Read news in NepalBhasa text-- www.hamroschool.com BACK 𑐡𑐾𑐫𑑂 𑐡𑐧𑐹𑐫𑐵𑐟 𑐣𑐾𑐰𑐵𑑅 𑐀𑐢𑐶𑐎𑐵𑐬 𑐳𑐶𑐬𑐥𑐵𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐡𑐾𑐫𑑂 𑐡𑐧𑐹𑐫𑐵𑐟 𑐣𑐾𑐰𑐵𑑅 𑐀𑐢𑐶𑐎𑐵𑐬 𑐳𑐶𑐬𑐥𑐵𑑅

𑐫𑐾𑑃-  𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵𑐟 𑐁𑐂𑐟𑐰𑐵𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐠𑐸𑐐𑐸 𑐡𑑃𑐫𑐵 𑐣𑐾𑐰𑐵𑑅 𑐀𑐢𑐶𑐎𑐵𑐬 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐟 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐮𑐶𑐳𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐡𑐾𑐫𑑂 𑐡𑐧𑐹𑐥𑐵𑐏𑐾𑑄 𑐳𑐶𑐬𑐥𑐵𑑅 𑐎𑐫𑐵 𑐠𑐾𑑄 𑐣𑐾𑐰𑐵𑑅𑐟𑐫𑑂 𑐨𑐵𑐲𑐵, 𑐖𑐵𑐟𑐶𑐫𑐵 𑐏𑑂𑐫𑐮𑐫𑑂 𑐣𑑂𑐴𑑂𑐫𑐠𑐣𑐾𑐧𑐴𑑅𑐐𑐸 𑐖𑑂𑐫𑐵 𑐫𑐵𑐣𑐵𑑅 𑐎𑑂𑐫𑐣𑐵 𑐧𑐶𑐮 𑐢𑐵𑑅𑐳𑐵 𑐠𑐸𑐎𑐶𑑄 𑐳𑐶𑐬𑐥𑐵𑑅 𑐣𑑄 𑐳𑐵𑐬𑑂𑐠𑐎 𑐖𑐸𑐂𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑑅 𑐎𑐫𑐵𑐡𑐶𑐳𑐾𑑄 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑐶𑐬𑐥𑐵𑑅 𑐠𑐩𑑂𑐴𑑄 𑐐𑑂𑐬𑐴𑐞 𑐫𑐵𑐣𑐵𑑅 𑐎𑐫𑐵𑐔𑑂𑐰𑐣𑐵𑐐𑐸 𑐏𑑅𑐳𑐵𑑄 𑐠𑐸𑐎𑐶𑐫𑐵 𑐱𑑂𑐬𑐫 𑐢𑐂𑐐𑐸 𑐠𑑅 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐫𑐵𑐥𑐶𑑄 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅𑐥𑐶𑑄𑐟 𑐧𑐷𑐩𑐵𑑅𑐐𑐸 𑐰 𑐰𑐫𑑂𑐎𑑅𑐥𑐶𑑄𑐳𑑄 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐫𑐵 𑐎𑐡𑐬 𑐎𑐠𑑄 𑐴𑐾 𑐠𑑂𑐰 𑐳𑐶𑐬𑐥𑐵𑑅 𑐡𑐾𑐫𑑂 𑐡𑐧𑐹𑐫𑐵𑐟 𑐮𑐵𑑅𑐐𑐸 𑐏𑑅 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶 𑐮𑐶𑐳𑐾𑑄 𑐣𑐾𑐰𑐵𑑅 𑐀𑐢𑐶𑐎𑐵𑐬 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵 𑐜𑐵. 𑐩𑐴𑐾𑐱𑐩𑐵𑐣 𑐱𑑂𑐬𑐾𑐲𑑂𑐛𑑄 𑐣𑐾𑐰𑐵𑑅 𑐀𑐢𑐶𑐎𑐵𑐬 𑐔𑐹𑐮𑐵𑐎𑐾𑐐𑐸 𑐁𑐣𑑂𑐡𑑀𑐮𑐣𑐫𑐵 𑐗𑑂𑐰𑐮𑐫𑑂 𑐫𑑀𑐐𑐡𑐵𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐰𑑂𑐫𑐎𑑂𑐟𑐶 𑐰 𑐳𑑄𑐳𑑂𑐠𑐵𑐫𑐵𑐟 𑐧𑐷𑐐𑐸 𑐮𑑂𑐫𑐵𑐏𑑄 𑐠𑑂𑐰 𑐳𑐶𑐬𑐥𑐵𑑅 𑐣𑐷𑐳𑑂𑐰𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑑂𑐫𑐖𑑂𑐫𑐵 𑐥𑐸𑐔𑑅𑐫𑐵 𑐎𑐖𑐶 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐰𑑄𑐐𑐸 𑑒𑑗 𑐡𑑃 𑐣𑑂𑐴𑑂𑐫𑑅 𑐣𑐷𑐳𑑂𑐰𑑄𑐐𑐸 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐸𑐮𑐶𑑄 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵 𑐮𑐵𑐐𑐶𑑄 𑐟𑑅𑐖𑐶𑐎 𑐁𑐣𑑂𑐡𑑀𑐮𑐣 𑐫𑐵𑑅𑐐𑐸 𑐰 𑐡𑐾𑐱𑐫𑑂 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐫𑐵𑐟 𑐳𑐩𑐵𑐰𑐾𑐱𑐷 𑐡𑐫𑐾𑐎𑐾𑐐𑐸 𑐀𑐨𑐶𑐫𑐵𑐣𑐫𑑂 𑐣𑑄 𑐟𑑅𑐖𑐶𑐎 𑐥𑐮𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐠𑑂𑐰 𑐳𑑄𑐳𑑂𑐠𑐵𑑄 𑐫𑐵𑐣𑐵 𑐰𑑅𑐐𑐸 𑐠𑐸𑐥𑐶𑑄 𑐖𑑂𑐫𑐵𑐏𑑃𑐫𑐵 𑐎𑐡𑐬 𑐫𑐵𑐳𑐾𑑄 𑐠𑐸𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐀𑐢𑐶𑐎𑐵𑐬 𑐳𑐶𑐬𑐥𑐵𑑅 𑐳𑐩𑐶𑐟𑐶𑐫𑐵 𑐡𑐸𑐖𑑅 𑐱𑐵𑐎𑑂𑐫 𑐳𑐸𑐬𑐾𑐣𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑐩𑐶𑐟𑐶𑐫𑐵 𑐐𑑂𑐰𑐵𑐴𑐵𑐮𑐶 𑐥𑐸𑐔𑑅𑐫𑐵 𑐡𑐸𑐖𑑅 𑐜𑐵. 𑐩𑐣𑑀𑐖𑐩𑐵𑐣 𑐱𑑂𑐬𑐾𑐲𑑂𑐛𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵 𑐩𑐫𑑂𑐖𑐸 𑐩𑑀𑐴𑐶𑐣𑐷 𑐱𑑂𑐬𑐾𑐲𑑂𑐛𑑄 𑐡𑐾𑐫𑑂 𑐡𑐧𑐹𑐫𑐵𑐟 𑐳𑐶𑐬𑐥𑐵𑑅 𑐎𑐠𑑄 𑐣𑑂𑐫𑐫𑑂𑐡𑑂𑐰𑑅 (𑑕𑑐 𑐴𑐖𑐵𑐬) 𑐟𑐎𑐵 𑐡𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐩𑐸𑑃𑐖𑑂𑐫𑐵𑐫𑑂 𑐧𑑂𑐰𑐟𑐶 𑐎𑐵𑑅 𑐗𑐵𑑅𑐥𑐶𑑄 𑐠𑐷𑐠𑐷 𑐖𑐶𑐮𑑂𑐮𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑐣𑐶 𑐣𑑄 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS