Read news in NepalBhasa text-- www.hamroschool.com BACK 𑐚𑐾𑐎𑑂𑐳𑐵𑐳𑐫𑑂 𑐮𑐬𑐷 𑐡𑐸𑐣𑐾 𑑔𑑖 𑐩𑑂𑐴 𑐩𑐣𑐹 𑐳𑐷𑐣𑐵𑐔𑑂𑐰𑑄𑐐𑐸 𑐮𑐸𑐂𑐎𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐚𑐾𑐎𑑂𑐳𑐵𑐳𑐫𑑂 𑐮𑐬𑐷 𑐡𑐸𑐣𑐾 𑑔𑑖 𑐩𑑂𑐴 𑐩𑐣𑐹 𑐳𑐷𑐣𑐵𑐔𑑂𑐰𑑄𑐐𑐸 𑐮𑐸𑐂𑐎𑐮

𑐊𑐖𑐾𑐣𑑂𑐳𑐷÷ 𑐀𑐩𑐾𑐬𑐶𑐎𑐵𑐫𑐵 𑐚𑐾𑐎𑑂𑐳𑐵𑐳 𑐬𑐵𑐖𑑂𑐫𑐫𑐵 𑐳𑐵𑐣 𑐊𑐣𑑂𑐚𑑀𑐣𑐶𑐫𑑀𑐫𑐵 𑐥𑐶𑐣𑐾 𑐮𑐵𑑅𑐐𑐸 𑐠𑐵𑐳𑐫𑑂 𑐡𑐶𑐎𑐵𑐟𑑅𑐐𑐸 𑐕𑐐𑑅 𑐮𑐬𑐷 (𑐟𑐵𑑅𑐴𑐵𑐎𑑅𑐐𑐸 𑐚𑑂𑐬𑐎)𑐫𑑂 𑑔𑑖 𑐩𑑂𑐴 𑐳𑐷𑐩𑑂𑐴 𑐮𑐸𑐂𑐎𑐹𑐐𑐸 𑐡𑐸 𑑋 𑐠𑑂𑐰 𑐳𑐷𑐩𑑂𑐴 𑐦𑐸𑐎𑑂𑐎𑑄 𑐁𑐥𑑂𑐬𑐰𑐵𑐳𑐷𑐟𑐫𑑂𑐐𑐸 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐄𑐡𑑂𑐢𑐵𑐬𑐎𑐬𑑂𑐟𑐵𑐟𑐫𑑂𑐳𑑄 𑐮𑐬𑐷𑐂 𑐡𑐸𑐥𑐶𑑄 𑐩𑐾𑐥𑐶𑑄 𑐥𑑂𑐫𑐩𑑂𑐴 𑐩𑐳𑑂𑐟 𑐳𑐴𑐶𑐟 𑐗𑐶𑑄𑐏𑐸𑐩𑑂𑐴𑐾𑐳𑐶𑐟 𑐀𑐳𑑂𑐥𑐟𑐵𑐮 𑐫𑑄𑐎𑐵𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐮𑐬𑐷𑐂 𑐖𑐷𑐰𑐶𑐟 𑐀𑐰𑐳𑑂𑐠𑐵𑐫𑑂 𑐮𑐹𑐥𑐶𑐣𑐶 𑐩𑑂𑐴 𑐣𑑄 𑐟𑐳𑐎𑑄 𑐎𑑂𑐰𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐳𑐎𑑄 𑐟𑐵𑑄𑐣𑑂𑐰𑑅𑐐𑐸𑐮𑐶𑑄 𑐄𑐩𑐶𑐟 ‘𑐴𑐷𑐚 𑐳𑑂𑐚𑑂𑐬𑑀𑐎’ 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐳𑐵𑐣 𑐊𑐣𑑂𑐚𑑀𑐣𑐶𑐫𑑀 𑐀𑐩𑐾𑐬𑐶𑐎𑐵 𑐰 𑐩𑐾𑐎𑑂𑐳𑐶𑐎𑑀𑐫𑐵 𑐳𑐷𑐩𑐵 𑐳𑑂𑐰𑐫𑐵𑑄 𑑒𑑕𑑐 𑐎𑐶𑐩𑐶 𑐟𑐵𑐥𑐵𑐎 𑐮𑐵𑑅𑐐𑐸 𑐠𑐵𑐫𑑂 𑐏𑑅 𑑋 𑐩𑐵𑐣𑐰 𑐟𑐳𑑂𑐎𑐬𑐟𑐫𑑂𑐳𑑄 𑐁𑐥𑑂𑐬𑐵𑐰𑐵𑐳𑐷𑐟𑐫𑑂𑐟 𑐀𑐩𑐾𑐬𑐶𑐎𑐵 𑐡𑐸𑐟 𑐴𑐫𑐾𑐐𑐸 𑐣𑐶𑑄𑐟𑐶𑑄 𑐠𑑂𑐰 𑐳𑐴𑐬𑐫𑐵 𑐮𑑃 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐳𑑂𑐎𑐬𑐟𑐫𑑂𑐳𑑄 𑐀𑐰𑐿𑐢𑐵𑐣𑐶𑐎 𑐬𑐸𑐥𑑄 𑐀𑐩𑐾𑐬𑐶𑐎𑐵 𑐡𑐸𑐴𑐵𑑄 𑐰𑐂𑐥𑐶𑑄 𑐁𑐥𑑂𑐬𑐰𑐵𑐳𑐷𑐟𑐫𑑂𑐟 𑐡𑐸𑐬𑑂𑐐𑐩 𑐠𑐵𑐳𑐫𑑂 𑐣𑐵𑐥𑐮𑐵𑐣𑐵𑑅 𑐮𑐬𑐷𑐂 𑐟𑐫𑐵𑑅 𑐱𑐴𑐬𑐫𑑂 𑐡𑐸𑐟 𑐴𑐂𑐐𑐸 𑐏𑑅 𑑋 𑐠𑐠𑐾 𑐴𑐾 𑐱𑐴𑐬𑐫𑑂 𑐡𑐸𑐟 𑐴𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑐸𑐥𑐶𑑄 𑐳𑐷𑐐𑐸 𑐀𑐣𑐸𑐩𑐵𑐣 𑐫𑐵𑑅𑐐𑐸 𑐡𑐸 𑑋

𑐳𑐵𑐣 𑐊𑐣𑑂𑐚𑑀𑐣𑐶𑐫𑐵𑐫𑑀 𑐣𑐐𑐬 𑐥𑑂𑐬𑐩𑐸𑐏 𑐬𑑀𑐣 𑐣𑐶𑐬𑐾𑐣𑑂𑐧𑐬𑑂𑐐𑑄 𑐳𑐩𑑂𑐨𑐰𑐟𑑅 𑐧𑐵𑑄𑐮𑐵𑑅𑐐𑐸 𑐖𑐷𑐰𑐣 𑐩𑐵𑐮𑐾𑐐𑐸 𑐗𑑂𑐰𑐮𑐫𑑂 𑐰𑑅𑐥𑐶𑐣𑐶𑐐𑐸 𑐠𑑂𑐰 𑐀𑐰𑐳𑑂𑐠𑐵 𑐕𑐐𑐹 𑐨𑐫𑐵𑐣𑐎, 𑐩𑐵𑐣𑐰𑐷𑐫 𑐰𑐶𑐫𑑀𑐐 𑐏𑑅 𑐢𑐵𑑅𑐐𑐸 𑐡𑐸 𑑋

𑐩𑑄𑐐𑐮𑐰𑐵𑑅 𑐕𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐮𑐹𑐐𑐸 𑐏𑐧𑐬 𑐰𑐫𑐾𑐰𑑄 𑐁𑐥𑐟𑐎𑐵𑐮𑐷𑐣 𑐳𑐾𑐰𑐵𑐫𑐵 𑐎𑐬𑑂𑐩𑐔𑐵𑐬𑐷𑐟𑐫𑑂 𑐳𑐣𑐶𑐮𑐫𑑂 𑑖 𑐧𑐖𑐾 𑐑𑐚𑐣𑐵𑐳𑑂𑐠𑐮𑐫𑑂 𑐠𑑂𑐫𑑄𑐐𑐸 𑐏𑑅 𑑋 𑐎𑐾𑐊𑐳𑐊𑐚 𑐚𑐾𑐮𑐶𑐨𑐶𑐖𑐣𑐫𑐵 𑐎𑐠𑑄 𑐄𑐐𑐸 𑐚𑑂𑐬𑐎 𑐬𑐾𑐮𑐫𑐵 𑐮𑐶𑐎 𑐮𑐶𑐎𑑂𑐎𑐳𑑄 𑐮𑐸𑐂𑐎𑐹𑐐𑐸 𑐏𑑅 𑑋 𑐥𑑂𑐬𑐴𑐬𑐷𑑄 𑐁𑑅 𑐠𑑂𑐰 𑐮𑐬𑐷𑐫𑐵 𑐔𑐵𑐮𑐎𑐫𑐵𑐟 𑐩𑐵𑐮𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐱𑐴𑐬𑐫𑐵 𑐡𑐩𑐎𑐮 𑐳𑐾𑐰𑐵 𑐥𑑂𑐬𑐩𑐸𑐏 𑐔𑐵𑐮𑑂𑐬𑑂𑐳 𑐴𑐸𑐜𑐫𑐵 𑐎𑐠𑑄 𑐮𑐬𑐷 𑐰𑐵𑐟𑐵𑐣𑐸𑐎𑐹𑐮 𑐡𑐫𑐾𑐎𑐵𑐟𑑅𑐐𑐸 𑐰 𑐀𑐣 𑐡𑐸𑐣𑐾 𑐟𑑂𑐰𑐣𑐾𑐐𑐸 𑐮𑑅 𑐣𑑄 𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐟𑐬 𑐚𑑂𑐬𑐎 𑐔𑐵𑐫𑐾𑐎𑐵 𑐳𑑂𑐰𑐫𑐵𑐧𑐮𑐫𑑂 𑐳𑐷𑐩𑑂𑐴𑐫𑐵 𑐳𑐷𑐩𑑂𑐴 𑐏𑑄𑐐𑐸 𑐢𑐵𑐳𑐾𑑄 𑐢𑐵𑑅𑐐𑐸 𑐡𑐸, ‘𑐖𑐶𑐩𑐶𑐳𑑄 𑐠𑐖𑑂𑐫𑐵𑑅𑐐𑐸 𑐑𑐚𑐣𑐵𑐫𑐵 𑐎𑐮𑑂𑐥𑐣𑐵 𑐟𑐎𑑄 𑐩𑐫𑐵𑐣𑐵𑐐𑐸 𑐏𑑅 𑑋’
𑐐𑐬𑑂𑐩𑐷𑐫𑐵 𑐂𑐮𑐫𑑂 𑐳𑐵𑐣 𑐊𑐣𑑂𑐚𑑀𑐣𑐶𑐫𑑀𑐫𑑂 𑐟𑐳𑐎𑑄 𑐟𑐵𑑄𑐣𑑂𑐰𑐂 𑑋 𑐳𑑀𑐩𑐰𑐵𑑅 𑐀𑐣𑐫𑐵 𑐟𑐵𑐥𑐎𑑂𑐬𑐩 𑑓𑑙.𑑔 𑐜𑐶𑐐𑑂𑐬𑐷 𑐠𑑂𑐫𑑄𑐐𑐸 𑐏𑑅 𑑋

𑐮𑐸𑐬𑐷 𑐮𑐸𑐂𑐎𑐹𑐥𑐶𑑄 𑐩𑐢𑑂𑐫𑐾 𑐀𑐳𑑂𑐥𑐟𑐵𑐮 𑐫𑑄𑐎𑐹𑐥𑐶𑑄 𑐣𑐶𑐩𑑂𑐴 𑐐𑑂𑐰𑐵𑐚𑐾𑐮𑐩𑐵𑐮𑐵𑐫𑐵 𑐣𑐵𑐐𑐬𑐶𑐎 𑐖𑐹𑐐𑐸 𑐩𑐾𑐎𑑂𑐳𑐶𑐎𑑀𑐫𑐵 𑐰𑐶𑐡𑐾𑐱𑐩𑐣𑑂𑐟𑑂𑐬𑐷𑑄 𑐢𑐵𑑅𑐐𑐸 𑐡𑐸 𑑋 𑐩𑐾𑐥𑐶𑑄 𑐐𑐣 𑐐𑐣𑐫𑐵𑐥𑐶𑑄 𑐢𑐫𑐵𑐐𑐸 𑐳𑐷𑐩𑐡𑐸𑐣𑐶 𑑋 𑐥𑑂𑐬𑐴𑐬𑐷𑑄 𑐠𑑂𑐰 𑐑𑐚𑐣𑐵𑐫𑑂 𑐳𑑂𑐰𑐩𑑂𑐴𑐾𑐳𑐶𑐟 𑐀𑐣𑐸𑐳𑐣𑑂𑐢𑐵𑐣𑐫𑐵 𑐣𑐶𑑄𑐟𑐶𑑄 𑐖𑑂𑐰𑐣𑐵𑐟𑑅𑐐𑐸 𑐏𑑅 𑑋

𑐩𑐾𑐎𑑂𑐳𑐶𑐎𑑀𑐫𑐵 𑐩𑐴𑐵𑐰𑐵𑐞𑐶𑐖𑑂𑐫𑐡𑐹𑐟𑑄 𑐫𑐡𑐶 𑐳𑐷𑐥𑐶𑑄 𑐩𑐾𑐎𑑂𑐳𑐶𑐎𑑀𑐫𑐵 𑐣𑐵𑐐𑐬𑐶𑐎 𑐖𑐹𑐳𑐵𑑄 𑐩𑐵𑑅𑐐𑐸 𑐦𑐸𑐎𑑂𑐎𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐠𑑂𑐰 𑐱𑐴𑐬𑐫𑑂 𑐣𑑂𑐴𑐵𑐥𑐵 𑐣𑑄 𑐠𑐠𑐾 𑐁𑐥𑑂𑐬𑐰𑐵𑐳𑐷𑐟 𑐳𑐶𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐮𑐸𑐂𑐎𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐳𑐣𑑂 𑑒𑑐𑑑𑑗 𑐫𑑂 𑐳𑐴𑐬𑐫𑐵 𑐡𑐎𑑂𑐲𑐶𑐞𑐫𑑂 𑐮𑐵𑑅𑐐𑐸 𑐰𑐵𑐮𑐩𑐵𑐬𑑂𑐚𑐫𑐵 𑐥𑐶𑐣𑐾 𑐡𑐶𑐎𑐵𑐟𑑅𑐐𑐸 𑐠𑐖𑑂𑐫𑐵𑑅𑐐𑐸 𑐴𑐾 𑐕𑐐𑑅 𑐮𑐬𑐷𑐂 𑐗𑐶𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐮𑐸𑐂𑐎𑐹𑐐𑐸 𑐏𑑅 𑑋

𑐑𑐚𑐣𑐵𑐳𑑂𑐠𑐮 𑐳𑑂𑐰𑐫𑐵𑑅 𑐨𑐔𑐵 𑐟𑐵𑐥𑐵𑐎 𑐳𑐸𑐬𑐎𑑂𑐲𑐵𑐎𑐬𑑂𑐩𑐷 𑐎𑐠𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐩𑑂𑐴 𑐊𑐜𑑂𑐰𑐬𑑂𑐜 𑐬𑐾𑐣𑐵𑑄 𑐠𑐖𑑂𑐫𑐵𑑅𑐐𑐸 𑐑𑐚𑐣𑐵 𑐖𑐹𑐐𑐸 𑐏𑑄 𑐠𑑅𑐟 𑐀𑐖𑐹 𑐩𑐔𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐰𑐫𑐵 𑐎𑐠𑑄 𑐮𑐬𑐷 𑐮𑐹𑐐𑐸 𑐠𑐵𑐳𑐫𑑂 𑐠𑑅𑐩𑑂𑐴𑑄 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐁𑐥𑑂𑐬𑐰𑐵𑐳𑐷𑐟 𑐬𑐾𑐮𑑄 𑐟𑐶𑑄𑐣𑑂𑐴𑐸𑐫𑐵 𑐔𑑂𑐰𑑄𑐐𑐸 𑐏𑐣𑐵𑐐𑐸 𑐢𑐵𑑅𑐐𑐸 𑐡𑐸 𑑋

‘𑐐𑐸𑐐𑐸𑑄 𑐣𑑄 𑐂𑐮𑐫𑑂 𑐳𑐸𑑄 𑐩𑐣𑐹 𑐧𑐵𑑄𑐩𑐮𑐵𑐎 𑐑𑐵𑑅𑐥𑐵𑑅 𑐖𑐸𑐂 𑐢𑐎𑐵𑑅 𑐖𑐶𑐟𑑅 𑐟𑐵𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐄𑐩𑐶𑐟 𑐴𑐂𑐥𑐶𑑄 𑐟𑐳𑑂𑐎𑐬𑐟𑐫𑑂𑐳𑑄 𑐠𑐸𑐥𑐶𑑄 𑐩𑐣𑐹𑐟 𑐣𑑂𑐴𑑂𑐫𑐵𑐐𑐸 𑐖𑐹𑐳𑐵𑑄 𑐰𑐵𑐳𑑂𑐟𑐵 𑐴𑐾 𑐫𑐵𑐂𑐩𑐏𑐸’, 𑐬𑐾𑐣𑐵𑑄 𑐢𑐵𑑅𑐐𑐸 𑐡𑐸 𑑋

𑐳𑐵𑐣 𑐊𑐣𑑂𑐚𑑀𑐣𑐶𑐫𑑀𑐫𑐵 𑐳𑐸𑐡𑐹𑐬 𑐡𑐎𑑂𑐲𑐶𑐞 𑐎𑑂𑐲𑐟𑑂𑐬𑐫𑑂 𑐣𑐶𑐥𑐸 𑐩𑐹 𑐬𑐵𑐖𑐩𑐵𑐬𑑂𑐐𑐫𑐵 𑐎𑐬𑐶𑐜𑑀𑐬 𑐡𑐸, 𑐐𑐸𑐎𑐶𑑄 𑐚𑐾𑐎𑑂𑐳𑐵𑐳𑐫𑐵 𑐳𑐷𑐩𑐵𑐫𑑂 𑐮𑐵𑑅𑐐𑐸 𑐣𑐐𑐬𑐫𑐵𑐟 𑐳𑐴𑐬𑐮𑐶𑐳𑐾 𑐳𑑂𑐰𑐵𑐂 𑑋 𑐀𑐥𑑂𑐰𑑅 𑐠𑐾𑑄 𑐐𑐵𑑄 𑐮𑐵𑐐𑐵 𑐮𑐵𑑅𑐐𑐸 𑐠𑐣 𑐥𑐸𑐮𑐵𑑄𑐐𑐸 𑐳𑐵𑐩𑐵𑐣 𑐟𑐫𑐵𑐟𑑅𑐐𑐸 𑐠𑐵𑐫𑑂 𑐰 𑐨𑐔𑐵𑐨𑐔𑐵 𑐰𑐶𑐎𑐵𑐳 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐰𑐳𑑂𑐟𑐶 𑐖𑐎 𑐡𑐸 𑑋 𑐄𑐎𑐶𑑄 𑐳𑐵𑐣 𑐊𑐣𑑂𑐚𑑀𑐣𑐶𑐫𑐵𑐫𑑀 𑐄𑐐𑐸 𑐠𑐵𑐳𑐫𑑂 𑐠𑐖𑑂𑐫𑐵𑑅𑐐𑐸 𑐮𑐬𑐷 𑐴𑑅𑐳𑐵𑑄 𑐏𑐵𑐳 𑐴𑐾 𑐣𑐶𑐐𑐬𑐵𑐣𑐷 𑐩𑐟𑐂𑐐𑐸 𑐖𑐹𑐐𑐸𑐮𑐶𑑄 𑐟𑐳𑑂𑐎𑐬𑐟𑐫𑑂𑐳𑑄 𑐠𑑂𑐰 𑐮𑑃𑐥𑐸 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑂𑐰 𑐑𑐚𑐣𑐵𑐫𑐵𑐟 𑐎𑐫𑐵𑑅 𑐀𑐩𑐾𑐬𑐶𑐎𑐵𑐫𑐵 𑐁𑐣𑑂𑐟𑐬𑐶𑐎 𑐳𑐸𑐬𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫 𑐴𑑀𑐩𑐮𑑂𑐫𑐵𑐣𑑂𑐜 𑐳𑐾𑐎𑑂𑐫𑐸𑐬𑐶𑐚𑐷 𑐩𑐣𑑂𑐟𑑂𑐬𑐷 𑐀𑐮𑐶𑐴𑐵𑐣𑑂𑐜𑑂𑐬𑑀 𑐩𑐵𑐂𑐫𑑀𑐬𑑂𑐎𑐵𑐳𑑄 𑐩𑐵𑐣𑐰𑐟𑐳𑑂𑐎𑐬𑐟𑐫𑑂𑐳𑑄 𑐣𑐵𑐦𑐵 𑐎𑐩𑐾 𑐫𑐵𑐫𑐾 𑐟𑐵𑑅 𑐟𑐫𑐵𑑅 𑐎𑐩𑐖𑑀𑐬 𑐩𑐣𑐹𑐟𑐫𑑂 𑐱𑑀𑐲𑐞 𑐫𑐵𑐣𑐵𑐔𑑂𑐰𑑄𑐐𑐸 𑐰 𑐄𑐩𑐶𑐟 𑐖𑑀𑐏𑐶𑐩𑐫𑑂 𑐮𑐵𑐎𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐚𑐾𑐎𑑂𑐳𑐳𑐫𑐵 𑐐𑐨𑐬𑑂𑐣𑐬 𑐐𑑂𑐬𑐾𑐐 𑐫𑐵𑐧𑐚𑑄 𑐠𑑂𑐰 𑐩𑐺𑐟𑑂𑐫𑐸𑐫𑐵 𑐣𑐶𑑄𑐟𑐶𑑄 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐖𑐵 𑐧𑐵𑐂𑐜𑐾𑐣𑐫𑐵𑐟 𑐡𑑀𑐲 𑐧𑐶𑐄𑐐𑐸 𑐡𑐸 𑑋 𑐊𑐧𑑀𑐚𑑀𑑄 𑐠𑑂𑐰 𑐑𑐚𑐣𑐵𑐫𑐵𑐟 𑐧𑐵𑐂𑐜𑐣𑐫𑐵 𑐐𑑂𑐫𑐵𑐣𑐵𑐥𑐸𑐐𑐸 𑐳𑐷𑐩𑐵𑐣𑐷𑐟𑐶𑐫𑐵 𑐮𑐶𑐔𑑂𑐰𑑅 𑐏𑑅 𑐢𑐵𑑅𑐐𑐸 𑐡𑐸 𑑋

𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐐𑐬𑐶𑐧𑐷 𑐰 𑐴𑐶𑑄𑐳𑐵𑐫𑐵 𑐎𑐵𑐬𑐞𑑄 𑐀𑐣𑐫𑐵 𑐩𑐣𑐹𑐟 𑐟𑐳𑑂𑐎𑐬𑐟𑐫𑑂𑐟 𑐎𑐸𑐐𑐵𑐎𑑂𑐎 𑐢𑑂𑐫𑐧𑐵 𑐧𑐶𑐫𑐵𑑅 𑐀𑐩𑐾𑐬𑐶𑐎𑐵 𑐡𑐸𑐴𑐵𑑄 𑐰𑐫𑐾𑐐𑐸 𑐎𑐸𑐟𑑅 𑐫𑐵𑐂𑐐𑐸 𑐏𑑅 𑑋 𑐟𑐳𑑂𑐎𑐬𑐟𑐫𑑂𑐳𑑄 𑐩𑐾𑐎𑑂𑐳𑐶𑐎𑑀𑐫𑐵 𑐮𑑃𑐥𑐸 𑐖𑐸𑐫𑐵𑑅 𑐖𑑀𑐏𑐶𑐩𑐥𑐹𑐬𑑂𑐰𑐎 𑐄𑐩𑐶𑐟 𑐀𑐩𑐾𑐬𑐶𑐎𑐵 𑐡𑐸𑐟 𑐴𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐠𑐾 𑐀𑐩𑐾𑐬𑐶𑐎𑐵 𑐡𑐸𑐟 𑐴𑐫𑐾𑐐𑐸 𑐗𑑂𑐰𑐮𑐫𑑂 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐣𑑄 𑐁𑐥𑑂𑐬𑐰𑐵𑐳𑐷𑐟𑐫𑑂𑐳𑑄 𑐫𑐎𑑂𑐰 𑐳𑐵𑐳𑑂𑐟𑐶 𑐣𑐫𑐾𑐩𑐵𑑅𑐐𑐸 𑐑𑐚𑐣𑐵𑐟 𑐥𑐶𑐴𑐵𑑄 𑐰𑑅𑐳𑐵𑑄 𑐠𑐸𑐎𑐠𑑄 𑐕𑐎𑑂𑐰𑐮𑑄 𑐴𑐾 𑐟𑑅𑐩𑑂𑐴 𑐩𑐣𑐹𑐟 𑐳𑐷𑐐𑐸 𑐑𑐚𑐣𑐵 𑐢𑐵𑑅𑐳𑐵 𑐖𑐹𑐐𑐸 𑐩𑐡𑐸𑐣𑐶 𑑋 𑐫𑐡𑐶 𑐠𑑂𑐰 𑐑𑐚𑐣𑐵 𑐩𑐵𑐣𑐰 𑐟𑐳𑑂𑐎𑐬𑐮𑐶𑐳𑐾 𑐳𑐩𑑂𑐧𑐣𑑂𑐢𑐶𑐟 𑐖𑐹𑐳𑐵 𑐠𑑂𑐰 𑐀𑐩𑐾𑐬𑐶𑐎𑐵𑐫𑐵 𑐂𑐟𑐶𑐴𑐵𑐳𑐫𑐵 𑐴𑐾 𑐡𑐎𑐮𑐫𑑂 𑐏𑐬𑐵𑐧 𑐑𑐚𑐣𑐵 𑐥𑑂𑐬𑐩𑐵𑐞𑐶𑐟 𑐖𑐸𑐂𑐐𑐸 𑐏𑑃 𑐳𑑂𑐠𑐵𑐣𑐷𑐫 𑐥𑐟𑑂𑐬𑐎𑐵𑐬𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS