Read news in NepalBhasa text-- www.hamroschool.com BACK 𑐫𑐾𑑃𑐫𑐵 𑐣𑑂𑐴𑐹𑐩𑑂𑐴 𑐩𑐾𑐫𑐬𑐫𑐵 𑐣𑑂𑐴𑐵𑐥𑐵𑑄𑐐𑐸 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩 : 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑐣𑐾𑐖𑑂𑐫𑐵 𑐣𑐶𑐬𑐣𑑂𑐟𑐬, 𑐀𑐫𑐮𑐵𑑅𑐫𑐵 𑐧𑑂𑐬𑐵𑐞𑑂𑐜𑐷𑐒, 𑐟𑑂𑐰𑐵𑑅𑐫𑐵 𑐥𑐸𑐮𑐵𑑄𑐐𑐸 𑐣𑐵𑑄 𑐥𑐸𑐣𑐬𑑂𑐳𑑂𑐠𑐵𑐥𑐣𑐵 𑐫𑐵𑐫𑐾𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐾𑑃𑐫𑐵 𑐣𑑂𑐴𑐹𑐩𑑂𑐴 𑐩𑐾𑐫𑐬𑐫𑐵 𑐣𑑂𑐴𑐵𑐥𑐵𑑄𑐐𑐸 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩 : 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑐣𑐾𑐖𑑂𑐫𑐵 𑐣𑐶𑐬𑐣𑑂𑐟𑐬, 𑐀𑐫𑐮𑐵𑑅𑐫𑐵 𑐧𑑂𑐬𑐵𑐞𑑂𑐜𑐷𑐒, 𑐟𑑂𑐰𑐵𑑅𑐫𑐵 𑐥𑐸𑐮𑐵𑑄𑐐𑐸 𑐣𑐵𑑄 𑐥𑐸𑐣𑐬𑑂𑐳𑑂𑐠𑐵𑐥𑐣𑐵 𑐫𑐵𑐫𑐾𑐐𑐸

𑐫𑐾𑑃 𑐫𑐾𑑃 𑐮𑐨𑐵𑐲𑐵 𑐚𑐵𑐂𑐩𑑂𑐳)𑐩𑐴𑐵– 𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐧𑐵𑐮𑐾𑐣𑑂𑐡𑑂𑐬 𑐳𑐵𑐴𑑄 𑐩𑑂𑐴𑐶𑐐𑑅 𑐠𑑅𑐥𑐶𑐣𑐶 𑐣𑑂𑐴𑐵𑐥𑐵𑑄𑐐𑐸 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑐡𑐶𑐮 𑑋 𑐰𑐫𑑂𑐎𑑅𑐫𑐵 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩𑐫𑑂 𑐏𑐵𑐳 𑐴𑐾 𑐴𑐶𑐄𑐥𑐵𑑅 𑐏𑐣𑐾 𑐡𑐂𑐐𑐸 𑐕𑐸𑑄 𑐣𑑂𑐴𑐹𑐐𑐸 𑐰𑐶𑐲𑐫 𑐡𑐸𑐩𑐠𑑂𑐫𑐵𑑅𑐳𑐵𑑄 𑐫𑐾𑑃 𑐡𑐾𑐫𑑂𑐫𑐵 𑐳𑑂𑐠𑐵𑐣𑐷𑐫 𑐖𑐣𑐟𑐵𑐫𑐵 𑐣𑐸𑐐𑑅 𑐳𑐵𑐮𑐷𑐐𑐸 𑐧𑐸𑑃𑐡𑐵𑐟 𑐢𑐵𑑅𑐳𑐵 𑐁𑐥𑐵𑐮𑑄 𑐡𑐸𑐠𑑂𑐫𑐵𑐎𑐹𑐐𑐸 𑐩𑐴𑐳𑐸𑐳 𑐫𑐵𑐣𑐵 𑐴𑑅𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑐦𑐸𑐎𑑂𑐎𑑄 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐖𑑂𑐫𑐵 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩𑐫𑐫𑑂 𑐡𑐸𑐠𑑂𑐫𑐵𑑅 𑑋 𑐰𑐫𑑂𑐎𑐮𑑄 𑐠𑑅𑐐𑐸 𑐣𑐷𑐟𑐶𑐫𑐵 𑑓 𑐣𑐩𑑂𑐧𑐬 𑐧𑐸𑑃𑐡𑐵𑐫𑑂 𑐠𑑂𑐰 𑐏𑑃 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋 𑐠𑐸𑐎𑐶𑐫𑐵𑐟 𑐫𑐾𑑃 𑐡𑐾𑐫𑑂𑐫𑐵 𑐖𑐣𑐟𑐵𑑄 𑐳𑐎𑐵𑐬𑐵𑐟𑑂𑐩𑐎 𑐬𑐸𑐥𑑄 𑐎𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐫𑐾𑑃𑐫𑐵 𑐩𑑁𑐮𑐶𑐎 𑐥𑐴𑐶𑐔𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐬𑐘𑑂𑐖𑐣𑐵 𑐮𑐐𑐵𑐫𑐫𑐵𑐟 𑐮𑐶𑐥𑐶 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐰𑐶𑐱𑐾𑐲 𑐎𑐵𑐬𑑂𑐫𑐎𑑂𑐬𑐩 𑐴𑐫𑐾𑐐𑐸 𑐮𑐶𑐳𑐾𑑄 𑐫𑐾𑑃 𑐡𑐾𑐫𑑂𑐫𑐵 𑐠𑐷𑐠𑐷 𑐟𑑂𑐰𑐵𑑅𑐫𑐵 𑐥𑐸𑐮𑐵𑑄𑐐𑐸 𑐣𑐵𑑄 𑐥𑐸𑐣𑐳𑑂𑐬𑑂𑐠𑐵𑐥𑐣𑐵 𑐫𑐵𑐫𑐾𑐐𑐸 𑐎𑐵𑐬𑑂𑐫𑐎𑑂𑐬𑐩 𑐣𑑂𑐴𑑂𑐫𑐵𑐎𑐾𑐐𑐸 𑐏𑑃 𑐣𑑄 𑐣𑐷𑐟𑐶𑐂 𑐡𑐸𑐠𑑂𑐫𑐵𑐎𑐹𑐐𑐸 𑐡𑐸 𑑋

𑐫𑐾𑑃 𑐡𑐾𑐫𑑂𑐫𑐵 𑐩𑑁𑐮𑐶𑐎 𑐰𑐵𑐳𑑂𑐟𑐸𑐎𑐮𑐵𑐫𑐵𑐟 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐮𑐵𑐐𑐶𑑄 𑐠𑐵𑐫𑑂𑐠𑐵𑐳𑐫𑑂 𑐟𑐫𑐵𑐟𑑅𑐐𑐸 𑐧𑐳𑐳𑑂𑐚𑐥𑐫𑐵𑐟 𑐁𑑅 𑐦𑐮𑑂𑐔𑐵 𑐱𑐿𑐮𑐷𑑄 𑐡𑐫𑐾𑐎𑐾𑐐𑐸 𑐰 𑐳𑑂𑐰𑐣𑐶𑐐𑑅𑐫𑐵 𑐳𑑂𑐠𑐵𑐣𑐷𑐫 𑐣𑐾𑐰𑐵𑑅𑐟𑐫𑑂𑐳𑑄 𑐕𑐾𑑃𑐫𑑂 𑐡𑐫𑐾𑐎𑐷𑐐𑐸 𑐀𑐫𑑂𑐮𑐵𑑅𑐫𑐵𑐟 𑐧𑑂𑐬𑐵𑐞𑑂𑐜𑐶𑐒 𑐫𑐵𑐣𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐧𑐖𑐵𑐬𑐫𑑂 𑐕𑑂𑐰𑐫𑐾𑐐𑐸 𑐏𑑃 𑐣𑑄 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐥𑐸𑐮𑐵𑑄𑐐𑐸 𑐮𑑂𑐰𑐴𑑄 𑐴𑐶𑐟𑐶 𑐰 𑐥𑐬𑐩𑑂𑐥𑐬𑐵𑐐𑐟 𑐡𑐧𑐹𑐟𑐫𑑂𑐟 𑐴𑐵𑐣𑑄 𑐩𑑂𑐰𑐵𑐎𑐾𑐐𑐸 𑐮𑐵𑐐𑐶𑑄 𑐎𑐸𑐟𑑅 𑐫𑐵𑐫𑐾𑐐𑐸 𑐏𑑃 𑐣𑑄 𑐄𑐎𑐷 𑐡𑐸𑐠𑑂𑐫𑐵𑑅 𑑋

𑐰𑐶𑐰𑐵𑐡𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐴𑐬𑐶𑐨𑐰𑐣𑐳𑑂𑐠𑐶𑐟 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑐸𑐮𑐵𑑄𑐐𑐸 𑐨𑐰𑐣𑐫𑐵𑐟 𑐁𑑅 𑐠𑐸𑐣𑐵 𑐕𑑂𑐰𑐫𑐾𑐐𑐸 𑐥𑐮𑐾𑐳𑐵 𑐬𑐾𑐎𑑂𑐚𑑂𑐬𑑀 𑐦𑐶𑐚𑐶𑐒 𑐫𑐵𑐣𑐵𑑅 𑐳𑐸𑐬𑐎𑑂𑐲𑐵 𑐧𑐷𑐐𑐸 𑐏𑑃 𑐣𑑄 𑐠𑐸𑐎𑐷 𑐡𑐸𑐠𑑂𑐫𑐵𑑅 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑑄 𑐣𑑄 𑐄𑐐𑐸 𑐨𑐰𑐣 𑐬𑐾𑐎𑑂𑐚𑑂𑐬𑑀 𑐦𑐶𑐚𑐶𑐒 𑐫𑐵𑐣𑐵𑑅 𑐳𑐸𑐬𑐎𑑂𑐲𑐶𑐟 𑐫𑐵 𑐢𑐎𑐵𑑅 𑐴𑐾 𑐁𑐡𑐾𑐱 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐮𑐶𑐳𑐾𑑄 𑐫𑐾𑑃 𑐩𑐣𑐥𑐵 𑑒𑑒 𑐰𑐜𑐵𑐳𑑂𑐠𑐶𑐟 𑐥𑐸𑐮𑐵𑑄𑐐𑐸 𑐣𑐐𑐬𑐥𑐵𑐮𑐶𑐎𑐵𑐫𑐵 𑐨𑐰𑐣 𑐡𑐸𑐐𑐸 𑐠𑐵𑐳𑐫𑑂 𑐁𑑅 𑐣𑐾𑐰𑐵𑑅 𑐳𑐩𑑂𑐧𑐣𑑂𑐢𑐷 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣 𑐫𑐵𑐫𑐾𑐐𑐸 𑐫𑐾𑑃 𑐡𑐾𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐕𑐾𑑃 𑐡𑐫𑐾𑐎𑐾𑐐𑐸 𑐑𑑀𑐲𑐞𑐵 𑐣𑑄 𑐄𑐎𑐷 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐫𑐾𑑃𑐫𑑂 𑐮𑑅 𑐬𑐶𑐔𑐵𑐬𑑂𑐖 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐏𑐵𑐮𑐷 𑐖𑐸𑐫𑐵𑐔𑑂𑐰𑑄𑐐𑐸 𑐳𑐬𑐎𑐵𑐬𑐷 𑐖𑐐𑑂𑐐𑐵𑐫𑑂 𑐥𑐸𑐏𑐹 𑐰 𑐥𑐸𑐣𑐬𑑂𑐨𑐬𑐞 𑐫𑐵𑐫𑐾𑐐𑐸 𑐠𑐵𑐫𑑂 𑐡𑐫𑐾𑐎𑐾𑐐𑐸, 𑐫𑐾𑑃 𑐡𑐾𑐫𑑂𑐫𑐵 𑐎𑐬𑐡𑐵𑐟𑐵𑐟𑐫𑑂𑐟 𑐩𑐣𑐥𑐵𑑄 𑐴𑐾 𑑕𑑐 𑐥𑑂𑐬𑐟𑐶𑐱𑐟 𑐡𑐵𑑄 𑐟𑐫𑐵𑑅 𑐳𑑂𑐰𑐵𑐳𑑂𑐠𑑂𑐫 𑐧𑐶𑐩𑐵 𑐫𑐵𑐣𑐵𑐧𑐷𑐐𑐸 𑐏𑑃 𑐣𑑄 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐣𑑂𑐴𑐹𑐩𑑂𑐴 𑐩𑐾𑐫𑐬 𑐳𑐵𑐴𑑄 𑐫𑐾𑑃 𑐡𑐾𑐫𑑂𑐫𑐵 𑐥𑐸𑐮𑐵𑑄𑐐𑐸 𑐣𑐵𑐬𑐵𑐫𑐵𑐟 𑐕𑐸𑑄 𑐨𑐔𑐵 𑐳𑑄𑐱𑑀𑐢𑐣 𑐫𑐵𑐣𑐵𑑅 ‘𑐳𑐵𑑄𑐳𑑂𑐎𑐺𑐟𑐶𑐎 𑐳𑐴𑐬, 𑐳𑐩𑐺𑐡𑑂𑐢 𑐩𑐴𑐵𑐣𑐐𑐬’ 𑐢𑐎𑐵𑑅 𑐟𑑅𑐐𑐸 𑐡𑐸 𑑋

‘𑐣𑐾𑐥𑐵𑐮𑐨𑐵𑐲𑐵 𑐦𑐸𑐎𑑂𑐎𑑄 𑐰𑐶𑐡𑑂𑐫𑐵𑐮𑐫𑐫𑐵𑐟 𑐏𑑅’
𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐧𑑂𑐰𑑄𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐦𑐸𑐎𑑂𑐎 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐖𑐎 𑐮𑐵𑐐𑐹 𑐖𑐸𑐫𑐵𑐔𑑂𑐰𑑄𑐐𑐸 𑐢𑐎𑐵𑑅 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩𑐫𑐵 𑐕𑐐𑐹 𑐧𑐸𑑃𑐡𑐵𑐫𑑂 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐣𑐥𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐬𑐵𑐩𑐥𑑂𑐬𑐳𑐵𑐡 𑐳𑐸𑐰𑐾𑐡𑐷𑑄 𑐀𑐠𑐾 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐳𑐵𑑄 𑐰 𑐐𑐮𑑂𑐟𑐷 𑐖𑐹𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐩𑐣𑐥𑐵𑑄 𑐳𑐵𑐩𑐸𑐡𑐵𑐫𑐶𑐎 (𑐳𑐬𑐎𑐵𑐬𑐷) 𑐰 𑐳𑑄𑐳𑑂𑐠𑐵𑐐𑐟 (𑐣𑐶𑐖𑐷) 𑐫𑐵𑐣𑐵𑑅 𑐦𑐸𑐎𑑂𑐎 𑐴𑐾 𑐳𑑂𑐎𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐴𑐾 𑐣𑐷𑐟𑐶 𑐁𑑅𑐫𑐵 𑐣𑐾𑐟𑐺𑐟𑑂𑐰𑑄 𑐣𑑄 𑐎𑐵𑑅𑐐𑐸 𑐖𑐹𑐐𑐸𑐮𑐶𑑄 𑐄𑐎𑐷 𑐳𑐸𑑄 𑐣𑑄 𑐨𑑂𑐬𑐩𑐶𑐟 𑐩𑐖𑐸𑐂𑐟 𑐣𑑄 𑐳𑐎𑐳𑐶𑐟𑑄 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS