Read news in NepalBhasa text-- www.hamroschool.com BACK 𑐗𑐵𑐥𑐵𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐫𑐾𑐟 𑐖𑐐𑑂𑐐𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐗𑐵𑐥𑐵𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐫𑐾𑐟 𑐖𑐐𑑂𑐐𑐵

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐀𑐬𑑂𑐖𑐸𑐣𑐢𑐵𑐬𑐵 𑐣𑐐𑐬 𑐳𑐩𑐶𑐟𑐶 𑐗𑐵𑐥𑐵𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐥𑑂𑐬𑐰𑐬𑑂𑐟𑐎 𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐱𑑄𑐏𑐢𑐬 𑐳𑐵𑐏𑑂𑐰𑐵𑐫𑐵 𑐗𑑂𑐰𑐵𑐟𑐵 𑐥𑐮𑐶𑐳𑑂𑐠𑐵 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐡𑐾𑐫𑑂 𑐡𑐧𑐹 𑐀𑐬𑑂𑐖𑐸𑐣𑐢𑐵𑐬𑐵 𑐖𑐐𑑂𑐐𑐵 𑐣𑑄 𑐥𑑂𑐬𑐵𑐥𑑂𑐟 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐖𑐐𑑂𑐐𑐵 𑐥𑑂𑐬𑐵𑐥𑑂𑐟𑐶𑐮𑐶𑐳𑐾𑑄 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐥𑐮𑐶𑐳𑑂𑐠𑐫𑐵 𑐣𑐶𑑄𑐟𑐶𑑄 𑐱𑐶𑐮𑐵𑐣𑑂𑐫𑐵𑐳 𑐮𑐶𑐳𑐾𑑄 𑐮𑐵𑐏𑐾 𑐥𑑂𑐫𑐵𑐏𑑄𑐫𑐵 𑐣𑑄 𑐄𑐮𑐾𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋

𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐟𑐫𑐾𑐟 𑐳𑐵𑐮𑐧𑐵𑐬𑐷 𑐣𑐩𑐹𑐣𑐵 𑐰𑐣 𑐎𑑂𑐲𑐾𑐟𑑂𑐬𑐫𑑂 𑐎𑐬𑐶𑐧 𑑑𑑒 𑐎𑐛𑑂𑐛𑐵 𑐖𑐐𑑂𑐐𑐵 𑐎𑐵𑐫𑐾𑐟 𑐟𑐵𑑅𑐮𑐵𑑅𑐐𑐸 𑐏𑑃 𑐡𑐾𑐫𑑂 𑐡𑐧𑐹 𑐀𑐬𑑂𑐖𑐸𑐣𑐢𑐵𑐬𑐵 𑐣𑐐𑐬 𑐳𑐩𑐶𑐟𑐶 𑐗𑐵𑐥𑐵𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐫𑐾𑐟 𑐖𑐐𑑂𑐐𑐵 𑐎𑐵𑐫𑐾𑐟 𑐟𑐵𑑅𑐮𑐵𑑅𑐐𑐸 𑐠𑐵𑐫𑑂 𑐄𑐐𑐸 𑐮𑐵𑐐𑐵𑐫𑐵 𑐥𑐬𑑂𑐫𑐚𑐣 𑐎𑑂𑐲𑐾𑐟𑑂𑐬 𑐣𑑄 𑐏𑑅 𑑋 𑐥𑐬𑑂𑐫𑐚𑐣 𑐎𑑂𑐲𑐾𑐟𑑂𑐬 𑐖𑐹𑐐𑐸𑐮𑐶𑑄 𑐄𑐐𑐸 𑐮𑐵𑐐𑐵𑐫𑐵 𑐡𑐎𑐮𑐫𑑂 𑐟𑐖𑐵𑑅𑐐𑐸 𑐠𑐵𑐳𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐥𑐮𑐶𑐳𑑂𑐠𑐵 𑐫𑐵𑐫𑐾𑐐𑐸 𑐣𑐐𑐬 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐬𑐸𑐡𑑂𑐬𑐩𑐞𑐷 𑐱𑑂𑐬𑐾𑐲𑑂𑐛𑑄 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐠𑐸𑐐𑐸 𑐖𑑂𑐫𑐵𑐫𑐵 𑐣𑐶𑑄𑐟𑐶𑑄 𑐀𑐬𑑂𑐖𑐸𑐣𑐢𑐵𑐬𑐵 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐧𑐮𑐡𑐾𑐰 𑐳𑐶𑑄𑐴 𑐐𑑀𑐩𑑂𑐡𑐾𑐣 𑐟𑐵𑐩𑐵𑐒, 𑑑 𑐣𑑄 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡 𑐧𑐶𑐬𑑂𑐏 𑐥𑑂𑐬𑐢𑐵𑐣𑑄 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐷𑐐𑐸 𑐣𑐵𑐫𑑅 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐡𑐾𑐫𑑂 𑐡𑐧𑐹𑐫𑐵 𑐳𑐔𑐶𑐰 𑐡𑐶𑐣𑐾𑐱 𑐱𑐵𑐎𑑂𑐫𑑄 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵𑐫𑐵 𑐱𑐶𑐮𑐵𑐣𑑂𑐫𑐵𑐳 𑐫𑐵𑐣𑐵𑐡𑐶𑐳𑐾𑑄 𑐡𑐾𑐫𑑂 𑐡𑐧𑐹 𑐎𑐾𑐣𑑂𑐡𑑂𑐬𑐥𑐵𑐏𑐾𑑄 𑐣𑑄 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐥𑐮𑐶𑐳𑑂𑐠𑐵𑐮𑐶𑐳𑐾𑑄 𑐁𑑅 𑐄𑐐𑐸 𑐎𑑂𑐲𑐾𑐟𑑂𑐬𑐫𑑂 𑐨𑐶𑑄𑐡𑑂𑐫𑑅𑐫𑐵 𑐡𑐾𑐐𑑅, 𑐧𑑁𑐡𑑂𑐢 𑐔𑐿𑐟𑑂𑐫, 𑐡𑐾𑐐𑑅 𑐰 𑐨𑐰𑐣 𑐣𑑄 𑐡𑐫𑐾𑐎𑐾𑐐𑐸 𑐫𑑀𑐖𑐣𑐵 𑐡𑐸𑐐𑐸 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐗𑐵𑐥𑐵 𑐖𑐶𑐮𑑂𑐮𑐵𑐫𑐵 𑐠𑐷𑐠𑐷 𑐏𑐮𑑅𑐫𑐵 𑐥𑐸𑐔𑑅 𑐰 𑐖𑐵𑐟𑐷𑐫 𑐳𑑄𑐐𑐛𑐣𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑐫𑑂 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS