Read news in NepalBhasa text-- www.hamroschool.com BACK 𑐱𑑂𑐬𑐷𑐮𑑄𑐎𑐵𑑄 𑐧𑐶𑐳𑐶𑐄𑑃 𑐰𑑄𑐩𑑂𑐴 𑐬𑐵𑐲𑑂𑐚𑑂𑐬𑐥𑐟𑐶 𑐐𑑀𑐚𑐵𑐧𑐵𑐫 𑐬𑐵𑐖𑐥𑐎𑑂𑐲 𑐳𑐶𑑄𑐐𑐵𑐥𑐸𑐬𑐫𑑂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐱𑑂𑐬𑐷𑐮𑑄𑐎𑐵𑑄 𑐧𑐶𑐳𑐶𑐄𑑃 𑐰𑑄𑐩𑑂𑐴 𑐬𑐵𑐲𑑂𑐚𑑂𑐬𑐥𑐟𑐶 𑐐𑑀𑐚𑐵𑐧𑐵𑐫 𑐬𑐵𑐖𑐥𑐎𑑂𑐲 𑐳𑐶𑑄𑐐𑐵𑐥𑐸𑐬𑐫𑑂

𑐊𑐖𑐾𑐣𑑂𑐳𑐷- 𑐱𑑂𑐬𑐷𑐮𑑄𑐎𑐵𑑄 𑐧𑐶𑐳𑐶𑐄𑑃 𑐰𑑄𑐩𑑂𑐴 𑐬𑐵𑐲𑑂𑐚𑑂𑐬𑐥𑐟𑐶 𑐐𑑀𑐚𑐵𑐧𑐵𑐫 𑐬𑐵𑐖𑐥𑐎𑑂𑐲 𑐳𑐶𑑄𑐐𑐵𑐥𑐸𑐬𑐫𑑂 𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐧𑐶𑐧𑐶𑐳𑐷𑐫𑐵 𑐎𑐠𑑄 𑐬𑐵𑐖𑐥𑐎𑑂𑐲 𑐩𑐵𑐮𑑂𑐡𑐶𑐨𑑂𑐳𑑄 𑐳𑐵𑐄𑐡𑐷 𑐊𑐫𑐬𑐮𑐵𑐂𑐣𑑂𑐳𑐫𑐵 𑐰𑐶𑐩𑐵𑐣 𑐐𑐫𑐵𑑅 𑐳𑐶𑑄𑐐𑐵𑐥𑐸𑐬 𑐰𑑄𑐐𑐸 𑐢𑐵𑑅𑐐𑐸 𑐡𑐸 𑑋 𑐟𑐬 𑐬𑐵𑐖𑐥𑐎𑑂𑐲 𑐀𑐣 𑐴𑐾 𑐱𑐬𑐞 𑐎𑐫𑐵𑑅 𑐔𑑂𑐰𑐣𑐷 𑐰𑐵 𑐀𑐣𑑄 𑐣𑑄 𑐩𑐾𑐠𑐵𑐫𑑂 𑐰𑐣𑐷 𑐢𑐫𑐵𑐐𑐸 𑐳𑐷𑐩𑐡𑐸𑐣𑐶 𑑋

𑐱𑑂𑐬𑐷𑐮𑑄𑐎𑐵𑐫𑑂 𑐳𑐬𑐎𑐵𑐬𑐰𑐶𑐬𑐸𑐡𑑂𑐢 𑐟𑑅𑐢𑑄𑐐𑐸 𑐥𑑂𑐬𑐡𑐬𑑂𑐱𑐣 𑐖𑐸𑐂𑐰𑑄 𑐬𑐵𑐖𑐥𑐎𑑂𑐲 𑐱𑐣𑐶𑐰𑐵𑑅 𑐩𑐵𑐮𑑂𑐡𑐶𑐨𑑂𑐳 𑐧𑐶𑐳𑐶𑐄𑑃 𑐰𑑄𑐐𑐸 𑐏𑑅 𑑋 𑐰𑑄 𑐧𑐸𑐢𑐰𑐵𑑅 𑐴𑐾 𑐠𑑅𑐐𑐸 𑐥𑐡𑑄 𑐬𑐵𑐖𑐷𑐣𑐵𑐩𑐵 𑐧𑐷𑐐𑐸 𑐏𑑃 𑐥𑐶𑐴𑐵𑑄 𑐰𑑅𑐐𑐸 𑐏𑑅𑐳𑐵𑑄 𑐁𑑅𑐟𑐎 𑐬𑐵𑐖𑐷𑐣𑐵𑐩𑐵 𑐢𑐵𑑅𑐳𑐵 𑐧𑐶𑐄𑐐𑐸 𑐩𑐡𑐸𑐣𑐶 𑑋 𑐬𑐵𑐖𑐥𑐎𑑂𑐲𑑄 𑐠𑑅 𑐳𑐸𑐬𑐎𑑂𑐲𑐶𑐟 𑐬𑐸𑐥𑑄 𑐔𑑂𑐰𑐣𑐾𑐡𑐂𑐐𑐸 𑐐𑐣𑑂𑐟𑐰𑑂𑐫𑐫𑑂 𑐩𑐠𑑂𑐫𑑄𑐎𑑄 𑐬𑐵𑐖𑐷𑐣𑐵𑐩𑐵 𑐧𑐷𑐩𑐏𑐸𑐣𑐶𑐐𑐸 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐵𑐖𑐥𑐎𑑂𑐲 𑐣𑑂𑐴𑐹𑐐𑐸 𑐳𑐬𑐎𑐵𑐬 𑐰𑐮𑐎𑐶 𑐠𑑅𑐟 𑐁𑐬𑑂𑐠𑐶𑐎 𑐑𑑀𑐚𑐵𑐮𑐵𑐫𑐵 𑐡𑑂𑐰𑐥𑐣𑐫𑑂 𑐖𑑂𑐰𑐣𑐾𑐦𑐸𑐐𑐸𑐮𑐶𑑄 𑐧𑐶𑐳𑐶𑐄𑑃 𑐰𑑄𑐐𑐸 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸𑐡𑐸 𑑋

𑐬𑐵𑐖𑐥𑐎𑑂𑐲𑑄 𑐧𑐸𑐢𑐰𑐵𑑅 𑐬𑐵𑐖𑐷𑐣𑐵𑐩𑐵 𑐩𑐧𑐶𑐳𑐾𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐬𑐣𑐶𑐮 𑐰𑐶𑐎𑑂𑐬𑐩𑐳𑐶𑑄𑐑𑐾𑐫𑐵𑐟 𑐎𑐵𑐬𑑂𑐫𑐰𑐵𑐴𑐎 𑐬𑐵𑐲𑑂𑐚𑑂𑐬𑐥𑐟𑐶 𑐡𑐫𑐾𑐎𑐵𑐠𑐎𑐹𑐐𑐸 𑐏𑑅 𑑋 𑐰𑐶𑐎𑑂𑐬𑐩𑐳𑐶𑑄𑐑 𑐬𑐵𑐖𑐥𑐎𑑂𑐲𑐫𑐵𑐩𑑂𑐴 𑐴𑐾 𑐣𑐾𑐟𑐵 𑐏𑑅 𑑋 𑐰𑐶𑐎𑑂𑐬𑐩𑐳𑐶𑑄𑐑𑐾𑑄 𑐎𑐵𑐬𑑂𑐫𑐰𑐵𑐴𑐎 𑐬𑐵𑐲𑑂𑐚𑑂𑐬𑐥𑐟𑐶 𑐖𑐸𑐂𑐰𑑄 𑐡𑐾𑐱𑐫𑑂 𑐳𑑄𑐎𑐚𑐎𑐵𑐮 𑐑𑑀𑐲𑐞𑐵 𑐫𑐵𑑅𑐐𑐸 𑐡𑐸𑐳𑐵 𑐧𑐶𑐴𑐶𑐰𑐵𑑅 𑐣𑑄 𑐠𑐷𑐠𑐷 𑐠𑐵𑐳𑐫𑑂 𑐎𑐦𑑂𑐬𑑂𑐫𑐸 𑐑𑑀𑐲𑐞𑐵 𑐫𑐵𑑅𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐠𑐷𑐠𑐷 𑐠𑐵𑐳𑐫𑑂 𑐥𑑂𑐬𑐡𑐬𑑂𑐱𑐣 𑐖𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐥𑑂𑐬𑐡𑐬𑑂𑐱𑐣𑐎𑐵𑐬𑐷𑐟𑐫𑑂𑐳𑑄 𑐰𑐶𑐎𑑂𑐬𑐩𑐳𑐶𑑄𑐑𑐾𑐫𑐵 𑐣𑑄 𑐬𑐵𑐖𑐷𑐣𑐵𑐩𑐵 𑐦𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐾𑐏𑐾 𑐡𑐾𑐫𑑂 𑐟𑑂𑐰𑑅𑐟𑐵𑑅 𑐧𑐶𑐳𑐶𑐄𑑃 𑐰𑑄𑐩𑑂𑐴 𑐬𑐵𑐲𑑂𑐚𑑂𑐬𑐥𑐟𑐶 𑐐𑑀𑐚𑐵𑐧𑐫𑐫𑐵𑐟 𑐁𑑅 𑐳𑐸𑐣𑐵𑑄 𑐱𑐬𑐞 𑐧𑐷 𑐢𑐫𑐵𑐐𑐸 𑐣𑑂𑐴𑑂𑐫𑐳𑑅 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐶𑑄𑐐𑐵𑐥𑐸𑐬 𑐠𑑂𑐫𑑄𑐩𑑂𑐴 𑐐𑑀𑐚𑐵𑐧𑐫𑐫𑐵𑐟 𑐀𑐣𑐫𑐵 𑐳𑐬𑐎𑐵𑐬𑑄 𑐟𑐵𑑅𑐃 𑐟𑐎 𑐱𑐬𑐞 𑐩𑐧𑐷𑐦𑐸𑐐𑐸 𑐏𑑃 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐱𑐾𑐲𑐟𑑅 𑐳𑐶𑑄𑐐𑐵𑐥𑐸𑐬𑐫𑑂 𑐱𑑂𑐬𑐷𑐮𑑄𑐎𑐵𑐫𑐵 𑐟𑐩𑐶𑐮𑐟𑐫𑑂 𑐧𑐳𑑀𑐧𑐵𑐳 𑐣𑑄 𑐫𑐎𑑂𑐰 𑐡𑐸 𑑋 𑐄𑐩𑐶𑐐𑐸 𑐁𑑅 𑐣𑑄 𑐱𑑂𑐬𑐷𑐮𑑄𑐎𑐵𑐮𑐶𑐳𑐾 𑐥𑐬𑐩𑑂𑐥𑐬𑐵𑐐𑐟 𑐳𑐩𑑂𑐧𑐣𑑂𑐢 𑐡𑐣𑐶 𑑋 𑐫𑐡𑐶 𑐐𑑀𑐚𑐵𑐧𑐫𑐫𑐵𑐟 𑐳𑐶𑑄𑐐𑐵𑐥𑐸𑐬𑐫𑑂 𑐱𑐬𑐞 𑐧𑐶𑐮 𑐢𑐵𑑅𑐳𑐵 𑐠𑑂𑐰 𑐳𑐩𑐸𑐡𑐵𑐫𑐫𑑂 𑐟𑑄𑐔𑐵𑐫𑐾𑐦𑐸𑐐𑐸𑐮𑐶𑑄 𑐣𑑄 𑐳𑐶𑑄𑐐𑐵𑐥𑐸𑐬𑐫𑐵 𑐳𑐬𑐎𑐵𑐬𑑄 𑐰𑐫𑐵𑐟 𑐀𑐣 𑐟𑐵𑑅𑐃 𑐩𑐟𑐂𑐐𑐸 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐐𑑀𑐚𑐵𑐧𑐫 𑐱𑑂𑐬𑐷𑐮𑑄𑐎𑐵𑐫𑑂 𑐟𑐩𑐶𑐮 𑐰𑐶𑐡𑑂𑐬𑑀𑐴𑐫𑐵𑐟 𑐡𑐩𑐣 𑐫𑐵𑐣𑐵𑑅 𑐳𑐟𑑂𑐟𑐵𑐫𑑂 𑐠𑑂𑐫𑑄𑐩𑑂𑐴 𑐏𑑅 𑑋 𑐰𑐫𑐵𑐰𑐶𑐬𑐸𑐡𑑂𑐢 𑐫𑐸𑐡𑑂𑐢 𑐀𑐥𑐬𑐵𑐢𑐫𑐵 𑐩𑐸𑐡𑑂𑐡𑐵 𑐣𑑄 𑐮𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐣𑑄 𑐳𑐶𑑄𑐐𑐵𑐥𑐸𑐬𑑄 𑐟𑐵𑑅𑐃 𑐱𑐬𑐞 𑐩𑐧𑐷𑐦𑐸𑐐𑐸 𑐏𑑃 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐩𑐾𑐏𑐾 𑐎𑑀𑐮𑐩𑑂𑐧𑑀𑐫𑑂 𑐧𑐸𑐢𑐰𑐵𑑅 𑐖𑐹𑐐𑐸 𑐥𑑂𑐬𑐡𑐬𑑂𑐱𑐣𑐫𑑂 𑐕𑐩𑑂𑐴 𑐥𑑂𑐬𑐡𑐬𑑂𑐱𑐣𑐎𑐵𑐬𑐷 𑐳𑐷𑐐𑐸 𑐡𑐸𑐳𑐵 𑑘𑑔 𑐩𑑂𑐴 𑐑𑐵𑑅𑐥𑐵𑑅 𑐖𑐹𑐐𑐸 𑐳𑑂𑐠𑐵𑐣𑐷𑐫 𑐀𑐳𑑂𑐥𑐟𑐵𑐮𑐫𑐵 𑐀𑐢𑐶𑐎𑐵𑐬𑐷𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐥𑑂𑐬𑐴𑐬𑐷𑑄 𑐀𑐱𑑂𑐬𑐸𑐐𑑂𑐫𑐵𑐳 𑐎𑐫𑐾𑐎𑐹𑐮𑐶𑑄 𑐳𑐵𑐳𑑅 𑐮𑑂𑐴𑐵𑐫𑐾 𑐠𑐵𑐎𑐸𑐫𑐵 𑑒𑑖 𑐡𑑃𑐫𑐵 𑐕𑐩𑑂𑐴 𑐮𑑂𑐫𑐵𑐫𑑂𑐩𑑂𑐴 𑐳𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐎𑑀𑐮𑐩𑑂𑐧𑑀 𑐣𑐾𑐱𑐣𑐮 𑐀𑐳𑑂𑐥𑐟𑐵𑐮𑐫𑐵 𑐀𑐢𑐶𑐎𑐵𑐬𑐷𑐟𑐫𑑂 𑐎𑐠𑑄 𑐑𑐵𑑅𑐥𑐵𑑅 𑐖𑐹𑐥𑐶𑑄 𑐩𑐢𑑂𑐫𑐾 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑑂𑐫𑐵𑐎𑐹 𑐰 𑐳𑑄𑐳𑐡 𑐨𑐰𑐣 𑐥𑐶𑐣𑐾 𑐥𑑂𑐬𑐡𑐬𑑂𑐱𑐣 𑐫𑐵𑐣𑐵𑐔𑑂𑐰𑑄𑐥𑐶𑑄 𑐏𑑅 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐖𑑂𑐫𑐵𑐎𑐸𑐠𑐶𑐂 𑐡𑐸𑐴𑐵𑑄 𑐰𑐣𑐾𑐟 𑐩𑐹𑐮𑐸𑐏𑐵 𑐔𑐵𑐫𑐾𑐎𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐥𑑂𑐬𑐴𑐬𑐷𑑄 𑐀𑐱𑑂𑐬𑐐𑑂𑐫𑐵𑐳 𑐎𑐫𑐾𑐎𑐹𑐐𑐸 𑐏𑑅 𑑋

𑐱𑑂𑐬𑐷𑐮𑑄𑐎𑐵𑐫𑑂 𑐟𑐔𑑂𑐰𑑅𑐐𑐸 𑐁𑐬𑑂𑐠𑐶𑐎 𑐳𑑄𑐎𑐚 𑐰𑐫𑐾𑐰𑑄 𑐳𑐬𑐎𑐵𑐬𑐰𑐶𑐬𑐸𑐡𑑂𑐢 𑐥𑑂𑐬𑐡𑐬𑑂𑐱𑐣 𑐟𑐔𑑂𑐰𑐫𑐵 𑐰𑑅𑐐𑐸 𑐏𑑅 𑑋 𑐬𑐵𑐲𑑂𑐚𑑂𑐬𑐥𑐟𑐶 𑐐𑑀𑐚𑐵𑐧𑐫 𑐰 𑐳𑐟𑑂𑐟𑐵𑐫𑑂 𑐠𑑂𑐫𑑄𑐥𑐶𑑄 𑐰𑐫𑐵 𑐠𑑅𑐠𑐶𑐟𑐶𑐥𑐶𑐣𑐶𑐐𑐸 𑐎𑐵𑐬𑐞𑑄 𑐴𑐾 𑐁𑐬𑑂𑐠𑐶𑐎 𑐳𑑄𑐎𑐚 𑐰𑑅𑐐𑐸 𑐢𑐵𑐳𑐾𑑄 𑐱𑑂𑐬𑐷𑐮𑑄𑐎𑐵𑐮𑐷 𑐖𑐣𑐟𑐵𑑄 𑐳𑐟𑐎𑐫𑑂 𑐎𑐸𑐴𑐵𑑄 𑐰𑑅𑐐𑐸 𑐏𑑅 𑑋

𑐬𑐵𑐖𑐣𑐷𑐟𑐶𑐎 𑐳𑑄𑐎𑐚
𑐬𑐵𑐲𑑂𑐚𑑂𑐬𑐥𑐟𑐶 𑐐𑑀𑐚𑐵𑐧𑐫 𑐬𑐵𑐖𑐥𑐎𑑂𑐲 𑐡𑐾𑐱𑑄 𑐧𑐶𑐳𑐶𑐄𑑃 𑐰𑐣𑐾𑐰𑑄 𑐱𑑂𑐬𑐷𑐮𑑄𑐎𑐵𑐫𑑂 𑐁𑑅 𑐬𑐵𑐖𑐣𑐷𑐟𑐶𑐎 𑐳𑑄𑐎𑐚 𑐣𑑄 𑐟𑐔𑑂𑐰𑐫𑐵 𑐰𑑅𑐐𑐸 𑐡𑐸 𑑋 𑐁𑑅 𑐀𑐣 𑐳𑐟𑑂𑐟𑐵 𑐳𑐸𑐣𑐵𑑄 𑐣𑑂𑐴𑑂𑐫𑐵𑐎𑐾𑐐𑐸 𑐢𑐫𑐵𑐐𑐸 𑐴𑐾 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐵𑐲𑑂𑐚𑑂𑐬𑐥𑐟𑐶𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐰𑐶𑐎𑑂𑐬𑐩𑐳𑐶𑑄𑐑𑐾𑐫𑐵𑐟 𑐎𑐵𑐬𑑂𑐫𑐰𑐵𑐴𑐎 𑐬𑐵𑐲𑑂𑐚𑑂𑐬𑐥𑐟𑐶 𑐫𑐵𑐣𑐵𑐠𑐎𑐹𑐳𑐵𑑄 𑐖𑐣𑐟𑐵𑑄 𑐰𑐫𑐵𑐟 𑐣𑑄 𑐳𑑂𑐰𑐷𑐎𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸 𑑋
𑐎𑐵𑐬𑑂𑐫𑐰𑐵𑐴𑐎 𑐬𑐵𑐲𑑂𑐚𑑂𑐬𑐥𑐟𑐶 𑐖𑐸𑐂𑐢𑐸𑑄𑐎𑐵𑑅 𑐰𑐶𑐎𑑂𑐬𑐩𑐳𑐶𑑄𑐑𑐾𑑄 𑐡𑐾𑐱𑐫𑑂 𑐳𑐸𑐰𑑂𑐫𑐰𑐳𑑂𑐠𑐵 𑐎𑐵𑐫𑐩 𑐫𑐵𑐫𑐾𑐟 𑐕𑐸 𑐁𑐰𑐱𑑂𑐫𑐎 𑐡𑐸 𑐀𑐠𑐾 𑐫𑐵𑐫𑐾𑐟 𑐳𑐾𑐣𑐵𑐫𑐵𑐟 𑐁𑐡𑐾𑐱 𑐧𑐶𑐄𑐐𑐸 𑐡𑐸 𑑋 𑐟𑐬 𑐳𑐾𑐣𑐵 𑐥𑑂𑐬𑐡𑐬𑑂𑐱𑐣𑐎𑐵𑐬𑐷𑐰𑐶𑐬𑐸𑐡𑑂𑐢 𑐎𑐜𑐵 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅𑐰𑑅𑐐𑐸 𑐏𑐣𑐾𑐩𑐡𑐸𑐣𑐶 𑑋
𑐱𑑂𑐬𑐷𑐮𑑄𑐎𑐵𑐫𑐵 𑐁𑐬𑑂𑐠𑐶𑐎 𑐳𑑄𑐎𑐚 𑐖𑑂𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐠𑑁𑑄𑐎𑐣𑑂𑐴𑐫𑑂 𑐀𑐣 𑐥𑐹𑐬𑑂𑐞𑐬𑐸𑐥𑑄 𑐖𑑂𑐫𑐵 𑐫𑐵𑐫𑐾𑐦𑐂𑐐𑐸 𑐳𑐬𑐎𑐵𑐬𑐫𑐵 𑐁𑐰𑐱𑑂𑐫𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐠𑐖𑑂𑐫𑐵𑑅𑐐𑐸 𑐳𑐬𑐎𑐵𑐬 𑐐𑐸𑐎𑐠𑑄 𑐐𑐛𑐣 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐴𑐾 𑐀𑐣𑑂𑐫𑑁𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐬𑐟𑐶𑐥𑐎𑑂𑐲𑐷 𑐥𑐵𑐬𑑂𑐚𑐷𑐟 𑐳𑐬𑑂𑐰𑐡𑐮𑐷𑐫 𑐳𑐬𑐎𑐵𑐬 𑐐𑐛𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐰𑐵𑐬𑑂𑐟𑐵𑐫𑑂 𑐡𑐸𑐳𑐵𑑄 𑐄𑐩𑐶 𑐡𑐠𑐸𑐂 𑐕𑐸𑑄 𑐳𑐴𑐩𑐟𑐶 𑐖𑐸𑐂𑐦𑐸𑐐𑐸 𑐩𑐡𑐸𑐣𑐶 𑑋 𑐫𑐡𑐶 𑐳𑐬𑑂𑐰𑐡𑐮𑐷𑐫 𑐳𑐬𑐎𑐵𑐬𑐫𑐵 𑐣𑐶𑑄𑐟𑐶𑑄 𑐳𑐴𑐩𑐟 𑐴𑐾 𑐖𑐹𑐳𑐵𑑄 𑐖𑐣𑐟𑐵𑑄 𑐄𑐎𑐶𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑐂 𑐎𑐶 𑐩𑐫𑐵𑐂 𑐢𑐫𑐵𑐐𑐸 𑐣𑑄 𑐀𑐣𑑂𑐫𑑁𑐮 𑐡𑐣𑐶 𑑋
𑐠𑑂𑐰𑐴𑐾 𑐡𑐠𑐸𑐂 𑐥𑑂𑐬𑐩𑐸𑐏 𑐥𑑂𑐬𑐟𑐶𑐥𑐎𑑂𑐲𑐷 𑐡𑐮𑐫𑐵 𑐣𑐾𑐟𑐵 𑐳𑐖𑐶𑐟 𑐥𑑂𑐬𑐾𑐩𑐡𑐵𑐳𑑄 𑐠𑑅 𑐬𑐵𑐲𑑂𑐚𑑂𑐬𑐥𑐟𑐶 𑐖𑐸𑐂𑐟 𑐟𑐫𑐵𑐬 𑐡𑐸 𑐢𑐵𑑅𑐐𑐸 𑐏𑑅𑐳𑐵𑑄 𑐖𑐣𑐟𑐵𑑄 𑐰𑐫𑐵𑐟 𑐣𑑄 𑐳𑑂𑐰𑐷𑐎𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸𑐣𑐶 𑑋
𑐧𑐸𑐢𑐰𑐵𑑅 𑐎𑐵𑐬𑑂𑐫𑐰𑐵𑐴𑐎 𑐬𑐵𑐲𑑂𑐚𑑂𑐬𑐥𑐟𑐶 𑐰𑐶𑐎𑑂𑐬𑐩𑐳𑐶𑑄𑐑𑐾𑑄 𑐳𑑄𑐳𑐡𑐫𑐵 𑐳𑐨𑐵𑐩𑐸𑐏𑐫𑐵𑐟 𑐣𑑂𑐴𑐹𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐮𑑂𑐫𑐫𑐾𑐟 𑐢𑐵𑑅𑐐𑐸 𑐏𑑅 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐂𑐩𑑂𑐴 𑐳𑐬𑐎𑐵𑐬 𑐰 𑐥𑑂𑐬𑐟𑐶𑐥𑐎𑑂𑐲𑐷𑐫𑐵𑐟 𑐳𑑂𑐰𑐷𑐎𑐵𑐬𑑂𑐫 𑐡𑐸𑐩𑑂𑐴 𑐖𑐸𑐂𑐩𑐵𑑅 𑐢𑐵𑑅𑐐𑐸 𑐡𑐸 𑑋 𑐟𑐬 𑐀𑐖𑑂𑐫𑐵𑑅𑐩𑑂𑐴 𑐰𑑂𑐫𑐎𑑂𑐟𑐶 𑐢𑐵𑑅𑐳𑐵 𑐧𑐶𑐴𑐶𑐰𑐵𑑅 𑐟𑐎 𑐮𑐸𑐂𑐎𑐾𑐦𑐸𑐐𑐸 𑐩𑐡𑐸𑐣𑐶 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS