𑐳𑐵𑐥𑐵𑐬𑐸𑐫𑐵 𑐗𑑂𑐰𑐮𑐫𑑂 𑐳𑐵𑐫𑐵𑑅 𑐣𑐏𑑅
𑐫𑐮(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐗𑐷𑐐𑐸 𑐳𑑅 𑐰 𑐳𑐸𑐎𑐸𑐣𑑂𑐡𑐵 𑐦𑐶𑐮𑑂𑐩𑑂𑐳𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐳𑐵𑐥𑐵𑐬𑐸𑐫𑐵 𑐮𑐳𑐟𑐵𑐫𑑂 𑐰𑐂𑐐𑐸 𑐨𑐡𑑁 𑑔 𑐐𑐟𑐾 𑐱𑐣𑐶𑐰𑐵𑑅 𑐳𑐵𑐫𑐵𑑅 𑐣𑐏𑑅 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐫𑐮𑐫𑐵 𑐨𑑀𑐮𑐢𑑂𑐰𑐵𑐏𑐵𑐫𑑂 𑐔𑑂𑐰𑑄𑐐𑐸 𑐖𑑂𑐫𑐵𑐥𑐸 𑐳𑐩𑐵𑐖𑐫𑐵 𑐨𑐰𑐣𑐫𑑂 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐖𑐸𑐂𑐐𑐸 𑐖𑐵𑐣𑐎𑐵𑐬𑐷 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐧𑐶𑐄𑐐𑐸 𑐡𑐸 𑑋 𑐮𑑀𑐎𑑄𑐴𑑂𑐰𑐵𑑅𑐥𑐶𑑄 𑐎𑐮𑐵𑐎𑐵𑐬𑐟𑐫𑑂 𑐥𑑂𑐬𑐳𑑂𑐟𑐸𑐟𑐶 𑐡𑐂𑐐𑐸 𑐖𑑂𑐫𑐵𑐗𑑂𑐰𑑅 𑐣𑐶𑐐𑐹 𑐱𑑀 𑐎𑑂𑐫𑐣𑐾𑐐𑐸 𑐣𑑄 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋
𑐗𑐷𑐐𑐸 𑐳𑑅𑐫𑐵 𑐳𑑄𑐬𑐎𑑂𑐲𑐎 𑐣𑐵𑐥𑑄 𑐰𑐬𑐶𑐲𑑂𑐛 𑐳𑐶𑐣𑐾 𑐥𑐟𑑂𑐬𑐎𑐵𑐬 𑐰𑐶𑐖𑐫𑐬𑐟𑑂𑐣 𑐟𑐸𑐮𑐵𑐢𑐬𑑄 𑐏𑑂𑐫𑐵𑐮𑐶 𑐣𑐏𑑅 𑐖𑑂𑐫𑐵𑐗𑑂𑐰𑑅𑐥𑐵𑐏𑐾𑑄 𑐳𑑄𑐎𑐮𑐣 𑐖𑐹𑐐𑐸𑐩𑐢𑑂𑐫𑐾 𑐕𑐸𑑄 𑐢𑑂𑐫𑐧𑐵 𑐠𑑁𑑄𑐎𑐣𑑂𑐴𑐫𑑂 𑐰𑐵𑐳𑑅 𑐫𑐵𑐎𑐵𑐔𑑂𑐰𑐣𑐵𑐡𑐷𑐩𑑂𑐴 𑐐𑐵𑐫𑐎 𑐰 𑐳𑑄𑐐𑐷𑐟𑐎𑐵𑐬 𑐳𑐸𑐩𑐣 𑐎𑐥𑐵𑐮𑐷𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋
𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑑂𑐰𑐣𑐶𑐐𑑅𑐮𑐶𑐳𑐾𑑄 𑐣𑐾𑐰𑐵𑑅𑐟𑐫𑑂 𑐰𑐳𑑂𑐟𑐷𑐂 𑐣𑐾𑐥𑐵𑐮 𑐳𑑄𑐰𑐟𑑂𑐎𑐠𑑄 𑐗𑐶𑐐𑐹𑐐𑐸 𑐮𑐵 𑐐𑐸𑑄𑐮𑐵 𑐥𑐵𑐬𑐸𑐣𑐶𑐳𑐾𑑄 𑐕𑐰𑐵𑑅𑐟𑐎 𑐠𑐷𑐠𑐷 𑐠𑐵𑐳𑐫𑑂 𑐏𑑂𑐫𑐵𑐮𑑅 𑐎𑑂𑐫𑐣𑐾𑐐𑐸 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐥𑐬𑐩𑑂𑐥𑐬𑐵 𑐡𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐰𑐶𑐐𑐟𑐫𑑂 𑐟𑑂𑐰𑐵𑑅 𑐟𑑂𑐰𑐵𑐮𑐫𑑂 𑐡𑐧𑐹 𑐡𑐫𑐾𑐎𑐵𑑅 𑐣𑑄 𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐎𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸𑐮𑐶𑐂 𑐁𑑅 𑐰𑐫𑐵𑑅 𑐮𑑀𑐥 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐁𑑅 𑐰𑐫𑐵𑑅 𑐴𑐵𑐎𑐣𑑄 𑐠𑐸𑐐𑐸 𑐥𑐬𑐩𑑂𑐥𑐬𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐎𑐸𑐟𑑅 𑐖𑐹𑐐𑐸𑐮𑐶𑑄 𑐳𑐦𑐟𑐵𑐫𑐵 𑐎𑐵𑐩𑐣𑐵 𑐫𑐵𑐣𑐵𑐡𑐶𑐮 𑑋
𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑖 𑐰𑐜𑐵𑐀𑐢𑑂𑐫𑐎𑑂𑐲 𑐣𑐶𑐬𑑂𑐩𑐮𑐬𑐟𑑂𑐣 𑐱𑐵𑐎𑑂𑐫𑑄 𑐠𑐸𑐎𑐠𑑄𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐖𑑂𑐫𑐵𑐗𑑂𑐰𑑅𑐫𑐵 𑐣𑐶𑑄𑐟𑐶𑑄 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐨𑐹𑐩𑐶𑐎𑐵 𑐳𑐎𑐵𑐬𑐵𑐟𑑂𑐩𑐎 𑐡𑐂 𑐢𑐵𑐳𑐾𑑄 𑐠𑐩𑑂𑐴𑑄 𑐣𑑄 𑐦𑐎𑑂𑐰 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋
𑐗𑐷𑐐𑐸 𑐳𑑅𑐫𑐵 𑐥𑑂𑐬𑐩𑐸𑐏 𑐬𑐵𑐖𑐸𑐬𑐵𑐖𑐡𑐾𑐰 𑐰𑐖𑑂𑐬𑐵𑐔𑐵𑐬𑑂𑐫𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐥𑑂𑐬𑐾𑐳 𑐰𑐶𑐖𑑂𑐘𑐥𑑂𑐟𑐷 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐳𑐸𑐎𑐸𑐣𑑂𑐡𑐵 𑐦𑐶𑐮𑑂𑐩𑑂𑐳𑐫𑐵 𑐰𑐵𑐳𑐸 𑐱𑐵𑐴𑐷𑑄 𑐳𑐸𑐨𑐵𑐫𑑂 𑐡𑐾𑐕𑐣𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS