Read news in NepalBhasa text-- www.hamroschool.com BACK 𑐬𑐶𑐫𑐵 𑐔𑐎𑑂𑐬𑐰𑐬𑑂𑐟𑐶𑐰𑐶𑐬𑐸𑐡𑑂𑐢 𑐔𑐵𑐬𑑂𑐖𑐳𑐶𑐚 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐬𑐶𑐫𑐵 𑐔𑐎𑑂𑐬𑐰𑐬𑑂𑐟𑐶𑐰𑐶𑐬𑐸𑐡𑑂𑐢 𑐔𑐵𑐬𑑂𑐖𑐳𑐶𑐚

𑐊𑐖𑐾𑐣𑑂𑐳𑐷- 𑐨𑐵𑐬𑐟𑐫𑐵 𑐮𑐵𑐐𑐹 𑐰𑐵𑐳𑑅 𑐣𑐶𑐫𑐣𑑂𑐟𑑂𑐬𑐞 𑐧𑑂𑐫𑐹𑐬𑑀 (𑐊𑐣𑐳𑐷𑐧𑐷𑑄) 𑐧𑐮𑐶𑐄𑐜 𑐀𑐨𑐶𑐣𑐾𑐟𑐵 𑐳𑐸𑐱𑐵𑐣𑑂𑐟 𑐳𑐶𑑄𑐴 𑐬𑐵𑐖𑐥𑐹𑐟 𑐩𑐵𑐩𑐶𑐮𑐵𑐫 𑐔𑐵𑐬𑑂𑐖𑐳𑐶𑐚 𑐡𑐬𑑂𑐟𑐵 𑐫𑐵𑑅𑐐𑐸 𑐡𑐸 𑑋 𑐠𑑂𑐰 𑐔𑐵𑐬𑑂𑐖𑐳𑐶𑐚𑐫𑑂 𑐬𑐵𑐖𑐥𑐹𑐟𑐫𑐵 𑐥𑑂𑐬𑐾𑐩𑐶𑐎𑐵 𑐢𑐫𑐵𑐟𑑅𑐩𑑂𑐴 𑐬𑐶𑐫𑐵 𑐔𑐎𑑂𑐬𑐰𑐬𑑂𑐟𑐶𑑄 𑐬𑐵𑐖𑐥𑐹𑐟𑐫𑐵𑐟 𑐮𑐵𑐐𑐹 𑐰𑐵𑐳𑑅 𑐧𑐶𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐐𑐩𑑂𑐨𑐷𑐬 𑐡𑑂𑐰𑐥𑑄 𑐧𑐶𑐫𑐵𑐟𑑅𑐐𑐸 𑐡𑐸 𑑋

𑐡 𑐴𑐶𑐣𑑂𑐡𑐹𑑄 𑐔𑑂𑐰𑑅𑐐𑐸 𑐏𑐧𑐬 𑐎𑐠𑑄 𑐔𑐵𑐬𑑂𑐖𑐳𑐶𑐚𑐫𑑂 𑐔𑐎𑑂𑐬𑐧𑐬𑑂𑐟𑐶𑑄 𑐮𑐵𑐐𑐹 𑐰𑐵𑐳𑑅 𑐣𑑂𑐫𑐵𑐣𑐵𑑅 𑐬𑐵𑐖𑐥𑐹𑐟𑐫𑐵𑐟 𑐧𑐷𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐬𑐵𑐖𑐥𑐹𑐟𑑄 𑐣𑐶𑐡𑑃 𑐣𑑂𑐴𑑂𑐫𑑅 𑐖𑐹𑐣 𑑑𑑔 𑐫𑑂 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐄𑐧𑐮𑐫𑑂 𑐔𑐎𑑂𑐬𑐰𑐬𑑂𑐟𑐶𑐫𑐵𑐟 𑐁𑐟𑑂𑐩𑐴𑐟𑑂𑐫𑐵𑐫𑐵 𑐡𑐸𑐬𑐸𑐟𑑂𑐳𑐵𑐴𑐣 𑐫𑐵𑑅𑐐𑐸 𑐡𑑂𑐰𑐥𑐣𑐫𑑂 𑐖𑑂𑐰𑑄𑐐𑐸 𑐣𑑄 𑐏𑑅𑐳𑐵 𑐀𑐡𑐵𑐮𑐟𑑄 𑐰𑐫𑐵𑐟 𑐠𑑂𑐰 𑐡𑑂𑐰𑐥𑐣𑐫𑑂 𑐖𑐩𑐵𑐣𑐟 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐬𑐵𑐖𑐥𑐹𑐟𑐫𑐵 𑐀𑐧𑐸 𑐎𑐾𑐎𑐾 𑐳𑐶𑑄𑐴𑑄 𑐔𑐎𑑂𑐬𑐰𑐬𑑂𑐟𑐶 𑐰𑐶𑐬𑐸𑐡𑑂𑐢 𑐊𑐦𑐁𑐂𑐁𑐬 𑐡𑐬𑑂𑐟𑐵 𑐫𑐵𑐫𑐾𑐢𑐸𑑄𑐎𑐵𑑅 𑐰𑐫𑐵𑐟 𑐖𑑂𑐰𑑄𑐐𑐸 𑐏𑑅 𑑋

𑐧𑐸𑐢𑐰𑐵𑑅 𑐡𑐬𑑂𑐟𑐵 𑐫𑐵𑑅𑐐𑐸 𑐔𑐵𑐬𑑂𑐖𑐳𑐶𑐚𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐎𑐠𑑄 𑐔𑐎𑑂𑐬𑐰𑐬𑑂𑐟𑐶𑑄 𑐠𑑅 𑐎𑐶𑐖𑐵 𑐱𑑁𑐰𑐶𑐎 𑐔𑐎𑑂𑐬𑐰𑐬𑑂𑐟𑐶, 𑐡𑐷𑐥𑐾𑐱 𑐳𑐵𑑄𑐰𑐟, 𑐳𑑂𑐫𑐵𑐩𑐸𑐊𑐮 𑐩𑐶𑐬𑐵𑑄𑐜𑐵𑐥𑐵𑐏𑐾𑑄 𑐐𑐵𑑃𑐖𑐵 𑐎𑐫𑐵𑑅 𑐬𑐵𑐖𑐥𑐹𑐟𑐫𑐵𑐟 𑐧𑐷𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑂𑐰 𑐮𑐵𑐐𑐹 𑐰𑐵𑐳𑑅𑐫𑐵 𑐣𑐶𑑄𑐟𑐶𑑄 𑐔𑐎𑑂𑐬𑐰𑐬𑑂𑐟𑐶𑑄 𑐄𑐩𑐶𑐟 𑐢𑑂𑐫𑐧𑐵 𑐣𑑄 𑐥𑐹𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐩𑐾𑐏𑐾 𑐮𑐵𑐐𑐹 𑐰𑐵𑐳𑑅𑐫𑐵 𑐴𑐾 𑐩𑐵𑐩𑐶𑐮𑐵𑐫𑑂 𑐧𑐮𑐶𑐄𑐜 𑐀𑐨𑐶𑐣𑐾𑐟𑐵 𑐱𑐵𑐴𑐬𑐸𑐏 𑐏𑐵𑐣𑐫𑐵𑐟 𑐀𑐡𑐵𑐮𑐟𑐥𑐵𑐏𑐾𑑄 𑐬𑐵𑐴𑐟 𑐔𑐹𑐮𑐵𑑅𑐐𑐸 𑐡𑐸 𑑋 𑐩𑐸𑐩𑑂𑐧𑐃𑐫𑐵 𑐕𑐐𑐹 𑐰𑐶𑐱𑐾𑐲 𑐀𑐡𑐵𑐮𑐟𑑄 𑐏𑐵𑐣𑑄 𑐀𑐡𑐵𑐮𑐟𑑄 𑐧𑐸𑐗𑐾 𑐫𑐵𑐣𑐵𑐟𑑅𑐐𑐸 𑐥𑐵𑐳𑐥𑑀𑐬𑑂𑐚 𑐮𑐶𑐟 𑐧𑐷𑐟 𑐢𑐵𑑅𑐐𑐸 𑐡𑐸 𑑋 𑐏𑐵𑐣𑐫𑐵𑐟 𑐊𑐣𑐳𑐷𑐧𑐷𑑄 𑐕𑐐𑐹 𑐎𑑂𑐬𑐹𑐖 𑐖𑐴𑐵𑐖 𑐮𑐵𑐐𑐹 𑐰𑐵𑐳𑑅 𑐎𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐔𑑂𑐰𑑄𑐐𑐸 𑐏𑑅, 𑐟𑐬 𑐮𑐶𑐥𑐵 𑐰𑐫𑐵𑐟 𑐳𑐦𑐵𑐂 𑐧𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐏𑐵𑐣𑐫𑐵𑐟 𑐠𑐐𑐸𑐣𑐾 𑑓 𑐀𑐎𑑂𑐚𑐸𑐧𑐬𑐫𑑂 𑐩𑐸𑐩𑑂𑐧𑐂 𑐣𑑄 𑐐𑑀𑐰𑐵 𑐰𑐣𑐵𑐔𑑂𑐰𑑄𑐐𑐸 𑐎𑑂𑐬𑐹𑐖 𑐰𑐶𑐩𑐵𑐣𑐫𑑂 𑐕𑐵𑐥𑐵 𑐩𑐵𑐬𑐾 𑐫𑐵𑐣𑐵𑑅 𑐖𑑂𑐰𑑄𑐐𑐸 𑐏𑑅 𑑋 𑐄𑐧𑐮𑐫𑑂 𑐀𑐡𑐵𑐮𑐟𑑄 𑐖𑐩𑐵𑐣𑐟 𑐩𑐧𑐶𑐄𑐣𑐶𑐧𑐮𑐫𑑂 𑐟𑐎𑐫𑐵 𑐫𑐵𑐣𑐵𑑅 𑐣𑐷𑐣𑑂𑐴𑐸 𑐟𑐎 𑐴𑐶𑐬𑐵𑐳𑐟𑐫𑑂 𑐔𑑂𑐰𑐣𑐾𑐩𑐵𑑅𑐐𑐸 𑐏𑑅 𑑋 𑐏𑐵𑐣𑐫𑐵𑐟 𑐖𑐩𑐵𑐣𑐟 𑐧𑐶𑐄𑐧𑐮𑐫𑑂 𑐧𑐸𑐗𑐾 𑐫𑐵𑐣𑐵𑐟𑑅𑐐𑐸 𑐥𑐵𑐬𑑂𑐳𑐥𑑀𑐬𑑂𑐚 𑐁𑑅 𑐮𑐶𑐟 𑐧𑐷𑐟 𑐀𑐡𑐵𑐮𑐟𑑄 𑐁𑐡𑐾𑐱 𑐧𑐶𑐄𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS