Read news in NepalBhasa text-- www.hamroschool.com BACK 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵 𑐬𑐵𑐖𑐣𑐷𑐟𑐶𑐎 𑐨𑐰𑐶𑐲𑑂𑐫 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵 𑐬𑐵𑐖𑐣𑐷𑐟𑐶𑐎 𑐨𑐰𑐶𑐲𑑂𑐫

𑐣𑐾𑐥𑐵𑑅𑐫𑐵 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐖𑐵𑐬𑐷 𑐫𑐵𑑅𑐐𑐸 𑐂𑐮𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐫𑐵𑐡𑐷𑐩𑑂𑐴 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐂 𑐕𑐩𑑂𑐴 𑐏𑐾𑐮𑐵𑐜𑐷 𑐎𑐠𑑄 𑐩𑑂𑐴𑐳𑑂𑐫𑐹𑐩𑑂𑐴 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑑋 𑐣𑐾𑐥𑐵𑑅𑐫𑐵 𑐖𑐣𑐫𑐸𑐡𑑂𑐢𑐫𑐵 𑐂𑐮𑑄𑐣𑐶𑐳𑐾𑑄 𑐴𑐾 𑐳𑐎𑐮𑐳𑐶𑐣𑑄 𑐩𑑂𑐴𑐳𑑂𑐫𑐹𑐩𑑂𑐴 𑐀𑐮𑐾 𑐡𑐾𑐱𑐫𑑂 𑐐𑐞𑐟𑐣𑑂𑐟𑑂𑐬𑐫𑐵 𑐣𑐶𑑄𑐟𑐶𑑄 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐩𑑂𑐴 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵 𑐬𑐵𑐖𑐣𑐷𑐟𑐶𑐎 𑐨𑐰𑐶𑐲𑑂𑐫 𑐕𑐸 𑐖𑐸𑐂𑐐𑐸 𑐏𑑅 𑐢𑐎𑐵𑑅 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐂 𑐔𑐶𑐄𑐟𑐵𑑅𑐫𑐵 𑐰𑐶𑐲𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑑒𑑐𑑗𑑒 𑐳𑐵𑐮𑐫𑑂 𑐳𑑄𑐰𑐶𑐢𑐵𑐣𑐳𑐨𑐵𑐥𑐵𑐏𑐾𑑄 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐖𑐵𑐬𑐷 𑐖𑐹𑐐𑐸 𑐂𑐮𑐫𑑂 𑐁𑑅 𑐐𑐶𑐮𑐵𑐳 𑐧𑐔𑑂𑐕𑐶 𑐖𑐵𑐮 𑐀𑐬𑑂𑐠𑐵𑐟 𑐧𑐵𑐐𑑅 𑐖𑐵𑐮, 𑐁𑑅 𑐥𑐸𑐬𑐵 𑐖𑐵𑐫𑐾𑐎𑐾𑐐𑐸 𑐀𑐬𑑂𑐠𑐵𑐟 𑐕𑐐𑐮𑑄 𑐖𑐵𑐫𑐾𑐎𑐾𑐐𑐸 𑐮𑑂𑐫𑑄𑐡𑐣𑐶 𑐢𑐎𑐵𑑅 𑐚𑐶𑐥𑑂𑐥𑐞𑐷 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐣𑐾𑐥𑐵𑑅𑐫𑐵 𑐣𑑂𑐴𑐹𑐐𑐸 𑐬𑐵𑐖𑐣𑐷𑐟𑐶𑐎 𑐥𑐬𑐶𑐳𑑂𑐠𑐶𑐟𑐶𑐂 𑐣𑑂𑐴𑐹𑐐𑐸 𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅 𑐢𑐎𑐵𑑅 𑐩𑐵𑐌𑐰𑐵𑐡𑐷𑐥𑐵𑐏𑐾𑑄 𑐧𑑂𑐫𑐵𑐐𑐮𑑄 𑐔𑑂𑐰𑐣𑐵 𑐣𑐫𑐵𑑃 𑐱𑐎𑑂𑐟𑐶 𑐣𑐶𑐬𑑂𑐩𑐵𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐰𑐫𑑂𑐎𑑅𑐥𑐵𑐏𑐾 𑐫𑐎𑑂𑐰 𑐴𑐾 𑐁𑐎𑐬𑑂𑐲𑐶𑐟 𑐖𑐸𑐮 𑑋 𑐩𑐵𑐌𑐰𑐵𑐡𑐷 𑐥𑐵𑐬𑑂𑐚𑐷 𑐟𑑂𑐰𑑅𑐟𑐵𑑅 𑐴𑐾 𑐎𑐫𑑁𑑄 𑐣𑐾𑐟𑐵𑐟 𑐰𑐣 𑑋 𑐀𑐠𑐾 𑐴𑐾 𑐎𑐮𑐵𑐎𑐬, 𑐄𑐡𑑂𑐫𑐩𑐷𑐣𑐶𑐳𑐾𑑄 𑐠𑐷𑐠𑐷 𑐥𑐎𑑂𑐲𑐫𑐵𑐥𑐶𑑄 𑐟𑐎𑑄 𑐄𑐎𑐷 𑐡𑐸𑐴𑐵𑑄 𑐰𑐣 𑑋 𑐣𑐫𑐵𑑃 𑐱𑐎𑑂𑐟𑐶 𑐢𑐎𑐵𑑅 𑐣𑑂𑐴𑐹𑐐𑐸 𑐥𑐵𑐬𑑂𑐚𑐷 𑐑𑑀𑐲𑐞𑐵 𑐫𑐵𑑅𑐐𑐸 𑐂𑐮𑐫𑑂 𑐕𑐐𑐹 𑐮𑐏𑐩𑑂𑐴 𑐥𑐵𑐬𑑂𑐚𑐷𑐫𑐵 𑐳𑑄𑐳𑑂𑐠𑐵𑐥𑐎 𑐢𑐎𑐵𑑅 𑐟𑐎𑑄 𑐑𑑀𑐲𑐞𑐵 𑐫𑐵𑐟 𑑋 𑐄𑐎𑐶𑑄 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐂 𑐕𑐐𑐹 𑐣𑑂𑐴𑐹𑐐𑐸 𑐎𑐠𑑄𑐫𑐵 𑐥𑐵𑐬𑑂𑐚𑐷 𑐖𑐸𑐂 𑐀𑐮𑐾 𑐢𑐵𑐠𑐾𑑄 𑐴𑐾 𑐣𑑂𑐴𑐹𑐐𑐸 𑐱𑐎𑑂𑐟𑐶𑐫𑐵 𑐬𑐸𑐥𑐫𑑂 𑐰𑐿𑐎𑐮𑑂𑐥𑐶𑐎 𑐱𑐎𑑂𑐟𑐶𑐫𑐵 𑐬𑐸𑐥𑐫𑑂 𑐧𑐵𑐧𑐸𑐬𑐵𑐩𑐫𑐵 𑐣𑐾𑐟𑐺𑐟𑑂𑐰𑐫𑐵 𑐥𑐵𑐬𑑂𑐚𑐷 𑐳𑑂𑐠𑐵𑐥𑐶𑐟 𑐖𑐸𑐂 𑐢𑐎𑐵𑑅 𑐫𑐎𑑂𑐰𑐳𑐶𑐣𑑄 𑐟𑐵𑐫𑐾𑐎𑐹𑐐𑐸 𑐏𑑅 𑑋

𑐣𑐫𑐵𑑃 𑐱𑐎𑑂𑐟𑐶 𑐖𑐧 𑐔𑐸𑐣𑐵𑐰𑐫𑑂 𑐰𑐣 𑐀𑐧𑐮𑐾 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵 𑐬𑐵𑐖𑐣𑐷𑐟𑐶𑐎 𑐴𑐿𑐳𑐶𑐫𑐟 𑐏𑐣𑐾𑐡𑐟 𑑋 𑐕𑐐𑐹 𑐮𑐏𑐩𑑂𑐴 𑐳𑑄𑐳𑑂𑐠𑐵𑐥𑐎 𑐳𑐡𑐳𑑂𑐫 𑐡𑐸𑐐𑐸 𑐥𑐵𑐬𑑂𑐚𑐷 𑐣𑐫𑐵𑑃 𑐱𑐎𑑂𑐟𑐶 𑐣𑐾𑐥𑐵𑐮𑐫𑐵 𑐀𑐧𑐮𑐫𑑂 𑐩𑐸𑐎𑑂𑐎𑑄 𑐨𑑀𑐚 𑐴𑐾 𑑘𑑖 𑐴𑐖𑐵𑐬 𑐖𑐎 𑐰𑐮 𑑋 𑐳𑑄𑐳𑑂𑐠𑐵𑐥𑐎 𑐳𑐡𑐳𑑂𑐫𑐟 𑐐𑐸𑐮𑐶 𑐡𑐸 𑐄𑐮𑐶 𑐴𑐾 𑐨𑑀𑐚 𑐩𑐰𑐮 𑑋 𑐀𑐠𑐾 𑐖𑐹𑐳𑐵𑑄 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐣𑐫𑐵𑑃 𑐱𑐎𑑂𑐟𑐶 𑐢𑐎𑐵𑑅 𑐰𑐣 𑑋 𑐀𑐣𑑄 𑐮𑐶𑐥𑐵 𑐥𑐵𑐬𑑂𑐚𑐷 𑐟𑑂𑐰𑑅𑐟𑐵𑑅 𑐰𑐣𑐷𑐥𑐶𑑄 𑐣𑑄 𑐀𑐥𑑂𑐰𑐫𑐵 𑐰𑐮 𑑋 𑐰 𑐴𑐾 𑐂𑐮𑐫𑑂 𑐣𑐫𑐵𑑃 𑐱𑐎𑑂𑐟𑐶 𑐥𑐵𑐬𑑂𑐚𑐷𑑄 𑐄𑐥𑐾𑐣𑑂𑐡𑑂𑐬 𑐫𑐵𑐡𑐰𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐳𑑄𑐑𑐷𑐫 𑐳𑐩𑐵𑐖𑐰𑐵𑐡𑐷 𑐦𑑀𑐬𑐩𑐮𑐶𑐳𑐾 𑐊𑐎𑐟𑐵 𑐫𑐵𑐟 𑑋 𑐀𑐮𑐾 𑐩𑑄𑐎𑐵𑑅 𑐎𑐠𑑄 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷 𑐢𑐎𑐵𑑅 𑐣𑐵𑑄 𑐟𑐮 𑑋 𑐀𑐣𑑄 𑐮𑐶𑐥𑐵 𑐳𑑄𑐑𑐷𑐫 𑐳𑐩𑐵𑐖𑐰𑐵𑐡𑐷 𑐰 𑐬𑐵𑐲𑑂𑐚𑑂𑐬𑐶𑐫 𑐖𑐣𑐟𑐵 𑐥𑐵𑐬𑑂𑐚𑐷𑐫𑐵 𑐡𑐠𑐸𑐂 𑐣𑑄 𑐊𑐎𑐟𑐵 𑐖𑐸𑐮 𑑋 𑐊𑐎𑐟𑐵 𑐖𑐸𑐂 𑐢𑐸𑑄𑐎𑐵𑑅 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷 𑐣𑐾𑐥𑐵𑐮 𑐣𑐵𑑄 𑐖𑐸𑐮 𑑋 𑐠𑐸𑐐𑐸 𑐃 𑐟𑐎𑐫𑐵 𑐡𑐸𑐣𑐾 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑐥𑐵𑐬𑑂𑐚𑐷𑐫𑐵 𑐳𑑄𑐑𑐷𑐫 𑐥𑐬𑐶𑐲𑐡𑑂𑐫𑐵 𑐀𑐢𑑂𑐫𑐎𑑂𑐲 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐮𑐶𑐥𑐵 𑐴𑐵𑐎𑐣𑑄 𑐖𑐳𑐥𑐵𑐫𑑂 𑐰𑑅𑐥𑐶𑑄 𑐬𑐵𑐖𑐥𑐵𑐫𑐵 𑐣𑐾𑐟𑐵𑐟 𑐥𑐵𑐬𑑂𑐚𑐷 𑐟𑐕𑑂𑐫𑐵𑐣𑐵𑑅 𑐰𑐣 𑑋 𑐠𑐸𑐎𑐠𑑄 𑐬𑐵𑐖𑐣𑐷𑐟𑐶𑐎 𑐑𑐚𑐣𑐵𑐎𑑂𑐬𑐩𑐫𑑂 𑐣𑐶𑐬𑐣𑑂𑐟𑐬 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑑄𑐩𑑂𑐴 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑐁𑑅𑐫𑐵 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐧𑐮𑐫𑑂 𑐟𑐎 𑐟𑐳𑐎𑑄 𑐎𑐩𑐖𑑀𑐬 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐐𑐸 𑐡𑐸 𑑋 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐫𑐵 𑐣𑐵𑐫𑑅 𑐄𑐥𑐾𑐣𑑂𑐡𑑂𑐬 𑐫𑐵𑐡𑐰𑐮𑐶𑐳𑐾 𑐰𑐫𑑂𑐎𑑅𑐫𑐵 𑐫𑐎𑑂𑐰 𑐏𑑃 𑐩𑐶𑐮𑐾 𑐩𑐖𑐸𑐮 𑑋 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐀𑐳𑐴𑐩𑐟𑐶 𑐖𑐸𑐫𑐵 𑐰𑑅𑐐𑐸 𑐏𑐣𑐾𑐡𑐟 𑑋 𑐀𑐮𑐾 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐣𑑄 𑐴𑐵𑐎𑐣𑑄 𑐧𑑂𑐫𑐵𑐐𑐮𑑄 𑐥𑐵𑐬𑑂𑐚𑐷 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐡𑐫𑐾𑐎𑐮 𑑋 𑐧𑑂𑐫𑐵𑐐𑐮𑑄 𑐨𑐾𑐮𑐵 𑐫𑐵𑐟 𑑋 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑑄 𑐰𑐫𑑂𑐎𑑅𑐫𑐵𑐟 𑐎𑐵𑐬𑐰𑐵𑐴𑐷 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐁𑑅 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵 𑐬𑐵𑐖𑐣𑐷𑐟𑐶𑐎 𑐨𑐰𑐶𑐲𑑂𑐫𑐫𑑂 𑐴𑐾 𑐣𑑂𑐴𑑂𑐫𑐳𑑅 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐮𑐶𑐳𑐾 𑐊𑐎𑐟𑐵𑐫𑑂 𑐰𑑄𑐐𑐸 𑐂𑐮𑐫𑑂 𑐐𑐸𑐮𑐶 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵 𑐖𑑂𑐰𑐣𑐵𑐰𑑄𑐐𑐸 𑐏𑑅 𑐁𑑅 𑐧𑑂𑐫𑐵𑐐𑐮𑑄 𑐔𑑂𑐰𑑄𑐐𑐸 𑐂𑐮𑐫𑑂 𑐄𑐮𑐶 𑐣𑑄 𑐱𑐎𑑂𑐟𑐶 𑐩𑑄𑐟 𑑋 𑐟𑐳𑐎𑑄 𑐎𑐩𑐖𑑀𑐬 𑐀𑐰𑐳𑑂𑐠𑐵𑐫𑑂 𑐮𑐵𑐟 𑑋 𑐄𑐮𑐶 𑐖𑐎 𑐩𑐏𑐸 𑐠𑑅𑐐𑐸 𑐥𑐎𑑂𑐲𑐫𑑂 𑐡𑐸𑐥𑐶𑑄 𑐎𑐫𑑁𑑄 𑐣𑐾𑐟𑐵 𑐎𑐬𑑂𑐫𑐵𑐎𑐬𑑂𑐟𑐵𑐟 𑐁𑑅 𑐊𑐩𑐵𑐮𑐾 𑐰𑐵 𑐩𑐵𑐌𑐰𑐵𑐡𑐷 𑐎𑐾𑐣𑑂𑐡𑑂𑐬𑐫𑑂 𑐰𑐣𑐾𑐐𑐸 𑐫𑑀𑐖𑐣𑐵 𑐡𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐮𑐶𑐳𑐾 𑐡𑐸𑐥𑐶𑑄 𑐟𑑅𑐢𑑄𑐐𑐸 𑐳𑑄𑐏𑑂𑐫𑐵𑐫𑑂 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟 𑐊𑐩𑐵𑐮𑐾 𑐰 𑐩𑐵𑐌𑐰𑐵𑐡𑐷 𑐎𑐾𑐣𑑂𑐡𑑂𑐬𑐫𑑂 𑐰𑐣𑐷𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐀𑐮𑐾 𑐮𑑂𑐫𑑄𑐡𑐸𑐥𑐶𑑄 𑐩𑐣𑐹𑐟 𑐔𑑂𑐰𑐣𑐵𑑅 𑐣𑑂𑐴𑐹𑐐𑐸 𑐥𑐵𑐬𑑂𑐚𑐷 𑐡𑐫𑐾𑐎𑐾𑐐𑐸 𑐏𑑃 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐷 𑐡𑐸𑐣𑐾 𑐣𑑄 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐂 𑐰𑐣𑐾𑐩𑐵𑑅 𑐢𑐵𑐂𑐥𑐶𑑄 𑐫𑐎𑑂𑐰 𑐡𑐸 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃 𑐁𑑅 𑐐𑐸𑐐𑐸 𑐎𑐠𑑄 𑐣𑑂𑐴𑑂𑐫𑐵𑑅𑐰𑐣𑐾𑐐𑐸 𑐢𑐫𑐵𑐐𑐸 𑐳𑐰𑐵𑐮𑐫𑑂 𑐴𑐾 𑐀𑐮𑐩𑐮𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋

𑐣𑐾𑐥𑐵𑑅𑐫𑐵 𑐩𑐢𑐾𑐳𑐷𑐣𑐶𑐳𑐾𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐐𑐸 𑐥𑐴𑐶𑐔𑐵𑐣𑐫𑐵 𑐩𑐸𑐡𑑂𑐡𑐵, 𑐳𑐩𑐵𑐰𑐾𑐱𑐷𑐟𑐵 𑐩𑐸𑐡𑑂𑐡𑐵 𑐖𑑂𑐰𑐣𑐵𑑅 𑐧𑐵𑐐𑑅 𑐖𑐵𑑅𑐐𑐸 𑐐𑐶𑐮𑐵𑐳𑐫𑐵𑐟 𑐖𑐵𑐫𑐾𑐎𑐾𑐐𑐸 𑐫𑑀𑐖𑐣𑐵 𑐳𑐴𑐶𑐟 𑐣𑑂𑐴𑐹𑐎𑐠𑑄𑐫𑐵 𑐫𑑀𑐖𑐣𑐵 𑐡𑐫𑐾𑐎𑐵𑑅 𑐰𑐣𑐾𑐐𑐸 𑐢𑐎𑐵𑑅 𑐣𑐫𑐵𑑃 𑐱𑐎𑑂𑐟𑐶 𑐥𑐵𑐬𑑂𑐚𑐷 𑐣𑐶𑐬𑑂𑐩𑐵𑐞 𑐫𑐵𑑅𑐩𑑂𑐴 𑐨𑐚𑑂𑐚𑐬𑐵𑐃 𑐣𑑄 𑐁𑑅 𑐠𑑅 𑐐𑐮𑐟 𑐠𑐵𑐳𑐫𑑂 𑐮𑐵𑐟 𑐢𑐎𑐵𑑅 𑐳𑑂𑐰𑐷𑐎𑐵𑐬 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐨𑐶𑑄𑐐𑐸 𑐰 𑐧𑐵𑑄𑐮𑐵𑑅𑐐𑐸 𑐖𑑂𑐫𑐵 𑐫𑐵𑐫𑐾 𑐢𑐎𑐵𑑅 𑐰𑑃𑐰𑑄 𑐴𑐾 𑐐𑐮𑐟 𑐠𑐵𑐳𑐫𑑂 𑐮𑐵𑐟 𑐢𑐎𑐵𑑅 𑐠𑑅 𑐮𑐶𑐎𑑂𑐎 𑐮𑐵𑑅𑐥𑐶𑑄 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐟 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐫𑑂𑐎𑐮𑑄 𑐣𑐾𑐥𑐵𑑅𑐫𑐵 𑐦𑐸𑐎𑑂𑐎 𑐥𑑂𑐬𑐩𑐸𑐏 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐳𑑄 𑐥𑐴𑐶𑐔𑐵𑐣, 𑐳𑐩𑐵𑐰𑐾𑐱𑐷𑐟𑐵 𑐰 𑐳𑐩𑐵𑐣𑐸𑐥𑐵𑐟𑐶𑐎𑐫𑐵 𑐩𑐸𑐡𑑂𑐡𑐵 𑐢𑐫𑐵𑐐𑐸 𑐬𑐵𑐖𑐣𑐷𑐟𑐶𑐎 𑐩𑐸𑐡𑑂𑐡𑐵 𑐖𑐎 𑐡𑐫𑐾𑐎𑐵 𑐥𑐹𑐩𑐰𑑄𑐎𑐾𑐐𑐸 𑐎𑐠𑑄𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵𑑅 𑐰𑐶𑐱𑑂𑐮𑐾𑐲𑐞 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐡𑐎𑑂𑐰 𑐡𑐮𑐟𑐫𑑂𑐳𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶, 𑐩𑐢𑐾𑐳𑐷𑐣𑐶𑐳𑐾𑑄 𑐡𑐮𑐶𑐟𑐫𑐵 𑐩𑐸𑐡𑑂𑐡𑐵 𑐳𑐩𑑂𑐰𑑀𑐢𑐣 𑐫𑐵𑐫𑐾 𑐢𑐵𑐂𑐐𑐸 𑐟𑐬 𑐰𑑂𑐫𑐰𑐴𑐵𑐬𑐫𑑂 𑐢𑐵𑑅𑐳𑐵 𑐳𑐩𑑂𑐰𑑀𑐢𑐣 𑐫𑐵𑐫𑐾𑐐𑐸 𑐥𑐎𑑂𑐲𑐫𑑂 𑐩𑐡𑐸 𑐢𑐎𑐵𑑅 𑐨𑐚𑑂𑐚𑐬𑐵𑐃 𑐁𑑅 𑐠𑐸𑐂𑐎𑐹𑐐𑐸 𑐏𑐣𑐾𑐡𑐸 𑑋 𑐖𑐧 𑐎𑐶 𑐣𑐾𑐥𑐵𑑅𑐫𑐵 𑐥𑑂𑐬𑐩𑑂𑐸𑐏 𑐡𑐮𑐫𑐵 𑐥𑑂𑐬𑐩𑐸𑐏 𑐣𑐾𑐟𑐵𑐟𑐫𑑂𑐳𑑄 𑐥𑐴𑐶𑐔𑐵𑐣𑐫𑐵 𑐩𑐸𑐡𑑂𑐡𑐵𑐣𑐶𑐳𑐾𑑄 𑐳𑐩𑐵𑐣𑐸𑐥𑐵𑐟𑐶𑐎 𑐳𑐩𑐵𑐰𑐾𑐱𑐷𑐟𑐵𑐫𑐵 𑐩𑐸𑐡𑑂𑐡𑐵 𑐢𑐫𑐵𑐐𑐸 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶, 𑐩𑐢𑐾𑐳𑐷𑐣𑐶𑐳𑐾𑑄 𑐡𑐮𑐶𑐟𑐟𑐫𑑂𑐟 𑐟𑐎𑑄 𑐎𑐣𑑂𑐦𑑂𑐫𑐹𑐖 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐖𑐎 𑐮𑑂𑐴𑑂𑐰𑐵𑐣𑐵𑐔𑑂𑐰𑑄𑐐𑐸 𑐀𑐮𑐾 𑐄𑐩𑐶𑐐𑐸 𑐣𑐶𑐫𑐟 𑐢𑐵𑑅𑐳𑐵 𑐳𑐦𑐵 𑐩𑐖𑐹 𑐢𑐎𑐵𑑅 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶, 𑐩𑐢𑐾𑐳𑐷 𑐩𑐸𑐡𑑂𑐡𑐵𑐫𑐵𑐟 𑐮𑐶𑐎𑑂𑐎 𑐔𑑂𑐰𑐣𑐵 𑐳𑑂𑐰𑐫𑐵𑐔𑑂𑐰𑑄𑐥𑐶𑑄, 𑐰𑐶𑐱𑑂𑐮𑐾𑐲𑐞 𑐫𑐵𑐣𑐵𑐔𑑂𑐰𑑄𑐥𑐶𑑄 𑐣𑐵𑐥𑑄 𑐁𑐡𑐶𑐰𑐵𑐳𑐷𑐰𑐵𑐡𑐫𑐵 𑐏𑑃 𑐮𑑂𑐴𑐵𑐂𑐥𑐶𑑄 𑐳𑐎𑐮𑐳𑐶𑐣𑑄 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐢𑐫𑐵 𑐴𑐾 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐏𑑅 𑑋

𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐫𑐵 𑐥𑐴𑐶𑐔𑐵𑐣𑐫𑐵 𑐏𑑃 𑐮𑑂𑐴𑐵𑐟 𑐢𑐵𑑅𑐳𑐵 𑐨𑑁𑐐𑑀𑐮𑐶𑐎 𑐥𑐴𑐶𑐔𑐵𑐣, 𑐏𑐸𑐳𑐶𑐫𑐵 𑐥𑐴𑐶𑐔𑐵𑐣, 𑐥𑐴𑐵𑐜𑐫𑐵 𑐥𑐴𑐶𑐔𑐵𑐣 𑐢𑐎𑐵𑑅 𑐩𑑄𑐎𑐵𑑅 𑐥𑐴𑐶𑐔𑐵𑐣𑐫𑐵 𑐣𑐵𑐬𑐵 𑐧𑐶𑐫𑐵𑑅 𑐎𑐣𑑂𑐦𑑂𑐫𑐹𑐖 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐴𑐾 𑐏𑑅 𑐡𑐮𑐫𑐵 𑐣𑐾𑐟𑐵𑐟𑐫𑑂𑐳𑑄 𑑋 𑐀𑐠𑐾 𑐴𑐾 𑐥𑐴𑐶𑐔𑐵𑐣𑐫𑐵 𑐁𑐣𑑂𑐡𑑀𑐮𑐣 𑐟𑐔𑑂𑐰𑐂𑐐𑐸 𑐂𑐮𑐫𑑂 𑐀𑐬𑑂𑐠𑐵𑐟 𑐥𑐴𑐶𑐔𑐵𑐣𑐫𑐵 𑐩𑐸𑐡𑑂𑐡𑐵 𑐟𑐔𑑂𑐰𑐮 𑐢𑐵𑑅𑐳𑐵 𑐠𑑅𑐐𑐸 𑐥𑐵𑐬𑑂𑐚𑐷 𑐡𑐸𑐣𑐾𑐫𑐵𑐥𑐶𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶, 𑐩𑐢𑐾𑐳𑐷 𑐡𑐮𑐶𑐟𑐟𑐫𑑂𑐟 𑐣𑑂𑐴𑑂𑐫𑑅𑐣𑐾 𑐟𑐫𑐵 𑐄𑐐𑑂𑐬 𑐬𑐸𑐥𑑄 𑐥𑑂𑐬𑐳𑑂𑐟𑐸𑐟 𑐫𑐵𑐎𑐵𑑅 𑐧𑑂𑐫𑐵𑐐𑐮𑑄 𑐎𑐠𑑄𑐫𑐵 𑐳𑑄𑐬𑐔𑐣𑐵 𑐡𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐟𑐎𑑄 𑐡𑐮𑐟𑐫𑑂𑐳𑑄 𑐮𑐶𑐦𑑅 𑐩𑐳𑑂𑐰𑑅 𑑋 𑐠𑑂𑐰 𑐏𑑃 𑐠𑐸𑐂𑐎𑐾𑐟 𑐟𑐵𑐥𑐵𑐎 𑐰𑐣𑐵 𑐳𑑂𑐰𑑅 𑐰𑐣𑐾 𑐴𑐾 𑐩𑑂𑐰𑐵𑑅 𑑋 𑐳𑑄𑐰𑐶𑐢𑐵𑐣𑐳𑐨𑐵𑐫𑐵 𑐔𑐸𑐣𑐵𑐰𑐫𑐵 𑐂𑐮𑑄𑐣𑐶𑐳𑐾𑑄𑐫𑐵 𑐑𑐚𑐣𑐵𑐫𑐵𑐟 𑐖𑐎 𑐳𑑂𑐰𑐮 𑐢𑐵𑑅𑐳𑐵𑑄 𑐧𑐵𑑄𑐮𑐵𑐎 𑐴𑐾 𑐠𑐸𑐂 𑑋

𑐜𑐵. 𑐨𑐚𑑂𑐚𑐬𑐵𑐃𑐫𑐵 𑐬𑐵𑐖𑐣𑐷𑐟𑐶𑐎 𑐨𑐰𑐶𑐲𑑂𑐫 𑐁𑑅 𑐕𑐐𑐹 𑐎𑐠𑑄 𑐳𑑄𑐎𑐚𑐫𑑂 𑐮𑐵𑑅𑐐𑐸 𑐖𑐎𑑄 𑐩𑐏𑐸𑐮𑐵 𑐢𑐫𑐵𑐐𑐸 𑐣𑑂𑐴𑑂𑐫𑐳𑑅 𑐧𑑂𑐰𑐣𑐵𑐰𑑅𑐐𑐸 𑐡𑐸 𑑋 𑐨𑐚𑑂𑐚𑐬𑐵𑐃 𑐮𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐟𑐎𑑄 𑐖𑐸𑐂𑐢𑐸𑑄𑐎𑐮 𑑋 𑐟𑐬 𑐰𑐫𑐵 𑐮𑑂𑐫𑐹𑐮𑑂𑐫𑐹 𑐰𑐣𑐵𑐔𑑂𑐰𑑄𑐥𑐶𑑄 𑐮𑐵 𑐎𑐣𑑂𑐴𑐫𑑂 𑐰𑐣𑐵𑑅 𑐕𑐸𑑄 𑐡𑐂 𑐮𑐵 𑐢𑐎𑐵𑑅 𑐁𑐱𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐣𑐶 𑑋 𑐄𑐎𑐶𑑄 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑐫𑐵𑐟 𑐫𑐎𑑂𑐰 𑐃 𑐟𑐎 𑐩𑐾𑐩𑐾𑐥𑐶𑑄 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐳𑐵𑐠 𑐧𑐶𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐂 𑐱𑐎𑑂𑐟𑐶 𑐡𑐸𑐐𑐸 𑐥𑐵𑐬𑑂𑐚𑐷 𑐖𑐎 𑐣𑑂𑐴𑑂𑐫𑑅𑐣𑐾 𑐮𑐵𑐂𑐐𑐸, 𑐳𑐟𑑂𑐟𑐵𑐫𑑂 𑐰𑐣𑐾𑐦𑐸𑐐𑐸 𑐥𑐵𑐬𑑂𑐚𑐷 𑐖𑐎 𑐮𑑂𑐫𑐣𑐵 𑐔𑑂𑐰𑐣𑐷𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐩𑐾𑐩𑐾𑐐𑐸 𑐥𑐵𑐬𑑂𑐚𑐷 𑐢𑐵𑑅𑐳𑐵 𑐣𑑂𑐴𑑂𑐫𑑅𑐣𑐾 𑐰𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐁𑑅 𑐠𑐠𑐾𑑄𑐫𑐵 𑐣𑐶𑑄𑐟𑐶𑑄 𑐏𑐣𑐾 𑐴𑐾 𑐩𑐡𑐸 𑑋 𑐁𑑅 𑐖𑐸𑐂𑐐𑐸 𑐔𑐸𑐣𑐵𑐰𑐫𑐵 𑐮𑐶𑐔𑑂𑐰𑑅 𑐣𑑄 𑐥𑑂𑐬𑐩𑐸𑐏 𑐡𑐮𑐟 𑐩𑐢𑑂𑐫𑐾 𑐕𑐐𑐹 𑑑 𑐣𑐩𑑂𑐧𑐬𑐫𑑂 𑐮𑐵𑐂𑐐𑐸 𑐩𑐾𑐐𑐸 𑑒 𑐣𑐩𑑂𑐧𑐬𑐫𑑂 𑐀𑐮𑐾 𑐩𑐾𑐐𑐸 𑑓 𑐣𑐩𑑂𑐧𑐬𑐫𑑂 𑐮𑐵𑐂𑐐𑐸 𑐧𑐵𑐴𑐾𑐎 𑐩𑐾𑐐𑐸 𑐖𑐸𑐂𑐐𑐸 𑐰𑐵𑐮𑐵 𑐕𑐸𑑄 𑐩𑐡𑐸 𑑋 𑐠𑑁𑑄𑐫𑐵 𑐂𑐮𑐫𑑂 𑐩𑐣𑐹𑐟 𑐠𑑅 𑐳𑐸𑐬𑐎𑑂𑐲𑐶𑐟 𑐖𑐸𑐂𑐐𑐸 𑐣𑐶𑑄𑐟𑐶𑑄 𑐀𑐮𑐾 𑐎𑐣𑑂𑐴𑐫𑑂 𑐰𑐣𑐵𑑅 𑐳𑐵𑐠 𑐎𑐵𑐫𑐾𑐐𑐸 𑐣𑐶𑑄𑐟𑐶𑑄 𑐴𑐾 𑐥𑑂𑐬𑐩𑐸𑐏 𑐥𑐵𑐬𑑂𑐚𑐷𑐫𑐵 𑐮𑑂𑐫𑐹𑐮𑑂𑐫𑐹 𑐖𑐸𑐂𑐐𑐸 𑐏𑑅 𑑋 𑐳𑐵𑐩𑐵𑐣𑑂𑐫 𑐩𑐣𑐹𑐟𑐫𑑂𑐐𑐸 𑐣𑐶𑑄𑐟𑐶𑑄 𑐡𑐮 𑐧𑐶𑐣𑐵𑐫𑐵 𑐠𑑅𑐐𑐸

𑐖𑐣𑐖𑐷𑐰𑐣𑐣𑐶𑐳𑐾𑑄 𑐕𑐸𑑄 𑐣𑑄 𑐎𑐠𑑄𑐫𑐵 𑐖𑑂𑐫𑐵 𑐫𑐵𑐫𑐾𑐐𑐸 𑐳𑐩𑑂𑐨𑐵𑐰𑐣𑐵 𑐩𑐡𑐸 𑐢𑐎𑐵𑑅 𑐟𑐵𑐫𑐾𑐎𑐾𑐟 𑐧𑐵𑐢𑑂𑐫 𑐖𑐸𑐫𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐄𑐎𑐶𑑄 𑐢𑐵𑐟𑑂𑐠𑐾𑑄 𑐴𑐾 𑐡𑐾𑐱𑐫𑑂 𑐴𑐶𑐄𑐥𑐵𑑅 𑐁𑑅𑐫𑐵 𑐀𑐰𑐳𑑂𑐠𑐵𑐫𑑂 𑐰𑐂𑐐𑐸 𑐏𑐣𑐾𑐩𑐡𑐸 𑑋 𑐕𑐸𑑄 𑐃 𑐀𑐗 𑐣𑑄 𑐩𑐵𑐮𑐷𑐐𑐸 𑐀𑐰𑐳𑑂𑐠𑐵 𑐡𑐸 𑐢𑐵𑑅𑐳𑐵𑑄 𑐕𑐸𑑄 𑐥𑐵𑐂𑐩𑐏𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS