Read news in NepalBhasa text-- www.hamroschool.com BACK 𑐠𑑁𑑄 𑐡𑐾𑐫𑑂𑐣𑑂𑐫𑑄𑐎𑑄 𑐩𑐟𑐡𑐵𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐠𑑁𑑄 𑐡𑐾𑐫𑑂𑐣𑑂𑐫𑑄𑐎𑑄 𑐩𑐟𑐡𑐵𑐣

𑐫𑐾𑑃 – 𑐡𑐾𑐫𑑂𑐣𑑂𑐫𑑄𑐎𑑄 𑐠𑑁𑑄 𑐕𑐣𑑂𑐴𑐸𑑄 𑐴𑐾 𑐳𑑂𑐠𑐵𑐣𑐷𑐫 𑐣𑐶𑐬𑑂𑐰𑐵𑐔𑐣𑐫𑐵 𑐮𑐵𑐐𑐶𑑄 𑐩𑐟𑐡𑐵𑐣 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋 𑐠𑑁𑑄 𑐳𑐸𑐠𑐫𑑂 𑑗 𑐧𑐖𑐾𑐣𑐶𑐳𑐾𑑄 𑐳𑐣𑐶𑐮𑐫𑑂 𑑕 𑐧𑐖𑐾 𑐟𑐎 𑐩𑐟𑐡𑐵𑐣 𑐖𑐸𑐂𑐐𑐸 𑐏𑑃 𑐣𑐶𑐬𑑂𑐰𑐵𑐔𑐣 𑐁𑐫𑑀𑐐𑑄 𑐢𑐵𑑅𑐐𑐸 𑐡𑐸 𑑋 𑐠𑑁𑑄 𑐖𑐸𑐂𑐐𑐸 𑐩𑐟𑐡𑐵𑐣𑐫𑐵 𑐮𑐵𑐐𑐶𑑄 𑐩𑐟𑐡𑐵𑐟𑐵 𑐥𑐬𑐶𑐔𑐫𑐥𑐟𑑂𑐬 𑐩𑐡𑐸𑐳𑐵 𑐣𑐵𑐐𑐬𑐶𑐎𑐟𑐵 𑐰𑐵 𑐠𑑅𑐐𑐸 𑐥𑐬𑐶𑐔𑐫 𑐏𑐸𑐮𑐾 𑐖𑐸𑐂𑐐𑐸 𑐣𑑂𑐴𑑂𑐫𑐵𑐐𑐸 𑐨𑑂𑐰𑑄 𑐡𑐸𑐳𑐵𑑄 𑐣𑑄 𑐩𑐟 𑐎𑐸𑐬𑑂𑐎𑐾 𑐧𑐷𑐐𑐸 𑐏𑑃 𑐣𑑄 𑐁𑐫𑑀𑐐𑑄 𑐢𑐵𑑅𑐐𑐸 𑐡𑐸 𑑋

𑐠𑑁𑑄 𑐩𑐟𑐡𑐵𑐣 𑐫𑐵𑐂𑐐𑐸 𑐖𑐹𑐐𑐸𑐮𑐶𑑄 𑐩𑑂𑐴𑐶𑐐𑑅 𑐰 𑐩𑑂𑐴𑐷𑐐 𑐳𑐸𑐣𑐵𑑄 𑐐𑐣𑑄 𑐣𑑄 𑐩𑐟 𑐦𑑂𑐰𑐣𑐾 𑐩𑐡𑐂 𑐎𑐠𑑄 𑐩𑑁𑐣 𑐀𑐰𑐢𑐶 𑐟𑑀𑐎𑐾 𑐫𑐵𑐣𑐵𑐴𑑅𑐐𑐸 𑐏𑑅 𑑋 𑐟𑐬 𑐩𑑂𑐴𑐶𑐐𑑅 𑐣𑑄 𑐄𑐩𑑂𑐩𑐾𑐡𑐰𑐵𑐬𑐟 𑐢𑐵𑑅𑐳𑐵 𑐠𑐷𑐠𑐷 𑐠𑐵𑐳𑐫𑑂 𑐰𑐣𑐵𑑅 𑐩𑐣𑐹 𑐣𑐵𑐥𑐮𑐵𑐫𑐾𑐐𑐸 𑐖𑑂𑐫𑐵𑐫𑑂 𑐰𑑂𑐫𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐏𑐵𑐳 𑐫𑐵𑐣𑐵𑑅 𑐩𑑂𑐴𑐶𑐐𑑅 𑐰𑑂𑐫𑐎𑑂𑐟𑐶𑐐𑐟 𑐬𑐸𑐥𑑄 𑐦𑑀𑐣 𑐫𑐵𑐣𑐵𑑅 𑐨𑑀𑐚 𑐦𑑂𑐰𑐣𑐾𑐐𑐸 𑐖𑑂𑐫𑐵 𑐟𑐷𑐰𑑂𑐬 𑐖𑐹𑐐𑐸 𑐡𑐸 𑑋

𑐔𑐶𑐟𑐰𑐣𑐫𑑂 𑐩𑐵𑐌𑐰𑐵𑐡𑐷 𑐀𑐢𑑂𑐫𑐎𑑂𑐲 𑐥𑐸𑐲𑑂𑐥 𑐎𑐩𑐮 𑐡𑐵𑐴𑐵𑐮𑑄 𑐩𑑁𑐣 𑐀𑐰𑐢𑐶𑐫𑐵 𑐂𑐮𑐫𑑂 𑐣𑑄 𑐩𑐣𑐹 𑐣𑐵𑐥𑐮𑐵𑐣𑐵𑑅 𑐩𑐟𑐡𑐵𑐟𑐵 𑐥𑑂𑐬𑐨𑐵𑐰𑐶𑐟 𑐫𑐵𑐣𑐵𑐔𑑂𑐰𑐣 𑐢𑐵𑐳𑐾𑑄 𑐊𑐩𑐵𑐮𑐾𑑄 𑐰𑐶𑐬𑑀𑐢 𑐫𑐵𑑅𑐐𑐸 𑐡𑐸 𑑋 𑐊𑐩𑐵𑐮𑐾𑑄 𑐐𑐛𑐧𑐣𑑂𑐢𑐣𑐫𑐵 𑐄𑐩𑑂𑐩𑐾𑐡𑐰𑐵𑐬𑐷 𑐴𑐾 𑐏𑐵𑐬𑐾𑐖 𑐫𑐵𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐡𑐸 𑑋 𑐔𑐶𑐟𑐰𑐣𑐫𑑂 𑐎𑐵𑑄𑐐𑑂𑐬𑐾𑐳𑐫𑐵 𑐧𑐵𑐐𑐷 𑐄𑐩𑑂𑐩𑐾𑐡𑐰𑐵𑐬𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐟 𑐢𑐵𑐳𑐾𑑄 𑐩𑑂𑐴𑐶𑐐𑑅 𑐥𑐵𑐬𑑂𑐚𑐷𑑄 𑐣𑑂𑐫𑐵𑐩𑑂𑐴 𑐎𑐵𑐬𑑂𑐫𑐎𑐬𑑂𑐟𑐵𑐫𑐵𑐟 𑐳𑐵𑐢𑐵𑐬𑐞 𑐳𑐡𑐳𑑂𑐫𑐟𑐵 𑐟𑐎𑑄 𑐩𑐡𑐂 𑐎𑐠𑑄 𑐎𑐵𑐬𑐰𑐵𑐴𑐷 𑐫𑐵𑑅𑐐𑐸 𑐡𑐸 𑑋

𑐩𑐾𑐏𑐾 𑐖𑐣𑐎𑐥𑐸𑐬𑐫𑑂 𑐩𑐟𑐡𑐵𑐟𑐵𑐫𑐵𑐟 𑐢𑑂𑐫𑐧𑐵 𑐂𑐣𑐵𑑅 𑐥𑑂𑐬𑐨𑐵𑐰𑐶𑐟 𑐫𑐵𑐣𑐵𑐔𑑂𑐰𑐣 𑐢𑐵𑐳𑐾𑑄 𑐊𑐩𑐵𑐮𑐾 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐩𑐸𑐳𑑂𑐮𑐶𑐩 𑐁𑐫𑑀𑐐𑐫𑐵 𑐀𑐢𑑂𑐫𑐎𑑂𑐲 𑐳𑐩𑐶𑐩 𑐀𑐣𑑂𑐳𑐵𑐬𑐷𑐫𑐵𑐟 𑐑𑐾𑐬𑐵𑐄 𑐫𑐵𑑅𑐐𑐸 𑐡𑐸 𑑋 𑐀𑐣𑐫𑐵 𑐳𑐷𑐟𑐵𑐱𑐬𑐞 𑐴𑑀𑐚𑐮𑐫𑑂 𑐔𑑂𑐰𑐣𑐵𑐔𑑂𑐰𑑄𑐩𑑂𑐴 𑐀𑐣𑑂𑐳𑐵𑐬𑐷𑐫𑐵𑐟 𑐑𑐾𑐬𑐵𑐄 𑐫𑐵𑐫𑐾𑐰𑑄 𑐰𑐫𑑂𑐎𑑅𑐫𑐵𑐟 𑐧𑐔𑐾 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐥𑑂𑐬𑐴𑐬𑐷 𑐳𑐩𑐾𑐟 𑐰𑐫𑐾𑐩𑐵𑑅𑐐𑐸 𑐏𑑅𑐳𑐵 𑐮𑐶𑐥𑐵 𑐥𑑂𑐬𑐴𑐬𑐷𑑄 𑐴𑐾 𑐧𑐔𑐾 𑐫𑐵𑐣𑐵𑑅 𑐫𑐾𑑃𑐫𑑂 𑐰𑐫𑐾𑐟 𑐰𑐶𑐩𑐵𑐣𑐳𑑂𑐠𑐮 𑐟𑐎 𑐟𑑂𑐰𑑅𑐟𑐹𑐐𑐸 𑐡𑐸 𑑋 𑐩𑑁𑐣 𑐀𑐰𑐢𑐶𑐫𑐵 𑐂𑐮𑐫𑑂 𑐩𑐟𑐡𑐵𑐟𑐵 𑐥𑑂𑐬𑐨𑐵𑐰𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣 𑐢𑐂𑐐𑐸 𑐑𑐚𑐣𑐵 𑐩𑐾𑐠𑐵𑐫𑑂 𑐣𑑄 𑐖𑐹𑐐𑐸 𑐏𑐧𑐬 𑐰𑑅𑐐𑐸 𑐡𑐸 𑑋

𑐫𑐾𑑃𑐫𑑂 𑐢𑐵𑑅𑐳𑐵 𑐐𑐸𑐮𑐶𑑄 𑐄𑐩𑑂𑐩𑐾𑐡𑐰𑐵𑐬𑐟 𑐩𑑂𑐴𑐶𑐐𑑅 𑐠𑐷𑐠𑐷 𑐡𑑂𑐫𑑅𑐫𑐵 𑐡𑐬𑑂𑐱𑐣 𑐫𑐵𑐫𑐾𑐟 𑐰𑑄𑐐𑐸 𑐏𑐣𑐾 𑐡𑐟𑐳𑐵 𑐐𑐸𑐮𑐶𑑄 𑐠𑑅𑐠𑐶𑐟𑐶𑐫𑐵 𑐕𑐾𑑃𑐫𑑂 𑐰𑐣𑐵𑐔𑑂𑐰𑑄𑐐𑐸 𑐣𑑄 𑐮𑐹𑐐𑐸 𑐡𑐸 𑑋 𑐠𑑁𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾 𑐖𑐎 𑑓𑑖𑑓 𑐐𑐹 𑐩𑐟𑐡𑐵𑐣𑐳𑑂𑐠𑐮𑐫𑑂 𑐩𑐟 𑐎𑐸𑐬𑑂𑐎𑐾𑐐𑐸 𑐖𑑂𑐫𑐵 𑐖𑐸𑐂 𑑋

𑐫𑐾𑑃𑐫𑑂 𑐢𑐵𑑅𑐳𑐵 𑐩𑐟𑐡𑐵𑐣 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐁𑐥𑐵𑐮𑑄 𑐩𑐣𑐹𑐟 𑐥𑐶𑐴𑐵𑑄 𑐰𑑄𑐐𑐸 𑐎𑐵𑐬𑐞𑑄 𑐳𑐟𑐎 𑐳𑐸𑐣𑐳𑐵𑐣 𑐖𑐸𑐫𑐵𑑅 𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐳𑑄 𑐬𑐵𑐴𑐟 𑐩𑐴𑐳𑐸𑐳 𑐫𑐵𑑅𑐐𑐸 𑐡𑐸 𑑋 𑐔𑐸𑐣𑐵𑐰𑐫𑐵 𑐮𑐵𑐐𑐶𑑄 𑐮𑐏𑑁𑑄 𑐥𑐶𑐴𑐵𑑄 𑐰𑑄𑐐𑐸 𑐀𑐣𑐸𑐩𑐵𑐣 𑐫𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS