Read news in NepalBhasa text-- www.hamroschool.com BACK 𑐳𑑄𑐑𑐷𑐫𑐟𑐵 𑐣𑑂𑐴𑑂𑐫𑐵𑐎𑐾𑐟 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑑄𑐑𑐷𑐫𑐟𑐵 𑐣𑑂𑐴𑑂𑐫𑐵𑐎𑐾𑐟 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞

𑐥𑑂𑐬𑐡𑐾𑐱 𑐳𑐬𑐎𑐵𑐬𑐟𑐫𑑂𑐳𑑄 𑐠𑑅𑐐𑐸 𑐣𑑂𑐴𑐵𑐥𑐵𑑄𑐐𑐸 𑐎𑐵𑐬𑑂𑐫𑐎𑐵𑐮 𑐥𑐹𑐰𑑄𑐎𑐾𑐟𑑂𑐫𑑄𑐐𑐸 𑐂𑐮𑐫𑑂 𑐳𑑄𑐑𑐷𑐫𑐟𑐵𑐫𑐵 𑐧𑐵𑐬𑐾 𑐴𑐵𑐣𑑄 𑐧𑐴𑐳 𑐳𑐸𑐬𑐸 𑐖𑐹𑐐𑐸 𑐡𑐸 𑑋 𑐣𑑂𑐴𑐵𑐥𑐵𑑄𑐐𑐸 𑐎𑐵𑐬𑑂𑐫𑐎𑐵𑐮𑐫𑐵 𑐡𑐸𑐣𑐾 𑐥𑑂𑐬𑐡𑐾𑐱 𑐳𑐬𑐎𑐵𑐬𑐟𑐫𑑂 𑐩𑐹 𑐨𑐹𑐩𑐶𑐎𑐵 𑐢𑐫𑐵𑐐𑐸 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞𑐫𑐵 𑐏𑑅 𑑋 𑐟𑐬 𑐀𑐗 𑐣𑑄 𑐥𑐹𑐬𑑂𑐞𑐬𑐸𑐥𑑄 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐩𑐖𑐹𑐣𑐶 𑑋 𑐠𑑂𑐰 𑐂𑐮𑐫𑑂 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐫𑐵𑐫𑐾𑐩𑐦𑐸𑐐𑐸 𑐎𑐵𑐬𑐞 𑐰 𑐁𑑅𑐫𑐵 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑑂 𑐡𑐸𑐐𑐸 𑐎𑐩𑐖𑑀𑐬𑐷𑐫𑐵𑐟 𑐨𑐶𑑄𑐎𑐵 𑐐𑐸𑐎𑐠𑑄 𑐠𑑂𑐰 𑐰𑑂𑐫𑐰𑐳𑑂𑐠𑐵𑐫𑐵𑐟 𑐎𑑂𑐰𑐵𑐟𑐸𑐎𑐾𑐐𑐸 𑐢𑐫𑐵𑐐𑐸 𑐧𑐶𑐲𑐫𑐫𑑂 𑐀𑐥𑑂𑐰𑑅 𑐳𑐴𑐮𑐴 𑐁𑐰𑐱𑑂𑐫𑐎 𑐖𑐹 𑑋 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐥𑑂𑐬𑐡𑐾𑐱 𑐳𑐬𑐎𑐵𑐬𑐟𑐫𑑂𑐳𑑄 𑐀𑐗 𑐣𑑄 𑑖𑑐 𑐐𑐹 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐎𑐵𑐣𑐹𑐣 𑐡𑐫𑐾𑐎𑐾𑐩𑐵𑐣𑐶 𑑋 𑐟𑐬 𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐳𑑄𑐑𑐷𑐫 𑐳𑐬𑐎𑐵𑐬𑑄 𑐏𑐸𑐐𑐹 𑐡𑐬𑑂𑐖𑐣𑑄 𑐩𑐮𑑂𑐫𑐵𑑅 𑐎𑐵𑐣𑐹𑐣 𑐡𑐫𑐾𑐎𑐾𑐩𑐵𑐣𑐶 𑑋 𑐀𑐠𑐾𑐏𑑅𑐳𑐵𑑄 𑐳𑑄𑐑𑐷𑐫 𑐳𑐬𑐎𑐵𑐬𑐫𑐵 𑐧𑐾𑐰𑐵𑐳𑑂𑐟𑐵 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋

𑐥𑑂𑐬𑐵𑐢𑑂𑐫𑐵𑐥𑐎 𑐎𑐺𑐲𑑂𑐞 𑐏𑐣𑐵𑐮𑐫𑐵 𑐎𑐠𑑄 𑐥𑑂𑐬𑐡𑐾𑐱 𑐳𑐬𑐎𑐵𑐬𑐫𑐵 𑐳𑑂𑐰𑐵𑐫𑐟𑑂𑐟 𑐀𑐳𑑂𑐟𑐶𑐟𑑂𑐰 𑐰 𑐥𑐴𑐶𑐔𑐵𑐣𑐫𑐵 𑐁𑐢𑐵𑐬 𑐢𑐫𑐵𑐐𑐸 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵, 𑐥𑑂𑐬𑐱𑐵𑐳𑐣 𑐰 𑐬𑐵𑐖𑐱𑑂𑐰 𑐏𑑅 𑑋 𑐟𑐬 𑐳𑑂𑐰𑐟𑐵𑑄 𑐏𑑃 𑐥𑑂𑐬𑐡𑐾𑐱𑐣𑐵𑐥 𑐩𑐡𑐸𑐐𑐸𑐮𑐶𑑄 𑐄𑐥𑐶𑑄 𑐳𑑄𑐑𑐣𑐵𑐥 𑐁𑐱𑑂𑐬𑐶𑐟 𑐖𑐸𑐂𑐟 𑐧𑐵𑐢𑑂𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑄𑐰𑐶𑐢𑐵𑐣𑑄 𑐥𑑂𑐬𑐡𑐾𑐱𑐫𑐵𑐟 𑐧𑐶𑐫𑐵𑐟𑑅𑐐𑐸 𑐥𑑂𑐬𑐱𑐵𑐳𑐣 𑐰 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵𑐫𑐵 𑐀𑐢𑐶𑐎𑐵𑐬 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐣𑐶𑑄𑐟𑐶𑑄 𑐥𑑂𑐬𑐡𑐾𑐱𑐟𑐫𑑂𑐟 𑐣𑐶𑐖𑐵𑐩𑐟𑐷 𑐳𑐾𑐰𑐵, 𑐥𑑂𑐬𑐡𑐾𑐱 𑐥𑑂𑐬𑐴𑐬𑐷, 𑐥𑑂𑐬𑐡𑐾𑐱 𑐀𑐣𑐸𑐳𑐣𑑂𑐢𑐵𑐣 𑐳𑐩𑑂𑐧𑐣𑑂𑐢𑐷 𑐎𑐵𑐣𑐹𑐣 𑐡𑐫𑐾𑐎𑐹𑐐𑐸, 𑐥𑑂𑐬𑐡𑐾𑐱 𑐮𑑀𑐎 𑐳𑐾𑐰𑐵 𑐁𑐫𑑀𑐐 𑐣𑐷𑐳𑑂𑐰𑑄𑐐𑐸 𑐡𑐸 𑑋 𑐟𑐬 𑐳𑑄𑐑𑐷𑐫 𑐳𑐬𑐎𑐵𑐬𑐫𑐵 𑐝𑐶𑐮𑐵𑐳𑐸𑐳𑑂𑐟𑐷 𑐰 𑐴𑐿𑐎𑐩𑐫𑐵 𑐎𑐵𑐬𑐞𑑄 𑐥𑑂𑐬𑐡𑐾𑐱𑑄 𑐀𑐗 𑐠𑑅𑐐𑐸 𑐎𑐬𑑂𑐩𑐔𑐵𑐬𑐷 𑐰 𑐥𑑂𑐬𑐴𑐬𑐷 𑐎𑐵𑐫𑐩 𑐫𑐵𑐫𑐾𑐩𑐦𑐸𑐣𑐶 𑑋 𑐠𑑅𑐐𑐸 𑐴𑐾 𑐥𑑂𑐬𑐴𑐬𑐷 𑐰 𑐥𑑂𑐬𑐱𑐵𑐳𑐣 𑐧𑐶𑐣𑐵 𑐳𑑄𑐑𑐷𑐫𑐟𑐵𑐫𑑂 𑐥𑑂𑐬𑐡𑐾𑐱 𑐳𑐬𑐎𑐵𑐬𑐫𑐵 𑐀𑐳𑑂𑐟𑐶𑐟𑑂𑐰 𑐴𑐾 𑐡𑐂𑐩𑐏𑐸 𑑋 (𑐎𑐺𑐲𑑂𑐞 𑐏𑐣𑐵𑐮 ‘𑐩𑐢𑐾𑐱, 𑐳𑑄𑐑𑐷𑐫𑐟𑐵 𑐰 𑐬𑐵𑐖𑐣𑐷𑐟𑐶’, 𑐎𑐵𑐣𑑂𑐟𑐶𑐥𑐸𑐬 𑐣𑑂𑐴𑐶𑐥𑑁, 𑑒𑑐𑑗𑑙 𑐱𑑂𑐬𑐵𑐰𑐣 𑑑, 𑐥𑐺. 𑑖)

𑐠𑑁𑑄 𑐳𑑄𑐑𑐷𑐫𑐟𑐵 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐩𑐹 𑐳𑐩𑐳𑑂𑐫𑐵 𑐢𑐫𑐵𑐐𑐸 𑐴𑐾 𑐳𑑄𑐑𑐷𑐫 𑐳𑐬𑐎𑐵𑐬𑐫𑐵 𑐴𑐿𑐎𑐩𑐰𑐵𑐡𑐷 𑐳𑑀𑐔 𑐏𑑅 𑑋 𑐳𑑄𑐰𑐶𑐢𑐵𑐣𑑄 𑐧𑐶𑐫𑐵𑐟𑑅𑐐𑐸 𑐀𑐢𑐶𑐎𑐵𑐬𑐟𑐫𑑂𑐟 𑐮𑐵𑐐𑐹 𑐫𑐵𑐫𑐾𑐟 𑐟𑐎𑑄 𑐳𑑄𑐑𑐷𑐫 𑐳𑐬𑐎𑐵𑐬 𑐮𑐶𑐔𑐶𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐬𑐡𑐾𑐱 𑐳𑐬𑐎𑐵𑐬𑐟𑐫𑑂𑐳𑑄 𑐟𑑅𑐎𑑂𑐰 𑐂𑐣𑐵𑐥 𑐫𑐵𑑅𑐳𑐵𑑄 𑐳𑑄𑐑𑑄 𑐠𑐸𑐏𑐾𑐥𑐵𑐏𑐾 𑐢𑑂𑐫𑐵𑐣 𑐧𑐶𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐥𑑂𑐬𑐡𑐾𑐱 𑐳𑐬𑐎𑐵𑐬𑐟𑐫𑑂 𑐐𑐺𑐴 𑐰 𑐁𑐣𑑂𑐟𑐬𑐶𑐎 𑐩𑐵𑐩𑐶𑐮𑐵 𑐩𑐣𑑂𑐟𑑂𑐬𑐷𑐟𑐫𑑂 𑐕𑐸𑑄 𑐃 𑐣𑑂𑐴𑑂𑐫𑑅 𑐔𑑂𑐰𑑄𑐐𑐸 𑐩𑐸𑑃𑐖𑑂𑐫𑐵𑑄 𑐣𑑄 𑐳𑐬𑐎𑐵𑐬𑐫𑐵𑐟 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐫𑐵𑐎𑐣𑑄 𑐫𑐵𑐫𑐾𑐟 𑐡𑐧𑐵𑐰 𑐧𑐶𑐄𑐐𑐸 𑐡𑐸 𑑋 𑐳𑑄𑐑𑐷𑐫 𑐳𑐬𑐎𑐵𑐬𑑄 𑐥𑑂𑐬𑐴𑐬𑐷 𑐳𑐩𑐵𑐫𑑀𑐖𑐣𑐫𑑂 𑐁𑐮𑐚𑐵𑐮 𑐰 𑐥𑑂𑐬𑐴𑐬𑐷 𑐨𑐬𑑂𑐣𑐵 𑐫𑐵𑐫𑐾𑐐𑐸 𑐀𑐢𑐶𑐎𑐵𑐬 𑐩𑐧𑐶𑐄𑐐𑐸𑐮𑐶𑑄 𑐣𑑂𑐴𑐫𑑂𑐐𑐹𑐮𑐶𑑄 𑐥𑑂𑐬𑐡𑐾𑐱𑐫𑐵 𑐩𑐣𑑂𑐟𑑂𑐬𑐷𑐟𑐫𑑂 𑐨𑐾𑐮𑐵 𑐖𑐣𑐎𑐥𑐸𑐬𑐫𑑂 𑐔𑑂𑐰𑑄𑐐𑐸 𑐏𑑅 𑑋 𑐥𑑂𑐬𑐡𑐾𑐱𑐫𑐵𑐟 𑐧𑐮𑑂𑐮𑐵𑐎𑐾𑐐𑐸 𑐣𑐶𑑄𑐟𑐶𑑄 𑐩𑐵𑑅𑐐𑐸 𑐀𑐢𑐶𑐎𑐵𑐬𑐟 𑐩𑐢𑑂𑐫𑐾 𑐕𑐐𑐹 𑐩𑐸𑐏𑑂𑐫 𑐥𑑂𑐬𑐴𑐬𑐷 𑐥𑑂𑐬𑐱𑐵𑐳𑐣 𑐥𑑂𑐬𑐡𑐾𑐱𑐫𑐵𑐟 𑐩𑐧𑐷𑐟 𑐎𑐾𑐣𑑂𑐡𑑂𑐬 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐷𑐫𑐵 𑐴𑐾 𑐦𑐮𑐳𑑂𑐰𑐬𑐸𑐥 𑐳𑑂𑐰𑐣𑐶𑐐𑑅 𑐡𑐸𑐣𑐾𑐫𑐵 𑐥𑑂𑐬𑐴𑐬𑐷 𑐳𑑄𑐑𑐷𑐫 𑐳𑐬𑐎𑐵𑐬 𑐩𑐵𑐟𑐴𑐟𑐫𑑂 𑐟𑐫𑐾𑐐𑐸 𑐰𑐶𑐢𑐾𑐫𑐎 𑐥𑑂𑐬𑐟𑐶𑐣𑐶𑐢𑐶𑐳𑐨𑐵𑑄 𑐥𑐵𑐬𑐶𑐟 𑐟𑐎𑑄 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐐𑐠𑐾 𑐥𑑂𑐬𑐴𑐬𑐷 𑐥𑑂𑐬𑐱𑐵𑐳𑐣 𑐥𑑂𑐬𑐡𑐾𑐱𑐫𑐵 𑐩𑐵𑐟𑐴𑐟 𑐩𑐰𑐫𑐾𑐎𑑄 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑐵 𑐀𑐬𑑂𑐠 𑐡𑐂𑐩𑐏𑐸 𑐀𑐠𑐾𑐴𑐾 𑐥𑑂𑐬𑐡𑐾𑐱𑑄 𑐠𑑅 𑐎𑐬𑑂𑐩𑐔𑐵𑐬𑐷𑐟 𑐨𑐬𑑂𑐣𑐵 𑐫𑐵𑐫𑐾𑐩𑐏𑐣𑐾𑐰𑑄 𑐥𑑂𑐬𑐡𑐾𑐱 𑐣𑑂𑐴𑑂𑐫𑐵𑐧𑐮𑐾𑑄 𑐎𑐾𑐣𑑂𑐡𑑂𑐬𑐫𑑂 𑐁𑐱𑑂𑐬𑐶𑐟 𑐖𑐸𑐂𑐩𑐵𑐮𑐷 𑑋 𑐠𑑂𑐰 𑐣𑐶𑐐𑐹𑐮𑐶𑑄 𑐩𑐹 𑐏𑑃𑐟 𑐥𑑂𑐬𑐡𑐾𑐱𑐫𑐵𑐟 𑐩𑐧𑐷𑐐𑐸 𑐢𑐫𑐵𑐐𑐸 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑐵𑐟 𑐴𑐾 𑐎𑐩𑐖𑑀𑐬 𑐡𑐫𑐾𑐎𑐾𑐐𑐸 𑐏𑑅 𑑋 𑐎𑐬𑑂𑐩𑐔𑐵𑐬𑐷 𑐧𑐶𑐣𑐵 𑐥𑑂𑐬𑐡𑐾𑐱𑑄 𑐫𑐵𑐫𑐾𑐩𑐵𑑅𑐐𑐸 𑐣𑑂𑐴𑐶𑐫𑐵 𑐣𑑂𑐴𑐶𑐠𑑄𑐫𑐵 𑐖𑑂𑐫𑐵 𑐣𑐶𑐳𑐾𑑄 𑐩𑐾𑐩𑐾𑐐𑐸 𑐀𑐟𑑂𑐫𑐵𑐰𑐱𑑂𑐫𑐎 𑐖𑑂𑐫𑐵𑐏𑑃 𑐣𑑄 𑐫𑐵𑐫𑐾𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑐸𑐎𑐷𑐫𑐵 𑐥𑐮𑐾𑐳𑐵 𑐎𑐾𑐣𑑂𑐡𑑂𑐬𑑄 𑐥𑑂𑐬𑐩𑐸𑐏 𑐖𑐶𑐮𑑂𑐮𑐵 𑐀𑐢𑐶𑐎𑐵𑐬𑐷𑐟𑐫𑑂 𑐰𑑂𑐫𑐰𑐳𑑂𑐠𑐵 𑐀𑐗 𑐣𑑄 𑐫𑐵𑐣𑐵𑐔𑑂𑐰𑑄𑐐𑐸 𑐖𑐎 𑐩𑐏𑐸 𑐄𑐩𑐶𑐟 𑐀𑐗 𑐀𑐥𑑂𑐰𑑅 𑐀𑐢𑐶𑐎𑐵𑐬 𑐧𑐶𑐫𑐵𑑅 𑐱𑐎𑑂𑐟𑐶𑐱𑐵𑐮𑐷 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐸𑐐𑐸 𑐏𑑃 𑐳𑑄𑐑𑐷𑐫𑐟𑐵𑐫𑐵 𑐀𑑅𑐏 𑐖𑐎 𑐩𑐏𑐸 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑐵 𑐩𑐬𑑂𑐩𑐫𑑂 𑐫𑐵𑐣𑐵𑐔𑑂𑐰𑑄𑐐𑐸 𑐥𑑂𑐬𑐴𑐵𑐬 𑐏𑑅 𑑋

𑐳𑑄𑐑𑐷𑐫𑐟𑐵 𑐎𑐵𑐬𑑂𑐫𑐵𑐣𑑂𑐰𑐣𑐫𑑂 𑐡𑐎𑐮𑐫𑑂 𑐩𑐢𑑂𑐫𑐾 𑐟𑑅𑐢𑑄𑐐𑐸 𑐥𑑄𑐐𑑅 𑐠𑑂𑐰𑐴𑐾 𑐖𑐹𑐳𑐵𑑄 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐣𑑄 𑐎𑐾𑐣𑑂𑐡𑑂𑐬𑐫𑐵 𑐣𑐾𑐟𑐵𑐟𑐫𑑂𑐟 𑐣𑐶𑐬𑐣𑑂𑐟𑐬 𑐡𑐧𑐵𑐧 𑐧𑐶𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐂𑐮𑐫𑑂–𑐧𑑂𑐫𑐮𑐫𑑂 𑐥𑑂𑐬𑐡𑐾𑐱𑐫𑐵 𑐣𑐶𑐬𑑂𑐞𑐫𑐫𑐵𑐟 𑐳𑑄𑐑𑐥𑐵𑐏𑐾𑑄 𑐴𑐳𑑂𑐟𑐎𑑂𑐲𑐾𑐥 𑐫𑐵𑐫𑐾𑐩𑐡𑐸 𑐢𑐎𑐵𑑅 𑐣𑑂𑐰𑐰𑐵𑐣𑐵 𑐖𑐹𑐳𑐵𑑄 𑐳𑐱𑐎𑑂𑐟 𑐝𑑄𑐐𑑄 𑐥𑑂𑐬𑐟𑐶𑐰𑐵𑐡 𑐫𑐵𑐫𑐾𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑐎𑐬𑐞𑐫𑐵 𑐳𑐰𑐵𑐮𑐫𑑂 𑐖𑐎 𑐳𑑂𑐰𑑅𑐳𑐵𑑄 𑐠𑑂𑐰 𑐏𑑃 𑐳𑑂𑐥𑐲𑑂𑐚 𑐖𑐹 𑑋 𑐣𑐵𑐎𑐵𑐎𑐬𑐞 𑐥𑑂𑐬𑐡𑐾𑐱𑐫𑐵 𑐳𑑂𑐰𑐰𑐶𑐰𑐾𑐎𑐫𑐵 𑐏𑑃 𑐏𑑅 𑑋 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡𑐟𑐫𑑂𑐳𑑄 𑐖𑐣𑐟𑐵𑐫𑐵 𑐣𑑂𑐴𑑂𑐫𑑅𑐣𑐾 𑐕𑐐𑐹 𑐣𑐵𑑄 𑐟𑐫𑐾 𑐢𑐎𑐵𑑅 𑐎𑐧𑐸𑐮 𑐫𑐵𑐣𑐵𑐔𑑂𑐰𑑄𑐐𑐸 𑐖𑐹𑐳𑐵𑑄 𑐀𑐣𑑂𑐟𑑂𑐫𑐫𑑂 𑐎𑐾𑐣𑑂𑐡𑑂𑐬𑐥𑐵𑐏𑐾𑑄 𑐰𑑅𑐐𑐸 𑐁𑐎𑐵𑐱𑐰𑐵𑐞𑐷 𑐎𑐠𑑄 𑐴𑐾 𑐣𑐵𑐩𑐵𑐎𑐬𑐞 𑐖𑐹𑐐𑐸 𑐏𑐣𑐾𑐡𑐸 𑑋 𑐣𑐵𑐩𑐵𑐎𑐬𑐞 𑐠𑐖𑑂𑐫𑐵𑑅𑐐𑐸 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐏𑑃𑐫𑑂 𑐟𑐎𑑄 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐣𑐾𑐟𑐵, 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐎𑐾𑐣𑑂𑐡𑑂𑐬𑐷𑐫 𑐣𑐾𑐟𑐵𑐟𑐫𑑂 𑐏𑑂𑐰𑐵𑑅 𑐳𑑂𑐰𑐫𑐵𑐔𑑂𑐰𑐣 𑑋 𑐳𑑂𑐰𑐨𑐵𑐰𑐶𑐎 𑐬𑐸𑐥𑑄 𑐠𑐖𑑂𑐫𑐵𑑅𑐐𑐸 𑐥𑑂𑐬𑐰𑐺𑐟𑑂𑐟𑐶𑐫𑐵 𑐴𑐸𑐣𑐶𑑄 𑐎𑐾𑐣𑑂𑐡𑑂𑐬𑐫𑐵𑐟 𑐠𑑅𑐐𑐸 𑐣𑐶𑐬𑑂𑐞𑐫 𑐮𑐵𑐡𑐾 𑐫𑐵𑐫𑐾𑐟 𑐗𑐣𑑂 𑐀𑑅𑐥𑐸𑐮 𑑋 𑐥𑑂𑐬𑐡𑐾𑐱𑐫𑐵 𑐣𑐾𑐟𑐵 𑐰 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐮𑐵 𑐗𑐷𑐳𑑄 𑐢𑐵𑑅𑐐𑐸𑐏𑑃 𑐣𑑂𑐫𑐣𑐾𑐩𑐵𑑅, 𑐥𑑂𑐬𑐡𑐾𑐱 𑐳𑑄𑐔𑐵𑐮𑐣 𑐣𑑄 𑐗𑐷𑐳𑑄 𑐢𑐵𑑅𑐐𑐸 𑐎𑐠𑑄 𑐴𑐾 𑐖𑐸𑐂𑐩𑐵𑑅 𑐢𑐎𑐵𑑅 𑐎𑐾𑐣𑑂𑐡𑑂𑐬𑐫𑐵𑐟 𑐀𑐗 𑐀𑐥𑑂𑐰 𑐁𑐟𑑂𑐩𑐧𑐮 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑑄𑐑, 𑐥𑑂𑐬𑐡𑐾𑐱 𑐰 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐳𑑂𑐰𑑄𑐐𑐸𑐮𑐶𑑄 𑐟𑐴 𑐳𑐴𑐀𑐳𑑂𑐟𑐶𑐟𑑂𑐰 𑐰 𑐳𑐴𑐎𑐵𑐬𑑂𑐫𑐫𑐵 𑐳𑐶𑐡𑑂𑐢𑐵𑐣𑑂𑐟 𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅𑐐𑐸 𑐏𑑅 𑑋 𑐳𑐴𑐎𑐵𑐬𑑂𑐫 𑐩𑐖𑐹𑐳𑐵 𑐣𑐎𑐣𑐶𑐟𑐶 𑐴𑑂𑐰𑐫𑐵𑐔𑑂𑐰𑑄𑐐𑐸 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑑂 𑐣𑐎𑐵𑐬𑐵𑐟𑑂𑐩𑐎 𑐮𑐶𑐔𑑂𑐰𑑅 𑐮𑐵𑐣𑐵𑐰𑐣𑐷 𑑋 𑐳𑐶𑑄𑐴𑐡𑐬𑐰𑐵𑐬𑐫𑑂 𑐔𑑂𑐰𑐣𑐵 𑐱𑐵𑐳𑐣 𑐫𑐵𑐣𑐵𑐔𑑂𑐰𑑄𑐥𑐶𑑄𑐟 𑐠𑑅𑐥𑐶𑑄𑐎𑐾 𑐡𑐫𑐵𑐔𑑂𑐰𑑄𑐐𑐸 𑐀𑐢𑐶𑐎𑐵𑐬 𑐎𑐚𑑁𑐟𑐶 𑐖𑐸𑐂 𑐢𑐫𑐵𑐐𑐸 𑐟𑑅𑐢𑑄𑐐𑐸 𑐐𑑂𑐫𑐵𑑅𑐔𑐶𑐎𑐸 𑐡𑐸 𑑋 𑐖𑐣𑐟𑐵𑐫𑐵 𑐁𑐣𑑂𑐡𑑀𑐮𑐣𑑄 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐳𑑄𑐰𑐶𑐢𑐵𑐣𑐫𑑂 𑐮𑐵 𑐟𑐮 𑑋 𑐟𑐬 𑐄𑐎𑐷𑐫𑐵𑐟 𑐥𑐹𑐬𑑂𑐞𑐬𑐸𑐥𑑄 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑑅𑐳𑐵 𑐠𑑅𑐥𑐶𑐣𑐶 𑐀𑐢𑐶𑐎𑐵𑐬 𑐩𑑂𑐴𑑀 𑐖𑐸𑐂 𑐢𑐎𑐵𑑅 𑐳𑑄𑐑𑑄 𑐥𑑂𑐬𑐡𑐾𑐱𑐟𑐫𑑂𑐟 𑐩𑐮𑐖𑐮 𑐫𑐵𑐫𑐾 𑐔𑐵𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐐𑐸𑐮𑐶𑐦𑐟 𑐄𑐮𑐶 𑐁𑐮𑐚𑐵𑐮 𑐫𑐵𑐫𑐾𑐐𑐸, 𑐦𑐸𑐳𑐵 𑐥𑑂𑐬𑐡𑐾𑐱𑐫𑐵 𑐀𑐢𑐶𑐎𑐵𑐬 𑐀𑐗 𑐎𑑂𑐰𑐥𑐵𑐮𑐾𑐐𑐸𑐥𑐵𑐏𑐾 𑐳𑐶𑑄𑐴𑐡𑐬𑐧𑐵𑐬𑑄 𑐢𑑂𑐫𑐵𑐣 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵𑐫𑐵𑐟 𑐠𑐸𑐎𑐠𑑄 𑐎𑐾𑐣𑑂𑐡𑑂𑐬𑐫𑐵 𑐐𑑂𑐰𑐵𑐴𑐵𑐮𑐶 𑐩𑐡𑐫𑐵𑐔𑑂𑐰𑑄𑐐𑐸𑐮𑐶𑑄 𑐂𑐮𑐫𑑂 𑐠𑑂𑐰 𑐰𑑂𑐫𑐰𑐳𑑂𑐠𑐵 𑐴𑐾 𑐏𑐵𑐬𑐾𑐖 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐳𑐴𑐶𑐟 𑐕𑐠𑑂𑐰𑑅 𑐩𑐣𑐹𑐟 𑐴𑐵𑐣𑑄 𑐳𑑅 𑐠𑑂𑐰𑐫𑐾𑐎𑐾𑐐𑐸 𑐳𑐸𑐬𑐸 𑐫𑐵𑐣𑐵𑐴𑑅𑐐𑐸 𑐡𑐸 𑑋 𑐳𑑂𑐰𑐟𑐣𑑂𑐟𑑂𑐬 𑐬𑐵𑐖𑐣𑐷𑐟𑐶 𑐫𑐵𑐫𑐾 𑐢𑐎𑐵𑑅 𑐰𑐫𑐵𑐔𑑂𑐰𑑄𑐥𑐶𑑄 𑐐𑐸𑐮𑐶𑐏𑐾𑑄 𑐩𑐣𑐹𑐟 𑐥𑑂𑐬𑐡𑐾𑐱𑐫𑐵 𑐏𑐵𑐬𑐾𑐖𑐷, 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐔𑐷𑐎𑐾𑐐𑐸 𑐢𑐫𑐵𑐐𑐸 𑐣𑐵𑐬𑐵 𑐖𑑂𑐰𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑑅𑐎𑑂𑐰𑑅 𑐁𑐣𑑂𑐡𑑀𑐮𑐣 𑐫𑐵𑐣𑐵𑑅 𑐰𑑅𑐐𑐸 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐧𑑂𑐰𑐮𑐣𑐾𑐩𑐏𑑄𑐎 𑐔𑐷𑐎𑐵𑐕𑑂𑐰𑐫𑐾 𑐢𑐫𑐵𑐥𑐶𑑄 𑐕𑐠𑑂𑐰𑑅 𑐡𑐸𑐳𑐵 𑐄𑐎𑐷𑐫𑐵𑐟 𑐧𑐮 𑐧𑐷 𑐎𑐠𑑄 𑐎𑐾𑐣𑑂𑐡𑑂𑐬𑑄 𑐥𑑂𑐬𑐡𑐾𑐱𑐟𑐫𑑂𑐟 𑐀𑐳𑐴𑐫𑑀𑐐 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐳𑑄𑐰𑐶𑐢𑐵𑐣𑐫𑑂 𑐡𑐸𑐐𑐸 𑐰𑑂𑐫𑐰𑐳𑑂𑐠𑐵 𑐎𑐠𑑄 𑐥𑑂𑐬𑐡𑐾𑐱𑐫𑐵 𑐩𑐵𑑅𑐐𑐸 𑐀𑐢𑐶𑐎𑐵𑐬 𑐧𑐷𑐐𑐸, 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐫𑐵𑐎𑐣𑑄 𑐫𑐵𑐫𑐾𑐟 𑐡𑐧𑐵𑐧 𑐧𑐷𑐐𑐸 𑐖𑑂𑐫𑐵 𑐣𑐶𑐬𑐣𑑂𑐟𑐬 𑐖𑐸𑐫𑐵𑐔𑑂𑐰𑐣𑐾𑐩𑐵𑑅 𑑋

𑐥𑑂𑐬𑐵𑐡𑐾𑐱𑐶𑐎 𑐟𑐴𑐮𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐣𑐾𑐟𑐵÷𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐠𑑅𑐟 𑐀𑐢𑐶𑐎𑐵𑐬𑐧𑐶𑐴𑐷𑐣 𑐫𑐵𑐣𑐵𑑅 𑐎𑐾𑐣𑑂𑐡𑑂𑐬𑑄 𑐣𑐶𑐬𑑂𑐞𑐫 𑐮𑐵𑐡𑐾 𑐫𑐵𑐟 𑐢𑐎𑐵𑑅 𑐎𑐾𑐰𑐮 𑐎𑐸𑑄𑐏𑐶𑐣𑐷𑐐𑐸 𑐖𑐎 𑐩𑐫𑐵𑐳𑐾𑑄 𑐎𑐾𑐣𑑂𑐡𑑂𑐬𑐷𑐫 𑐣𑐾𑐟𑐵𑐟𑐫𑑂 𑐠𑐵𑐫𑑂 𑐰𑐣𑐵𑑅 𑐡𑐧𑐵𑐧 𑐧𑐷𑐐𑐸, 𑐁𑐰𑐱𑑂𑐫𑐎 𑐖𑐹𑐳𑐵 𑐁𑐣𑑂𑐡𑑀𑐮𑐶𑐟 𑐖𑐸𑐂𑐐𑐸 𑐖𑑂𑐫𑐵 𑐫𑐵𑐫𑐾𑐩𑐵𑑅 𑑋 𑐠𑐖𑑂𑐫𑐵𑑅𑐐𑐸 𑐥𑑂𑐬𑐰𑐺𑐟𑑂𑐟𑐶 𑐐𑐧𑐮𑐾𑐟𑐮𑐾 𑐨𑐶𑐣𑐶𑐩𑐏𑐸 𑐎𑐾𑐣𑑂𑐡𑑂𑐬𑐥𑐵𑐏𑐾𑑄 𑐳𑐴𑐖 𑐬𑐸𑐥𑑄 𑐀𑐢𑐶𑐎𑐵𑐬 𑐎𑑂𑐰𑐫𑑂𑐫𑐵 𑐟𑐴𑐮𑐫𑑂 𑐠𑑂𑐫𑑄𑐎𑐷𑐐𑐸 𑐳𑐩𑑂𑐨𑐵𑐰𑐣𑐵 𑐩𑐡𑐸 𑑋 𑐀𑐠𑐾 𑐖𑐹𑐐𑐸𑐮𑐶𑑄 𑐳𑑄𑐑𑐷𑐫𑐟𑐵 𑐥𑐎𑑂𑐲𑐢𑐬𑐟 𑐦𑐸𑐎𑑂𑐎𑑄 𑐊𑐎𑐷𑐎𑐺𑐟 𑐖𑐸𑐫𑐵𑑅 𑐠𑐸𑐎𑐷𑐫𑐵𑐟 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐎𑐾𑐟 𑐬𑐔𑐣𑐵𑐟𑑂𑐩𑐎 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐎𑐾𑐣𑑂𑐡𑑂𑐬𑐷𑐎𑐺𑐟 𑐩𑐵𑐣𑐳𑐶𑐎𑐟𑐵𑐫𑐵𑐟 𑐔𑐷𑐎𑐵𑑅 𑐐𑐸𑐮𑐶𑐦𑐟 𑐫𑐵𑐎𑐣𑑄 𑐳𑑄𑐑𑐷𑐫𑐟𑐵 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵𑐟 𑐩𑐵𑑅𑐐𑐸 𑐎𑐵𑐣𑐹𑐣 𑐣𑐶𑐬𑑂𑐩𑐵𑐞 𑐫𑐵𑐎𑐾𑐟 𑐡𑐧𑐵𑐧 𑐧𑐷𑐩𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS