Read news in NepalBhasa text-- www.hamroschool.com BACK 𑐏𑑃𑐫𑑂 𑐩𑐏𑐸 𑐰𑑂𑐫𑐰𑐴𑐵𑐬𑐫𑑂 𑐴𑐶𑐄𑐥𑐵𑑅 𑐁𑐰𑐱𑑂𑐫𑐎 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐏𑑃𑐫𑑂 𑐩𑐏𑐸 𑐰𑑂𑐫𑐰𑐴𑐵𑐬𑐫𑑂 𑐴𑐶𑐄𑐥𑐵𑑅 𑐁𑐰𑐱𑑂𑐫𑐎

𑐴𑐬𑐾𑐎 𑐡𑐾𑐱𑐫𑑂 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵𑐟 𑐬𑐵𑐖𑑂𑐫, 𑐢𑐵𑐬𑑂𑐩𑐶𑐎 𑐳𑑄𑐳𑑂𑐠𑐵 𑐰𑐵 𑐱𑐵𑐳𑐎𑐟𑐫𑑂𑐳𑑄 𑐫𑐵𑑅𑐐𑐸 𑐡𑐩𑐣𑐫𑐵 𑐩𑐸𑐡𑑂𑐡𑐵𑐫𑐵𑐟 𑐳𑐸𑐔𑑂𑐎𑐾𑐐𑐸 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐂, 𑐫𑐎𑑂𑐰 𑐠𑐵𑐳𑐫𑑂 𑐀𑐗 𑐣𑑄 𑐡𑐣𑐶 𑑋 𑐣𑑂𑐴𑑂𑐫𑐵𑐎𑑂𑐰 𑐴𑐾 𑐳𑐸𑐔𑑂𑐎𑐾𑐐𑐸 𑐎𑐸𑐟𑑅 𑐖𑐹𑐳𑐵𑑄 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫 𑐡𑐸𑐣𑐾 𑐀𑐖𑑂𑐫𑐵𑑅𑐐𑐸 𑐡𑐩𑐣𑐫𑐵 𑐑𑐵𑑅 𑐀𑐗𑑄 𑐮𑑂𑐫𑐣𑐵𑐔𑑂𑐰𑑄𑐐𑐸 𑐡𑐣𑐷 𑑋 𑐠𑑅𑐐𑐸 𑐂𑐟𑐶𑐴𑐵𑐳 𑐰 𑐥𑐹𑐬𑑂𑐏𑐵𑐥𑐶𑑄𑐟 𑐫𑐵𑑅𑐐𑐸 𑐣𑐬𑐳𑑄𑐴𑐵𑐬𑐫𑐵 𑐧𑐵𑐏𑑄 𑐥𑐸𑐳𑑂𑐟𑐵𑐣𑑂𑐟𑐬𑐞 𑐖𑐸𑐫𑐵𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐴𑐾 𑐕𑐐𑐹 𑐣𑐬𑐳𑑄𑐴𑐵𑐬 𑐎𑑂𑐫𑐵𑐣𑐵𑐜𑐵𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑑂 𑐣𑑄 𑐖𑐹𑐐𑐸 𑐏𑑅 𑑋 𑐳𑐣𑑂 𑑑𑑘𑑗𑑐 𑐣𑐶𑐳𑐾𑑄 𑑑𑑙𑑙𑑖 𑐟𑐎 𑐬𑑀𑐩𑐣 𑐎𑑂𑐫𑐵𑐠𑑀𑐮𑐶𑐎 𑐔𑐬𑑂𑐔𑑄 𑐎𑑂𑐫𑐵𑐣𑐵𑐜𑐵𑐫𑑂 𑐔𑐵𑐫𑐾𑐎𑐹𑐐𑐸 𑐁𑐰𑐵𑐳𑐶𑐫 𑐧𑑂𑐰𑐣𑐾𑐎𑐸𑐠𑐶 𑐡𑐸𑐣𑐾 𑐀𑐣𑐫𑐵 𑐁𑐡𑐶𑐰𑐵𑐳𑐷 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐣𑐬𑐳𑑄𑐴𑐵𑐬 𑐖𑐹𑐐𑐸 𑐏𑑅 𑑋 𑐀𑐖𑑂𑐫𑐵𑑅𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑑃𑐥𑐶𑑄 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟 𑐡𑐸𑐰𑑂𑐬𑑂𑐫𑐰𑐴𑐵𑐬, 𑐬𑑀𑐐 𑐰 𑐎𑐸𑐥𑑀𑐲𑐞𑐫𑐵 𑐳𑐶𑐎𑐵𑐬 𑐖𑐸𑐫𑐵𑑅 𑐳𑐶𑐣𑐵𑐰𑑄𑐐𑐸 𑐏𑑅 𑑋 𑐀𑐮𑐾 𑐠𑐸𑐥𑐶𑑄 𑐦𑐸𑐎𑑂𑐎𑑄 𑐀𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟 𑐖𑐹𑐐𑐸𑐮𑐶𑑄 𑐴𑐾 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐡𑐟𑐶 𑐖𑐹𑐐𑐸 𑐏𑑅 𑑋

𑐎𑑂𑐫𑐵𑐣𑐵𑐜𑐵𑐫𑐵 𑐳𑐟𑑂𑐫𑐣𑐶𑐬𑐸𑐥𑐞 𑐟𑐠𑐵 𑐩𑐾𑐮𑐩𑐶𑐮𑐵𑐥 𑐁𑐫𑑀𑐐𑑄 𑐳𑐣𑑂 𑑒𑑐𑑑𑑕𑐫𑑂 𑐣𑑂𑐴𑑂𑐫𑐧𑑂𑐰𑑅𑐐𑐸 𑐥𑑂𑐬𑐟𑐶𑐰𑐾𑐡𑐣𑑄 𑐠𑐸𑐐𑐸 𑐖𑑂𑐫𑐵𑐫𑐵𑐟 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫 𑐰𑐶𑐬𑐸𑐡𑑂𑐢𑐫𑐵 ‘𑐳𑐵𑑄𑐳𑑂𑐎𑐺𑐟𑐶𑐎 𑐣𑐬𑐳𑑄𑐴𑐵𑐬’ 𑐢𑐵𑑅𑐐𑐸 𑐡𑐸 𑑋 𑐁𑐰𑐵𑐳𑐷𑐫 𑐧𑑂𑐰𑐣𑐾𑐎𑐸𑐠𑐶𑐫𑐵 𑐩𑐹 𑐁𑐖𑑂𑐖𑐹 𑐢𑐫𑐵𑐐𑐸 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐩𑐳𑑂𑐟𑐫𑑂𑐟 𑐄𑐩𑐶𑐐𑐸 𑐳𑐩𑐸𑐡𑐵𑐫𑐥𑐵𑐏𑐾𑑄 𑐟𑐵𑐥𑐵𑐎 𑐟𑐫𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐃𑐱𑐵𑐂𑐎𑐬𑐞 𑐫𑐵𑐫𑐾𑐐𑐸 𑐏𑑅 𑑋 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐩𑐣𑐹𑐟𑐫𑑂𑐟 𑐧𑑂𑐰𑐣𑐾𑐩𑐧𑐷𑐐𑐸, 𑐟𑐬 𑐥𑑂𑐬𑐵𑐠𑐩𑐶𑐎 𑐬𑐸𑐥𑑄 𑐄𑐩𑐶𑐐𑐸 𑐳𑐩𑐸𑐡𑐵𑐫𑐣𑐵𑐥𑐫𑐵 𑐳𑑂𑐰𑐵𑐥𑐹 𑐟𑑂𑐰𑐵𑑅𑐠𑐮𑐾𑐐𑐸 𑐎𑐠𑑄 𑐧𑑂𑐰𑐣𑐾𑐎𑐸𑐠𑐶𑑄 𑐫𑑀𑐖𑐣𑐵 𑐡𑐫𑐾𑐎𑐵𑐟𑑅𑐐𑐸 𑐏𑑅 𑑋

𑐁𑐫𑑀𑐐𑐫𑐵 𑐥𑑂𑐬𑐟𑐶𑐰𑐾𑐡𑐣 𑐎𑐠𑑄 𑐧𑑂𑐰𑐣𑐾𑐎𑐸𑐠𑐶 𑐡𑐸𑐣𑐾 𑐱𑐵𑐬𑐬𑐷𑐎 𑐰 𑐫𑑁𑐣 𑐱𑑀𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵𑑄 𑐫𑐵𑐣𑐵𑑅 𑐣𑑄 𑐁𑐥𑐵𑐮𑑄 𑐰𑐶𑐡𑑂𑐫𑐵𑐬𑑂𑐠𑐷 𑐳𑐷𑐐𑐸 𑐏𑑅 𑑋 𑐳𑐬𑐎𑐵𑐬𑐷 𑐟𑐠𑑂𑐫𑐵𑑄𑐎 𑐎𑐠𑑄 𑐥𑑂𑐫𑐡𑑂𑐰𑑅 𑐩𑐳𑑂𑐟 𑐠𑐖𑑂𑐫𑐵𑑅𑐐𑐸 𑐴𑐸𑐣𑐶𑑄 𑐩𑐡𑐸𑐐𑐸 𑐢𑐵𑑅𑐳𑐵𑑄 𑐠𑐸𑐎𑐷𑐫𑐵 𑐮𑑂𑐫𑐵𑑅 𑐟𑐳𑐎𑑄 𑐀𑐥𑑂𑐰𑑅 𑐖𑐸𑐂𑐦𑐸𑐐𑐸 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐡𑐵𑐰𑐷 𑐡𑐸 𑑋 𑐠𑐐𑐸𑐣𑐾 𑐖𑐎 𑐣𑑂𑐴𑐵𑐥𑐵 𑐎𑐵𑐮𑐮𑐸𑐥𑑂𑐳 𑐂𑐣𑑂𑐜𑐶𑐫𑐣 𑐁𑐰𑐵𑐳𑐶𑐫 𑐧𑑂𑐰𑐣𑐾𑐎𑐸𑐠𑐶 𑐡𑐸𑐐𑐸 𑐠𑐵𑐳𑐫𑑂 𑑒𑑑𑑕 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐔𑐶𑐴𑐵𑐣 𑐮𑐸𑐂𑐎𑐹𑐐𑐸 𑐏𑑅 𑑋

𑐟𑑅𑐡𑑃𑐫𑐵 𑐱𑑀𑐳𑐣 𑐰 𑐀𑐟𑑂𑐫𑐵𑐔𑐵𑐬𑐫𑐵𑐟 𑐎𑐫𑐵𑑅 𑐰𑑄𑐐𑐸 𑐰𑐵𑐮𑐫𑑂 𑐥𑑀𑐥 𑐦𑑂𑐬𑐵𑐣𑑂𑐳𑐶𑐳𑑄 𑐎𑑂𑐲𑐩𑐵𑐫𑐵𑐔𑐣𑐵 𑐫𑐵𑐟 𑑋 𑐎𑑂𑐫𑐵𑐣𑐵𑐜𑐵 𑐨𑑂𑐬𑐩𑐞𑐫𑐵 𑐗𑑂𑐰𑐮𑐫𑑂 𑐥𑑀𑐥 𑐦𑑂𑐬𑐵𑐣𑑂𑐳𑐶𑐳𑑄 𑐀𑐮𑑂𑐧𑐬𑑂𑐚𑐵𑐫𑐵 𑐩𑐵𑐳𑑂𑐎𑑀𑐔𑐶𑐳𑐫𑑂 𑐣𑑂𑐰𑐰𑐵𑐳𑐾𑑄 𑐬𑑀𑐩𑐣 𑐎𑑂𑐫𑐵𑐠𑑀𑐮𑐶𑐎 𑐔𑐬𑑂𑐔𑑄 𑐳𑑄𑐔𑐵𑐮𑐣 𑐫𑐵𑑅𑐐𑐸 𑐁𑐰𑐵𑐳𑐶𑐫 𑐧𑑂𑐰𑐣𑐾𑐎𑐸𑐠𑐶 𑐡𑐸𑐣𑐾 𑐁𑐡𑐶𑐰𑐵𑐳𑐷 𑐩𑐳𑑂𑐟𑐫𑑂𑐟 𑐖𑐹𑐐𑐸 𑐖𑑂𑐫𑐵𑐡𑐟𑐶𑐫𑐵 𑐰𑐶𑐲𑐫𑐫𑑂 𑐎𑑂𑐲𑐩𑐵𑐫𑐵𑐔𑐣𑐵 𑐫𑐵𑑅𑐐𑐸 𑐏𑑅 𑑋 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐣𑑄 𑐠𑐸𑐐𑐸 𑐴𑐾 𑐡𑑃𑐫𑑂 𑐥𑑀𑐥 𑐦𑑂𑐬𑐵𑐣𑑂𑐳𑐶𑐳𑑄 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐳𑑄𑐳𑑂𑐎𑐺𑐟𑐶 𑐥𑑂𑐬𑐟𑐶 𑐎𑑂𑐫𑐵𑐠𑑀𑐮𑐶𑐎 𑐔𑐬𑑂𑐔𑑄 𑐳𑐩𑑂𑐩𑐵𑐣 𑐩𑐫𑐵𑑅𑐐𑐸 𑐢𑐵𑐳𑐾𑑄 𑐮𑐖𑑂𑐖𑐵 𑐰 𑐱𑑀𑐎 𑐰𑑂𑐫𑐎𑑂𑐟 𑐫𑐵𑑅𑐐𑐸 𑐏𑑅 𑑋

𑐎𑑂𑐫𑐵𑐣𑐵𑐜𑐵𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐟𑐫𑑂𑐳𑑄 𑐥𑑀𑐥𑐫𑐵 𑐁𑐟𑑂𑐩𑐁𑐮𑑀𑐔𑐣𑐵 𑐳𑐎𑐵𑐬𑐵𑐟𑑂𑐩𑐎 𑐖𑐹𑐳𑐵𑑄 𑐠𑐸𑐮𑐶𑑄 𑐋𑐟𑐶𑐴𑐵𑐳𑐶𑐎 𑐣𑐬𑐳𑑄𑐴𑐵𑐬𑐫𑐵𑐟 𑐣𑑂𑐫𑐵𑐫 𑐩𑐧𑐷𑐐𑐸 𑐟𑐬𑑂𑐎 𑐟𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐏𑑃𑐫𑑂 𑐳𑑂𑐰𑐫𑐵𑑄 𑐖𑑂𑐫𑐵 𑐫𑐵𑐣𑐵𑑅 𑐎𑑂𑐫𑑄𑐳𑐵 𑐖𑐎 𑐢𑐵𑐠𑐾𑑄𑐫𑐵 𑐣𑑂𑐫𑐵𑐫 𑐖𑐸𑐂𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐣𑐬𑐳𑑄𑐴𑐵𑐬𑐫𑐵 𑐣𑐶𑐲𑑂𑐥𑐎𑑂𑐲 𑐕𑐵𑐣𑐧𑐶𑐣 𑐖𑐸𑐂𑐩𑐵𑑅𑐐𑐸 𑐩𑐵𑐐 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐡𑐸 𑑋 𑐣𑐵𑐥𑑄 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐠𑐵𑐫𑑂, 𑐳𑑄𑐳𑑂𑐎𑐺𑐟𑐶 𑐰 𑐨𑐵𑐫𑑂𑐫𑐵𑐟 𑐄𑐥𑐣𑐶𑐰𑐾𑐱 𑐡𑐫𑐾𑐎𑐵𑑅 𑐢𑑂𑐰𑐳𑑂𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸𑐮𑐶𑑄 𑐄𑐎𑐷𑐫𑐵 𑐥𑐸𑐣𑑅𑐄𑐟𑑂𑐠𑐵𑐣 𑐫𑐵𑐫𑐾𑐐𑐸𑐥𑐵𑐏𑐾 𑐣𑑄 𑐖𑑂𑐫𑐵 𑐖𑐸𑐂𑐩𑐵𑑅𑐐𑐸 𑐩𑐵𑐐 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑑂𑐫𑐵𑐠𑑀𑐮𑐶𑐎 𑐔𑐬𑑂𑐔𑑄 𑐠𑑅𑐥𑐶𑐣𑐶 𑐳𑑄𑐳𑑂𑐎𑐺𑐟𑐶, 𑐨𑐵𑐲𑐵 𑐰 𑐩𑐣𑐹𑐟𑐫𑑂 𑐕𑐾𑑃𑐖𑑅𑐫𑐵 𑐖𑐷𑐰𑐣 𑐰𑐶𑐣𑐵𑐱𑐫𑑂 𑐨𑐹𑐩𑐶𑐎𑐵 𑐩𑑂𑐴𑐶𑐟𑐹𑐐𑐸𑐮𑐶𑑄 𑐁𑑅 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑑂 𑐰𑑂𑐫𑐎𑑂𑐟 𑐖𑐹𑐐𑐸 𑐨𑐵𑐰𑐫𑐵𑐟 𑐖𑑂𑐫𑐵 𑐴𑐾 𑐫𑐵𑐣𑐵𑐎𑑂𑐫𑐣𑐾𑐦𑐸𑐳𑐵 𑐖𑐎 𑐀𑐖𑑂𑐫𑐵𑑅𑐐𑐸 𑐎𑑂𑐲𑐩𑐵𑐫𑐵𑐔𑐣𑐵𑑄 𑐳𑐵𑐬𑑂𑐠𑐎𑐟𑐵 𑐎𑐵𑐂𑐐𑐸 𑐡𑐵𑐧𑐷 𑐎𑑂𑐫𑐵𑐣𑐵𑐜𑐵𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐡𑐸 𑑋

𑐎𑑂𑐫𑐵𑐣𑐵𑐜𑐵𑐫𑑂 𑐠𑐾𑑄 𑐁𑐥𑐵𑐮𑑄 𑐡𑐾𑐱𑐫𑑂 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐟𑐫𑑂𑐟 𑐳𑐸𑐣𑐶𑐫𑑀𑐖𑐶𑐟 𑐟𑐰𑐬𑑄 𑐠𑑅𑐐𑐸 𑐂𑐟𑐶𑐴𑐵𑐳, 𑐳𑑄𑐳𑑂𑐎𑐺𑐟𑐶 𑐰 𑐨𑐵𑐫𑑂𑐥𑐵𑐏𑐾𑑄 𑐟𑐵𑐥𑐵𑐎 𑐟𑐫𑐾𑐐𑐸 𑐣𑐶𑑄𑐟𑐶𑑄 𑐬𑐵𑐖𑑂𑐫𑐥𑐵𑐏𑐾𑑄 𑐟𑑅𑐎𑑂𑐰𑑅 𑐎𑐸𑐟𑑅 𑐖𑐹𑐐𑐸 𑐡𑐸 𑑋 𑐴𑐮𑐶𑑄𑐣𑑂𑐫𑑄𑐎 𑐔𑑂𑐰𑑄𑐥𑐶𑑄 𑐁𑐡𑐶𑐰𑐵𑐳𑐷𑐟 𑐕𑐥𑑂𑐥𑑃 𑐖𑐸𑐫𑐵𑑅 𑐁𑐡𑐶𑐰𑐵𑐳𑐷𑐟𑐫𑑂 𑐩𑐸𑐡𑑂𑐡𑐵 𑐖𑐰𑐬𑑂𑐖𑐳𑑂𑐟𑐝𑑄𑐐𑑄 𑐣𑑂𑐴𑑂𑐫𑑅𑐣𑐾 𑐫𑑄𑐎𑐾𑐐𑐸 𑐳𑐸𑐬𑐸 𑐖𑐸𑐂𑐰𑑄 𑐁𑐡𑐶𑐰𑐵𑐳𑐷𑐟𑐫𑑂 𑐕𑐸𑑄 𑐕𑐸𑑄 𑐩𑐸𑐡𑑂𑐡𑐵𑐟 𑐳𑐩𑑂𑐧𑑀𑐢𑐣 𑐖𑐸𑐫𑐵𑐔𑑂𑐰𑑄𑐐𑐸 𑐣𑑄 𑐡𑐸 𑑋 𑐐𑐸𑐮𑐶𑐏𑐫𑑂 𑐡𑐾𑐫𑑂𑐫𑐵 𑐥𑑂𑐬𑐩𑐸𑐏𑐟𑐫𑑂𑐳𑑄 𑐁𑐡𑐶𑐰𑐵𑐳𑐷𑐟 𑐥𑑂𑐬𑐟𑐶 𑐬𑐵𑐖𑑂𑐫𑐥𑐵𑐏𑐾𑑄 𑐣𑑂𑐴𑐵𑐥𑐵 𑐫𑐵𑑅𑐐𑐸 𑐖𑑂𑐫𑐵𑐡𑐟𑐶 𑐥𑑂𑐬𑐟𑐶 𑐎𑑂𑐲𑐩𑐵𑐦𑑂𑐰𑐣𑐾𑐐𑐸 𑐟𑐎𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐟𑐫𑑂𑐟 𑐬𑐵𑐖𑑂𑐫𑐥𑐵𑐏𑐾𑑄 𑐳𑐩𑑂𑐧𑑀𑐢𑐣 𑐖𑐸𑐂𑐐𑐸 𑐕𑐐𑐹 𑐳𑐎𑐵𑐬𑐵𑐟𑑂𑐩𑐎 𑐥𑐎𑑂𑐲 𑐏𑐟 𑑋 𑐟𑐬 𑐀𑐗 𑐣𑑄 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐥𑐵𑐏𑐾𑑄 𑐮𑑂𑐴𑑂𑐰𑐣𑐵𑐔𑑂𑐰𑑄𑐐𑐸 𑐁𑐥𑐵𑐮𑑄 𑐩𑐸𑐡𑑂𑐡𑐵𑐫𑐵𑐟 𑐎𑐫𑐵𑑅 𑐱𑐵𑐳𑐎 𑐰𑐬𑑂𑐐 𑐀𑐣𑐸𑐡𑐵𑐬 𑐏𑐣𑐾𑐡𑐸 𑑋 𑐐𑐠𑐾𑐎𑐷 𑐥𑑀𑐥 𑐦𑑂𑐬𑐵𑐣𑑂𑐳𑐶𑐳𑑄 𑐎𑑂𑐲𑐩𑐵𑐫𑐵𑐔𑐣𑐵 𑐫𑐵𑑅𑐳𑐵𑑄 𑐀𑐣𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫 𑐥𑑂𑐬𑐟𑐶 𑐖𑐹𑐐𑐸 𑐄𑐥𑐣𑐶𑐰𑐾𑐱𑐫𑐵𑐟 𑐨𑐶𑑄𑐎𑐾𑐐𑐸, 𑐄𑐩𑐶𑐐𑐸 𑐠𑐵𑐫𑑂𑐫𑐵𑐟 𑐎𑐧𑑂𑐖𑐵 𑐫𑐵𑑅𑐐𑐸, 𑐳𑑄𑐳𑑂𑐎𑐺𑐟𑐶 𑐰 𑐨𑐵𑐫𑑂𑐫𑐵𑐟 𑐲𑐜𑑂𑐫𑐣𑑂𑐟𑑂𑐬𑐥𑐹𑐬𑑂𑐰𑐎 𑐰𑐶𑐣𑐵𑐱 𑐫𑐵𑑅𑐐𑐸𑐮𑐶𑑄 𑐄𑐩𑐶𑐐𑐸 𑐳𑑄𑐬𑐎𑑂𑐲𑐞 𑐮𑐐𑐵𑐫𑐟𑐫𑐵 𑐩𑐸𑐡𑑂𑐡𑐵𑐟 𑐀𑐗 𑐮𑑂𑐫𑑄𑑄 𑐡𑐣𑐶 𑑋

𑐎𑑂𑐫𑐵𑐣𑐵𑐜𑐵, 𑐀𑐲𑑂𑐚𑑂𑐬𑐾𑐮𑐶𑐫𑐵, 𑐩𑐾𑐎𑑂𑐳𑐶𑐎𑑀, 𑐧𑑂𑐬𑐵𑐖𑐶𑐮 𑐣𑐶𑐳𑐾𑑄 𑐳𑑄𑐫𑐸𑐎𑑂𑐟 𑐬𑐵𑐖𑑂𑐫 𑐀𑐩𑐾𑐬𑐶𑐎𑐵𑐫𑑂 𑐣𑑄 𑐄𑐥𑐣𑐶𑐰𑐾𑐱 𑐎𑐵𑐫𑐩 𑐖𑐸𑐂𑐢𑐸𑑄𑐎𑐵𑑅 𑐀𑐣𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫 𑐥𑑂𑐬𑐟𑐶 𑐖𑐸𑐫𑐵𑐔𑑂𑐰𑑄𑐐𑐸 𑐀𑐟𑑂𑐫𑐵𑐔𑐵𑐬 𑐰 𑐄𑐎𑐷𑐫𑐵 𑐣𑑂𑐫𑐫𑑀𑐔𑐶𑐟 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂 𑐮𑑂𑐫𑑄𑐡𑐣𑐶 𑑋 𑐴𑐮𑐶𑑄𑐣𑑂𑐫𑑄𑐎 𑐠𑐾𑑄 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫 𑐁𑐣𑑂𑐟𑐬𑐶𑐎 𑐄𑐥𑐣𑐶𑐰𑐾𑐱𑐫𑐵 𑐱𑐶𑐎𑐵𑐬 𑐖𑐹𑐐𑐸 𑐏𑑅 𑑋 𑑒𑑐𑑗𑑒 𑐳𑐵𑐮𑐫𑑂 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐫𑑂 𑐩𑐸𑐡𑑂𑐡𑐵 𑐳𑐩𑑂𑐧𑑀𑐢𑐣 𑐫𑐵𑐫𑐾𑐐𑐸 𑐕𑐸𑑄 𑐨𑐔𑐵 𑐎𑐸𑐟𑑅 𑐖𑐹𑐳𑐵𑑄 𑐠𑐣 𑐫𑐵𑐫𑐾𑐮𑑂𑐫𑑄 𑐡𑐣𑐶𑐐𑐸 𑐖𑑂𑐫𑐵𑐏𑑃 𑐫𑐎𑑂𑐰 𑐡𑐣𑐶 𑑋

𑐎𑑂𑐫𑐵𑐣𑐵𑐜𑐵𑐫𑐵 𑐬𑐿𑐠𑐵𑐣𑐾 𑐳𑐨𑐵 (𑐊𑐳𑐾𑐩𑑂𑐧𑐮𑐷 𑐀𑐦 𑐦𑐳𑑂𑐚 𑐣𑐾𑐱𑐣) 𑐫𑐵 𑐥𑑂𑐬𑐩𑐸𑐏 𑐬𑑀𑐖 𑐊𑐣𑐶 𑐁𑐬𑑂𑐎𑐶𑐧𑐵𑐮𑑂𑐜𑐫𑐵 𑐎𑐠𑑄 𑐎𑑂𑐫𑐵𑐣𑐵𑐜𑐵𑐫𑑂 𑐬𑐿𑐠𑐵𑐣𑐾𑐟𑐫𑑂𑐟 𑐎𑑂𑐲𑐩𑐵 𑐦𑑂𑐰𑐣𑐵 𑐖𑐎 𑐩𑐐𑐵𑑅, 𑐖𑑂𑐫𑐵 𑐳𑑂𑐰𑐫𑐵𑑄 𑐟𑑅𑐳𑐮𑑄 𑐖𑑂𑐫𑐵 𑐖𑐸𑐂𑐩𑐵 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐁𑐡𑐶𑐰𑐵𑐳𑐷𑐟𑐫𑑂 𑐳𑑄𑐳𑑂𑐎𑐺𑐟𑐶 𑐰 𑐨𑐵𑐲𑐵 𑐰𑐶𑐣𑐵𑐳 𑐣𑐵𑐥𑑄 𑐩𑐳𑑂𑐟 𑐳𑐷𑐐𑐸 𑐏𑑃𑐫𑑂 𑐎𑑂𑐫𑐵𑐠𑑀𑐮𑐶𑐎 𑐔𑐬𑑂𑐔𑐫𑐵 𑐨𑐹𑐩𑐶𑐎𑐵 𑐡𑐸𑐐𑐸 𑐢𑐎𑐵𑑅 𑐳𑑄𑐳𑑂𑐠𑐵𑐐𑐟 𑐬𑐸𑐥𑑄 𑐳𑑂𑐰𑐷𑐎𑐵𑐬 𑐫𑐵𑐫𑐾𑐩𑐵𑑅 𑑋 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐎𑑂𑐲𑐩𑐵 𑐢𑐫𑐵𑐐𑐸 𑐰𑑂𑐫𑐰𑐴𑐵𑐬𑐫𑑂 𑐴𑐶𑐄𑐥𑐵𑑅 𑐏𑑅 𑑋 𑐗𑐷 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑑂 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑑅𑐰𑐣𑐾𑐩𑐵𑑅, 𑐗𑐷𑐳𑑄 𑐖𑑂𑐫𑐵 𑐫𑐵𑐣𑐵𑑅 𑐎𑑂𑐫𑐣𑐾𑐩𑐵𑑅 𑑋’

𑐎𑑂𑐫𑐵𑐣𑐵𑐜𑐵𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐟𑐫𑑂𑐳𑑄 𑐢𑐵𑑅𑐠𑐾𑑄 𑐠𑑁𑑄 𑐴𑐮𑐶𑐣𑑂𑐫𑑄𑐎𑐫𑐵 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐥𑑂𑐬𑐟𑐶 𑐳𑐴𑐵𑐞𑐸𑐨𑐹𑐟𑐶 𑐎𑑂𑐫𑐣𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐳𑐵𑑄 𑐠𑐸𑐎𑐷𑐫𑐵𑐟 𑐰𑑂𑐫𑐰𑐴𑐵𑐬𑐫𑑂 𑐎𑑂𑐫𑐣𑐾𑐐𑐸 𑐟𑑅𑐢𑑄𑐐𑐸 𑐏𑑃 𑐏𑑅 𑑋 𑐣𑐾𑐥𑐵𑐮𑐫𑑂 𑐣𑑄 𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐵 𑐧𑐵𑐬𑐾 𑐬𑐵𑐖𑑂𑐫𑐥𑐵𑐏𑐾𑑄 𑐫𑐎𑑂𑐰 𑐏𑑃 𑐖𑐹𑐳𑐵𑑄 𑐄𑐩𑐶𑐐𑐸 𑐂𑐟𑐶𑐴𑐵𑐳𑐫𑐵𑐟 𑐐𑐸𑐎𑐠𑑄 𑐮𑑂𑐫𑑄𑐎𑐾𑐐𑐸, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐐𑐸𑐎𑐠𑑄 𑐮𑑂𑐫𑑄𑐎𑐾𑐐𑐸 𑐰 𑐨𑐵𑐫𑑂𑐫𑐵𑐟 𑐐𑐸𑐎𑐠𑑄 𑐩𑑂𑐰𑐵𑐎𑐵𑐟𑐫𑐾𑐐𑐸 𑐢𑐫𑐵𑐐𑐸 𑐥𑑂𑐬𑐩𑐸𑐏 𑐏𑑃 𑐏𑑅 𑑋

𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐮𑐶𑐥𑐵 𑐁𑐡𑐶𑐰𑐵𑐳𑐷 𑐁𑐫𑑀𑐐, 𑐳𑐩𑐵𑐰𑐾𑐱𑐷 𑐁𑐫𑑀𑐐, 𑐨𑐵𑐲𑐵 𑐁𑐫𑑀𑐐 𑐣𑐷𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐟𑐬 𑐐𑐣𑑄 𑐥𑑂𑐬𑐩𑐸𑐏 𑐧𑐵𑐴𑐾𑐎𑐫𑐵 𑐥𑐡𑐵𑐢𑐶𑐎𑐵𑐬𑐷 𑐩𑐡𑐸 𑑋 𑐐𑐣𑑄 𑐁𑐫𑑀𑐐𑑄 𑐟𑐫𑐵𑐬 𑐫𑐵𑑅𑐐𑐸 𑐥𑑂𑐬𑐟𑐶𑐰𑐾𑐡𑐣 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾𑐟 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂 𑐂𑐔𑑂𑐕𑐵 𑐩𑐡𑐸 𑑋

𑐁𑐡𑐶𑐰𑐵𑐳𑐷𑐟 𑐣𑐾𑐥𑐵𑑅𑐫𑐵 𑐟𑐶𑐳𑐵 𑐏𑑅 𑑋 𑐄𑐩𑐶𑐐𑐸 𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐶 𑐣𑐾𑐥𑐵𑑅𑐫𑐵 𑐥𑐴𑐶𑐔𑐵𑐣 𑐏𑑅 𑑋 𑐏𑑃𑐮𑑂𑐴𑐵𑐧𑐮𑑂𑐴𑐵𑐫𑑂 𑐦𑐸𑐎𑑂𑐎 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐳𑑄 𑐠𑐸𑐎𑐷𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐰𑑂𑐫𑐰𑐴𑐵𑐬𑐫𑑂 𑐰 𑐴𑐾 𑐳𑑄𑐳𑑂𑐎𑐺𑐟𑐶 𑐰 𑐨𑐵𑐫𑑂 𑐮𑑂𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐋𑐣 𑐎𑐵𑐣𑐹𑐣 𑐡𑐫𑐾𑐎𑐾 𑐢𑐵𑑅𑐳𑐵 𑐂𑐔𑑂𑐕𑐸𑐎 𑐩𑐖𑐹 𑑋 𑐕𑐰𑐵𑑅 𑐮𑐶𑐥𑐵 𑐰𑐶𑐱𑑂𑐰 𑐁𑐡𑐶𑐰𑐵𑐳𑐷 𑐡𑐶𑐰𑐳 𑐰𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐬𑐵𑐖𑑂𑐫𑐥𑐵𑐏𑐾𑑄 𑐁𑐡𑐶𑐰𑐵𑐳𑐷 𑐡𑐶𑐰𑐳𑐫𑐵 𑐨𑐶𑑄𑐟𑐸𑐣𑐵 𑐮𑐵 𑐧𑐷, 𑐟𑐬 𑐠𑑁𑑄 𑐗𑐷𑐳𑑄 𑐬𑐵𑐖𑑂𑐫𑐥𑐵𑐏𑐾𑑄 𑐎𑐵𑐫𑐾𑐩𑐵𑑅𑐐𑐸 𑐎𑐾𑐰𑐮 𑐨𑐶𑑄𑐟𑐸𑐣𑐵 𑐩𑐏𑐸 𑐣𑐶𑐱𑑂𑐔𑐶𑐟 𑐎𑐵𑐬𑑂𑐫𑐫𑑀𑐖𑐣𑐵 𑐏𑑅 𑑋

𑐁𑐡𑐶𑐰𑐵𑐳𑐷 𑐳𑐩𑐸𑐡𑐵𑐫𑐫𑐫𑐵 𑐩𑐸𑐡𑑂𑐡𑐵𑐫𑐵 𑐳𑐩𑑂𑐧𑑀𑐢𑐣 𑐖𑐸𑐂𑐐𑐸 𑐰𑑂𑐫𑐰𑐴𑐵𑐬𑐶𑐎 𑐖𑑂𑐫𑐵𑐏𑑃 𑐩𑐵𑑅𑐐𑐸 𑐡𑐸 𑑋 𑐎𑑂𑐫𑐵𑐣𑐵𑐜𑐵𑐫𑐵 𑐬𑐿𑐠𑐵𑐣𑐾 𑐳𑐨𑐵𑐫𑐵 𑐥𑑂𑐬𑐩𑐸𑐏 𑐬𑑀𑐖 𑐊𑐣𑐶 𑐁𑐬𑑂𑐎𑐶𑐧𑐵𑐮𑑂𑐜𑐫𑐵 𑐏𑑃𑐐𑑂𑐰𑑅 𑐟𑑂𑐫𑐵𑐳𑐵 𑐎𑐵𑐫𑐾𑐐𑐸 𑐏𑑅𑐳𑐵 𑐁𑐡𑐶𑐰𑐵𑐳𑐷𑐟𑐫𑑂𑐟 𑐡𑐎𑐮𑐫𑑂 𑐧𑐵𑑄𑐮𑐵𑐐𑐸 𑐎𑑂𑐲𑐩𑐵𑐫𑐵𑐔𑐣𑐵 𑐢𑐫𑐵𑐐𑐸 𑐏𑑃𑐫𑑂 𑐩𑐏𑐸, 𑐰𑑂𑐫𑐰𑐴𑐵𑐬𑐫𑑂 𑐴𑐶𑐄𑐥𑐵𑑅 𑐴𑐫𑐾𑐐𑐸 𑐏𑑅 𑑋 𑐠𑐸𑐐𑐸 𑐡𑑃𑐫𑐵 𑐁𑐡𑐶𑐰𑐵𑐳𑐷 𑐡𑐶𑐰𑐳 𑐣𑐶𑐳𑐾𑑄 𑐗𑐷𑐐𑐸 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐳𑑄 𑐣𑑄 𑐠𑑅𑐐𑐸 𑐰𑑂𑐫𑐰𑐴𑐵𑐬𑐫𑑂 𑐴𑐶𑐄𑐥𑐵𑑅 𑐴𑐫𑐾𑐦𑐫𑐾𑐩𑐵𑑅 𑑋 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷𑐟𑐫𑑂𑐟 𑐬𑐵𑐖𑑂𑐫𑐥𑐵𑐏𑐾𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐩𑐣𑐫𑐵 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐎𑑂𑐲𑐩𑐵𑐫𑐵𑐔𑐣𑐵 𑐠𑑂𑐰𑐴𑐾 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS