑑅𑐕𑐶𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐗𑐷 𑐣𑐾𑐰𑐵𑑅𑐟𑐫𑑂 𑐕𑐸𑑄 𑐣𑑄 𑐣𑐏𑑅𑐔𑐏𑑅 𑐩𑐮𑐵𑐂𑐐𑐸 𑐃𑐫𑐵𑐟 𑐢𑑂𑐫𑐵𑐣𑐫𑑂 𑐟𑐫𑐵𑑅 𑐩𑐵𑐬𑑂𑐔 𑐩𑐴𑐶𑐣𑐵𑐫𑐵 𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐱𑐣𑐶𑐰𑐵𑑅 𑐴𑐮𑐶𑑄 𑐣𑐾𑐰𑐵𑑅 𑐡𑐶𑐰𑐳 𑐣𑑂𑐫𑐵𑐫𑐾𑐎𑐾𑐐𑐸 𑐎𑑂𑐰𑐕𑐶𑐣𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋

𑐣𑐾𑐰𑐵𑑅𑐟𑐫𑑂𑐟 𑐣𑑂𑐴𑑄𑐎𑐵 𑐕𑑂𑐰𑐫𑐾𑐐𑐸 𑐄𑐡𑑂𑐡𑐾𑐱𑑂𑐫𑑄 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐕𑐐𑐹 𑐕𑐐𑐹 𑐫𑐵𑐫𑐵𑑄 𑐠𑐷𑐠𑐷 𑐫𑑀𑐖𑐣𑐵𑐟 𑐴𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐳𑑂𑐰𑐣𑐶𑐐𑑅𑐮𑐶𑐳𑐾𑑄 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟 𑐳𑐎𑐮𑐾𑑄 𑐕𑐢𑐷𑐕𑐥𑑂𑐥𑑃 𑐖𑐸𑐫𑐵𑑅 𑐁𑐣𑑂𑐡𑑀𑐮𑐣𑐫𑑂 𑐎𑐸𑐴𑐵𑑄 𑐰𑐫𑐾𑐩𑐵𑑅𑐐𑐸 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐵𑑄𑐖𑐵𑑅𑐩𑑂𑐴 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐖𑐸𑐖𑐸𑐎𑐵𑐖𑐷 𑐬𑑄𑐖𑐶𑐟 𑐰 𑐎𑐮𑐵𑐎𑐵𑐬 𑐩𑐴𑐣𑑂𑐟 𑐩𑐮𑑂𑐮𑑄 𑐩𑑂𑐫𑐾𑑃 𑐴𑐵𑐮𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS