Read news in NepalBhasa text-- www.hamroschool.com BACK 𑐱𑑂𑐬𑐷𑐮𑑄𑐎𑐵𑐫𑑂 𑐕𑐣𑑂𑐴𑐸𑐫𑐵 𑐣𑐶𑑄𑐟𑐶𑑄 𑐣𑑄 𑐔𑐶𑐎𑑄 𑐩𑐡𑐫𑐾𑐢𑐸𑑄𑐎𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐱𑑂𑐬𑐷𑐮𑑄𑐎𑐵𑐫𑑂 𑐕𑐣𑑂𑐴𑐸𑐫𑐵 𑐣𑐶𑑄𑐟𑐶𑑄 𑐣𑑄 𑐔𑐶𑐎𑑄 𑐩𑐡𑐫𑐾𑐢𑐸𑑄𑐎𑐮

𑐊𑐖𑐾𑐣𑑂𑐳𑐷- 𑐣𑑂𑐴𑐫𑑂𑐐𑐹 𑐡𑐱𑐎 𑐮𑐶𑐥𑐵 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐁𑐬𑑂𑐠𑐶𑐎 𑐳𑑄𑐎𑐚𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐱𑑂𑐬𑐷𑐮𑑄𑐎𑐵𑐫𑑂 𑐕𑐣𑑂𑐴𑐸𑐫𑐵 𑐣𑐶𑑄𑐟𑐶𑑄 𑐣𑑄 𑐐𑐵𑐎𑑂𑐎 𑐥𑐾𑐚𑑂𑐬𑐵𑐮𑐶𑐫𑐩 𑐥𑐡𑐵𑐬𑑂𑐠 𑐩𑐡𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐡𑐾𑐫𑑂𑐫𑐵 𑐅𑐬𑑂𑐖𑐵𑐩𑐣𑑂𑐟𑑂𑐬𑐷 𑐎𑐘𑑂𑐔𑐣 𑐰𑐶𑐖𑐾𑐱𑐾𑐎𑐬𑑄 𑐫𑐡𑐶 𑐣𑑂𑐴𑑂𑐫𑐵𑐧𑑂𑐮𑐾𑑄 𑐠𑐾𑑄 𑐔𑐶𑐎𑑄 𑐂𑐣𑐾𑐐𑐸 𑐏𑑅𑐳𑐵 𑐕𑐣𑑂𑐴𑐸𑐫𑐵𑐟 𑐣𑑄 𑐔𑐶𑐎𑑄 𑐩𑐡𑐫𑐾𑐢𑐸𑑄𑐎𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑐣𑑂𑐟𑑂𑐬𑐷 𑐰𑐶𑐖𑐾𑐱𑐾𑐎𑐬𑑄 𑐩𑐾𑐐𑐸 𑐔𑐶𑐎𑑄 𑐣𑐶𑐰𑐵𑑅 𑐖𑐎 𑐰𑐂𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋

𑐩𑐣𑑂𑐟𑑂𑐬𑐷 𑐰𑐶𑐖𑐾𑐱𑐾𑐎𑐬𑐫𑐵 𑐎𑐠𑑄 𑐱𑑂𑐬𑐷𑐮𑑄𑐎𑐵𑐫𑑂 𑐳𑑀𑐩𑐰𑐵𑑅 𑐟𑐎 𑐩𑐸𑐎𑑂𑐎𑑂𑑄 𑑑𑑒 𑐴𑐖𑐵𑐬 𑑗𑑗𑑔 𑐚𑐣 𑐜𑐶𑐖𑐾𑐮 𑐰 𑑔 𑐴𑐖𑐵𑐬 𑑖𑑑 𑐚𑐣 𑐥𑐾𑐚𑑂𑐬𑑀𑐮 𑐮𑑂𑐫𑑄 𑐡𑐸𑐐𑐸 𑐏𑑅 𑑋 𑐩𑐣𑑂𑐟𑑂𑐬𑐷𑐫𑐵 𑐎𑐠𑑄 𑐥𑐾𑐚𑑂𑐬𑑀𑐮 𑐰𑐂𑐐𑐸 𑑒𑑒–𑑒𑑓 𑐟𑐵𑐬𑐶𑐏𑐫𑑂 𑐖𑐎 𑐱𑑂𑐬𑐷𑐮𑑄𑐎𑐵 𑐠𑑂𑐫𑐣𑐷𑐳𑐵 𑐜𑐶𑐖𑐾𑐮 𑐩𑐾𑐐𑐸 𑐰𑐵𑐮𑐫𑑂 𑐰𑐫𑐾𑐦𑐸 𑑋 𑐟𑐬 𑐠𑑂𑐰 𑐔𑐶𑐎𑑄 𑐣𑑂𑐫𑐵𑐫𑐾𑐟 𑐣𑑄 𑐐𑐵𑐎𑑂𑐎 𑐰𑐶𑐡𑐾𑐱𑐷 𑐩𑐸𑐡𑑂𑐬𑐵 𑐩𑐡𑐸𑐐𑐸 𑐏𑑃 𑐩𑐣𑑂𑐟𑑂𑐬𑐷 𑐰𑐶𑐖𑐾𑐱𑐾𑐎𑐬𑑄 𑐢𑐵𑑅𑐐𑐸 𑐡𑐸 𑑋 𑐱𑑂𑐬𑐷𑐮𑑄𑐎𑐵𑐫𑐵 𑐎𑐾𑐣𑑂𑐡𑑂𑐬𑐷𑐫 𑐧𑐿𑑄𑐎𑑄 𑐔𑐶𑐎𑑄 𑐣𑑂𑐫𑐵𑐫𑐾𑐟 𑐩𑐸𑐎𑑂𑐎𑑄 𑑑𑑒 𑐎𑐬𑑀𑐜 𑐥𑐔𑐵𑐳 𑐮𑐵𑐏 𑐜𑐮𑐬 𑐧𑐷𑐐𑐸 𑐖𑐹𑐐𑐸 𑐡𑐸, 𑐟𑐬 𑐁𑑅 𑐴𑐫𑐾𑐟𑑂𑐫𑑄𑐐𑐸 𑐔𑐶𑐎𑑄𑐫𑐵 𑐣𑐶𑑄𑐟𑐶𑑄 𑐖𑐎 𑐴𑐾 𑑕𑑘 𑐎𑐬𑑀𑐜 𑑗𑑐 𑐮𑐵𑐏 𑐜𑐮𑐬 𑐁𑐰𑐱𑑂𑐫𑐎 𑐡𑐸 𑑋 𑐀𑐠𑐾𑐴𑐾 𑐠𑑂𑐰 𑐰𑐵𑐮𑐫𑑂 𑐣𑑂𑐫𑐵𑑅𑐐𑐸 𑐔𑐶𑐎𑑄𑐫𑐵 𑐖𑐎 𑑘𑑐 𑐎𑐬𑑀𑐜 𑐜𑐮𑐬 𑐥𑐸𑐮𑐾 𑐀𑐗𑑄 𑐮𑑂𑐫𑑄 𑐡𑐣𑐶 𑑋

𑐰𑐶𑐡𑐾𑐱𑐷 𑐩𑐸𑐡𑑂𑐬𑐵𑐫𑐵 𑐀𑐨𑐵𑐰𑑄 𑐱𑑂𑐬𑐷𑐮𑑄𑐎𑐵𑐫𑑂 𑐟𑑅𑐢𑑄𑐐𑐸 𑐁𑐬𑑂𑐠𑐶𑐎 𑐳𑑄𑐎𑐚 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐴𑐶𑐫𑐵𑐣𑑂𑐴𑐶𑐠𑑄𑐫𑐵𑐟 𑐩𑐵𑑅𑐐𑐸 𑐳𑐵𑐩𑐵𑐣 𑐁𑐫𑐵𑐟 𑐫𑐵𑐫𑐾𑐟 𑐟𑐎𑑄 𑐢𑑂𑐫𑐧𑐵 𑐩𑐡𑐸𑐐𑐸𑐮𑐶𑑄 𑐂𑐣𑑂𑐢𑐣 𑐖𑐎 𑐩𑐏𑐸, 𑐏𑐵𑐡𑑂𑐫 𑐥𑐡𑐵𑐬𑑂𑐠 𑐰 𑐰𑐵𑐳𑑅 𑐟𑐎𑑄 𑐁𑐫𑐵𑐟 𑐫𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐬𑐎𑐵𑐬𑑄 𑐕𑐸𑑄 𑐃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐴𑐾 𑐀𑐟𑑂𑐫𑐵𑐰𑐱𑑂𑐫𑐎 𑐳𑐾𑐰𑐵 𑐧𑐵𑐴𑐾𑐎 𑐩𑐾𑐩𑐾𑐐𑐸 𑐐𑐵𑐜𑐷𑐫𑐵𑐟 𑐜𑐶𑐖𑐾𑐮 𑐰 𑐥𑐾𑐚𑑂𑐬𑑀𑐮 𑐩𑐧𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐳𑐣𑑂 𑑑𑑙𑑗𑑐𑐫𑐵 𑐡𑐱𑐎𑐫𑑂 𑐂𑐣𑑂𑐢𑐣 𑐁𑐥𑐹𑐬𑑂𑐟𑐶 𑐳𑑄𑐎𑐚 𑐰𑑅𑐐𑐸 𑐃 𑐢𑐸𑑄𑐎𑐵𑑅 𑐔𑐶𑐎𑑄 𑐩𑐷𑐐𑐸 𑐴𑐾 𑐡𑐶𑐎𑐾𑐩𑐵𑑅𑐐𑐸 𑐱𑑂𑐬𑐷𑐮𑑄𑐎𑐵 𑐣𑑂𑐴𑐵𑐥𑐵𑑄𑐐𑐸 𑐡𑐾𑐫𑑂 𑐖𑐹𑐐𑐸 𑐏𑑃 𑐰𑐶𑐖𑑂𑐘𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐄𑐧𑐮𑐫𑑂 𑐀𑐩𑐾𑐬𑐶𑐎𑐵 𑐰 𑐫𑐸𑐬𑑀𑐥𑐫𑑂 𑐟𑐎𑑄 𑐔𑐶𑐎𑑄 𑐩𑐷𑐐𑐸 𑐣𑐶𑑄𑐟𑐶𑑄 𑐎𑑀𑐚𑐵 𑐥𑑂𑐬𑐞𑐵𑐮𑐷 𑐮𑐵𑐐𑐹 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋

𑐱𑑂𑐬𑐷𑐮𑑄𑐎𑐵 𑐳𑐣𑑂 𑑑𑑙𑑔𑑘 𑐫𑑂 𑐧𑐺𑐚𑐶𑐳 𑐳𑐵𑐩𑑂𑐬𑐵𑐖𑑂𑐫𑐥𑐵𑐏𑐾𑑄 𑐳𑑂𑐰𑐟𑐣𑑂𑐟𑑂𑐬 𑐖𑐹𑐐𑐸 𑐡𑐾𑐫𑑂 𑐏𑑅 𑑋 𑐳𑑂𑐰𑐟𑐣𑑂𑐟𑑂𑐬𑐟𑐵 𑐮𑐶𑐥𑐵 𑐱𑑂𑐬𑐷𑐮𑑄𑐎𑐵𑑄 𑐣𑑂𑐴𑐵𑐥𑐵𑑄𑐏𑐸𑐳𑐷 𑐠𑐠𑐾 𑐔𑐬𑐩 𑐁𑐬𑑂𑐠𑐶𑐎 𑐳𑑄𑐎𑐚 𑐦𑐫𑐾𑐩𑐵𑐮𑐵𑐔𑑂𑐰𑑄𑐐𑐸 𑐏𑑅 𑑋

𑐄𑐡𑑂𑐢𑐵𑐬𑐫𑐵 𑐎𑐸𑐟𑑅
𑐰𑑄𑐐𑐸 𑐧𑐶𑐴𑐶𑐰𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐸𑐡𑑂𑐬𑐵 𑐎𑑀𑐲 (𑐁𑐂𑐊𑐩𑐊𑐦)𑐫𑐵 𑐕𑐐𑐹 𑐥𑐸𑐔𑐮𑑄 𑐱𑑂𑐬𑐷𑐮𑑄𑐎𑐵𑐫𑐵 𑐁𑐬𑑂𑐠𑐶𑐎 𑐳𑑄𑐎𑐚 𑐖𑑂𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐳𑑂𑐰𑑄𑐐𑐹 𑐀𑐬𑑂𑐧 𑐜𑐮𑐬 𑐐𑑂𑐰𑐵𑐴𑐵𑐮𑐶 𑐧𑐷𑐐𑐸 𑐣𑐶𑑄𑐟𑐶𑑄 𑐏𑑃 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅, 𑐟𑐬 𑐠𑑂𑐰 𑐥𑑂𑐫𑐵𑐎𑐾𑐖𑐫𑑂 𑐀𑐗𑑄 𑐳𑐴𑐩𑐟𑐶 𑐩𑐖𑐹𑐣𑐶 𑑋 𑐟𑐬 𑐁𑐂𑐊𑐩𑐊𑐦𑐫𑐵 𑐰𑐵𑐬𑑂𑐟𑐵 𑐥𑐸𑐔𑐮𑑄 𑐠𑑂𑐰 𑐥𑑂𑐫𑐵𑐎𑐾𑐖𑐫𑐵 𑐣𑐶𑑄𑐟𑐶𑑄 𑐩𑐴𑐟𑑂𑐰𑐥𑐹𑐬𑑂𑐞 𑐥𑑂𑐬𑐐𑐟𑐶 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋𑐱𑑂𑐬𑐷𑐮𑑄𑐎𑐵𑑄 𑐡𑑄𑐐𑐸 𑐨𑐵𑐰𑑄 𑐔𑐶𑐎𑑄 𑐣𑑂𑐫𑐵𑐫𑐾 𑐡𑐂 𑐮𑐵 𑐢𑐎𑐵𑑅 𑐬𑐸𑐳 𑐰 𑐎𑐟𑐵𑐬𑐫𑑂 𑐠𑑅 𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐟
𑐕𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS