Read news in NepalBhasa text-- www.hamroschool.com BACK 𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐄𑐥𑐔𑐵𑐬𑐫𑑂 𑐮𑐵𑐥𑐬𑐰𑐵𑐴𑐷 𑐫𑐵𑑅𑐥𑐶𑑄𑐟 𑐩𑐸𑐡𑑂𑐡𑐵 𑐟𑐂𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐄𑐥𑐔𑐵𑐬𑐫𑑂 𑐮𑐵𑐥𑐬𑐰𑐵𑐴𑐷 𑐫𑐵𑑅𑐥𑐶𑑄𑐟 𑐩𑐸𑐡𑑂𑐡𑐵 𑐟𑐂𑐐𑐸

𑐊𑐖𑐾𑐣𑑂𑐳𑐷- 𑐀𑐬𑑂𑐖𑐾𑐣𑑂𑐚𑐶𑐣𑐵𑐫𑐵 𑐩𑐴𑐵𑐣 𑐦𑐸𑐚𑐧𑐮 𑐎𑐵𑐳𑐵𑐩𑐶 𑐜𑐶𑐊𑐐𑑀 𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐄𑐥𑐔𑐵𑐬𑐫𑑂 𑐮𑐵𑐥𑐬𑐰𑐵𑐴𑐷 𑐫𑐵𑑅𑐐𑐸 𑐡𑑂𑐰𑐥𑐣𑐫𑑂 𑐔𑑂𑐫𑐵𑐩𑑂𑐴 𑐳𑑂𑐰𑐵𑐳𑑂𑐠𑑂𑐫𑐎𑐬𑑂𑐩𑐷𑐫𑐵𑐟 𑐩𑐸𑐡𑑂𑐡𑐵 𑐟𑐂𑐐𑐸 𑐖𑐹𑐐𑐸 𑐡𑐸 𑑋 𑐕𑐐𑐹 𑐕𑐵𑐣𑐰𑐶𑐣 𑐳𑐩𑐶𑐟𑐶𑑄 𑐄𑐩𑐶𑐐𑐸 𑐄𑐥𑐔𑐵𑐬𑐫𑑂 𑐫𑐎𑑂𑐰 𑐴𑐾 𑐎𑐩𑐖𑑀𑐬𑐷 𑐰 𑐀𑐣𑐶𑐫𑐩𑐶𑐟𑐟𑐵 𑐡𑐸𑐐𑐸 𑐮𑐸𑐂𑐎𑐾𑐰𑑄 𑐕𑐩𑑂𑐴 𑐣𑑂𑐫𑐵𑐫𑐵𑐢𑐶𑐱𑑄 𑐄𑐩𑐶𑐰𑐶𑐬𑐸𑐡𑑂𑐢 𑐮𑐵𑐥𑐬𑐰𑐵𑐴𑐷𑐥𑐹𑐬𑑂𑐞 𑐴𑐟𑑂𑐫𑐵 𑐫𑐵𑑅𑐐𑐸 𑐡𑑂𑐰𑐥𑐣𑐫𑑂 𑐩𑐸𑐡𑑂𑐡𑐵 𑐣𑑂𑐴𑑂𑐫𑐵𑐎𑐾𑐟 𑐁𑐡𑐾𑐱 𑐧𑐶𑐄𑐐𑐸 𑐏𑑅 𑑋

𑐀𑐬𑑂𑐖𑐾𑐣𑑂𑐚𑐶𑐣𑐵𑐫𑐵 𑐬𑐵𑐖𑐢𑐵𑐣𑐷 𑐧𑑂𑐫𑐸𑐣𑐬𑑂𑐳 𑐁𑐫𑐬𑑂𑐳𑐫𑑂 𑐳𑐣𑑂 𑑒𑑐𑑒𑑐 𑐫𑐵 𑐣𑑀𑐰𑐾𑐩𑑂𑐨𑐬𑐫𑑂 𑑖𑑐 𑐡𑑃𑐫𑐵 𑐄𑐩𑐾𑐬𑐫𑑂 𑐴𑐺𑐡𑐫𑐑𑐵𑐟 𑐖𑐸𑐫𑐵𑑅 𑐩𑑂𑐫𑐵𑐬𑐵𑐜𑑀𑐣𑐵 𑐩𑐡𑐸𑐐𑐸 𑐏𑑅 𑑋 𑐰𑐫𑐵𑑄 𑐕𑐸𑑄 𑐣𑑂𑐴𑐶 𑐣𑑂𑐴𑑂𑐫𑐰 𑐖𑐎 𑐩𑐳𑑂𑐟𑐶𑐲𑑂𑐎𑐫𑐵 𑐀𑐥𑐬𑐾𑐱𑐣 𑐫𑐵𑑅𑐩𑑂𑐴 𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐳𑑂𑐰𑐵𑐳𑑂𑐠𑑂𑐫 𑐀𑐰𑐳𑑂𑐠𑐵 𑐳𑐸𑐢𑐵𑐬 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐩𑑂𑐫𑐵𑐬𑐵𑐜𑑀𑐣𑐵 𑐩𑐡𑐸𑐐𑐸 𑐕𑐸𑑄 𑐣𑑂𑐴𑐶 𑐮𑐶𑐥𑐵 𑐀𑐬𑑂𑐖𑐾𑐣𑑂𑐚𑐶𑐣𑐵𑐫𑐵 𑐀𑐨𑐶𑐫𑑀𑐖𑐣𑐎𑐬𑑂𑐟𑐵𑐟𑐫𑑂𑐳𑑄 𑐄𑐥𑐔𑐵𑐬𑐫𑑂 𑐳𑑄𑐮𑐐𑑂𑐣 𑐔𑐶𑐎𑐶𑐟𑑂𑐳𑐎 𑐰 𑐣𑐬𑑂𑐳𑐟𑐫𑑂 𑐀𑐣𑐸𑐳𑐣𑑂𑐢𑐵𑐣 𑐳𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐰𑑄𑐐𑐸 𑐡𑑃𑐫𑑂 𑐣𑐷𑐩𑑂𑐴 𑐰𑐶𑐖𑑂𑐘 𑐡𑐸𑐠𑑂𑐫𑐵𑑅𑐐𑐸 𑐕𑐐𑐹 𑐥𑑂𑐫𑐵𑐣𑐮𑑄 𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐄𑐥𑐔𑐵𑐬𑐫𑑂 𑐳𑑄𑐮𑐐𑑂𑐣 𑐔𑐶𑐎𑐶𑐟𑑂𑐳𑐎𑐟𑐫𑑂 𑐥𑐸𑐔𑐮𑑄 𑐀𑐣𑐸𑐥𑐫𑐸𑐎𑑂𑐟, 𑐀𑐥𑐬𑑂𑐫𑐵𑐥𑑂𑐟 𑐰 𑐐𑐿𑐬𑐖𑐶𑐩𑑂𑐩𑐾𑐰𑐵𑐬𑐷𑐝𑑄𑐐𑑄 𑐖𑑂𑐫𑐵 𑐫𑐵𑑅𑐐𑐸 𑐮𑐸𑐂𑐎𑐹𑐐𑐸 𑐏𑑅 𑑋

𑐀𑐡𑐵𑐮𑐟𑐫𑐵 𑐎𑐠𑑄 𑐄𑐐𑐸 𑐥𑑂𑐫𑐵𑐣𑐮𑑄 𑐫𑐡𑐶 𑐄𑐥𑐫𑐸𑐎𑑂𑐟 𑐔𑐶𑐎𑐶𑐟𑑂𑐳𑐵 𑐳𑐸𑐰𑐶𑐢𑐵𑐫𑑂 𑐎𑐸𑐐𑐵𑐎𑑂𑐎 𑐄𑐥𑐔𑐵𑐬 𑐫𑐵𑑅𑐐𑐸 𑐏𑑅𑐳𑐵 𑐩𑑂𑐫𑐵𑐬𑐵𑐜𑑀𑐣𑐵 𑐩𑑂𑐰𑐵𑐂𑐐𑐸 𑐳𑐩𑑂𑐨𑐵𑐣𑐵 𑐡𑐂 𑐢𑐵𑑅𑐐𑐸 𑐏𑑅 𑑋
𑐁𑑅 𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐣𑐱𑐵 𑐳𑐩𑑂𑐧𑐣𑑂𑐢𑐷 𑐣𑐶𑐖𑐷 𑐔𑐶𑐎𑐶𑐟𑑂𑐳𑐎, 𑐕𑐩𑑂𑐴 𑐩𑐣𑑀𑐔𑐶𑐎𑐶𑐟𑑂𑐳𑐎𑐫𑐵 𑐮𑐶𑐳𑐾𑑄 𑐩𑐾𑐥𑐶𑑄 𑐣𑐶𑐩𑑂𑐴 𑐔𑐶𑐎𑐶𑐟𑑂𑐳𑐎, 𑐣𑐶𑐩𑑂𑐴 𑐣𑐬𑑂𑐳 𑐰 𑐄𑐩𑐶 𑐴𑐵𑐎𑐶𑐩𑐟𑐫𑑂𑐟 𑐩𑐸𑐡𑑂𑐡𑐵 𑐟𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐄𑐩𑐶𑐳𑑄 𑐢𑐵𑑅𑐳𑐵 𑐩𑑂𑐫𑐵𑐬𑐵𑐜𑑀𑐣𑐵 𑐳𑐷𑐐𑐸𑐮𑐶𑐂 𑐠𑑅𑐥𑐶𑑄 𑐖𑐶𑐩𑑂𑐩𑐾𑐰𑐵𑐬 𑐩𑐡𑐸 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐫𑐡𑐶 𑐠𑑂𑐰 𑐩𑐸𑐡𑑂𑐡𑐵𑐫𑑂 𑐀𑐨𑐶𑐫𑑀𑐐 𑐥𑐸𑐲𑑂𑐚𑐶 𑐖𑐸𑐮 𑐢𑐵𑑅𑐳𑐵 𑐄𑐩𑐶𑐳𑑄 𑐔𑑂𑐫𑐵𑐡𑑃 𑐣𑐶𑐳𑐾𑑄 𑐣𑐷𑐣𑑂𑐫𑐵𑐡𑑃 𑐟𑐎 𑐖𑐾𑐮 𑐳𑐖𑐵𑐫 𑐦𑐫𑐾𑐩𑐵𑐮𑐾𑐦𑐸 𑐢𑐵𑑅𑐐𑐸 𑐡𑐸 𑑋 𑐩𑐸𑐡𑑂𑐡𑐵𑐫𑐵 𑐳𑐸𑐣𑐰𑐵𑐂 𑐖𑐸𑐂𑐐𑐸 𑐃 𑐢𑐵𑑅𑐳𑐵 𑐎𑑂𑐰𑑅𑐕𑐶𑐄𑐐𑐸 𑐩𑐡𑐸𑐣𑐶 𑑋

𑐩𑑂𑐫𑐵𑐬𑐵𑐜𑑀𑐣𑐵 𑐳𑐷𑐐𑐸 𑐂𑐮𑐫𑑂 𑐩𑐴𑐵𑐣 𑐎𑐵𑐳𑐵𑐩𑐶𑐫𑐵 𑐀𑐰𑐳𑑂𑐠𑐵 𑐳𑐸𑑄 𑐴𑐾 𑐐𑑂𑐰𑐵𑐴𑐵𑐮𑐶 𑐫𑐵𑐂𑐥𑐶𑑄 𑐩𑐡𑐸𑐐𑐸 𑐠𑐾𑑄 𑐏𑐣𑐾𑐡𑐸𑐐𑐸 𑐩𑑂𑐫𑐵𑐬𑐵𑐜𑑀𑐣𑐵 𑐎𑐵𑐫𑐫𑐵 𑐰𑐎𑐶𑐮 𑐩𑐵𑐬𑐶𑐌 𑐧𑐵𑐄𑐜𑑂𑐬𑐷𑑄 𑐳𑐩𑐵𑐔𑐵𑐬 𑐳𑑄𑐳𑑂𑐠𑐵 𑐬𑑀𑐫𑐚𑐬𑑂𑐳𑐫𑐵𑐟 𑐢𑐵𑑅𑐐𑐸 𑐡𑐸 𑑋

‘𑐖𑐶𑑄 𑐩𑐡𑐸𑐐𑐸 𑐎𑐵𑐬𑐞 𑐣𑑂𑐫𑐣𑐾𑐰𑑄 𑐴𑐾 𑐠𑑂𑐰 𑐮𑐵𑐥𑐬𑐰𑐵𑐴𑐷𑐥𑐹𑐬𑑂𑐞 𑐴𑐟𑑂𑐫𑐵 𑐏𑑅 𑐢𑐫𑐵𑐐𑐸 𑐏𑑅 𑑋 𑐖𑐶𑐩𑐶𑐳𑑄 𑐟𑐵𑑅𑐴𑐵𑐎𑑅𑐐𑐸 𑐮𑐜𑐵𑐂𑑃 𑐟𑑂𑐫𑐵𑐎𑐵𑑅 𑐠𑐣 𑐟𑐎 𑐠𑑂𑐫𑑄𑐐𑐸 𑐡𑐸 𑑋 𑐕𑐐𑐹 𑐔𑐬𑐞 𑐥𑐹𑐰𑑄𑐐𑐸 𑐡𑐸’ 𑐰𑐎𑐶𑐮 𑐧𑐵𑐄𑐜𑑂𑐬𑐷𑑄 𑐢𑐵𑑅𑐐𑐸𑐡𑐸 𑑋

𑐩𑑂𑐫𑐵𑐬𑐵𑐜𑑀𑐣𑐵𑐫𑐵 𑐣𑐶𑐩𑑂𑐴 𑐩𑑂𑐴𑑂𑐫𑐵𑐫𑑂𑐥𑐶𑑄𑐳𑑄 𑐟𑑅𑐐𑐸 𑐕𑐐𑐹 𑐄𑐖𑐸𑐬𑐷𑐫𑐵 𑐎𑐵𑐬𑐞𑑄 𑐎𑐵𑐣𑐸𑐣𑐷 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋 𑐩𑐳𑑂𑐟𑐶𑐲𑑂𑐎𑐫𑐵 𑐱𑐮𑑂𑐫𑐎𑑂𑐬𑐶𑐫𑐵 𑐮𑐶𑐥𑐵 𑐠𑑅 𑐀𑐧𑐸𑐫𑐵 𑐄𑐥𑐔𑐵𑐬𑐧𑐵𑐬𑐾 𑐄𑐩𑐶𑐳𑑄 𑐔𑐶𑐄𑐟𑐵𑑅 𑐥𑑂𑐰𑑄𑐎𑐵𑑅 𑐠𑑂𑐰 𑐄𑐖𑐸𑐬𑐷 𑐟𑑅𑐐𑐸 𑐏𑑅 𑑋

𑐰𑐶𑐱𑑂𑐰𑐫𑐵 𑐳𑐬𑑂𑐰𑐎𑐵𑐮𑐶𑐟 𑐩𑐴𑐵𑐣 𑐦𑐸𑐚𑐧𑐮 𑐎𑐵𑐳𑐵𑐩𑐶 𑐩𑐢𑑂𑐫 𑐕𑐩𑑂𑐴 𑐩𑑂𑐫𑐵𑐬𑐵𑐜𑑀𑐣𑐵 𑐩𑐡𑐫𑐾𑐰𑑄 𑐖𑐹𑐐𑐸 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐰𑐫𑐵 𑐣𑐶𑐖𑐷 𑐔𑐶𑐎𑐶𑐟𑑂𑐳𑐎 𑐮𑐸𑐎 𑐏𑑂𑐰𑐏𑑂𑐰𑑄 𑐠𑑅𑐩𑑂𑐴𑑄 𑐠𑑅 𑐥𑐵𑐳𑐵𑐫𑐵 𑐖𑑂𑐫𑐵𑐣 𑐧𑐔𑐾 𑐫𑐵𑐫𑐾𑐟 𑐴𑐬𑐳𑐩𑑂𑐨𑐰 𑐄𑐥𑐵𑐫 𑐣𑐵𑐮𑐵𑐐𑐸 𑐢𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS