Read news in NepalBhasa text-- www.hamroschool.com BACK 𑐩𑐡𑐸𑐩𑑂𑐴 𑐱𑐬𑑂𑐩𑐵𑐫𑐵 ‘𑐄𑐥𑐣𑑂𑐫𑐵𑐳𑐫𑐵 𑐔𑐵𑐎𑐮𑐫𑑂 𑐐𑐶𑐬𑐶𑐖𑐵’ 𑐥𑐶𑐡𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑐡𑐸𑐩𑑂𑐴 𑐱𑐬𑑂𑐩𑐵𑐫𑐵 ‘𑐄𑐥𑐣𑑂𑐫𑐵𑐳𑐫𑐵 𑐔𑐵𑐎𑐮𑐫𑑂 𑐐𑐶𑐬𑐶𑐖𑐵’ 𑐥𑐶𑐡𑐣

𑐫𑐾𑑃- 𑐩𑐡𑐸𑐩𑑂𑐴 𑐂𑐟𑐶𑐴𑐵𑐳𑐰𑐶𑐡𑑂 𑐳𑐴 𑐥𑑂𑐬𑐵𑐢𑑂𑐫𑐵𑐥𑐎 𑐐𑑀𑐰𑐡𑑂𑐬𑑂𑐢𑐣 𑐱𑐬𑑂𑐩𑐵𑑄 𑐗𑐶𑑄𑐥𑑂𑐫𑐡𑑃 𑐣𑑂𑐴𑑂𑐫𑑅 𑐔𑑂𑐰𑐫𑐵𑐡𑐷𑐐𑐸 𑐳𑐩𑐵𑐮𑑀𑐔𑐣𑐵 𑐳𑐦𑐹 ‘𑐄𑐥𑐣𑑂𑐫𑐵𑐳𑐫𑐵 𑐔𑐵𑐎𑐮𑐫𑑂 𑐐𑐶𑐬𑐶𑐖𑐵’ 𑐥𑐶𑐡𑑄𑐐𑐸 𑐡𑐸 𑑋 𑐬𑐵𑐖𑑀𑐥𑐵𑐢𑑂𑐫𑐵𑐫 𑐳𑐩𑐵𑐖𑐫𑐵 𑐐𑑂𑐰𑐳𑐵𑐮𑐫𑑂 𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐣𑐾𑐥𑐵𑑅 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐕𑐐𑑅 𑐣𑐎𑑂𑐲𑐟𑑂𑐬 𑐩𑐴𑐵𑐎𑐰𑐶 𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷𑑄 𑐔𑑂𑐰𑐫𑐵𑐡𑐷𑐐𑐸 𑐄𑐥𑐣𑑂𑐫𑐵𑐳𑐟𑐫𑑂𑐐𑐸 𑐳𑐩𑐵𑐮𑑀𑐔𑐣𑐵 𑐫𑐵𑐣𑐵𑑅 𑐩𑐡𑐸𑐩𑑂𑐴 𑐳𑐴𑐥𑑂𑐬𑐵𑐢𑑂𑐫𑐵𑐥𑐎 𑐱𑐬𑑂𑐩𑐵 𑐔𑑂𑐰𑐫𑐵𑐡𑐷𑐐𑐸 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐳𑐦𑐹𑐫𑐵 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐰𑐬𑐶𑐲𑑂𑐛 𑐳𑐩𑐵𑐮𑑀𑐔𑐎 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬, 𑐃𑐮𑑀𑐴 𑐥𑑂𑐬𑐎𑐵𑐱𑐣𑐫𑐵 𑐥𑑂𑐬𑐧𑐣𑑂𑐢 𑐣𑐶𑐬𑑂𑐡𑐾𑐱𑐎 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫 𑐮𑐐𑐵𑐫𑐟𑐫𑐵 𑐥𑐵𑐴𑐵𑑄𑐥𑐶𑑄𑐳𑑄 𑐄𑐐𑐸 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐳𑐩𑐵𑐮𑑀𑐔𑐎 𑐟𑐵𑐩𑑂𑐬𑐵𑐎𑐵𑐬𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐩𑐴𑐵𑐎𑐰𑐶 𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐔𑐬𑑂𑐔𑐵 𑐫𑐵𑐣𑐵𑐡𑐶𑐳𑐾𑑄 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐳𑐦𑐸𑐟𑐶𑑄 𑐂𑐟𑐶𑐴𑐵𑐳𑐰𑐶𑐡𑑂 𑐱𑐬𑑂𑐩𑐵𑐫𑐵𑐎𑐾 𑐳𑐔𑑂𑐔𑐵 𑐳𑐩𑐮𑑀𑐔𑐣𑐵𑐫𑐵 𑐏𑐸𑐧𑐷 𑐡𑐸𑐐𑐸 𑐥𑑂𑐬𑐩𑐵𑐞𑐶𑐟 𑐫𑐵𑐣𑐵𑐡𑐷𑐐𑐸 𑐰𑐶𑐔𑐵𑑅 𑐟𑐫𑐵𑐡𑐶𑐮 𑑋

𑐃𑐮𑑀𑐴𑑄 𑐥𑑂𑐬𑐎𑐵𑐱𑐣𑐫𑐵 𑐣𑐶𑐬𑑂𑐡𑐾𑐱𑐎 𑐱𑐵𑐎𑑂𑐫𑑄 𑐩𑐴𑐵𑐎𑐰𑐶 𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵𑐟 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐥𑐵𑐐𑐮 𑐎𑐰𑐶 𑐢𑐵𑐂𑐐𑐸 𑐢𑐵𑐳𑐾𑑄 𑐰𑐫𑑂𑐎𑑅 𑐕𑐩𑑂𑐴 𑐠𑑅𑐐𑐸 𑐩𑐣𑐫𑑂 𑐮𑐹𑐐𑐸 𑐨𑐵𑐰𑐣𑐵𑐫𑐵𑐟 𑐐𑐠𑐾 𑐏𑑅 𑐀𑐠𑐾 𑐴𑐾 𑐔𑑂𑐰𑐫𑐵𑐡𑐷𑐩𑑂𑐴 𑐳𑑂𑐰𑐔𑑂𑐕𑐣𑑂𑐡𑐰𑐵𑐡𑐷 𑐎𑐰𑐶 𑐖𑐹𑐐𑐸 𑐰𑐶𑐔𑐵𑑅 𑐟𑐫𑐵𑐡𑐶𑐮 𑑋

𑐣𑐾𑐰𑐵𑑅 𑐖𑐵𑐟𑐷𑐫 𑐩𑐴𑐵𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐩𑐣𑑀𑐖 𑐣𑐾𑐰𑐵𑑅 𑐏𑐜𑑂𑐐𑐷𑑄 𑐳𑐩𑐵𑐖𑑄 𑐠𑑅𑐐𑐸 𑐩𑑂𑐴𑐳𑐷𑐎𑐵 𑐮𑑂𑐫𑑄𑐎𑐵 𑐟𑐫𑐾𑐟 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞𑐫𑑂 𑐰𑐶𑐱𑐾𑐲 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐩𑐡𑐸𑐩𑑂𑐴 𑐱𑐬𑑂𑐩𑐵𑐫𑐵 𑐎𑐵𑐫 𑐳𑐸𑐨𑐵𑐲 𑐱𑐬𑑂𑐩𑐵𑑄 𑐠𑑅 𑐀𑐧𑐸 𑐡𑐶𑐰𑑄𑐐𑐟 𑐖𑐹𑐐𑐸 𑑑𑑔 𑐡𑑃 𑐮𑐶𑐥𑐵 𑐖𑐹𑐳𑐵𑑄 𑐰𑐫𑑂𑐎𑐮𑑄 𑐔𑑂𑐰𑐫𑐵𑐡𑐷𑐐𑐸 𑐳𑐦𑐹 𑐥𑐶𑐠𑐣𑐾 𑐏𑑄𑐐𑐸𑐮𑐶𑑄 𑐮𑐫𑑂𑐟𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵 𑐂𑐮𑐫𑑂 𑐳𑑄𑐎𑑂𑐬𑐩𑐶𑐟𑐫𑐵 𑐄𑐥𑐔𑐵𑐬𑐫𑑂 𑐏𑐚𑐾 𑐖𑐹𑐥𑐶𑑄 𑐬𑐵𑐖𑑀𑐥𑐵𑐢𑑂𑐫𑐵𑐫 𑐳𑑂𑐰𑐵𑐳𑑂𑐠𑑂𑐫𑐎𑐬𑑂𑐩𑐶𑐮𑐶𑐳𑐾𑑄 𑑒𑑐𑑗𑑖 𑐰 𑑐𑑗𑑗 𑐫𑐵 𑐊𑐳𑐂𑐂 𑐥𑐬𑐷𑐎𑑂𑐲𑐵 𑐄𑐟𑑂𑐟𑐷𑐬𑑂𑐞 𑐳𑐩𑐵𑐖𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐣𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵 𑐢𑐬𑑂𑐩, 𑐳𑑄𑐳𑑂𑐎𑐺𑐟𑐶, 𑐳𑑄𑐳𑑂𑐎𑐵𑐬𑐮𑐶𑐳𑐾 𑐰𑐾𑐡, 𑐩𑐣𑑂𑐟𑑂𑐬 𑐳𑐩𑑂𑐧𑐣𑑂𑐢𑐷 𑐳𑐦𑐹𑐫𑐵 𑐣𑑄 𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS