Read news in NepalBhasa text-- www.hamroschool.com BACK 𑐖𑐣𑐟𑐵 𑐴𑑀𑐱𑐶𑐫𑐵𑐬 𑐖𑐸𑐂𑐩𑐵𑑅 ! – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐖𑐣𑐟𑐵 𑐴𑑀𑐱𑐶𑐫𑐵𑐬 𑐖𑐸𑐂𑐩𑐵𑑅 !

𑐡𑐾𑐱𑐫𑑂 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋 𑐔𑐸𑐣𑐵𑐰𑐫𑑂 𑐧𑑂𑐰𑐟𑐶 𑐎𑐵𑐂𑐥𑐶𑑄 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂 𑐧𑐵𑐬𑐾 𑐀𑐣𑐾𑐎 𑐡𑐺𑐲𑑂𑐚𑐶𑐎𑑀𑐞𑑄 𑐰𑐶𑐱𑑂𑐮𑐾𑐲𑐞 𑐩𑐹𑐮𑑂𑐫𑐵𑑄𑐎𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐵𑐖𑐣𑐷𑐟𑐶𑐎 𑐰𑐶𑐱𑑂𑐮𑐾𑐲𑐎, 𑐥𑐟𑑂𑐬𑐎𑐵𑐬, 𑐰𑐶𑐨𑐶𑐣𑑂𑐣 𑐳𑑄𑐔𑐵𑐬 𑐩𑐵𑐢𑑂𑐫𑐩𑐟𑐫𑑂𑐳𑑄 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐔𑐶𑐬𑐦𑐵𑐬 𑐫𑐵𑐣𑐵𑑅 𑐂𑐩𑐶𑐐𑐸 𑐳𑑂𑐠𑐶𑐟𑐶 𑐧𑐵𑐬𑐾 𑐖𑑅 𑐴𑑂𑐰𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐸𑐣𑐵𑐰𑐫𑐵 𑐂𑐮𑐫𑑂 𑐨𑑀𑐚 𑐎𑐸𑐬𑑂𑐎𑐷𑐥𑐶𑑄 𑐩𑐟𑐡𑐵𑐟𑐵𑐟𑐫𑑂𑐟 𑐰𑐶𑐰𑐶𑐢 𑐳𑑂𑐬𑑀𑐟𑑄 𑐰𑐂𑐐𑐸 𑐰𑐶𑐱𑑂𑐮𑐾𑐲𑐞, 𑐔𑐶𑐬𑐦𑐵𑐬𑑄 𑐠𑑅𑐐𑐸 𑐩𑐟 𑐣𑐶𑐬𑑂𑐩𑐵𑐞, 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐮𑐵𑐐𑐶 𑐐𑑂𑐰𑐵𑐴𑐵𑐮𑐶 𑐫𑐵𑐂 𑑋 𑐳𑐔𑐾𑐟 𑐫𑐵𑐂 𑑋

𑐠𑐸𑐐𑐸𑐳𑐷 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰 𑐰𑐶𑐱𑐾𑐲 𑐰 𑐀𑐳𑐵𑐩𑐵𑐣𑑂𑐫 𑐏𑑄𑐎𑐵𑑅 𑐕𑐠𑑂𑐰𑑅 𑐬𑐵𑐖𑐣𑐷𑐟𑐶𑐎 𑐩𑐣𑑀𑐔𑐶𑐎𑐶𑐟𑑂𑐳𑐎𑐟𑐫𑑂𑐳𑑄 𑐴𑐵𑐮 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐎𑐾 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐀𑐳𑐵𑐩𑐵𑐣𑑂𑐫 𑐩𑐣𑑀𑐰𑐶𑐖𑑂𑐘𑐵𑐣𑐫𑐵 𑐩𑐣𑑀𑐰𑐶𑐱𑑂𑐮𑐾𑐲𑐞 𑐫𑐵𑐫𑐾𑐐𑐸 𑐎𑑂𑐰𑑅𑐕𑐶𑐄𑐐𑐸 𑐡𑐸 𑑋 𑐥𑐶𑐣𑐾𑑄 𑐥𑐶𑐣𑐾𑑄 𑐳𑑂𑐰𑐫𑐾𑐧𑐮𑐫𑑂 𑐣𑐾𑐥𑐵𑑅𑐫𑐵 𑐥𑑂𑐬𑐩𑐸𑐏 𑐡𑐮𑐟𑐫𑑂𑐎𑐾 𑐐𑐵𑐎𑑂𑐎𑑄 𑐦𑐸𑐟𑐶𑐦𑐵𑐬𑑂𑐟𑐶 𑐏𑐣𑐾𑐡𑐂 𑑋 ‘𑐖𑐶𑐩𑐶𑐐𑐸 𑐡𑐮 𑐋𑐟𑐶𑐴𑐵𑐳𑐶𑐎 𑐥𑐵𑐬𑑂𑐚𑐷 𑑋 𑐥𑑂𑐬𑐖𑐵𑐟𑐣𑑂𑐟𑑂𑐬𑐫𑐵 𑐳𑑄𑐰𑐵𑐴𑐎’ 𑐕𑐐𑐹 𑐥𑐵𑐬𑑂𑐚𑐷𑑄 𑐣𑐶𑐬𑐣𑑂𑐟𑐬 𑐧𑐎𑐧𑐎 𑐫𑐵𑐣𑐵𑐔𑑂𑐰𑐣𑐷 𑑋 𑐩𑐾𑐐𑐸 𑐥𑐵𑐬𑑂𑐚𑐷𑑄 ‘𑐖𑐶𑐥𑐶𑑄 𑐩𑐴𑐵𑐣𑑂 𑐎𑑂𑐬𑐵𑐣𑑂𑐟𑐶𑐎𑐵𑐬𑐷 𑐡𑐮, 𑐖𑐣𑐁𑐣𑑂𑐡𑑀𑐮𑐣𑐫𑐵 𑐩𑐸𑐴𑐵𑐣’ 𑐩𑐡𑐶𑐎𑑂𑐎 𑐴𑐵𑐮𑐵𑐔𑑂𑐰𑐣𑐷 𑑋

𑐀𑐠𑐾 𑐴𑐾 𑐕𑐐𑐹 𑐣𑐶𑐐𑐹 𑐥𑐵𑐬𑑂𑐚𑐷𑑄 𑐡𑐾𑐱𑐫𑑂 𑐰𑐶𑐎𑐵𑐳, 𑐳𑐩𑐺𑐡𑑂𑐢𑐶 𑐴𑐫𑐵𑐐𑐸 𑐖𑐶𑐩𑐶𑐳𑑄 𑐏𑑅 𑐡𑐵𑐰𑐵 𑐫𑐵𑐣𑐵𑑅 𑐔𑐵𑐣𑑂𑐴𑐶𑑄 𑐐𑑄 𑐠𑐵𑐣𑐵𑐔𑑂𑐰𑐣𑐷 𑑋 𑐐𑐸𑐮𑐶𑑄 𑐡𑐮𑐟𑐫𑑂𑐳𑑄 𑐠𑑅𑐐𑐸 𑐴𑐾 𑐳𑐸𑐬𑐫𑑂 𑐨𑐸𑐣𑐸𑐨𑐸𑐣𑐸 𑐴𑐵𑐮𑐵𑐔𑑂𑐰𑐣𑐷 𑑋 𑐖𑐣𑐟𑐵𑑄 𑐣𑑂𑐫𑑄𑐳𑐵𑑄 𑐩𑐣𑑂𑐫𑑄𑐳𑐵𑑄 𑑋 𑐠𑑅𑐐𑐸 𑐴𑐵𑐰𑐵𑐡𑐵𑐬𑐷 𑐧𑐫𑐵𑐣 𑐟𑑂𑐰𑑅𑐟𑐵 𑐔𑑂𑐰𑐣𑐷 𑑋 𑐥𑐶𑐣𑐾𑑄 𑐥𑐶𑐣𑐾𑑄 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐳𑑄 𑐠𑑅𑐠𑑅𑐐𑐸 𑐴𑐵𑐄𑐨𑐵𑐄 𑐫𑐵𑐣𑐵𑑅 𑐳𑑄𑐰𑐵𑐡𑐟 𑐟𑑂𑐰𑑅𑐟𑐵𑑅 𑐖𑐣𑐟𑐵𑐫𑐵𑐟 𑐥𑑂𑐬𑐨𑐵𑐰𑐶𑐟 𑐫𑐵𑐫𑐾𑐟 𑐳𑑂𑐰𑐫𑐵𑐔𑑂𑐰𑐣𑐷 𑑋 𑐳𑐩𑐬𑑂𑐠𑐣 𑐎𑐵𑐫𑐾𑐟 𑐳𑑂𑐰𑐫𑐵𑐔𑑂𑐰𑐣𑐷 𑑋 𑐦𑐳𑐾 𑐫𑐵𑐫𑐾𑐟 𑐳𑑂𑐰𑐫𑐵𑐔𑑂𑐰𑐣𑐷 𑑋

𑐟𑐬 𑑋 𑐩𑐣𑐹𑐟 𑐥𑐶𑐣𑐾𑑄 𑐥𑐶𑐣𑐾𑑄 𑐕𑐸 𑐏𑐣𑐾 𑐡𑐂 𑑋 𑐰 𑐴𑐾 𑐳𑐎𑑂𑐎𑐮 𑐩𑐏𑐸 𑑋 𑐖𑐸𑐂𑐩𑐏𑐸 𑑋 𑐩𑐣𑐹𑐫𑐵 𑐳𑐎𑑂𑐎𑐮 𑐳𑐷𑐎𑐾𑐐𑐸 𑐏𑑅𑐳𑐵 𑐥𑐶𑐣𑐾𑐫𑐵 𑐳𑑂𑐰𑐬𑐸𑐥 𑐏𑑃𑐐𑑂𑐰𑑅 𑐖𑐎 𑐳𑑂𑐰𑐫𑐵𑑄, 𑐣𑑂𑐫𑐣𑐵𑑄 𑐩𑐐𑐵𑑅 𑑋 𑐰𑐫𑐵 𑐡𑐸𑐣𑐾𑐫𑐵 𑐩𑐣𑐳𑑂𑐠𑐶𑐟𑐶 𑐣𑑄 𑐳𑐷𑐎𑐾𑐩𑐵𑑅 𑑋 𑐡𑐸𑐣𑐾 𑐣𑐸𑐐𑐮𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐩𑐣𑑀𑐟𑐬𑑄𑐐𑐫𑐵𑐟 𑐣𑑄 𑐮𑐵𑐫𑐾 𑐦𑐫𑐾𑐎𑐾𑐩𑐵𑑅 𑑋 𑐀𑐮𑐾 𑐖𑐎 𑐰 𑐩𑐣𑐹 𑐳𑐸 𑐏𑑅 ? 𑐩𑑂𑐴𑐳𑐷𑐎𑐾 𑐦𑐂 𑑋 𑐥𑑂𑐬𑐳𑐶𑐡𑑂𑐢 𑐀𑑄𑐐𑐾𑑂𑐬𑐖𑐷 𑐣𑐵𑐚𑐎𑐎𑐵𑐬 𑐰𑐶𑐮𑐶𑐫𑐩 𑐱𑐾𑐎𑑂𑐳𑐥𑐶𑐫𑐬𑑄 𑐕𑐐𑐹 𑐣𑐵𑐚𑐎𑐫𑐵 𑐳𑑄𑐰𑐵𑐡𑐫𑐵 𑐗𑑂𑐰𑐮𑐫𑑂 𑐢𑐵𑐂, ‘𑐕𑐩𑑂𑐴 𑐏𑐮𑐣𑐵𑐫𑐎 𑐥𑐶𑐣𑐾𑑄 𑐣𑑂𑐴𑐶𑐮𑐷 𑑋 𑐰 𑐣𑑂𑐴𑐶𑐮𑐵 𑐥𑐶𑐖𑑂𑐰𑐫𑐾𑐎𑐵 𑐔𑑂𑐰𑐣𑐷 𑑋 𑐟𑐬 𑐰 𑐡𑐸𑐣𑐾𑑄 𑐏𑐮𑐣𑐵𑐫𑐎 𑐴𑐾 𑐖𑐸𑐂 𑑋 𑐖𑐸𑐫𑐵𑐔𑑂𑐰𑐣𑐷 𑑋 𑐥𑐶𑐣𑐾𑐫𑐵 𑐁𑐰𑐬𑐞𑑄 𑐡𑐸𑐣𑐾𑐫𑐵 𑐩𑐣𑐹𑐫𑐵 𑐔𑐬𑐶𑐟𑑂𑐬 𑐎𑑂𑐫𑐣𑐷 𑐩𑐏𑐸 𑑋 𑐱𑐾𑐎𑑂𑐳𑐥𑐶𑐫𑐬𑐫𑐵 𑐢𑐵𑐥𑐹𑐫𑐵 𑐁𑐳𑐫 𑐏𑑅 𑑋 𑐩𑐣𑑀𑐔𑐶𑐎𑐶𑐟𑑂𑐳𑐎𑐟𑐫𑑂𑐳𑑄 𑐮𑐵 𑐩𑐣𑐹𑐫𑐵 𑐳𑐩𑑂𑐥𑐹𑐬𑑂𑐞 𑐐𑐟𑐶𑐰𑐶𑐢𑐶 𑐔𑐵𑐫𑐾𑐎 𑐩𑐔𑐵𑐫𑐾𑐎𑑄 𑐰𑐫𑐵 𑐁𑐣𑑂𑐟𑐬𑐶𑐎 𑐩𑐣𑑀𑐎𑐵𑐬𑐞𑑄 𑐣𑐶𑐬𑑂𑐞𑐵𑐫𑐎 𑐨𑐹𑐩𑐶𑐎𑐵 𑐩𑑂𑐴𑐶𑐟𑐷𑐐𑐸 𑐏𑑃𑐫𑐵𑐟 𑐄𑐮𑐵 𑐎𑑂𑐫𑐣𑐷 𑑋

𑐡𑐾𑐱𑐫𑑂 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐎𑐾 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐰𑐶𑐔𑐶𑐟𑑂𑐬 𑐳𑑂𑐰𑐨𑐵𑐰, 𑐬𑐴𑐳𑑂𑐫𑐥𑐹𑐬𑑂𑐞 𑐐𑐟𑐶𑐰𑐶𑐢𑐶 𑐳𑑂𑐰𑐫𑐵𑑅, 𑐏𑐣𑐵𑑅 𑐬𑐵𑐖𑐣𑐷𑐟𑐶𑐎 𑐩𑐣𑑀𑐔𑐶𑐎𑐶𑐟𑑂𑐳𑐎𑐟𑐳𑐾𑑄 𑐠𑐸𑐩𑐶𑐟 𑐂𑐮𑐫𑑂 𑐴𑐾 𑐳𑐟𑐬𑑂𑐎 𑐫𑐵𑐫𑐾𑐩𑐵𑑅𑐐𑐸, 𑐄𑐥𑐔𑐵𑐬𑐥𑐵𑐏𑐾 𑐳𑐔𑐾𑐟 𑐫𑐵𑐫𑐾𑐩𑐵𑑅𑐐𑐸 𑐰𑐵𑑅 𑐔𑐵𑐫𑐾𑐎𑐷 𑑋 𑐡𑐮𑐟 𑐠𑑁𑑄 𑐥𑐷𑐜𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐩𑐣𑑀𑐬𑑀𑐐𑐫𑐵 𑐐𑐩𑑂𑐨𑐶𑐬 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐂𑐮𑐫𑑂 𑐴𑐾 𑐄𑐥𑐔𑐵𑐬 𑐩𑐫𑐵𑑅𑐳𑐵 𑐳𑑂𑐰𑐫𑑄 𑐡𑐮𑐟 𑐖𑐎 𑐰𑐶𑐣𑐵𑐳 𑐖𑐸𑐂𑐐𑐸 𑐩𑐏𑐸, 𑐳𑐩𑑂𑐥𑐹𑐬𑑂𑐞 𑐖𑐣𑐟𑐵𑑄 𑐴𑐾 𑐡𑐸𑑅𑐏 𑐳𑐷 𑑋 𑐩𑐣𑑀𑐔𑐶𑐎𑐶𑐟𑑂𑐳𑐎𑐟𑐳𑐾𑑄 𑐛𑐴𑐬 𑐫𑐵𑐂 𑑋 𑐔𑐾𑐟𑐵𑐰𑐣𑐷 𑐧𑐷 𑑋

𑐬𑐵𑐖𑐣𑐷𑐟𑐶𑐎 𑐩𑐣𑑀𑐔𑐶𑐎𑐶—𑐟𑑂𑐳𑐎𑐟𑐳𑐾𑑄 𑐠𑑅𑐐𑐸 𑐀𑐢𑑂𑐫𑐫𑐣 𑐰𑐶𑐱𑑂𑐮𑐾𑐲𑐞𑐫𑐵 𑐥𑑂𑐬𑐟𑐶𑐰𑐾𑐡𑐣𑐫𑑂 𑐢𑐵𑐂, ‘𑐠𑑁𑑄 𑐡𑐾𑐫𑑂𑐫𑐵 𑐥𑑂𑐬𑐩𑐸𑐏 𑐬𑐵𑐖𑐣𑐷𑐟𑐶𑐎 𑐡𑐮𑐟 𑐠𑑅𑐐𑐸 𑐀𑐳𑑂𑐟𑐶𑐟𑑂𑐰𑐫𑐵 𑐔𑐶𑐣𑑂𑐟𑐵, 𑐳𑑄𑐎𑐚𑑄 𑐐𑑂𑐬𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑅 𑐳𑐶𑐂𑐣, 𑐦𑐸𑐂𑐣 𑐢𑐂𑐐𑐸 𑐱𑑄𑐎𑐵, 𑐨𑐫𑑄 𑐂𑐥𑐶𑑄 𑐔𑐵𑐣𑑂𑐴𑐶 𑐨𑐫𑐨𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐶𑐣𑐾𑑄 𑐥𑐶𑐣𑐾𑑄 𑐟𑐟𑑅𑐢𑑄𑐐𑐸 𑐏𑑃 𑐮𑑂𑐴𑐵𑐣𑐵𑑅 𑐖𑐣𑐟𑐵𑐫𑐵𑐟 𑐢𑐵𑐎𑐢𑐎𑑂𑐎𑐸 𑐟𑑂𑐰𑑅𑐟𑐹𑐳𑐵𑑄 𑐡𑐮𑐟𑐫𑑂 𑐩𑐣𑑀𑐧𑐮 𑐟𑐳𑐎𑑄 𑐎𑐩𑐖𑑀𑐬 𑐖𑐸𑐂𑐢𑐸𑑄𑐎𑐮 𑑋’ 𑐄𑐎𑐶𑑄 𑐡𑐮𑐟𑐫𑑂𑐳𑑄 𑐩𑑂𑐰𑐵𑐫𑐾𑐫𑐵 𑐮𑐵𑐐𑐶𑑄 𑐳𑐵𑐳𑑅 𑐠𑐵𑐩𑐾 𑐫𑐵𑐫𑐾𑐫𑐵 𑐮𑐵𑐐𑐶 𑐠𑑂𑐰 𑐫𑐵𑐫𑐾 𑐖𑐶𑐄, 𑐰 𑐫𑐵𑐫𑐾 𑐖𑐶𑐄 𑑋 𑐰𑐶𑐔𑐵𑑅 𑐩𑐫𑐵𑐫𑐾𑐢𑐸𑑄𑐎𑐮 𑑋 𑐠𑑁𑑄 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐎𑐾 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐰𑐶𑐎𑑂𑐲𑐶𑐥𑑂𑐟 𑐰 𑐰𑐶𑐎𑐺𑐟𑐶 𑐂𑐩𑐶𑐐𑐸 𑐣𑐸𑐐𑐮𑐫𑑂 𑐴𑐬𑐑𑐜𑐷 𑐧𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐁𑐟𑑂𑐩 𑐰𑐶𑐣𑐵𑐱, 𑐎𑑂𑐲𑐫𑐫𑐵 𑐟𑑂𑐬𑐵𑐳, 𑐨𑐫 𑐏𑑅 𑑋

𑐠𑑁𑑄 𑐡𑐾𑐫𑑂𑐫𑐵 𑐬𑐵𑐖𑐣𑐷𑐟𑐶𑐎 𑐏𑑂𑐫𑐮𑐫𑑂 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 ‘𑐐𑐛𑐧𑐣𑑂𑐢𑐣’ 𑐡𑐮𑐟𑐫𑑂𑐳𑑄 𑐥𑐺𑐠𑐎𑐎𑐠𑑄 𑐩𑑂𑐰𑐵𑐫𑐾𑐐𑐸 𑐁𑐟𑑂𑐩 𑐰𑐶𑐱𑑂𑐰𑐵𑐳𑐫𑐵 𑐎𑐩𑐶𑑄 𑐥𑐮𑐵𑐫𑐣 𑐖𑐸𑐂𑐟 𑐡𑐫𑐾𑐎𑐹𑐐𑐸 𑐖𑐸𑐎𑑂𑐟𑐶 𑐖𑐎 𑐏𑑅 𑑋 𑐐𑐛𑐧𑐣𑑂𑐢𑐣 𑐣𑐶𑐬𑑂𑐩𑐵𑐞 𑐮𑐶𑐥𑐵 𑐠𑑅𑐐𑐸 𑐡𑐮𑐫𑐵 𑐳𑑂𑐰𑐵𑐳𑑂𑐠𑑂𑐫 𑐮𑐵𑐨 𑐖𑐹𑐐𑐸 𑐏𑑃𑐫𑐵𑐟 𑐳𑑄𑐎𑐾𑐟 𑐫𑐵𑐳𑐾 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵𑑄 𑐢𑐵𑐂, ‘𑐗𑐷𑐐𑐸 𑐡𑐮𑐫𑐵𑐟 𑐐𑐛𑐧𑐣𑑂𑐢𑐣𑑄 𑐟𑑅𑐢𑑄𑐐𑐸 𑐱𑐎𑑂𑐟𑐶 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐡𑐸 𑑋’ 𑐀𑐠𑐾 𑐴𑐾 𑐩𑐾𑐩𑑂𑐴 𑐣𑐾𑐟𑐵 𑐥𑑂𑐬𑐔𑐞𑑂𑐜𑑄 𑐢𑐵𑐂, ‘𑐐𑐛𑐧𑐣𑑂𑐢𑐣 𑐣𑐷𑐡𑑃 𑐟𑐎 𑐣𑑂𑐴𑑂𑐫𑐵𑐂, 𑐥𑐣𑐷𑐩𑑂𑐴 𑐳𑐸 ?’

𑐩𑐾𑐏𑐾𑐬 𑐥𑑂𑐬𑐟𑐶𑐥𑐎𑑂𑐲𑐷, 𑐥𑑂𑐬𑐟𑐶𑐡𑑂𑐰𑐣𑑂𑐡𑑂𑐰𑐷 𑐡𑐮 𑐊𑐩𑐵𑐮𑐾𑐫𑐵 𑐩𑐣𑑀𑐟𑐣𑐵𑐰 𑐐𑐛𑐧𑐣𑑂𑐢𑐣 𑐖𑐸𑐂 𑑋 𑐐𑐛𑐧𑐣𑑂𑐢𑐣 𑐊𑐩𑐵𑐮𑐾𑐫𑐵𑐟 𑐔𑐸𑐣𑑁𑐟𑐶 𑐖𑐸𑐂 𑑋 𑐨𑐫 𑐟𑑂𑐬𑐵𑐳𑑄 𑐊𑐩𑐵𑐮𑐾𑐫𑐵 𑐣𑑂𑐴𑑂𑐫𑑅 𑐳𑑂𑐫𑑄𑐎𑐵𑐧𑐷 𑑋 𑐣𑐸𑐐𑑅 𑐏𑐮𑐧𑐮 𑐫𑐵𑐣𑐵𑐧𑐷 𑑋 𑐀𑐫𑑂𑐣𑑄 𑐊𑐩𑐵𑐮𑐾𑐫𑐵 𑐣𑐾𑐟𑐵𑐖𑑂𑐫𑐹 𑐩𑐣𑑀𑐰𑐶𑐣𑐵𑐡𑐥𑐹𑐬𑑂𑐞 𑐏𑑃 𑐮𑑂𑐴𑐵𑐣𑐵𑑅 𑐠𑑅𑐐𑐸 𑐡𑐮𑐫𑐵 𑐨𑐫, 𑐟𑑂𑐬𑐵𑐳 𑐮𑑂𑐰𑑅𑐩𑑄𑐎𑐾𑐟 𑐳𑑂𑐰𑐂 𑑋 𑐩𑐣 𑐠𑐵𑐩𑐾 𑐫𑐵𑐂 𑑋 𑐣𑐸𑐐𑑅 𑐰𑐴𑐟 𑐫𑐵𑐂 𑑋 𑐐𑐛𑐧𑐣𑑂𑐢𑐣 𑐡𑐸𑐣𑐷 𑑋 𑐁𑐱𑐵 𑐫𑐵𑐣𑐵𑐔𑑂𑐰𑐣𑐷 𑑋

𑐡𑐮𑐷𑐫 𑐬𑐵𑐖𑐣𑐷𑐟𑐶𑐂 𑐡𑐮𑐟𑐫𑑂𑐳𑑄 𑐠𑑅𑐐𑐸 𑐀𑐳𑑂𑐟𑐶𑐟𑑂𑐰𑐫𑐵 𑐣𑐶𑐬𑑂𑐩𑐵𑐞, 𑐰𑐶𑐎𑐵𑐳, 𑐖𑐣𑐟𑐵𑐫𑐵 𑐰𑐶𑐱𑑂𑐰𑐵𑐳, 𑐥𑐾𑑂𑐬𑐩𑐥𑐵𑐏𑐾𑑄 𑐁𑐬𑑂𑐖𑐣 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋 𑐖𑐣𑐟𑐵 𑐡𑐣𑐮𑐫𑑂 𑐀𑐳𑑂𑐟𑐶𑐟𑑂𑐰𑐫𑐵 𑐖𑐐 𑐏𑑅 𑑋 𑐖𑐸𑐂𑐩𑐵𑑅 𑑋 𑐟𑐬 𑑋 𑐖𑐣𑐟𑐵𑐫𑐵𑐟 𑐢𑑂𑐫𑐵𑐎𑐸𑐣𑐫𑑂 𑐟𑐫𑐵𑑅 𑐡𑐮𑐫𑐵 𑐣𑐾𑐟𑐵𑐟𑐫𑑂𑐳𑑄 𑐦𑑀𑐴𑐬𑐷 𑐳𑑂𑐰𑐵𑐬𑑂𑐠𑐷 𑐬𑐵𑐖𑐣𑐷𑐟𑐶𑐫𑐵𑐟 𑐠𑑅𑐐𑐸 𑐎𑐬𑑂𑐩 𑐏𑑄𑐎𑐷 𑑋 𑐄𑐎𑐷 𑐴𑐾 𑐡𑐸𑐣𑐷 𑑋 𑐠𑐸𑐎𑐶𑐫𑐵 𑐥𑑂𑐬𑐩𑐵𑐞 𑐠𑑁𑑄 𑐡𑐾𑐱𑐫𑑂 𑐏𑐣𑐾 𑐡𑐸𑐐𑐸 𑐡𑐮𑐟𑐫𑑂 𑐳𑐷, 𑐩𑑂𑐰𑐵𑐫𑐾𑐐𑐸 𑐣𑑂𑐴𑑂𑐫𑐳𑑅 𑐖𑐸𑐫𑐵𑐧𑐷 𑑋

𑐐𑐸𑐐𑐸𑑄 𑐡𑐮𑐫𑐵𑐎𑐾 𑐣𑑄 𑐠𑑁𑑄 𑐖𑐣𑐟𑐵𑐫𑐵 𑐡𑐠𑐸𑐂 𑐰𑐣𑐾𑐐𑐸 𑐰𑐶𑐱𑐸𑐡𑑂𑐢 𑐁𑐟𑑂𑐩 𑐰𑐶𑐱𑑂𑐰𑐵𑐳 𑐩𑐡𑐸 𑑋 𑐠𑑂𑐰 𑐴𑐾 𑐁𑐟𑑂𑐩𑐰𑐶𑐱𑑂𑐰𑐵𑐳𑐫𑐵 𑐎𑐩𑐶𑑄 𑐫𑐵𑐣𑐵𑑅 𑐡𑐮𑐟𑐫𑑂𑐳𑑄 𑐳𑐶𑑃 𑐣𑑂𑐴𑐵𑐫𑑂 𑐕𑐸𑐣𑐵𑑅 𑐀𑐣𑐾𑐎 𑐕𑐮𑐕𑐵𑐩𑐫𑐵 𑐴𑐬𑑂𑐎𑐟 𑐎𑑂𑐫𑐣𑐵𑑅 𑐖𑐣𑐟𑐵𑐫𑐵 𑐣𑑂𑐴𑑂𑐫𑑅𑐣𑐾 𑐰𑐣𑐷 𑑋 𑐟𑐟𑑅𑐢𑑄𑐐𑐸 𑐰𑐵𑐔𑐵 𑐫𑐵𑐂 𑑋 𑐗𑐹𑐛𑐫𑐵 𑐏𑐾𑐟𑐷 𑐫𑐵𑐂 𑑋 𑐬𑐵𑐖𑐣𑐷𑐟𑐶𑐎 𑐩𑐣𑑀𑐔𑐶𑐎𑐶𑐟𑑂𑐳𑐎𑐟𑐫𑑂𑐳𑑄 𑐠𑑁𑑄𑐫𑐵 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂 𑐴𑐷𑐣𑐟𑐵𑐧𑑀𑐢𑐫𑐵𑐟 𑐄𑐮𑐵 𑐧𑐷 𑑋 𑐴𑐷𑐣 𑐩𑐵𑐣𑐳𑐶𑐎𑐟𑐵𑑄 𑐐𑑂𑐬𑐳𑑂𑐟 𑐡𑐮𑐟𑐳𑐾𑑄 𑐣𑑂𑐴𑑂𑐫𑐵𑐐𑐸𑑄 𑐫𑐵𑐫𑐾𑐦𑐸 𑑋 𑐖𑐣𑐟𑐵 𑐴𑑀𑐱𑐶𑐫𑐵𑐬 𑐖𑐸𑐂𑐩𑐵𑑅 𑑋 𑐬𑐵𑐖𑐣𑐷𑐟𑐶𑐎 𑐩𑐣𑑀𑐔𑐶𑐎𑐶𑐟𑑂𑐳𑐵𑐰𑐶𑐡𑐟𑐫𑑂𑐳𑑄 𑐢𑐵𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS