Read news in NepalBhasa text-- www.hamroschool.com BACK 𑐳𑑂𑐰𑐣𑐶𑐐𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐀𑐟𑑂𑐫𑐵𑐔𑐵𑐬 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑑂𑐰𑐣𑐶𑐐𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐀𑐟𑑂𑐫𑐵𑐔𑐵𑐬

𑐳𑑂𑐰𑐣𑐶𑐐𑑅 𑐡𑐸𑐣𑐾𑐫𑐵 𑐠𑐷𑐠𑐷 𑐣𑐐𑐬𑑄 𑐥𑐶𑐴𑐵𑑄 𑐰𑐂𑐐𑐸 𑐦𑑀𑐴𑑀𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐕𑐐𑐹 𑐴𑐵𑐠𑑂𑐫𑐵𑐥𑐹𑐬𑑂𑐞 𑐰𑐶𑐲𑐫 𑐏𑑅 𑑋 𑐳𑑂𑐰𑐣𑐶𑐐𑐮𑑄 𑐖𑐎 𑐣𑑂𑐴𑐶 𑐎𑐬𑐶𑐧 𑑑𑑒 𑐳𑐫 𑐚𑐣 𑐦𑑀𑐴𑑀𑐬 𑐥𑐶𑐴𑐵𑑄𑐰𑐂 𑑋 𑐀𑐮𑐾 𑐀𑐖𑑂𑐫𑐵𑑅𑐐𑐸 𑐦𑑀𑐴𑑀𑐬𑐫𑐵 𑐳𑐴𑐶 𑐰𑑂𑐫𑐰𑐳𑑂𑐠𑐵𑐥𑐣 𑐩𑐖𑐹𑐳𑐵 𑐦𑑀𑐴𑑀𑐬 𑐠𑐣𑐫𑐵 𑐳𑐟𑐎𑐫𑑂 𑐡𑑂𑐰𑑄 𑐔𑐶𑐣𑐾𑐐𑐸 𑐳𑐸𑐬𑐸 𑐖𑐸𑐂 𑑋 𑐀𑐖𑑂𑐫𑐵𑑅𑐐𑐸 𑐴𑐾 𑐀𑐰𑐳𑑂𑐠𑐵 𑐠𑐸𑐐𑐸𑐳𑐷 𑐳𑑂𑐰𑐣𑐶𑐐𑑅𑐰𑐵𑐳𑐷𑐟𑐫𑑂𑐳𑑄 𑐴𑐵𑐣𑑄 𑐦𑐫𑐾𑐩𑐵𑐮 𑑋 𑐱𑐴𑐬𑐷 𑐰𑐶𑐎𑐵𑐳 𑐩𑐣𑑂𑐟𑑂𑐬𑐵𑐮𑐫, 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐣𑐵𑐥𑑄 𑐣𑐎𑑂𑐰𑐵𑑅𑐫𑐵 𑐎𑐎𑐣𑐷 𑐐𑐵𑑃𑐄𑐥𑐵𑐮𑐶𑐎𑐵𑐫𑐵 𑐳𑐶𑐳𑐜𑑀𑐮 𑐰 𑐢𑐵𑐡𑐶𑐒 𑐢𑐸𑐣𑐶𑐧𑐾𑐳𑐷𑐫𑐵 𑐧𑐘𑑂𑐔𑐬𑐾𑐜𑐵𑑃𑐜𑐵𑐫𑐵 𑐳𑐩𑑂𑐧𑐣𑑂𑐢𑐶𑐟 𑐩𑐣𑐹𑐟 𑐣𑐵𑐥 𑐳𑐴𑐩𑐟𑐶 𑐖𑐸𑐂𑐢𑐸𑑄𑐎𑐵𑑅 𑐖𑐎 𑐳𑑂𑐰𑐣𑐶𑐐𑑅𑐫𑐵 𑐳𑐟𑐎𑑄 𑐴𑐵𑐣𑑄 𑐦𑑀𑐴𑑀𑐬 𑐩𑐸𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐳𑐶𑐳𑐜𑑀𑐮 𑐰 𑐧𑐘𑑂𑐔𑐬𑐾𑐜𑐵𑑃𑐜𑐵𑐫𑐵 𑐳𑑂𑐠𑐵𑐣𑐷𑐫𑐟𑐫𑑂𑑄 𑐠𑐷𑐠𑐷 𑐩𑐵𑐐 𑐟𑐫𑐵 𑐮𑑃 𑐀𑐰𑐬𑑀𑐢 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑂𑐴𑐹𑐐𑐸 𑐢𑐵𑑅𑐳𑐵 𑐩𑐏𑐸 𑑋 𑐣𑑂𑐴𑐵𑐥𑐵 𑐮𑐶𑐥𑐵 𑐣𑑄 𑐰𑐶𑐬𑑀𑐢 𑐖𑐸𑐂, 𑐳𑐴𑐩𑐟𑐶 𑐖𑐸𑐂 𑑋 𑐀𑐠𑐾𑐏𑑅𑐳𑐵𑑄 𑐠𑐸𑐎𑐷𑐫𑐵 𑐳𑑂𑐠𑐵𑐫𑐷 𑐳𑐩𑐵𑐢𑐵𑐣 𑐩𑐵𑐮𑐾𑐐𑐸 𑐖𑑂𑐫𑐵𑐫𑑂 𑐢𑐵𑑅𑐳𑐵 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑐟 𑐎𑐩𑐖𑑀𑐬 𑐖𑐹𑐐𑐸 𑐏𑐣𑐾𑐡𑐸 𑑋 𑐣𑑂𑐴𑐵𑐥𑐵 𑐮𑐶𑐥𑐵 𑐠𑐖𑑂𑐫𑐵𑑅𑐐𑐸 𑐰𑐶𑐬𑑀𑐢 𑐖𑐸𑐂𑐐𑐸 𑐃 𑐳𑑂𑐰𑐫𑐵𑑄 𑐠𑐸𑐐𑐸𑐳𑐷𑐫𑐵 𑐀𑐰𑐬𑑀𑐢𑑄 𑐨𑐔𑐵 𑐀𑐥𑑂𑐰 𑐥𑑂𑐬𑐔𑐵𑐬 𑐖𑐹𑐐𑐸 𑐏𑐣𑐾𑐡𑐸 𑑋 𑐀𑐮𑐾 𑐀𑐖𑑂𑐫𑐵𑑅𑐐𑐸 𑐥𑑂𑐬𑐔𑐵𑐬 𑐖𑐹𑐐𑐸 𑐂𑐮𑐫𑑂 𑐡𑐎𑐮𑐫𑑂 𑐄𑐥𑑂𑐰𑑅 ‘𑐚𑐵𑐬𑑂𑐐𑐾𑐚’𑐫𑑂 𑐮𑐵𑑅𑐐𑐸 𑐏𑑅, 𑐫𑐾𑑃 𑐰 𑐳𑑂𑐰𑐣𑐶𑐐𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲 𑐣𑐶𑐳𑐾𑑄 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑑄 𑐟𑐎 𑐳𑑂𑐰𑐣𑐶𑐐𑐮𑑄 𑐳𑐶𑐳𑐜𑑀𑐮𑐫𑐵𑐟 𑐀𑐟𑑂𑐫𑐵𑐔𑐵𑐬 𑐫𑐵𑑅𑐐𑐸 𑐡𑐵𑐧𑐷 𑐫𑐵𑐟 𑑋 𑐥𑐎𑑂𑐎𑐵𑑄 𑐣𑑄 𑐦𑑀𑐴𑑀𑐬 𑐰𑐵𑐫𑐾𑐐𑐸 𑐠𑐵𑐫𑑂𑐫𑐵 𑐳𑑂𑐠𑐵𑐣𑐷𑐫 𑐰 𑐳𑐩𑑂𑐧𑐣𑑂𑐢𑐶𑐟 𑐩𑐣𑐹𑐟𑐫𑑂 𑐳𑑂𑐰𑐵𑐳𑑂𑐠𑑂𑐫 𑐣𑐶𑐳𑐾𑑄 𑐥𑐹𑐬𑑂𑐰𑐵𑐢𑐵𑐬 𑐰𑐶𑐎𑐵𑐳𑐫𑐵 𑐖𑑂𑐫𑐵 𑐩𑐵𑑅𑐐𑐸 𑐎𑐠𑑄 𑐣𑑂𑐴𑑂𑐫𑐵𑐫𑐾𑐩𑐦𑐸𑐐𑐸 𑐏𑑅 𑑋 𑐟𑐬 𑐰 𑐫𑐾𑑃 𑐰 𑐳𑑂𑐰𑐣𑐶𑐐𑑅𑐫𑐵 𑐖𑐣𑐟𑐵𑐟𑐫𑑂𑐳𑑄 𑐫𑐵𑑅𑐐𑐸 𑐀𑐟𑑂𑐫𑐵𑐔𑐵𑐬 𑐩𑐏𑐸 𑑋 𑐳𑑂𑐰𑐣𑐶𑐐𑑅𑐫𑐵 𑐨𑐹𑐩𑐶𑐂 𑐔𑑂𑐰𑐣𑐵𑑅 𑐱𑐵𑐳𑐣 𑐫𑐵𑐣𑐵𑐔𑑂𑐰𑑄𑐥𑐶𑑄𑐳𑑄 𑐫𑐵𑑅𑐐𑐸 𑐏𑑅 𑑋 𑐀𑐖𑑂𑐫𑐵𑑅𑐐𑐸 𑐱𑐵𑐳𑐣 𑐫𑐵𑐂𑐥𑐶𑐣𑐶 𑐀𑐡𑐸𑐬𑑂𑐡𑐬𑑂𑐱𑐷 𑐣𑐶𑐬𑑂𑐞𑐫𑐫𑐵 𑐮𑐶𑐔𑑂𑐰𑑅 𑐏𑑅 𑑋 𑐱𑐵𑐳𑐎𑐟𑐫𑑂 𑐀𑐬𑑂𑐎𑐩𑐣𑑂𑐫𑐟𑐵𑐫𑐵 𑐎𑐵𑐬𑐞𑑄 𑐏𑑅 𑑋 𑐄𑐎𑐷𑑄 𑐟𑐥𑑂𑐫𑑄𑐎 𑐠𑐣𑐫𑐵 𑐳𑐬𑑂𑐰𑐳𑐵𑐢𑐵𑐬𑐞𑐟𑐫𑑂𑐟 𑐡𑑂𑐰𑐥𑑄 𑐧𑐷𑐐𑐸 𑐖𑑂𑐫𑐵 𑐥𑐵𑐫𑑂𑐕𑐶𑐐𑐸 𑐏𑑃 𑐩𑐏𑐸 𑑋

𑐫𑐾𑑃, 𑐫𑐮, 𑐏𑑂𑐰𑐥 𑐰 𑐳𑐩𑐐𑑂𑐬 𑐳𑑂𑐰𑐣𑐶𑐐𑑅𑐰𑐵𑐳𑐷𑐟 𑐳𑑂𑐰𑐫𑐩 𑐮𑐵 𑐠𑑅𑐐𑐸 𑐴𑐾 𑐠𑐵𑐳𑐫𑑂 𑐔𑑂𑐰𑐣𑐵 𑐬𑐵𑐖𑑂𑐫 𑐳𑐟𑑂𑐟𑐵 𑐳𑑄𑐔𑐵𑐮𑐣 𑐫𑐵𑐣𑐵𑐔𑑂𑐰𑑄𑐥𑐶𑑄 𑐱𑐵𑐳𑐎𑐟𑐥𑐵𑐏𑐾𑑄 𑐥𑐷𑐜𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐶𑑄𑐴𑐡𑐬𑐰𑐵𑐬𑐥𑐵𑐏𑐾𑑄 𑐕𑐐𑐹 𑐮𑐶𑐥𑐵 𑐩𑐾𑐐𑐸 𑐐𑐮𑐟 𑐣𑐶𑐬𑑂𑐞𑐫 𑐫𑐵𑐣𑐵𑐔𑑂𑐰𑑄𑐐𑐸 𑐟𑐥𑑂𑐫𑑄𑐎 𑐮𑐶𑐔𑑂𑐰𑑅 𑐠𑐣𑐫𑐵 𑐳𑑂𑐠𑐵𑐣𑐷𑐫𑐟𑐫𑑂𑐟 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐣 𑐳𑐶𑐳𑐜𑑀𑐮𑐰𑐵𑐳𑐷𑐟𑐫𑑂 𑐳𑑂𑐰𑐵𑐳𑑂𑐠𑑂𑐫𑐫𑐵 𑐏𑑃 𑐰𑐮, 𑐂𑐩𑐶𑐐𑐸 𑐠𑐵𑐫𑑂𑐫𑐵 𑐳𑐸𑐢𑐵𑐬𑐫𑐵 𑐏𑑃 𑐰𑐮 𑑋 𑐠𑑂𑐰 𑐥𑐵𑐫𑑂𑐕𑐶𑐐𑐸 𑐏𑑃 𑐏𑑅 𑑋 𑐀𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵 𑐮𑑂𑐴𑑂𑐰𑐣𑐾 𑐴𑐾 𑐩𑐵𑑅, 𑐥𑐶𑐴𑐵𑑄𑐰𑐫𑐾 𑐩𑐵𑑅 𑑋 𑐀𑐮𑐾 𑐳𑐩𑐵𑐢𑐵𑐣𑐫𑐵 𑐮𑑃𑐥𑐸 𑐩𑐵𑐮𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐂𑐩𑐵𑑅 𑑋

𑐀𑐠𑐾𑐟𑐸𑑄 𑐳𑑂𑐰𑐣𑐶𑐐𑑅𑐰𑐵𑐳𑐷𑐟 𑐟𑐥𑑂𑐫𑑄𑐎 𑐦𑑀𑐴𑑀𑐬𑐫𑐵 𑐮𑑂𑐫𑐵𑐞𑑂𑐜𑐦𑐶𑐮 𑐳𑐵𑐂𑐚 𑐣𑐵𑐥𑑄 𑐩𑐡𑐸𑐳𑐵𑑄 𑐳𑑂𑐰𑐣𑐶𑐐𑑅𑐡𑐸𑐣𑐾 𑐥𑑂𑐬𑐡𑐸𑐲𑐞 𑐟𑐳𑐎𑑄 𑐐𑑂𑐫𑐵𑐣𑐵𑐥𑐸𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑂𑐰𑐣𑐶𑐐𑑅𑐫𑐵 𑐰𑐵𑐫𑐸 𑐴𑐮𑐶𑑄𑐫𑐵 𑐡𑐎𑐮𑐫𑑂 𑐥𑑂𑐬𑐡𑐸𑐲𑐶𑐟 𑐠𑐵𑐫𑑂 𑐩𑐢𑑂𑐫𑐾𑐫𑐵 𑐕𑐐𑐹 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐀𑐖𑑂𑐫𑐵𑑅𑐐𑐸 𑐥𑑂𑐬𑐡𑐸𑐲𑐞 𑐠𑐴𑐵𑑄𑐰𑐣𑐵 𑐡𑐎𑐮𑐫𑑂 𑐔𑑂𑐰𑐫𑑂 𑐠𑑂𑐫𑐣𑐵 𑐣𑑄 𑐔𑑂𑐰𑑄𑐐𑐸 𑐡𑐸 𑑋 𑐨𑐵𑐬𑐟𑐫𑐵 𑐡𑐶𑐮𑑂𑐮𑐷 𑐰 𑐮𑐏𑐣𑐄𑐮𑐫𑑂 𑐖𑐎 𑐰𑐵𑐫𑐸 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐩𑐣𑐹𑐟𑐫𑑂 𑐁𑐫𑐸 𑐗𑐶𑐡𑑃 𑐰 𑐐𑐸𑐡𑑃𑐫𑐵 𑐮𑑂𑐫𑐵𑐏𑑄 𑐩𑑂𑐴𑑀 𑐖𑐹𑐐𑐸 𑐡𑐸 𑑋 𑐱𑐶𑐎𑐵𑐐𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐄𑐬𑑂𑐖𑐵 𑐣𑐷𑐟𑐶 𑐳𑑄𑐳𑑂𑐠𑐵𑐣𑐫𑐵 𑐎𑐠𑑄 𑐩𑐣𑐹𑐟𑐫𑑂 𑐁𑐫𑐸 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐠𑐸𑐎𑐠𑑄 𑐩𑑂𑐴𑑀 𑐖𑐸𑐫𑐵𑐰𑑄𑐐𑐸 𑐏𑑅 𑑋 𑐫𑐡𑐶 𑐡𑐶𑐮𑑂𑐮𑐷 𑐰 𑐮𑐏𑐣𑐄𑐫𑐵 𑐀𑐰𑐳𑑂𑐠𑐵 𑐠𑐠𑐾 𑐡𑐸𑐳𑐵 𑐥𑐎𑑂𑐎𑐵𑑄 𑐣𑑄 𑐳𑑂𑐰𑐣𑐶𑐐𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐄𑐔𑑂𑐔 𑐥𑑂𑐬𑐡𑐸𑐲𑐞𑐫𑐵 𑐎𑐵𑐬𑐞𑑄 𑐠𑐣𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂 𑐁𑐫𑐸 𑐣𑑄 𑐳𑑂𑐰𑐟𑑂𑐟 𑐩𑑂𑐴𑑀 𑐖𑐸𑐫𑐵𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵 𑐠𑑂𑐰 𑐬𑐵𑐖𑑂𑐫 𑐳𑐟𑑂𑐟𑐵𑐥𑐵𑐏𑐾𑑄 𑐳𑑂𑐰𑐣𑐶𑐐𑑅𑐰𑐵𑐳𑐷𑐟𑐫𑑂 𑐳𑑂𑐰𑐵𑐳𑑂𑐠𑑂𑐫 𑐣𑐵𑐥 𑐫𑐵𑐣𑐵𑐔𑑂𑐰𑑄𑐐𑐸 𑐏𑐾𑐮𑐰𑐵𑐜 𑐩𑐏𑐸𑐮𑐵 ? 𑐕𑐸 𑐠𑑂𑐰 𑐳𑑂𑐰𑐵𑐣𑐶𑐐𑑅𑐰𑐵𑐳𑐷𑐟𑐫𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐀𑐟𑑂𑐫𑐵𑐔𑐵𑐬 𑐩𑐏𑐸𑐮𑐵 ?

𑐟𑑂𑐰𑑅𑐣𑐾 𑐮𑑅 𑐀𑐬𑑂𑐠𑐵𑐟 𑐏𑐵𑐣𑐾𑐥𑐵𑐣𑐷𑐫𑐵 𑐏𑑃 𑐰𑐫𑐾𑐰𑑄 𑐩𑐾𑐮𑐩𑑂𑐔𑐷𑐫𑐵 𑐏𑑃 𑐥𑐶𑐴𑐵𑑄𑐰𑐂 𑑋 𑐀𑐮𑐾 𑐀𑐣𑐫𑐵 𑐳𑑂𑐠𑐵𑐣𑐷𑐫𑐟𑐫𑑂 𑐩𑐵𑐐, 𑐳𑑂𑐠𑐵𑐣𑐷𑐫𑐟𑐫𑑂 𑐳𑐩𑐳𑑂𑐫𑐵𑐫𑐵 𑐏𑑃 𑐰𑐂 𑑋 𑐕𑐸𑑄 𑐣𑑄 𑐁𑐫𑑀𑐖𑐣𑐵, 𑐥𑐬𑐶𑐫𑑀𑐖𑐣𑐵𑐫𑑂 𑐳𑑂𑐠𑐵𑐣𑐷𑐫𑐟𑐫𑑂 𑐳𑐬𑐎𑑀𑐬 𑐡𑐂 𑑋 𑐄𑐎𑐷𑐫𑐵 𑐳𑐩𑑂𑐧𑑀𑐢𑐣 𑐫𑐵𑐫𑐾𑐐𑐸, 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐏𑑃𑐫𑑂 𑐦𑐸𑐎𑑂𑐎𑑄 𑐥𑐎𑑂𑐲 𑐳𑐎𑐵𑐬𑐵𑐟𑑂𑐩𑐎 𑐖𑐸𑐫𑐵𑑅 𑐳𑑂𑐰𑐫𑐾𑐩𑐵𑑅, 𑐫𑐵𑐫𑐾𑐩𑐵𑑅 𑑋 𑐟𑐬 𑐩𑐾𑐮𑐩𑑂𑐔𑐷𑐫𑐵 𑐮𑑅 𑐳𑑂𑐰𑐣𑐶𑐐𑐮𑐫𑑂 𑐫𑑄𑐎𑐮 𑐟𑐬 𑐀𑐣𑐫𑐵 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐩𑐖𑐸𑐮 𑐢𑐎𑐵𑑅 𑐳𑑂𑐰𑐣𑐶𑐐𑑅𑐰𑐵𑐳𑐷𑐟𑐫𑑂𑐳𑑄 𑐀𑐣𑑂𑐫𑐵𑐫 𑐫𑐵𑑅𑐐𑐸 𑐢𑐵𑐫𑐾𑐐𑐸 𑐥𑐵𑐫𑑂𑐕𑐶𑐐𑐸 𑐏𑑃 𑐢𑐵𑑅𑐳𑐵 𑐩𑐏𑐸 𑑋 𑐠𑑂𑐰 𑐴𑐵𑐣𑑄 𑐣𑑄 𑐳𑐩𑑂𑐧𑐣𑑂𑐢𑐶𑐟 𑐣𑐶𑐎𑐵𑐫, 𑐣𑐷𑐟𑐶 𑐣𑐶𑐬𑑂𑐩𑐵𑐞 𑐫𑐵𑐂𑐥𑐶𑑄 𑐀𑐮𑐾 𑐁𑐫𑑀𑐖𑐣𑐵 𑐳𑑄𑐔𑐵𑐮𑐣 𑐫𑐵𑐂𑐥𑐶𑐣𑐶 𑐎𑐩𑐖𑑀𑐬𑐷 𑐏𑑅, 𑐀𑐬𑑂𑐎𑐩𑐣𑑂𑐫𑐟𑐵 𑐏𑑅 𑑋 𑐳𑑂𑐰𑐣𑐶𑐐𑑅𑐰𑐵𑐳𑐷 𑐩𑐾𑐮𑐩𑑂𑐔𑐷𑐫𑐵 𑐖𑐣𑐵𑐟𑐫𑐵 𑐩𑐵𑐐 𑐳𑐩𑑂𑐧𑑀𑐢𑐣 𑐖𑐸𑐂𑐩𑐵𑑅 𑐢𑐫𑐵𑐐𑐸 𑐥𑐎𑑂𑐲𑐫𑑂 𑐴𑐾 𑐡𑐸 𑑋

𑐐𑐠𑐾 𑐩𑐾𑐮𑐩𑑂𑐔𑐷𑐫𑐵 𑐖𑐣𑐟𑐵 𑐀𑐣𑑂𑐫𑐵𑐫𑐫𑐵 𑐨𑐵𑐐𑐶𑐡𑐵𑐬 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐳𑑂𑐰𑐣𑐶𑐐𑑅𑐫𑐵 𑐖𑐣𑐟𑐵 𑐣𑑄 𑐮𑑅𑐫𑐵 𑐰𑐶𑐲𑐫𑐮𑐫𑑂 𑐬𑐵𑐖𑑂𑐫𑐫𑐵 𑐀𑐟𑑂𑐫𑐵𑐔𑐵𑐬𑐫𑐵 𑐳𑐵𑐩𑐵𑐣𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑂𑐰𑐣𑐶𑐐𑑅 𑐡𑐸𑐣𑐾𑐫𑐵 𑐁𑐥𑐵𑐮𑑄 𑐕𑐾𑑃𑐫𑑂 𑐮𑑅 𑐕𑑅𑐦𑐸𑐟𑐶 𑐟𑐎𑑄 𑐩𑐴𑐵𑑅𑐐𑐸 𑐰𑐬𑑂𑐲𑑁𑑄 𑐡𑐫𑐾𑐢𑐸𑑄𑐎𑐮 𑑋 𑐮𑑅 𑐰𑐂𑐐𑐸 𑐠𑐵𑐳𑐫𑑂 𑐢𑑅𑐣𑐵𑐥 𑐮𑑂𑐰𑐵𑐎𑐖𑑂𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐐𑐩𑑂𑐨𑐷𑐬 𑐳𑐩𑐳𑑂𑐫𑐵 𑐡𑐸 𑐟𑐬 𑐏𑐵𑐣𑐾𑐥𑐵𑐣𑐷 𑐳𑑄𑐳𑑂𑐠𑐵𑐣𑑄 𑐢𑐵𑑅𑐳𑐵 𑐴𑐬𑐾𑐎 𑐩𑐴𑐶𑐣𑐵 𑐥𑑂𑐬𑐟𑑂𑐾𑐫𑐎 𑐕𑐾𑑃𑐏𑐵𑑄 𑐢𑑂𑐫𑐧𑐵 𑐩𑑂𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐾𑑃𑐫𑑂 𑐮𑑅 𑐰𑐫𑐾𑐩𑐵𑑅 𑐩𑐰𑐫𑐾𑐩𑐵𑑅, 𑐟𑑂𑐰𑐣𑐾𑐧𑐴𑑅𑐐𑐸 𑐮𑑅 𑐰𑐫𑐾𑐩𑐵𑑅 𑐰𑐵 𑐢𑑅 𑐰𑐫𑐾𑐩𑐵𑑅 𑐏𑐵𑐣𑐾𑐥𑐵𑐣𑐷 𑐳𑑄𑐳𑑂𑐠𑐵𑐣𑐫𑐵𑐟 𑐩𑐟𑐮𑐧 𑐡𑐸𑐐𑐸 𑐰𑐶𑐲𑐫 𑐩𑐏𑐸 𑑋 𑐄𑐩𑐶𑐟 𑐳𑐬𑑀𑐎𑐵𑐬 𑐡𑐸𑐳𑐵 𑐎𑐾𑐰𑐮 𑐮𑐔𑑂𑐕𑐶 𑐥𑐟𑐶𑐎𑑄 𑐰𑐂𑐐𑐸 𑐨𑐸𑐎𑑂𑐟𑐵𑐣𑐷 𑐏𑑅 𑑋 𑐫𑐡𑐶 𑐬𑐳𑐶𑐡 𑐎𑐠𑑄 𑐢𑑂𑐫𑐧𑐵 𑐥𑐹𑐩𑐰𑐳𑐵𑑅 𑐮𑐶𑐥𑐵𑑄𑐣𑐶𑐳𑐾𑑄 𑐐𑐰𑐮𑐾𑑄 𑐮𑑅 𑐩𑐧𑐷𑐐𑐸 𑐏𑑂𑐫𑐵𑐔𑑂𑐰𑑅 𑐧𑐷𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑂𑐰𑐣𑐶𑐐𑑅𑐰𑐵𑐳𑐷𑐟 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐰𑐬𑑂𑐲𑑁𑑄𑐣𑐶𑐳𑐾𑑄 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐩𑐣𑐹𑐟𑐫𑑂 𑐖𑐷𑐰𑐣 𑐩𑑂𑐰𑐵𑐫𑐾𑐟 𑐩𑐵𑑅𑐐𑐸 𑐥𑐘𑑂𑐔𑐟𑐟𑑂𑐰 𑐩𑐢𑑂𑐫𑐾 𑐰𑐵𑐫𑐸 𑐰 𑐮𑑅 𑐥𑑂𑐬𑐟𑐶 𑐬𑐵𑐖𑑂𑐫𑐥𑐵𑐏𑐾𑑄 𑐠𑐖𑑂𑐫𑐵𑑅𑐐𑐸 𑐏𑐾𑐮𑐰𑐵𑐜 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑑂𑐰𑐣𑐷𑐐𑑅𑐰𑐵𑐳𑐷𑐟𑐫𑑂𑐳𑑄 𑐠𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵𑐫𑐵 𑐳𑐵𑐩𑐣𑐵 𑐫𑐵𑐣𑐵𑐔𑑂𑐰𑑄𑐐𑐸 𑐁𑐥𑐵𑐮𑑄 𑐡𑑃 𑐡𑐫𑐾𑐢𑐸𑑄𑐎𑐮 𑑋 𑐀𑐠𑐾𑐏𑑅𑐳𑐵𑑄 𑐳𑐸𑐢𑐵𑐬𑐫𑐵 𑐕𑐸𑑄 𑐮𑐎𑑂𑐲𑐞 𑐡𑐸𑐐𑐸 𑐩𑐏𑐸 𑑋 𑐀𑐗 𑐀𑐰𑑂𑐫𑐰𑐳𑑂𑐠𑐶𑐟 𑐱𑐴𑐬𑐷𑐎𑐬𑐞, 𑐳𑑂𑐰𑐣𑐶𑐐𑑅𑐡𑐸𑐣𑐾 𑐣𑑂𑐴𑐹𑐐𑐸 𑐱𑐴𑐬𑐫𑐵 𑐫𑑀𑐖𑐣𑐵, 𑐴𑐬𑐵𑐨𑐬𑐵 𑐖𑐐𑑂𑐐𑐵𑐫𑑂 𑐥𑑂𑐮𑐚𑐶𑐒, 𑐡𑐸𑐐𑐸 𑐐𑐸𑑃 𑐀𑐮𑐾 𑐥𑐴𑐵𑐜𑐫𑐵 𑐰𑐣 𑐰𑐶𑐣𑐵𑐱 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐱𑐴𑐬𑐫𑐵 𑐮𑑅, 𑐢𑑅, 𑐥𑑂𑐬𑐡𑐸𑐲𑐞 𑐣𑐶𑐫𑐣𑑂𑐟𑑂𑐬𑐞 𑐧𑐵𑐬𑐾 𑐢𑐵𑑅𑐳𑐵 𑐕𑐸𑑄 𑐫𑑀𑐖𑐣𑐵 𑐡𑐸𑐐𑐸 𑐩𑐏𑐸 𑑋 𑐠𑐸𑐎𑐷𑐫𑐵 𑐥𑑂𑐬𑐟𑑂𑐫𑐎𑑂𑐲 𑐮𑐶𑐔𑑂𑐰𑑅 𑐠𑐣𑐫𑐵 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂 𑐖𑐷𑐰𑐣𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐐𑐠𑐾 𑐠𑑁𑑄 𑐳𑐶𑐳𑐜𑑀𑐮, 𑐧𑐘𑑂𑐔𑐬𑐾𑐜𑐵𑑃𑐜𑐵 𑐣𑐶𑐳𑐾𑑄 𑐩𑐾𑐮𑐩𑑂𑐔𑐷 𑐟𑐎𑐫𑐵 𑐖𑐣𑐟𑐵𑐫𑐵𑐟 𑐖𑐸𑐫𑐵𑐔𑑂𑐰𑑄𑐐𑐸 𑐀𑐟𑑂𑐫𑐵𑐔𑐵𑐬𑐫𑐵 𑐏𑑃 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐖𑑂𑐫𑐵𑑅𑐐𑐸 𑐴𑐾 𑐀𑐟𑑂𑐫𑐵𑐔𑐵𑐬 𑐰𑐬𑑂𑐲𑑁𑑄𑐣𑐶𑐳𑐾𑑄 𑐳𑑂𑐰𑐣𑐶𑐐𑑅𑐰𑐵𑐳𑐷𑐟𑐫𑑂𑐳𑑄 𑐦𑐫𑐾𑐩𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐠𑐾 𑐳𑐶𑐳𑐜𑑀𑐮𑐫𑐵 𑐳𑐩𑐳𑑂𑐫𑐵 𑐖𑑂𑐫𑑄𑐎𑐾𑐐𑐸 𑐎𑐸𑐟𑑅 𑐖𑐸𑐂𑐩𑐵𑑅, 𑐧𑐘𑑂𑐔𑐬𑐾𑐜𑐵𑑃𑐜𑐵𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐖𑐸𑐂𑐩𑐵𑑅, 𑐩𑐾𑐮𑐩𑑂𑐔𑐷𑐫𑐵 𑐥𑐹𑐬𑑂𑐰𑐵𑐢𑐵𑐬 𑐰𑐶𑐎𑐵𑐳 𑐖𑐸𑐂𑐩𑐵𑑅 𑐀𑐠𑐾𑐟𑐸𑑄 𑐳𑑂𑐰𑐣𑐶𑐐𑑅𑐫𑐵 𑐣𑑄 𑐄𑐔𑐶𑐟 𑐟𑐰𑐬𑑄 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐖𑐸𑐂𑐩𑐵𑑅 𑑋 𑐣𑑂𑐴𑑂𑐫𑐵𑐠𑐵𑐫𑑂 𑐔𑑂𑐰𑐥𑐶𑑄 𑐩𑐣𑐹𑐟 𑐖𑐹𑐳𑐵𑑄 𑐳𑑂𑐰𑐔𑑂𑐕, 𑐳𑐦𑐵 𑐰 𑐧𑐵𑑄𑐮𑐵𑐐𑐸 𑐮𑐎𑐳𑐫𑑂 𑐩𑑂𑐰𑐵𑐫𑐾 𑐡𑐂𑐐𑐸 𑐩𑐣𑐹𑐟𑐫𑑂 𑐩𑐵𑐣𑐰 𑐀𑐢𑐶𑐎𑐵𑐬 𑐏𑑅 𑑋 𑐄𑐎𑐶𑑄 𑐳𑐶𑐳𑐜𑑀𑐮 𑐣𑐶𑐳𑐾𑑄 𑐩𑐾𑐮𑐩𑑂𑐔𑐷 𑐟𑐎 𑐀𑐮𑐾 𑐧𑐘𑑂𑐔𑐬𑐾𑐜𑐵𑑃𑐜𑐵 𑐣𑐶𑐳𑐾𑑄 𑐳𑑂𑐰𑐣𑐶𑐐𑑅 𑐟𑐎 𑐥𑑂𑐬𑐟𑑂𑐫𑐾𑐎 𑐠𑐵𑐫𑑂𑐫𑐵 𑐄𑐔𑐶𑐟 𑐰𑑂𑐫𑐰𑐳𑑂𑐠𑐵𑐥𑐣 𑐖𑐸𑐂𑐩𑐵𑑅 𑑋 𑐴𑐬𑐾𑐎 𑐠𑐵𑐳𑐫𑑂 𑐬𑐵𑐖𑑂𑐫𑐥𑐵𑐏𑐾𑑄 𑐫𑐵𑐣𑐵𑐔𑑂𑐰𑑄𑐐𑐸 𑐏𑐾𑐮𑐰𑐵𑐜 𑐰 𑐀𑐟𑑂𑐫𑐵𑐔𑐵𑐬𑐟 𑐧𑐣𑑂𑐡 𑐖𑐸𑐂𑐩𑐵𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS