Read news in NepalBhasa text-- www.hamroschool.com BACK 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐎𑑂𑐰𑐔𑐵𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐎𑑂𑐰𑐔𑐵𑐮

𑐫𑐾𑑃- 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵 𑐎𑐔𑐵𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑑂𑐫𑐵𑑅𑐐𑐸 𑐧𑐵𑑅𑐕𑐶𑐫𑑄𑐎𑑄𑐫𑐵 𑐁𑐢𑐵𑐬𑐨𑐹𑐟 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐎𑑂𑐰𑐔𑐵𑐮 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐶𑐱𑐾𑐲 𑐐𑑂𑐰𑐵𑐴𑐵𑐮𑐶𑐂 𑐳𑑄𑐔𑐵𑐮𑐣 𑐖𑐹𑐐𑐸 𑐄𑐐𑐸 𑐥𑐟𑑂𑐬𑐎𑐵𑐬𑐶𑐟𑐵 𑐟𑐵𑐮𑐶𑐩 𑐰𑑄𑐐𑐸 𑐖𑐾𑐛 𑑑𑑕 𑐐𑐟𑐾𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐡𑐧𑐹𑐫𑐵 𑐫𑐾𑑃 𑐖𑐶𑐮𑑂𑐮𑐵 𑐎𑐔𑐵𑐫𑐵 𑐣𑐵𑐫𑑅 𑐀𑐬𑑂𑐰𑐶𑐣𑑂𑐡𑑂𑐬𑐩𑐵𑐣 𑐳𑐶𑑄𑐴𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐄𑐟𑑂𑐠𑐵𑐣 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐄𑐥𑐵𑐢𑑂𑐫𑐎𑑂𑐲 𑐐𑑀𑐎𑐸𑐮𑐥𑑂𑐬𑐳𑐵𑐡 𑐑𑐬𑑂𑐟𑐷𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐟 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐶𑐳𑐾𑑄 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐂𑐩𑐵𑐣𑑂𑐡𑐵𑐬𑐶𑐟𑐵𑐫𑐵 𑐁𑐰𑐱𑑂𑐫𑐎𑐟𑐵 𑐖𑐹𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐳𑑄𑐰𑐶𑐢𑐵𑐣𑑄 𑐧𑐶𑐫𑐵𑐟𑑅𑐐𑐸 𑐀𑐢𑐶𑐎𑐵𑐬𑐫𑐵𑐟 𑐥𑐟𑑂𑐬𑐎𑐵𑐬𑐶𑐟𑐵𑐥𑐵𑐏𑐾𑑄 𑐖𑐣𑐟𑐵𑐫𑐵𑐟 𑐳𑐸𑐳𑐹𑐔𑐶𑐟 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐳𑐾𑑄 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐩𑐡𑐶𑐎𑑂𑐎𑑂 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐐𑐾𑐮𑑂𑐖𑐾 𑐮𑐵𑐩𑐵 𑐱𑐾𑐬𑑂𑐥𑐵𑑄 𑐥𑐟𑑂𑐬𑐎𑐵𑐬𑐟𑐫𑑂𑐳𑑄 𑐂𑐩𑐵𑐣𑑂𑐡𑐵𑐬 𑐖𑐸𑐫𑐵𑑅 𑐥𑐟𑑂𑐬𑐎𑐵𑐬𑐶𑐟𑐵 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋
𑐟𑐵𑐮𑐶𑐩𑐫𑐵 𑐩𑐸𑐏𑑂𑐫 𑐥𑑂𑐬𑐱𑐶𑐎𑑂𑐲𑐎 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳 𑐣𑑂𑐴𑐶𑐥𑑁𑐫𑐵 𑐳𑐩𑑂𑐥𑐵𑐡𑐎 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑑄 𑐟𑐵𑐮𑐶𑐩𑐥𑐵𑐏𑐾𑑄 𑐥𑑂𑐬𑐵𑐥𑑂𑐟 𑐖𑑂𑐘𑐵𑐣𑐫𑐵𑐟 𑐁𑑅 𑐰𑑂𑐫𑐰𑐴𑐵𑐬𑐫𑑂 𑐣𑑄 𑐕𑑂𑐫𑐮𑐾𑐟 𑐂𑐣𑐵𑐥 𑐫𑐵𑐳𑐾𑑄 𑐟𑐵𑐮𑐶𑐩 𑐎𑑂𑐰𑐔𑐵𑑅𑐳𑐵𑑄 𑐥𑐟𑑂𑐬𑐎𑐵𑐬𑐶𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐱𑐸𑐬𑐸 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷 𑐳𑐸𑐣𑐶𑐟𑐵 𑐟𑐸𑐮𑐵𑐢𑐬 𑐱𑐶𑐮𑑂𑐥𑐎𑐵𑐬𑑄 𑐟𑐵𑐮𑐶𑐩𑐫𑐵 𑐀𑐣𑐸𑐨𑐰𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐟𑐵𑐮𑐶𑐩𑐫𑑂 𑐩𑐸𑐏𑑂𑐫 𑐥𑑂𑐬𑐱𑐶𑐎𑑂𑐲𑐎 𑐩𑐵𑐣𑐣𑑂𑐢𑐬𑑄 𑐳𑐩𑐵𑐔𑐵𑐬, 𑐣𑐵𑐐𑐬𑐶𑐎 𑐥𑐟𑑂𑐬𑐎𑐵𑐬𑐶𑐟𑐵, 𑐥𑐟𑑂𑐬𑐎𑐵𑐬 𑐁𑐔𑐵𑐬𑐳𑑄𑐴𑐶𑐟𑐵, 𑐦𑐶𑐔𑐬 𑐮𑐾𑐏 𑐔𑑂𑐰𑐫𑐾𑐐𑐸 𑐰𑐶𑐲𑐫𑐫𑑂 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐦𑑀𑐚𑑀 𑐩𑐣𑑀𑐖𑐬𑐟𑑂𑐣 𑐱𑐵𑐴𑐷𑑄 𑐦𑑀𑐚𑑀 𑐥𑐟𑑂𑐬𑐎𑐵𑐬𑐶𑐟𑐵, 𑐎𑐾𑐥𑐷 𑐝𑐸𑑄𑐐𑐵𑐣𑐵𑑄 𑐀𑐣𑐮𑐵𑐂𑐣 𑐥𑐟𑑂𑐬𑐎𑐵𑐬𑐶𑐟𑐵, 𑐱𑑀𑐨𑐵 𑐩𑐴𑐬𑑂𑐖𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐀𑐨𑐶𑐩𑐸𑐏𑐷𑐎𑐬𑐞, 𑐰𑐾𑐡 𑐬𑐵𑐣𑐵𑑄 𑐨𑐵𑐲𑐵 𑐱𑐸𑐡𑑂𑐢𑐶𑐎𑐬𑐞, 𑐥𑑂𑐬𑐩𑐶𑐮𑐵 𑐩𑐵𑐣𑐣𑑂𑐢𑐬𑑄 𑐧𑐵𑐮 𑐳𑐬𑑀𑐎𑐵𑐬𑐫𑐵 𑐰𑐶𑐲𑐫𑐫𑑂 𑐟𑐵𑐮𑐶𑐩 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐐𑑂𑐰𑐳𑐵𑑅 𑐏𑐮𑑅𑐥𑐵𑐏𑐾𑑄 𑐣𑐵𑐫𑑅 𑐳𑐶𑑄𑐴 𑐥𑑂𑐬𑐱𑐶𑐎𑑂𑐲𑐎𑐟𑐫𑑂𑐟 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐥𑐵𑐏𑐾𑑄 𑐣𑑄 𑐥𑑂𑐬𑐱𑐶𑐎𑑂𑐲𑐎 𑐰 𑐐𑑂𑐰𑐳𑐵𑑅 𑐏𑐮𑑅𑐫𑐵𑐟 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐟𑐵𑐮𑐶𑐩𑐫𑐵 𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐟 𑐳𑑂𑐰𑐫𑐩𑑂𑐨𑐹𑐫 𑐳𑑂𑐠𑐮𑐐𑐟 𑐨𑑂𑐬𑐩𑐞 𑐣𑑄 𑐫𑐵𑐎𑐹𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS