Read news in NepalBhasa text-- www.hamroschool.com BACK 𑐫𑐾𑑃𑐫𑑂 𑑘𑑒𑑖 𑐩𑑂𑐴 𑐥𑑂𑐬𑐟𑑂𑐫𑐵𑐱𑐷 𑐔𑐸𑐣𑐵𑐰𑐷 𑐩𑐿𑐡𑐵𑐣𑐫𑑂 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐾𑑃𑐫𑑂 𑑘𑑒𑑖 𑐩𑑂𑐴 𑐥𑑂𑐬𑐟𑑂𑐫𑐵𑐱𑐷 𑐔𑐸𑐣𑐵𑐰𑐷 𑐩𑐿𑐡𑐵𑐣𑐫𑑂

𑐫𑐾𑑃- 𑐡𑐾𑐱𑐫𑑂 𑐳𑑂𑐰𑑄𑐐𑐹 𑐟𑐴𑐫𑐵 𑐳𑐬𑐎𑐵𑐬 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐰𑐫𑐾𑐢𑐸𑑄𑐎𑐵𑑅 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐣𑑂𑐴𑐹𑐐𑐸 𑐣𑐾𑐟𑐺𑐟𑑂𑐰𑐫𑐵 𑐣𑐶𑑄𑐟𑐶𑑄 𑐣𑐶𑐎𑑂𑐰𑑅𑐏𑐸𑐳𑐷 𑐎𑐣𑑂𑐴𑐫𑑂 𑐧𑐿𑐱𑐵𑐏 𑑓𑑐 𑐐𑐟𑐾 𑐔𑐸𑐣𑐵𑐰 𑐖𑐹 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐔𑐸𑐣𑐵𑐰𑐫𑐵𑐟 𑐳𑑄𑐑𑐷𑐫𑐟𑐵 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐕𑐐𑐹 𑐔𑐬𑐞 𑐳𑐦𑐮𑐟𑐵𑐥𑐹𑐬𑑂𑐰𑐎 𑐎𑑂𑐰𑐔𑐵𑑅𑐐𑐸𑐎𑐠𑑄 𑐣𑑄 𑐎𑐫𑐵𑐟𑑅𑐐𑐸 𑐡𑐸 𑑋

𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑑗𑑕𑑓 𑐐𑐹 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐣𑑂𑐴𑐹𑐐𑐸 𑐣𑐾𑐟𑐺𑐟𑑂𑐰𑐫𑐵 𑐣𑐶𑑄𑐟𑐶𑑄 𑐎𑐣𑑂𑐴𑐫𑑂 𑐣𑐶𑐬𑑂𑐰𑐵𑐔𑐣 𑐖𑐹 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐏𑐸𑐐𑐹 𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑑑𑑑 𑐐𑐹 𑐄𑐥𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑑒𑑗𑑖 𑐐𑐹 𑐣𑐐𑐬𑐥𑐵𑐮𑐶𑐎𑐵 𑐰 𑑔𑑖𑑐 𑐐𑐹 𑐐𑐵𑐄𑑃𑐥𑐵𑐮𑐶𑐎𑐵 𑐫𑐵𑐣𑐵𑑅 𑑗𑑕𑑓 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐣𑑂𑐴𑐹𑐐𑐸 𑐣𑐾𑐟𑐺𑐟𑑂𑐰𑐫𑐵 𑐣𑐶𑑄𑐟𑐶𑑄 𑐔𑐸𑐣𑐵𑐰 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋

𑐳𑑂𑐠𑐵𑐣𑐷𑐫 𑐣𑐶𑐬𑑂𑐰𑐵𑐔𑐣𑐫𑑂 𑐩𑐸𑐏𑑂𑐫 𑐁𑐎𑐬𑑂𑐲𑐞𑐫𑐵 𑐎𑐾𑐣𑑂𑐡𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐳𑑄𑐑𑐷𑐫 𑐬𑐵𑐖𑐢𑐵𑐣𑐷 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐥𑑂𑐬𑐩𑐸𑐏, 𑐄𑐥𑐥𑑂𑐬𑐩𑐸𑐏 𑐰 𑑓𑑒 𑐐𑐹 𑐰𑐜𑐵𑐫𑑂 𑐰𑐜𑐵𑐀𑐢𑑂𑐫𑐎𑑂𑐲, 𑐏𑐸𑐮𑑂𑐮𑐵 𑐡𑐸𑐖𑑅, 𑐩𑐶𑐳𑐵 𑐡𑐸𑐖𑑅 𑐰 𑐡𑐮𑐶𑐟 𑐩𑐶𑐳𑐵 𑐡𑐸𑐖𑑅 𑐫𑐵𑐣𑐵𑑅 𑑑𑑖𑑒 𑐐𑐹 𑐥𑐡𑐫𑐵 𑐣𑐶𑑄𑑄𑐟𑐶𑑄 𑐔𑐸𑐣𑐵𑐰 𑐖𑐸𑐂 𑑋 𑐠𑑂𑐰 𑐡𑐎𑑂𑐰𑑄 𑐥𑐡𑐫𑐵 𑐣𑐶𑑄𑐟𑐶𑑄 𑐬𑐵𑐖𑐣𑐷𑐟𑐶𑐎 𑐡𑐮 𑐰 𑐳𑑂𑐰𑐟𑐣𑑂𑐟𑑂𑐬 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑘𑑒𑑖 𑐩𑑂𑐴 𑐥𑑂𑐬𑐟𑑂𑐫𑐵𑐱𑐷 𑐔𑐸𑐣𑐵𑐰𑐷 𑐩𑐿𑐡𑐵𑐣𑐫𑑂 𑐎𑐸𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐫𑐵 𑐥𑑂𑐬𑐩𑐸𑐏 𑐥𑐡𑐫𑐵 𑐣𑐶𑑄𑐟𑐶𑑄 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐬𑐵𑐖𑐣𑐷𑐟𑐶𑐎 𑐡𑐮, 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐩𑐫𑐵𑑅𑐐𑐸 𑐬𑐵𑐖𑐣𑐷𑐟𑐶𑐎 𑐡𑐮 𑐰 𑐳𑑂𑐰𑐟𑐣𑑂𑐟𑑂𑐬 𑐫𑐵𑐣𑐵𑑅 𑑕𑑕 𑐩𑑂𑐴𑐾𑐳𑐶𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐠𑐸𑐎𑐷 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐡𑐮𑐥𑐵𑐏𑐾𑑄 𑐳𑑂𑐰𑐩𑑂𑐴, 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐩𑐖𑐹𑐐𑐸 𑐡𑐮𑐥𑐵𑐏𑐾𑑄 𑑑𑑗 𑐩𑑂𑐴 𑐰 𑐳𑑂𑐰𑐟𑐣𑑂𑐟𑑂𑐬 𑑓𑑕 𑐩𑑂𑐴𑐾𑐳𑐶𑐫𑐵 𑐄𑐩𑑂𑐩𑐾𑐡𑐰𑐵𑐬𑐷 𑐮𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐄𑐥𑐥𑑂𑐬𑐩𑐸𑐏 𑐥𑐡𑐫𑑂 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐬𑐵𑐖𑐣𑐷𑐟𑐶𑐎 𑐡𑐮𑐥𑐵𑐏𑐾𑑄 𑐣𑐶𑐩𑑂𑐴, 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐩𑐫𑐵𑑅𑐐𑐸 𑐡𑐮𑐥𑐵𑐏𑐾𑑄 𑐐𑐸𑐩𑑂𑐴 𑐰 𑐳𑑂𑐰𑐟𑐣𑑂𑐟𑑂𑐬 𑑑𑑙 𑐩𑑂𑐴 𑐫𑐵𑐣𑐵𑑅 𑑓𑑐 𑐩𑑂𑐴𑐾𑐳𑐶𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐫𑐵𑐟𑑅𑐐𑐸 𑐡𑐸 𑑋

𑐠𑐸𑐎𑐠 𑐴𑐾 𑐕𑐐𑐹 𑐰𑐜𑐵𑐫𑑂 𑐰𑐜𑐵𑐀𑐢𑑂𑐫𑐎𑑂𑐲, 𑐩𑐶𑐳𑐵 𑐳𑐡𑐳𑑂𑐫, 𑐡𑐮𑐶𑐟 𑐩𑐶𑐳𑐵 𑐳𑐡𑐳𑑂𑐫 𑐰 𑐣𑐶𑐩𑑂𑐴 𑐏𑐸𑐮𑑂𑐮𑐵 𑐳𑐡𑐳𑑂𑐫 𑐫𑐵𑐣𑐵𑑅 𑐣𑑂𑐫𑐵𑐩𑑂𑐴 𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐐𑐸 𑐥𑑂𑐬𑐵𑐰𑐢𑐵𑐣 𑐡𑐸 𑑋 𑐠𑑂𑐰 𑐮𑑂𑐫𑐵𑐏𑑄 𑐫𑐾𑑃 𑐩𑐴𑐵𑐣𑐐𑐬𑐫𑐵 𑑓𑑒 𑐐𑐹 𑐰𑐜𑐵𑐫𑑂 𑑑𑑖𑑐 𑐥𑐡𑐫𑐵 𑐣𑐶𑑄𑐟𑐶𑑄 𑐣𑐶𑐬𑑂𑐰𑐵𑐔𑐣 𑐖𑐸𑐂 𑑋 𑑓𑑒 𑐐𑐸𑐮𑐶𑑄 𑐰𑐜𑐵𑐫𑐵 𑐣𑐶𑑄𑐟𑐶𑑄 𑑗𑑔𑑑 𑐩𑑂𑐴𑐾𑐳𑐶𑐫𑐵 𑐄𑐩𑑂𑐩𑐾𑐡𑐰𑐵𑐬𑐷 𑐮𑐵𑐣𑐵𑐔𑑂𑐰𑑄𑐐𑐸 𑐩𑐸𑐏𑑂𑐫 𑐣𑐶𑐬𑑂𑐰𑐵𑐔𑐣 𑐀𑐢𑐶𑐎𑐺𑐟𑐫𑐵 𑐖𑑂𑐫𑐵𑐎𑐹 𑐫𑐾𑑃𑐫𑑂 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐄𑐐𑐸 𑐖𑑂𑐫𑐵𑐎𑐸𑐠𑐶𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷𑐎𑐠𑑄 𑐰𑐜𑐵𑐫𑐵 𑐣𑐶𑑄𑐟𑐶𑑄 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐡𑐮𑐥𑐵𑐏𑐾𑑄 𑑕𑑐𑑖, 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐩𑐫𑐵𑑅𑐐𑐸 𑐡𑐮𑐥𑐵𑐏𑐾𑑄 𑑑𑑗𑑗 𑐰 𑐳𑑂𑐰𑐟𑐣𑑂𑐟𑑂𑐬 𑑕𑑘 𑐩𑑂𑐴𑐾𑐳𑐶𑐫𑐵 𑐄𑐩𑑂𑐩𑐾𑐡𑐰𑐵𑐬𑐷 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐫𑐾𑑃𑐫𑑂 𑐣𑐶𑐬𑑂𑐰𑐵𑐔𑐣 𑐀𑐢𑐶𑐎𑐺𑐟𑐫𑐵 𑐖𑑂𑐫𑐵𑐎𑐹𑐫𑐵𑐎𑐠𑑄 𑐰𑐜𑐵𑐀𑐢𑑂𑐫𑐎𑑂𑐲𑐫𑑂 𑑒𑑑𑑐, 𑐳𑐡𑐳𑑂𑐫𑐫𑑂 𑑒𑑙𑑘, 𑐩𑐶𑐳𑐵 𑐳𑐡𑐳𑑂𑐫𑐫𑑂 𑑑𑑔𑑕 𑐰 𑐡𑐮𑐶𑐟 𑐩𑐶𑐳𑐵 𑐳𑐡𑐳𑑂𑐫𑐫𑑂 𑑘𑑘 𑐩𑑂𑐴𑐾𑐳𑐶𑐫𑐵 𑐄𑐩𑑂𑐩𑐾𑐡𑐰𑐵𑐬𑐷 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐄𑐎𑐷𑐩𑐢𑑂𑐫𑐾 𑑒𑑔 𑐰 𑑒𑑕 𑐰𑐜𑐵𑐫𑑂 𑐡𑐮𑐶𑐟 𑐩𑐶𑐳𑐵 𑐳𑐡𑐳𑑂𑐫 𑐥𑐡𑐫𑐵 𑐣𑐶𑑄𑐟𑐶𑑄 𑐳𑐸𑐣𑐵𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐩𑐡𑐸 𑑋 𑐀𑐠𑐾 𑐴𑐾 𑐥𑑂𑐫𑑄𑐐𑐹 𑐰𑐜𑐵𑐫𑑂 𑐡𑐮𑐶𑐟 𑐩𑐶𑐳𑐵 𑐳𑐡𑐳𑑂𑐫𑐫𑐵 𑐣𑐶𑑄𑐟𑐶𑑄 𑐕𑐩𑑂𑐴 𑐕𑐩𑑂𑐴𑐾𑐳𑐶𑐫𑐵 𑐖𑐎 𑐄𑐩𑑂𑐩𑐾𑐡𑐰𑐵𑐬𑐷 𑐮𑐵𑑅𑐐𑐸𑐮𑐶𑑄 𑐣𑐶𑐬𑑂𑐰𑐶𑐬𑑀𑐢 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐡𑐮𑐶𑐟 𑐩𑐶𑐳𑐵 𑐳𑐡𑐳𑑂𑐫𑐫𑑂 𑐣𑐶𑐬𑑂𑐰𑐵𑐔𑐟 𑐖𑐹𑐐𑐸𑐮𑐶𑐂 𑑑𑑘, 𑑒𑑒, 𑑒𑑓 𑐰 𑑒𑑗 𑐰𑐜𑐵 𑐏𑑅 𑑋 𑐠𑐸𑐎𑐷 𑐊𑐩𑐵𑐮𑐾𑐫𑐵 𑐳𑑂𑐰𑐩𑑂𑐴 𑐰 𑐎𑐵𑑄𑐐𑐾𑑂𑐬𑐳𑐫𑐵 𑐕𑐩𑑂𑐴 𑐣𑐶𑐬𑑂𑐰𑐶𑐬𑑀𑐢 𑐖𑐹𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐫𑐵 𑑓𑑒 𑐐𑐹 𑐰𑐜𑐵𑐩𑐢𑑂𑐫𑐾 𑐡𑐎𑐮𑐫𑑂 𑐀𑐥𑑂𑐰𑑅 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐰𑐜𑐵 𑑑𑑕 𑐏𑑅 𑑋 𑐠𑐣 𑐰𑐜𑐵𑐀𑐢𑑂𑐫𑐎𑑂𑐲, 𑐳𑐡𑐳𑑂𑐫, 𑐡𑐮𑐶𑐟 𑐩𑐶𑐳𑐵 𑐳𑐡𑐳𑑂𑐫 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑓𑑓 𑐩𑑂𑐴𑐾𑐳𑐶𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐀𑐠𑐾 𑐴𑐾 𑐡𑐎𑐮𑐫𑑂 𑐩𑑂𑐴𑑀 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐰𑐜𑐵 𑑑𑑓 𑐏𑑅 𑑋 𑑑𑑓 𑐰𑐜𑐵𑐫𑑂 𑐡𑐎𑑂𑐰𑑄 𑐥𑐡𑐫𑐵 𑐣𑐶𑑄𑐟𑐶𑑄 𑐩𑐸𑐎𑑂𑐎𑑄 𑑑𑑓 𑐩𑑂𑐴𑐾𑐳𑐶𑐣𑑄 𑐖𑐎 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑑑𑑕 𑐰𑐜𑐵 𑐮𑐶𑐥𑐵 𑐡𑐎𑐮𑐫𑑂 𑐀𑐥𑑂𑐰𑑅 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐰𑐜𑐵 𑑗 𑐰 𑑓𑑑 𑐏𑑅 𑐠𑐣 𑑓𑑑÷𑑓𑑑 𑐩𑑂𑐴𑐾𑐳𑐶𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑑑𑑗 𑐰 𑑒𑑙 𑐰𑐜𑐵𑐫𑑂 𑑒𑑘÷𑑒𑑘 𑐩𑑂𑐴𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐠𑐸𑐎𑐠𑑄 𑐴𑐾 𑐩𑑂𑐴𑑀 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐄𑐐𑐸 𑐰𑐜𑐵𑐫𑐵 𑐢𑐮𑐏𑐫𑑂 𑐣𑐶𑐐𑐹𑐐𑐸 𑐠𑐵𑐳𑐫𑑂 𑑒𑑓 𑐰𑐜𑐵 𑐏𑑅 𑑋 𑐠𑐣 𑐩𑐸𑐎𑑂𑐎𑑄 𑑑𑑖 𑐩𑑂𑐴𑐾𑐳𑐶𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐰𑐜𑐵 𑑒𑑑 𑐰 𑑒𑑒 𑐫𑑂 𑐣𑐷𑐣𑐶𑐩𑑂𑐴, 𑐣𑐷𑐣𑐶𑐩𑑂𑐴𑐾𑐳𑐶𑐣𑑄 𑐄𑐩𑑂𑐩𑐾𑐡𑐰𑐵𑐬𑐷 𑐧𑐶𑐫𑐵𑐟𑑅𑐐𑐸 𑐡𑐸 𑑋

𑐫𑐾𑑃𑑃 𑐩𑐴𑐵𑐐𑐬𑐫𑑂 𑐩𑐸𑐎𑑂𑐎𑑄 𑐳𑑂𑐰𑑄𑐐𑐹 𑐮𑐏𑑄 𑑒𑑔𑑒 𑐩𑑂𑐴 𑐩𑐟𑐡𑐵𑐟𑐵 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS