𑐐𑐸𑑄𑐥𑐸𑐣𑑂𑐴𑐶, 𑐳𑐵𑐥𑐵𑐬𑐸, 𑐩𑐟𑐫𑐵𑑅𑐣𑐶𑐳𑐾𑑄 𑐳𑑂𑐰𑐣𑑂𑐟𑐶 𑐣𑐏𑑅𑐫𑐵 𑐀𑐣𑑂𑐫𑑁𑐮𑐟𑐵
𑐠𑐸𑐐𑐸𑐳𑐷 𑐳𑑂𑐰𑐣𑑂𑐟𑐶 𑐣𑐏𑑅𑐫𑐵 𑐖𑐎 𑐩𑐏𑐸 𑐫𑐵𑐎𑐣𑑄 𑐰𑐫𑐾𑐟𑑂𑐫𑑄𑐐𑐸 𑐐𑐸𑑄𑐥𑐸𑐣𑑂𑐴𑐶 𑐰 𑐳𑐵𑐥𑐵𑐬𑐸𑐫𑐵 𑐳𑐰𑐵𑐮𑐫𑑂 𑐟𑐎𑑄 𑐀𑐣𑑂𑐫𑑁𑐮𑐟𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐶𑐠𑐶 𑐩𑐶𑐟𑐶, 𑐟𑐶𑐠𑐶 𑐟𑐸𑐟𑐫𑐵 𑐎𑐵𑐬𑐞𑑄 𑐀𑐖𑑂𑐫𑐵𑑅𑐐𑐸 𑐎𑐠𑑄𑐫𑐵 𑐳𑐩𑐳𑑂𑐫𑐵 𑐰𑑅𑐐𑐸 𑐏𑑅 𑑋 𑐐𑐸𑑄𑐥𑐸𑐣𑑂𑐴𑐶, 𑐳𑐵𑐥𑐵𑐬𑐸 𑐰 𑐩𑐟𑐫𑐵 𑐐𑐧𑐮𑐾 𑐴𑐣𑐾𑐐𑐸 𑐢𑐂𑐐𑐸 𑐳𑐩𑐳𑑂𑐫𑐵 𑐧𑑂𑐰𑐮𑑄𑐐𑐸 𑐡𑐸 𑑋 𑐀𑐠𑐾 𑐴𑐾 𑐳𑑂𑐰𑐣𑑂𑐟𑐶 𑐣𑐏𑑅𑐫𑐵 𑐧𑐵𑐬𑐾 𑐣𑑄 𑐀𑐣𑑂𑐫𑑁𑐮𑐟𑐵 𑐧𑑂𑐰𑐮𑑄𑐐𑐸 𑐡𑐸 𑑋
𑐐𑐸𑐸𑑄𑐥𑐸𑐣𑑂𑐴𑐶
𑐧𑐸𑑃𑐖𑑂𑐫𑐵𑐫𑐵 𑐡𑐺𑐲𑑂𑐚𑐶𑐎𑑀𑐞𑑄 𑐳𑑂𑐰𑐮 𑐢𑐵𑑅𑐳𑐵 𑐡𑐎𑐮𑐫𑑂 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐖𑑂𑐫𑐵 𑐳𑐶𑐣𑐵𑐖𑑂𑐫𑐵 𑐏𑑅 𑑋 𑐳𑐶𑐣𑐵𑐖𑑂𑐫𑐵 𑐎𑑂𑐰𑐔𑐵𑐫𑐾 𑐢𑐸𑐣𑐾𑐰𑑄 𑐰𑐂𑐐𑐸 𑐮𑐵 𑐢𑐫𑐵𑐐𑐸 𑐐𑐸𑑄𑐮𑐵 𑐏𑑅 𑑋 𑐐𑐸𑑄𑐥𑐸𑐣𑑂𑐴𑐶 𑐢𑐫𑐵𑐐𑐸 𑐧𑑁𑐡𑑂𑐢 𑐢𑐬𑑂𑐩𑐫𑐵 𑐡𑐺𑐲𑑂𑐚𑐶𑐎𑑀𑐞𑑄 𑐖𑐎 𑐩𑐏𑐸 𑐴𑐶𑐣𑑂𑐡𑐹 𑐰 𑐱𑐿𑐰 𑐢𑐬𑑂𑐩𑐫𑐵 𑐡𑐺𑐲𑑂𑐚𑐶𑐎𑑀𑐞𑑄 𑐣𑑄 𑐄𑐮𑐶 𑐴𑐾 𑐩𑐴𑐟𑑂𑐰𑐥𑐹𑐬𑑂𑐞 𑑋 𑐐𑐸𑑄𑐮𑐵 𑐏𑑃𑐐𑑂𑐰𑑅𑐫𑐵𑐟 𑐳𑑂𑐰𑐮 𑐢𑐵𑑅𑐳𑐵 𑐐𑐸𑐞 𑐰 𑐮𑐵 𑐳𑑂𑐰𑐵𑐣𑐵𑑅 𑐐𑐸𑑄𑐮𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐐𑐸𑐞𑐶𑐮𑐵 𑐥𑐸𑐣𑑂𑐴𑐶 𑐖𑐸𑐫𑐵𑑅 𑐴𑐾 𑐐𑐸𑐞𑐶𑐮𑐵 𑐥𑐸𑐣𑑂𑐴𑐶 𑐢𑐵𑐢𑐵𑑄 𑐐𑐸𑑄𑐥𑐸𑐣𑑂𑐴𑐶 𑐢𑐵𑑅𑐐𑐸 𑐏𑑅 𑑋 𑐢𑐵𑐬𑑂𑐩𑐶𑐎 𑐩𑐶𑐏𑐵𑑄 𑐳𑑂𑐰𑐮 𑐢𑐵𑑅𑐳𑐵 𑐁𑐢𑑂𑐫𑐵𑐟𑑂𑐩𑐶𑐎 𑐔𑐶𑐣𑑂𑐟𑐣 𑐀𑐥𑑂𑐰𑐫𑐾𑐎𑐾𑐐𑐸, 𑐁𑐢𑑂𑐫𑐵𑐟𑑂𑐩𑐶𑐎 𑐳𑐸𑐏 𑐱𑐵𑐣𑑂𑐟𑐶 𑐀𑐥𑑂𑐰𑐫𑐾𑐎𑐾𑐐𑐸 𑐀𑐮𑐾 𑐫𑐠𑐵𑐬𑑂𑐠𑐰𑐵𑐡𑐷 𑐣𑐵𑐥 𑐰𑑂𑐫𑐰𑐴𑐵𑐬𑐫𑑂 𑐴𑐾 𑐳𑐸𑐏 𑐱𑐵𑐣𑑂𑐟𑐶 𑐀𑐥𑑂𑐰𑐫𑐾𑐎𑐾𑐐𑐸 𑐏𑑅 𑑋
𑐐𑐸𑑄𑐮𑐵 𑐢𑐫𑐵𑐐𑐸 𑐐𑐸𑐞 𑐢𑐬𑑂𑐩 𑐳𑑄𑐔𑐫 𑐫𑐵𑐫𑐾𑐐𑐸 𑐥𑐸𑐣𑑂𑐴𑐶𑐫𑐵 𑐀𑐬𑑂𑐠𑐫𑑂 𑐎𑐫𑐵𑐟𑑅𑐐𑐸 𑐡𑐸 𑑋 𑐐𑐸𑑃𑐂 𑐔𑑂𑐰𑑄𑐐𑐸 𑐧𑐴𑐵𑑅 𑐧𑐴𑐶𑐮𑐫𑑂 𑐰𑐣𑐵𑑅 𑐱𑐶𑐎𑑂𑐲𑐵 𑐎𑐵𑐫𑐾𑐐𑐸 𑐣𑐵𑐥𑑄 𑐖𑑂𑐘𑐵𑐣 𑐐𑐸𑐞𑐫𑐵 𑐏𑑃 𑐳𑐫𑐾𑐎𑐾𑐐𑐸 𑐀𑐬𑑂𑐠𑐫𑑂 𑐣𑑄 𑐎𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐴𑐵𑐬 𑐰 𑐧𑐴𑐶𑐮𑐶𑐂 𑐰𑐣𑐵𑑅 𑐳𑐵𑐢𑐣𑐵 𑐫𑐵𑐫𑐾𑐐𑐸, 𑐄𑐥𑐰𑐵𑐳 𑐔𑑂𑐰𑐣𑐾𑐐𑐸, 𑐀𑐥𑑂𑐳𑑄 𑐔𑑂𑐰𑐣𑐾𑐐𑐸, 𑐱𑐶𑐎𑑂𑐲𑐵 𑐎𑐵𑐫𑐾𑐐𑐸 𑐟𑐎𑑄 𑐫𑐵𑐂 𑑋 𑐐𑐸𑑄𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐧𑐴𑐵𑑅 𑐧𑐴𑐷 𑐔𑐵𑑅𑐴𑐶𑐮𑐾𑐩𑐵𑑅 𑐢𑐫𑐵𑐐𑐸 𑐣𑑄 𑐩𑐵𑐣𑑂𑐫𑐟𑐵 𑐡𑐸 𑑋 𑐎𑐶𑐥𑐸𑐮𑐶𑐂 𑐮𑐵 𑐧𑐴𑐵𑑅 𑐔𑐵𑑅𑐴𑐶𑐮𑐾𑐐𑐸 𑐢𑐎𑐵𑑅 𑐎𑐶𑐥𑐹𑐫𑐵 𑐦𑐸𑐎𑑂𑐎 𑐴𑐾 𑐧𑐴𑐵𑑅 𑐧𑐴𑐷 𑐔𑐵𑐣𑑂𑐴𑐫𑑂 𑐔𑐵𑑅𑐴𑐶𑐮𑐾𑐐𑐸 𑐫𑐵𑐂 𑑋 𑐐𑐸𑑄𑐥𑐸𑐣𑑂𑐴𑐶𑐫𑐵𑐟 𑐎𑑂𑐰𑐵𑐟𑐶 𑐥𑐸𑐣𑑂𑐴𑐶 𑐣𑑄 𑐢𑐵𑐂 𑑋 𑐎𑑂𑐰𑐵𑐟𑐶 𑐢𑐫𑐵𑐐𑐸 𑐎𑑂𑐰𑐵𑑅𑐐𑐸 𑐟𑐶 𑐏𑑅 𑑋 𑐎𑑂𑐰𑐵𑑅𑐐𑐸 𑐟𑐶 𑐟𑑂𑐰𑐣𑐾𑐐𑐸 𑐀𑐬𑑂𑐠𑐫𑑂 𑐴𑐾 𑐎𑑂𑐰𑐵𑐟𑐶 𑐥𑐸𑐣𑑂𑐴𑐶 𑐢𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐎𑑂𑐰𑐵𑐟𑐶 𑐡𑐵𑐫𑐾𑐎𑐵𑑅 𑐟𑑂𑐰𑐣𑐾𑐐𑐸 𑐣𑐶𑑄𑐟𑐶𑑄 𑐥𑑂𑐫𑐣𑑂𑐴𑐸 𑐣𑑂𑐴𑑂𑐫𑑅 𑐀𑐲𑑂𑐚𑐩𑐶𑐷𑐵 𑐡𑐶𑐣𑐫𑑂 𑐎𑑂𑐰𑐵𑐟𑐶 𑐦𑑂𑐰𑐫𑐾𑐐𑐸 𑐫𑐵𑐂 𑑋 𑐐𑐸𑐮𑐶𑑄 𑐐𑐸𑐮𑐶𑐳𑐶𑐣𑑄 𑐩𑐹𑐟𑐹𑐔𑐵 𑐦𑑂𑐰𑐫𑐾𑐐𑐸 𑐢𑐎𑐵𑑅 𑐴𑐵𑐎𑐸𑐩𑐸𑐳𑑂𑐫𑐵 𑐦𑑂𑐰𑐂𑐐𑐸 𑐏𑑅 𑑋 𑐦𑑂𑐰𑑅𑐐𑐸𑐫𑐵𑐟 𑐔𑐸𑐮𑐷 𑐰𑐫𑐾𑐎𑐵 𑐠𑐷𑐠𑐷 𑐎𑐠𑑄𑐫𑐵 𑐧𑐸𑐧𑑅 𑐡𑐵𑐫𑐾𑐎𑐵𑑅 𑐟𑑂𑐰𑐣𑐷𑐐𑐸 𑐏𑑅 𑑋 𑐎𑑂𑐰𑐵𑐟𑐶 𑐟𑑂𑐰𑐣𑐾𑐐𑐸 𑐡𑐶𑑄 𑐖𑐹𑐐𑐸𑐮𑐶𑑄 𑐥𑐸𑐮𑐵𑑄 𑐥𑐸𑐮𑐵𑑄𑐥𑐶𑑄𑐳𑑄 𑐕𑐸𑐔𑐸𑑄 𑐎𑑂𑐰𑐵𑐟𑐶 𑐨𑑂𑐫𑐐𑑅 𑐨𑑂𑐫𑐐𑑅 𑐢𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑐫𑐵 𑐀𑐬𑑂𑐠 𑐕𑐸𑐔𑐸𑑄 𑐣𑐵𑐥𑑄 𑐎𑑂𑐰𑐵𑐟𑐶 𑐣𑐂𑐐𑐸 𑐀𑐮𑐾 𑐎𑑂𑐰𑐵𑐟𑐶 𑐨𑐾𑐐𑐮𑐫𑑂 𑐟𑐫𑐵 𑐟𑐂𑐐𑐸 𑐀𑐬𑑂𑐠𑐫𑑂 𑐏𑑅 𑑋
𑐎𑑂𑐰𑐣𑑂𑐟𑐶 𑐩𑐴𑐵𑐡𑑂𑐫𑑅 𑐥𑐸𑐏𑐹 𑐰 𑐳𑐶𑐮𑐸 𑐟𑐶𑐬𑑂𑐠𑐫𑐵 𑐩𑐾𑐮𑐵
𑐐𑐸𑑄𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐫𑐮𑐫𑐵 𑐎𑑂𑐰𑐣𑑂𑐟𑐶 𑐩𑐴𑐵𑐡𑑂𑐫𑑅𑐫𑐵𑐟 𑐥𑐸𑐏𑐸𑐮𑐶𑐂 𑐟𑐫𑐵𑑅 𑐖𑐵𑐟𑑂𑐬𑐵 𑐫𑐵𑐂𑐐𑐸 𑐔𑐮𑐣 𑐡𑐸 𑑋 𑐔𑐵𑐣𑑂𑐴𑐫𑑂 𑐴𑐾 𑐥𑐸𑐏𑐸𑐮𑐶𑐂 𑐩𑐴𑐵𑐡𑑂𑐫𑑅𑐫𑐵 𑐩𑐹𑐬𑑂𑐟𑐶 𑐟𑐂𑐐𑐸 𑐏𑑅𑐳𑐵𑑄 𑐖𑐵𑐟𑑂𑐬𑐵 𑐢𑐵𑑅𑐳𑐵 𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐰𑐶𑐱𑐾𑐲𑐎𑐠𑑄 𑐫𑐵𑐂 𑑋 𑐎𑐸𑐩𑑂𑐨𑐾𑐱𑑂𑐰𑐬 𑐩𑐴𑐵𑐡𑑂𑐫𑑅𑐫𑐵 𑐩𑐹𑐬𑑂𑐟𑐶 𑐀𑐠𑐾 𑐥𑐸𑐏𑐸𑐮𑐶𑐂 𑐟𑐂𑐐𑐸 𑐏𑑅 𑑋 𑐠𑑂𑐫𑑄𑐩𑐠𑑂𑐫𑑄 𑑓 𑐦𑐶𑐚 𑐡𑐸𑐐𑐸 𑐄𑐐𑐸 𑐩𑐹𑐬𑑂𑐟𑐶 𑐟𑐫𑐵𑑅 𑐥𑐸𑐖𑐵𑐁𑐖𑐵 𑐫𑐵𑐣𑐵𑑅 𑐟𑑅𑐖𑐶𑐎 𑐖𑐵𑐟𑑂𑐬𑐵 𑐟𑐎𑑄 𑐫𑐵𑐂𑐐𑐸 𑐏𑑅 𑑋 𑐳𑐶𑐮𑐸 𑐟𑐶𑐬𑑂𑐠𑐫𑑂 𑐩𑑂𑐰𑑅 𑐮𑑂𑐴𑐸𑐂𑐧𑐮𑐫𑑂 𑐐𑐸𑐮𑐶 𑐥𑐸𑐞𑑂𑐫 𑐮𑐵𑐂 𑐢𑐂𑐐𑐸 𑐢𑐵𑐬𑑂𑐩𑐶𑐎 𑐩𑐵𑐣𑑂𑐫𑐟𑐵 𑐡𑐸 𑐎𑑂𑐰𑐣𑑂𑐟𑐶 𑐩𑐴𑐵𑐡𑑂𑐫𑑅𑐫𑐵 𑐥𑐸𑐏𑐸𑐮𑐶𑐂 𑐩𑑂𑐰𑑅𑐮𑑂𑐴𑐸𑐂𑐐𑐸 𑐂𑐮𑐫𑑂 𑐣𑑄 𑐄𑐮𑐶 𑐴𑐾 𑐥𑐸𑐞𑑂𑐫 𑐮𑐵𑐂 𑐢𑐂𑐐𑐸 𑐩𑐵𑐣𑑂𑐫𑐟𑐵 𑐡𑐸 𑑋
𑐧𑑂𑐫𑐵𑑄𑐖𑐵 𑐣𑐎𑐷𑐐𑐸
𑐐𑐸𑑄𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐧𑑂𑐫𑐵𑑄𑐖𑐵 𑐣𑐎𑐷 𑑋 𑐰𑐵 𑐥𑐶𑐂𑐐𑐸 𑐖𑑂𑐫𑐵 𑐎𑑂𑐰𑐔𑐵𑐫𑐾 𑐢𑐸𑑄𑐎𑐵𑑅 𑐧𑐸𑑃𑐂 𑐰𑐂𑐥𑐶𑑄𑑄 𑐎𑐷𑐔𑐵𑐫𑐵𑐟 𑐣𑐂𑐥𑐶𑑄 𑐧𑑂𑐫𑐵𑑄𑐔𑐵𑐫𑐵𑐟 𑐖𑐵 𑐣𑐎𑐾𑐐𑐸 𑐫𑐵𑐟 𑐴𑐾 𑐧𑑂𑐫𑐵𑑄𑐖𑐵 𑐣𑐎𑐾𑐐𑐸 𑐢𑐵𑐂𑐐𑐸 𑐏𑑅 𑑋 𑐑𑐞𑑂𑐚𑐵𑐎𑐬𑑂𑐞𑐫𑐵𑐟 𑐢𑑂𑐫𑐵𑐔𑐮𑐫𑑂 𑐫𑑄𑐎𑐵𑑅 𑐧𑑂𑐫𑐵𑑄𑐔𑐵𑑅 𑐎𑑂𑐰𑐦𑐵𑑅𑐐𑐸 𑐣𑑂𑐫𑑄𑐎𑑄 𑐧𑐵𑐏𑑄 𑐡𑐸 𑑋 𑐄𑐎𑐶𑑄 𑐴𑐾 𑐧𑑂𑐫𑐵𑑄𑐔𑐶𑐟 𑐖𑐵 𑐣𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑐢𑐵𑐂𑐥𑐶𑑄 𑐣𑑄 𑐩𑐡𑐸𑐐𑐸 𑐩𑐏𑐸 𑑋 𑐣𑑂𑐴𑑂𑐫𑐵𑐐𑐸 𑐖𑐹𑐳𑐵𑑄 𑐕𑐐𑐹 𑐎𑐠𑑄𑐫𑐵 𑐥𑑂𑐬𑐵𑐞𑐷 𑐀𑐮𑐾 𑐧𑐸𑑃𑐂 𑐰𑐵 𑐳𑑂𑐫𑑄𑐎𑐷𑐥𑐶𑑄 𑐎𑐷𑐔𑐵𑐟 𑐣𑐂𑐥𑐶𑑄 𑐧𑑂𑐫𑐵𑑄𑐔𑐶𑐟 𑐖𑐵 𑐣𑐎𑐷𑐐𑐸 𑐢𑐂𑐐𑐸 𑐴𑐾 𑐧𑑂𑐫𑐵𑑄𑐖𑐵 𑐣𑐎𑐷𑐐𑐸 𑐏𑑅 𑑋
𑐳𑐵𑐥𑐵𑐬𑐸
𑐐𑐸𑑄𑐥𑐸𑐣𑑂𑐴𑐶𑐫𑐵 𑐎𑐣𑑂𑐴𑐫𑑂 𑐏𑐸𑐣𑑂𑐴𑐸𑐫𑐵𑐟 𑐳𑐵𑐥𑐵𑐬𑐸 𑐢𑐵𑐂 𑑋 𑐳𑐵𑐥𑐵𑐬𑐸 𑐢𑐂𑐐𑐸 𑐩𑐹𑐮 𑐬𑐸𑐥𑑄 𑐡𑐕𑐶𑐫𑐵 𑐡𑐸𑐣𑐾 𑐩𑐡𑐸𑐥𑐶𑑄 𑐥𑐬𑐶𑐰𑐵𑐬𑐥𑐵𑐏𑐾𑑄 𑐳𑐵 𑐧𑐵𑐫𑑂 𑐩𑐣𑐹𑐫𑐵𑐟 𑐴𑐾 𑐳𑐵 𑐫𑐵𑐣𑐵𑐕𑑂𑐰𑐂𑐐𑐸 𑐣𑐵𑐥𑑄 𑐡𑐵𑐣 𑐧𑐷𑐐𑐸 𑐏𑑅 𑑋 𑐕𑐐𑐹𑐎𑐠𑑄 𑐡𑐸𑑅𑐏 𑐖𑐹𑐳𑐵𑑄 𑐣𑑂𑐴𑐶𑐮𑐵 𑐣𑑂𑐴𑐶𑐮𑐵 𑐴𑐣𑐷𑐐𑐸 𑐥𑐬𑑂𑐰 𑐏𑑅 𑑋 𑐳𑐵𑐥𑐵𑐬𑐸𑐫𑐵 𑐡𑐶𑐣𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐩𑑄𑐎𑐵𑑅𑐎𑐠𑑄 𑐳𑐵 𑐕𑑂𑐰𑐫𑐾𑐐𑐸 𑐫𑐵𑐂𑐳𑐵 𑐐𑐣𑑄 𑐐𑐣𑑄 𑐏𑑂𑐫𑐵𑐮𑑅 𑐰𑐣𑐾𑐐𑐸𑐣𑐶𑐳𑐾𑑄 𑐠𑐷𑐠𑐷 𑐎𑐠𑑄𑐫𑐵 𑐣𑑄 𑐠𑑅𑐐𑐸 𑐴𑐾 𑐔𑐮𑐣 𑐡𑐸 𑑋 𑐳𑐵𑐫𑐵𑑅𑐫𑐵 𑐡𑐶𑐣𑐫𑑂 𑐏𑑂𑐰𑐥𑐫𑑂 𑐟𑐵𑐴𑐵 𑐳𑐵 𑐥𑐶𑐎𑐵𑐂𑐐𑐸 𑐔𑐮𑐣 𑐡𑐸 𑑋 𑐎𑐶𑐥𑐸𑐮𑐶𑐂 𑐢𑐾𑑄𑐢𑐾𑑄𑐥𑐵𑐥𑐵 𑐥𑑂𑐫𑐵𑐏𑑄 𑐥𑐶𑐠𑐣𑐷𑐐𑐸 𑐔𑐮𑐣 𑐡𑐸 𑑋 𑐳𑐵𑐫𑐵𑑅 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐳𑑄𑐳𑑂𑐎𑐺𑐟𑐶𑐩𑐢𑑂𑐫𑐾 𑐩𑐺𑐟𑑂𑐫𑐸 𑐳𑑄𑐳𑑂𑐎𑐵𑐬𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸 𑐖𑐹𑐐𑐸𑐮𑐶𑑄 𑐩𑑄𑐎𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐬𑐸𑐥𑐫𑑂 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋
𑐩𑐟𑐫𑐵𑑅
𑐣𑐾𑐰𑐵𑑅 𑐳𑐩𑐵𑐖 𑐡𑐸𑐣𑐾 𑐣𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐫𑐮 𑐡𑐸𑐣𑐾𑐫𑐵 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐳𑑄𑐳𑑂𑐎𑐺𑐟𑐶 𑐩𑐟𑐫𑐵𑑅 𑐏𑑅 𑑋 𑐳𑐵𑐥𑐵𑐬𑐸𑐫𑐵 𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐰𑐣𑐷𑐐𑐸 𑐩𑐟𑐫𑐵𑑅 𑐏𑑅 𑑋 𑐧𑐴𑐵𑑅 𑐧𑐴𑐷 𑐮𑐵𑐐𑐵𑐫𑑂 𑐔𑐵𑑅𑐴𑐶𑐮𑐾𑐐𑐸 𑐣𑐵𑐥𑑄 𑐏𑑂𑐫𑐵𑐮𑑅 𑐎𑑂𑐫𑐣𑐵 𑐰𑐣𑐾𑐐𑐸 𑐖𑐎 𑐩𑐏𑐸 𑐡𑐕𑐶𑐫𑐵 𑐡𑐸𑐣𑐾 𑐩𑐡𑐫𑐾 𑐢𑐸𑑄𑐎𑐹𑐥𑐶𑐣𑐶𑐐𑐸 𑐣𑐵𑐩𑑄 𑐧𑐴𑐵𑑅 𑐔𑐵𑑅𑐴𑐶𑐮𑐾𑐐𑐸 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐳𑑄𑐳𑑂𑐎𑐺𑐟𑐶 𑐏𑑅 𑑋
𑐠𑐸𑐮𑐶𑐩𑐕𑐶 𑐩𑐴𑐟𑑂𑐰𑐥𑐹𑐬𑑂𑐞 𑐳𑑄𑐳𑑂𑐎𑐺𑐟𑐶 𑐐𑐸𑑄𑐥𑐸𑐣𑑂𑐴𑐶, 𑐳𑐵𑐫𑐵𑑅 𑐣𑐵𑐥𑑄 𑐩𑐟𑐫𑐵𑑅𑐫𑐵 𑐳𑐰𑐵𑐮𑐫𑑂 𑐠𑐸𑐐𑐸𑐳𑐷 𑐥𑐘𑑂𑐔𑐵𑐒 𑐣𑐶𑐬𑑂𑐞𑐵𑐫𑐎 𑐳𑐩𑐶𑐟𑐶𑐫𑐵 𑐥𑐵𑐟𑑂𑐬𑑀𑐫𑑂 𑐀𑐣𑑂𑐫𑑁𑐮𑐟𑐵 𑐏𑐣𑐾 𑐡𑐟 𑑋 𑐁𑑅 𑐮𑐕𑐶 𑐮𑐶𑐥𑐵 𑐰𑐂𑐐𑐸 𑐳𑐵𑐄𑐣 𑑒𑑗 𑐐𑐟𑐾 𑐱𑐸𑐎𑑂𑐬𑐰𑐵𑑅𑐫𑐵 𑐡𑐶𑑄𑐫𑐵𑐟 𑐐𑐸𑑄𑐥𑐸𑐣𑑂𑐴𑐶 𑐰 𑐳𑐵𑐫𑐵𑑅 𑐢𑐎𑐵𑑅 𑐔𑑂𑐰𑐫𑐵𑐟𑐮 𑑋 𑐀𑐠𑐾 𑐴𑐾 𑑒𑑘 𑐐𑐟𑐾 𑐱𑐣𑐶𑐰𑐵𑑅 𑐩𑐟𑐫𑐵𑑅 𑐢𑐎𑐵𑑅 𑐔𑑂𑐰𑐫𑐵𑐟𑐮 𑑋 𑐁𑑅 𑐳𑐵𑐄𑐣 𑑒𑑗 𑐐𑐟𑐾𑐫𑐵𑐟 𑐐𑐸𑑄𑐥𑐸𑐣𑑂𑐴𑐶 𑐢𑐎𑐵𑑅 𑐴𑐣𑐾𑐐𑐸 𑐮𑐵 𑐎𑐶 𑐳𑐵𑐥𑐵𑐬𑐸 𑐢𑐎𑐵𑑅 𑐴𑐣𑐾𑐐𑐸 𑐢𑐂𑐐𑐸 𑐳𑐰𑐵𑐮𑐫𑑂 𑐀𑐣𑑂𑐫𑑁𑐮𑐟𑐵 𑐎𑐵𑐫𑐩 𑐖𑐹𑐐𑐸 𑐡𑐸 𑑋 𑐫𑐮𑐫𑑂 𑐎𑑂𑐰𑐣𑑂𑐟𑐶 𑐩𑐴𑐵𑐡𑑂𑐫𑑅𑐫𑐵 𑐥𑐸𑐏𑐸𑐮𑐶𑐂 𑐡𑑂𑐫𑑅𑐫𑐵𑐟 𑐖𑐵𑐟𑑂𑐬𑐵 𑐫𑐵𑐂𑐐𑐸 𑐀𑐮𑐾 𑐀𑐣 𑐩𑐾𑐮𑐵 𑐟𑐎𑑄 𑐖𑐸𑐂𑐐𑐸 𑐏𑑅 𑑋
𑐄𑐮𑐶 𑐖𑐎 𑐩𑐏𑐸 𑐣𑐾𑐰𑐵𑑅𑐟𑐫𑑂𑐳𑑄 𑐐𑐸𑑄𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐮𑐵 𑐧𑑂𑐫𑐵𑑄𑐖𑐵 𑐣𑐎𑐷𑐐𑐸 𑐔𑐮𑐣 𑐡𑐸 𑑋 𑐎𑐶𑐥𑐸𑐮𑐶𑐂 𑐧𑐴𑐵𑑅 𑐔𑐵𑑅𑐴𑐶𑐮𑐾𑐐𑐸 𑐔𑐮𑐣 𑐡𑐸 𑑋 𑐁𑑅 𑐠𑐸𑐐𑐸 𑐳𑑄𑐳𑑂𑐎𑐺𑐟𑐶 𑐳𑐵𑐄𑐣 𑑒𑑗 𑐐𑐟𑐾 𑐫𑐵𑐫𑐾𑐐𑐸 𑐮𑐵 𑐎𑐶 𑑒𑑖 𑐐𑐟𑐾 𑐰𑐶𑐴𑐷𑐰𑐵𑑅 𑐴𑐾 𑐫𑐵𑐫𑐾𑐐𑐸 𑐢𑐎𑐵𑑅 𑐀𑐣𑑂𑐫𑑁𑐮𑐟𑐵 𑐧𑑂𑐰𑐮𑐣 𑑋 𑐀𑐮𑐾 𑐖𑐣𑐿 𑐔𑐷𑐥𑐶𑑄𑐳𑑄 𑐣𑑄 𑐥𑐸𑐣𑑂𑐴𑐶𑐎𑐸𑐣𑑂𑐴𑐸 𑐴𑐾 𑐔𑐷𑐐𑐸 𑐏𑑅 𑑋 𑐁𑑅 𑐐𑐸𑐎𑐸𑐣𑑂𑐴𑐸 𑐔𑐷𑐐𑐸 𑐢𑐂𑐐𑐸 𑐳𑐩𑐳𑑂𑐫𑐵 𑐧𑑂𑐰𑐮𑑄𑐐𑐸 𑐡𑐸 𑑋 𑐫𑐡𑐶 𑑒𑑗 𑐐𑐟𑐾 𑐐𑐸𑑄𑐥𑐸𑐣𑑂𑐴𑐶 𑐣𑐏𑑅 𑐴𑐣 𑐢𑐵𑑅𑐳𑐵 𑑒𑑘 𑐐𑐟𑐾 𑐳𑐵𑐥𑐵𑐬𑐸 𑐖𑐸𑐂 𑑋 𑐀𑐮𑐾 𑑒𑑙 𑐐𑐟𑐾 𑐖𑐎 𑐩𑐟𑐫𑐵𑑅 𑐖𑐸𑐂 𑑋 𑐠𑑂𑐰 𑐳𑐩𑐳𑑂𑐫𑐵 𑐰𑑅𑐐𑐸𑐫𑐵 𑐩𑐹𑐮 𑐎𑐵𑐬𑐞 𑐢𑐂𑐐𑐸 𑑒𑑖 𑐐𑐟𑐾 𑐳𑐸𑐠𑐫𑑂 𑑙 𑐧𑐖𑐾 𑐖𑐸𑐫𑐵𑑅 𑑔𑑕 𑐩𑐶𑐣𑐾𑐚 𑐰𑐳𑐵𑑄𑐣𑐶𑐳𑐾𑑄 𑐥𑐸𑐣𑑂𑐴𑐶 𑐎𑑂𑐫𑐣𑐷 𑑋
𑑒𑑗 𑐐𑐟𑐾 𑐳𑐸𑐠𑐫𑑂 𑑗 𑐧𑐖𑐾 𑐖𑐸𑐫𑐵𑑅 𑑒𑑕 𑐩𑐶𑐣𑐾𑐚 𑐟𑐎 𑑋 𑑒𑑗 𑐐𑐟𑐾 𑐳𑐸𑐠𑐫𑑂 𑑗𑑅𑑒𑑕 𑐮𑐶𑐥𑐵𑑄𑐣𑐶𑐳𑐾𑑄 𑐣𑑂𑐴𑐶𑐕𑐶 𑐔𑐕𑐶 𑐴𑐾 𑐥𑐵𑐬𑐸 𑐎𑑂𑐫𑐣 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐠𑐸𑐐𑐸𑐳𑐷 𑐳𑐸𑐡𑑂𑐬𑑂𑐫𑑅 𑐮𑐹𑐐𑐸 𑐂𑐮𑐫𑑂 𑐥𑐵𑐬𑐸 𑐩𑑄𑐟 𑑋 𑐀𑐠𑐾 𑐳𑐸𑐡𑑂𑐬𑑂𑐫𑑅 𑐮𑐹𑐐𑐸 𑐂𑐮𑐫𑑂 𑐥𑐵𑐬𑐸 𑐩𑐎𑑂𑐫𑑄𑐐𑐸 𑐖𑐸𑐫𑐵𑑅 𑐠𑐸𑐐𑐸𑐳𑐷 𑐥𑐵𑐬𑐸 𑐟𑐹𑐟 𑐖𑐸𑐮 𑑋 𑐟𑐶𑐠𑐶𑑄 𑐳𑐸𑐡𑑂𑐬𑑂𑐫𑑅 𑐩𑐏𑐣𑐎𑐷 𑐰 𑐟𑐶𑐠𑐶 𑐟𑐹𑐟 𑐖𑐸𑐮 𑐢𑐵𑑅𑐳𑐵 𑐀𑐮𑐾 𑐕𑐐𑐹 𑐴𑐾 𑐟𑐶𑐠𑐶𑐂 𑐣𑐶𑐐𑐹 𑐳𑐹𑐡𑑂𑐬𑑂𑐫𑑅 𑐏𑐣 𑐢𑐵𑑅𑐳𑐵 𑐰 𑐣𑐶𑐣𑑂𑐴𑐸 𑐎𑑂𑐫𑐣 𑐢𑐵𑐂𑐐𑐸 𑐏𑑅 𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐠𑐸𑐐𑐸𑐳𑐷 𑐥𑐘𑑂𑐔𑐵𑐒𑐫𑐵 𑐣𑐶𑐬𑑂𑐞𑐵𑐫𑐎 𑐳𑐩𑐶𑐟𑐶𑐫𑐵 𑐥𑐵𑐟𑑂𑐬𑑀𑐫𑑂 𑐳𑐵𑐥𑐵𑐬𑐸 𑐟𑐹𑐟 𑐖𑐸𑐮 𑑋 𑐀𑐠𑐾 𑐴𑐾 𑐖𑐸𑐫𑐵𑑅 𑑒𑑗 𑐐𑐟𑐾 𑐱𑐸𑐎𑑂𑐬𑐰𑐵𑑅𑐫𑐵𑐟 𑐴𑐾 𑐥𑐸𑐣𑑂𑐴𑐶 𑐰 𑐥𑐵𑐬𑐸 𑐣𑐶𑐐𑐸𑐮𑐶𑑄 𑐮𑐵𑐎𑐹𑐐𑐸 𑐏𑐣𑐾𑐡𑐸 𑑋
𑐠𑐸𑐐𑐸𑐳𑐷 𑐐𑐸𑑄𑐥𑐸𑐣𑑂𑐴𑐶 𑐰 𑐳𑐵𑐥𑐵𑐬𑐸𑐫𑐵 𑐳𑐰𑐵𑐮𑐫𑑂 𑐐𑐸𑐎𑐸𑐣𑑂𑐴𑐸 𑐐𑐸𑐎𑐸𑐣𑑂𑐴𑐸 𑐴𑐣𑐾𑐐𑐸 𑐢𑐂𑐐𑐸 𑐳𑐰𑐵𑐮𑐫𑑂 𑐧𑑂𑐰𑐮𑑄𑐐𑐸 𑐳𑐩𑐳𑑂𑐫𑐵𑐫𑐵𑐟 𑐎𑐫𑐵 𑐁𑑅 𑐟𑐎 𑐣𑑄 𑐏𑐵𑐳 𑐴𑐾 𑐧𑐴𑐳 𑐖𑐹𑐐𑐸 𑐩𑐡𑐸𑐣𑐶 𑑋 𑐄𑐎𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑐸𑐎𑐶𑐫𑐵 𑐳𑐰𑐵𑐮𑐫𑑂 𑐖𑑂𑐫𑑀𑐟𑐶𑐲𑐣𑐶𑐳𑐾𑑄 𑐳𑐵𑐫𑐵𑑅 𑐐𑑂𑐰𑐳𑐵𑑅 𑐐𑑂𑐰𑐂𑐐𑐸 𑐏𑐮𑑅, 𑐩𑐟𑐫𑐵𑑅 𑐐𑑂𑐰𑐳𑐵𑑅 𑐐𑑂𑐰𑐂𑐐𑐸 𑐏𑐮𑑅, 𑐎𑑂𑐰𑐣𑑂𑐟𑐶𑐂 𑐩𑐾𑐮𑐵 𑐫𑐵𑐂𑐐𑐸 𑐏𑐮𑑅𑐣𑐶𑐳𑐾𑑄 𑐖𑐣𑐿 𑐔𑐶𑐎𑐷𑐥𑐶𑑄 𑐡𑑂𑐫𑑅𑐧𑑂𑐬𑐩𑑂𑐴𑐸𑐟𑐣𑐵𑐥𑑄 𑐔𑑂𑐰𑐣𑐵𑑅 𑐧𑑂𑐫𑐵𑐥𑐎 𑐳𑐴𑐮𑐴 𑐧𑑂𑐫𑐵𑐎𑐵 𑐥𑐸𑐣𑑂𑐴𑐶𑐂 𑐐𑐸𑐐𑐸 𑐡𑐶𑐣𑐫𑐵𑐟 𑐣𑐵𑐮𑐾𑐐𑐸 𑐀𑐮𑐾 𑐳𑐵𑐥𑐵𑐬𑐸 𑐐𑐸𑐎𑐸𑐣𑑂𑐴𑐸 𑐴𑐣𑐾𑐐𑐸 𑐣𑐵𑐥𑑄 𑐩𑐟𑐫𑐵𑑅 𑐐𑐸𑐎𑐸𑐣𑑂𑐴𑐸 𑐡𑐶𑐣𑐫𑑂 𑐴𑐣𑐾𑐐𑐸 𑐢𑐂𑐐𑐸 𑐳𑐰𑐵𑐮𑐫𑑂 𑐧𑑂𑐫𑐵𑐥𑐎 𑐳𑐴𑐮𑐴 𑐧𑑂𑐫𑐵𑐎𑐵𑑅 𑐕𑐐𑐹 𑐴𑐾 𑐢𑐵𑐬𑐞𑐵 𑐡𑐫𑐾𑐎𑐾 𑐴𑐠𑐵𑐫𑑂 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐐𑐸𑑄𑐥𑐸𑐣𑑂𑐴𑐶 𑐰 𑐳𑐵𑐥𑐵𑐬𑐸𑐫𑐵 𑐧𑐵𑐬𑐾 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐖𑐸𑐂𑐰𑑄 𑐴𑐵𑐎𑐣𑑄 𑐳𑑂𑐰𑐣𑑂𑐟𑐶 𑐣𑐏𑑅𑐫𑐵𑐟 𑐥𑐵𑐟𑑂𑐬𑑀𑐫𑑂 𑐥𑑂𑐫𑐣𑑂𑐴𑐸𑐸 𑐟𑐶𑐠𑐶𑐂 𑐮𑐵𑐎𑐵𑐟𑑅𑐐𑐸 𑐏𑑃𑐫𑐵𑐟 𑐎𑐫𑐵 𑐣𑑄 𑐧𑐴𑐳 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋 𑐮𑐎𑑂𑐲𑑂𑐩𑐷𑐥𑐸𑐖𑐵 𑐢𑐸𑑄𑐎𑐵𑑅 𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐟𑐹𑐟 𑐫𑐵𑐣𑐵𑐟𑑅𑐐𑐸𑐮𑐶𑑄 𑐳𑐩𑐳𑑂𑐫𑐵 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐏𑑃𑐫𑑂 𑐣𑑄 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐣𑐶𑐟𑐶𑑄 𑐟𑐫𑐵𑐬𑐷 𑐫𑐵𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋
LEAVE YOUR COMMENTS